༄༅།། ནང་སོག་གི་ཤར་ཕྱོགས་ཀྱི་འབྲོག་པ་ཁག་ཅིག་གིས་ཛ་རཱུ་ད་བྷན་ནེར་ཞེས་པའི་ས་གནས་སུ་རྒྱ་ལམ་བཀག་སྟེ་ས་གནས་སྲིད་གཞུང་གིས་འབྲོག་པའི་རྩྭ་ས་འཕྲོག་གི་ཡོད་པར་ངོ་རྒོལ་བྱས་པའི་གནས་ཚུལ་ཐོན་འདུག ཕྱི་ཟླ་༦་པའི་ཚེས་༡༥་ཉིན་ཨ་རིའི་ནེའུ་ཡོག་གྲོང་ཁྱེར་དུ་ཡོད་པའི་ལྷོ་སོག་འགྲོ་བ་མིའི་ཐོབ་ཐང་དང་ཆ་འཕྲིན་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། ཟླ་བ་འདིའི་ཚེས་༡༢་ཉིན་ནང་སོག་གི་འབྲོག་པ་ཚོས་རང་གི་རྩྭ་སར་སྲུང་སྐྱོབ་དང་རྒྱ་གཞུང་གིས་གླས་པས་ས་འབྲུ་འཁོར་ལོའི་ཁ་ལོ་བ་རུས་མིང་ལུ་ཞེས་པ་ཞིག་གིས་འབྲོག་པ་ཚོའི་སྟེང་དུ་ས་འབྲུ་འཁོར་ལོ་བཏང་སྟེ་ཉུང་མཐའ་ཡང་མི་༢་ལ་རྨས་སྐྱོན་ཕོག་པའི་གནས་ཚུལ་ཐོན། མི་མང་ངོ་རྒོལ་བ་ཚོས་ཛ་རཱུ་ད་བྷན་ནེར་རྫོང་གི་འགོ་ཁྲིད་ཚོས་མི་མང་དང་འབྲོག་པ་ཚོར་ཆོག་མཆན་མ་ཞུར་པར་ཨར་ཧན་དེ་ལཱན་ཕྱུགས་ཟོག་འཚོ་སྐྱོང་ས་ཁུལ་གྱི་རྩྭ་ས་རྒྱ་ཆེན་པོ་ཞིག་རྒྱ་མི་ཚོང་པ་ཞིག་ལ་བཙོངས་པ་རེད་ཅེས་སྐྱོན་བཙུགས།།
ས་གནས་མི་མང་གིས་བཀྲམ་པའི་གསལ་བསྒྲགས་ཤིག་ཏུ་ང་ཚོར་གྲོས་སྡུར་མ་བྱས་པ་དང་ཆོག་མཆན་སོགས་ཅི་ཡང་མ་ཞུས་པར་ས་གནས་ཀྱི་འགོ་ཁྲིད་ཚོས་རྩྭ་ས་ཧ་ཅང་ཆེན་པོ་ཞིག་རྒྱ་མི་ཚོང་པ་ཞིག་ལ་རྒྱ་སྒོར་ས་ཡ་༢་བྱས་ནས་བཙོངས་སོང་། ད་ལྟ་རྒྱ་མི་ཚོང་པ་དེས་ས་གནས་མི་མང་གི་ངོ་རྒོལ་དང་དགག་བྱ་སོགས་ལ་བརྩི་མེད་བཏང་སྟེ་ས་གནས་གཞན་ནས་ར་དང་ལུག བ་ཕྱུགས་སོགས་ཕྱུགས་ཟོག་སྟོང་ཕྲག་མང་པོ་དེད་ཡོང་ནས་ང་ཚོའི་རྩྭ་སའི་ཐོག་ཏུ་འཚོ་སྐྱོང་བྱེད་ཀྱི་འདུག འདི་ནི་ས་གནས་གཞུང་གི་འགོ་ཁྲིད་ཚོའི་མིག་མདུན་དུ་འབྱུང་གི་ཡོད་མོད། འོན་ཀྱང་ཁོ་ཚོས་གདུག་རྩུབ་ཅན་གྱི་རྒྱ་མི་བཙན་འཛུལ་བ་དེར་ཁ་མཐུན་དང་ངན་འབྲེལ་བྱས་ནས་འབྲོག་པའི་བདེ་སྡུག་ལ་སྣང་མེད་གཏོང་གི་འདུག སོག་པོ་ཚོའི་ཚེ་སྲོག་ལ་རིན་ཐང་མེད་པར་གྱུར་འདུག་ཅེས་སྐད་འཕྲིན་ཚོགས་པ་ཁག་གི་ནང་དུ་འཁང་ར་བཤད་པའི་གནས་ཚུལ་ཐོན།།
ཛ་རཱུ་ད་བྷན་ནེར་སྤྱི་བདེ་ལས་ཁུངས་ཀྱིས་རྩྭ་ས་རྩོད་གླེང་གི་ངོ་རྒོལ་བྱུང་བ་ངེས་གཏན་བྱས་ཀྱང་གནད་དོན་དེ་ཆེན་པོ་ཞིག་རེད། དེ་ནི་ནང་སོག་གི་འབྲོག་པ་ཞིག་དང་ས་འདྲུད་འཁོར་ལོའི་ཁ་ལོ་བ་ལུ། རྩིས་པ་བུད་མེད་ལུ་གསུམ་རྩོད་པ་ཐུག་སྟེ་འབྲོག་པ་ཝུ་ལ་རྨས་སྐྱོན་ཅུང་ཙམ་ཕོག་རེད་ཅེས་གནད་དོན་དུ་ཆུང་དུ་བཏང་ནས་འགྲེལ་བཤད་མཁས་པོ་ཞིག་བརྒྱབ། ཕྱི་ཉིན་དེར་ནང་སོག་གི་ཤར་ཕྱོགས་ཀྱི་ཨེ་ཝེན་ཀ་བྷན་ནེར་ས་གནས་སུའང་རྩྭ་ས་རྩོད་གླེང་གི་འཁྲུག་རྩོད་བྱུང་། སོག་པའི་འབྲོག་པ་ཞིག་གིས་རང་གི་རྩྭ་ས་བསྲུངས། རྒྱ་མི་ས་ཆ་འཕྲོག་མཁན་ཞིག་གིས་སོག་པོ་རྩྭ་ས་སྲུང་མཁན་དེར་རླངས་འཁོར་གྱི་གདོང་ཁ་བརྒྱབ། སྐབས་དེར་སོག་པོའི་འབྲོག་པ་དེ་དྲན་པ་འཐོར་བ་ཀུན་གྱིས་མཐོང་ཡང་ཕྱིས་སུ་མི་དེ་དྲག་སྐྱེད་བྱུང་ཡོད་མེད་ཀྱི་གནས་ཚུལ་ཅི་ཡང་ཤེས་རྟོགས་མ་ཐུབ། ནང་སོག་གི་འབྲོག་པ་ཞིག་གིས་ཉིན་གཉིས་བསྟུད་མར་རྒྱ་ནག་པ་ས་ཆ་འཕྲོག་མཁན་ཚོས་སོག་པ་ཚོར་རྡུང་རྡེག་བཏང་སོང་། ད་ནས་ང་ཚོའི་ས་ཆ་དང་རྩྭ་ས་ནི་ལྟ་ཞོག ཐ་ན་སོག་པོ་ཚོས་རང་གི་སྲོག་མགོ་ཡང་ཐོན་ཐུབ་ས་མ་རེད་ཅེས་སྐད་འཕྲིན་ཚོགས་པའི་ནང་དུ་སྡུག་སྐད་བརྒྱབ་པའི་གནས་ཚུལ་ཐོན་འདུག
ལྷོ་སོག་འགྲོ་བ་མིའི་ཐོབ་ཐང་དང་ཆ་འཕྲིན་ལྟེ་གནས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། སོག་པོ་ཞིག་གིས་སྐད་འཕྲིན་ནང་དུ་ང་ཚོས་འདི་ལྟར་མྱོང་དགོས་པ་ནི་རྒྱ་ནག་གི་མི་སེར་སྤེལ་ཡུལ་དུ་གྱུར་པའི་ཉེར་ལེན་རེད་ཅེས་སྨྲས། མི་གཞན་པ་དེས་རེད། ཡིན་ནའང་ཐམས་ཅད་རྟག་པ་མ་རེད། མི་སེར་སྤེལ་བའི་སྲིད་གཞུང་གི་ཚེ་ཐག་ནི་ཐུང་ཐུང་ཡིན་པ་དང་ང་ཚོ་སོག་པོ་ཚོ་ངང་རྒྱུན་རིང་དགོས། ང་ཚོས་སྡུག་རུས་བྱས་ནས་རེ་བ་བཟང་ས་ཞིག་ལ་རྒྱག་དགོས་ཞེས་ལན་བཏབ། སྐད་འཕྲིན་ཚོགས་པའི་ཚོགས་མི་གཞན་ཞིག་གིས་ང་ཚོ་ལའང་ཕྱི་སོག་ལྟར་སོ་སོའི་རང་བཙན་རྒྱལ་ཁབ་ཅིག་ཡོད་ན་གདུག་རྩུབ་འདིའི་རིགས་ནམ་ཡང་མྱོང་མི་དགོས། གལ་ཏེ་མྱོང་དགོས་བྱུང་ཡང་ཉེས་ཅན་རྣམས་འཕྲལ་དུ་ཁྲིམས་ལ་སྦྱོར་ཐུབ་ཅེས་བཤད། སོག་པོ་གཞན་ཞིག་གིས་མི་གྲུ་བཞི་དེ་ཚོ་(རྒྱ་མི་གཞིས་ཆགས་པ)་ལས་དྲག་རྩུབ་ཅན་དང་གདུག་རྩུབ་ཆེ་བ་ནི་འགྲོ་བ་མིའི་ལོ་རྒྱུས་སུ་བྱུང་མྱོང་ཡོད་རྒྱུ་མ་རེད། ཁོ་ཚོས་ང་ཅག་གི་ཐོབ་ཐང་ཡོད་ཚད་ཕྲོགས། ས་སྟེང་ས་འོག་གི་རང་བྱུང་ཐོན་སྐྱེད་རྣམས་གཏོར་བཅོམ། ད་ལྟ་ཁོ་ཚོས་ང་ཚོའི་ས་ཆ་དང་ཚེ་སྲོག་འཕྲོག་གི་ཡོད་པ་རེད་ཟེར།།
ལྷོ་སོག་གི་སྐད་འཕྲིན་ཚོགས་པ་དེའི་ནང་དུ་མུ་མཐུད་ནས་བཤད་པ་ལྟར་ན། སོག་པོ་ཞིག་གིས་ང་ཚོའི་ས་ཆ་འཕྲོག་གི་ཡོད་པ་དང་ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པར་ཁྱད་པར་ཅི་ཡང་མི་འདུག ཁོ་ཚོ་ངོ་བོ་གཅིག་པ་རེད། སྟོབས་ཤུགས་ཆེ་བ་དེས་གཉོམ་ཆུང་དེ་བྲན་དུ་བཀོལ་རྒྱུ་ཁོ་ན་རེད་ཅེས་བསྡིགས། སོག་པོ་ཚོ་རྒྱ་ནག་གི་བྲན་གཡོག་ཏུ་གྱུར་ཡོད་མེད་ཐད་སྐད་འཕྲིན་ཚོགས་པ་ཁག་གི་ནང་དུ་བགྲོ་གླེང་མང་དུ་བྱུང་ཞིང་། ལྷོ་སོག་འགྲོ་བ་མིའི་ཐོབ་ཐང་དང་ཆ་འཕྲིན་ལྟེ་གནས་ཁང་གིས་དཔེ་མཚོན་ཁག་ཅིག་ཟུར་དུ་བཀོད། སོག་པ་ཚོས་ང་ཚོ་རྒྱ་ནག་གི་བྲན་གཡོག་ཏུ་གྱུར་ཡོད་པ་ཁས་ལེན་དགོས། འདི་ནི་དོན་དངོས་དང་ང་ཚོའི་གནས་བབ་རེད་ཟེར། མི་གཞན་ཞིག་གིས་ང་དེར་འཐད་པ་མེད། ང་ཚོ་བྲན་གཡོག་མིན། ང་ཚོ་ནི་དཔའ་མཛངས་ཅན་གྱི་སོག་པོ་རེད། ང་ཚོས་རང་གིས་རང་ལ་བྲན་གཡོག་ཅེས་མིང་བཏགས་ནས་ང་ཚོའི་གནས་སྟངས་ཡར་རྒྱས་གཏོང་མི་ཐུབ། ང་ཚོའི་གནས་སྟངས་ནི་བོད་དང་ཞིན་ཅང་ལས་ཐབས་རྡུགས་མེད་ཀྱང་ཡག་ག་ཞིག་ཡིན་མི་སྲིད། ང་ཚོའི་ས་ཆ་ཕྲོགས་པ་ནི་གོ་རིམ་ལྡན་པའི་འཆར་གཞི་ཆེན་པོ་ཞིག་གི་གྲུབ་ཆ་རེད། ད་ལྟ་ལྷོ་སོག་གི་སྐད་ཡིག་དང་རིག་གཞུང་རྒྱ་ནག་གིས་རྩ་མེད་བཏང་ཚར་བ་རེད་ཅེས་བསྟན།།
རྒྱ་ནག་གཞུང་གིས་ནང་སོག་ལ་འཛིན་པའི་སྲིད་ཇུས་གདུག་རྩུབ་ཆེ་རུ་བཏང་སྟེ་༢༠༡༡་ནས་ནང་སོག་གི་ས་གནས་ཁག་ཏུ་རྒྱ་ནག་གི་དབང་བསྒྱུར་ལ་ངོ་རྒོལ་ཆེན་པོ་ཐེངས་འགའ་ཞིག་བྱུང་། ལོ་དེའི་ཕྱི་ཟླ་༥་པའི་ནང་སོག་པའི་འབྲོག་པ་མེར་གེན་ཞེས་པ་ཞིག་རྒྱ་མི་དོས་སྐྱེལ་རླངས་འཁོར་ཁ་ལོ་བ་ཞིག་གིས་དམར་གསོད་བྱས་པའི་རྗེས་སུ་ངོ་རྒོལ་ལངས། རྒྱ་གཞུང་གིས་ནང་སོག་ལ་དེ་མ་ཐག་ཏུ་དྲག་གནོན་བྱས་ནས་ངོ་རྒོལ་ལས་འགུལ་དེ་མགོ་མནན། ༢༠༢༠་ལོར་རྒྱ་ནག་གཞུང་གིས་ཤེས་ཡོན་སློབ་གསོའི་སྲིད་ཇུས་གསར་པ་ཞིག་གཏན་ལ་ཕབ། ནང་སོག་ཏུ་སློབ་ཚན་ཐམས་ཅད་རྒྱ་ཡིག་ཏུ་འཁྲིད་དགོས། སོག་པ་ཚོར་སྐད་ཡིག་གཅིག་པུ་སོག་སྐད་དུ་འཁྲིད་དགོས་ཞེས་ཐག་བཅད། དེར་བརྟེན་སོག་པོ་ཚོས་རྒྱ་གཞུང་གི་སྲིད་ཇུས་དེའི་དམིགས་ཡུལ་ནི་མི་རིགས་གཙང་སེལ་དང་སོག་པོ་རྣམས་རྩ་མེད་གཏོང་རྒྱུའི་ཐབས་ཇུས་ཤིག་རེད་ཅེས་ངོ་རྒོལ་བྱས་ནས་ཕྲུ་གུ་ཚོ་ཟླ་བ་མང་པོར་སློབ་གྲྭར་མ་བཏང་བར་ཁྱིམ་དུ་བཞག ༢༠༢༠་ལོའི་ངོ་རྒོལ་ལ་འབྲེལ་བ་ཡོད་པའི་མི་༨༠༠༠་ནས་༡༠༠༠༠་ཡས་མས་ཤིག་འཛིན་བཟུང་དང་བཙོན་འཇུག བཀག་ཉར་དང་རང་ཁྱིམ་དུ་བཟང་བཙོན་ལ་བཅུག་པ་སོགས་ཀྱི་གནས་ཚུལ་ཐོན་འདུག
ཕྱི་ཟླ་༦་པའི་ཚེས་༡༦་ཉིན་ཨེ་ཤི་ཡ་རང་དབང་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་ནང་སོག་ཏུ་རྩྭ་ས་རྩོད་གླེང་བྱུང་སྟེ་ས་འབྲུ་འཕྲུལ་འཁོར་ཕོག་པའི་སོག་པོ་འབྲོག་པ་དེ་སྨན་ཁང་དུ་བསྐྱལ་འདུག ས་གནས་དེའི་འགོ་ཁྲིད་ཚོས་མི་མང་གི་ཐུན་མོང་རྩྭ་ས་བཙོངས་པ་རེད། ཊོས་ཊར་དྲྭ་ལམ་དུ་བརྙན་ཐུང་ཞིག་ཁྱབ་ཡོད་པ་དེའི་ནང་དུ་ས་འབྲུ་འཁོར་ལོས་སོག་པོ་འབྲོག་པ་ཚོ་ཁ་གཏོར་གཏོང་གི་ཡོད་པ་མཐོང་ཐུབ། ཉེ་དུས་ཤིག་ནས་རྒྱ་ནག་པ་རྣམས་ནང་སོག་ཏུ་གནས་སྤོར་དང་ས་གནས་འགོ་ཁྲིད་ཚོས་མི་མང་གི་ས་ཆ་འཕྲོག་གི་ཡོད་པའི་གནས་ཚུལ་འབྱུང་རྒྱུ་ཇེ་མང་རེད། ནང་སོག་གི་རྩྭ་ཐང་རྣམས་བཟོ་ལས་ས་ཁུལ་དང་གྲོང་ཁྱེར་དུ་བསྒྱུར་ཏེ་རྩྭ་ཐང་རྣམས་བྱེ་ཐང་དུ་གྱུར་ནས་སྐྱེ་ཁམས་ལ་གནོད་སྐྱོན་ཆེན་པོ་འཕོག་གི་འདུག དྲྭ་ལམ་དུ་ཁྱབ་པའི་བརྙན་ཐུང་གཞན་ཞིག་གི་ནང་དུ་རྒྱ་མི་དེས་ནང་སོག་གི་འབྲོག་པ་ཚོའི་འཕྲུལ་རྟ་བཅག་གཅོག་བྱས་ཡོད་པའང་གསལ་པོར་མཐོང་ཐུབ་ཅེས་གནས་ཚུལ་སྤེལ། ༢༠༡༦་ལོར་ཨར་ཧུན་དེ་ལཱན་ས་ཁུལ་གྱི་འབྲོག་པ་ཚོས་རང་གི་རྩྭ་སའི་འཁྲིས་སུ་ཧ་ཡང་བཟོ་གྲྭ་ཚུགས་ཏེ་མི་ལ་སྐྲན་ནད་ཕོག ཕྱུགས་ཟོག་གིས་བཟོ་གྲྭའི་དུག་ཆུང་འཐུངས་ནས་ཤི་བའི་རོ་རྣམས་སྤུངས་ཏེ་ངོ་རྒོལ་བྱས་པའི་གནས་ཚུལ་ཐོན་འདུག
དེང་སྐབས་ནང་སོག་ལ་མི་འབོར་ས་ཡ་༢༣་ཡོད་པ་དེའི་ཁོངས་སུ་སོག་པོ་བརྒྱ་ཆ་༢༠་ལས་མེད་ཅིང་། ནང་སོག་ལ་རྟག་ཏུ་རང་བྱུང་ཁོར་ཡུག་ཉམས་ཆག་དང་འཛུགས་སྐྲུན་དོ་མཉམ་མེད་པ། སོག་པོ་ཚོར་ལས་ཀ་དང་ཤེས་ཡོན་སློབ་སྦྱོང་གི་གོ་སྐབས་ཆུང་བ། རྒྱ་གཞུང་གི་ས་གནས་འགོ་ཁྲིད་ཚོས་སོག་པོ་ཚོའི་ཁེ་ཕན་སྲུང་སྐྱོབ་བྱ་རྒྱུའི་ཚབ་ཏུ་གཞུང་གཉེར་གཏེར་བརྐོ་ལས་གྲྭ་ཁག་དང་ཤིང་གཅོད་བཟོ་གྲྭ་ཁག་ལ་རྒྱབ་སྐྱོར། སོག་པོ་ཚོས་རང་གི་ཐོབ་ཐང་རྩོད་པའམ། ཡང་ན་སོག་པོའི་བདེ་སྡུག་གླེང་ན་རྒྱ་གཞུང་གིས་སུན་གཙེར་དང་རྡུང་རྡེག བཀག་ཉར་དང་བཙོན་འཇུག་བྱེད་ཀྱི་ཡོད་པའི་གནས་ཚུལ་ཐོན། ཨེ་ཤི་ཡ་རང་དབང་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་བདུན་ཕྲག་སྔོན་མའི་གཟའ་མིག་དམར་དང་ལྷག་པ་གཉིས་ཀར་ཁ་པར་བཏང་ནས་འདྲི་རྩད་བྱས་ཀྱང་ལན་འདེབས་མ་བྱུང་། མི་ཞིག་གིས་ཁ་པར་བླངས་ཀྱང་གནས་ཚུལ་དེའི་སྐོར་ཅི་ཡང་མི་ཤེས། ཁྱེད་ཚོས་དྲིལ་བསྒྲགས་ལས་ཁུངས་ལ་སྐད་ཆ་དྲིས་ཟེར། གསར་འགོད་པས་རྨས་སྐྱོན་ཕོག་པའི་མི་དེ་དྲག་སྐྱེད་བྱུང་ཡོད་མེད་དྲིས་པའི་དུས་སུ་ཁ་པར་བཞག་ནས་ལན་འདེབས་བྱས་མེད་པའི་གནས་ཚུལ་ཐོན་འདུག
