རྒྱ་ནག་གི་མི་སྣ་གྲགས་ཅན་སོགས་ཐེ་ལན་དུ་བསྐྱོད་རྒྱུར་ཟོན་བྱ་དགོས་པར་གྱུར།

༄༅།། ཉེ་ཆར་རྒྱ་ནག་གི་གློག་བརྙན་འཁྲབ་མཁན་ཝང་ཞཱིང་ལྷོ་ཤར་ཨེ་ཤི་ཡའི་རྒྱལ་ཁབ་ཐེ་ལན་དུ་བསྐྱོད། ཁོ་པ་གཡོ་ཁྲམ་ཚོགས་པ་ཞིག་གིས་གནམ་ཐང་ནས་འབར་མའི་ས་མཚམས་སུ་ཆགས་པའི་མཱི་ཡ་ཝ་ཌི་གྲོང་རྡལ་དུ་བཙན་ཁྲིད་བྱས་ཏེ་དྲྭ་ལམ་གཡོ་ཁྲམ་གྱི་ལས་སུ་འཇུག་རྒྱུའི་གྲབས་བཤམས། ཕྱི་ཟླ་དང་པོའི་ཚེས་༡༥་ཉིན་ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཟླ་བ་འདིའི་ཕྱི་ཚེས་༣་ཉིན་རྒྱ་ནག་གི་གློག་བརྙན་འཁྲབ་མཁན་དེ་ཐེ་ལན་བྱང་ཕྱོགས་ཀྱི་མེ་སོ་ཏ་(Mae Sot)་ས་གནས་སུ་གར་སོང་ཆ་མེད་དུ་གྱུར། དྲྭ་ལམ་གྱི་གཡོ་ཁྲམ་ཚོགས་པ་དེས་ལོ་ན་༣༡་ལ་སོན་པའི་ཝང་ཞཱིང་གི་སྐྲ་བཞར་ཏེ་མགོ་རིལ་དུ་བསྒྱུར། ཁོ་པར་ཁ་པར་ནང་ནས་མི་ལ་མགོ་སྐོར་བཏང་སྟེ་དངུལ་སྒོར་གཡོ་ལེན་ཇི་ལྟར་བྱ་དགོས་མིན་གྱི་སྦྱོང་བརྡར་སྤྲད། ཉི་མ་གསུམ་གྱི་རྗེས་སུ་ཐེ་ལན་གྱི་ཉེན་རྟོག་པས་ཝང་ཞཱིང་སྐྱོབ་ཐུབ་ཡོད་ཀྱང་གཡོ་ཁྲམ་ལྟེ་གནས་དེར་འཇིགས་སྐྲག་ཆེན་པོ་མྱངས།།

ཐེ་ལན་ནི་རྒྱ་ནག་པ་ཚོ་ཡུལ་སྐོར་སྤྲོ་འཆམ་དུ་བསྐྱོད་ཡུལ་གཙོ་བོ་ཞིག་ཡིན་ཞིང་། ལྷག་པར་དུ་ཟླ་མཇུག་འདིར་རྒྱ་ནག་གི་ལོ་སར་ཁེལ་གྱི་ཡོད་པས་རྒྱ་ནག་པ་སྟོང་ཕྲག་མང་པོ་ཐེ་ལན་དུ་ཡུལ་སྐོར་སྤྲོ་འཆམ་ལ་བསྐྱོད་འཆར་ཡོད་ཅིང་། ཝང་ཞཱིང་བཙན་ཁྲིད་བྱུང་བའི་རྗེས་སུ་རྒྱ་ནག་དང་ཧོང་ཀོང་གི་གཞས་པ་གཞས་མ་དང་མི་སྣ་གྲགས་ཅན། ཡུལ་སྐོར་སྤྲོ་འཆམ་པ་ཚོ་ལྷོ་ཤར་ཨེ་ཤི་ཡའི་གཡོ་ཁྲམ་ཚོགས་པ་ཁག་གིས་བཙན་ཁྲིད་བྱེད་སྲིད་པར་སྐྲག་སྟེ་ཐེ་ལན་དུ་བསྐྱོད་རྒྱུ་ཕྱིར་འཐེན་བྱས་འདུག རྒྱ་ནག་པ་དང་ཧོང་ཀོང་བ་ཚོས་གནམ་གྲུ་སྡེབ་གླས་བྱས་ཡོད་པ་དང་མགྲོན་ཁང་མངགས་ཡོད་པ་རྣམས་བསློགས། རྒྱ་ནག་གི་མི་སྣ་གྲགས་ཅན་ཚོས་ཐེ་ལན་དུ་འཁྲབ་སྟོན་བཀོད་སྒྲིག་བྱས་ཡོད་པ་རྣམས་ཀྱང་ཕྱིར་འཐེན་བྱས་ནས་ཐེ་ལན་གཞུང་དཀའ་ངལ་གསར་པ་ཞིག་ཕྲད། ཐེ་ལན་གྱི་ཡུལ་སྐོར་སྤྲོ་འཆམ་ལས་ཁུངས་ཀྱིས་རྒྱ་ནག་པ་ཚོར་ཉེན་ཁ་མེད། རྒྱལ་སྤྱིའི་འགྲུལ་པ་རྣམས་ཐེ་ལན་དུ་ཡོང་ན་བདེ་འཇགས་ཡིན་ཞེས་བསྒྲགས།།

དེང་སྐབས་གཡོ་ཁྲམ་ལྟེ་གནས་ཁང་ཞེས་འབོད་པ་དེ་དག་གིས་ཁ་པར་དང་སྐད་འཕྲིན། ཝ་ཚིབ་དང་དར་འཕྲིན་སོགག་ཀྱི་ནང་དུ་ཕོ་གསར་རྫིག་པོ་དང་མོ་གསར་མཛེས་མའི་མགོ་པར་རྣམས་བཞག གཡོ་ཁྲམ་པ་ཚོས་མི་ལ་ཁ་པར་ནང་དུ་འཕྲིན་ཐུང་བསྐུར་ནས་འབྲེལ་བ་བཙུགས། ཁོ་ཚོས་སྐད་ཆ་སྙན་པོ་བཤད་པ་དང་རླངས་འཁོར་གོང་ཆེན། རྒྱས་སྤྲོས་ཀྱི་འདྲ་པར་རྣམས་བསྟན། རིམ་བཞིན་དྲྭ་ལམ་གྱི་དགའ་རོགས་སུ་གྱུར་ནས་ཕ་རོལ་པོ་འཁྲུལ་དུ་བཅུག མཐར་དྲྭ་དངུལ་ཊམ་ཀའི་(Cryptocurrency)་ཚོང་བརྒྱབ་ན་ཁེ་སང་འདུག་ཅེས་བསླབས། ད་དུང་དྲྭ་དངུལ་ཊམ་ཀ་ཉོ་སའི་འབྲེལ་ཐག་བསྐུར་ནས་མགོ་སྐོར་གཏོང་ཡུལ་དེར་ཁེ་སང་ཅུང་ཙམ་ཐོབ་ཏུ་བཅུག མི་དེ་ཧེབ་ལངས་ནས་མ་རྩ་ཆེན་པོ་བཙུགས་པའི་རྗེས་སུ་དངུལ་སྒོར་རྣམས་གཡོ་ཁྲམ་པའི་ལག་ཏུ་ཤོར། གཡོ་ཁྲམ་པ་ཚོས་དམིགས་འབེན་དུ་འཛིན་ས་གཙོ་བོ་ནི་རྒན་རྒོན་ཡུགས་ཕོ་ཡུགས་མོ་དང་བཟའ་ཚང་ཐོར་བའི་ཕོ་ཧྲེང་མོ་ཧྲེང་ཚོ་རེད་ཡིན་པའི་གནས་ཚུལ་ཐོན་འདུག

ཕྱི་ཟླ་དང་པོའི་ཚེས་༡༤་ཉིན་ཨ་རིའི་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་གློག་བརྙན་འཁྲབ་མཁན་ཝང་ཞཱིང་ལ་སྐད་འཕྲིན་ནང་དུ་ཐེ་ལན་དུ་གློག་བརྙན་གསར་པ་ཞིག་འཁྲབ་ཀྱི་ཡོད་པས་དེ་ལ་ཚོད་ལྟ་བྱེད་དུ་ཤོག་ཅེས་མགྲོན་ཤོག་འབྱོར། ཁོ་པ་ཧྲང་ཧེ་ནས་བྷན་ཁོག་ཏུ་བསྐྱོད་པ་དང་ཐེ་ལན་བྱང་ཕྱོགས་ཀྱི་འབར་མའི་ས་ཐོག་ཏུ་བཙན་ཁྲིད་བྱུང་། ཝང་ཞཱིང་གི་ཕ་མ་སྤུན་མཆེད་དང་གྲོགས་མོ། རྒྱ་ནག་གི་དྲྭ་དམངས་ཚོས་སྐད་བརྒྱབ་པའི་རྐྱེན་གྱིས་ཐེ་ལན་གཞུང་གིས་བསྐྱབས། ཝང་ཞཱིང་གིས་གསར་འགོད་པ་ཚོར་གཡོ་ཁྲམ་ལྟེ་གནས་དེར་རྒྱ་ནག་པ་༥༠་ཙམ་ཡོད་པ་དངོས་སུ་མཐོང་བྱུང་ཞེས་བཤད། ཐེ་ལན་གཞུང་གིས་ཝང་ཞཱིང་བསྐྱབས་པའི་གསར་འགྱུར་ཐོན་པའི་རྗེས་སུ་རྒྱ་ནག་པ་༡༧༤་ཡི་བཟའ་མི་ཚོས་སྤྱི་ཚོགས་དྲྭ་ལམ་ཁག་ཏུ་ཡི་གེ་བཀྲམ་ནས་ང་ཚོའི་བུ་ཕྲུག་དང་གཉེན་ཚན་རྣམས་ཝང་ཞཱིང་ལྟར་བཙན་ཁྲིད་བྱས་ནས་སྐྱོབ་ཐུབ་མེད་ཅེས་ལས་འགུལ་སྤེལ།།

ཨ་རིའི་ཞི་བདེ་ཞིབ་འཇུག་ཁང་གི་ཉམས་ཞིབ་པ་ཇཱེ་སན་ཊ་ཝར་(Jason Tower)་གྱིས་ཝང་ཞཱིང་བཙན་ཁྲིད་བྱུང་བ་ནི་གཡོ་ཁྲམ་དར་ཁྱབ་འགྲོ་བཞིན་པའི་རྟགས་མཚན་རེད། བཙན་ཁྲིད་དེ་སྔོན་ནས་འཆར་འགོད་བྱས་པ་ཞིག་ལོས་ཡིན། འབར་མ་ནི་དམག་གི་སྲིད་དབང་སྒེར་གཅོད་འོག་ཏུ་ཚུད་ནས་ནང་འཁྲུག་ལངས། གཡོ་ཁྲམ་པ་ཚོ་ཁྲིམས་མགོ་རང་བཙན་ལྟར་དུ་གྱུར་ཏེ་རྒན་གཞོན་བར་གསུམ་དང་ཕོ་མོར་དབྱེ་བ་མེད་པར་གཡོ་ཁྲམ་གྱི་ལས་སུ་བཀོལ་བའམ། ཡང་ན་མི་དེ་ཚོ་བཙན་ཁྲིད་བྱས་ནས་དངུལ་སྒོར་འཕྲོག་གི་འདུག་ཅེས་བཀྲལ། ཉིན་ཤས་གོང་དུ་ཝུ་ཅ་ཆི་ཟེར་བའི་རྒྱ་ནག་པ་ཞིག་འབར་མའི་གཡོ་ཁྲམ་ལྟེ་གནས་དེ་ནས་སྐྱོབ་ཐུབ་འདུག་ཟེར། རུས་མིང་ཁྲེན་ཞེས་པ་ཞིག་གིས་ང་༢༠༢༣་ལོར་འབར་མའི་གཡོ་ཁྲམ་ལྟེ་གནས་དེར་བཙན་ཁྲིད་བྱས་བྱུང་། གཡོ་ཁྲམ་ལྟེ་གནས་དེར་ཉུང་མཐར་ཡང་རྒྱ་ནག་པ་༡༠༠༠་ཙམ་འདུག མི་ཞིག་གཡོ་ཁྲམ་ལྟེ་གནས་དེ་ནས་ཐར་དགོས་ན་གློད་རིན་ཨ་སྒོར་ཁྲི་ཚོ་༣་རེ་སྤྲོད་དགོས་ཀྱི་འདུག་ཅེས་ཉམས་མྱོང་གླེང་།།

ལྷོ་ཤར་ཨེ་ཤི་ཡའི་རྒྱལ་ཁབ་ཁག་ཏུ་ཚུགས་པའི་གཡོ་ཁྲམ་ལྟེ་གནས་དེ་རྣམས་རྒྱ་ནག་གི་ཁྲིམས་འགལ་ཚོགས་པ་ཁག་གིས་བཙུགས། ཁོ་ཚོས་མི་ལ་ལས་ཀ་སྤྲོད་རྒྱུ་ཡོད་པ་དང་ཚོང་ལས་ཀྱི་གོ་སྐབས་ཡོད་ཅེས་མགོ་སྐོར་བཏང་ནས་འབར་མར་ཁྲིད། ན་ནིང་ཕྱི་ཟླ་༧་ནང་ཨ་རིའི་ཞི་བདེ་ཞིབ་འཇུག་ཁང་གིས་རྒྱ་ནག་པའི་གཡོ་ཁྲམ་ལྟེ་གནས་དེ་རྣམས་འབར་ནས་ལའོ་སི་དང་ཁེམ་བྷོ་ཌི་ཡ་གཉིས་ལ་ཁྱབ་འདུག གཡོ་ཁྲམ་ལྟེ་གནས་དེ་དག་གི་ཁྲམ་པ་ཚོས་ལོ་ལྟར་མིའི་ལག་ནས་ཨ་སྒོར་དུང་ཕྱུར་མང་པོ་གཡོ་ལེན་བྱེད་ཀྱི་འདུག་ཅེས་སྙན་ཐོ་བཏོན། ཐེ་ལན་གྱི་ཁྱིམ་མཚེས་རྒྱལ་ཁབ་འབར་མ་དང་ལའོ་སི། ཁེམ་བྷོ་ཌི་ཡ་གསུམ་གྱི་ནང་དུ་གཡོ་ཁྲམ་ལྟེ་གནས་ཅི་ཙམ་མང་དུ་སོང་ན་དེ་ཙམ་གྱིས་ཐེ་ལན་དུ་བསླེབས་པའི་ཡུལ་སྐོར་སྤྲོ་འཆམ་པ་ཚོར་ཉེན་ཁ་ཆེ་རུ་སོང་།།

ལོ་ཤས་གོང་ནས་རྒྱ་གར་དང་དྷུ་བྷེ། པ་ཀི་སི་ཐན་དང་ལྷོ་ཨ་མི་རི་ཀ་བཅས་ལའང་གཡོ་ཁྲམ་ལྟེ་གནས་དར། རྒྱ་གར་གྱི་གཡོ་ཁྲམ་ལྟེ་གནས་དེ་དག་གི་ཁྲམ་པ་ཚོས་མི་ལ་པར་བཏང་ནས་གློག་ཀླད་དྲྭ་དུག་གཙང་སེལ་ཁང་གི་སྲི་ཞུ་བ་ཡིན། ཁྱོད་ཀྱི་གློག་ཀླད་ནང་དུ་དྲྭ་དུག་འཛུལ་འདུག དེ་གཙང་སེལ་བྱ་དགོས་ཞེས་མགོ་སྐོར་བཏང་ནས་མིའི་གློག་ཀླད་ནང་གི་གསང་བའི་གནས་ཚུལ་བརྐུས། རྒྱ་གར་གྱི་གཡོ་ཁྲམ་པ་མང་ཆེ་བས་དངུལ་ཁང་གི་སྲི་ཞུ་བ་ཡིན། ཁྱོད་ཀྱི་བཅོལ་ཁྲའི་ནང་གི་དངུལ་སྒོར་མི་ཞིག་གིས་ལེན་གྱི་འདུག ཁྱོད་ཀྱི་བུན་ཁའི་གསང་གྲངས་མིའི་ལག་ཏུ་ཤོར་འདུག དངུལ་ཁང་གི་བཅོལ་ཁྲའི་ཨང་གྲངས་དང་བུན་ཁའི་གསང་གྲངས་རྣམས་བརྗེ་དགོས་ཀྱི་འདུག་ཅེས་མགོ་སྐོར་བཏང་ནས་མི་ཚོས་དངུལ་ཁང་དུ་བཅོལ་ཡོད་པའི་དངུལ་སྒོར་རྣམས་གཡོ་ཐབས་ཀྱིས་བླངས། ཨ་རི་དང་ཁེ་ན་ཌ། ཨོ་གླིང་དང་ཡུ་རོབ་སོགས་ཀྱི་རྒན་རྒོན་མང་པོ་རྒྱ་གར་གྱི་ཁྲམ་པ་ཚོའི་མགོ་སྐོར་འོག་ཏུ་ཚུད་ཀྱི་ཡོད་པའི་གནས་ཚུལ་ཐོན་འདུག

ཕྱི་ཟླ་དང་པོའི་ཚེས་༡༤་ཉིན་བྷན་ཁོག་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་ཡུལ་སྐོར་སྤྲོ་འཆམ་ཚོགས་པ་ཁག་ཐེ་ལན་དུ་ཡོང་རྒྱུ་ཕྱིར་འཐེན་བྱས་ནས་མཁའ་ལམ་ལས་ཁུངས་ཁག་དང་མགྲོན་ཁང་། ཡུལ་སྐོར་སྣེ་ཤན་ལས་ཁུངས་ཁག་ལ་ཚོང་ལས་ཀྱི་གྱོང་གུད་ཕོག བདུན་ཕྲག་སྔོན་མར་ཧོང་ཀོང་གི་གཞས་པ་ཨེ་སོན་ཆན་(Eason Chan)་གྱིས་ཐེ་ལན་དུ་འཁྲབ་སྟོན་བྱ་འཆར་ཡོད་པ་མེད་པར་བཏང་བ་ཡིན། ཐེ་ལན་དུ་བདེ་འཇགས་མི་འདུག་ཅེས་རྒྱུ་མཚན་བགྲངས། ཧོང་ཀོང་གཞུང་གིས་ཉེན་རྟོག་པ་བཏང་ནས་གཡོ་ཁྲམ་ལྟེ་གནས་ཁག་རྩད་བཅད། རྒྱ་ནག་གི་གློག་བརྙན་འཁྲབ་མཁན་ཝང་ཞཱིང་བཙན་ཁྲིད་མ་བྱས་གོང་དུ་བྷན་ཁོག་གི་མགྲོན་ཁང་ཁག་བརྒྱ་ཆ་༧༠་ནས་༨༠་ཙམ་ཁེངས། ཕུ་ཁེ་སོགས་མཚོ་ཁའི་ས་གནས་ཁག་གི་མགྲོན་ཁང་བརྒྱ་ཆ་༨༠་ནས་༩༠་ཙམ་ཁེངས་མོད། འོན་ཀྱང་ཝང་ཞཱིང་བཙན་ཁྲིད་བྱུང་བའི་གནས་ཚུལ་བྱུང་སྟེ་མགྲོན་ཁང་ཁག་ཕྱིར་སློག་བྱས་ཡོད་པའི་གསར་འགྱུར་ཐོན་འདུག