Your browser doesn’t support HTML5
བྱང་ཀོ་རི་ཡའི་ཕྱི་འབྲེལ་མི་སྣ་ཞིག་ལྷོ་ཀོ་རི་ཡར་བྲོས་བྱོལ་ལ་སོང་བ།
རེས་གཟའ་མིག་དམར་ཉིན་ལྷོ་ཀོ་རི་ཡའི་དབུས་གསང་བའི་ལྷན་ཁང་གིས་བཤད་དོན་ལ། ཀྱུ་བྷའི་ནང་བརྟེན་གཞི་བྱས་པའི་བྱང་ཀོ་རི་ཡའི་མཐོ་རིམ་ཕྱི་འབྲེལ་མི་སྣ་ཞིག་ལྷོ་ཀོ་རི་ཡར་བྲོས་བྱོལ་ལ་སོང་འདུག་ཅིང་། དེ་ནི་བྱང་ཀོ་རི་ཡའི་མཐོ་རིམ་འགོ་ཁྲིད་ལྷོ་ཀོ་རི་ཡར་བྲོས་བྱོལ་ལ་སོང་བའི་གནས་ཚུལ་གསར་ཤོས་དེ་ཆགས་ཡོད།
ལྷོ་ཀོ་རི་ཡའི་རྒྱལ་ནང་གསང་བའི་ལྷན་ཁང་གིས་གསར་འགོད་པར་བཤད་དོན་ལ། ཀྱུ་བྷའི་ནང་ཡོད་བྱང་ཀོ་རི་ཡའི་ཕྱི་འབྲེལ་གཞུང་ཚབ་ཁང་གི་ཆབ་སྲིད་སྡེ་ཚན་གྱི་འགོ་ཁྲིད་དེ་ལྷོ་ཀོ་རི་ཡ་ལ་བྲོས་བྱོལ་སོང་བའི་གནས་ཚུལ་དེ་བདེན་པ་རེད་ཅེས་འགྲེལ་བརྗོད་བྱས་པ་ལས་ཞིབ་ཕྲ་འགྲེལ་བརྗོད་གང་ཡང་བྱས་མི་འདུག
རེས་གཟའ་མིག་དམར་ཉིན་ལྷོ་ཀོ་རི་ཡའི་གསར་འགྱུར་ལས་ཁང་ཆོ་སུམ་ཨིལ་བྷོས་གནས་ཚུལ་སྤེལ་བར་གཞིགས་ན། སྔ་ལོ་ཟླ་བ་བཅུ་གཅིག་པའི་ནང་བྱང་ཀོ་རི་ཡའི་ཕྱི་འབྲེལ་མི་སྣ་རི་ ཨིལ་ཀྱུ་དང་བཟའ་ཟླ། བུ་ཕྲུག་བཅས་བྱང་ཀོ་རི་ཡ་ལ་རྒྱབ་གཏོད་བྱས་ཏེ་ལྷོ་ཀི་རི་ཡར་བྲོས་བྱོལ་ལ་སོང་འདུག་ཅེས་འགྲེལ་བརྗོད་བྱས་འདུག
ཆོ་སུམ་ ཨིལ་བྷོ་གསར་ཤོག་གིས་སྐུ་ཞབས་རིས་བཤད་པ་ལུང་འདྲེན་བྱས་དོན། བྱང་ཀོ་རི་ཡའི་ཆབ་སྲིད་ལམ་ལུགས་ལ་ཁོང་ཞེན་པ་ལོག་པ་དང་འབྲེལ། བྱང་ཀོ་རི་ཡའི་ཕྱི་སྲིད་ལྷན་ཁང་གི་ལས་བྱེད་ཚོས་ལས་ཀ་བྱེད་ཕྱོགས་ལ་ཞིབ་བཤེར་བྱེད་བཞིན་པ་དེ་དྲང་བདེན་མིན་པ། ཁོང་མེཀ་སི་ཁོར་སྨན་བཅོས་ཆེད་བསྐྱོད་རྒྱུའི་ཆོག་མཆན་ཞུས་སྐབས་ཕྱི་སྲིད་ལྷན་ཁང་གིས་ཆོག་མཆན་སྤྲད་མེད་པ་སོགས་འགྲེལ་བརྗོད་བྱས་འདུག ཀྱུ་བྷ་ལ་རྒྱལ་སྤྱིའི་དཔལ་འབྱོར་ཉེས་ཆད་མང་པོ་ཡོད་པར་བརྟེན་སྨན་བཅོས་ཀྱི་མཐུན་རྐྱེན་མེད་པའི་སྐོར་ཡང་འགྲེལ་བརྗོད་བྱས་འདུག
སྐུ་ཞབས་རིས་ལྷོ་ཀོ་རི་ཡར་བྲོས་བྱོལ་བྱས་པའི་སྐོར་བྱང་ཀོ་རི་ཡས་ལམ་སེང་ལན་འདེབས་གསལ་བཤད་བྱས་མེད་ཅིང། དེའི་གོང་བྱང་ཀོ་རི་ཡའི་མཐོ་རིམ་དཔོན་རིགས་ཁག་གཅིག་ལྷོ་ཀོ་རི་ཡར་བྲོས་བྱོལ་ལ་འགྲོ་སྐབས་ལྷོ་ཀོ་རི་ཡས་དཔོན་རིགས་ཀྱིས་བཙན་འཁྲིད་བྱས་ལུགས་དང། ཁ་ཤས་ལ་དངུལ་དངོས་སོགས་སྤྲད་དེ་བྱང་ལ་རྒྱབ་གཏོད་བྱེད་འཇུག་ལུགས་སོགས་ཀྱི་སྐྱོན་བརྗོད་བྱས་ཡོད། མི་སྣ་བྲོས་བྱོལ་འགྲོ་མཁན་དེ་ཁྲིམས་འགལ་ནག་ཅན་པ་ཡིན་པར་བརྟེན་ཉེས་ཁྲིམས་ནས་ཐར་ཐབས་ཆེད་དུ་ལྷོ་ཀོ་རི་ཡར་བྲོས་བྱོལ་བྱས་ལུགས་བྱང་ཀོ་རི་ཡས་ནག་འཛུགས་བྱས་ཡོད། དེ་ཡང་འདི་ལོའི་ཟླ་བ་གཉིས་པར་ལྷོ་ཀོ་རི་ཡ་དང་ཀྱུ་བྷ་གཉིས་ཀྱིས་ཕྱི་འབྲེལ་གྱི་འབྲེལ་བ་གསར་འཛུགས་མ་བྱས་གོང་བྱང་གི་དཔོན་རིགས་དེ་བྲོས་བྱོལ་སོང་ཡོད། བྱང་ཀོ་རི་ཡ་དང་ཕྱི་འབྲེལ་གྱི་འབྲེལ་བ་ཡོད་པའི་རྒྱལ་ཁབ་ཁ་ཤས་ལས་མེད་ཅིང་། ལྷོ་ཀོ་རི་ཡ་དང་ཀྱུ་བྷ་གཉིས་དབར་ཕྱི་འབྲེལ་འབྲེལ་ལམ་འཛུགས་ཐུབ་པ་དེ་ནི་བྱང་ཀོ་རི་ཡར་གྱོང་གུན་ཆེན་པོ་ཞིག་ཆགས་ཡོད།
ལྷོ་ཀོ་རི་ཡ་ལ་བྲོས་བྱོལ་མ་སོང་བར་སྐུ་ཞབས་རིས་ལྷོ་ཀོ་རི་ཡ་དང་ཀྱུ་བྷ་གཉིས་ཕྱི་འབྲེལ་ལམ་འཛུགས་མ་ཐུབ་པའི་ཐབས་ཤེས་བྱས་ཡོད་པ་དང། ལྷོ་ཀོ་རི་ཡའི་གསར་འགྱུར་ལས་ཁང་གིས་གནས་ཚུལ་སྤེལ་བའི་ནང་དེ་སྔོན་པ་ན་མས་གནམ་གྲུའི་ཆ་ལག་དང་མེ་ཤུགས་འཕུར་མདེལ་སོགས་འཁྱེར་བའི་བྱང་གི་གྲུ་གཟིང་གཅིག་འཛིན་བཟུང་བྱས་པ་དེ་གློད་དཀྲོལ་ཡོང་རྒྱུར་སྐུ་ཞབས་རིས་ལམ་ལྷོང་ལྡན་པའི་གྲོས་མོལ་བྱས་པ་དེར་བྱང་ཀོ་རི་ཡའི་འགོ་ཁྲིད་ཀྱིས་ཁོང་ལ་ཆེད་བསྟོད་བྱས་ཡོད། སྐུ་ཞབས་རི་ནི་ཀྱུ་བྷའི་ནང་ཡོད་བྱང་ཀོ་རི་ཡའི་གཞུང་ཚབ་ལས་ཁང་གི་དཔོན་རིགས་མཐོ་ཤོས་ཨང་རིམ་གསུམ་པ་དེ་ཡིན་པ་རེད།
དེ་ཡང་བྱང་ཀོ་རི་ཡའི་ནང་གི་དཀའ་ཚེགས་ཆེ་བའི་དཔལ་འབྱོར་གནས་སྟངས་དང། ཆབ་སྲིད་ཀྱི་དམ་བསྒྲགས་སོགས་ནས་ཐར་ཐབས་སུ་ཕྱི་ལོ་༡༩༩༠ ལོ་ནས་བཟུང་ད་བར་བྱང་ཀོ་རི་ཡའི་མི་ཁྲི་གསུམ་དང་བཞི་སྟོང་ཙམ་ལྷོ་ཀོ་རི་ཡར་བྲོས་བྱོལ་བྱས་ཡོད་ཅིང་། དེ་ཚོའི་ཁོངས་ནས་མང་ཆེ་བ་བྱང་ཀོ་རི་ཡའི་བྱང་ཕྱོགས་དབུལ་འཕོང་ས་ཁུལ་གྱི་བུད་མེད་ཆགས་ཡོད། འོན་ཀྱང་ཉེ་བའི་དུས་ནས་བྱང་གི་ཤེས་ཡོན་སློབ་སྦྱོང་གི་གནས་ཚད་ཡག་པོ་ཡོད་མཁན་བྲོས་བྱོལ་བྱེད་མཁན་གྱི་གྲངས་འབོར་ཇེ་མང་དུ་འགྲོ་བཞིན་ཡོད། དཔེར་ན་ཕྱི་ལོ་༢༠༢༣ ལོར་བྱང་ཀོ་རི་ཡའི་ནང་གི་མི་སྣ་འབྱོར་བ་ཆེ་བ་བཅུ་ཙམ་ལྷོ་ཀོ་རི་ཡའི་ནང་སྐྱབས་བཅོལ་ཞུས་ཡོད་པའི་གནས་ཚུལ་འཐོན་འདུག
ལྷོ་ཀོ་རི་ཡའི་རྒྱལ་ས་སི་ཡོལ་ནང་གི་བུད་མེད་ཀྱི་གཙུག་ལག་སློབ་ཁང་ཞིག་གི་སློབ་དཔོན་ལེཕ་་ཨི་རིག་གིས་གསུངས་དོན། བྱང་གི་མཐོ་རིམ་འགོ་ཁྲིད་བྲོས་བྱོལ་བྱས་པའི་གནས་ཚུལ་དེ་རིགས་ཀྱིས་བྱང་ཀོ་རི་ཡར་ངོ་ཚ་ཁ་སྐྱེང་བཟོ་གཞིར་གྱུར་ཡོད། སྐུ་ཞབས་རི་ལྟ་བུར་ཆ་མཚོན་ན། ཀྱུ་བྷའི་ནང་བྱང་ཀོ་རི་ཡའི་ཁེ་ཕན་འཐབ་རྩོད་བྱེད་མཁན་གྱི་མི་སྣ་ཞིག་ཆགས་ཡོད་ཅེས་གསུངས་འདུག
ཨེ་པི་གསར་འགྱུར་ལས་ཁང་ནས་བཏུས།
གསར་འགོད་པ། ཀུན་བཟང་རིག་འཛིན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།