བོད་ནང་སྐྱབས་རྗེ་བླ་མ་ཨ་ལག་ཐོགས་མེད་རིན་པོ་ཆེས་གསར་འཛུགས་གནང་བའི་གངས་ལྗོངས་གསོ་རིག་སྨན་རྩིས་རྒྱུད་སྤེལ་སློབ་གླིང་ཞེས་པ་དེ་བོད་ལུགས་གསོ་རིག་སྨན་གྱི་སྐོར་ལ་སློབ་གཉེར་བྱེད་སའི་སློབ་གྲྭ་ཞིག་ཡིན་པ་དང་། རྒྱ་ནག་གཞུང་གིས་སྔ་ཕྱིར་ཐེངས་མང་སུན་གཙེར་ཚད་མེད་བཟོས་མཐར་བཙན་དབང་གིས་སྒོ་རྒྱག་ཏུ་བཅུག་འདུག
དེ་ཡང་མིང་དངོས་སུ་བརྗོད་འདོད་མེད་མཁན་གྱི་གནས་ཚུལ་མཁོ་སྤྲོད་པ་ཞིག་གིས་འདི་ག་རླུང་འཕྲིན་ཁང་ལ་བརྗོད་དོན་ལྟར་ན་རྩི་ཀོར་ཐང་རྫོང་གི་མངའ་ཁོངས་མོ་རྡོ་སྡེ་བའི་ནང་རྒྱུན་བཞུགས་ཨ་ལག་ཐོགས་མེད་རིན་པོ་ཆེ་མཆོག་ནི་ང་ཚོ་ཡུལ་སྡེ་འདིར་ཕན་ཐོགས་རྒྱ་ཆེར་ཡོད་མཁན་གྱི་བླ་མ་དགེ་བའི་བཤེས་གཉེན་བསམ་གྱིས་མི་ཁྱབ་པ་ཞིག་ཡིན་པ་མ་ཟད་། ཁོང་ནི་ཡོངས་གྲགས་ཅན་གྱི་བོད་ལུགས་གསོ་རིགས་སྨན་པ་ཆེད་མཁས་པ་ཞིག་ཀྱང་རེད། ད་བར་དུ་ཁོང་གིས་རྒྱ་བོད་སོག་གསུམ་གཙོས་ས་ཐག་རིང་ཐུང་ཀུན་ན་བཞུགས་པའི་ནད་པ་མང་པོ་སྨན་བཅོས་བྱས་ནས་དྲག་བསྐྱེད་བྱུང་སྟེ་རྒྱ་ཆེ་མང་ཚོགས་ཀྱི་དགའ་བསུ་དང་དད་གུས་ཆེན་པོ་བྱེད་ཡུལ་ཞིག་རེད། འདས་བའི་ལོ་མང་གོང་ནས་བཟུང་ཁོང་གི་སར་སྨན་སྦྱོང་དུ་ཡོང་མཁན་སྐྱ་སེར་ཕོ་མོ་མང་པོ་ཡོད་པ་ལ་བརྟེན། ཁོང་གིས་གངས་ལྗོངས་གསོ་རིག་སྨན་རྩིས་རྒྱུད་སྤེལ་སློབ་གླིང་ཞེས་སྨན་སྦྱོང་ཡུལ་སློབ་གྲ་ཞིག་ཆེད་འཛུགས་ཀྱིས་ད་བར་དུ་སློབ་མ་བརྒྱ་ཕྲག་ཁ་ཤས་སློབ་གླིང་འདི་ནས་སྨན་སྦྱངས་ཏེ་བསླབ་པ་མཐར་སོན་རྗེས་དེང་སྐབས་སྤྱི་ཚོགས་སྟེང་སྒེར་གཉེར་སྨན་ཁང་ཆེད་འཛུགས་དང་། ཡང་ན་ཞིང་གྲོང་གི་སྲིད་གཞུང་གི་སྨན་ཁང་ནང་སྨན་པའི་ཕྱག་ལས་གནང་མཁན་མང་པོ་ཐོན་ཡོད། འོན་ཀྱང་སྤྱི་ཟླ་བ་བདུན་པའི་ཕྱི་ཚེས་༡༧་གྱི་རྗེས་ལ་རྒྱལ་ཁབ་ཀྱི་བཀའ་རྒྱ་བཏང་སྟེ་བཙན་གྱིས་སློབ་གླིང་འདི་སྒོ་རྒྱག་བཅུག་སོང་། གནས་ཚུལ་འདི་གངས་ལྗོངས་ཤེས་རིག་ནོར་བུའི་སློབ་གླིང་སྒོ་བརྒྱབ་ནས་ཉིན་གསུམ་གྱི་རྗེས་རེད་ཅེས་འགྲེལ་བརྗོད་བྱེད་ཀྱི་འདུག
སློབ་གླིང་སྒོ་རྒྱག་པའི་ཉིན་མོ་དེར་སློབ་གྲའི་ནང་ཡོད་བཞིན་པ་སློབ་མ་སྐྱ་སེར་ཕོ་མོ་བརྒྱ་ལྷག་ཡོད་པ་དང་། སློབ་གྲ་སྒོ་བརྒྱབ་རྗེས་གསོ་རིག་སློབ་མ་དེ་དག་རང་སར་མི་འགྲོ་ཐབས་མེད་དུ་གྱུར་འདུག སྦྱིར་བོད་རོང་འབྲོག་མང་ཚོགས་ཀྱི་བྱིས་པ་ཚོར་བོད་ཀྱི་གསོ་རིག་སྨན་རྩིས་སྦྱོང་སའི་སློབ་གྲ་ཞིག་ལ་བསྐྱོད་དགོས་བྱུང་ན་སློབ་ཡོན་དང་། འགྲོ་འོང་། སྡོད་གནས་དང་གྱོན་གོས་སོགས་འགྲོ་སོང་ཆེན་པོ་གཏོང་དགོས་བའི་སྟབས་ཀྱིས་བོད་རིགས་སློབ་མ་མང་པོ་ཞིག་སློབ་ཡོན་སྤྲོད་དགོས་སའི་ཆེད་གཉེར་གསོ་རིག་སློབ་གླིང་ལ་འགྲོ་རྒྱུར་དཀའ་ངལ་འཕྲད་ཀྱི་ཡོད་པ་རེད།
ཨ་ལག་ཐོག་མེད་ལགས་ཀྱི་བཙུགས་པའི་གངས་ལྗོངས་གསོ་རིག་སྨན་རྩིས་སློབ་གླིང་ནི་སྐྱ་སེར་ཕོ་མོ་སུ་འདྲ་ཞིག་ཡིན་ནའང་སློབ་གྲ་དེར་འཛུལ་ཞུགས་ཆོག་པ་མ་ཟད། སློབ་ཡོན་གང་ཡང་སྤྲོད་མི་དགོས་པར་རིན་མེད་ཐོག་སློབ་གཉེར་བྱེད་ཐུབ་ས་ཞིག་ཡིན་པ་རེད། རྣམ་ཀུན་དུ་ཨ་ལག་ཐོག་མེད་ལགས་སྐུ་དངོས་ཀྱི་སློབ་མ་ཚོར་བོད་ཀྱི་གསོ་བ་རིག་པའི་སྨན་དང་ལག་ཐབས་སོགས་དངོས་སུ་བསླབ་ཁྲིད་གནང་གི་ཡོད་པ་མ་ཟད། ཉིན་ལྟར་ཕྱོགས་ཡོངས་ཀྱི་ནད་པ་མང་པོར་འཚང་ཁ་ཤིག་ཤིག་ཡིན་པ་རེད། ཁོང་གིས་རྩར་སྨན་བླངས་ནའང་སྨན་རིན་གོང་ཚད་ཧ་ཅང་དམའ་བའི་རོང་འབྲོག་མང་ཚོགས་ལ་ཕན་ཐོག་ཆེན་པོ་ཡོད་པ་རེད།ད་ལྟ་སློབ་གླིང་སྒོ་བརྒྱབ་པ་དང་སུན་གཙེར་གྱིས་ཁོང་ལ་དཀའ་ངལ་མང་པོ་འཕྲད་ཡོད་པ་མ་ཟད།དུས་རྒྱུན་ཁོང་གིས་རྩར་འགྲོ་བཞིན་པའི་ཡུལ་སྡེ་མང་ཚོགས་ཀྱིས་ཀྱང་རྒྱལ་ཁབ་ཀྱིས་བཙན་དབང་གི་སྲིད་ཇུས་ལ་བློ་ཕམ་ཆེན་པོ་བྱེད་བཞིན་འདུག
བོད་ནས་གནས་ཚུལ་བྱུང་གིས་བཤད་པ་ལས་བཏུས།
གསར་འགོད་པ། ཀུན་བཟང་བསྟན་འཛིན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།