དེ་སྔ་༢༠༡༠་ལོར་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་བའི་བོད་པ་ཚོང་པ་དང་ཁོར་ཡུག་སྲུང་སྐྱོབ་པ་ཀརྨ་བསམ་གྲུབ་བཙོན་ཁང་ནས་གློད་གྲོལ་བཏང་ཡོད་ཅིང་། ཨ་རིའི་རླུང་འཕྲིན་ཁང་གི་བལ་ཡུལ་གྱི་གསར་འགོད་པ་ཀུན་བཟང་བསྟན་འཛིན་ལ་བོད་ནས་མིང་དངོས་སུ་བརྗོད་འདོད་མེད་མཁན་ཞིག་གིས་གནས་ཚུལ་མཁོ་སྤྲོད་བྱས་པར་གཞིགས་ན། ཐོག་མར་༢༠༡༠་ལོར་རྒྱ་ནག་གཞུང་གིས་ཀརྨ་བསམ་གྲུབ་འཛིན་བཟུང་བྱས་པ་དང་ལོ་དེའི་ཟླ་༦་ཚེས་༢༤་ཉིན་ཞིན་ཅང་ཡན་ཆི་རྫོང་ཁྲིམས་ཁང་གིས་ལོ་བཅོ་ལྔའི་བཙོན་འཇུག་གི་ཁྲིམས་ཐག་བཅད། ལོ་ལྔའི་རིང་ཆབ་སྲིད་ཀྱི་ཁེ་དབང་ཕྲོགས་ཡོད་པར་མ་ཟད། ད་དུང་རྒྱ་སྒོར་༡༠༠༠༠་ཉེས་ཆད་བཅད། ཡིན་ནའང་ཟླ་འདིའི་ཕྱི་ཚེས་༡༨་ཉིན་ཞིང་ཅང་གི་བཙོན་ཁང་དེ་ནས་ཀརྨ་བསམ་གྲུབ་གློད་གྲོལ་ཐོབ།།
འདས་པའི་ལོ་༡༥་ཙམ་གྱི་རིང་ཀརྨ་བསམ་གྲུབ་ཀྱིས་བཙོན་ཁང་དུ་མནར་གཅོད་མྱངས་ནས་སྐུ་གཟུགས་བདེ་ཐང་མེད་པ་དང་སྨན་བཅོས་བྱེད་དགོས་པར་གྱུར་ཡོད་པའི་གནས་ཚུལ་ཐོན་འདུག ཁོང་ལ་སྨན་ཁང་དུ་བརྟག་དཔྱད་བྱས་ནས་ནད་གཞི་ཅི་ཞིག་ཕོག་ཡོད་མེད་ཀྱི་གནས་ཚུལ་རྣམས་གནས་སྐབས་རིང་གསལ་པོ་ཞིག་ཤེས་ཐབས་བྲལ། མ་འོངས་པར་གནས་སྟངས་ཚང་མ་གསལ་པོ་ཆགས་རྒྱུའི་རེ་བ་འཆང་རྒྱུ་ལས་མ་མཆིས། ཀརྨ་བསམ་གྲུབ་གློད་གྲོལ་བཏང་ནས་ཕ་ཡུལ་དུ་ལོག་བཞིན་པའི་ལམ་དུ་ཤ་ཉེ་སྤུན་མཆེད་སོགས་བསུ་རུ་ཕྱིན་འདུག ད་སྔ་གང་ཅིའི་གནས་ཚུལ་ཞིབ་ཕྲ་བཤད་རྒྱུ་སྟབས་བདེ་མ་རེད་ཅེས་འདི་གའི་འགོད་པར་གནས་ཚུལ་མཁོ་སྤྲོད་བྱས་འདུག
བོད་པ་གནའ་རྫས་བདག་ཉར་བ་དང་ཚོང་པ། ཁོར་ཡུག་སྲུང་སྐྱོབ་པ་ཀརྨ་བསམ་གྲུབ་ལ་རྒྱ་ནག་གཞུང་གིས་དུར་ས་བསྔོགས་ཏེ་ཤུལ་བཞག་རིག་དངོས་རྩ་ཆེན་བརྐུས་འཁྱེར་བྱས་ཚུལ་དང་རྒྱལ་ཁབ་ཀྱི་བདེ་འཇགས་ལ་གནོད་པའི་ལས་འགུལ་སྤེལ་སོང་ཞེས་ནག་ཉེས་བཙུགས་ནས་ལོ་མང་རིང་བཙོན་དུ་བཅུག ཁོང་གི་སྤུན་མཆེད་རིན་ཆེན་བསམ་གྲུབ་དང་འཇིགས་མེད་རྣམ་རྒྱལ་གཉིས་ཀྱང་རྒྱ་ནག་གཞུང་གིས་འཛིན་བཟུང་བྱས་ཏེ་རྒྱལ་ཁབ་ཀྱི་བདེ་འཇགས་ལ་གནོད་པའི་ལས་ཀ་བྱས་པའི་ཉེས་མིང་འོག་རིན་ཆེན་བསམ་གྲུབ་ལ་ལོ་༥་དང་འཇིགས་མེད་རྣམ་རྒྱལ་ལོ་གཅིག་དང་ཕྱེད་ཀའི་རིང་ངལ་རྩོལ་བསྒྱུར་བཀོད་ཀྱི་ཁྲིམས་ཐག་བཅད། ཀརྨ་བསམ་གྲུབ་ནི་བོད་ཡུལ་གོ་འཇོ་རྫོང་། བསམ་འཕེལ་ཡུལ་ཚོའི་སྡོམ་པ་གྲོང་རྡལ་ནས་ཡིན་པའི་གནས་ཚུལ་ཐོན་འདུག
གླེང་སྟེགས།