༄༅།། ཡུཀ་རེན་གྱི་དམག་གིས་ཁེ་རེ་མཱི་ཡ་གླིང་ཟུར་དུ་ཆགས་པའི་སི་ཝ་སི་ཏོ་པོལ་ས་གནས་ཀྱི་ཨུ་རུ་སུའི་མཚོ་དམག་གི་སྤྱི་ཁྱབ་བཀོད་འདོམས་ཁང་ལ་གཏོར་རྒོལ་བྱས་ནས་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པ་བསད་པ་ཡིན་ཞེས་བསྒྲགས། ཨུ་རུ་སུའི་གཞུང་གིས་དེ་ལ་ངེས་གཏན་ནམ། ཡང་ན་མཚོ་དམག་བཀོད་འདོམས་པ་བསད་མེད་ཅེས་གསལ་བསྒྲགས་སོགས་གང་ཡང་མ་སྤེལ། ཕྱི་ཟླ་༩་པའི་ཚེས་༢༦་ཉིན་རོ་ཡེ་ཊར་སི་གསར་འགྱུར་ལས་ཁང་གིས་ཡུཀ་རེན་གྱི་གཞུང་འབྲེལ་མི་སྣ་ཚོ་ལུང་འདྲེན་བྱས་ནས་གསར་འགྱུར་སྤེལ་བ་ལྟར་ན། བདུན་ཕྲག་སྔོན་མའི་གཟའ་པ་སངས་ཉིན་ཡུཀ་རེན་གྱི་དམག་གིས་སི་ཝ་སི་ཊོ་པོལ་ས་གནས་སུ་གཏོར་རྒོལ་བྱས་ནས་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པ་ཝིཀ་ཊོར་སོ་ཀོ་ལོབ་ཚུད་པའི་དམག་དཔོན་༣༤་བསད་པ་ཡིན། ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་ཁང་གི་ལས་བྱེད་པ་༡༠༥་ལ་རྨས་སྐྱོན་ཕོག་འདུག་ཅེས་བཤད།།
ཡུཀ་རེན་གྱི་དམག་གིས་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པ་བསད་པ་ཡིན་ཟེར་བ་བདེན་པ་ཡིན་ཚེ། ཨུ་རུ་སུའི་མཚོ་དམག་ལ་ཇུས་ཉེས་ཆེན་པོ་ཞིག་ཡིན་ཤས་ཆེ། ཁ་སང་གཟའ་ཟླ་བའི་ཉིན་ཡུཀ་རེན་གྱི་དམིགས་བསལ་དཔུང་སྡེས་སི་ཝ་སི་ཊོ་པོལ་ས་གནས་སུ་ཆགས་ཡོད་པའི་ཨུ་རུ་སུའི་མཚོ་དམག་གི་སྤྱི་ཁྱབ་བཀོད་འདོམས་ཁང་དེ་ཞིག་གསོ་བྱེད་མི་ཐུབ་པ་ཞིག་ཏུ་བསྒྱུར་ཡོད། གཏོར་རྒོལ་དེའི་སྐབས་སུ་ཨུ་རུ་སུའི་དམག་དཔོན་རྣམས་བསད་རྨས་བྱུང་བའི་གྲངས་འབོར་ཧ་ཅང་མང་པོ་རེད། དེ་བཞིན་ཨུ་རུ་སུའི་འབབ་གྲུ་མཱིན་སིཀ་ཟེར་པ་དེར་གཏོར་རྒོལ་བྱས་ནས་དམག་གྲུའི་ནང་གི་མཚོ་དམག་༦༢་ཀྱི་ཚེ་སྲོག་ཤོར། ཨུ་རུ་སུའི་མཚོ་འོག་དམག་གྲུ་ཞིག་ལའང་གཏོར་རྒོལ་བྱས་ནས་རྩ་གཏོར་བཏང་བ་ཡིན་ཞེས་དར་འཕྲིན་དྲྭ་ལམ་དུ་འཕྲིན་ཐུང་ཞིག་སྤེལ། ཡུཀ་རེན་གྱིས་ཕྱིར་བསྒྲགས་བྱས་པའི་གནས་ཚུལ་དེར་རང་བཙན་གྱི་གསར་འགྱུར་ལས་ཁུངས་ཁག་གིས་དངོས་བདེན་ཡིན་མིན་ངེས་གཏན་བྱེད་ཐུབ་ཀྱི་མེད་པའི་གནས་ཚུལ་ཐོན་འདུག
ཕྱི་ཟླ་༩་པའི་ཚེས་༢༥་ཉིན་དབྱིན་ཇིའི་གྷར་ཌི་ཡན་ཚགས་པར་ལ་གནས་ཚུལ་ཐོན་པ་ལྟར་ན། ཨུ་རུ་སུའི་རྒྱལ་སྲུང་ལྷན་ཁང་གིས་སི་ཝ་སི་ཊོ་པོལ་ས་གནས་ཀྱི་མཚོ་དམག་སྤྱི་ཁྱབ་བཀོད་འདོམས་ཁང་ལ་གཏོར་རྒོལ་བྱས་ནས་མི་གཅིག་གར་སོང་ཆ་མེད་དུ་གྱུར་སོང་ཞེས་ཁས་བླངས། བདུན་ཕྲག་སྔོན་མའི་གཟའ་ལྷག་པ་དང་ཕུར་བུ། གཟའ་སྤེན་པ་གསུམ་ལའང་ཡུཀ་རེན་གྱི་དམག་གིས་སི་ཝ་སི་ཊོལ་པོལ་ས་གནས་ཀྱི་ཨུ་རུ་སུའི་མཚོ་དམག་གི་རྟེན་གཞི་ཁག་ལ་གཏོར་རྒོལ་བྱས་འདུག གྷར་ཌི་ཡན་གསར་ཁང་གིས་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པ་སོ་ཀོ་ལོབ་ཀྱི་གཉེན་ཚན་ཚོར་སྐད་ཆ་དྲིས་ཀྱང་ལན་འདེབས་མ་བྱུང་། གཟའ་མཇུག་དེར་ཡུཀ་རེན་གྱི་གསང་བའི་ལས་ཁུངས་ཀྱི་འགན་འཛིན་ཀི་རི་ལོབ་བྷུ་དྷ་ནོབ་ཀྱིས་ཨ་རིའི་རླུང་འཕྲིན་ཁང་ལ་ཨུ་རུ་སུའི་ལྷོ་ཤར་མངའ་ཁུལ་གྱི་དམག་དཔུང་སྤྱི་ཁྱབ་བཀོད་འདོམས་པ་ཨ་ལིཀ་ཛན་ཌར་རོ་མན་ཆུག་ཚུད་པའི་དམག་དཔོན་༩་བསད་པ་དང་མི་༡༦་ལ་རྨས་སྐྱོན་ཕོག་འདུག་ཟེར།།
ཡུཀ་རེན་གྱི་དམག་འཁྲུག་ལངས་ནས་ལོ་གཅིག་ལ་ཟླ་བ་༧་འགྲོ་གྲབས་ཡོད་པའི་མཚམས་འདིར་ཨུ་རུ་སུ་དང་ཡུཀ་རེན་གཉིས་ཀས་ཕ་རོལ་པོར་བསད་རྨས་ཚབས་ཆེན་ཕོག་ལུགས་དང་རང་ཕྱོགས་སུ་བསད་རྨས་ཅི་བྱུང་ཕྱིར་བསྒྲགས་མི་བྱེད་པའི་ལུགས་སྲོལ་ཞིག་དར། ཝིཀ་ཊོར་སོ་ཀོ་ལོབ་༢༠༢༢་ལོའི་ཕྱི་ཟླ་༨་པའི་ནང་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པར་བསྐོས། ཁོ་པ་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པར་བསྐོ་བཞག་མ་བྱུང་སྔོན་དེར་ཞི་བདེ་རྒྱ་མཚོ་དང་བྱང་ཕྱོགས་ཀྱི་ཨུ་རུ་སུའི་མཚོ་དམག་བཀོད་འདོམས་པའི་གོ་གནས་བཟུང་། ཨུ་རུ་སུའི་དམག་འཁྲུག་ལ་རྒྱབ་སྐྱོར་བྱེད་མཁན་དྲྭ་ལམ་གསར་འགོད་པ་ཚོས་རྒྱལ་སྲུང་ལྷན་ཁང་གིས་གསལ་བཤད་བྱ་དགོས། ང་ཚོར་གནས་ཚུལ་ངོ་མ་དེ་མྱུར་དུ་ཤེས་འདོད་ཡོད། མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་སྤྱི་ཁྱབ་བཀོད་འདོམས་པ་བསད་པ་རེད་ཟེར་བའི་གནས་ཚུལ་དེ་བདེན་པ་ཡིན་མིན་གྱི་གསལ་བཤད་ལ་ང་ཚོ་ཚང་མས་སྒུག་ཡོད་ཅེས་ནན་གྱིས་དྲིས།།
ཕྱི་ཟླ་༩་པའི་ཚེས་༢༦་ཉིན་ཧོ་ཧྥུ་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། གཟའ་འཁོར་འགའ་ཞིག་གི་སྔོན་ནས་ཡུཀ་རེན་གྱི་དམག་གིས་ཁེ་རེ་མཱི་ཡ་གླིང་ཟུར་གྱི་ཨུ་རུ་སུའི་དམག་སྒར་ཁག་དང་གོ་མཛོད་ཁག ཨུ་རུ་སུའི་དམག་གྲུ་བཟོ་བཅོས་རྒྱག་ཡུལ་གྲུ་ཁ་ཁག་དང་ཟམ་པ། ལྕགས་ལམ་སོགས་ལ་གཏོར་རྒོལ་བྱ་རྒྱུ་ཤུགས་ཆེ་རུ་བཏང་སྟེ་ཨུ་རུ་སུའི་དམག་གིས་སྔར་བཞིན་ཁེ་རེ་མཱི་ཡ་གླིང་ཟུར་ལ་དབང་བསྒྱུར་བྱེད་མི་ཐུབ་པ་ཞིག་ཏུ་འགྱུར་གྱི་ཡོད་ཅིང་། དབྱིན་ཇིའི་རྒྱལ་སྲུང་ལྷན་ཁང་གིས་ཕྱི་ཟླ་༩་པའི་ཚེས་༢༠་དང་༢༢་གཉིས་ལ་ཡུཀ་རེན་གྱི་དམག་གིས་སྔ་རྗེས་སུ་ཨུ་རུ་སུའི་མཚོ་དམག་གི་སྤྱི་ཁྱབ་བཀོད་འདོམས་ཁང་ལ་གཏོར་རྒོལ་བྱས་པ་ནི་ཤིན་ཏུ་ཚབས་ཆེན་དང་གཏོར་རྒོལ་དེར་མཉམ་འབྲེལ་གང་ལེགས་བྱས་ཐུབ་འདུག ད་ལྟའི་བར་དུ་ཨུ་རུ་སུའི་མཚོ་དམག་གིས་ཡུཀ་རེན་གྱི་འབྲུ་རིགས་ཕྱིར་ཚོང་བྱེད་དུ་མ་བཅུག་པར་མཚོ་ལམ་བཀག ཨུ་རུ་སུའི་མཚོ་དམག་གིས་མཚོ་ནག་མངའ་ཁུལ་དུ་ཡུཀ་རེན་ལ་གཏོར་རྒོལ་བྱས་ནས་འགུལ་སྐྱོད་བྱེད་དུ་འཇུག་གི་མེད་པ་ཁུངས་འཁྱོལ་ས་མ་རེད་ཅེས་བཀྲལ།།
ཕྱི་ཟླ་༩་པའི་ཚེས་༢༦་ཉིན་སི་ཨེན་བྷི་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གཟའ་མིག་དམར་ཉིན་ཨུ་རུ་སུས་ཡུཀ་རེན་ལ་རྒོལ་ལན་བསློགས་ནས་ཨོ་དྷེ་ས་གྲོང་ཁྱེར་གྱི་ཨི་ཛི་མེལ་རྫོང་གི་ཌ་ནུ་བྷེ་གཙང་པོའི་འགྲམ་གྱི་འབྲུ་མཛོད་ཁག་ལ་གཏོར་རྒོལ་བྱས་པར་མ་ཟད། ས་མཚམས་ཀྱི་འགག་སྒོའི་ཁང་ཆེན་ཁག་དང་དོས་སྐྱེལ་རླངས་འཁོར། སྒེར་འཁོར་བཅས་རླངས་འཁོར་༣༠་ལྷག་ལ་གཏོར་རྒོལ་དང་མི་༢་ལ་རྨས་སྐྱོན་ཕོག ཡུཀ་རེན་དང་རོ་མེ་ཎི་ཡའི་ས་མཚམས་ཀྱང་རེ་ཞིག་སྒོ་བརྒྱབ། ཨུ་རུ་སུས་དུས་ཡུན་ཆུ་ཚོད་གཉིས་ལ་འཕུར་མདེལ་དང་ཁ་ལོ་བ་མེད་པའི་འཕུར་གྲུས་གཏོར་རྒོལ་བྱས་ནས་ཡུཀ་རེན་གྱི་འབྲུ་མཛོད་ཁག་དང་མཚོ་ཁའི་གྲུ་ཁ་རྣམས་རྩ་གཏོར། ཡུཀ་རེན་ནི་འཛམ་གླིང་གི་འབྲུ་རིགས་ཐོན་ཁུངས་ཕྱུག་ཤོས་ཀྱི་གྲས་སུ་གཏོགས་མོད། འོན་ཀྱང་ཨུ་རུ་སུའི་དམག་གིས་མཚོ་ནག་མངའ་ཁུལ་གྱི་སྐྱེལ་འདྲེན་བཀག་སྟེ་ཡུཀ་རེན་གྱི་འབྲུ་རིགས་ཕྱིར་ཚོང་མ་ཐུབ། ཨ་ཧྥི་རི་ཀ་སོགས་འཛམ་གླིང་གི་རྒྱལ་ཁབ་མང་པོར་མུ་གེ་འབྱུང་གི་ཡོད་པའི་གནས་ཚུལ་ཐོན་འདུག
ཨུ་རུ་སུའི་དམག་གིས་ཨི་རན་ནས་ཐོན་པའི་ཁ་ལོ་བ་མེད་པའི་འཕུར་གྲུ་༣༨་བཏང་ནས་གཏོར་རྒོལ་བྱས་ཀྱང་འཕུར་གྲུ་༢༦་བར་སྣང་དུ་གཏོར། ད་དུང་ཡུཀ་རེན་གྱི་ཁར་སན་གྲོང་དུའང་ཨུ་རུ་སུས་གཏོར་རྒོལ་བྱས་ནས་མི་༦་བསད་པ་དང་མི་༡༠་ལ་རྨས་སྐྱོན་ཕོག འདས་པའི་ཉིན་ཞག་གཅིག་གི་རིང་ཨུ་རུ་སུས་མེ་སྒྱོགས་༤༩༡་འཕངས་ནས་གཏོར་རྒོལ་ཐེངས་༩༣་བྱས། ཨུ་རུ་སུའི་དམག་གིས་ཁར་སན་གྲོང་གི་ཡུཀ་རེན་གྱི་མི་མང་དཀྱུས་མའི་སྡོད་གནས་ཁག་དང་སློབ་གྲྭ འཛིན་སྐྱོང་གི་ལས་ཁུངས་ཁག་དང་སྨན་ཁང་། ཟས་སྦྱོར་ཁང་དང་ཁྲོམ་གཞུང་བཅས་ལ་གཏོར་རྒོལ་བྱས་ནས་ཡུཀ་རེན་གྱི་མི་དམངས་རྣམས་སྡོད་བཟོད་མེད་པར་གཏོང་རྒྱུའི་འཐབ་ཇུས་ཤིག་ལག་ལེན་བསྟར། ཨུ་རུ་སུའི་གཞུང་གིས་གཏོར་རྒོལ་བྱ་ཡུལ་ཡུཀ་རེན་གྱི་ས་གནས་དེ་རྣམས་དམག་སྒར་ཁག་དང་མཚོན་ཆའི་བཟོ་གྲྭ དམག་གི་གོ་མཛོད་ཁག་དང་ཡུཀ་རེན་གྱི་དམག་དོན་གསང་བའི་ལས་ཁུངས་སོགས་རེད། ང་ཚོས་ཡུཀ་རེན་གྱི་མི་མང་དཀྱུས་མར་རྒོལ་རྡུང་བྱེད་ཀྱི་མེད་ཅེས་འགྲེལ་བཤད་ཐ་དད་ཅིག་རྒྱག་གི་ཡོད་པའི་གནས་ཚུལ་ཐོན་འདུག
ལོ་རྗེས་མར་ཡུཀ་རེན་གྱི་རྒྱབ་སྐྱོར་བ་གཙོ་བོ་ཨ་མི་རི་ཀར་སྲིད་འཛིན་འོས་བསྡུ་བྱེད་ཀྱི་ཡོད་པ་དང་ཇཱོ་བྷ་ཌན་བསྐྱར་དུ་འདེམས་ཐོན་ཐུབ་རྒྱུ་ཡིན་མིན་ཐེ་ཚོམ་གྱི་གནས་སུ་ཟད། ཡུ་རོབ་རྒྱལ་ཁབ་ཁག་ཀྱང་དམག་འཁྲུག་ལ་ཡི་ཐང་ཆད་ནས་ཡུཀ་རེན་ལ་མུ་མཐུད་དུ་རྒྱབ་སྐྱོར་བྱ་རྒྱུའི་སེམས་ཤུགས་ཆག དེས་ན་ཡུཀ་རེན་གྱིས་ཨུ་རུ་སུར་ཕར་རྒོལ་བྱས་ནས་རྒྱལ་ཁ་ལེན་གྱི་ཡོད་པའི་གྲུབ་འབྲས་ཤིག་སྟོན་དགོས། ད་ལོའི་དབྱར་དུས་དེར་ཨ་རི་དང་ཡུ་རོབ་རྒྱལ་ཁབ་ཁག་གི་མི་མང་ལ་བསམ་ཚུལ་དྲིས་པའི་གྲུབ་འབྲས་ལྟར་ན། ཨ་རི་དང་ཡུ་རོབ་གླིང་དུ་ཡུཀ་རེན་ལ་དཔལ་འབྱོར་དང་མཚོན་ཆ་རོགས་རམ་འཐོལ་པ་སྤྲོད་རྒྱུར་འཐད་པ་མེད་པའི་མི་གྲངས་ཇེ་མང་དུ་སོང་། ལྷག་པར་དུ་ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ཁག་ཅིག་དང་ཡུ་རོབ་ཀྱི་སྲིད་དོན་ཚོགས་པ་འགས་ཡུཀ་རེན་ལ་རྒྱབ་སྐྱོར་བྱེད་འདོད་མེད་པའི་རྣམ་འགྱུར་བསྟན། ལོ་རྗེས་མར་པོ་ལན་ཌི་དང་སི་ལོ་ཝ་ཀི་ཡ་གཉིས་ལའང་འོས་བསྡུ་བྱེད་ཀྱི་ཡོད་པས་རྒྱལ་ནང་གི་དཀའ་ངལ་ཟུར་དུ་བཞག་ནས་ཡུཀ་རེན་གལ་ཆེན་དུ་འཛིན་དཀའ་བའི་གནས་ཚུལ་ཐོན་འདུག