༄༅།། ད་ལོའི་ཕྱི་ཟླ་༦་པའི་ཚེས་༤་ཉིན་ནི་༡༩༨༩་ལོར་པེ་ཅིང་གནམ་བདེ་སྒོ་མོ་ཆེའི་ཐང་དུ་ལངས་པའི་སློབ་ཕྲུག་གི་དམངས་གཙོའི་ལས་འགུལ་ལ་རྒྱ་ནག་གཞུང་གིས་དྲག་གནོན་བྱས་ནས་ལོ་༣༤་འཁོར་བའི་དུས་དྲན་ཡིན་ཞིང་། དེ་རིང་ཕྱི་ཟླ་༦་པའི་ཚེས་༢་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཧོང་ཀོང་གི་ས་ཐོག་ཏུ་རྒྱ་ནག་གི་དྲུག་བཞིའི་ལས་འགུལ་གྱི་རྗེས་དྲན་དང་འགྲེམ་སྟོན་ཁང་ཡོད་པ་རྣམས་སྒོ་བརྒྱབ། ཨ་རིའི་ནེའུ་ཡོག་གྲོང་ཁྱེར་དུ་རྒྱ་ནག་གི་དྲུག་བཞིའི་ལས་འགུལ་གྱི་འགྲེམ་སྟོན་ཁང་ཞིག་གསར་དུ་སྒོ་ཕྱེ། རྒྱ་ནག་ལ་རང་དབང་ཐོབ་རྒྱུའི་ཕུགས་བསམ་དེ་ནེའུ་ཡོག་ཏུ་གསོན་གནས་ཡིན་པའི་གནས་ཚུལ་ཐོན་འདུག ༢༠༢༡་ལོར་རྒྱ་གཞུང་གི་གནོན་ཤུགས་འོག་ཏུ་ཧོང་ཀོང་གི་ས་ཐོག་ཏུ་གནམ་བདེ་སྒོ་མོ་ཆེའི་ཐང་དུ་ལངས་པའི་སློབ་ཕྲུག་གི་དམངས་གཙོའི་ལས་འགུལ་དེའི་འགྲེམ་སྟོན་ཁང་ཡོད་པ་རྣམས་སྒོ་བརྒྱབ། གཟའ་པ་སངས་ཉིན་ནེའུ་ཡོག་གྲོང་ཁྱེར་གྱི་གཞུང་ལམ་༦་པའི་ཁང་ཆེན་སྒོ་རྟགས་ཨང་༨༩༤་པའི་ཐོག་བརྩེགས་༤་པའི་ལས་ཁུངས་ཤིག་གི་ནང་དུ་རྒྱ་ནག་གི་དྲུག་བཞིའི་ལས་འགུལ་གྱི་འགྲེམ་སྟོན་ཁང་ཚུགས་ཡོད་པའི་གནས་ཚུལ་ཐོན་འདུག
༡༩༨༩་ལོའི་ཕྱི་ཟླ་༦་པའི་ཚེས་༤་ཉིན་གྱི་ཐོ་རེངས་སུ་རྒྱ་ནག་གཞུང་གིས་གནམ་བདེ་སྒོ་མོ་ཆེའི་ཐང་དུ་ལྕགས་ཁྲབ་འཁོར་ལོ་བཏང་སྟེ་དམངས་གཙོའི་ལས་འགུལ་ལ་ཞུགས་པའི་སློབ་ཕྲུག་ཚོར་དྲག་གནོན་བྱ་རྒྱུ་མགོ་བརྩམས། རྒྱ་ནག་གི་དམངས་གཙོའི་ལས་འགུལ་ལ་ཞུགས་པའི་སློབ་ཕྲུག་ཚོའི་ཐོག་མའི་དམིངས་ཡུལ་ནི་གསར་འགོད་རང་དབང་དང་སྨྲ་བརྗོད་རང་དབང་དགོས། ལྐོག་ཟ་རུལ་སུངས་ལ་ངོ་རྒོལ་ཡོད། རྒྱ་ནག་གི་ཆབ་སྲིད་ལམ་ལུགས་ལ་འགྱུར་བ་གཏོང་དགོས་ཞེས་དགོས་འདུན་བཏོན། ད་ལྟ་ལོ་༣༤་ཡི་རྗེས་སུའང་རྒྱ་ནག་དམངས་གཙོར་འགྱུར་མ་ཐུབ། གསར་འགོད་རང་དབང་དང་སྨྲ་བརྗོད་རང་དབང་མེད། རྒྱ་ནག་ལ་ཁྲིམས་ཀྱིས་སྐྱོང་བའི་ལམ་ལུགས་ཤིག་དར་ཐུབ་རྒྱུ་ནི་རྒྱང་ཐག་རིང་དུ་སོང་། ཏིན་ཞའོ་ཕིང་གིས་རྒྱ་ནག་གི་དམར་ཤོག་འགོ་ཁྲིད་ཚོས་མཉམ་རུབ་ཐོག་ཏུ་རྒྱལ་ཁབ་འཛིན་སྐྱོང་བྱ་དགོས་པའི་ལམ་ལུགས་གསར་གཏོད་བྱས་པ་རིང་དུ་དོར། ཞིས་ཅིན་ཕིང་གིས་རྒྱ་ནག་ལ་བཙན་དབང་རིང་ལུགས་སླར་གསོ་བྱས་ནས་མའོ་ཙེ་ཏུང་གི་དུས་སྐབས་དེར་ཕྱིར་ལྡོག་བྱེད་ཀྱི་ཡོད་པའི་གནས་ཚུལ་ཐོན་འདུ
དེང་སྐབས་ལོ་ན་༥༥་ལ་སོན་པའི་ཀྲུག་ཧྥེང་སོ་ནི་པེ་ཅིང་གནམ་བདེ་སྒོ་མོ་ཆེའི་ཐང་གི་དམངས་གཙོའི་ལས་འགུལ་ལ་ཞུགས་མྱོང་བའི་སློབ་ཕྲུག་ཟུར་པ་དང་ཨ་མི་རི་ཀར་བཙན་བྱོལ་དུ་འབྱོར་བ་ཞིག་ཡིན་ཞིང་། ཁོང་གིས་འགྲེམ་སྟོན་ཁང་དེ་རྒྱ་ནག་ལ་རང་དབང་ཐོབ་རྒྱུའི་ཕུགས་བསམ་འཚོ་གནས་བྱ་ཡུལ་དེ་ཡིན། ང་ཚོར་ཕམ་ཉེས་ཅི་ཞིག་བྱུང་བ་དང་འཐབ་རྩོད་ཅི་ཞིག་བྱ་དགོས་ཀྱང་རེ་བ་ནམ་ཡང་བརླག་མི་སྲིད། རྒྱ་ནག་ལ་རང་དབང་ཐོབ་རྒྱུའི་ཕུགས་བསམ་དེ་གསོན་གནས་ཡིན་ཞེས་བཀྲལ། རྒྱ་ནག་གཞུང་གིས་༡༩༨༩་ལོར་གནམ་བདེ་སྒོ་མོ་ཆེའི་ཐང་དུ་སློབ་ཕྲུག་ཅི་ཙམ་བསད་མིན་གྱི་ཁ་གྲངས་གསལ་པོ་ཞིག་གཏན་ནས་ཕྱིར་བསྒྲགས་མ་བྱུང་། འགྲོ་བ་མིའི་ཐོབ་ཐང་དོན་གཉེར་བ་དང་མིག་མཐོང་བདེན་དཔང་པ་ཚོས་རྒྱ་ནག་གཞུང་གིས་སློབ་ཕྲུག་སྟོང་ཕྲག་འགའ་ཞིག་བསད་ཡོད་པ་རེད་ཟེར། འདས་པའི་ལོ་མང་རིང་ཧོང་ཀོང་གི་ས་ཐོག་ཏུ་དྲུག་བཞིའི་ལས་འགུལ་ལ་རྗེས་དྲན་ཚོགས། ༢༠༢༠་ནས་ཧོང་ཀོང་གི་ས་ཐོག་ཏུའང་རྒྱ་ནག་གི་དྲུག་བཞིའི་ལས་འགུལ་ལ་རྗེས་དྲན་ཚོགས་མི་ཆོག་པར་གྱུར།།
རྒྱ་ནག་གཞུང་གིས་གསར་འགྱུར་དང་དྲྭ་ཚིགས། སྐད་འཕྲིན་སོགས་ལ་ཞིབ་བཤེར་བྱས་ནས་རྒྱ་ནག་གི་སྤྱི་ཚོགས་སུ་དྲུག་བཞིའི་ལས་འགུལ་གྱི་དུས་དྲན་གླེང་སློང་ཙམ་ཡང་བྱེད་མི་ཐུབ་པར་བཏང་ཡོད་པར་མ་ཟད། རྒྱ་ནག་གི་འགོ་ཁྲིད་ཚོས་༡༩༨༩་ལོའི་ལས་འགུལ་དེ་གནའ་སྔ་མོ་ཞིག་ཏུ་བྱུང་བའི་ངོ་ལོག་པའི་དོན་རྐྱེན་ཞིག་རེད་ཅེས་ལོ་རྒྱུས་སུ་བསྒྱུར་ནས་མི་རབས་གསར་པ་ཚོས་ཤེས་རྟོགས་ཐུབ་རྒྱུ་འགོག་ཐབས་སུ་འབད། ཐེ་ཝན་དང་ཨ་རི། ཡུ་རོབ་སོགས་སུ་རྒྱ་ནག་གི་དམངས་གཙོའི་ལས་འགུལ་ལ་ཞུགས་པའི་སློབ་ཕྲུག་ཟུར་པ་ཚོ་དང་འགྲོ་བ་མིའི་ཐོབ་ཐང་དོན་གཉེར་བ་ཚོས་དྲུག་བཞིའི་ལས་འགུལ་གྱི་དུས་དྲན་སྲུང་བརྩི་བྱ་རྒྱུ་མཚམས་ཆད་མེད་ཅིང་། གནམ་བདེ་སྒོ་མོ་ཆེའི་ཐང་གི་དམངས་གཙོའི་ལས་འགུལ་གྱི་སློབ་ཕྲུག་ཚོའི་འགོ་ཁྲིད་ཟུར་པ་དང་ནེའུ་ཡོག་གི་འགྲེམ་སྟོན་ཁང་འཛུགས་མཁན་གྲས་ཝང་ཏན་གྱིས་ངོ་རྒོལ་བ་འདས་པོ་ཚོར་གུས་ཞབས་བྱ་རྒྱུ་ནི་ང་ཚོའི་ལས་འགན་ཡིན་བསམས་ཡོད། ཡིད་མ་ཞུམ། འདི་ནི་ངས་རྒྱ་ནག་མི་དམངས་ལ་བསྐུར་བའི་གཏམ་འཕྲིན་ཡིན་ཞེས་གསར་འགོད་པར་གླེང་མོལ་བྱས་འདུག
ཕྱི་ཟླ་༦་པའི་ཚེས་༢་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་དམངས་གཙོ་དོན་གཉེར་བ་ཀྲུག་ཧྥེང་སོ་ཡིས་ངས་༡༩༨༩་ལོའི་ཞོགས་པ་དེར་གནམ་བདེ་སྒོ་མོ་ཆེའི་ཐང་དུ་ལྕགས་ཁྲབ་འཁོར་ལོ་ཡོང་བ་ནམ་ཡང་རྗེད་ཐུབ་ཀྱི་མི་འདུག་ཅེས་སྨྲས། ཁོང་རྒྱ་ནག་ནས་ཨ་མི་རི་ཀར་བཙན་བྱོལ་དུ་འབྱོར་བའི་རྗེས་སུ་ནེའུ་ཛར་སིར་གཞིས་ཆགས། ཀྲུག་ཧྥེང་སོ་ཡིས་ལོ་མང་རིང་རྒྱ་ནག་གི་དམངས་གཙོའི་ལས་འགུལ་ལ་ཞུགས་པའི་སློབ་ཕྲུག་ཚོར་དྲག་གནོན་བྱུང་བའི་དཔང་རྟགས་བསྡུས། ཁོང་གིས་འཚོལ་བསྡུ་བྱས་པའི་དཔང་རྟགས་ཀྱི་གྲས་སུ་ཁྲག་འགོས་པའི་ཨ་ཅོར་དང་ཁྲག་གིས་ཚོས་པའི་འཕྲེད་དར། གསར་ཤོག་དང་འཕྲིན་ཡིག སློབ་ཕྲུག་སྟོང་ཕྲག་མང་པོས་ངོ་རྒོལ་སྐབས་སུ་བཀོལ་སྤྱོད་བྱས་པའི་གུར་སོགས་འདུས། ནེའུ་ཡོག་གྲོང་ཁྱེར་གྱི་འགྲེམ་སྟོན་ཁང་དེའི་བཤམས་རྫས་གཙོ་བོ་ཡང་དངོས་རྫས་དེ་དག་ཡིན་འདུག ཀྲུག་ཧྲེང་སོ་ཡིས་དངོས་རྫས་འདི་རྣམས་རྒྱ་ནག་གི་ཤུལ་བཞག་ཆེས་རྩ་ཆེན་རྣམས་ཡིན། རྒྱ་ནག་དམར་ཤོག་ཚོགས་པས་ནམ་ཡང་བསྒྱུར་མི་ཐུབ་པའི་དཔང་རྟགས་ཡིན་ཞེས་བསྒྲགས།།
ཝང་ཏན་དང་ཀྲུག་ཧྲེང་སོ་གཉིས་ཀས་རྒྱ་ནག་གཞུང་གིས་མི་དམངས་ལ་དྲུག་བཞིའི་ལས་འགུལ་དང་སྲིད་གཞུང་དེ་དྲག་རྩུབ་ཀྱི་རྨང་གཞིའི་ཐོག་ཏུ་ཚུགས་པ་རྗེད་དུ་འཇུག་ཐབས་བྱེད་ཀྱི་འདུག ང་ཚོར་ལོ་རྒྱུས་ཀྱི་བདེན་པ་ཡོད། རྒྱ་ནག་དམར་ཤོག་ཚོགས་པས་ལོ་རྒྱུས་དེ་ནག་སུབ་གཏོང་གི་ཡོད་པར་འགོག་རྒོལ་བྱ་དགོས། ང་ཚོར་འགྲེམ་སྟོན་ཁང་འདི་འཛུགས་དགོས་པའི་ལས་འགན་དང་འོས་འགན་ཡོད་ཅེས་གསལ་བསྒྲགས་སྤེལ། ལོ་ལྟར་རྒྱ་ནག་གི་དྲུག་བཞིའི་ལས་འགུལ་དུས་སུ་ཧོང་ཀོང་གི་དམངས་གཙོ་དོན་གཉེར་བ་ཚོས་མར་མེ་ཁྲོམ་སྐོར་ཚོགས། ༢༠༢༣་གྱི་མགོ་སྟོད་དེར་ཧོང་ཀོང་ས་གནས་གཞུང་གིས་དྲུག་བཞིའི་མར་མེ་ཁྲོམ་སྐོར་བཀོད་སྒྲིག་པ་གསུམ་ལ་བཙོན་འཇུག་གི་ཁྲིམས་ཐག་བཅད། ཧོང་ཀོང་གི་དམངས་གཙོ་དོན་གཉེར་བའི་མཐུན་ཚོགས་ཀྱང་སྒོ་བརྒྱབ། ཚོགས་པ་དེའི་ཚོགས་མི་ཚོར་ཧོང་ཀོང་ས་གནས་ཀྱི་ཁྲིམས་དང་རྒྱལ་ཁབ་ཀྱི་བདེ་འཇགས་བཅའ་ཁྲིམས་ལ་འགལ་འཛོལ་བྱུང་སོང་ཞེས་ནག་ཉེས་བཙུགས།།
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ༡༩༦༦་ནས་༧༦་བར་དུ་རྒྱ་ནག་ལ་ལོ་བཅུའི་རིག་གནས་གསར་བརྗེ་ལངས་ནས་བཟུང་། ༡༩༨༩་ལོར་གནམ་བདེ་སྒོ་མོ་ཆེའི་ཐང་དུ་རྒྱ་ནག་གི་སློབ་ཕྲུག་ཚོས་དུས་ཡུན་གཟའ་འཁོར་བདུན་ལ་དམངས་གཙོའི་ལས་འགུལ་སྤེལ་བ་དེ་འདྲ་ཞིག་བྱུང་མ་མྱོང་། ཏིན་ཞའོ་ཕིང་གིས་བཀའ་ལྟར་རྒྱ་ནག་མི་དམངས་བཅིངས་འགྲོལ་དམག་གི་ལྕགས་ཁྲབ་འཁོར་ལོའི་དཔུང་སྟེ་གནམ་བདེ་སྒོ་མོ་ཆེའི་ཐང་དུ་བཏང་སྟེ་སློབ་ཕྲུག་ཚོ་ཤ་འཐག་པ་ལྟར་ལྕགས་ཁྲབ་འཁོར་ལོའི་འོག་ཏུ་བརྫིས། མཐར་སློབ་ཕྲུག་ཚོ་འུ་ཐུག་ཐབས་ཟད་དུ་གྱུར་ཏེ་ཧོང་ཀོང་དང་ཐེ་ཝན། ཨ་རི་དང་ཁེ་ན་ཌ། དབྱིན་ཡུལ་དང་ཧྥ་རན་སི། འཇར་མན་ཎི་སོགས་ཡུ་རོབ་རྒྱལ་ཁབ་ཁག་ཏུ་བཙན་བྱོལ་དུ་བྲོས། རྒྱ་ནག་གཞུང་གིས་རིག་གནས་གསར་བརྗེའི་དུས་སུ་ནག་ཉེས་ཕོག་པ་ཚོར་དཀར་འདོན་བྱས་ཀྱང་༡༩༨༩་ལོའི་གནམ་བདེ་སྒོ་མོ་ཆེའི་ཐང་གི་དམངས་གཙོའི་ལས་འགུལ་ལ་ཞུགས་པའི་སློབ་ཕྲུག་ཚོར་དཀར་འདོན་མ་བྱུང་། པེ་ཅིང་གི་དབང་འཛིན་པ་ཚོས་སྐབས་དེའི་དམངས་གཙོའི་ལས་འགུལ་དེ་ཆབ་སྲིད་ཀྱི་ཟིང་འཁྲུག་དང་རྒྱལ་ཁབ་ལ་གྱེན་ལོག་རེད་ཅེས་མཐའ་སྡོམ་བརྒྱབ།།
ཕྱི་ཟླ་༦་པའི་ཚེས་༢་ཉིན་ཧོང་ཀོང་གི་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་དམངས་གཙོའི་ལས་འགུལ་གྱི་སློབ་ཕྲུག་གི་འགོ་ཁྲིད་ཟུར་པ་ཝང་ཏན་ནས་ཧོང་ཀོང་དུ་སྒྲུབ་ཐུབ་པ་ཅི་ཡང་མི་འདུག ཧོང་ཀོང་རྒྱ་ནག་གི་གནོན་འཚིར་འོག་ཚུད་ཟིན་པ་རེད། ནེའུ་ཡོག་གི་འགྲེམ་སྟོན་ཁང་འདི་རྒྱ་ནག་པ་གཅིག་པུའི་ཆེད་དུ་མིན། འཛམ་གླིང་མི་དམངས་ཀྱི་དོན་དུ་བཙུགས་པ་ཡིན། ང་ཚོས་ནེའུ་ཡོག་གི་མཐོ་འབྲིང་སློབ་གྲྭ་ཁག་ལ་མཉམ་འབྲེལ་དང་སློབ་ཕྲུག་ཚོ་ལྟ་སྐོར་དུ་ཡོང་རྒྱུ། ཁོ་ཚོས་རྒྱ་ནག་གི་སྐོར་སློབ་སྦྱོང་དང་རྒྱ་ནག་གི་བྱུང་རབས་ཤེས་ཐུབ་པའི་རེ་བ་ཡོད་ཅེས་གསར་འགོད་པའི་དྲི་བར་ལན་བཏབ། ཝང་ཏན་དང་རྒྱ་ནག་གི་དྲུག་བཞིའི་ལས་འགུལ་ལ་ཞུགས་པའི་སློབ་ཕྲུག་ཟུར་པ་ཚོས་ཨ་སྒོར་འབུམ་༥་འདུ་འགོད་ཀྱིས་ནེའུ་ཡོག་གྲོང་ཁྱེར་དུ་འགྲེམ་སྟོན་ཁང་བཙུགས། རྒྱ་ནག་གི་དམངས་གཙོ་དོན་གཉེར་བ་ཁག་ཅིག་གིས་ཚོང་ལས་གཉེར། འགའ་ཤས་ཀྱིས་གཉེན་སྒྲིག་བྱས་ནས་སྒེར་གྱི་འཚོ་བར་རོལ། ཝང་ཏན་དང་ཀྲུག་ཧྲེང་སོ་སོགས་དྲུག་བཞིའི་ལས་འགུལ་ལ་ཞུགས་པའི་སློབ་ཕྲུག་ཟུར་པ་མང་ཆེ་བས་ཕྱི་ལོགས་སུ་རྒྱ་ནག་གི་དམངས་གཙོའི་ལས་འགུལ་རྒྱུན་འཁྱོངས་བྱེད་ཀྱི་ཡོད་པའི་གནས་ཚུལ་ཐོན་འདུག
