༄༅།། ཨོ་གླིང་གི་བྷ་རེ་སི་བྷེན་གྲོང་ཁྱེར་དུ་སོག་པོའི་ལས་རྩལ་བ་གཉིས་འབྱོར་བ་དང་ས་གནས་དེའི་བཟོ་ཚོང་ལས་ཁང་ཁག་གིས་ཨོ་གླིང་གཞུང་ལ་ངལ་རྩལ་བ་འདང་ངེས་མེད་པའི་དཀའ་ངལ་སེལ་བར་ཕྱི་རྒྱལ་ནས་ལས་རྩོལ་བ་ལེན་དགོས་པའི་ནན་སྐུལ་བྱས་འདུག གཟའ་འཁོར་འདིར་ཨེ་བྷི་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨོ་གླིང་རྒྱལ་ཡོངས་ལ་ཏོག་དབྱིབས་ནད་དུག་སྔོན་འགོག་ཆེད་དུ་སྒོ་རྒྱ་དམ་པོ་བསྡམས་པའི་སྟབས་ཀྱིས་རྒྱལ་ཁབ་དེར་ཕྱི་རྒྱལ་གྱི་ངལ་རྩལ་བ་ཡོང་རྒྱུ་ཉུང་དུ་སོང་། ཨེ་བྷི་སི་གསར་ཁང་གི་གཞི་གྲངས་སུ་ལོ་འདིའི་ཕྱི་ཟླ་༥་པའི་བར་དུ་ཨོ་གླིང་ལ་ངལ་རྩལ་བ་མེད་པའི་ས་མིག་སྟོང་པ་བརྒྱ་ཆ་༡༤་མང་དུ་ཕྱིན་ཡོད་པས་ཨོ་གླིང་གཞུང་གིས་ཐོངས་མཆན་དང་ཁེ་ཕན་སྤྲད་ནས་ཕྱི་རྒྱལ་གྱི་ངལ་རྩལ་བ་རྣམས་འགུགས་ཐབས་བྱ་དགོས་ཞེས་དགོས་འདུན་བཏོན། ཏོག་དབྱིབས་ནད་དུག་མ་ཁྱབ་གོང་དུ་ཨོ་གླིང་ལ་ལོ་ལྟར་ཕྱི་རྒྱལ་གྱི་ལས་རྩལ་བ་༡༥༠༠༠༠་ཡས་མས་རེ་བསླེབས་ཏེ་ཚོང་ལས་དང་བཟོ་ལས། ཞིང་ལས་དང་འབྲོག་ལས་སོགས་ས་གནས་སོ་སོར་ངལ་རྩལ་བ་འདང་གི་མེད་པའི་དཀའ་ངལ་རྣམས་སེལ། ད་ལོའི་ཕྱི་ཟླ་༧་པའི་ནང་ཨོ་གླིང་གཞུང་གིས་སོག་ཡུལ་ལ་རིག་གཞུང་བརྗེ་ལེན་གྱི་བཟང་ལན་སློག་ནས་སོག་པོ་ཚོ་ཨོ་གླིང་དུ་ལས་ཀར་ཡོང་ཆོག་པའི་སྒོ་ཕྱེ། སོག་ཡུལ་ནི་ཨོ་གླིང་ལ་ལས་ཀ་འཚོལ་དུ་ཡོང་ཆོག་པའི་ཐོབ་ཐང་སྤྲོད་ཡུལ་རྒྱལ་ཁབ་༤༧་པ་དེར་གྱུར། ལོ་ན་༢༣་ལ་སོན་པའི་ཁུ་རེལ་བྷ་ཏར་ནི་སོག་པོའི་རྒྱལ་ས་ཨུ་ལན་བྷ་ཏོར་གྲོང་ཁྱེར་གྱི་སྒྱུ་རྩལ་དང་རིག་གཞུང་སློབ་ཆེན་ནས་སྦྱོང་བརྡར་ཐོབ་པའི་གསར་འགོད་པ་ཞིག་ཡིན་ཞིང་། ཁོ་མོས་ཁྱོ་ག་དང་ཕྲུ་གུ་སོགས་ཁྱིམ་དུ་བཞག་སྟེ་ཨོ་གླིང་ལ་ངལ་རྩོལ་དུ་བསྐྱོད། དེ་བཞིན་ལོ་ན་༢༥་ལ་སོན་པའི་ཐུར་བྷ་ཏ་ལྷག་བསམ་ཚེ་རིང་ལའང་མི་གཤིས་རིག་པའི་ལག་འཁྱེར་ཡོད་པ་དང་སྔོན་ཆད་མ་བྱན་ཞིག་ཡིན་རུང་ཨོ་གླིང་ལ་ངལ་རྩོལ་རྒྱུག་ཏུ་བསླེབས།།
ཐུར་བྷ་ཏ་ལྷག་བསམ་ཚེ་རིང་གིས་ཨོ་གླིང་ནི་ཡ་མཚན་གྱི་རྒྱལ་ཁབ་ཅིག་རེད། ངས་ནི་མིང་ཚིག་གི་ལམ་ནས་འགྲེལ་བཤད་རྒྱག་ཤེས་ཀྱི་མི་འདུག ངས་ཡུན་རིང་ཨོ་གླིང་ལ་བསྐྱོད་རྒྱུའི་རེ་སེམས་བཅངས་པ་དང་སྔོན་ཆད་གློག་བརྙན་ནང་ནས་མ་གཏོགས་ཨོ་གླིང་མཐོང་མྱོང་མེད། ད་ནི་ང་ས་ཆ་འདིར་དངོས་སུ་བསླེབས་པ་རེད། ཨོ་གླིང་ནི་རིག་གཞུང་དང་གནམ་གཤིས་སོགས་ཕྱོགས་གང་ཐད་དུ་སོག་ཡུལ་དང་འདྲ་ཡི་མི་འདུག ང་ལ་དགའ་ཚོར་ཆེན་པོ་འཐོབ་ཀྱི་འདུག་ཅེས་གསར་འགོད་པའི་དྲི་བར་ལན་བཏབ། ན་གཞོན་མ་ཁུ་རེལ་བྷ་ཏར་གྱིས་ལས་ཀ་འཕྲལ་དུ་འགོ་ཚུགས་འདོད་ཡོད། ང་ལ་ཀངྒ་རུ་དང་དབྱི་མ་དོམ་སོགས་སེམས་ཅན་ཁག་ཅིག་བལྟ་འདོད་ཆེན་པོ་ཡོད་ཅེས་སྤྲོ་སྣང་གིས་བརྟས། སོག་པོའི་ན་གཞོན་ལས་རྩོལ་བ་ཟུང་གིས་ལས་ཀ་འགོ་མ་བཙུགས་གོང་དུ་ཀངྒ་རུ་དང་དབྱི་མ་དོམ། བྷ་རེ་སི་བྷེན་གྱི་རི་ཆུ་ལུང་གསུམ་ལ་ལྟད་མོར་བལྟས། དེ་ནས་གཞིས་ཀ་ཁག་ཏུ་ཕྱིན་ཏེ་རྟར་བཞོན་རྒྱུ་དང་འདྲུད་འཐེན་འཁོར་ལོ་གཏོང་རྒྱུ། ཕྱུགས་ཟོག་འཚོ་སྐྱོང་དང་སེམས་ཅན་རྣམས་ཕྱུགས་ཁང་དུ་བསྡུ་རྒྱུའི་ལས་རིགས་རྣམས་སྦྱངས། སོག་ཡུལ་དུ་རྟ་ལ་བཞོན་རྒྱུ་དར་སྲོལ་ཆེན་པོ་ཡོད་པས་ཁུ་རེལ་བྷ་ཏར་དང་ལྷག་བསམ་ཚེ་རིང་གཉིས་ནི་ཀུན་ལ་མ་ཐོབ་པའི་ལས་མི་གཉིས་སུ་གྱུར། ཨོ་གླིང་གི་ཁེ་ལས་ཁང་གི་འགན་འཛིན་ཇཱོ་ཝ་ན་བྷར་ནེ་ཊི་ཞེས་པ་ཞིག་གིས་སོག་ཡུལ་གྱི་སྐྱེས་ཕོ་མོ་གཉིས་ཀར་རྟ་རྩལ་བླ་ན་མེད་པ་ཡོད་པ་དེར་འཛམ་གླིང་ཡོངས་སུ་སྐད་གྲགས་ཆེ་ཞེས་བསྔགས་བརྗོད་ཞུས། སོག་པོ་དེ་དག་ལ་ཉིན་དགུའི་སྦྱོང་བརྡར་སྤྲད་པའི་རྗེས་སུ་ཟླ་བ་གསུམ་ལ་གཞིས་ཀ་ཞིག་ཏུ་ངལ་རྩོལ་རྒྱུག་ཆོག་པར་མ་ཟད། ལོ་གཞུག་མར་ཡང་ཨོ་གླིང་དུ་ཡོང་སྟེ་ངལ་རྩོལ་རྒྱུག་རྒྱུའི་ཐོངས་མཆན་ཞུ་ཆོག་པའི་གནས་ཚུལ་ཐོན་འདུག
ཁུན་སི་ལན་ཌི་ས་གནས་ཀྱི་སོ་ནམ་པའི་མཐུན་ཚོགས་ཀྱི་མགྲིན་ཚབ་པ་ཌ་ཡ་ན་སོན་ཌར་གྱིས་ས་གནས་དེའི་ཞིང་ལས་ལ་ཕྱི་ནས་ལས་རྩོལ་བ་ལེན་རྒྱུ་གནད་འགག་ཆེན་པོ་རེད། ང་ཚོར་ཕྱོགས་ཡོངས་ནས་ངལ་རྩལ་བ་འདང་ངེས་མེད་པར་དཀའ་ངལ་འཕྲད་ཀྱི་ཡོད། སྤྱིར་བཏང་གི་ངལ་རྩོལ་ཙམ་མིན་པར་ལག་ཤེས་ཅན་མེད་པའི་དཀའ་ངལ་ཡང་འཕྲད་ཀྱི་འདུག ཨོ་གླིང་གཞུང་གིས་ཕྱི་མི་ལས་རྩོལ་བ་ཚོར་ཁེ་ཕན་སྤྲོད་རྒྱུ་གལ་གནད་ཆེ། དེ་ལྟར་བྱུང་ན་ང་ཚོས་ཀྱང་ཕྱི་མི་ལས་རྩོལ་བ་ཚོར་རྒྱབ་སྐྱོར་ཇི་ལྟར་བྱེད་དགོས་མིན་གྱི་འགན་ཞིག་འཁུར་ཐུབ། ང་ཚོའི་ལས་རིགས་ཁག་ལ་ངལ་རྩོལ་བ་དགོས་མཁོ་ཡོད་པ་དང་ལས་རིགས་དེ་དག་སྒྲུབ་ཐུབ་པའི་ལག་ཤེས་ཅན་རག་རྒྱུ་ནི་ཤིན་ཏུ་གནད་འགག་ཆེན་པོ་ཞིག་རེད། ཨོ་གླིང་ནི་ལས་ཀ་འཚོལ་ཡུལ་ཡག་པོ་ཞིག་ཡིན་པའི་དྲིལ་བསྒྲགས་བྱེད་དགོས་ཀྱི་འདུག དེང་སྐབས་ཞིང་ལས་ཐོན་སྐྱེད་ལ་ཁེ་སང་ཆེན་པོ་ཡོད་པ་དང་ཞིང་ལས་འཕེལ་རྒྱས་ཕྱིན་ཏེ་གོ་སྐབས་ཀྱང་ཇེ་ཆེར་འགྲོ་རྒྱུ་ཉག་གཅིག་རེད། ཡིན་ནའང་ང་ཚོར་ངལ་རྩོལ་བ་མེད་པར་གོ་སྐབས་དེ་རྣམས་དམ་འཛིན་བྱེད་ཐུབ་རྒྱུ་ཁག་པོ་ཡིན་པ་དང་ཕྱི་རྒྱལ་ནས་ལས་རྩོལ་བ་ལེན་རྒྱུ་གལ་ཆེན་པོ་རེད། ལས་བདག་ཚོས་ལས་མིའི་འདོད་པ་ལྟར་གླ་ཕོགས་སྤྲོད་པ་དང་གང་དུ་ལས་ཀ་སྒྲུབ་འདོད་ཡོད་ཀྱང་དེར་བཀོད་སྒྲིག་བྱེད་ཀྱི་འདུག གླ་ཕོགས་སྤྲད་ནས་སྦྱོང་བརྡར་ཐོབ་པ་དང་ཕན་ཐོགས་ཅན་ཞིག་ཏུ་གྱུར་པ་རྣམས་ཨོ་གླིང་གི་གྲུབ་ཆ་ཞིག་ཏུ་འགྱུར་དགོས་ཀྱི་འདུག་ཅེས་བཀྲལ། ཨོ་གླིང་གི་སིལ་ཚོང་མཐུན་ཚོགས་ཀྱི་སྤྱི་ཁྱབ་འགན་འཛིན་ཕོལ་ཛཱ་ར་ཞེས་པ་ཞིག་གིས་བཤད་པ་ལྟར་ན། བྷ་རེ་སི་བྷེན་གྲོང་ཁྱེར་གྱི་སིལ་ཚོང་ལས་རིགས་གཅིག་པུར་ལས་མི་༤༠༠༠༠་ལྷག་གི་ས་མིག་སྟོང་པ་ཡོད་ཅིང་། འདས་པའི་ཟླ་བ་གསུམ་གྱི་རིང་ལས་རྩལ་བ་མེད་པའི་དཀའ་ངལ་བརྒྱ་ཆ་༤༠་ཡས་མས་ཤིག་ཆེ་རུ་ཕྱིན་ཡོད་པ་དང་ད་དུང་ཡང་དཀའ་ངལ་དེ་སེལ་ཐུབ་རྒྱུའི་རྟགས་མཚན་བྲལ། སིལ་ཚོང་གཉེར་མཁན་ཚོས་ལས་རྩོལ་བ་དགོས་ཀྱི་འདུག་ཟེར་གྱི་ཡོད་ཀྱང་ང་ཚོར་ལས་མི་གཏོང་རྒྱུ་རག་གི་མི་འདུག་ཅེས་སྡུག་སྐད་ཤོར།།
སོག་པོ་ཚོར་རང་ཡུལ་དུ་རང་བྱུང་ཐོན་སྐྱེད་མེད་པ་དང་ས་རྒྱ་ཆུང་དྲགས་པ། རྒྱལ་ནང་དུ་གོ་སྐབས་མེད་པར་ཨོ་གླིང་སོགས་ཕྱི་ལ་ལས་ཀ་འཚོལ་དུ་བསྐྱོད་དགོས་པ་ཞིག་མིན་པ་སྟེ། སོག་ཡུལ་ལ་མི་འབོར་ས་ཡ་༣་དང་ཕྱེད་ཀ་ཙམ་ལས་མེད་ཀྱང་ས་ཁྱོན་ནི་ཏུར་ཀི་རྒྱལ་ཁབ་ལས་ལྡབ་གཉིས་ཆེ་བ་ཡོད་པར་མ་ཟད། སོག་ཡུལ་ལ་རྡོ་སོལ་དང་ཡུ་རེ་ནེམ། གསེར་དངུལ་ཟངས་ལྕགས་དང་ཏི་ཚ་སོགས་རང་བྱུང་གཏེར་ཁས་རབ་ཏུ་ཕྱུག ཡིན་ནའང་ཏོག་དབྱིབས་ནད་ཡམས་དང་ལོ་འདིའི་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུའི་སྲིད་འཛིན་ཕུ་ཊིན་གྱིས་ཡུཀ་རེན་ལ་བཙན་འཛུལ་བྱེད་དུ་བཅུག་སྟེ་དམག་འཁྲུག་ལངས་ནས་བཟུང་། སོག་ཡུལ་ལ་དངོས་ཟོག་གི་རིན་གོང་འཕར་བ་དང་འབྲོག་པ་ཚོས་རླངས་འཁོར་གྱི་སྣུམ་ཉོ་དཀའ་བའི་ཚད་དེར་ལྷུང་། ནུབ་ཕྱོགས་རྒྱལ་ཁབ་ཁག་གིས་ཨུ་རུ་སུར་ཚོང་ལས་དང་དངོས་ཟོག་བཀག་སྡོམ་བྱས་པའི་རྗེས་སུ་སོག་པོ་ཚོར་ཨུ་རུ་སུ་ནས་ཟས་རིགས་དང་རྫས་ལུད། གཏེར་ཁ་སྔོག་པར་ཉེ་བར་མཁོ་བའི་འགས་རྫས་སོགས་ནང་འདྲེན་བྱ་རྒྱུ་མེད་པར་གྱུར་པའམ། ཡང་ན་འགས་རྫས་ཀྱི་རིན་གོང་འཕར་ནས་ནང་འདྲེན་བྱེད་མི་ཐུབ་པས་སོག་པོ་ཚོ་ཨོ་གླིང་ལྟ་བུའི་རྒྱལ་ཁབ་ཁག་ལ་ངལ་རྩོལ་རྒྱུག་ཏུ་མི་བསྐྱོད་ཐབས་མེད་དུ་གྱུར། སོག་ཡུལ་གྱི་དཔལ་འབྱོར་ཡོང་འབབ་བརྒྱ་ཆ་༧་དང་གྲངས་ཆུང་༢་ཡུལ་སྐོར་སྤྲོ་འཆམ་ལ་བརྟེན་ཡོད་པ་དང་༢༠༡༩་ལོའི་གོང་དུ་སོག་པོའི་ལས་མི་བརྒྱ་ཆ་༧་དང་གྲངས་ཆུང་༦་གི་འཚོ་བའི་དམིགས་སྒོ་རྣམས་ཡུལ་སྐོར་སྲི་ཞུ་ལ་བརྟེན་ཡོད་པ་རྣམས་སྦོ་ལུག ནད་ཡམས་ཀྱི་མགོ་སྟོད་ནས་ལོ་འདིའི་ཕྱི་ཟླ་༣་པའི་བར་དུ་སོག་ཡུལ་ལ་ཨ་སྒོར་དུང་ཕྱུར་༤་དང་བྱེ་བ་༧་ལྷག་གི་དཔལ་འབྱོར་གྱོང་གུད་ཕོག་སོང་ཞེས་གཞུང་གི་གཞི་གྲངས་སུ་བཀོད། སོག་ཡུལ་གྱི་ལྷོ་ཕྱོགས་སུ་ཆགས་པའི་རྒྱ་ནག་གིས་ཏོག་དབྱིབས་ནད་དུག་གཅིག་ཀྱང་མེད་པར་གཏོང་དགོས་པའི་སྲིད་ཇུས་ཤིག་ལག་ལེན་བསྟར། རྒྱ་ནག་གིས་དུས་ནས་དུས་སུ་སོག་ཡུལ་ལ་ས་མཚམས་བཀག་སྟེ་ཚོང་ལས་འགགས། ད་ལོའི་ཕྱི་ཟླ་༦་པའི་ནང་དུ་རྒྱ་ནག་གི་གཞུང་འབྲེལ་མི་སྣ་ཚོས་ནད་འགོག་སྲིད་ཇུས་འདི་ལོ་ལྔར་རྒྱུན་འཁྱོངས་བྱེད་སྲིད་ཅེས་གཏམ་བཤད་བྱས་པ་ནི་སོག་ཡུལ་ལ་དེ་བས་ཀྱང་དཀའ་ངལ་ཞིག་ཏུ་འགྱུར་རྒྱུ་ཡིན་པའི་གནས་ཚུལ་ཐོན་འདུག
འཛམ་གླིང་ཡོངས་ལ་ཏོག་དབྱིབས་ནད་དུག་ཁྱབ་པའི་རྗེས་སུ་སོག་ཡུལ་གྱིས་ཀྱང་རང་གི་དཔལ་འབྱོར་དང་ཚོང་ལས། མི་མང་གི་ལས་ཀ་འཚོལ་ཡུལ་བཅས་པ་ཨུ་རུ་སུ་དང་རྒྱ་ནག་གཉིས་གཅིག་པུར་བརྟེན་ན་ཉེན་ཁ་ཆེ་བ་དང་སོག་པོ་ཚོས་རྒྱང་ཐག་རིང་སར་བལྟ་དགོས་པ་ངེས་ཟིན། དཔེར་ན་ཕྱི་ཟླ་༨་པའི་ཚེས་༡༤་ཉིན་ཊེམ་དུས་དེབ་ལ་གནས་ཚུལ་ཐོན་པ་ལྟར་ན། ཨ་རིའི་ཧར་ཝ་ཌི་སློབ་ཆེན་ཐོན་པའི་སོག་པོའི་སྲིད་བློན་ཨོ་ཡུན་ཨེར་ཏེ་ནེས་ང་ཚོའི་ས་ཁམས་ཆབ་སྲིད་ཀྱི་ཆགས་ཡུལ་ནི་སྟོབས་ཆེན་རྒྱལ་ཁབ་གཉིས་ཀྱི་བར་དུ་ཚུད་ཡོད། འཛམ་གླིང་གི་དཔལ་འབྱོར་འཕེལ་ཆག་གི་འགྱུར་ལྡོག་ལ་ང་ཚོ་ཧ་ཅང་གི་ཚོར་སྐྱེན་རྣོན་པོ་ཡིན། ཡུཀ་རེན་དང་ཨུ་རུ་སུའི་དམག་འཁྲུག་ལངས་པར་བློ་ཕམ་ཆེན་པོ་ཡོད། ང་ཚོས་ཡུཀ་རེན་ལ་མི་ཆོས་རིང་ལུགས་ཀྱི་རོགས་སྐྱོར་སྤྲད་ཀྱང་སོག་པོའི་ཕྱི་སྲིད་ནི་ངེས་པར་དུ་རང་ཚུགས་ཐུབ་པ་ཞིག་ཡིན་དགོས། མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཁང་གི་ཚོགས་འཐུས་སྟོབས་ཆེན་རྒྱལ་ཁབ་ཁག་གིས་གྲོས་སྡུར་བྱས་ནས་ལས་དོན་ཐག་གཅོད་བྱ་དགོས། ཁོ་ཚོས་ཐག་གཅོད་ཅི་ཞིག་བྱས་ཀྱང་འཛམ་གླིང་མི་མང་ས་ཡ་མང་པོའི་འཚོ་བར་འབྲེལ་བ་ཆགས་ཀྱི་ཡོད་པ་རེད་ཅེས་ནན་བརྗོད་བྱས་འདུག སོག་ཡུལ་དེང་རབས་ཅན་དུ་བསྒྱུར་ནས་གཏེར་ཁ་ཕྱིར་ཚོང་བྱ་རྒྱུ་ཤུགས་ཆེ་རུ་གཏོང་དགོས་མོད། འོན་ཀྱང་སོག་ཡུལ་གྱི་ཐོན་སྐྱེད་བརྒྱ་ཆ་༩༠་ལྷག་རྒྱ་ནག་གཅིག་པུར་བཙོང་གི་ཡོད་པས་ཁྲོམ་ར་རྒྱ་སྐྱེད་མ་ཐུབ་པའི་དཀའ་ངལ་འཕྲད། སོག་ཡུལ་ལ་མཚོ་ལམ་མེད་པར་རྒྱ་ནག་དང་ཨུ་རུ་སུ་གང་རུང་ཞིག་བརྒྱུད་ནས་དངོས་ཟོག་ཕྱི་ལ་འདྲེན་དགོས་པ་ནི་རྟག་ཏུ་གཞན་དབང་སྟབས་བསྟུན་དུ་ཟད། ད་ལྟ་ཨོ་གླིང་གཞུང་གིས་སོག་ཡུལ་ནས་ལས་རྩོལ་བ་ལེན་རྒྱུའི་ཐག་གཅོད་བྱས་ཏེ་སོག་པོའི་གཞུང་དམངས་གཉིས་ཀར་གོ་སྐབས་གསར་པ་ཞིག་དང་སོག་པོ་ཚོས་ཨུ་རྒྱ་གཉིས་ཁོ་ན་མ་ཡིན་པར་རྒྱ་ཆེ་ས་ཞིག་ལ་བལྟ་ས་རྙེད་པ་རེད་ཅེས་གནས་ཚུལ་ཐོན་འདུག