རྒྱ་ནག་གཞུང་གིས་བསྐོ་གཞག་བྱས་པའི་པན་ཆེན་རྒྱལ་མཚན་ནོར་བུ་ཟླ་བ་འདིའི་ཚེས་༡༢ནས་༡༧བར་དུ་བལ་ཡུལ་གྱི་གནས་ཆེན་ལུམ་པེ་ནིར་འཚོགས་རྒྱུའི་ལྷོ་རྒྱ་ནག་རྒྱ་མཚོའི་ཁུལ་གྱི་ནང་པའི་ཚོགས་ཆེན་ཐེངས་དགུ་པ་ཟེར་བའི་ཐོག་ལ་མཉམ་བཞུགས་བྱ་རྒྱུ་དང་།ཚེས་༡༤ནས་༡༧བར་བལ་ཡུལ་ནང་གཟིགས་སྐོར་གྱི་འཆར་གཞི་ཡོད་པས་དེ་ནི་རྒྱ་ནག་གཞུང་ནས་སངས་རྒྱས་བཅོམ་ལྡན་འདས་ཀྱི་འཁྲུངས་ཡུལ་ནང་པའི་གནས་རྩ་ཆེན་དེ་དང་ལྷོ་རྒྱ་ནག་རྒྱ་མཚོའི་ཁུལ་གྱི་ནང་པའི་ཚོགས་ཆེན་ཟེར་བ་གོ་སྒྲིག་གིས་ཆོས་ཕྱོགས་ཀྱི་བྱེད་སྒོ་དེ་བེད་སྤྱོད་ཀྱིས་རང་གི་ཆབ་སྲིད་ཀྱི་ཁེ་ཕན་གྲུབ་པ་ཞིག་དང་།ཡང་རྒྱ་དཀར་ནག་གཉིས་ཀྱི་བར་དུ་གནས་པའི་བལ་ཡུལ་གྱི་བར་བཞུགས་པའི་རྣམ་པ་དེ་མུ་མཐུད་དེ་གནས་ཐུབ་མིན་ཐེ་ཚོམ་དུ་འགྱུར་རྒྱུ་ཡིན་པའི་སྐོར་བལ་ཡུལ་གྱི་ཚགས་ཤོག་ཞིག་གིས་གནས་ཚུལ་སྤེལ་ཡོད་པ་རེད།
གནས་ཚུལ་སྤེལ་དོན་འདིའི་ནང་རྒྱ་ནག་ནས་ཐེངས་འདིའི་ལྷོ་རྒྱ་ནག་རྒྱ་མཚོའི་ཁུལ་གྱི་ནང་པའི་ཚོགས་ཆེན་ཟེར་བ་དེ་སངས་རྒྱས་བཅོམ་ལྡན་འདས་ཀྱི་འཁྲུངས་ཡུལ་དུ་འཚོགས་པའི་དམིགས་ཡུལ་ནི་ལྷོ་ཨེ་ཤི་ཡའི་ནང་པའི་རྒྱལ་ཁབ་ཚོའི་ཐོག་ལ་རྒྱ་ནག་གི་ཤུགས་རྐྱེན་ཆེ་རུ་གཏོང་རྒྱུ་དང་།ཆོས་དང་རིག་གཞུང་གི་ཐོག་ནས་རང་གི་ཕྱི་འབྲེལ་སྟོབས་ཤུགས་རྒྱ་སྐྱེད་གཏོང་ཐབས་ཤིག་ཡིན་པས་བལ་ཡུལ་ནས་རྒྱ་ནག་གི་དམིགས་ཡུལ་དེ་ཚོའི་བསླུ་ཁྲིད་འོག་ཏུ་ཚུད་ནས་ད་བར་དུ་རྒྱ་དཀར་ནག་གཉིས་དབར་ལ་བར་བཞུགས་སུ་གནས་ཐབས་བྱེད་པའི་ལངས་ཕྱོགས་དེར་དཀའ་ངལ་འཕྲད་སྲིད་པ་རེད་ཅེས་གནས་ཚུལ་སྤེལ་བ་དང་།དེ་ཡང་བལ་ཡུལ་ནས་དཔལ་འབྱོར་གྱི་དགོས་མཁོའི་ཆེད་དུ་རྒྱ་ནག་དང་འབྲེལ་བ་དམ་ཟབ་དགོས་ཀྱི་ཡོད་ནའང་ལོ་རྒྱུས་དང་རིག་གཞུང་སོགས་གང་ཅིའི་ཐད་ནས་བལ་ཡུལ་ནི་རྒྱ་གར་དང་འབྲེལ་བ་ཆེན་བ་དང་ལྷག་པར་དུ་ནང་པའི་སྤྱི་ཚོགས་ཁག་དང་འབྲེལ་བ་ཆེན་པོ་ཡོད་པར་བརྟེན་རྒྱ་ནག་གཞུང་ནས་བསྐོ་གཤག་བྱས་པའི་པན་ཆེན་རྒྱལ་མཚན་ནོར་བུ་ནི་ཆབ་སྲིད་ཐོག་ལ་རྩོད་གཞི་ཅན་ཞིག་ཡིན་པས་བལ་ཡུལ་ནང་གདན་འདྲེན་ཞུས་པ་དེས་བལ་ཡུལ་དང་བོད་མིའི་སྤྱི་ཚོགས་ཀྱི་འབྲེལ་བའང་གནོད་འཚེ་བཟོ་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཚོའི་སྐྱོན་བརྗོད་ཕོག་རྒྱུ་ཡིན་ཞིང་ལྷག་དོན་དུ་བལ་ཡུལ་ནས་ལྷོ་རྒྱ་ནག་རྒྱ་མཚོའི་ཁུལ་དང་འབྲེལ་བ་ཡོད་པའི་རྒྱ་ནག་གཞུང་གི་ལས་འཆར་དེ་འདྲ་ཞིག་ནང་ཐེ་ཇུས་བྱས་པ་དེས་བལ་ཡུལ་དང་རྒྱ་གར། དེ་བཞིན་ལྷོ་རྒྱ་ནག་རྒྱ་མཚོའི་ཁུལ་གྱི་རྒྱ་ནག་དང་རྩོད་གཞི་ཡོད་པའི་རྒྱལ་ཁབ་ཚོའི་དབར་གྱི་འབྲེལ་ལམ་ལ་གནོད་འཚེ་བཟོ་སྲིད་པ་རེད་ཅེས་གནས་ཚུལ་སྤེལ་འདུག
ལྷོ་རྒྱ་ནག་རྒྱ་མཚོའི་ཁུལ་གྱི་ནང་པའི་ཚོགས་ཆེན་ཟེར་བ་དེ་ནི་རྒྱ་ནག་གཞུང་གིས་གོ་སྒྲིག་བྱས་པ་ཞིག་པ་ཞིག་ཡིན་པ་དང་།ད་ལོའི་ཚོགས་ཆེན་དེ་སངས་རྒྱས་བཅོམ་ལྡན་འདས་སྐུ་འཁྲུངས་ཡུལ་ལུམ་བི་ནི་འདེམས་ཀ་བྱས་པ་དེ་ནི་ཆོས་ལ་ངོས་ལེན་མེད་པའི་དམར་ཤོག་རྒྱ་ནག་གཞུང་གིས་རྒྱལ་སྤྱིའི་ཐོག་ལ་ནང་པའི་འགོ་ཁྲིད་ཀྱི་རྣམ་པ་ཞིག་སྟོན་ཐབས་བྱས་པ་ཞིག་ཡིན་པ་རེད།
བལ་ཡུལ་ནས་ནང་པའི་གནས་རྩ་ཆེན་འདི་མངོན་གསལ་འདོད་དུ་གཏོང་རྒྱུའི་ཁེ་ཕན་ཞིག་གྲུབ་ཐབས་བྱེད་ཀྱི་ཡོད་ནའང་རྒྱ་ནག་གཞུང་གིས་གོ་སྒྲིག་བྱས་པའི་ལྷོ་རྒྱ་ནག་རྒྱ་མཚོའི་ཁུལ་གྱི་ནང་པའི་ཚོགས་ཆེན་ཟེར་བ་འདི་གར་འཚོགས་རྒྱུར་ཁས་ལེན་དང་རྒྱ་ནག་གཞུང་གི་བསྐོ་གཞག་བྱས་པའི་པན་ཆེན་རྒྱལ་མཚན་ནོར་བུ་བལ་ཡུལ་གྱི་ས་ཐོག་ཏུ་གདན་འདྲེན་ཞུས་པ་སོགས་ཀྱི་ཐོག་ནས་བལ་ཡུལ་དེ་རྒྱ་ནག་གི་བཀའ་བཀོད་འོག་ཏུ་གྱུར་ཟིན་པ་ཞིག་མངོན་གསལ་འདོད་པོས་མཚོན་གྱི་ཡོད་པ་དབྱེ་ཞིབ་པ་ཚོས་འགྲེལ་བརྗོད་གནང་གི་ཡོད་པ་རེད།
རྒྱ་ནག་གཞུང་ནས་ཉེ་དུས་ནས་རྒྱལ་མཚན་ནོར་བུ་བེད་སྤྱོད་ཤུགས་ཆེ་རུ་གཏོང་བཞིན་ཡོད་པ་དང་དཔེ་ན་ཟླ་ཉིང་རྒྱ་ནག་དབུས་འཐབ་ཕྱོགས་གཅིག་གྱུར་ཁང་ནས་གོ་སྒྲིག་འོག་ཟླ་བ་དྲུག་ལྷག་རིང་དེ་སྔོན་པན་ཆེན་སྐུ་གོང་མ་ཞབས་བཅག་མྱོང་བའི་ཆབ་མདོ་དང་ལྷ་ས་གཞི་ཀ་རྩེ་བཅས་ཀྱི་ས་ཁུལ་དུ་ཆོས་ཕྱོགས་ཀྱི་བྱེད་སྒོ་ཁག་གོ་སྒྲིག་བྱས་ཡོད་ཅིང་ད་རེས་བལ་ཡུལ་ལྟ་བུ་ཕྱིའི་རྒྱལ་ཁབ་ཤིག་ནང་མངགས་གཏོང་བྱས་པ་དེའི་ཐོག་ནས་རྒྱ་ནག་གིས་རྒྱལ་སྤྱིའི་ཐོག་ལ་བོད་བརྒྱུད་ནང་བསྟན་གྱི་མི་སྣ་གལ་ཆེ་ཞིག་བཟོ་ཐབས་བྱེད་བཞིན་པ་གསལ་པོ་ཡིན་པ་རེད།
གླེང་སྟེགས།