རྒྱ་གཞུང་གིས་གསར་འགོད་པ་ཏུང་ཡུས་ཡུས་ལ་ལོ་བདུན་གྱི་ཁྲིམས་ཐག་བཅད།

༄༅།། པེ་ཅིང་གི་མི་དམངས་འབྲིང་རིམ་ཁྲིམས་ཁང་གཉིས་པས་ཨ་རིའི་ཧར་ཝར་ཌི་སློབ་ཆེན་ཐོན་པའི་རྒྱ་ནག་གི་གསར་འགོད་པ་ཏུང་ཡུས་ཡུས་(Dong Yuyu)་ལ་གསང་ཉུལ་གྱི་ནག་ཉེས་བཙུགས་ནས་ལོ་བདུན་གྱི་བཙོན་འཇུག་གི་ཁྲིམས་ཐག་བཅད། ཕྱི་ཟླ་༡༡་པའི་ཚེས་༢༩་ཉིན་རོ་ཡེ་ཊར་སི་གསར་ཁང་གིས་གནས་ཚུལ་སྤེལ་བ་ལྟར་ན། ཏུང་ཡུས་ཡུས་ཀྱི་བཟའ་མི་ཚོས་ཁྲིམས་ཁང་གི་བཅད་ཁྲ་དེ་དྲང་སྙོམས་ཤིག་གཏན་ནས་མ་རེད་ཅེས་གསར་འགོད་པར་གླེང་མོལ་བྱས་འདུག ལོ་ན་༦༢་ལ་སོན་པའི་ཏུང་ཡུས་ཡུས་ནི་ཀོང་མཱིང་ཉིན་རེའི་ཚགས་པར་གྱི་རྩོམ་སྒྲིག་པ་ཟུར་པ་ཞིག་ཡིན་ཞིང་། ཨ་རིའི་རྒྱལ་ཡོངས་གསར་འགོད་པའི་མཐུན་ཚོགས་ཀྱིས་༢༠༢༢་ལོའི་ཕྱི་ཟླ་༢་པའི་ནང་ཏུང་ཡུས་ཡུས་དང་ཉི་ཧོང་གི་ཕྱི་འབྲེལ་མི་སྣ་ཞིག་གིས་ཉིན་གུང་གསོལ་ཚིགས་བཞེས་བཞིན་པའི་སྐབས་སུ་ཉེན་རྟོག་པས་བཀག་ཉར་བྱས་པ་རེད་ཅེས་བསྒྲགས།།

གསར་འགོད་པ་ཏུང་ཡུས་ཡུས་ཀྱི་བཟའ་མི་ཚོས་རོ་ཡེ་ཊར་སི་གསར་ཁང་གི་གསར་འགོད་པར་རྒྱ་ནག་གཞུང་ལ་དཔང་རྟགས་ཅི་ཡང་མེད་པར་ཏུང་ཡུས་ཡུས་ལ་ལོ་བདུན་གྱི་བཙོན་འཇུག་གི་ཁྲིམས་ཐག་བཅད་པ་ནི་ཁྲིམས་འཛིན་ལམ་ལུགས་དེ་རུལ་སུངས་སུ་གྱུར་ཡོད་པའི་རྟགས་མཚན་རེད། དེ་རིང་གི་ཁྲིམས་གཅོད་དེ་ཏུང་ཡུས་ཡུས་དང་ང་ཚོ་བཟའ་མི་ཚོར་དྲང་པོ་མ་བྱུང་བ་གཅིག་པུ་མིན། དེ་ནི་རྒྱ་ནག་གི་གསར་འགོད་པའི་བསམ་བློའི་རང་དབང་དང་འཛམ་གླིང་ཡོངས་ལ་མཛའ་མཐུན་གྱི་འབྲེལ་བ་འཛིན་འདོད་ཡོད་པའི་རྒྱ་ནག་མི་དམངས་ལ་དྲང་པོ་མ་བྱུང་བ་ཞིག་རེད་ཅེས་ཁྲིམས་ཁང་གི་ཐག་གཅོད་ལ་ངོ་རྒོལ་གྱི་རྣམ་འགྱུར་བསྟན།།

རྒྱ་ནག་གཞུང་གིས་གསར་འགོད་པ་ཏུང་ཡུས་ཡུས་ཀྱི་མཉམ་དུ་ཉིན་གུང་གི་གསོལ་ཚིགས་བཞེས་རོགས་ཕྱི་འབྲེལ་མི་སྣ་དེ་པེ་ཅིང་དུ་བཅའ་སྡོད་ཉི་ཧོང་གཞུང་ཚབ་ཁང་གི་གསང་བའི་སྒྲིག་འཛུགས་ཀྱི་སོ་པ་རེད་ཅེས་ནག་ཉེས་བཙུགས། ཏུང་ཡུས་ཡུས་ཀྱི་བཟའ་མི་ཚོས་རྒྱ་ནག་གི་སྤྱི་དམངས་ཚང་མར་ཁྲིམས་གཅོད་འདི་འདྲ་འཕོག་སྲིད། རྒྱ་ནག་གཞུང་གིས་པེ་ཅིང་དུ་བཅའ་སྡོད་ཕྱི་རྒྱལ་གྱི་གཞུང་ཚབ་ཁང་རྣམས་གསང་ཉུལ་གྱི་སྒྲིག་འཛུགས་ལ་ངོས་འཛིན་བྱས་ནས་ཉེས་འཛུགས་བྱེད་ཀྱི་ཡོད་པས་ཀུན་གྱིས་དོགས་ཟོན་བྱོས་ཞེས་གསལ་བསྒྲགས་སྤེལ། དེ་རིང་གཟའ་པ་སངས་ཉིན་རྒྱ་གཞུང་གི་ཉེན་རྟོག་པའི་རླངས་འཁོར་བདུན་གྱིས་རྒྱ་ལམ་བཀག་སྟེ་ཁྲིམས་ཁང་ཕྱི་ལོགས་སུ་མི་ཚོགས་འདུ་འཛོམ་བྱེད་དུ་མ་བཅུག ཨ་རིའི་གཞུང་ཚབ་ཁང་གི་ལས་སྣེ་ཚོ་ཡང་ཁྲིམས་ཁང་ལ་བཅར་དུ་མ་བཅུག་པར་བཀག

ཁ་སྔོན་ཕྱི་ཟླ་༩་པའི་ནང་ཨ་རིའི་རྒྱལ་ཡོངས་གསར་འགོད་པའི་མཐུན་ཚོགས་ཀྱིས་༢༠༢༣་ལོའི་ཕྱི་ཟླ་༧་པ་ནས་ཏུང་ཡུས་ཡུས་ལ་ཁྲིམས་བཤེར་བྱས་ནས་པེ་ཅིང་གི་བཙོན་ཁང་ཞིག་ཏུ་བཀག་ཉར་བྱས་པ་རེད། ཁོ་པར་ཁྲིམས་བཤེར་བྱས་པའི་སྐབས་སུ་བཟའ་མི་དང་གསར་འགོད་པ་སོགས་ཁྲིམས་ཁང་ལ་ཟུར་ཉན་བྱེད་དུ་ཡོང་མ་བཅུག་པར་སྒོ་རྒྱ་བསྡམས་པ་རེད་ཅེས་གསར་འགོད་གསལ་བསྒྲགས་སྤེལ། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་མའོ་ཉིན་(Mao Ning)་ནས་རྒྱ་ནག་གི་འབྲེལ་ཡོད་ལས་སྣེ་ཚོས་ཁྲིམས་ལུགས་གཞི་བཟུང་ལྟར་གྱོད་གཞི་དེར་ཐག་གཅོད་བྱས་ཡོད་ཅེས་གསར་འགོད་པའི་དྲི་བར་ལན་བཏབ། རྒྱ་ནག་གཞུང་གིས་གསང་ཉུལ་གྱི་ནག་ཉེས་བཙུགས་ནས་རྒྱལ་ནང་དང་ཕྱི་རྒྱལ་གྱི་གསར་འགོད་པ་ཚོ་འཛིན་བཟུང་བྱེད་ཀྱི་ཡོད་པར་མ་ཟད། ཕྱི་རྒྱལ་གྱི་ཚོང་པ་ཁག་ཅིག་ལའང་གསང་ཉུལ་གྱི་ནག་ཉེས་བཙུགས་ནས་བཙོན་དུ་འཇུག་གི་ཡོད་པ་ཡོངས་གྲགས་སུ་གྱུར།།

ཉི་ཧོང་གི་ཕྱི་སྲིད་བློན་ཆེན་ཏ་ཀེ་ཤི་ཨི་ཝ་ཡས་(Takeshi Iwaya)་རྒྱ་གཞུང་གིས་གསར་འགོད་པ་ཏུང་ཡུས་ཡུས་ལ་བཙོན་འཇུག་གི་ཁྲིམས་ཐག་བཅད་པར་ཐ་ཀར་གླེང་སློང་མ་བྱས་མོད། འོན་ཀྱང་ཁོང་གིས་ང་ཚོའི་གཞུང་ཚབ་ཁང་དང་དོན་གཅོད་ལས་ཁུངས་ཁག་གི་ལས་དོན་སྒྲུབ་ཕྱོགས་དེ་ཁྲིམས་མཐུན་ཡིན་ཞེས་གསལ་བཀྲོལ་བྱས་འདུག གསར་འགོད་པ་སྲུང་སྐྱོབ་མཐུན་ཚོགས་ཀྱི་ཨེ་ཤི་ཡའི་ཚན་པའི་ལས་འཆར་འགན་འཛིན་པེ་ལི་དབྱིས་(Beh Lih Yi)་རྒྱ་ནག་གི་དབང་འཛིན་པ་ཚོས་དྲང་སྙོམས་མིན་པའི་བཅད་ཁྲ་ཞིག་བསྒྲགས་ཡོད་པ་དེ་ཆོད་ལོག་གཏོང་དགོས།

རྒྱ་ནག་གི་གསར་འགོད་པ་ཚོར་རང་དབང་དང་བདེ་འཇགས་ངང་དུ་ཆེད་ལས་སྒྲུབ་ཆོག་པའི་ཐོབ་ཐང་ཡོད་པར་སྲུང་སྐྱོབ་བྱ་དགོས། ཏུང་ཡུས་ཡུས་དང་བཟའ་མི་ཚོ་ལྷན་འཛོམ་འབྱུང་དུ་འཇུག་དགོས་ཞེས་ནན་གྱིས་བསྐུལ། ཏུང་ཡུས་ཡུས་ནི་ཉི་ཧོང་གི་ཕྱི་འབྲེལ་མི་སྣ་ཚོ་ཁོ་ན་མིན་པར་རྟག་ཏུ་ཕྱི་རྒྱལ་གྱི་གཞུང་ཚབ་ཁག་དང་དོན་གཅོད་ལས་ཁུངས་ཁག་གི་ལས་སྣེ་ཚོར་ཐུག་འཕྲད་བྱས་པའི་གསར་འགོད་པ་ཞིག་རེད་ཅེས་བཀྲལ།།

༢༠༠༧་ལོར་གསར་འགོད་པ་ཏུང་ཡུས་ཡུས་ཀྱིས་ཨ་རིའི་ཧར་ཝར་ཌི་སློབ་ཆེན་དུ་སློབ་སྦྱོང་བྱས་པའི་རྗེས་སུ་ཉི་ཧོང་གི་ཀེ་འོ་སློབ་གྲྭ་ཆེན་མོའི་གདན་ཞུའི་མཁས་པ་དང་ཧོ་ཁ་ཡེ་དྷོ་སློབ་གྲྭ་ཆེན་མོའི་གདན་ཞུའི་སློབ་དཔོན་གྱི་ཆེད་ལས་བསྒྲུབས། ༡༩༨༧་ལོར་ཏུང་ཡུས་ཡུས་རྒྱ་ནག་གི་མཐོ་སློབ་རྩེ་ཕུད་པེ་ཅིང་སློབ་གྲྭ་ཆེན་མོ་ཐོན་ཏེ་ཀོང་མིང་ཉིན་རེའི་ཚགས་པར་ཁང་དུ་ཞུགས་ནས་དཔྱད་བརྗོད་ཚན་པའི་རྩོམ་སྒྲིག་པ་གཞོན་པའི་ལས་ཁུར་བཞེས། ཁོ་པས་ཁྲིམས་ལུགས་ལེགས་བཅོས་ནས་སྤྱི་ཚོགས་ཀྱི་གནད་དོན་ཁག དེ་བཞིན་རྒྱ་ནག་ལ་ཁྲིམས་ཀྱིས་སྐྱོང་བའི་ལམ་ལུགས་ཤིག་དར་སྤེལ་གཏོང་དགོས་ཞེས་བྲིས་པའི་དཔེ་དེབ་ཁག་ལ་ཞུ་དག་གི་རོགས་ཕན་བསྒྲུབས། ཏུང་ཡུས་ཡུས་ཀྱི་རྩོམ་ཡིག་ཁག་གིས་ཞིས་ཅིན་ཕིང་ལ་དངོས་སུ་སྐྱོན་བརྗོད་མ་བྱས་པར་རྒྱ་ནག་ལ་ལེགས་བཅོས་སྙོམས་པོ་ཞིག་གཏོང་དགོས་ཞེས་གོ་བརྡ་སྤྲད།།

ཐོག་མར་ཏུང་ཡུས་ཡུས་བཀག་ཉར་བྱས་ཀྱང་བཟའ་མི་ཚོས་གནས་ཚུལ་དེ་གསང་བ་བྱས་ནས་ཕྱི་རུ་མ་བསྒྲགས་པར་བསྡད། ཁོ་ཚོས་ཏུང་ཡུས་ཡུས་ཀྱི་ཉེས་ཆད་རྣམས་ཡང་དུ་གཏོང་བའམ། ཡང་ན་ནག་ཉེས་མ་བཙུགས་པར་གློད་གྲོལ་འཐོབ་རྒྱུའི་རེ་ལྟོས་བཅངས། ན་ནིང་ཕྱི་ཟླ་༣་ནང་རྒྱ་ནག་གཞུང་གིས་ཏུང་ཡུས་ཡུས་ལ་ཁྲིམས་བཤེར་བྱ་རྒྱུ་ཡིན་ཞེས་བཟའ་མི་ཚོར་བརྡ་བརྒྱབ། དེ་ནས་གསར་འགོད་པ་༧༠༠་ལྷག་དང་གསར་འགོད་རང་དབང་དར་སྤེལ་གཏོང་བའི་གཞུང་འབྲེལ་མ་ཡིན་པའི་སྒྲིག་འཛུགས་ཁག་གིས་རྒྱ་ནག་གཞུང་ལ་ཏུང་ཡུས་ཡུས་གློད་གྲོལ་གཏོང་དགོས་ཞེས་སྙན་ཞུ་ཕུལ། ཧར་ཝར་ཌི་སློབ་ཆེན་གྱི་ནེ་ཡེ་མན་གསར་འགོད་ལས་རིགས་ཐེབས་རྩ་ཁང་གི་འགན་འཛིན་ལི་པིན་སི་ཀིས་(Ann Marie Lipinski)་ཏུང་ཡུས་ཡུས་ནི་རྣམ་དཔྱོད་ལྡན་པའི་གསར་འགོད་པ་ཞིག་ཡིན། ཁོང་གིས་བརྩམས་པའི་དཔེ་དེབ་ཁག་ལ་ལས་རོགས་ཚོས་བརྩི་མཐོང་ཆེན་པོ་བྱེད་ཀྱི་ཡོད། ང་ཚོ་ཏུང་ཡུས་ཡུས་ཀྱི་རྒྱབ་རྩར་ལངས་ཡོད། ཁོ་པ་མྱུར་དུ་གློད་གྲོལ་བཏང་སྟེ་བཟའ་མི་ལྷན་འཛོམ་འབྱུང་དུ་འཇུག་དགོས་ཞེས་འབོད་སྐུལ་ཞུས་འདུག