༄༅།། ཕྱི་ཟླ་༦་པའི་ཚེས་༡༤་ཉིན་རྒྱ་ནག་གི་རྒྱལ་ཡོངས་འཕྲོད་བསྟེན་ལྷན་ཁང་གིས་ཁྱབ་བསྒྲགས་བྱས་པ་ལྟར་ན། གཟའ་སྤེན་པའི་ཉིན་རྒྱ་ནག་ལྷོ་ཕྱོགས་ཀྱི་ཀོང་ཀྲུག་གྲོང་ཁྱེར་ལ་ཏོག་དབྱིབས་ནད་དུག་གསར་དུ་འགོས་པའི་ནད་པ་༣༤་ཐོན། ཁ་སང་གཟའ་ཉི་མའི་ཉིན་ནད་པ་གསར་པ་༢༣་ཐོན་པ་དང་གཟའ་མཇུག་དེར་ཁྱོན་བསྡོམས་ཏོག་དབྱིབས་ནད་དུག་གསར་དུ་འགོས་པའི་ནད་པ་༥༧་ཐོན། ནད་པ་གསར་པ་དེ་དག་གི་གྲས་ཀྱི་མི་༤་ལ་ས་གནས་རང་དུ་ནད་དུག་འགོས་ཡོད་པ་དང་ནད་ཡམས་ཁྱབ་ཡུལ་གཙོ་བོ་ནི་ཀོང་ཏུང་ཞིང་ཆེན་རེད། ད་ལྟའི་བར་དུ་རྒྱ་ནག་ལ་ཏོག་དབྱིབས་ནད་དུག་འགོས་པའི་ནད་པ་༩༡༤༥༡་བྱུང་ཡོད་པ་དང་མི་༤༦༣༦་ལ་འཆི་སྐྱོན་བྱུང་སོང་ཞེས་བསྒྲགས། རྒྱ་ནག་གིས་ནད་དུག་འགོས་ཟིན་ཡོད་ཀྱང་ནད་རྟགས་མ་ཐོན་པ་རྣམས་ནད་པའི་གྲས་སུ་རྩི་ཡི་མེད་ཅིང་། རྒྱ་ནག་མི་དམངས་དང་རྒྱལ་སྤྱིའི་ཉམས་ཞིབ་པ་ཚོས་རྒྱ་ནག་གཞུང་གིས་ཁྱབ་བསྒྲགས་བྱས་པའི་ཏོག་དབྱིབས་ནད་དུག་འགོས་པའི་ནད་པའི་གྲངས་འབོར་དང་ཏོག་དབྱིབས་ནད་དུག་གིས་མི་ལ་འཆི་སྐྱོན་བྱུང་བའི་གྲངས་འབོར་ངོ་མ་ནི་མི་ས་ཡ་འགའ་ཞིག་ལོངས། རྒྱ་ནག་གཞུང་གིས་ནད་མནར་དང་འཆི་སྐྱོན་གྱི་གྲངས་འབོར་ངོ་མ་སྦས་གསང་བྱེད་ཀྱི་ཡོད་པའི་དོགས་པ་བྱེད་དགོས་པ་ཞིག་ཏུ་གྱུར། རྒྱ་ནག་གཞུང་གིས་བེམ་སྲེག་ཁང་དེ་དག་ལ་ཏོག་དབྱིབས་ནད་དུག་ཁྱབ་གདལ་དུས་སུ་ཉིན་ལྟར་མི་ཅི་ཙམ་གྱི་ཕུང་པོ་མེར་སྲེག་བཏང་མིན་གྱི་གྲངས་ཐོ་ཕྱིར་བསྒྲགས་བྱེད་དུ་འཇུག་གི་མེད་པ། ཏོག་དབྱིབས་ནད་དུག་ཁྱབ་གདལ་རྗེས་སུ་ཝུ་ཧན་གྲོང་ཁྱེར་གྱི་མི་གྲངས་ས་ཡ་མང་པོའི་ལག་ཐོགས་ཁ་པར་གྱི་ཐོ་ཁྲ་སྒོ་བརྒྱབ། རྒྱ་ནག་གཞུང་གིས་མི་གཅིག་ལ་ཁ་པར་གཉིས་རེ་ཡོད་པ་རྣམས་དཔལ་འབྱོར་དཀའ་ངལ་གྱིས་སྒོ་བརྒྱབ་སྟེ་ལག་ཐོགས་ཁ་པར་གྱི་ཐོ་ཁྲ་མང་པོ་ཞིག་སྒོ་བརྒྱབ་པ་རེད་ཅེས་བཀྲལ།།
ད་ལྟ་ཀོང་ཀྲུག་གྲོང་ཁྱེར་དང་ཀོང་ཏུང་ཞིང་ཆེན་གྱི་རྒྱ་ནག་དམར་ཤོག་ཚོགས་པའི་སྒྲིག་ཁྲིམས་ཞིབ་བཤེར་ལྷན་ཁང་གིས་ཞིབ་འཇུག་ཚོགས་ཆུང་ཞིག་བཙུགས་ནས་ཀོང་ཀྲུག་གྲོང་ཁྱེར་ལ་ཏོག་དབྱིབས་ནད་དུག་ཁྱབ་དོན་ཅི་ཞིག་ཡིན་མིན། ཀོང་ཏུང་ཞིང་ཆེན་དང་ཀོང་ཀྲུག་གྲོང་ཁྱེར་གྱི་འབྲེལ་ཡོད་ལས་སྣེ་ཚོས་ནད་ཡམས་སྔོན་འགོག་གི་ལས་འགན་འཐུས་ཤོར་བཏང་ཡོད་མེད། ཀོང་ཀྲུག་ལ་ནད་ཡམས་ཁྱབ་པ་དེར་དམར་ཤོག་ཚོགས་པའི་སྒྲིག་ཁྲིམས་དང་རྒྱལ་ཁབ་ཀྱི་ཁྲིམས་ལུགས་ལྟར་མཐོ་རིམ་ལས་སྣེ་ཁག་དང་གཞུང་གི་ལས་བྱེད་པ་ཚོས་རང་རང་གི་ལས་འགན་འཐུས་ཤོར་སོང་ཡོད་མེད་བཅས་ལ་ཞིབ་འཇུག་བྱ་དགོས་པའི་ཁྱབ་བསྒྲགས་བྱས་འདུག་ཅེས་ཧོང་ཀོང་གི་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་འདུག ལོ་འདིའི་ཕྱི་ཟླ་༥་པ་ནས་ཀོང་ཀྲུག་གྲོང་ཁྱེར་ལ་ཏོག་དབྱིབས་ནད་དུག་ཁྱབ། རྒྱ་ནག་གཞུང་གིས་གང་དུ་ཏོག་དབྱིབས་ནད་དུག་ཁྱབ་ན་ས་གནས་དེའི་འགོ་ཁྲིད་ཚོར་ཁྲིམས་གཅོད་དྲག་པོ་བྱས་ནས་བཟོད་སྒོམ་ཏིལ་འབྲུ་ཙམ་བྱེད་དཀའ། ཀོང་ཀྲུག་གྲོང་ཁྱེར་ལ་མི་འབོར་ས་ཡ་༡༨་ཡོད་ཀྱང་མི་༡༣༥་ལ་མ་གཏོགས་ཏོག་དབྱིབས་ད་དུག་མ་འགོས། ནད་པ་དེ་རྣམས་ཀོང་ཀྲུག་དང་ཧྲེན་ཀྲེན། ཧྥོ་ཧྲན་གསུམ་ཡིན་པས་ཀོང་ཀྲུག་གྲོང་ཁྱེར་གཞུང་གིས་འགྲིམ་འགྲུལ་དང་ཚོང་ལས། སློབ་གྲྭ་སོགས་ཉིན་ཤས་རིང་སྒོ་བརྒྱབ་ནས་ནད་ཡམས་སྔོན་འགོག་བྱས་ཤིང་། རྒྱ་ནག་གཞུང་གིས་དམར་ཤོག་ཚོགས་པ་བཙུགས་ཏེ་ལོ་༡༠༠་འཁོར་བའི་དུས་དྲན་དང་ལོ་རྗེས་མར་རྒྱ་ནག་ལ་དམར་ཤོག་ཚོགས་པའི་ཚོགས་ཆེན་འཚོགས་ནས་འགོ་ཁྲིད་ལ་འཕོ་འགྱུར་འགྲོ་སྲིད་པའི་དུས་སྐབས་འདིར་ཞིང་ཆེན་ཁག་གི་འགོ་ཁྲིད་ཚོས་ཧ་ཅང་གི་གཟབ་ནན་བྱེད་ཀྱི་ཡོད་པ་སྟེ། ཀོང་ཏུང་ཞིང་ཆེན་གྱི་དམར་ཤོག་ཚོགས་པའི་དྲུང་ཆེ་ལི་ཞིས་ནད་པ་ཟུར་འགོག་དང་འགྲིམ་འགྲུལ་བཀག་སྡོམ་གྱི་ལས་དོན་ཁག་ལ་དངོས་སུ་ཞུགས་ནས་འགན་ཁུར་ལེན་གྱི་ཡོད་པའི་གནས་ཚུལ་ཐོན་འདུག
རྒྱ་ནག་གི་སྨན་པ་ཚོས་ཐོག་མར་རྒྱ་གར་དུ་ཁྱབ་པའི་ངོ་བོ་ཉིས་འགྱུར་གྱི་ཏོག་དབྱིབས་ནད་དུག་ལ་བརྟག་དཔྱད། ངོ་བོ་ཉིས་འགྱུར་གྱི་ཏོག་དབྱིབས་ནད་དུག་ནི་ཐོག་མར་རྒྱ་ནག་གི་ཝུ་ཧན་གྲོང་ཁྱེར་ནས་ཁྱབ་པའི་ཏོག་དབྱིབས་ནད་དུག་ལས་ཀྱང་ཉེན་ཚབས་ཆེ་བ་དང་འགོས་ཁྱབ་མྱུར་བ་ཞིག་ཡིན་འདུག ཨ་རིའི་ནེའུ་ཡོཀ་དུས་བབ་ཚགས་པར་ལ་གནས་ཚུལ་བཀོད་པ་ལྟར་ན། རྒྱ་ནག་གི་སྨན་པ་ཚོས་ངོ་བོ་ཉིས་འགྱུར་གྱི་ནད་པ་ཐོག་མ་དེ་རྩད་ཆོད་ཐུབ་ཡོད་པ་དང་མི་དེའི་ནད་བབ་འཕྲལ་དུ་ཇེ་སྡུག་ལ་ཕྱིན་ཏེ་འགོ་ཁྱབ་མྱུར་དུ་ཕྱིན་ཡོད་པ་རྣམས་ཤེས་རྟོགས་བྱུང་། ཀོང་ཀྲུག་གྲོང་ཁྱེར་གྱི་སུན་ཀྲུང་ཧྲན་སློབ་གྲྭ་ཆེན་མོའི་ཛ་དྲག་སྨན་བཅོས་སྡེ་ཚན་གྱི་འགན་འཛིན་གྭན་ཤང་ཏུང་གིས་ནད་པ་བརྒྱ་ཆ་༡༢་ཙམ་ལ་ནད་རྟགས་ཐོན་ནས་ཉི་མ་གསུམ་བཞི་ཞིག་གི་རྗེས་སུ་ནད་བབ་ཚབས་ཆེན་ཞིག་ཏུ་འགྱུར་གྱི་འདུག སྤྱིར་བཏང་ཡིན་ན་ཉི་མ་གསུམ་བཞི་ཞིག་གི་ནང་དུ་ནད་བབ་འཕྲལ་དུ་ཛ་དྲག་ཅན་དུ་འགྱུར་བའི་ནད་པ་བརྒྱ་ཆ་༢་ནས་༣་ཡས་མས་རེ་ལས་མི་འབྱུང་། ནད་པ་ལྔ་ཆའི་བཞི་ལ་ཚ་བ་འཕར་བ་སོགས་ཀྱི་ནད་རྟགས་འཐོན་གྱི་འདུག་ཅེས་བསྟན། ཡིན་ནའང་ནེའུ་ཡོཀ་དུས་བབ་ཚགས་པར་གྱིས་རྒྱ་ནག་གི་སྨན་པ་ཚོས་ངོ་བོ་འགྱུར་བའི་ཏོག་དབྱིབས་ནད་དུག་རིགས་མ་འདྲ་བ་རྣམས་གཤིབ་སྡུར་ཇི་ལྟར་བྱེད་ཀྱི་ཡོད་མེད་གསལ་པོ་མི་འདུག་ཅེས་གནས་ཚུལ་སྤེལ། ད་ལྟ་ངོ་བོ་ཉིས་འགྱུར་གྱི་ཏོག་དབྱིབས་ནད་དུག་རྒྱལ་ཁབ་མང་དག་ཅིག་ལ་ཁྱབ་ཡོད་པས་འཛམ་གླིང་ཡོངས་སུ་ནད་རླབས་གཉིས་པ་དང་གསུམ་པ་ཞིག་འཕྱུར་སྲིད་པའི་བློ་ཚབས་བྱེད་ཀྱི་ཡོད་པར་མ་ཟད། བདུན་ཕྲག་སྔོན་མར་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཡུ་རོབ་ཡན་ལན་ལས་ཁུངས་ཀྱི་ལས་སྣེ་ཚོས་དབྱིན་ཡུལ་དུ་ངོ་བོ་འགྱུར་བའི་ཏོག་དབྱིབས་ནད་དུག་ཁྱབ་པ་ལྟར་ཡུ་རོབ་རྒྱལ་ཁབ་གཞན་ཁག་ལའང་ངོ་བོ་ཉིས་འགྱུར་གྱི་ཏོག་དབྱིབས་ནད་དུག་ཁྱབ་ཉེན་འདུག་ཅེས་ཉེན་བརྡ་བཏང་འདུག གཟའ་པ་སངས་ཉིན་དབྱིན་ཇིའི་འཕྲོད་བསྟེན་དྲུང་ཆེས་དབྱིན་ཡུལ་དུ་ཏོག་དབྱིབས་ནད་དུག་འགོས་པའི་ནད་པ་བརྒྱ་ཆ་༩༡་ངོ་བོ་ཉིས་འགྱུར་གྱི་ཏོག་དབྱིབས་ནད་དུག་འགོས་པའི་ནད་པ་རེད་ཅེས་བཤད།།
རྒྱ་ནག་མི་དམངས་ཀྱི་ཡིད་ཆེས་བྱ་ཡུལ་སྨན་པ་ཀྲང་ཝེན་ཧུང་གིས་མི་དམངས་ལ་མྱུར་དུ་ཏོག་དབྱིབས་ནད་དུག་སྔོན་འགོག་གི་སྨན་ཁབ་རྒྱག་དགོས། རྒྱ་ནག་གཞུང་གིས་ཀྱང་ཕྱིའི་རྒྱལ་ཁབ་ཁག་ལ་ཏོག་དབྱིབས་ནད་དུག་སྔོན་འགོག་གི་སྨན་ཁབ་གཏོང་རྒྱུའི་ཚབ་ཏུ་རྒྱལ་ནང་གི་མི་དམངས་ལ་འགོག་ཁབ་རྒྱག་རྒྱུ་གཙིགས་སུ་འཛིན་དགོས་ཞེས་བསྐུལ། སྨན་པ་ཀྲང་ཝེན་ཧུང་ནི་ཧྲང་ཧེ་གྲོང་ཁྱེར་གྱི་ཧྭ་ཧྲན་སྨན་ཁང་གི་འགོས་ནད་སྔོན་འགོག་ཁང་གི་འགན་འཛིན་ཡིན་ཞིང་། ཁོང་གིས་ཕྱི་ཟླ་༦་པའི་ཚེས་༡༡་ཉིན་རྒྱ་ནག་གི་མི་གྲངས་དུང་ཕྱུར་༨་དང་བྱེ་བ་༦་ལ་སྨན་ཐུན་དང་པོའི་འགོག་ཁབ་བརྒྱབ་འདུག འདི་ནི་འཛམ་གླིང་ཡོངས་ལ་བསྡུར་ན་ཧ་ཅང་གི་གྲངས་འབོར་མང་པོ་ཞིག་རེད། ཡིན་ནའང་རྒྱ་ནག་ལ་སྨན་ཐུན་གཉིས་ཀ་བརྒྱབ་པའི་མིའི་གྲངས་འབོར་ཧ་ཅང་གི་ཉུང་ཉུང་ཞིག་ཡིན་པས་ང་ཚོས་ངེས་པར་དུ་སྨན་ཐུན་གཉིས་ཀའི་འགོག་ཁབ་རྒྱག་དགོས། སྨན་ཐུན་གཉིས་ཀའི་འགོག་ཁབ་བརྒྱབ་ན་ནད་དུག་འགོ་མི་ཐུབ་པ་དང་ངོ་བོ་འགྱུར་བའི་ནད་དུག་ཡིན་རུང་ངར་ཤུགས་གཅོག་ཐུབ་པའི་ཕན་ཐོགས་ཆེ། དེ་ནས་རྒྱ་ནག་གཞུང་གིས་དངངས་ཚབས་བྱེད་མི་དགོས་པར་ནད་ཡམས་འདིར་སྔོན་འགོག་དང་བཅོས་ཐབས་བྱེད་ཆོག སྨན་ཁབ་ཀྱིས་ནད་དུག་གི་གནོད་ཚབས་ནུས་པ་གཅོག་ཐུབ་པ་དང་རྒྱུན་ལྡན་གྱི་འཚོ་བར་འགོག་རྐྱེན་བཟོ་མི་ཐུབ་ཅེས་བསྟན། རྒྱ་ནག་གཞུང་གིས་ཏོག་དབྱིབས་ཁྱབ་དུག་ཁྱབ་མ་ཐོག་ཏུ་མི་གྲངས་ས་ཡ་མང་པོ་རང་ཁྱིམ་དུ་བཀག་སྟེ་ནད་དུག་བཀག ཐེ་ཝན་གྱིས་ཀྱང་ས་མཚམས་བཀག་ནས་ཏོག་དབྱིབས་ནད་དུག་ཁྱབ་ཏུ་མ་བཅུག་པར་སྐབས་ཤིག་འཛམ་གླིང་ཡོངས་ཀྱིས་མིག་དཔེར་བལྟ་དགོས་པ་ཞིག་ཏུ་གྱུར་ཀྱང་ཉེ་དུས་ཤིག་ནས་མཚོ་འགག་ཕྱོགས་གཉིས་ཀར་ངོ་བོ་འགྱུར་བ་དང་ངོ་བོ་ཉིས་འགྱུར་གྱི་ཏོག་དབྱིབས་ནད་དུག་ཁྱབ།།
ཀྲང་ཝེན་ཧུང་གིས་རྒྱ་ནག་མི་དམངས་ལ་འགོག་ཁབ་རྒྱག་དགོས་པའི་སྐུལ་ལྕག་བཏང་རུང་རྒྱ་ནག་གིས་བཟོས་པའི་སྨན་ཁབ་དེ་ཚོར་ཕན་ནུས་མེད་པར་ནད་དུག་སྔོན་འགོག་ཐུབ་ཀྱི་མེད་པའི་གནས་ཚུལ་ཐོན། རྒྱ་ནག་མི་དམངས་ལ་རང་ཡུལ་གྱི་སྨན་སྦྱོར་བཟོ་ཚོང་ལས་ཁང་ཁག་གིས་བཟོས་པའི་སྨན་ཁབ་ལ་ཡིད་ཆེས་མེད་པར་འབྱོར་ལྡན་པ་ཚོས་ཨ་རིའི་ཧྥེ་ཛར་དང་མོར་ཌེ་ན་སྨན་ཁབ་རེར་རྒྱ་སྒོར་ཁྲི་ཚོ་གཉིས་རེ་དང་སྨན་ཁབ་གཉིས་ཀར་རྒྱ་སྒོར་ཁྲི་ཚོ་བཞི་རེ་སྤྲད་ནས་རྒྱག་ཐབས་སུ་འབད། བྷ་རེན་སོགས་དཀྱིལ་ཤར་ས་ཁུལ་གྱི་ཁ་ཆེའི་རྒྱལ་ཁབ་ཁག་གིས་རང་གི་མི་དམངས་ལ་རྒྱ་ནག་གི་འགོག་ཁབ་སྨན་ཐུན་གཉིས་ཀ་བརྒྱབ་ཀྱང་ཕན་ནུས་མ་བྱུང་བར་ཧྥེ་ཛར་དང་མོར་ཌེ་ན་སོགས་སྨན་ཁབ་གསུམ་པ་ཞིག་རྒྱག་འགོ་ཚུགས། ལྷོ་ཨ་མི་རི་ཀའི་རྒྱལ་ཁབ་བྷར་ཛིལ་ལ་ཚོད་ལྟ་བྱས་པའི་སྐབས་སུ་རྒྱ་ནག་གི་སྨན་ཁབ་དེར་ཕན་ནུས་བརྒྱ་ཆ་༥༠་༤་ཐོན། ཆི་ལེ་རྒྱལ་ཁབ་ལ་ཚོད་ལྟ་བྱས་པའི་སྐབས་སུ་ཕན་ནུས་བརྒྱ་ཆ་༥༦་༥་ཐོན། ཕྱི་ཟླ་༦་པའི་མགོ་སྟོད་བར་དུ་རྒྱལ་ཁབ་༢༦་གིས་རང་གི་མི་དམངས་ལ་རྒྱ་ནག་གི་འགོག་ཁྱབ་རྒྱག་ཆོག་པའི་ཆོག་མཆན་བཀོད། གལ་སྲིད་རྒྱལ་ཁབ་༢༦་པོ་དེའི་མི་དམངས་ལ་ཨ་རི་དང་དབྱིན་ཇི། རྒྱ་གར་བཅས་ཀྱིས་བཟོས་པའི་སྨན་ཁབ་གདམ་ཀ་ཡོད་ན་རྒྱ་ནག་གིས་བཟོས་པའི་འགོག་ཁབ་དེ་རྒྱག་འདོད་མེད་ཅེས་གསར་འགོད་པར་འགྲེལ་བཤད་བརྒྱབ་པའི་གནས་ཚུལ་ཐོན་འདུག རྒྱ་ནག་གིས་ལོ་འདིའི་ཕྱི་ཟླ་༣་པ་ནས་རྒྱལ་ནང་གི་མི་དམངས་ལ་འགོག་ཁབ་བརྒྱབ་སྟེ་ས་མཚམས་སྒོ་འབྱེད་རྒྱུའི་འབད་བརྩོན་བྱེད་ཀྱི་ཡོད་མོད། འོན་ཀྱང་ན་ནིང་ཕྱི་ཟླ་༣་པ་ནས་རྒྱ་ནག་གཞུང་གིས་ས་མཚམས་སྒོ་བརྒྱབ་སྟེ་འགྲིམ་འགྲུལ་བཀག་ཡོད་པ་ཕྱིར་འཐེན་བྱེད་ཐུབ་ཀྱི་མེད་པ། རྒྱ་ནག་ལ་ཡོང་ཆོག་པའི་ཐོངས་མཆན་སྤྲད་པའི་ཕྱི་རྒྱལ་བ་རྣམས་ཀྱང་དུས་ཡུན་རིང་པོར་ཟུར་འགོག་བྱས་ནས་ནད་ཡམས་སྔོན་འགོག་བྱེད་ཀྱི་ཡོད་པའི་གནས་སྟངས་དེར་འགྱུར་ཐེབས་མེད་པ་རེད།།
