༄༅། བོད་མིའི་སྒྲིག་འཛུགས་ཀྱི་དྲ་རྒྱ་དང་ཡུ་རོབ་ཀྱི་གྲོང་ཁྱེར་ཆེན་མོ་སྦེ་ར་ཛེལསི་ནང་གཏན་གཞི་བྱས་པའི་སྐུ་ཚབ་དོན་གཅོད་ལས་ཁུངས་བཅས་ཀྱིས་སྤེལ་བའི་གསར་འགྱུར་ནང་ བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཕྱི་ཟླ་བཅིུག་པའི་ཚེས་༡༢ཉིན་ཁུལ་དེར་ཕེབས་འབྱོར་གནང་པའི་རྗེས་ཉིན་གྲངས་གཉིས་ཆ་ཚང་རིང་གཞུང་འབྲེལ་འཚམས་གཟིགས་གནང་པ་ཁག་ལེགས་པར་གྲུབ་སྟེ་ཁ་ས་ཕྱི་ཚེས་༡༤ སྟེ་ས་གནས་ཀྱི་གཟའ་ཕུར་བུའི་ཉིན་སེ་པེན་ཡུལ་དུ་ཕེབས་ཐོན་ཟིན་ཡོད་པའི་གནས་ཚུལ་ཐོན་འདུག
དེའི་ཐོག་འདི་ནས་འབྲེལ་ཡོད་སྐུ་ཚབ་དོན་གཅོད་ལ་བཅར་འདྲི་ཞུ་ཐབས་ཞུས་ཀྱང་བརྡ་ལན་གང་ཡང་འབྱོར་མ་བྱུང་བས་བྱ་ཐབས་བྲལ།་ཡིན་ནའི་ཡིག་ཐོག་ཏུ་གསལ་བའི་གནས་ཚུལ་ལ་ལྟར་ན་ སྲིད་སྐྱོང་མཆོག་ཕྱི་ཚེས་༡༢ཉིན་ཡུ་རོབ་རྒྱལ་ཁབ་པོ་འཇུ་གྷལ་གྱི་རྒྱལ་ས་ལིསི་བྷོན་གྱི་གནམ་ཐང་དུ་འབྱོར་སྐབས་སུ་དོན་གཅོད་རྒན་ཁང་་རིག་འཛིན་ཆོས་སྒྲོན་ལགས་དང་བོད་དོན་རྒྱབ་བསྐྱོར་བའི་ལས་སྣེས་ཕེབས་བསུ་གཟབ་རྒྱས་ཞུས་པ་དང་སྦྲགས་ དེའི་རྗེས་ཀྱི་ཉིན་གྲངས་གཉིས་ཀྱི་རིང་གཞུང་འབྲེལ་འཚམས་གཟིགས་ལེགས་པར་གནང་པའི་ཐད་དོན་ཁང་གི་གསལ་བསྒྲགས་ནང་གསལ་དུ་ ཕྱི་ཚེས་༡༣གྱི་སྔ་དྲོར་པོ་འཇུ་གྷལ་ཡུལ་གྱི་གསར་འགྱུར་བརྒྱུད་ལམ་གྲགས་ཅན་ལུའུ་སཱ་དང་ཨེཛེ་པེ་རེསེ་གཉིས་ཀྱི་བཅར་འདྲིར་དྭང་ལེན་གནང་བའི་རྗེས་ ༢སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་ཕྱི་ལོ་༢༠༠༡དང་ཕྱི་ལོ་༢༠༠༧་བཅས་སོ་སོའི་སྐབས་ཀྱི་འཆིབ་བསྒྱུར་གོ་སྒྲིག་བ་གཙོ་གྲས་དང་བོད་དོན་ལ་ཐུགས་སྣང་ཆེན་པོ་གནང་མཁན་སློབ་དཔོན་པའོ་ལོ། མོ་རེསེ་དང་འབུམ་རམས་པ་བྷ་ཏ་ལྷ་གཉིས་དང་མཇལ་འཕྲད་ཀྱིས་བོད་དོན་ཐོག་བཀའ་མོལ་ལྷུག་པོ་བྱུང་པ་དང་ དེ་ནས་ཉིན་རྒྱབ་ལ་ པུ་འཇུ་གྷལ་གྱི་གཞུང་འཛིན་དང་ཕྱོགས་འགལ་ཚོགས་པ་གཉིས་ཀའི་གྲོས་ཚོགས་ཀྱི་འཐུས་མི་ཁག་ཅིག་དང་མཇལ་འཛོམས་གནང་སྟེ་ སྲིད་སྐྱོང་མཆོག་གིས་བོད་ཀྱི་ད་ཡོད་གནས་སྟངས་དང་བོད་ཀྱི་ས་ཁམས་ཆབ་སྲིད་ཀྱི་གནད་འགག་སོགས་ཀྱི་ཐོག་གཞི་རྒྱ་ཆེ་བའི་གནས་ཚུལ་རྒྱུད་ལོན་གནང་པའི་ཐོག་ལ་ གྲོས་ཚགོས་འཐུས་མི་རྣམས་ལ་བོད་དང་བོད་མིར་འཕྲད་བཞིན་པའི་དགག་རྩའི་རང་བཞིན་གྱི་གནད་དོན་ཁག་ཅིག་ངོ་སྤྲོད་གནང་གཞག
དེ་ཡང་གོ་བསྡུར་གནང་པའི་གནད་དོན་དེ་ཚོའི་གྲས་སུ་གཙོ་བོ་གཅིག་ནི་༢གོང་ས་མཆོག་གི་༢སྐུའི་ཡང་སྲིད་ཀྱི་གནད་དོན་དེ་ཡིན་ཞིང།་དེའི་ཐོག་གྲོས་ཚགོས་འཐུས་མི་རྣམ་པས་ཨ་རིའི་གཞུང་གིས་གཏན་འབེབ་གནང་པའི་ལངས་ཕྱོགས་ཐོག་ཕེབས་ཐུབ་པ་གནང་བའི་རེ་སྐུལ་གནང་ཡོད་འདུག། དེ་དང་ཕྱོགས་མཚུངས་ཕྱི་ཚེས་༡༤འམ་ད་རེས་སྲིད་སྐྱོང་མཆོག་གི་པུ་འཇུ་གྷལ་ཡུལ་ནང་སྐྱངས་པའི་ཉིན་གཉིས་པའི་མཛད་རིམ་ནང་ ཐོག་མར་རྒྱལ་ས་ལིསི་བྷོན་ནང་ཡོད་པའི་ཨ་རིའི་གཞུང་ཚབ་ཁང་གི་རྭ་བའི་ནང་གཞུང་ཚབ་པ་douglas Koneef དང་ཐུག་འཕྲད་གནང་སྟེ་ཕན་ཚུན་གཉིས་ཀས་གནད་འགག་རྩིས་པའི་གནད་དོན་ཁག་ཅིག་གི་ཐོག་གོ་བསྡུར་གནང་ཡོད་པ་རེད། དེ་ནས་སྲིད་སྐྱོ་མཆོགི་པོ་འཇུ་གྷལ་ནང་གི་མཛད་རིམ་མཐའ་མ་དེ་ནི་ཡུལ་དེའི་དེ་སྔའི་ཁྲིམས་དོན་བློན་ཆེན་དང་ད་ལྟའི་སྐབས་སུ་ཆོས་ལུགས་རང་དབང་ལྷན་ཚོགས་ཀྱི་གཙོ་འཛིན་ཌོཀ་ཌར་ ཝི་ར་ འཇར་རྡིམ་དང་མཇལ་འཕྲད་གྲོས་མོལ་གནང་བ་དེ་ཡིན་པ་རེད། གྲགས་ཅན་དཔོན་རིགས་ཁོང་ཡང་་དེ་སྔ་༢གོང་ས་མཆོག་ཕྱི་ལོ་༢༠༠༡་དང་༢༠༠༧་སོ་སོར་འཆིབ་བསྒྱུར་བཀྲིན་བསྐྱངས་སྐབས་སུ་མཇལ་འཕྲད་གནང་མྱོང་ཡོད་པ་རེད། གནས་ཚུལ་འདི་ཕྱོགས་བསྒྲིགས་དང་སྙན་སྒྲོན་ཞུ་མཁན་པདྨ་བདེ་ཆེན་ཡིན།