༄༅།། ཉེ་ཆར་ཨ་མི་རི་ཀའི་གསང་བའི་ལས་ཁུངས་ཁག་གི་མཐོ་རིམ་འགོ་ཁྲིད་ཚོ་དང་འཇིགས་སྐུལ་རིང་ལུགས་ལ་འཐབ་རྒོལ་བྱེད་པའི་ཚན་པ་ཁག་གི་ལས་སྣེ་ཚོ་ནང་མོལ་ཚོགས་འདུ་ཞིག་ཚོགས། ཨ་རིའི་དབུས་གསང་བའི་ལས་ཁུངས་ཀྱི་འགོ་ཁྲིད་ཨང་གཉིས་པས་ཨལ་ཁེ་དྷ་སྒྲིག་འཛུགས་དང་མཐའ་ལྷུང་རིགས་ལུགས་པའི་སྒྲིག་འཛུགས་ཁག་ལ་འཐབ་རྒོལ་བྱ་རྒྱུ་སྔར་བཞིན་གཙིགས་སུ་འཛིན་རྒྱུ་ཡིན་ཞེས་གཏམ་བཤད་བྱས་ཤིང་། ཕྱི་ཟླ་༨་པའི་ཚེས་༨་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གསང་བའི་ལས་ཁུངས་ཁག་གི་མིའི་ནུས་ཤུགས་དང་འགྲོ་གྲོན་ཕལ་མོ་ཆེ་རྒྱ་ནང་གི་སྟེང་དུ་གཏོང་རྒྱུ་མགོ་བརྩམས། ཨ་མི་རི་ཀའི་དམག་དཔུང་ཨབ་གྷ་ཎི་སི་ཐན་ནས་ཕྱིར་འཐེན་བྱས་ཏེ་ལོ་གཅིག་ཕྱིན་པའི་རྗེས་སུ་སྲིད་འཛིན་ཇཱོ་བྷ་ཌན་གྱི་རྒྱལ་སྲུང་སློབ་སྟོན་པ་ཚོས་འཇིགས་སྐུལ་རིང་ལུགས་ལ་འཐབ་རྒོལ་བྱ་དགོས་ཞེས་གཏམ་བཤད་བྱ་རྒྱུ་ཇེ་ཉུང་། རྒྱ་ནག་དང་ཨུ་རུ་སུ་གཉིས་ཆབ་སྲིད་དང་དཔལ་འབྱོར། དམག་དོན་སོགས་ཀྱི་ཉེན་ཁ་ཆེན་པོ་ཞིག་རེད་ཅེས་གླེང་སློང་བྱ་རྒྱུ་ཤུགས་ཆེ་རུ་སོང་། ཨ་རིའི་གསང་བའི་ལས་ཁུངས་ཁག་གིས་མངོན་གསལ་མེད་པར་ལས་བྱེད་པ་བརྒྱ་ཕྲག་མང་པོ་རྒྱ་ནག་ལ་ཁ་གཏད་གཅོག་པའི་སྡེ་ཚན་ཁག་ཏུ་ལས་བསྐོ་བརྒྱབ། ལས་བྱེད་པ་དེ་དག་གི་ཁག་ཅིག་སྔོན་ཆད་འཇིགས་སྐུལ་རིང་ལུགས་ལ་འཐབ་རྒོལ་བྱེད་པའི་སྡེ་ཚན་ཁག་གི་ལས་སྣེ་ཡིན་ཞིང་། ཨ་རིའི་གསང་བའི་ལས་ཁུངས་ཁག་གི་འགོ་ཁྲིད་ཚོས་འཇིགས་སྐུལ་རིང་ལུགས་ལ་འཐབ་རྒོལ་བྱ་རྒྱུ་ནམ་ཡང་ལྷོད་ཡང་གཏོང་རྒྱུ་མིན་ཟེར། བདུན་ཕྲག་སྔོན་མར་ཨ་རིའི་དབུས་གསང་བའི་ལས་ཁུངས་ཀྱི་འཕུར་གྲུ་ཞིག་གིས་འཕུར་མདེལ་འཕངས་ཏེ་ཨབ་གྷ་ཎི་སི་ཐན་གྱི་རྒྱལ་ས་ཀ་བྷུལ་གྲོང་ཁྱེར་དུ་སྐུང་ཡོད་པའི་ཨལ་ཁེ་དྷ་སྒྲིག་འཛུགས་ཀྱི་འགོ་ཁྲིད་ཨ་ཡེ་མན་ཨ་ཛ་ཝ་ཧི་རི་བསད། དེའི་རྗེས་སུ་ཨ་རིའི་གྲོས་ཚོགས་ཀྱི་ཚོགས་གཙོ་ནན་སི་ཕེ་ལོ་སི་ཐེ་ཝན་ལ་འཚམས་འདྲིར་ཕེབས་ནས་རྒྱ་ནག་གིས་སྡིགས་ར་བསྐུལ་ཏེ་ཛ་དྲག་ཅན་ཞིག་ཏུ་གྱུར།།
ཨ་རིའི་དབུས་གསང་བའི་ལས་ཁུངས་ཀྱི་འགན་འཛིན་གཞོན་པ་ཌེ་ཝི་ཌི་ཀོ་ཧན་གྱིས་རྒྱ་ནག་ལ་དོ་སྣང་བྱ་རྒྱུ་དང་རྒྱ་ནག་གི་ཉེན་ཁར་རྟོག་ཞིབ་བྱ་རྒྱུ་ལས་དོན་གཙོ་གྲས་སུ་རྩི་བཞིན་ཡོད་པར་མ་ཟད། རྒྱ་ནག་གི་དཔལ་འབྱོར་དང་ཆབ་སྲིད་ཀྱི་ཧམ་སེམས་ལ་ཨ་མི་རི་ཀས་སྔ་མོ་ནས་དོགས་ཟོན་བྱེད་ཀྱི་ཡོད། རྒྱ་ནག་གིས་ཕྱིའི་རྒྱལ་ཁབ་ཁག་གི་འོས་འདེམས་ལ་ཐེ་ཇུས་དང་དྲྭ་ལམ་ནས་གཞན་གྱི་གསང་བའི་གནས་ཚུལ་རྐུ་འཁྱེར། ཞིན་ཅང་གི་ཡུ་གུར་བ་ས་ཡ་རེ་ཟུང་བཙོན་སྒར་ཁག་ཏུ་བཀག་ཉར་བྱས་འདུག་ཅེས་ཐེར་འདོན་བྱས་འདུག ཉམས་ཞིབ་པ་ཁག་ཅིག་གིས་མ་འོངས་པའི་ལོ་ཤས་རྗེས་སུ་རྒྱ་ནག་གིས་ཐེ་ཝན་ལ་དམག་བརྒྱབ་ནས་མཚོ་འགག་ཕྱོགས་གཉིས་གཅིག་གྱུར་བྱ་རྒྱུ་རེད་ཅེས་ཉེན་བརྡ་བཏང་ཞིང་། ཨ་རིའི་གསང་བའི་ལས་ཁུངས་ཁག་གིས་ཏོག་དབྱིབས་ནད་ཡམས་ཀྱི་འབྱུང་ཁུངས་རྩད་གཅོད་གསལ་པོ་ཞིག་བྱས་མ་ཐུབ་པའི་རྗེས་སུ་གསང་ཉུལ་ཚོར་རྒྱ་ནག་ནང་ཁུལ་གྱི་གནས་ཚུལ་ཤེས་རྟོགས་ཐུབ་དགོས་ཞེས་གནོན་ཤུགས་སྤྲད། ཨ་རི་དང་འཛམ་གླིང་རྒྱལ་ཁབ་ཁག་གིས་པེ་ཅིང་གི་དབང་འཛིན་པ་ཚོས་ཏོག་དབྱིབས་ནད་དུག་གང་ནས་ཁྱབ་མིན་གསང་རྒྱ་བྱས་ནས་གསལ་པོར་བཤད་ཀྱི་མེད་པའི་སྐྱོན་བཙུགས། ཨུ་རུ་སུ་དམར་ཤོག་རྒྱལ་ཁབ་འཐོར་ཞིག་ཕྱིན་པའི་རྗེས་སུ་ཨ་མི་རི་ཀས་ཨུ་རུ་སུར་སྣང་ཆུང་ཤོར་ཡང་ཡུཀ་རེན་ལ་བཙན་འཛུལ་བྱུང་བའི་གཞུག་ནས་མོ་སི་ཀོར་དོ་སྣང་བྱ་དགོས་པ་སླར་ཡང་ངོ་འཕྲོད། དེར་བརྟེན་ཨ་མི་རི་ཀས་གསང་བའི་གནས་ཚུལ་མང་དག་ཅིག་ཕྱིར་བསྒྲགས་བྱས་ནས་ཕུ་ཊིན་གྱི་ཀུན་སློང་དང་ཨུ་རུ་སུའི་དམག་གི་འགུལ་སྐྱོད། ཨུ་རུ་སུར་འབྲེལ་བ་ཡོད་པའི་གསང་བའི་གནས་ཚུལ་རྣམས་ཡུཀ་རེན་ལ་མཁོ་སྤྲོད། ཨ་མི་རི་ཀ་དང་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་མཚོན་ཆ་དང་དཔལ་འབྱོར་རོགས་རམ་སྤྲད་ནས་ཨུ་རུ་སུར་འཐབ་རྒོལ་བྱེད་དུ་བཅུག
སྲིད་འཛིན་བྷ་ཌན་གྱི་རྒྱབ་སྐྱོར་བ་སྲིད་གཞུང་གི་ལས་སྣེ་ཚོས་ཨལ་ཁེ་དྷ་སྒྲིག་འཛུགས་ཀྱི་འགོ་ཁྲིད་ཛ་ཝ་ཧི་རི་གསོད་ཐུབ་ཡོད་པས་ཨ་མི་རི་ཀའི་དམག་དཔུང་ཨབ་གྷ་ཎི་སི་ཐན་ནས་ཕྱིར་འཐེན་བྱས་ཀྱང་འཇིགས་སྐུལ་རིང་ལུགས་པ་ཚོར་གཏོར་རྒོལ་བྱེད་ཐུབ་ཀྱི་ཡོད་པ་རེད་ཅེས་སྒྲུབ་བྱེད་བཀོད། སྲིད་འཛིན་བྷ་ཌན་གྱི་སྲིད་ཇུས་ལ་སྐྱོན་བརྗོད་བྱེད་མཁན་ཚོས་ཛ་ཝ་ཧི་རི་བཟའ་མི་འཁོར་དང་བཅས་པ་རྒྱལ་ས་ཀ་བྷུལ་དུ་སྐུང་ཡོད་པ་ནི་ཏ་ལི་བྷན་ཤོག་ཁག་གིས་སྲུང་སྐྱོབ་བྱེད་ཀྱི་ཡོད་པའི་རྟགས་མཚན་རེད། ཨབ་གྷ་ཎི་སི་ཐན་གྱི་ས་ཐོག་ཏུ་སླར་ཡང་འཇིགས་སྐུལ་རིང་ལུགས་པ་རྣམས་རྩ་བ་ཚུགས་ཐུབ་རྒྱུའི་ཉེན་ཁ་ཆེ། ཨ་མི་རི་ཀས་འཇིགས་སྐུལ་རིང་ལུགས་ལ་འཐབ་རྒོལ་བྱེད་པའི་ནུས་པ་ཉམས་ཟིན་འདུག་ཅེས་བསྟན། སྲིད་འཛིན་བྷ་ཌན་གྱི་གཞུང་གིས་རྒྱ་ནག་ལ་དམིགས་པ་གཏོད་རྒྱུའི་ཐག་གཅོད་བྱས་པར་ཨ་རིའི་གསང་བའི་ལས་ཁུངས་ཁག་གི་ལས་སྣེ་ཟུར་པ་དང་སྲིད་དོན་ཚོགས་པ་གཉིས་ཀྱི་གྲོས་ཚོགས་འཐུས་མི་ཚོའི་རྒྱབ་སྐྱོར་ཐོབ། རྒྱ་ནག་དམིགས་འབེན་དུ་འཛིན་དགོས་ཟེར་གྱི་ཡོད་པ་དེ་དག་གི་གྲས་སུ་སྔོན་ཆད་ཨབ་གྷ་ཎི་སི་ཐན་གྱི་ས་ཐོག་ཏུ་ཨལ་ཁེ་དྷ་དང་འཇིགས་སྐུལ་རིང་ལུགས་པའི་ཚོགས་པ་ཁག་ལ་འཐབ་རྒོལ་བྱས་མྱོང་བའི་གསང་བའི་མི་སྣ་ཟུར་པ་རྣམས་ཀྱང་ཚུད་ཡོད་ཅིང་། གྲོས་ཚོགས་འོག་མའི་འཐུས་མི་ཇཱེ་སན་ཀོ་རོ་ཡིས་ང་ཨབ་གྷ་ཎི་སི་ཐན་དང་ཨི་རཀ་གཉིས་ཀར་ལས་འགན་སྒྲུབ་ཏུ་བསྐྱོད་མྱོང་། འདས་པའི་ལོ་ཤས་རིང་ཨ་མི་རི་ཀས་འཇིགས་སྐུལ་རིང་ལུགས་ལ་འཐབ་རྒོལ་བྱ་རྒྱུ་གཙིགས་སུ་འཛིན་རྒྱུ་ཐལ་དྲགས་སོང་། ངས་བལྟས་ན་འཇིགས་སྐུལ་རིང་ལུགས་པའི་ཚོགས་པ་ཁག་ལས་ཀྱང་ཨུ་རུ་སུ་དང་རྒྱ་ནག་གཉིས་ཉེན་ཁ་ཆེ། གལ་སྲིད་ཁོ་ཚོས་ཐུབ་ན་ཨ་མི་རི་ཀའི་འཚོ་བའི་ལམ་སྲོལ་རྣམས་རྩ་མེད་གཏོང་རྒྱུ་དང་འཇིགས་སྐུལ་རིང་ལུགས་པ་ཚོས་དེ་ལྟར་སྒྲུབ་མི་ཐུབ་ཅེས་ནན་བརྗོད་བྱས་འདུག
ཨ་རིའི་གྲོས་ཚོགས་འོག་མའི་གསང་བའི་ལས་དོན་ཚོགས་ཆུང་གི་འཐུས་མི་ཚོས་དབུས་གསང་བའི་ལས་ཁུངས་སོགས་ཀྱིས་རྒྱ་ནག་ལ་རྟོག་ཞིབ་བྱེད་པའི་འགྲོ་གྲོན་རྣམས་ཇི་ལྟར་གཏོང་གི་ཡོད་མེད། ཨ་རིའི་གསང་བའི་ལས་ཁུངས་ཁག་གིས་རྒྱ་ནག་ལ་རྟོག་ཞིབ་བྱེད་པའི་ལས་དོན་བྱེ་བྲག་པ་རེར་མི་རྒྱུ་གཉིས་ཀྱི་འགྲོ་གྲོན་ཅི་ཙམ་གཏོང་གི་ཡོད་མེད་ཐད་ཞིབ་འཇུག་ནན་ཏན་བྱ་དགོས་ཞེས་དགོས་འདུན་བཏོན། དཔེར་ན་ཨ་རིའི་ཡུ་ཊ་མངའ་སྡེའི་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་སི་ཊི་ཝར་ཊིས་ང་ཚོ་འཕྱི་དྲགས་ཡོད་ཀྱང་མཐའ་མཇུག་ཨ་མི་རི་ཀས་རྒྱ་ནག་ལ་དམིགས་པ་གཏོད་ཀྱི་ཡོད་པར་དགེ་མཚན་ཆེ། ཨ་རིའི་མི་དང་འགྲོ་གྲོན། དམག་དོན་ཡོ་བྱད་དང་ཕྱི་འབྲེལ་སོགས་ཕྱོགས་གང་ཐད་དུ་རྒྱ་ནག་ལ་རྟོག་ཞིབ་བྱེད་འགོ་ཚུགས་པ་རེད་ཅེས་བསྔགས་བརྗོད་ཞུས། སྔ་ལོ་ཨ་རིའི་དབུས་གསང་བའི་ལས་ཁུངས་ཀྱིས་རྒྱ་ནག་ལ་རྟོག་ཞིབ་བྱེད་པའི་ལྟེ་གནས་ཤིག་དང་རྒྱ་ནག་གི་འཕྲུལ་རིག་ལག་རྩལ་ལ་རྟོག་ཞིབ་བྱེད་པའི་ལྟེ་གནས་ཤིག་བཅས་ལྟེ་གནས་གསར་པ་གཉིས་སྒོ་འབྱེད་རྒྱུ་ཡིན། ཨ་མི་རི་ཀས་རྒྱ་ནག་ལ་གསང་ཉུལ་བྱེད་པའི་ནུས་པ་གཅིག་ཏུ་སྤུང་འཆར་ཡོད། དབུས་གསང་བའི་ལས་ཁུངས་ལ་རྒྱ་ཡིག་རྒྱ་སྐད་ཤེས་པའི་ལས་བྱེད་པ་མང་ཙམ་བསྡུས་ནས་ཡིག་སྒྱུར་གྱི་དུས་ཡུན་རིང་པོ་འགོར་མི་དགོས་པའི་ཐག་གཅོད་བྱས་པ་ཡིན་ཞེས་གསལ་བསྒྲགས་སྤེལ། ༢༠༠༡་ལོར་འཇིགས་སྐུལ་རིང་ལུགས་པ་ཚོས་ཨ་མི་རི་ཀར་གཏོར་རྒོལ་བྱས་ནས་བཟུང་། འདས་པའི་ལོ་༢༡་ལ་ཨ་རིའི་གསང་བའི་ལས་ཁུངས་ཁག་གིས་འཇིགས་སྐུལ་རིང་ལུགས་ལ་འཐབ་རྒོལ་བྱས་ནས་རྒྱ་ནག་དང་ཨུ་རུ་སུ་གཉིས་ཡན་པོར་ལུས། ཨ་རིའི་དབུས་གསང་བའི་ལས་ཁུངས་ཀྱི་ལས་སྣེ་ཟུར་པ་ཌོག་ལ་སི་ཝ་ཡེ་སི་ཞེས་པ་ཞིག་གིས་ང་ཚོས་ལོ་བཅུ་ཕྲག་གཉིས་ཀྱི་རིང་འཇིགས་སྐུལ་རིང་ལུགས་ལ་འཐབ་རྒོལ་བྱས་པ་རེད། ད་ནས་དངོས་ཡོད་གནས་སྟངས་ལ་གཞིགས་ཏེ་རྒྱ་ནག་དང་ཨུ་རུ་སུར་དམིགས་པ་གཏོད་རྒྱུའི་ཁ་ཕྱོགས་བསྒྱུར་དགོས་ཞེས་ནན་བརྗོད་བྱས་འདུག
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། དབུས་གསང་བའི་ལས་ཁུངས་ཀྱི་མགྲིན་ཚབ་པས་འཇིགས་སྐུལ་རིང་ལུགས་ནི་ཉེན་ཁ་ཆེ་ཤོས་རེད། ཨུ་རུ་སུས་ཡུཀ་རེན་ལ་བཙན་འཛུལ་བྱས་པ་དང་རྒྱ་ནག་གི་ཉེན་ཁ་སོགས་ལའང་ང་ཚོས་དོ་སྣང་བྱེད་དགོས་ཀྱང་ཨ་རིའི་དབུས་གསང་བའི་ལས་ཁུངས་ཀྱིས་རང་གི་མཐུན་གྲོགས་དང་ཟླ་གྲོགས་རྒྱལ་ཁབ་ཁག་ལ་མཉམ་འབྲེལ་བྱས་ནས་འཇིགས་སྐུལ་རིང་ལུགས་ལ་འཐབ་རྒོལ་བྱེད་ཀྱི་ཡོད་པ་མཚམས་འཇོག་མི་ཉན་ཞེས་བསྒྲགས། ཨ་རིའི་གྲོས་ཚོགས་འཐུས་མི་ཚོས་དབུས་གསང་བའི་ལས་ཁུངས་དང་གསང་བའི་ལས་ཁུངས་གཞན་ཁག་གིས་རྒྱ་ནག་ལ་རྟོག་ཞིབ་བྱ་རྒྱུ་ཨང་དང་པོར་འཛིན་དགོས། རྒྱ་ནག་ལ་རྟོག་ཞིབ་བྱ་རྒྱུ་ཤུགས་ཆེ་རུ་བཏང་སྟེ་འཇིགས་སྐུལ་རིང་ལུགས་ལ་འཐབ་རྒོལ་བྱེད་པའི་འགྲོ་གྲོན་དང་མིའི་ནུས་པ་རྣམས་ཁ་ཕྱོགས་བསྒྱུར་དགོས་ཞེས་ནན་སྐུལ་བྱེད་ཀྱི་ཡོད་མོད། འོན་ཀྱང་འཇིགས་སྐུལ་རིང་ལུགས་ལ་འཐབ་རྒོལ་བྱེད་པའི་མིའི་ནུས་པ་དང་འགྲོ་གྲོན་ཅི་ཙམ་རྒྱ་ནག་གི་ཐོག་ཏུ་གཏོང་གི་ཡོད་མེད་ཀྱི་ཞིབ་ཕྲའི་གནས་ཚུལ་ཕྱིར་བསྒྲགས་མ་བྱུང་། ལྷག་པར་དུ་ཨ་རིའི་གྲོས་ཚོགས་འཐུས་མི་ཁག་ཅིག་གིས་རྒྱ་ནག་གི་འཕྲུལ་རིག་ལག་རྩལ་ཡར་རྒྱས་ཅི་ཙམ་ཕྱིན་ཡོད་མེད། ཞིས་ཅིན་ཕིང་གིས་ཨ་སྒོར་ཁྲག་ཁྲིག་མང་པོ་འགྲོ་གྲོན་བཏང་སྟེ་ཚན་རིག་དང་བཅོས་སྒྲིག་རྣམ་དཔྱོད། ལས་རིགས་གཞན་གྱི་ཚན་རིག་ཡར་རྒྱས་ཅི་ཙམ་བཏང་ཡོད་མེད། མ་འོངས་པའི་དམག་འཁྲུག་ནི་དཔལ་འབྱོར་དང་འཕྲུལ་རིག་གི་དམག་འཁྲུག་ཅིག་ལ་འགྱུར་རྒྱུ་ཡིན་པས་ཨ་རིའི་གསང་བའི་ལས་ཁུངས་ཁག་གིས་རྒྱ་ནག་ལ་དེའི་ཐད་རྟོག་ཞིབ་བྱ་རྒྱུ་ཤུགས་ཆེ་རུ་གཏོང་དགོས་པའི་གནོན་ཤུགས་སྤྲོད་ཀྱི་ཡོད་པའི་གནས་ཚུལ་ཐོན་འདུག
ཉེ་ཆར་ཕྱི་ཟླ་༧་པའི་ཚེས་༢༤་ཉིན་ཨ་རིའི་དམག་དཔུང་སྤྱི་ཁྱབ་བཀོད་འདོམས་པ་དམག་སྤྱི་མཱི་ལེ་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་དུ་ཕེབས་ནས་རྒྱ་ནག་གིས་གནམ་མཚོ་གཉིས་ནས་མངའ་ཁུལ་དེའི་རྒྱལ་ཁབ་ཁག་ལ་བཙན་དྲག་བཀོལ་རྒྱུ་མངོན་གསལ་ཇེ་དོད་དུ་ཕྱིན་ཡོད་ཅིང་། མངའ་ཁུལ་དེར་རྒྱ་ནག་གི་ཤུགས་རྐྱེན་རྒྱ་སྐྱེད་གཏོང་ཐབས་བྱེད་ཀྱི་འདུག དེ་ནི་གནས་ལུགས་ཡོད་པ་ཞིག་མིན་པས་ང་ཚོ་བློ་འཚབ་སྐྱེ་དགོས་པ་ཞིག་རེད། ཁོ་ཚོས་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་ནི་རྒྱ་ནག་གི་ཤུགས་རྐྱེན་ཁྱབ་ཡུལ་ཡིན་ཞེས་གོ་རྒྱུ་གཏོང་གི་འདུག ཡིན་ནའང་ཨ་མི་རི་ཀས་ཞི་བདེ་རྒྱ་མཚོའི་མངའ་ཁུལ་གྱི་རྒྱལ་ཁབ་ཁག་ལ་འབྲེལ་བ་སྲ་བརྟན་བཏང་ནས་རྒྱ་ནག་གི་ཤུགས་རྐྱེན་འགོག་རྒྱུའི་སེམས་ཐག་བཅད་ཡོད། སྲིད་འཛིན་བྷ་ཌན་གྱི་གཞུང་གིས་རྒྱ་ནག་ནི་རིམ་བཞིན་ཉེན་ཁ་ངོ་མ་དེར་འགྱུར་རྒྱུའི་ངོས་འཛིན་བྱེད་ཀྱི་ཡོད་ཅེས་བཤད། ཨ་མི་རི་ཀའི་དམག་དོན་མི་སྣ་ཚོས་རྒྱ་ནག་གིས་དམངས་གཙོ་དང་རང་སྲིད་རང་སྐྱོང་གི་ལམ་ལུགས་དར་ཡོད་པའི་ཐེ་ཝན་མཚོ་གླིང་ལ་བཙན་འཛུལ་བྱ་རྒྱུའི་ཉེན་ཁ་འདུག ༢༠༢༧་གྱི་མཚམས་སུ་རྒྱ་ནག་གིས་ཐེ་ཝན་ལེན་ཐུབ་རྒྱུའི་གྲ་སྒྲིག་བྱེད་ཀྱི་ཡོད་པ་དང་ཨ་རིའི་གྲོས་ཚོགས་ཀྱིས་ཐེ་ཝན་ལ་མཚོན་ཆ་བཙོང་དགོས་པའི་ཁྲིམས་ཡིག་གཏན་ལ་ཕབ་ཀྱང་རྒྱ་ནག་གིས་དངོས་སུ་ཐེ་ཝན་ལ་བཙན་འཛུལ་བྱེད་ཚེ། ཨ་མི་རི་ཀས་དམག་བཏང་ནས་ཐེ་ཝན་ལ་སྲུང་སྐྱོབ་བྱ་རྒྱུ་ཡིན་མིན་གསལ་ཁ་མ་ཐོན། རྒྱ་ནག་གི་དམག་དཔུང་སྤྱི་ཁྱབ་བཀོད་འདོམས་པ་ལི་ཙོ་ཁྲེང་གིས་ཨ་རིའི་དམག་དཔུང་སྤྱི་ཁྱབ་བཀོད་འདོམས་པར་ཐེ་ཝན་གྱི་རྩ་དོན་ཐོག་ཏུ་རྒྱ་ནག་གིས་ནམ་ཡང་གུ་བཤངས་བྱེད་ཐབས་བྲལ་ཞེས་བཤད། ཨ་མི་རི་ཀས་ཉི་ཧོང་དང་ཁེ་ན་ཌ། ཨིན་དུ་ནེ་ཤི་ཡ་དང་ཨོ་གླིང་རྒྱལ་ཁབ། ཧྥི་ལི་ཕིན་དང་ཝི་ཏེ་ནམ་བཅས་ལ་མཉམ་འབྲེལ་བྱས་ནས་རྒྱ་ནག་གི་སྟོབས་ཤུགས་གཅོག་རྒྱུའི་འཐབ་ཇུས་ཤིག་འཛིན་གྱི་ཡོད་པས་རྒྱ་ནག་གིས་ཨ་མི་རི་ཀས་ཨེ་ཤི་ཡའི་ནུབ་ཆིངས་དམག་དོན་སྒྲིག་འཛུགས་ལྟ་བུ་ཞིག་འཛུགས་ཀྱི་འདུག་ཅེས་སྐྱོན་བཙུགས། ཨ་རིའི་རྒྱལ་སྲུང་དྲུང་ཆེས་སིངྒ་པུར་གྱི་ཚོགས་འདུ་ཞིག་གི་ཐོག་ཏུ་ང་ཚོས་ཨེ་ཤི་ཡའི་ནུབ་ཆིངས་སམ། ཡང་ན་ཕྱོགས་སྒྲིག་བྱས་ནས་སླར་ཡང་གྲང་དམག་ཅིག་སློང་འདོད་མེད་ཅེས་འགྲེལ་བཤད་བརྒྱབ་ཡོད་པའི་གནས་ཚུལ་ཐོན་འདུག