༄༅།། ལྷོ་བྱང་ཀོ་རི་ཡ་གཉིས་ཀྱིས་ཀོ་རི་ཡའི་དམག་འཁྲུག་མཚམས་བཞག་ནས་ལོ་༧༠་ཕྱིན་པའི་དུས་དྲན་སྲུང་བརྩི་ཞུས། ཀོ་རི་ཡའི་དམག་འཁྲུག་གིས་ལོ་༧༠་ཐམ་པའི་རྗེས་སུའང་ལྷོ་བྱང་གཉིས་ཀྱི་ཆབ་སྲིད་དང་བདེ་འཇགས་སྲུང་སྐྱོབ། ཕྱི་སྲིད་བཅས་ལ་ཁ་ལོ་སྒྱུར་གྱི་ཡོད་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༢༧་ཉིན་ཉི་ཧོང་གི་ཎི་ཁེ་གསར་ཁག་གིས་གནས་ཚུལ་ཐོན་པ་ལྟར་ན། གཟའ་འཁོར་འདིར་བྱང་ཀོ་རི་ཡས་རྒྱ་ནག་དང་ཨུ་རུ་སུའི་སྐུ་ཚབ་ཚོགས་པ་གཉིས་གདན་འདྲེན་ཞུས་ནས་ཀོ་རི་ཡའི་དམག་འཁྲུག་མཚམས་བཞག་པའི་དུས་དྲན་མཛད་སྒོ་ཚོགས། ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་རྒྱལ་ཁབ་དེའི་ཕུ་སན་གྲོང་ཁྱེར་དུ་དམག་འཁྲུག་གི་དྲན་རྟེན་ཁང་ཞིག་ཡོད་སར་ཕེབས་ནས་ཨ་རི་དང་ལྷོ་ཀོ་རི་ཡའི་དམག་དཔུང་གི་མཉམ་དུ་ཀོ་རི་ཡའི་དམག་འཁྲུག་དུས་སུ་ཚེ་སྲོག་ཤོར་བའི་མཉམ་འབྲེལ་རྒྱལ་ཚོགས་ཀྱི་དམག་མི་འདས་པོ་རྣམས་ལ་མྱ་ངན་དང་རྗེས་དྲན་ཚུགས། ༡༩༥༠་ཐམ་པའི་ལོར་བྱང་ཀོ་རི་ཡའི་དམག་གིས་ལྷོ་ཀོ་རི་ཡར་བཙན་འཛུལ་བྱས་ནས་རྒྱལ་ས་སོལ་བླངས། ཨ་རིས་འགོ་ཁྲིད་པའི་མཉམ་འབྲེལ་རྒྱལ་ཚོགས་ཀྱི་དམག་གིས་བྱང་ཀོ་རི་ཡར་ཁ་གཏད་བཅག རྒྱ་ནག་གིས་བྱང་ཀོ་རི་ཡར་རྒྱབ་སྐྱོར་བྱས་ནས་ལོ་༣་ལ་ཀོ་རི་ཡའི་དམག་འཁྲུག་ལངས། ༡༩༥༣་ལོའི་ཕྱི་ཟླ་༧་པའི་ཚེས་༢༧་ཉིན་ཀོ་རི་ཡའི་དམག་འཁྲུག་མཚམས་འཇོག་གི་གྲོས་མཐུན་བཞག
ཀོ་རི་ཡའི་དམག་འཁྲུག་རྗེས་སུ་ཨ་མི་རི་ཀས་རྒྱབ་སྐྱོར་འོག་ལྷོ་ཀོ་རི་ཡར་དམངས་གཙོ་དང་ཁྲོམ་རའི་དཔལ་འབྱོར་ལམ་ལུགས་ཚུགས་ནས་གྲུབ་འབྲས་གཡུར་དུ་ཟ་བ་ཞིག་ཐོན། ལྷོ་ཀོ་རི་ཡའི་བདེ་འཇགས་སྲུང་སྐྱོབ་དོན་དུ་ཨ་མི་རི་ཀའི་དམག་མི་༢༨༥༠༠་གཏན་དུ་ལྷོ་ཀོ་རི་ཡའི་ས་ཐོག་ཏུ་འགྲེམ་འཇོག་བྱས། བྱང་ཀོ་རི་ཡ་ནི་སྔར་བཞིན་གྲོགས་མེད་ཁེར་རྐྱང་དང་དབུལ་ཕོངས། བྱང་ཀོ་རི་ཡའི་གཞུང་གིས་རྡུལ་ཕྲན་མཚོན་ཆ་བཟོ་སྐྲུན་དང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་སྟེ་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཁང་གིས་ཉེས་ཆད་བཅད། ད་དུང་ཡང་བྱང་ཀོ་རི་ཡར་རྒྱལ་སྤྱིའི་སྤྱི་ཚོགས་སུ་རྒྱ་ནག་མ་གཏོགས་མཐུན་གྲོགས་རྒྱལ་ཁབ་ཆེན་པོ་ཞིག་མེད་ཅིང་། ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་གྱི་སྲིད་གཞུང་གིས་རང་གི་རྒྱལ་ཁབ་དེའི་བདེ་འཇགས་སྲུང་སྐྱོབ་དོན་དུ་ཨ་མི་རི་ཀར་བདེ་འཇགས་སྲུང་སྐྱོབ་མཉམ་འབྲེལ་ཤུགས་ཆེ་རུ་གཏོང་རྒྱུའི་སྲིད་ཇུས་རིམ་པ་ཞིག་ལག་ལེན་བསྟར། ༢༠༢༡་ནས་བྱང་ཀོ་རི་ཡའི་རྡུལ་ཕྲན་མཚོན་ཆ་དང་འཕུར་མདེལ་ཚོད་ལྟ་བྱ་རྒྱུ་མང་དུ་བཏང་ཡོད་པའི་གནས་ཚུལ་ཐོན་འདུག
ཕྱི་ཟླ་༧་པའི་ཚེས་༢༦་ཉིན་བྷི་བྷི་སི་གསར་འགྱུར་ལས་ཁུངས་ཀྱིས་གནས་ཚུལ་སྤེལ་བ་ལྟར་ན། ༡༩༥༣་ལོར་ཀོ་རི་ཡའི་དམག་འཁྲུག་མཚམས་འཇོག་གི་གྲོས་མཐུན་བཞག་ཀྱང་ཞི་བདེའི་ཆིངས་ཡིག་ཅིག་འཇོག་མ་ཐུབ། དེར་བརྟེན་ལྷོ་ཀོ་རི་ཡའི་དམག་མི་ཁྲི་ཚོ་༥་ནས་ཁྲི་ཚོ་༨་ཡས་མས་ཤིག་བྱང་ཀོ་རི་ཡས་འཛིན་བཟུང་བྱས་ཏེ་གཏན་ནས་རང་ཡུལ་དུ་ཕྱིར་ལོག་མ་ཐུབ། འདས་པའི་ལོ་༧༠་ཐམ་པའི་རིང་ལྷོ་བྱང་ཀོ་རི་ཡ་གཉིས་ཀྱིས་འཐབ་འཁྲུག་ཆུང་ཚགས་རེ་བརྒྱབ་ཀྱང་དམག་འཁྲུག་ཆེན་པོ་ཞིག་མ་ལངས། དེང་སྐབས་ལོ་༩༢་ལ་སོན་པའི་ལི་ཏེ་པོང་ནི་ཀོ་རི་ཡའི་དམག་འཁྲུག་ལ་ཞུགས་པའི་འཐབ་མོ་བ་ཟུར་པ་ཞིག་ཡིན་ཞིང་། ཁོ་པ་མལ་ནས་ལྡང་སྟེ་ཕྱི་རུ་འབུད་རྒྱུར་དེ་ཙམ་མི་དགའ། ཁོང་གི་ལག་པ་གཡོན་པའི་མཛུབ་མོ་༣་མེད་པ་ནི་དམག་འཁྲུག་གི་དུས་སུ་རྨས་སྐྱོན་ཕོག་པ་མིན་པ་སྟེ། ལི་ཏེ་པོང་གིས་ལོ་༥༤་ལ་བྱང་ཀོ་རི་ཡའི་རྡོ་སོལ་གྱི་གཏེར་ཁ་ཞིག་ཏུ་ངལ་རྩོལ་བརྒྱུགས་ནས་ལག་པའི་མཛུབ་མོ་རྣམས་ཆད། ཁོ་པ་བྱང་ཀོ་རི་ཡས་འཛིན་བཟུང་བྱས་པའི་དམག་མི་ཉུང་ཤས་ཤིག་ལྷོ་ཀོ་རི་ཡར་བྲོས་བྱོལ་དུ་ཐར་པའི་གྲས་ཤིག་ཡིན་འདུག
༡༩༥༣་ལོའི་ཕྱི་ཟླ་༦་པའི་ཚེས་༢༨་ཉིན་རྒྱ་དམག་དང་བྱང་ཀོ་རི་ཡའི་དམག་གིས་མདའ་མགོ་རི་བོར་དཔུང་འཇུག་བྱས་ནས་ལི་ཏེ་པོང་སོགས་ལྷོ་ཀོ་རི་ཡའི་དམག་མི་རྣམས་འཛིན་བཟུང་ཐེབས། དེ་ནས་ཟླ་བ་གཅིག་ཀྱང་མ་འགོར་བར་ཀོ་རི་ཡའི་དམག་འཁྲུག་མཚམས་འཇོག་གི་གྲོས་མཐུན་ལ་མིང་རྟགས་བཀོད། མདའ་མགོ་རི་བོའི་འཐབ་འཁྲུག་སྐབས་སུ་ལྷོ་ཀོ་རི་ཡའི་སྐམ་དམག་གི་བརྒྱ་ཤོག་༣་བསད། ལི་ཏེ་པོང་དང་རོགས་པ་གཉིས་དོས་སྐྱེལ་མེ་འཁོར་ནང་དུ་བཞག་ནས་གཅིག་ལ་ཁྲིད། ཁོ་ཚོས་རང་ཡུལ་ལྷོ་ཀོ་རི་ཡར་སྐྱེལ་གྱི་ཡོད་པ་རེད་བསམས་ཀྱང་བྱང་ཀོ་རི་ཡའི་ཨོ་ཇཱི་རྡོ་སོལ་གཏེར་ཁའི་ལས་གྲྭར་བསྐྱལ། ལྷོ་ཀོ་རི་ཡའི་དམག་མི་དེ་དག་གི་མི་ཚེའི་དུས་ཚོད་མང་ཆེ་བ་རྡོ་སོལ་གྱི་ལས་གྲྭ་དེར་ཟད། ལྷོ་ཀོ་རི་ཡའི་གཞུང་གིས་ལི་ཏེ་པོང་དམག་འཁྲུག་ནང་དུ་བསད་པ་རེད་ཅེས་བཟའ་མི་ཚོར་བརྡ་བརྒྱབ། ཐོག་མའི་ལོ་དེར་ལི་ཏེ་པོང་སོགས་ནས་རྡོ་སོལ་གྱི་གཏེར་ཁ་དེར་ངལ་རྩོལ་ཁོ་ན་བརྒྱུགས། ༡༩༥༦་ནས་བདུན་ཕྲག་རེར་བྱང་ཀོ་རི་ཡའི་ལྟ་གྲུབ་བསླབས་པ་དང་གཉེན་སྒྲིག་བྱས་ནས་བྱང་ཀོ་རི་ཡའི་སྤྱི་ཚོགས་སུ་ཞུགས་དགོས་པའི་བཀའ་ཕབ།།
ལི་ཏེ་པོང་གིས་ང་ཚོའི་གཞོན་ནུའི་ལང་ཚོ་རྣམས་རྡོ་སོལ་གྱི་གཏེར་ཁ་དེར་ཆུད་ཟོས་སུ་ཕྱིན་པ་དང་ཉིན་ལྟར་ས་བརྡིབས་ནས་གསོད་སྲིད་པར་སྐྲག་ནས་བསྡད་པ་ཡིན། ངས་རང་ཡུལ་དང་བཟའ་མི་རྣམས་དྲན་ནས་བཟོད་ཐབས་མེད་པར་གྱུར། དུད་འགྲོ་སེམས་ཅན་རྣམས་ཀྱང་འཆི་ཁར་རང་གི་ཚང་དུ་ལོག་སྲོལ་ཡོད་པ་ལྟར་ང་ཚོས་རང་ཡུལ་ཤིན་ཏུ་དྲན། ཕྱིས་སུ་བྱང་ཀོ་རི་ཡས་བཟུང་དམག་༨༠༠༠་གློད་གྲོལ་བཏང་ཡང་བཟུང་དམག་ལྷག་འཕྲོ་ཡོད་པ་ངོས་ལེན་མ་བྱས། ཕྱི་ལོ་༢༠༠༠་ལོར་ལྷོ་ཀོ་རི་ཡའི་སྲིད་འཛིན་ཀིམ་ཏེ་ཇོང་དང་བྱང་ཀོ་རི་ཡའི་འགོ་ཁྲིད་ཀིམ་ཇོང་ཨིལ་གཉིས་ཀྱི་ཆེས་མཐོའི་ཐུག་འཕྲད་གྲོས་མོལ་སྐབས་སུ་བཟུང་དམག་རྩིས་སྤྲོད་བྱ་རྒྱུ་དེར་གླེང་སློང་ཙམ་ཡང་མ་བྱུང་། བདུན་ཕྲག་འདིར་ལྷོ་བྱང་ཀོ་རི་ཡ་གཉིས་ཀྱིས་དམག་འཁྲུག་མཚམས་འཇོག་གི་དུས་དྲན་སྲུང་བརྩི་ཞུས་ཀྱང་བཟུང་དམག་གི་བཟའ་མི་ཚོའི་སེམས་སྡུག་མ་སངས། ལྷོ་ཀོ་རི་ཡའི་སྲིད་འཛིན་མང་པོས་བྱང་ཀོ་རི་ཡའི་འགོ་ཁྲིད་ཚོར་ཐུག་འཕྲད་ལན་མང་བྱས་ཀྱང་ཀོ་རི་ཡའི་དམག་འཁྲུག་དུས་ཀྱི་བཟུང་དམག་རྣམས་རྩིས་སྤྲོད་བྱ་རྒྱུ་གྲོས་གཞི་ཆེན་པོ་ཞིག་ཏུ་འགྱུར་ཐུབ་མེད་པའི་གནས་ཚུལ་ཐོན་འདུག
ཆེ་ཨ་ཨིན་ནི་བྱང་ཀོ་རི་ཡས་འཛིན་བཟུང་བྱས་པའི་ལྷོ་ཀོ་རི་ཡའི་དམག་མི་ཞིག་གི་བུ་མོ་ཡིན་ཞིང་། ཁོ་མོ་ལོ་༦་ལ་སོན་པའི་སྐབས་དེར་ཨ་ཕ་གཏེར་ཁ་སྔོག་སར་སོལ་རླངས་བཀད་ནས་བསད། ཁོ་མོ་ལྷོ་ཀོ་རི་ཡའི་དམག་མི་ཞིག་གི་བུ་མོན་ཡིན་པས་སློབ་གྲྭའི་ནང་དུ་རྡུང་རྡེག་དང་ཐུབ་ཚོད་མྱངས། ༢༠༡༠་ལོར་ཆེ་ཨ་ཨིན་རྒྱ་ནག་བརྒྱུད་ནས་ལྷོ་ཀོ་རི་ཡར་བྲོས་བྱོལ་དུ་ཐར། སྔོན་ཆད་ང་ཨ་ཕར་དགའ་པོ་མེད། ངས་ཆུང་དུས་སྡུག་བསྔལ་མྱངས་པ་རྣམས་ཨ་ཕར་བརྟེན་ནས་བྱུང་བ་རེད། ང་ཚོ་ལྷོ་ཀོ་རི་ཡར་ཐར་པའི་རྗེས་སུ་ངའི་ཨ་ཕ་ནི་དཔའ་རྒོད་ཅིག་ཡིན་པ་ཤེས་རྟོགས་བྱུང་། ངས་ད་གཟོད་ཁོང་ལ་གུས་ཞབས་ཞུ་དགོས་པའི་འདུ་ཤེས་ཤིག་བསླེབས་བྱུང་། ང་ནི་བྱང་ཀོ་རི་ཡའི་བྲོས་བྱོལ་བ་གཞན་དང་མ་འདྲ་བར་ལྷོ་ཀོ་རི་ཡའི་དམག་ཞབས་ཟུར་པ་ཞིག་གི་བུ་མོ་ཡིན་པར་སྤོབས་ཡོད། དེ་རིང་ལྷོ་ཀོ་རི་ཡ་ཟེར་བ་ཞིག་ཡོད་པ་ནི་ངའི་ཨ་ཕ་ལྟ་བུའི་དཔའ་རྒོད་ཚོའི་བཀའ་དྲིན་རེད། ང་ཚོ་དམག་ཞབས་ཟུར་པའི་བུ་ཕྲུག་ཡིན་པར་ལྷོ་ཀོ་རི་ཡའི་གཞུང་གིས་ངོས་ལེན་བྱ་དགོས་ཞེས་གསར་འགོད་པར་བཤད། ཧ་ཅང་ཕངས་པ་ཞིག་ལ་ལྷོ་ཀོ་རི་ཡའི་གཞུང་གིས་ཆེ་ཨ་ཨིན་སོགས་ལྷོ་ཀོ་རི་ཡའི་དམག་ཞབས་ཟུར་པའི་བུ་ཕྲུག་ཡིན་པར་ངོས་ལེན་བྱེད་མི་དགོས་པའི་ཐབས་སུ་འབད། ལྷོ་ཀོ་རི་ཡའི་དམག་ཞབས་ཟུར་པའི་བུ་ཕྲུག་༢༨༠་ཡས་མས་ཤིག་བྱང་ཀོ་རི་ཡ་ནས་ལྷོ་ཕྱོགས་སུ་བྲོས་བྱོལ་དུ་ཐར་འདུག
ཕྱི་ཟླ་༧་པའི་ཚེས་༢༦་ཉིན་ཨ་རིའི་ནེའུ་མེཀ་སི་ཀོའི་སན་ཏ་ཧྥེ་གསར་ཁང་གིས་གནས་ཚུལ་སྤེལ་བ་ལྟར་ན། རོ་བྷར་ཊི་ཧི་མེ་རི་ཆི་ཞེས་པ་ནི་ཀོ་རི་ཡའི་དམག་འཁྲུག་ལ་ཞུགས་པའི་ཨ་རིའི་དམག་མི་ཟུར་པ་ཞིག་ཡིན་ཞིང་། ཁོང་གིས་ཀོ་རི་ཡའི་དམག་འཁྲུག་དེ་མི་ཚོས་བརྗེད་ཟིན་པ་ཞིག་ག་ལ་ཡིན། དེ་ནི་བསམ་བཞིན་སྣང་མེད་བཏང་བ་ཞིག་རེད། ཀོ་རི་ཡའི་དམག་འཁྲུག་དེ་ཆབ་སྲིད་པ་ཚོས་རྩེད་མོ་བརྩེས། ཁོ་ཚོས་ཅི་ཞིག་སྒྲུབ་ཀྱི་ཡོད་པ་ཤེས་རྟོགས་ཙམ་ཡང་མ་བྱུང་བར་བསླངས་པའི་དམག་འཁྲུག་ཅིག་རེད། ༡༩༥༣་ལོའི་ཕྱི་ཟླ་༧་པའི་ཚེས་༢༧་ཉིན་དམག་འཁྲུག་མཚམས་འཇོག་གི་གྲོས་མཐུན་བཞག་ཀྱང་དམག་འཁྲུག་ལ་དངོས་སུ་ཞུགས་པ་ཚོར་མཇུག་འབྲས་ཡིད་ཚིམས་དང་དམག་འཁྲུག་གི་གྱོང་གུད་རྣམས་དྲན་མི་དགོས་པའི་བདེ་བ་ཞིག་མ་ཐོབ། ད་དུང་ཡང་ལྷོ་བྱང་ཀོ་རི་ཡ་གཉིས་འབྲེལ་བ་ཡག་པོ་མེད་པ་དང་ཀོ་རི་ཡའི་དམག་འཁྲུག་གི་དུས་སུ་ཚེ་སྲོག་ཤོར་བ་ཚོར་ངོས་འཛིན་མ་ཐོབ་པར་ལུས་ཡོད་པ་རེད་ཅེས་འདས་དོན་ལ་ཕྱིར་དྲན་བྱས་ནས་གསར་འགོད་པའི་དྲི་བར་ལན་བཏབ།།
ཨ་མི་རི་ཀའི་དམག་འཁྲུག་ཉམས་ཞིབ་པ་ཁག་ཅིག་གིས་ཀོ་རི་ཡ་དང་ཝི་ཏེ་ནམ་གྱི་དམག་འཁྲུག་ནི་འཛམ་གླིང་དམག་ཆེན་གཉིས་པའི་དུས་སུ་རྒྱལ་ཁ་ཐོབ་པའི་ཤོག་ཁག་ཆེན་པོ་གཉིས་ཏེ། ཨ་རི་དང་ཨུ་རུ་སུ་དམར་ཤོག་གི་འགོ་ཁྲིད་ཚོས་རང་རང་གི་ང་རྒྱལ་དང་སྤོབས་པ་གནོན་མ་ཐུབ་པར་བསླངས་པ་ཞིག་ཏུ་བརྩིས། དེ་ནི་གྲང་དམག་ལངས་མགོ་བརྩམས་པའི་དུས་ཀྱི་དྲག་འཐབ་ཐེངས་དང་པོ་ཡིན་པར་མ་ཟད། བྱང་ཀོ་རི་ཡའི་དམག་གིས་ས་ཐིག་༣༨་པ་བརྒལ་ནས་ལྷོ་ཀོ་རི་ཡར་དམག་བརྒྱབ། ཨ་མི་རི་ཀས་འཕྲལ་དུ་ལྷོ་ཀོ་རི་ཡར་སྲུང་སྐྱོབ་བྱ་དགོས་པར་གྱུར། སི་ཏ་ལིན་གྱི་བཀའ་ལྟར་རྒྱ་ནག་གི་དམག་མི་འབུམ་༣་ལྷག་བྱང་ཀོ་རི་ཡར་དམག་རོགས་སུ་བཏང་སྟེ་འཐབ་འཁྲུག་ཆེན་པོ་ཞིག་བརྒྱབ་པ་རེད་ཅེས་བཀྲལ། ད་ལོ་ཀོ་རི་ཡའི་དམག་འཁྲུག་མཚམས་བཞག་ནས་ལོ་༧༠་ཐམ་པ་འགྲོ་བཞིན་ཡོད་མོད། འོན་ཀྱང་ཀོ་རི་ཡའི་དམག་འཁྲུག་གཏན་དུ་མཚམས་འཇོག་གི་ཆིངས་ཡིག་ཅིག་འཇོག་ཐུབ་མེད་པས་རྒྱུ་རྐྱེན་ཕྲ་མོ་ཞིག་གིས་ཀྱང་དམག་འཁྲུག་བསྐྱར་དུ་སློང་སླ། ཟླ་བ་འདིར་ལྷོ་ཀོ་རི་ཡའི་ཕུ་སན་གྲུ་ཁར་ཨ་རིའི་རྡུལ་ཕྲན་འབར་མདེལ་འཁྱེར་བའི་མཚོ་འོག་དམག་གྲུ་བབས། དེ་རིང་ཕྱི་ཚེས་༢༧་ཉིན་བྱང་ཀོ་རི་ཡའི་གཞུང་གིས་ཨུ་རུ་སུའི་རྒྱལ་སྲུང་བློན་ཆེན་སོགས་ལ་རྒྱང་སྙོབ་འཕུར་མདེལ་བསྟན་ནས་ཀོ་རི་ཡའི་གླིང་ཟུར་དུ་དམག་འཁྲུག་གི་ཛ་དྲག་སྔར་ལས་ཆེ་རུ་ཕྱིན་ཡོད་པའི་གནས་ཚུལ་ཐོན་འདུག