༄༅།། གློ་བོའི་ཡུལ་དུ་མཐོ་ཚད་ཧྥི་ཁྲུ་༡༥༠་ལྷག་གི་ཡན་ཆད་ཀྱི་གཡང་ངོས་སུ་གད་ཁུང་ཁྲི་ཚོ་༡་ཙམ་བརྐོས་ཡོད་པ་དེ་དག་ནི་ངོ་མཚར་ཆེ་བ་དང་ལྐོག་གྱུར་གྱི་གནས་ཤིག་ཡིན་ཞིང་། ཕྱི་ཟླ་དང་པོའི་ཚེས་༢༧་ཉིན་རྒྱ་གར་གྱི་ལྡི་ལི་གསར་པ་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། གློ་བོའི་ཡུལ་གྱི་གད་ཁུང་དེ་རྣམས་༢༠༢༤་ལོའི་བལ་ཡུལ་གྱི་ཡུལ་སྐོར་སྤྲོ་འཆམ་ས་གནས་གཙོ་གྲས་སུ་གྱུར། ཧི་མ་ལ་ཡའི་ལྗོངས་སུ་ཆགས་པའི་གད་ཁུང་དེ་ཚོར་མི་ཚོས་གློ་བོའི་ཡུལ་གྱི་གད་ཁུང་ངམ། ཡང་ན་གནམ་གྱི་གད་ཁུང་ཞེས་འབོད། གཡང་ངོས་སུ་གད་ཁུང་ཁྲི་ཚོ་༡་ཡས་མས་ཤིག་བརྐོས་པ་དེ་རྣམས་གནའ་མིའི་ཁྱིམ་གཞིས་ཡིན་པའི་ཚོད་དཔག་བྱེད་ཀྱི་ཡོད་པའི་གནས་ཚུལ་ཐོན་འདུག
གད་ཁུང་ཁག་ཅིག་ལུང་མཐིལ་ནས་མཐོ་ཚད་ཧྥི་ཁྲུ་༡༥༠་ལྷག་གི་ཡན་ཆད་དུ་ཡོད་ཅིང་། གད་ཁུང་དེ་དག་གི་ནང་དུ་ཐར་དཀའ་བའི་རྐྱེན་གྱིས་ལྐོག་གྱུར་གྱི་ངང་ཚུལ་དེ་ཉིད་བརྡོལ་མ་ཐུབ་པར་ལུས། གད་ཁུང་དེ་དག་གི་ནང་དུ་རི་འཛེག་པ་ཉམས་མྱོང་ཅན་དང་རྒྱལ་ཁམས་འགྲིམ་པའི་ས་མྱུར་བ་རྒྱུས་མངའ་ཅན་རྣམས་མ་གཏོགས་ཐར་དཀར། ཉེ་ཆར་མི་ཞིག་གིས་གློ་བོའི་ཡུལ་གྱི་གད་ཁུང་དེ་རྣམས་བརྙན་པར་བླངས་ཏེ་སྤྱི་ཚོགས་དྲྭ་ལམ་དུ་བཀྲམ་ནས་བཟུང་། རྒྱལ་སྤྱིའི་ཐོག་ཏུ་སླར་ཡང་གློ་བོའི་ཡུལ་གྱི་གད་ཁུང་དེ་དག་ལ་མཚར་སྣང་ཇེ་ཆེ་དང་གནའ་ཤུལ་དེར་དོ་སྣང་ཆེ་རུ་སོང་། ཐོག་མར་གད་ཁུང་དེ་རྣམས་སུས་བརྐོས་པ་དང་ཅི་ཞིག་ཆེད་དུ་བརྐས་མིན། གད་ཁུང་དེ་དག་གི་ནང་དུ་བརྟག་དཔྱད་བྱས་ན་ཅི་ཞིག་རྙེད་རྒྱུ་ཡོད་མེད་སོགས་ལ་མི་རྣམས་དབྱིངས་འཕར།།
གློ་སྨོན་ཐང་
ཨ་རིའི་སི་ཨེན་ཨེན་གསར་འགྱུར་ལས་ཁང་གིས་གློ་བོའི་ཡུལ་དུ་བསྐྱོད་ན་གཏམ་རྒྱུད་དུ་གྲགས་པའི་ཤང་ལི་ལ་ཞེས་པའི་ཞིང་ཁམས་དེར་བསླེབས་པའི་ཚོར་སྣང་ཞིག་སྟེར་ཞེས་གསར་འགྱུར་སྤེལ། དེ་ནས་བཟུང་སྟེ་གློ་སྨོན་ཐང་དང་ཉེ་འཁོར་གྱི་གད་ཁུང་ཁག གྲོག་རོང་ཟབ་མོ་དང་རྩེ་མོ་གནམ་ལ་ཟུག་པའི་རི་བོ་རྣམས་འཛམ་གླིང་ཡུལ་གྲུ་ཁག་གི་ལྟ་སྐོར་བ་དང་ས་མྱུར་བ་ཚོ་བསྐྱོད་ཡུལ་གཙོ་གྲས་སུ་གྱུར་ནས་རྒྱལ་ཁམས་ཀུན་ལ་སྐད་གྲགས་ཁྱབ། དུས་རབས་༡༨་པ་ནས་གློ་བོའི་ཡུལ་དེ་བལ་པོའི་མངའ་ཁོངས་སུ་ཚུད་ཀྱང་ས་གནས་དེའི་ཡུལ་མི་ཚོས་སྔར་བཞིན་བོད་པའི་ཆོས་དང་རིག་གཞུང་། ཡུལ་སྲོལ་གོམས་གཤིས་རྣམས་གྲ་མ་ཆག གྲུ་མ་ཉམས་པར་རྒྱུན་འཛིན་བྱེད་ཀྱི་བཞིན་ཡོད་པས་གློ་བོའི་ཡུལ་དུ་ལྷགས་ན་བོད་དུ་བསླེབས་པ་ལྟར་གྱི་ཚོར་སྣང་ཞིག་འགོག་མེད་མྱོང་ཞེས་གསར་འགྱུར་སྤེལ་འདུག
འདས་པའི་ལོ་བཅུ་ཕྲག་མང་པོར་བལ་པོའི་གཞུང་གིས་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་དང་འགྲུལ་པ་ཚོ་གློ་བོའི་ཡུལ་དུ་གཏོང་རྒྱུ་ཚད་བཀག་བྱས་ཀྱང་༡༩༩༡་ནས་བལ་ཡུལ་གཞུང་གིས་བཀག་སྡོམ་ཕྱིར་འཐེན་བྱས་ཏེ་ཡུལ་སྐོར་སྤྲོ་འཆམ་པ་གཏོང་རྒྱུ་མགོ་བརྩམས། ངག་རྒྱུན་དང་ལོ་རྒྱུས་ཀྱི་ཡིག་ཆ་ཁག་ཏུ་གློ་བོའི་ཡུལ་གྱི་གད་ཁུང་དེ་དག་གི་ནང་ནས་བོན་པའི་དཔེ་ཆ་རྙིང་པ་ཁག་ཅིག་རྙེད། ཉམས་ཞིབ་པ་ཚོས་གད་ཁུང་དེ་རྣམས་ཐོག་མར་བོན་པོ་དང་ཕྱིས་སུ་བོད་ལ་ནང་ཆོས་དར་བའི་རྗེས་སུ་གྲུབ་ཐོབ་ཚོས་སྒྲུབ་པ་ཉམས་ལེན་བྱ་ཡུལ་རེད། ལྷག་པར་དུ་གད་ཁུང་དེ་རྣམས་གཏུམ་མོ་སྒོམ་སར་ཤིན་ཏུ་ལེགས་ཞེས་འགྲེལ། གད་ཁུང་དེ་དག་གི་ནང་དུ་དབེན་འཇགས་སེ་དང་ཕྱི་ལ་བལྟས་ན་ཁོར་ཡུག་གིས་ཡིད་དབང་ཕྲོགས། གད་ཁུང་མང་ཆེ་བ་སྟོང་པ་ཡིན་རུང་འགའ་ཤས་ཀྱི་ནང་དུ་ལྡེབས་བྲིས་ཡོད་པ་དང་གད་ཁུང་ཁག་ཅིག་ལ་ཞལ་འདག་བྱུགས་ཏེ་ཉེ་འཁོར་གྱི་གྲོང་གསེབ་པ་ཚོར་སྒོ་འབྱེད་དུ་འཇུག་དགོས་པའི་གནས་ཚུལ་ཐོན་འདུག
གློ་སྨོན་ཐང་
ཕྱི་ཟླ་དང་པོའི་ཚེས་༢༨་ཉིན་རྒྱ་གར་གྱི་གསར་འགྱུར་འཕྲིན་ལམ་༡༨་པས་གནས་ཚུལ་སྤེལ་བ་ལྟར་ན། ཡིག་ཚགས་དྲྭ་ཚིགས་སུ་གློ་བོའི་ཡུལ་གྱི་གད་ཁུང་དེ་རྣམས་གནའ་བའི་དུས་སུ་གློ་སྨོན་ཐང་གི་ཡུལ་མི་རྣམས་འཚོ་གནས་བྱ་ཡུལ་ཡིན་ཤས་ཆེ། ལོ་སྟོང་ཕྲག་མང་པོར་ཀ་ལི་གྷ་དཱ་ཀི་ཆུ་བོ་བརྒྱུགས་ནས་ལུང་མཐིལ་དུ་གྲོག་ཤུར་གཏིང་ཟབ་ཅིག་གཏད་ཡོད་པ་དང་བྲག་རྡོ་ཁག་ལ་བཟོ་དབྱིབས་སྣ་ཚོགས་ཤིག་ཐོན། གད་ཁུང་དེ་དག་གི་ནང་དུ་མི་ཚོས་ལོ་ཁྲི་ཚོ་༡་ཡས་མས་ཤིག་གི་ཡར་སྔོན་དུ་ཁྱིམ་གཞིས་བཅས་ནས་རི་དྭགས་རྔོན་པ་དང་ས་ཞིང་བཏབ། སྤྱི་ཚོགས་འཕེལ་རྒྱས་ཕྱིན་པའི་རྟགས་མཚན་འདུག་ཅེས་བཀོད། གློ་བོའི་ཡུལ་གྱི་གད་ཁུང་དེ་རྣམས་གནའ་སྔ་མོ་ཞིག་ཏུ་བརྐས་པ་ཤེས་རྟོགས་ཐུབ་ཀྱང་དེའི་བྱུར་རབས་གསལ་པོ་ཞིག་སུ་ལའང་བཤད་རྒྱུ་མེད། ས་ཁམས་བརྟག་ཞིབ་པ་དང་ས་མྱུལ་བ། ཡུལ་སྐོར་སྤྲོ་འཆམ་པ་ཚོས་རང་རང་གི་མཐོང་ཐོས་དང་ཤེས་ཚོད་ལ་དཔགས་ནས་བསམ་ཚུལ་བྲིས།།
གློ་སྨོན་ཐང་མཆོད་རྟེན་
གད་ཁུང་དེ་དག་གི་འགའ་ཤས་ཀྱི་ནང་དུ་མེ་སྒོང་རྒྱག་ས་དང་འབྲུ་མཛོད། ཉལ་ས་སོགས་ཡོད་པར་མ་ཟད། ༢༠༢༤་ལོར་བལ་ཡུལ་དུ་ལྟ་སྐོར་དུ་བསྐྱོད་ས་༥༢་བདམས་ཡོད་པ་དེའི་གྲས་སུ་གློ་བོའི་ཡུལ་གྱི་གད་ཁུང་རྣམས་ཚུད། ཁ་སྔོན་ཕྱི་ཟླ་དང་པོའི་ཚེས་༡༠་ཉིན་ཨ་མི་རི་ཀའི་ནེའུ་ཡོཀ་དུས་བབ་ཚགས་པར་ནང་དུ་འཛམ་གླིང་གི་ཡུལ་སྐོར་སྤྲོ་འཆམ་ས་ཁུལ་༣༧་བདམས་པ་དེའི་གྲས་སུའང་གློ་བོའི་ཡུལ་གྱི་གད་ཁུང་རྣམས་འདུས། གློ་བོའི་ཡུལ་ནི་རི་བོ་དྷ་ཝ་ལ་གྷི་རི་དང་ནིལ་གྷི་རི་གཉིས་ཀྱི་བར་དུ་ཆགས་ཤིང་། ས་འོག་ནས་ཐོན་པའི་དངོས་པོ་ཁག་ལ་བརྟགས་ན་ལོ་༣༠༠༠་ལྷག་གི་ཡར་སྔོན་དུ་གློ་བོའི་ཡུལ་ནི་བོད་དང་བལ་ཡུལ་གྱི་ཚོང་ལམ་དུ་ཁེལ་ཡོད་པ་ཤེས་ནུས། གློ་སྨོན་ཐང་གི་རྒྱལ་པོའི་ཕོ་བྲང་དང་དགོན་སྡེ་ཁག མུག་ཏི་ན་ཐ་ཧིན་རྡུ་ལྷ་ཁང་། རི་བོ་མཐོན་པོ་རྣམས་ནི་ཡུལ་སྐོར་སྤྲོ་འཆམ་པ་རྣམས་ལྟད་མོར་བསྐྱོད་ས་རེད་ཅེས་གསར་འགྱུར་སྤེལ་འདུག