རེས་གཟའ་ཕུར་བུ་ཉིན་ཧོང་ཀོང་གི་ཁྲིམས་ཁང་གིས་ཧོང་ཀོང་གི་གསར་འགོད་པ་ཆུང་པུའི་ཀུའིན་དང་པེ་ཏྲིག་ལམ་གཉིས་ཀྱིས་ཧོང་ཀོང་གི་ས་གནས་སྲིད་གཞུང་མགོ་རྟིང་སློག་རྩིས་ཀྱི་ལས་འགུལ་ནང་མཉམ་བཞུགས་བྱས་པའི་ནག་ཉེས་ཡོད་པའི་ཁྲིམས་ཐག་བཅད་འདུག
དེ་ཡང་ཧོང་ཀོང་གི་སི་ཊནྜ་ནིའུས་ཞེས་པའི་དྲ་རྒྱའི་ཐོག་གསར་འགྱུར་འགོད་མཁན་གྱི་རྩོམ་བྲིས་འགན་འཛིན་ཟུར་པ་ཆུང་པུའི་ཀུའིན་དང་ཕྱག་རོགས་རྩོམ་བྲིས་འགན་འཛིན་གཞོན་པ་པེ་ཏྲིག་ལེམ་གཉིས་སྤྱི་ལོ་༢༠༢༡་ལོར་འཇུ་བཟུང་བྱས་ཏེ་ཁོང་གཉིས་ཀྱི་གསར་འགྱུར་ཁང་གིས་རྒྱལ་ཁབ་མགོ་རྟིང་སློག་རྩིས་ཀྱི་བྱེད་སྒོའི་ནང་མཉམ་བཞུགས་བྱས་པའི་ནག་འཛུགས་བྱས་ཡོད་པ་དེར་ད་རེས་ཁྲིམས་ཁང་གིས་དངོས་སུ་ནག་ཉེས་ཡོད་པའི་ཁྲིམས་ཐག་བཅད་འདུག དེ་ནི་སྤྱི་ལོ་༡༩༩༧་ལོར་དབྱིན་ཇིས་ཧོང་ཀོང་གི་བདག་དབང་རྒྱ་ནག་ལ་རྩེས་སྤྲོད་བྱས་རྗེས་གསར་འགོར་པར་ནག་ཉེས་ཀྱི་ཁྲིམས་ཐག་བཅད་པ་ཐོག་མར་དེ་རེད། གལ་སྲིད་ཁྲིམས་ཁང་གིས་ཁོང་གཉིས་ལ་ཉེས་འཛུགས་བྱས་པ་དེར་ཁྲིམས་ཤེར་སྐབས་དཔང་རྟགས་ར་སྤྲོད་བྱུང་ཚེ་ཁོང་གཉིས་ཉུང་མཐར་མོ་གསུམ་རིང་བཙོན་འཛུགས་དང་ཨ་སྒོར་བརྒྱ་ཕྲག་མང་པོའི་ཉེས་ཆད་གཏང་སྲིད་པ་རེད་ཅེས་ཉམས་ཞིབ་པས་འགྲེལ་བརྗོད་བྱས་འདུག
གནས་ཚུལ་ཐོན་པར་གཞིགས་ན་སི་ཊནྜ་ ནིའུས་ཞེས་པའི་དྲ་ལམ་གསར་འགྱུར་ཁང་དེ་སྒོ་མ་རྒྱབ་གོང་གསར་འགྱུར་ཁང་དེས་ཧོང་ཀོང་གི་མང་གཙོ་དང་རང་དབང་ཐོག་རྒྱ་ནག་དབུས་གཞུང་དང་ཧོང་ཀོང་གཞུང་གཉིས་ཀས་རྩིས་མེད་རྡོག་རོལ་བཏང་དང་གཏོང་བཞིན་པའི་སྐྱོན་བརྗོད་བྱེད་མཁན་གྱི་མི་སྣ་མང་པོ་ཞིག་དང་མཉམ་ལས་བྱས་ཏེ་གཞུང་མགོ་རྟིང་སློག་རྩེས་ཀྱི་ངན་ཇུས་ནང་མཉམ་བཞུགས་བྱས་པའི་ཉེས་འཛུགས་བྱུང་བ་རེད། འོན་ཀྱང་ཁོང་གཉིས་ཀྱི་དྲ་ལམ་གྱི་གསར་འགྱུར་ཁང་སྒོ་མ་རྒྱབ་གོང་མང་གཙོ་དང་རང་དབང་ཆེད་རྒྱ་ནག་དབུས་གཞུང་དང་ཧོང་ཀོང་གི་ས་གནས་གཞུང་གཉིས་ལ་སྐྱོན་བརྗོད་བྱེད་མཁན་ཨ་པལ་ ཌེ་ལི་གསར་ཤོག་ཅེས་པ་དེར་ཧོང་ཀོང་གི་བདེ་འཇགས་མི་སྣས་བཙན་ཤུགས་ཆེན་པོས་སྒོ་རྒྱབ་འཇུག་པ་མ་ཟད། དེའི་བདག་པོ་སྐུ་ཞབས་ཇིམྨི་ ལམ་དང་ཁོང་གི་རྩོམ་བྲིས་འགན་འཛིན་སོགས་མང་པོ་ཞིག་འཛིན་བཟུང་བྱས་པ་མ་ཟད། སྐུ་ཞབས་ཇིམྨི་ ལམ་དང་དེ་མིན་ཁག་གཅིག་དུ་དུང་ཡང་བཙོན་འཇུག་འོག་ཡོད་མུས་ཡིན་པ་རེད། དེ་ཡང་རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཟེར་བའི་ཁྲིམས་ལུགས་གསར་པ་ཞིག་སྤྱི་ལོ་༢༠༢༠་ལོར་དངོས་སུ་གཏན་འབེབས་ལག་ལྟར་བྱས་ཡོད་པ་དང་། དེའི་གོང་སྤྱི་ལོ་༢༠༡༩་ལོར་ཧོང་ཀོང་མི་སེར་སྟོང་ཕྲག་མང་པོས་གལ་སྲིད་ཁྲིམས་ལུགས་དེ་དངོས་སུ་གཏན་འདེབས་བྱས་ཚེ་ད་ལྟ་བར་ཧོང་ལ་དབྱིན་ཇིའི་འོག་རང་སྲིད་རང་སྐྱོང་གི་ཐོབ་ཐང་ཆ་ཚང་ཡོད་པ་དེ་དག་མེད་པ་བཟོས་ཏེ་རྒྱ་ནག་སྐམ་ས་ཆེན་མོ་དང་འདྲ་བ་བཟོ་རྒྱུ་ཡིན་པ་ཧོང་ཀོང་གི་མི་མང་ཚོས་ངོས་འཛིན་བྱས་ཏེ་ཟླ་བ་མང་པོར་ངོ་རྒོལ་ཤུགས་བྱས་ཡོད་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་ངོ་རྒོལ་བྱས་ཡོད་ཀྱང་ཕན་ནུས་མ་ཐོན་པར་ངོ་རྒོལ་བྱེད་མཁན་མི་མང་སྐྱུས་མ་དང་གསར་འགོད་པ། ས་གནས་གཞུང་གི་ལས་བྱེད། མང་གཙོ་རྩོད་ལེན་བྱེད་མཁན་གྲོས་ཚོགས་ཀྱི་འཐུས་མི་སོགས་ཧ་ཅང་མང་པོ་འཛིན་བཟུང་བྱས་པ་དང་། མང་པོ་ཞིག་ཐའེ་ཝན་དང་ཨ་རི། དབྱིང་ཡུལ། ཁེ་ན་ཌ་། ཡུ་རོབ་སོགས་རང་དབང་ཅན་གྱི་ཡུལ་གྲུ་མང་པོ་ཞིག་ལ་ཉེན་ཡོལ་དང་སྐྱབས་བྱོལ་དུ་འགྲོ་དགོས་བྱུང་ཡོད་པ་རེད།
ཨེ་པི་དང་རུའི་ཌར་གསར་སྤེལ་ཁང་གཉིས་ནས་བཏུས།
གསར་འགོད་པ། བསྟན་འཛིན་ལྷུན་གྲུབ།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།