Your browser doesn’t support HTML5
བཀའ་བརྒྱུད་སྨོན་ལམ་ཆེན་མོ་ཐེངས་སོ་བརྒྱད་པ་གནས་མཆོག་རྡོ་རྗེ་གདན་དུ་འཚོག་བཞིན་པ།
བཀའ་བརྒྱུད་སྨོན་ལམ་ཆེན་མོ་ཐེངས་སོ་བརྒྱད་པ་འདི་བཞིན་འདི་ཚེས་ ༡༤ ནས་འགོ་འཛུགས་ཀྱིས་ཚེས་ ༢༥ བར་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་པོའི་ཉེ་འཁྲིས་སུ་ཆགས་པའི་བཀའ་བརྒྱུད་དགོན་པའི་ནང་འཚོགས་བཞིན་ཡོད་པ་དང་། དེ་ཡང་ཐོག་མར་སྔོ་འགྲོའི་གསུང་ཆོས་ཉིན་གྲངས་གསུམ་དང་། སྨོན་ལམ་དངོས་གཞི་ཉིན་བརྒྱད་རིང་འཚོགས་བཞིན་ཡོད་པ་རེད། དེ་སོང་ཙང་འདི་ག་ཨ་རིའི་རླུང་འཕྲིན་ཁང་གི་གསར་འགོད་པས་བཀའ་བརྒྱུད་སྨོན་ལམ་ཆེན་མོའི་སྤྱི་ཁྱབ་ཆོས་ཁྲིམས་པ་མཁན་པོ་སྐལ་བཟང་ཉི་མ་ལགས་སུ་སྨོན་ལམ་ཚོགས་ཕྱོགས་དང་འབྲེལ་བའི་སྐོར་ལ་བཅར་འདྲི་ཞུས་པར་ཁོང་གིས་གཙོ་བོ་༧གོང་ས་མཆོག་གཙོས་པའི་བཀའ་རབས་བརྒྱུད་པའི་བླ་ཆེན་རྣམ་སྐུ་ཚེ་བརྟན་པ་དང་འཛམ་གླིང་ཞི་བདེ་སོགས་ཡོང་བའི་ཆེད་དུ་ཡིན་པ་གསུང་གནང་གི་འདུག དེ་བཞིན་འཚོགས་བཞིན་པའི་བཀའ་བརྒྱུད་སྨོན་ཆེན་མོ་འདི་བཞིན་དཔལ་རྒྱལ་དབང་ཀརྨ་པ་མཆོག་གི་དགོངས་བཞེད་གཞིར་བཟུང་ཏའི་སི་ཏུ་རིན་པོ་ཆེ་མཆོག་ཚོགས་མགོན་དུ་དབུ་བཞུགས་ཀྱི་སྨོན་ལམ་འཚོགས་བཞིན་ཡོད་པ་གསུངས་གནང་བྱུང་ལ། ཕྱོགས་མཚུངས་སྨོན་ལམ་ཐོག་རྒྱ་བལ་འབྲུག་གསུམ་ནང་ཡོད་པའི་དགོན་སྡེ་གྲྭ་ཚང་ཁག་གི་བླ་སྤྲུལ་གཙོས་པས་གྲྭ་བཙུན་ཐོ་བཀོད་བྱུང་བ་ཁྱོན་ ༤༦༠༠ ལྷག་ལྷན་འཛོམས་ཀྱིས་སྨོན་ལམ་གསུང་བཞིན་ཡོད་པ་དང་། འདོན་ཆོ་ག་གཙོ་བོ་ནི་རྒྱལ་དབང་ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོ་མཆོག་གིས་མཛད་པའི་སྨོན་ལམ་གྱི་ཆོ་ག་དང་བཟང་སྤྱོད་སྨོན་ལམ་སོགས་འདོན་བཞིན་ཡོད་པ་མཁན་པོ་སྐལ་བཟང་ཉི་མ་ལགས་ཀྱིས་མུ་མཐུད་འགྲེལ་བརྗོད་གནང་བྱུང་།
བཀའ་བརྒྱུད་སྨོན་ལམ་ཆེན་མོ་འདི་ནི། ༧རྒྱལ་དབང་ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོའི་སྐབས་ཐོག་མར་བྱུང་བ་ཞིག་ཡིན་པ་དང་། ཕྱི་སུ་བོད་ནང་དུས་འགྱུར་རིམ་པར་བྱུང་བར་རྟེན་སྨོན་ལམ་ཚོགས་ཐུབ་མེད་ན་ཡང་། ཕྱི་ལོ་༡༩༨༣ ལོར་༧སྐྱབས་རྗེ་ཀ་ལུ་རིན་པོ་ཆེ་མཆོག་དང་འབོ་དཀར་རིན་པོ་ཆེ་མཆོག་རྣམ་གཉིས་ནས་རྒྱ་གར་དང་བསྐྱར་གསོ་གནང་ཡོད་པ་དང་། ཕྱི་ལོ་ ༢༠༠༤ ལོར་༧རྒྱལ་བ་ཀརྨ་པ་མཆོག་ནས་སྒྲིག་གཞི་སོགས་འདུལ་ཁྲིམས་དང་མཐུན་པར་བསྐྱར་བཅོས་མཛད་དེ།ལོ་ལྟར་གནས་མཆོག་རྡོ་རྗེ་གདན་དུ་སྨོན་ལམ་ཆེན་མོ་འདི་འཚོགས་གནང་གི་ཡོད་པ་རེད།