༄༅།། རྒྱ་ནག་གཞུང་གིས་ཏོག་དབྱིབས་ནད་དུག་སྔོན་འགོག་ཆེད་དུ་ཞིང་ཆེན་དང་རང་སྐྱོང་ལྗོངས། གྲོང་ཁྱེར་བཅས་ས་གནས་ཁག་༢༠་ལྷག་གི་མི་གྲངས་ས་ཡ་མང་པོ་རང་ཁྱིམ་དུ་བཀག་ནས་སྒོ་རྒྱ་བསྡམས། ཕྱི་ཟླ་༨་པའི་ཚེས་༣༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་གཞུང་གི་བཀག་སྡོམ་བྱ་ཡུལ་ས་གནས་དེ་དག་གི་གྲས་སུ་བོད་རང་སྐྱོང་ལྗོངས་དང་མཚོ་སྔོན་ཞིང་ཆེན་གྱི་རྒྱལ་ས་ཟི་ལིང་གྲོང་ཁྱེར། བོད་ས་ཁག་ལ་བར་ཐག་ཉེ་བའི་རྒྱ་ནག་གི་སི་ཁྲོན་ཞིང་ཆེན་གྱི་རྒྱལ་ས་ཁྲེང་ཏུའུ་གྲོང་ཁྱེར་བཅས་འདུས། ཁ་སང་གཟའ་ཟླ་བ་ནས་མཚོ་སྔོན་ཞིང་ཆེན་གྱི་ས་གནས་ཁག་ཏུ་ཏོག་དབྱིབས་ནད་དུག་འགོས་པའི་ནད་པ་ཇེ་མང་དུ་སོང་སྟེ་ཟི་ལིང་གྲོང་ཁྱེར་ལ་མི་འབོར་ས་ཡ་༢་དང་ཕྱེད་ཀ་ཡོད་པ་རྣམས་གཟའ་ཕུར་བུའི་བར་དུ་རང་ཁྱིམ་དུ་འཛུལ་དགོས་པ་དང་མི་ཚོགས་འདུ་འཛོམ་བྱེད་མི་ཆོག་ཅེས་བཀའ་ཕབ། དེ་བཞིན་རྒྱ་ནག་གི་འཕྲུལ་རིག་ལག་རྩལ་གྱི་ལྟེ་གནས་ཧྲེན་ཀྲེན་གྲོང་ཁྱེར་དང་རྒྱ་ནག་གི་བཟོ་ལས་ཀྱི་ལྟེ་གནས་ཏ་ལཱེན་གྲོང་ཁྱེར། རྒྱ་ནག་གི་མཚོ་ལམ་གྱི་རྒྱལ་སྒོ་ལྟ་བུའི་ཐེན་ཅིན་གྲོང་ཁྱེར་བཅས་ཀྱི་མི་གྲངས་ས་ཡ་མང་པོ་རང་ཁྱིམ་དུ་བཀག་སྟེ་ཚོང་ལས་རྣམས་སྒོ་བརྒྱབ། སློབ་གྲྭ་ཁག་འཚོགས་རྒྱུའི་ཚེས་གྲངས་ཕར་འགྱངས། རྒྱ་ནག་གི་དཔལ་འབྱོར་དང་ཚོང་ལས་རྣམས་སླར་ཡང་ངེས་གཏན་མེད་པར་མི་དམངས་རྣམས་འཚབ་ཀྱི་གནས་སུ་ལྷུང་། འདས་པའི་ཉིན་ཤས་ཤིག་ནས་རྒྱ་ནག་གི་ས་གནས་ཕལ་མོ་ཆེར་ཏོག་དབྱིབས་དུག་སྔོན་འགོག་དང་མི་གྲངས་དུང་ཕྱུར་མང་པོར་བརྟག་དཔྱད། ས་གནས་གང་ཞིག་ཏུ་ཏོག་དབྱིབས་ནད་དུག་འགོས་པའི་ནད་པ་ཉུང་ཤས་ཤིག་ཐོན་རྗེས་རྒྱ་ནག་གཞུང་གིས་འཕྲལ་དུ་འགྲོ་འོང་བཀག་སྡོམ་བྱེད་ཀྱི་ཡོད་པ་དེ་ལ་བལྟས་ཚེ། ཞིས་ཅིན་ཕིང་གིས་ཏོག་དབྱིབས་ནད་དུག་གཙང་སེལ་གྱི་སྲིད་ཇུས་ཤིག་ལག་ལེན་བསྟར་གྱི་ཡོད་པ་མུ་མཐུད་དུ་རྒྱུན་འཁྱོངས་བྱ་རྒྱུའི་རྟགས་སུ་མངོན་ཞེས་གནས་ཚུལ་ཐོན་འདུག
དེ་རིང་གཟའ་མིག་དམར་ཉིན་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་རྒྱལ་ས་པེ་ཅིང་གྲོང་ཁྱེར་གྱི་མཐའ་འཁོར་དུ་ཆགས་པའི་ཧུ་པེ་ཞིང་ཆེན་གྱི་མི་གྲངས་ས་ཡ་༤་ལྷག་བདུན་ཕྲག་འདིའི་གཟའ་མཇུག་བར་དུ་ཁྱིམ་ལ་འཛུལ་ཏེ་ཕྱི་རུ་འབུད་མི་ཆོག་ཅེས་བསྒྲགས། ཐེན་ཅིན་གྲོང་ཁྱེར་དུ་ཏོག་དབྱིབས་ནད་དུག་འགོས་པའི་ནད་པ་༥༡་ཐོན་པའི་རྗེས་སུ་གྲོང་ཁྱེར་དེར་མི་གྲངས་ས་ཡ་༡༣་ཡོད་པ་ཚོར་བརྟག་དཔྱད་བྱ་རྒྱུ་ཚུགས། འདི་ནི་བདུན་ཕྲག་སྔོན་མའི་གཟའ་སྤེན་ནས་གྲོང་ཁྱེར་དེའི་མི་དམངས་ལ་བརྟག་དཔྱད་བྱས་པ་ཐེངས་༤་པ་ཡིན་འདུག ཁྲེང་ཏུའུ་གྲོང་ཁྱེར་དུ་འགྲིམ་འགྲུལ་བཀག་སྟེ་སློབ་གྲྭ་འཚོགས་རྒྱུའི་ཚེས་གྲངས་འགྱངས། རྒྱ་ནག་ལྷོ་ཕྱོགས་ཀྱི་ཧྲེན་ཀྲེན་གྲོང་ཁྱེར་ལ་མི་འབོར་ས་ཡ་༡༨་ཡོད་པ་དེའི་གྲས་སུ་ཉིན་ལྟར་ཏོག་དབྱིབས་ནད་དུག་འགོས་པའི་ནད་པ་༣༥་ལས་མེད་ཀྱང་རྫོང་ཁག་གཉིས་ལ་སྒོ་རྒྱ་བསྡམས། འཛམ་གླིང་གི་གློག་ཆས་ཁྲོམ་ར་ཆེ་ཤོས་ཧྭ་ཆིང་པེ་སྒོ་བརྒྱབ་པ་དང་ཁྲོམ་ར་དེའི་ཚོང་པ་ཁྲེན་ཞེས་པ་ཞིག་གིས་ང་ཚོར་གློ་བུར་དུ་སྒོ་རྒྱག་དགོས་པའི་བརྡ་ཐོ་འབྱོར་བྱུང་། ང་ཚོས་དངོས་ཟོག་བཀྲམ་ཡོད་པ་རྣམས་མཛོད་ཁང་དུ་བཅུག་སྟེ་ཁྲོམ་ར་སྒོ་རྒྱག་རྒྱུ་དེར་ཆུ་ཚོད་འགའ་ཤས་ཀྱི་དུས་ཡུན་ལས་མི་འདུག་ཅེས་བཀྲལ། བདུན་ཕྲག་འདིའི་གཟའ་པ་སངས་བར་དུ་ཧྲེན་ཀྲེན་གྱི་རྒྱལ་ས་ཧྥུ་ཐེན་གྲོང་ཁྱེར་གྱི་གློག་བརྙན་ཁང་དང་ཀ་ར་ཨོ་ཁེ་ཆང་ཁང་། སྤྱི་གླིང་རྣམས་སྒོ་བརྒྱབ་སྟེ་མང་ཚོགས་ཀྱི་བྱེད་སྒོ་ཁག་མེད་པར་བཏང་འདུག ཧྲེན་ཀྲེན་གྱི་མཐའ་མཚམས་སུ་ཆགས་པའི་ཝན་ཤ་ས་ཁུལ་ནི་གྲོང་གསེབ་ཁག་ནས་ལས་ཀ་འཚོལ་དུ་ཡོང་མཁན་རྣམས་འདུག་ས་དང་ཁང་གླ་ཁེ་པོ། བཟའ་བཏུང་དང་དངོས་ཟོག་སྐྱེལ་འདྲེན་བྱེད་མཁན་གླ་པ་རྣམས་འདུག་ས་ཞིག་ཡིན་རུང་ས་གནས་དེར་འགྲིམ་འགྲུལ་བཀག་ནས་ཐར་ས་མེད་པར་གྱུར་ཡོད་པའི་གནས་ཚུལ་ཐོན་འདུག
ཧྥ་རན་སིན་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། རྒྱ་ནག་གི་ཏ་ལཱེན་གྲོང་ཁྱེར་གྱི་ས་གནས་ཤིག་གི་མི་མང་ས་ཡ་༣་ལྷག་བདུན་ཕྲག་འདིའི་གཟའ་ཉི་མའི་བར་དུ་རང་ཁྱིམ་ནས་ཕྱི་ལ་འབུད་མི་ཆོག ཁྱིམ་ཚང་རེའི་མི་རེ་ཉིན་ལྟར་ཕྱི་ལ་ཉོ་ཆ་རྒྱག་ཏུ་འགྲོ་ཆོག་པ་དང་བཟོ་གྲྭ་ཁག་གི་བཟོ་པ་ཉུང་དུ་གཏོང་དགོས། བཟོ་པ་དགོས་ངེས་མིན་པ་ཚོས་རང་ཁྱིམ་དུ་རྒྱང་ལས་བྱེད་ཆོག་ཅེས་བཀའ་རྒྱ་བསྒྲགས། ཁ་སང་གཟའ་ཟླ་བའི་ཉིན་ཁྲེན་ཧུའུ་གྲོང་ཁྱེར་གྱི་ཅིན་ནུག་ས་གནས་སུ་ཏོག་དབྱིབས་ནད་དུག་སྔོན་འགོག་ཆེད་དུ་སྒོ་རྒྱ་བསྡམས་ནས་བཟུང་། ཝུ་ཧུག་དང་ཆིང་དབྱང་ས་གནས་གཉིས་ཀྱིས་གཟའ་མིག་དམར་ནས་ཡུལ་སྐོར་སྤྲོ་འཆམ་བཀག་སྟེ་སློབ་གྲྭ་སྒོ་འབྱེད་ཀྱི་ཚེས་གྲངས་འགྱངས། ད་ལྟ་ཁྲེང་ཏུའི་གྲོང་ཁྱེར་གྱི་ས་གནས་དེ་དག་གི་མི་གྲངས་ས་ཡ་༣་དང་ཕྱེད་ཀ་ལྷག་རང་ཁྱིམ་དུ་བཀག རྒྱ་ནག་བྱང་ཕྱོགས་ཀྱི་ཧྲི་ཅ་ཀྲོང་གྲོང་ཁྱེར་གྱི་རྫོང་ཁག་བཞིའི་ལས་མི་དགོས་ངེས་མིན་པ་ས་ཡ་༣་དང་ཕྱེད་ཀ་ལྷག་གཟའ་ལྷག་པའི་ཕྱི་དྲོ་བར་དུ་ལས་ཁུངས་དང་བཟོ་གྲྭ་སོགས་ལ་ཡོང་མི་དགོས་ཞེས་བཀོད་ཁྱབ་བཏང་འདུག ཧྲེན་ཀྲེན་གཙོས་རྒྱ་ནག་གི་གྲོང་ཁྱེར་ཕལ་ཆེ་བའི་མི་མང་རྣམས་ཕར་ཚུར་འགྲུལ་སྐྱོད་བྱེད་དགོས་ན་ཆུ་ཚོད་༢༤་ཡི་སྔོན་དེར་ནད་དུག་འགོས་མེད་པའི་བརྟག་དཔྱད་བྱས་པའི་དཔང་ཡིག་བསྟན་ནས་གྲོང་གླིང་ཁག་ཏུ་འཛུལ་ཞུགས་བྱེད་དགོས་པའི་སྒྲིག་ཁྲིམས་དམ་པོ་ཞིག་ལག་ལེན་བསྟར། ཉི་ཧོང་གི་ནོ་མུ་ར་དཔལ་འབྱོར་ཞིབ་འཇུག་ཁང་གི་ཉམས་ཞིབ་པ་ཐིང་ལུ་ཡིས་ཧྲེན་ཀྲེན་སོགས་ལ་ཏོག་དབྱིབས་ནད་དུག་ཁྱབ། རྒྱ་ནག་གི་ཁྲོམ་ར་རྣམས་སྒོ་བརྒྱབ་སྟེ་སླར་ཡང་དཔལ་འབྱོར་འཕེལ་རྒྱས་ཀྱི་ཚད་གཞི་དམའ་རུ་གཏོང་དགོས་པར་འགྱུར་ས་རེད། ཉེ་དུས་ཤིག་ནས་གྲོང་ཁྱེར་ཆེ་ཁག་ལ་ཨོ་མཱི་ཁོ་རོན་ཏོག་དབྱིབས་ནད་དུག་ཁྱབ་ཀྱི་ཡོད་པས་སྤྱི་ཡོངས་ཀྱི་ཆ་ནས་རྒྱ་ནག་ལ་ཏོག་དབྱིབས་ནད་དུག་ཁྱབ་གདལ་གྱི་གནས་སྟངས་ཧ་ཅང་ཚབས་ཆེན་ཞིག་ཏུ་གྱུར་ཡོད་པའི་སྣང་ཚུལ་ཞིག་ཤར་འདུག་ཅེས་བཤད།།
ད་སྔ་རྒྱ་ནག་རྒྱལ་ཡོངས་ཀྱི་ས་གནས་ཁག་གིས་སློབ་གྲྭ་རྣམས་སྒོ་འབྱེད་རྒྱུའི་ཚེས་གྲངས་ཕར་འགྱངས་བྱས་པ་ཡིན་ཞེས་གསལ་བསྒྲགས་སྤེལ་མེད་མོད། འོན་ཀྱང་ཕ་མའི་སྐད་འཕྲིན་ཚོགས་པ་ཁག་ཏུ་ཕ་མ་ཚོས་ཏོག་དབྱིབས་ནད་དུག་ཁྱབ་ནས་སློབ་གྲྭ་ཁག་བསྐྱར་དུ་སྒོ་འབྱེད་བྱ་རྒྱུ་ཕར་འགྱངས་གཏོང་སྲིད་པའི་བློ་འཚབ་ཆེན་པོ་བྱེད་ཀྱི་ཡོད་པ་གོ་ཐོས་འབྱུང་རྒྱུ་ཇེ་མང་དུ་སོང་། རྒྱ་ནག་གཞུང་གིས་ཕྱི་ཟླ་༡༠་པར་དམར་ཤོག་ཚོགས་པའི་ཚོགས་ཆེན་ཐེངས་༢༠་པ་འཚོགས་རྒྱུ་དེར་དམིགས་ནས་མ་འོངས་པའི་ཟླ་བ་གསུམ་གྱི་རིང་ནད་འགོག་གི་སྲིད་ཇུས་ལག་ལེན་བསྟར་རྒྱུ་སྔར་ལས་ཤུགས་ཆེ་རུ་གཏོང་གི་ཡོད་ཅིང་། ཞིས་ཅིན་ཕིང་གིས་ལས་དུས་གསུམ་པ་མ་བཟུང་བར་དུ་རྒྱ་ནག་ལ་ཏོག་དབྱིབས་ནད་དུག་གཙང་སེལ་གྱི་སྲིད་ཇུས་ལག་ལེན་བསྟར་རྒྱུ་དབུས་གཞུང་གི་ལས་དོན་གཙོ་བོ་ཞིག་ཏུ་འཛིན་གྱི་ཡོད་པའི་གནས་ཚུལ་ཐོན། ཞིས་ཅིན་ཕིང་གི་ནད་འགོག་སྲིད་ཇུས་དམ་དྲགས་པའི་སྟབས་ཀྱིས་རྒྱ་ནག་གི་ས་ཐོག་ཏུ་མ་རྩ་བཙུགས་ནས་ཚོང་ལས་གཉེར་གྱི་ཡོད་པའི་ཡུ་རོབ་རྒྱལ་ཁབ་ཁག་བཟོ་ཚོང་ལས་ཁང་བཞི་ཆའི་གཅིག་གིས་རྒྱལ་ཁབ་གཞན་ལ་མ་རྩ་བཙུགས་ནས་གནས་སྤོར་བྱ་རྒྱུའི་བསམ་ཞིབ་བྱེད་ཀྱི་ཡོད་པར་མ་ཟད། ཨ་རི་དང་དབྱིན་ཇི། ཉི་ཧོང་སོགས་ཀྱི་བཟོ་ཚོང་ལས་ཁང་ཁག་ཀྱང་རྒྱ་ནག་ནས་ལྷོ་ཤར་ཨེ་ཤི་ཡའི་རྒྱལ་ཁབ་དང་ཐེ་ཝན། རྒྱ་གར་སོགས་ལ་གནས་སྤོར་བྱས་ནས་ཁྲོམ་ས་གསར་པ་འཛིན་རྒྱུ་མགོ་བརྩམས། རྒྱ་ནག་གཞུང་གིས་ཕྱི་རྒྱལ་གྱི་འགྲུལ་པ་རྣམས་ཟུར་འགོག་བྱེད་པའི་དུས་ཡུན་ཐུང་དུ་བཏང་རུང་ཏོག་དབྱིབས་ནད་དུག་གཙང་སེལ་གྱི་རྩ་བའི་སྲིད་ཇུས་དེར་འགྱུར་བ་ཆེན་པོ་ཞིག་མ་བཏང་བར་རང་སོར་བཞག
རྒྱ་ནག་གི་ནད་འགོག་སྲིད་ཇུས་དེས་དཔལ་འབྱོར་དང་ཚོང་ལས་ལ་འགལ་རྐྱེན་འབྱུང་གི་ཡོད་པ་ཁོ་ན་མིན་ཞིང་། རྒྱ་ནག་གི་ན་གཞོན་ཚོར་ལས་ཀ་དང་མདུན་ལམ་མེད་པའི་དཀའ་ངལ་ཆེ་རུ་འགྲོ་བཞིན་ཡོད་པ་སྟེ། ཕྱི་ཟླ་༨་པའི་ཚེས་༢༤་ཉིན་ཨ་རིའི་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ༡༩༩༩་ལོར་རྒྱ་ནག་གི་ན་གཞོན་ས་ཡ་༡་མ་ཟིན་ཙམ་ཞིག་སློབ་ཆེན་ཐོན་ནས་ལས་ཀའི་ཁྲོམ་རར་ཞུགས། ༢༠༢༢་ལོར་རྒྱ་ནག་གི་ན་གཞོན་ས་ཡ་༡༠་དང་འབུམ་༧་སློབ་ཆེན་ཐོན་ཏེ་ལས་ཀ་འཚོལ་དགོས་པར་གྱུར། ༢༠༡༨་ལོར་རྒྱ་ནག་གི་ན་གཞོན་ལས་མེད་པའི་གྲངས་འབོར་དེ་བརྒྱ་ཆ་༩་དང་གྲངས་ཆུང་༦་ཡིན་རུང་ད་ལོའི་ཕྱི་ཟླ་༧་པར་རྒྱ་ནག་གི་ན་གཞོན་ལས་མེད་པའི་གྲངས་འབྱོར་ནི་བརྒྱ་ཆ་༢༠་ཟིན་གྲབས་སུ་གྱུར། ན་གཞོན་ལས་མེད་པ་དེ་རྣམས་ལོ་༡༦་ནས་༢༤་ཡི་བར་དུ་ཡིན་པ་དང་ཉམས་ཞིབ་པ་ཇི་སྙེད་ཅིག་གིས་ཨ་རིའི་རླུང་འཕྲིན་ཁང་གི་རྒྱ་སྐད་སྡེ་ཚན་ལ་རྒྱ་ནག་གི་དཔལ་འབྱོར་ཉམས་རྒུད་འགྲོ་དགོས་པའི་རྒྱུ་རྐྱེན་གཙོ་བོ་ཞིག་ནད་འགོག་སྲིད་ལ་འབྲེལ་བ་དམ་ཟབ་འདུག ཏོག་དབྱིབས་ནད་དུག་གཙང་སེལ་གྱི་སྲིད་ཇུས་དེ་མཁྲེགས་འཛིན་བྱས་ནས་རྒྱ་ནག་གི་དཔལ་འབྱོར་འཕེལ་རྒྱས་ལ་འགོག་རྐྱེན་བཟོ་ཡི་ཡོད་པའི་སྒྲུབ་བྱེད་རྣམས་བཀོད། རྒྱ་ནག་གི་ན་གཞོན་ཚན་ཁག་གི་སྤྱི་གཉེར་ཛཀ་ཌི་ཆི་ཝལ་ཌིས་པེ་ཅིང་གི་དབང་འཛིན་པ་ཚོས་ཅི་ཞིག་བཏབ་པ་རྣམས་སྐྱེ་ཡི་ཡོད་པ་རེད། ཁོ་ཚོས་འདས་པའི་ལོ་གཉིས་ལ་བཏབ་པའི་ས་བོན་དེར་འབྲས་བུ་བཟང་པོ་ཞིག་སྨིན་རྒྱུ་ཁག་པོ་རེད་ཅེས་བསྟན། ཨ་རིའི་ཁེ་ལི་ཧྥོར་ཎི་ཡ་སློབ་གྲྭ་ཆེན་མོའི་སློབ་དཔོན་ཌོ་རོ་ཐི་སོ་ལིང་གྷེར་གྱིས་རྒྱ་ནག་གི་ལས་མེད་པའི་གཞི་གྲངས་ནི་གཏན་ནས་ཡིད་རྟོན་རུང་བ་ཞིག་མ་རེད། རྒྱ་ནག་གཞུང་གིས་ན་གཞོན་ལས་མེད་པའི་གྲངས་འབོར་བརྒྱ་ཆ་༢༠་ཟིན་འདུག་ཅེས་གསལ་བསྒྲགས་སྤེལ་བར་ང་ཧང་སང་སོང་། ཡིན་ནའང་ང་ལ་རྒྱ་ནག་གི་ན་གཞོན་ལས་མེད་པའི་གྲངས་འབོར་ངོ་མ་ནི་གཞུང་གིས་གསལ་བསྒྲགས་བྱས་པ་ལས་ཀྱང་མང་བ་ཡོད་པའི་དོགས་པ་ཡོད་ཅེས་བཤད།།
ཕྱི་ཟླ་༨་པའི་མགོ་སྟོད་དེར་མཉམ་འབྲེལ་གསར་ཁང་གིས་རྒྱ་ནག་གི་ན་གཞོན་ཚོར་བཅར་འདྲི་ཞུས་ནས་གནས་ཚུལ་སྤེལ་བ་ལྟར་ན། ལོ་འདིར་རྒྱ་ནག་གི་ན་གཞོན་ས་ཡ་༡༡་མ་ཟིན་ཙམ་གྱིས་ལས་ཀ་འཚོལ་དགོས་པ་དང་ལོ་ན་༢༦་ལ་སོན་པའི་ལིའུ་ཆོན་ནི་ན་གཞོན་དེ་དག་གི་གྲས་ཀྱི་གཅིག་ཡིན་ཞིང་། ཁོ་མོར་གཙུག་ལག་རབ་འབྱམས་པའི་ལག་འཁྱེར་ཡོད་པ་དང་ལས་ཁུངས་གཉིས་ལ་སྙན་ཞུ་ཕུལ་ཡང་ས་མིག་མ་ཐོབ། ལིའུ་ཆོན་གྱིས་ཏོག་དབྱིབས་ནད་དུག་ཁྱབ་ནས་ངའི་མི་ཚེའི་མདུན་ལམ་ཆག་གྲུམ་དུ་བཏང་སོང་། ང་ལ་ལས་ཀ་ཞིག་རྙེད་ཐུབ་པའི་འཇོན་ཐང་ཡོད་དམ། ངས་མི་ཚེའི་མདུན་ལམ་ཆག་གྲུབ་ཏུ་གྱུར་པ་བསྐྱར་དུ་བསྒྲིག་ཐུབ་རྒྱུ་ཡིན་ནམ་ཞེས་རང་གིས་རང་ལ་ཡིད་ཆེས་མེད་པར་གྱུར་སོང་། སྔ་ལོ་རྒྱ་ནག་གི་སློབ་ཆེན་ཐོན་པའི་ན་གཞོན་ཚོར་རྒྱ་སྒོར་༩༨༠༠་རེ་ཟླ་ཕོགས་རག་གི་ཀྱང་ལོ་འདིར་རྒྱ་སྒོར་༨༠༠༠་ཐམ་པའི་གླ་ཕོགས་ཀྱི་ལས་ཀ་ཞིག་ཀྱང་རག་གི་མི་འདུག་ཅེས་བཤད། ཧྥང་ཀྲི་ཡུག་ནི་ཧུ་པེ་ཞིང་ཆེན་གྱི་རྩིས་ཞིབ་གཙུག་ལག་རབ་འབྱམས་པ་ཐོན་པའི་ན་གཞོན་ཞིག་ཡིན་ཞིང་། ཁོ་མོའི་སློབ་ཆེན་རྒྱུགས་སྤྲོད་ཕྱི་ཟླ་༣་ནས་༧་པའི་བར་དུ་འགྱངས་ཏེ་ལས་ཀ་འཚོལ་བའི་གོ་སྐབས་ཤོར། ཧྥང་ཀྲི་ཡུག་གིས་གསར་འགོད་པར་ཏོག་དབྱིབས་ནད་དུག་ཁྱབ་མེད་ན་ངའི་ཡིག་རྒྱུགས་ཕྱིར་འགྱངས་བྱས་མེད་པ་དང་ལས་ཀ་འཚོལ་རྒྱུ་དེར་དཀའ་ལས་འདི་འདྲ་ཞིག་ཡོད་རྒྱུ་མ་རེད། ང་ཏོག་དབྱིབས་ནད་ཡམས་ལ་ཞེ་ནས་སྡང་བ་ནམ་ཡང་དྭངས་ཐབས་བྲལ། གལ་སྲིད་ངས་ལོ་འདིར་ལས་ཀ་ཞིག་བཙལ་མ་ཐུབ་ན་ལོ་རྗེས་མར་ང་ལ་ལས་ཀ་རག་རྒྱུ་དེ་བས་ཀྱང་དཀའ་ངལ་ཆེ་རུ་འགྲོ་ཤས་ཆེ་ཞེས་སྡུག་སྐད་བརྒྱབ། རྒྱ་ནག་གི་ལས་ཀའི་ས་མིག་ཞིབ་འཇུག་ཁང་གིས་རྒྱ་ནག་གི་སྤྱི་ཚོགས་སུ་ལས་ཀའི་ས་མིག་གཅིག་ལ་སློབ་ཆེན་ཐོན་པའི་ན་གཞོན་གཉིས་ཀྱིས་འགྲན་རྩོད་བྱེད་དགོས་པ་དང་གྲོང་ཁྱེར་ཁག་ཏུ་ཐེམ་ཐོ་ཡོད་པའི་ན་གཞོན་ཚོར་ལས་ཀའི་གོ་སྐབས་མང་བ་འཐོབ་ཀྱི་འདུག་ཅེས་གསལ་སྟོན་བྱས་འདུག