༄༅།། ཐེ་ཝན་གྱི་སྲིད་འཛིན་གཞོན་པ་དང་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིང་ཏེས་མཚོ་གླིང་དེའི་གཞུང་འབྲེལ་གྱི་མིང་ལ་འགྱུར་བ་གཏོང་འཆར་མེད། ཐེ་ཝན་རྒྱ་ནག་གི་མངའ་འོག་ཏུ་གཏོགས་པ་ཞིག་མིན་ཞེས་བསྐྱར་དུ་བཟློས། ཕྱི་ཟླ་༨་པའི་ཚེས་༡༥་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ལེ་ཆིང་ཏེས་ཐེ་ཝན་ནི་ཀྲུང་ཧྭ་མིན་གོ་ཞེས་རང་བཙན་གྱི་རྒྱལ་ཁབ་ཅིག་ཡིན་པ་དང་མཚོ་གླིང་དེའི་གཞུང་འབྲེལ་གྱི་མིང་ལ་འགྱུར་བའམ། ཡང་ན་མཚོ་འགག་ཕྱོགས་གཉིས་ཀྱི་གནས་བབ་ལ་འགྱུར་བ་གཏོང་འདོད་མེད། ཐེ་ཝན་མི་དམངས་ཀྱིས་རང་གི་མདུན་ལམ་ཐག་གཅོད་བྱ་དགོས། ང་ཚོས་བདེན་དོན་ལ་བརྩི་འཇོག་དང་ངས་དེ་ལ་དོན་དངོས་རིང་ལུགས་ཟེར་གྱི་ཡོད། ཐེ་ཝན་ནི་ཀྲུང་ཧྭ་མིན་གོ་ཞེས་བདག་དབང་ལྡན་པའི་རང་བཙན་རྒྱལ་ཁབ་ཅིག་ཡིན། དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་མིན། ཀྲུང་ཧྭ་མིན་གོ་རྒྱ་ནག་གི་མངའ་འོང་ཏུ་མི་འདུས་པས་ང་ཚོས་རང་བཙན་གསལ་བསྒྲགས་བྱ་དགོས་དོན་མེད་ཅེས་བྷུ་ལུམ་བྷག་གསར་འགྱུར་ལས་ཁང་གིས་བཅར་འདྲིའི་སྐབས་སུ་ལན་འདེབས་བྱས་འདུག
རྒྱ་ནག་གི་ནང་འཁྲུག་དུས་སུ་གོ་མིན་ཏང་སྲིད་གཞུང་ལ་ཕམ་ཉེས་བྱུང་སྟེ་ཐེ་ཝན་དུ་བྲོས། ལེ་ཆིང་ཏེས་ད་ལྟའི་ཀྲུང་ཧྭ་མིན་གོ་ཞེས་པའི་མིང་འདི་ང་ཚོའི་རྩ་ཁྲིམས་སུ་འཁོད་ཡོད། སྲིད་འཛིན་ཚེ་དབྱིན་ཝེན་ནས་ཐེ་ཝན་གྱི་སྤྱི་ཚོགས་ཆིག་སྒྲིལ་འབྱུང་ཐབས་སུ་ང་ཚོའི་རྒྱལ་ཁབ་ཀྱི་མིང་ལ་ཀྲུང་ཧྭ་མིན་གོ་ཞེས་འབོད་ཀྱི་ཡོད་པར་འགྱུར་བ་མ་བཏང་བ་རེད། ང་ཚོ་དགྲ་རུ་འགྱུར་འདོད་མེད་པ་དང་གྲོགས་སུ་འགྱུར་འདོད་ཡོད། རྒྱ་ནག་དམངས་གཙོར་གྱུར་ནས་རང་དབང་ལོངས་སུ་སྤྱོད་ཐུབ་པ་ཞིག་ལ་བྱུང་ན་ང་ཚོ་དགའ་མོས་ཡོད། ཇི་སྲིད་རྒྱ་ནག་གིས་ཐེ་ཝན་ལ་དམག་བརྒྱབ་ནས་དྲག་གནོན་བྱ་རྒྱུའི་སྲིད་ཇུས་མ་དོར་བར་དུ་ཐེ་ཝན་གྱི་དམག་གི་སྟོབས་ཤུགས་ཡར་རྒྱས་གཏོང་རྒྱུ་མཚམས་འཇོག་བྱེད་མི་སྲིད། བཙན་དབང་རིང་ལུགས་ལ་རྔམ་འཇིགས་ཅི་ཙམ་ཆེ་ཡང་ང་ཚོ་སྐྲག་གི་མེད། ང་ཚོས་རང་དབང་དང་དམངས་གཙོའི་ལྟ་གྲུབ་འཛིན་ངེས་ཡིན། ཐེ་ཝན་ལ་བདེ་འཇགས་ཡོད་ན་འཛམ་གླིང་ལ་བདེ་འཇགས་ཡོད་པ་དང་ཐེ་ཝན་མཚོ་འགག་ཏུ་ཞི་བདེ་ཡོད་ན་འཛམ་གླིང་ལ་ཞི་བདེ་ཡོད་ཅེས་བཀྲལ།།
༢༠༢༤་ལོའི་ཕྱི་ཟླ་དང་པོའི་ནང་ཐེ་ཝན་ལ་སྲིད་འཛིན་དང་གྲོས་ཚོགས་འཐུས་མི་རྣམས་འོས་འདེམས་བྱེད་ཀྱི་ཡོད་མོད། འོན་ཀྱང་སྲིད་འཛིན་ཚེ་དབྱིན་ཝེན་གྱིས་ལས་དུས་གཉིས་ལ་སྲི་ཞུ་བསྒྲུབས་ཟིན་པས་སླར་ཡང་འོས་བསྡུར་འགྲན་ཞུགས་བྱེད་མི་ཆོག་ཅིང་། ཐེ་ཝན་གྱི་དམངས་གཙོ་ཡར་ཐོན་ཚོགས་པས་ལོ་རྗེས་མའི་སྲིད་འཛིན་འོས་བསྡུར་སྲིད་འཛིན་གཞོན་པ་ལེ་ཆིང་ཏེ་འོས་མིར་བདམས། སྲིད་འཛིན་ཚེ་དབྱིན་ཝེན་གྱིས་རྒྱ་ནག་ལ་གྲོས་མོལ་བྱ་དགོས་ཞེས་འབོད་སྐུལ་ལན་མང་ཞུས་ཀྱང་ཡ་ལན་མ་བྱུང་ཞིང་། ཐེ་ཝན་གྱི་སྲིད་འཛིན་གཞོན་པ་ལེ་ཆིང་ཏེས་ཆེ་མཐོང་དང་འདྲ་མཉམ་ཡོད་ན་རྒྱ་ནག་ལ་གྲོས་མོལ་གྱི་སྒོ་མོ་རྟག་ཏུ་ཕྱེ་ཡོད་ཟེར། ལེ་ཆིང་ཏེ་ལྷོ་ཨ་མི་རི་ཀའི་རྒྱལ་ཁབ་པ་ར་གྷ་ཡེའི་སྲིད་འཛིན་གསར་པའི་ཁྲི་སྟོན་མཛད་སྒོར་ཞུགས། པ་ར་གྷ་ཡེ་ནི་ཐེ་ཝན་ལ་ཕྱི་འབྲེལ་བཙུགས་ཡོད་པའི་རྒྱལ་ཁབ་༡༣་ཡོད་པ་དེ་དག་གི་གྲས་ཤིག་ཡིན་པ་དང་ལེ་ཆིང་ཏེ་ཨ་མི་རི་ཀ་བརྒྱུད་ནས་པ་ར་གྷ་ཡེ་ལ་བསྐྱོད་པར་རྒྱ་ནག་གིས་ཁ་རྡུང་དྲག་པོ་བཏང་འདུག
ཕྱི་ཟླ་༨་པའི་ཚེས་༡༤་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ཕྱི་སྲིད་ལྷན་ཁང་གིས་ཨ་རི་དང་ཐེ་ཝན་གྱི་གཞུང་འབྲེལ་མི་སྣ་ཚོ་ཐུག་འཕྲད་བྱེད་མི་ཆོག་པ་དང་ཐེ་ཝན་རང་བཙན་གྱི་ཁ་བྲལ་རིང་ལུགས་པ་ཚོར་འབྲེལ་བ་བྱས་ན་མཐའ་གཅིག་ཏུ་ངོ་རྒོལ་ཡོད་ཅེས་གསལ་བསྒྲགས་སྤེལ། ཐེ་ཝན་དང་ཨ་རི་གཉིས་ཀས་སྲིད་འཛིན་གཞོན་པ་ལེ་ཆིང་ཏེ་ཚུར་ཕྱོགས་ཨ་རིའི་ནེའུ་ཡོག་གྲོང་ཁྱེར་དུ་འབབ་སྡོད་དང་ཕར་ཕྱོགས་ཨ་རིའི་སན་ཧྥ་རན་སེ་སི་ཀོ་གྲོང་ཁྱེར་དུ་འབབ་སྡོད་བྱེད་ཀྱི་ཡོད་པ་ནི་རྒྱུན་ལྡན་ཞིག་ཡིན་ཞེས་ལན་གླན། ཨ་མི་རི་ཀས་ཐེ་ཝན་གྱི་མཐོ་རིམ་གཞུང་འབྲེལ་མི་སྣ་ཚོ་ཨ་མི་རི་ཀ་བརྒྱུད་ནས་རྒྱལ་ཁབ་གཞན་ལ་སྐྱོད་ཀྱི་ཡོད་ཀྱང་གཞུང་འབྲེལ་མིན། ཨ་མི་རི་ཀས་རྒྱ་ནག་གཅིག་གི་རྩ་དོན་རྩ་འཛིན་བྱེད་བཞིན་པར་འགལ་འཛོལ་བྱུང་མེད། ༢༠༢༢་ལོའི་ཕྱི་ཟླ་དང་པོའི་ནང་དུའང་ལེ་ཆིང་ཏེ་ཨ་མི་རི་ཀ་བརྒྱུད་ནས་རྒྱལ་ཁབ་གཞན་ལ་བསྐྱོད་པ་རེད། དེ་ནི་རྒྱུན་ལྡན་གྱི་ལམ་སྲོལ་ཞིག་ཡིན་ཞེས་རྒྱ་ནག་གི་སྐྱོན་བརྗོད་བཀག
ལོ་ན་༦༣་ལ་སོན་པའི་ཐེ་ཝན་གྱི་སྲིད་འཛིན་གཞོན་པ་ལེ་ཆིང་ཏེ་ཨ་རིའི་ཧར་ཝར་ཌི་སློབ་གྲྭ་ཆེན་མོ་ནས་སློབ་སྦྱོང་ཐོན། ཁོང་གིས་མངོན་སུམ་འཛེམ་མེད་ཀྱིས་ཐེ་ཝན་རང་བཙན་གྱི་ལངས་ཕྱོགས་བཟུང་སྟེ་རང་གིས་རང་ལ་ཐེ་ཝན་མི་དམངས་ཀྱི་རང་བཙན་འཐབ་རྩོད་ལ་ཞུགས་པའི་དོན་དམ་རིང་ལུགས་པ་ཞེས་མིང་བཏགས། དེར་བརྟེན་ལེ་ཆིང་ཏེ་རྒྱ་ནག་གི་སྡང་དགྲ་རུ་གྱུར་ཡོད་པ་དང་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མིར་བདམས་པའི་རྗེས་སུ་རྒྱ་ནག་ལ་སྐད་ཆ་འཇམ་པོ་བཤད་རྒྱུ་མགོ་བརྩམས། ཞིས་ཅིན་ཕིང་ནས་སྲིད་དབང་བཟུང་བའི་རྗེས་སུ་རྒྱ་ནག་གིས་དམག་དོན་དང་ཆབ་སྲིད། ཕྱི་འབྲེལ་དང་དཔལ་འབྱོར། ཚོང་ལས་སོགས་ཕྱོགས་གང་ཐད་དུ་ཐེ་ཝན་ལ་གནོན་ཤུགས་སྤྲད་ནས་མཚོ་གླིང་དེར་ཕྱི་འབྲེལ་བཙུགས་ཡོད་པའི་རྒྱལ་ཁབ་ཁག་རྒྱ་ནག་གི་ཕྱོགས་སུ་བཀུག རྒྱལ་སྤྱིའི་ཐོག་ཏུ་ཐེ་ཝན་ལ་ཕྱི་འབྲེལ་བཙུགས་ཡོད་པའི་རྒྱལ་ཁབ་ཇེ་ཉུང་དང་ཇེ་ཉུང་དུ་སོང་། ཐེ་ཝན་གྱིས་ཀྱང་ཨ་རི་གཙོས་ཡུ་རོབ་རྒྱལ་ཁབ་ཁག་དང་འཛམ་གླིང་གི་དམངས་གཙོ་དང་རང་དབང་། ཆབ་སྲིད་ཀྱི་ལམ་ལུགས་དང་ལྟ་གྲུབ་མཐུན་པའི་རྒྱལ་ཁབ་ཁག་ལ་འབྲེལ་བ་འཛུགས་རྒྱུ་ཤུགས་ཆེ་རུ་བཏང་ཡོད་པའི་གནས་ཚུལ་ཐོན་འདུག
སྔ་ལོའི་ཕྱི་ཟླ་༨་པའི་ནང་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་ཕེ་ལོ་སི་དང་སྐུ་ཚབ་ཚོགས་པ་ཞིག་ཐེ་ཝན་ལ་འཚམས་འདྲིར་ཕེབས་པའི་རྗེས་སུ་རྒྱ་ནག་གིས་མཚོ་གླིང་དེ་མཐའ་བསྐོར་ནས་སྐམ་མཚོ་གནམ་གསུམ་གྱི་དམག་སྦྱོང་བྱས་ནས་སྡིགས་ར་བསྐུལ། ཉེ་ཆར་ཕྱི་ཟླ་༣་པའི་ནང་ཐེ་ཝན་གྱི་སྲིད་འཛིན་ཚེ་དབྱིན་ཝེན་དང་ཨ་རིའི་གྲོས་ཚོགས་འོག་མའི་ཚོགས་གཙོ་གསར་པ་ཁེ་ཝིན་མ་ཁར་ཐི་གཉིས་ཨ་རིའི་ས་ཐོག་ཏུ་ཐུག་འཕྲད་གྲོས་མོལ་བྱས་པའི་རྗེས་སུའང་རྒྱ་ནག་གིས་ཐེ་ཝན་གྱི་མཐའ་འཁོར་དུ་དམག་སྦྱོང་བྱས་ནས་རྣམ་འགྱུར་དྲག་པོ་བསྟན། ཕྱི་ཟླ་༨་པའི་ཚེས་༡༥་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཐེ་ཝན་གྱི་སྲིད་འཛིན་གཞོན་པ་ཨ་མི་རི་ཀ་བརྒྱུད་ནས་པ་ར་གྷ་ཡེ་ལ་བསྐྱོད་ཀྱང་རྒྱ་ནག་གིས་ཐེ་ཝན་གྱི་མཐའ་འཁོར་དུ་དམག་སྦྱོང་ཆེན་པོ་བྱེད་ཀྱི་ཡོད་པ་རྣམ་པ་མི་མངོན། ཐེ་ཝན་གྱི་རྒྱལ་སྲུང་ལྷན་ཁང་གིས་དུས་དང་རྣམ་པ་ཀུན་ཏུ་རྒྱ་ནག་གི་འཇིགས་སྐུལ་ལ་དོགས་ཟོན་དང་གྲ་སྒྲིག་ཨང་གསར། ཐེ་ཝན་གྱི་རྒྱལ་སྲུང་ལྷན་ཁང་གི་མགྲིན་ཚབ་པ་སུན་ལི་ཧྥང་གིས་(Sun Li-fang)་རྒྱ་ནག་དམར་ཤོག་ཚོགས་པས་འཇིགས་སྣང་བསྐུལ་རུང་ཐེ་ཝན་གྱི་དམག་གིས་འཁྲུག་རྩོད་མི་སློང་བ་དང་དགྲ་ལ་མི་སྐྲག་པའི་རྩ་དོན་རྒྱུན་འཁྱོངས་བྱེད་ཀྱི་ཡོད་ཅེས་བསྒྲགས།།
ཐེ་ཝན་གྱི་རྒྱལ་སྲུང་ལྷན་ཁང་གི་མགྲིན་ཚབ་པ་སུན་ལི་ཧྥང
ཕྱི་ཟླ་༨་པའི་ཚེས་༡༤་ཉིན་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གཟའ་ཟླ་བའི་ཉིན་ཨ་མི་རི་ཀས་རྒྱ་ནག་ལ་ཐེ་ཝན་གྱི་སྲིད་འཛིན་གཞོན་པ་ཨ་རི་བརྒྱུད་ནས་རྒྱལ་ཁབ་གཞན་ལ་བསྐྱོད་པ་གནས་ཚུལ་ཚབས་ཆེན་ཞིག་ཏུ་བསྒྱུར་ན་དགེ་མཚན་མེད་ཅེས་ནན་བརྗོད་བྱས་འདུག ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་ཝེ་དཱན་ཏ་པ་ཊེལ་གྱིས་རྒྱ་ནག་གིས་གནས་ཚུལ་དེ་ཚབས་ཆེན་ཞིག་ཏུ་མ་བསྒྱུར། འདས་པའི་ལོ་༢༠་ཐམ་པའི་རིང་ཐེ་ཝན་གྱི་སྲིད་འཛིན་གཞོན་པ་རྣམས་ཨ་མི་རི་ཀ་བརྒྱུད་ནས་རྒྱལ་ཁབ་གཞན་ལ་ཐེངས་༡༡་ཕྱིན་འདུག ཨ་མི་རི་ཀས་རྒྱ་ནག་གཅིག་གི་རྩ་དོན་ལ་རྒྱབ་འགལ་བྱས་མེད། ང་ཚོར་མཚོ་འགག་ཕྱོགས་གཉིས་ཀྱི་གནས་བབ་དེར་འགྱུར་བ་གཏོང་འདོད་མེད། རྒྱ་ནག་གིས་དེ་ལ་ལན་ཁག་དཀྲིས་ནས་གཞན་ལ་བཙན་དྲག་བསྐུལ་མི་ཉན་ཞེས་གསར་འགོད་གསལ་བསྒྲགས་སྤེལ། ཨ་རིའི་གཞུང་གིས་ཐེ་ཝན་གྱི་སྲིད་འཛིན་གཞོན་པར་ཕེབས་བསུ་ཞུས་མེད་ཀྱང་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་མེག་མེ་ཀོལ་སོགས་ཀྱིས་ལེ་ཆིང་ཏེ་ལ་དགའ་བསུའི་གསལ་བསྒྲགས་སྤེལ་བའི་གནས་ཚུལ་ཐོན་འདུག
ཨ་རིའི་གཞུང་གིས་ཐེ་ཝན་གྱི་སྲིད་འཛིན་གཞོན་པར་ཕེབས་བསུ་ཞུས་མེད་ཀྱང་གྲོས་ཚོགས་འོག་མའི་ཕྱི་འབྲེལ་ཚོགས་ཆུང་གི་ཚོགས་གཙོ་མེག་མེ་ཀོལ་
ད་ལོའི་ཕྱི་ཟླ་༧་པའི་ཚེས་༥་ཉིན་བྷུ་ལུམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ༢༠༢༤་ལོའི་ཐེ་ཝན་གྱི་སྲིད་འཛིན་འོས་འདེམས་ནི་ཨ་རི་དང་རྒྱ་ནག་གཉིས་ཀར་གནད་འགག་ཅིག་ཏུ་གྱུར་འདུག ལོ་རྗེས་མའི་ཕྱི་ཟླ་དང་པོའི་ནང་ཐེ་ཝན་མི་དམངས་ཀྱིས་སྲིད་འཛིན་དང་གྲོས་ཚོགས་འཐུས་མི་རྣམས་འོས་འདེམས་བྱས་ནས་གྲུབ་འབྲས་ཅི་ཞིག་ཐོན་ཡང་རྒྱ་ནག་དང་ཨ་རིའི་འབྲེལ་བར་ཤུགས་རྐྱེན་ཐེབས་ཐུབ། འོས་འདེམས་དེ་ཐེ་ཝན་མཚོ་འགག་གི་ཞི་བདེ་བརྟན་ལྷིང་ལ་འབྲེལ་བ་ཡོད་པའི་གནད་དོན་ཞིག་རེད། ཨ་མི་རི་ཀས་རྒྱ་ནག་གཅིག་གི་རྩ་དོན་རྒྱུན་འཁྱོངས་བྱེད་ཀྱི་ཡོད་ཀྱང་ཐེ་ཝན་དམར་ཤོག་གི་དབང་བསྒྱུར་འོག་ལ་ཚུད་དུ་འཇུག་འདོད་མེད། ཨ་རིས་མཚོ་འགག་ཕྱོགས་གཉིས་ཞི་བའི་སྒོ་ནས་གཅིག་གྱུར་བྱ་དགོས་ཟེར། ༡༩༧༩་ལོར་ཨ་མི་རི་ཀས་ཐེ་ཝན་ལ་འབྲེལ་བ་བཅད་ནས་རྒྱ་ནག་ལ་ཕྱི་འབྲེལ་བཙུགས། ཨ་རིའི་གྲོས་ཚོགས་ཀྱིས་ཨ་མི་རི་ཀས་ཐེ་ཝན་ལ་རང་སྲུང་གི་མཚོན་ཆ་བཙོང་དགོས་ཞེས་ཁྲིམས་ཡིག་གཏན་འབེབས་བྱས་ནས་ཐེ་ཝན་ལ་གཞུང་འབྲེལ་མིན་པའི་འབྲེལ་བ་བཙུགས་པའི་གནས་ཚུལ་ཐོན་འདུག