༄༅།། དེ་རིང་ཕྱི་ཚེས་༡༡་ནས་༡༢་བར་དུ་ལི་ཐུ་ཝེ་ཎི་ཡའི་རྒྱལ་ས་ཝིལ་ནེ་སི་གྲོང་ཁྱེར་དུ་ནུབ་ཆིངས་སྒྲིག་འཛུགས་ཀྱི་ཚོགས་འཐུས་རྒྱལ་ཁབ་ཁག་གི་ཆེས་མཐོའི་འགོ་ཁྲིད་ཚོ་ཚོགས་འདུ་འཚོགས་བཞིན་ཡོད་ཅིང་། ཉི་ཧོང་གི་སྲིད་བློན་དང་ལྷོ་ཀོ་རི་ཡའི་སྲིད་འཛིན་གཉིས་ནུབ་ཆིངས་ཀྱི་ཚོགས་འདུར་ཞུགས་ནས་བདེ་འཇགས་དང་དྲྭ་ལམ་སྲུང་སྐྱོབ། ཟླ་གྲོགས་ཀྱི་འབྲེལ་བ་སྲ་བརྟན་གཏོང་རྒྱུའི་གྲོས་མོལ་བྱེད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༡༡་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་གྱིས་བྱང་ཀོ་རི་ཡ་དང་ཡུཀ་རེན། རྒྱལ་སྤྱིའི་བདེ་འཇགས་ཀྱི་གནད་དོན་ཁག་ལ་ལྷོ་ཀོ་རི་ཡས་ནུབ་ཆིངས་སྒྲིག་འཛུགས་ལ་མཉམ་འབྲེལ་གཏོང་རྒྱུ་ཡིན། ནུབ་རྒྱ་མཚོ་ཆེན་མོའི་མངའ་ཁུལ་གྱི་བདེ་འཇགས་དང་རྒྱ་གར་ནས་ཞི་བདེ་རྒྱ་མཚོའི་བར་གྱི་བདེ་འཇགས་སྲུང་སྐྱོབ་ནི་ཁ་འབྲལ་ཐབས་མེད་པ་ཞིག་རེད། ང་ཚོགས་འདུ་འདིར་བཅར་ནས་ལྷོ་ཀོ་རི་ཡའི་དགོས་མཁོ་ལྟར་ནུབ་ཆིངས་ལ་མཉམ་འབྲེལ་དང་ཟླ་གྲོགས་ཀྱི་འབྲེལ་བ་ཞིག་འཛུགས་ཀྱི་ཡོད། ང་ཚོས་དམག་དོན་གྱི་གསང་བའི་ལས་དོན་དང་དྲྭ་ལམ་སྲུང་སྐྱོབ་བཅས་ལ་དམིགས་སུ་བཀར་ནས་གྲོས་མོལ་བྱེད་ཀྱི་ཡོད་ཅེས་གསར་འགོད་གསལ་བསྒྲགས་སྤེལ།།
Poland Japan
ཕྱི་ཟླ་༧་པའི་ཚེས་༡༡་ཉིན་ཉི་ཧོང་གི་ཀིའོ་དྷོ་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། གཟའ་མིག་དམར་ཉིན་ནུབ་ཆིངས་དང་ཉི་ཧོང་གཉིས་ཀས་བདེ་འཇགས་སྲུང་སྐྱོབ་མཉམ་འབྲེལ་གྱི་ཡིག་ཆ་གསར་པ་ཞིག་ཕྱིར་བསྒྲགས་བྱ་རྒྱུ་ཡིན་ཞིང་། སྲིད་བློན་ཀི་ཤི་དྷ་ཚོགས་འདུ་མ་ཕེབས་གོང་དུ་ང་ནུབ་ཆིངས་ཀྱི་ཚོགས་འདུར་ཞུགས་ནས་རང་དབང་དང་དམངས་གཙོའི་ལྟ་གྲུབ་མཐུན་པ་དང་རྒྱལ་སྤྱིའི་ཁྲིམས་དང་ཁྲིམས་ཀྱིས་དབང་བསྒྱུར་ལམ་ལུགས་གཞི་རྩར་འཛིན་པའི་རྒྱལ་ཁབ་ཁག་ལ་མཉམ་འབྲེལ་བྱ་རྒྱུ་བསྐྱར་ཟློས་བྱ་འཆར་ཡོད་ཅེས་གསར་འགོད་པའི་དྲི་བ་ཁག་ལ་ལན་བཏབ། སྲིད་བློན་ཀི་ཤི་དྷ་དང་ནུབ་ཆིངས་ཀྱི་སྤྱི་ཁྱབ་དྲུང་ཆེ་ཡན་སི་ས་ཊོལ་ཊེན་བྷག་གིས་ཕྱོགས་གཉིས་ཀྱི་མཉམ་འབྲེལ་ཡིག་ཆ་དེ་ཕྱིར་བསྒྲགས་བྱ་རྒྱུ་དང་ཉི་ཧོང་གིས་རང་གི་མཁོ་དགོས་ལྟར་ནུབ་ཆིངས་ལ་མཚོ་ལམ་གྱི་བདེ་འཇགས་སྲུང་སྐྱོབ་དང་འཁྱོག་བཤད་ལ་འཐབ་རྒོལ། མཁའ་དབྱིངས་ཕྱི་ལོགས་སུ་མཉམ་འབྲེལ་བྱ་རྒྱུ། ལི་ཐུ་ཝེ་ཎི་ཡ་ནས་སྲིད་བློན་ཀི་ཤི་དྷ་ཡུ་རོབ་ལ་ཕེབས་ནས་ཡུ་རོབ་མཉམ་འབྲེལ་གྱི་འགོ་ཁྲིད་ཚོར་ཐུག་འཕྲད་གྲོས་མོལ་བྱ་རྒྱུ་ཡིན་པར་མ་ཟད། སྲིད་བློན་ཀི་ཤི་དྷས་ལྷོ་ཀོ་རི་ཡའི་སྲིད་འཛིན་དང་ཡུཀ་རེན་གྱི་སྲིད་འཛིན་གཉིས་ལའང་ཐུག་འཕྲད་གྲོས་མོལ་བྱེད་ཀྱི་ཡོད་འདུག
ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་ལ་ཐུག་འཕྲད་གྲོས་མོལ་བྱས་པའི་སྐབས་སུ་སྲིད་བློན་ཀི་ཤི་དྷས་རྒྱལ་སྤྱིའི་རྡུལ་ཕྲན་ནུས་ཤུགས་ལྷན་ཁང་གི་ཆོག་མཆན་ལྟར་ཧྥུ་ཀུ་ཤི་མ་རྡུལ་ཕྲན་གློག་ཁང་གི་གློག་ཆུ་རྣམས་ཞི་བདེ་རྒྱ་མཚོའི་ནང་དུ་བཏང་བ་ཡིན་ཞེས་འགྲེལ་བཤད་བསྐྱོན། ཡུཀ་རེན་གྱི་སྲིད་འཛིན་ཛེ་ལན་སི་ཀིར་ཐུག་འཕྲད་གྲོས་མོལ་བྱས་པའི་སྐབས་སུ་ཉི་ཧོང་གིས་དཔལ་འབྱོར་རོགས་རམ་མང་དུ་གཏོང་རྒྱུ་དང་ཡུཀ་རེན་བསྐྱར་དུ་འཛུགས་སྐྲུན་བྱེད་པར་རོགས་སྐྱོར་བྱ་རྒྱུ་ཁས་བླངས། སྲིད་བློན་ཀི་ཤི་དྷས་ཡུ་རོབ་མཉམ་འབྲེལ་གྱི་གཙོ་འཛིན་ཆལ་སི་མཱི་ཤལ་དང་ཡུ་རོབ་མཉམ་འབྲེལ་གྱི་འགན་འཛིན་ཨུར་སུ་ལ་ཝེན་ཌར་ལེན་གཉིས་ལ་ཐུག་འཕྲད་བྱས་པའི་རྗེས་སུ་ཉི་ཧོང་དང་ཡུ་རོབ་མཉམ་འབྲེལ་མཚོ་ལམ་དང་དྲྭ་ལམ་སྲུང་སྐྱོབ། དངོས་ཟོག་རྒྱུན་ཆད་མེད་པར་མཁོ་འདོན་ཐུབ་རྒྱུ་སོགས་ལས་དོན་སྣ་མང་ཞིག་གི་ཐོག་ཏུ་མཉམ་འབྲེལ་བྱ་རྒྱུའི་གསལ་བསྒྲགས་སྤེལ། དེ་བཞིན་སྲིད་བློན་ཀི་ཤི་དྷས་ཡུ་རོབ་མཉམ་འབྲེལ་གྱི་ཁོངས་གཏོགས་རྒྱལ་ཁབ་ཁག་གི་འགོ་ཁྲིད་ཚོར་ཡང་ལོགས་སུ་ཐུག་འཕྲད་གྲོལ་མོལ་བྱ་འཆར་ཡོད་ཅེས་ཉི་ཧོང་ཕྱི་སྲིད་ལྷན་ཁང་གིས་གསལ་བསྒྲག་སྤེལ་འདུག
ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པར་ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་གྱིས་སྐྱོན་བརྗོད་བྱས་པར་ནུབ་ཆིངས་ཀྱི་སྤྱི་ཁྱབ་དྲུང་ཆེས་རྗེས་སུ་ཡི་རང་ཞུས། ཁོང་གིས་བྱང་ཀོ་རི་ཡའི་རྡུལ་ཕྲན་མཚོན་ཆ་དང་འཕུར་མདེལ་གྱི་ཉེན་ཁ་རྣམས་ནུབ་ཆིངས་དང་དེ་ལས་བརྒལ་ནས་ཤུགས་རྐྱེན་ཐེབས་ཀྱི་འདུག ནུབ་ཆིངས་དང་ལྷོ་ཀོ་རི་ཡ་གཉིས་རྡུལ་ཕྲན་མཚོན་ཆ་ཁྱབ་གདལ་བཀག་སྡོམ་ཚུད་པའི་ལས་དོན་༡༡་གི་ཐོག་ཏུ་མཉམ་འབྲེལ་རྒྱ་ཆེ་རུ་གཏོང་རྒྱུའི་གྲོས་མཐུན་བྱུང་སོང་ཞེས་བསྒྲགས། ནུབ་ཆིངས་ཀྱི་ཚོགས་འདུའི་ཞོར་དུ་ལྷོ་ཀོ་རི་ཡའི་སྲིད་འཛིན་ཡོན་སུག་ཡོལ་གྱིས་ཉི་ཧོང་དང་ཨོ་གླིང་། ནེའུ་ཛི་ལན་ཌི་གསུམ་གྱི་སྲིད་བློན་རྣམས་ལ་ཐུག་འཕྲད། ཨ་མི་རི་ཀ་གཙོས་ནུབ་ཆིངས་ཀྱི་ཚོགས་འཐུས་རྒྱལ་ཁབ་ཁག་གིས་ཨུ་རུ་སུའི་སྲིད་འཛིན་ཕུ་ཊིན་གྱིས་བྱང་ཀོ་རི་ཡར་རྒྱབ་སྐྱོར་བྱེད་ཀྱི་ཡོད་པའི་སྟོབས་ཤུགས་གཅོག་དགོས། ལྷོ་ཀོ་རི་ཡའི་གཞུང་གིས་ཡུཀ་རེན་ལ་མཚོན་ཆ་འཚོང་རྒྱུ་ཤུགས་ཆེ་རུ་གཏོང་དགོས་ཞེས་གནོན་ཤུགས་སྤྲོད་ཀྱི་ཡོད་པའི་གནས་ཚུལ་ཐོན་འདུག
རོ་ཡ་ཊར་སི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ལྷོ་ཀོ་རི་ཡའི་གཞུང་གིས་མཚོན་ཆ་དང་མདེའུ་དེ་རྣམས་ཨ་མི་རི་ཀར་སྤྲད། ཨ་མི་རི་ཀ་ནས་མཚོན་ཆ་དང་མདེའུ་དེ་རྣམས་ཡུཀ་རེན་ལ་འཕྲོད་དུ་འཇུག་དགོས། ལྷོ་ཀོ་རི་ཡའི་རྩ་ཁྲིམས་སུ་དམག་འཁྲུག་རྒྱག་བཞིན་པའི་རྒྱལ་ཁབ་ཅིག་ལ་མཚོན་ཆ་ཕྱིར་ཚོང་བྱེད་མི་ཆོག་ཅེས་འཁོད་ཡོད་པ་གསལ་བཀྲོལ་བྱས་མོད། འོན་ཀྱང་ལྷོ་ཀོ་རི་ཡའི་རྒྱལ་སྲུང་ལྷན་ཁང་གིས་ཡུཀ་རེན་ལ་མདེའུ་ཕྱིར་ཚོང་བྱེད་ཀྱི་ཡོད་པ་རེད་ཟེར་བའི་གསར་འགྱུར་དེ་བདེན་པ་མ་རེད་ཅེས་བཀྲལ། ནུབ་ཆིངས་ཀྱི་སྤྱི་ཁྱབ་དྲུང་ཆེ་དང་ཡུཀ་རེན་གྱི་སྲིད་འཛིན་གཉིས་ཀས་ལྷོ་ཀོ་རི་ཡའི་སྲིད་འཛིན་ལ་མཚོན་ཆ་དང་མེ་སྒྱོགས་མདེའུ་རྣམས་མྱུར་དུ་བཙོང་དགོས་ཞེས་ནན་སྐུལ་བྱས་ཤིང་། ལྷོ་ཀོ་རི་ཡའི་སྲིད་འཛིན་གྱིས་བྱང་ཀོ་རི་ཡའི་རྡུལ་ཕྲན་མཚོན་ཆ་འགོག་པར་རྒྱལ་སྤྱིའི་སྤྱི་ཚོགས་ཀྱིས་རྣམ་འགྱུར་གསལ་པོ་སྟོན་པའི་དུས་ལ་བསླེབས་ཡོད་ཅེས་ནན་གྱིས་བསྐུལ། ནུབ་ཆིངས་ཀྱིས་བྱང་ཀོ་རི་ཡའི་རྡུལ་ཕྲན་མཚོན་ཆ་འགོག་པར་ནུས་པ་ཅི་ཞིག་འདོན་ཐུབ་རྒྱུ་ཡིན་མིན་ཐད་གྲོས་མོལ་བྱེད་ཀྱི་ཡོད་པའི་གནས་ཚུལ་ཐོན་འདུག
ཕྱི་ཟླ་༧་པའི་ཚེས་༡༡་ཉིན་སི་ཨེན་ཨེན་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། ནུབ་ཆིངས་ཀྱི་ཆེས་མཐོའི་འགོ་ཁྲིད་ཚོའི་ལོ་འཁོར་ཚོགས་འདུ་འདིར་ཉི་ཧོང་དང་ལྷོ་ཀོ་རི་ཡ། ཨོ་གླིང་དང་ནེའུ་ཛི་ལན་ཌི་བཞིའི་འགོ་ཁྲིད་རྣམས་ཕེབས་ཡོད་པ་དེ་ལ་གཞིགས་ཚེ། བྱང་ཨ་རི་དང་ཡུ་རོབ་ཀྱི་དམག་དོན་མཉམ་འབྲེལ་སྒྲིག་འཛུགས་འདིའི་ཚོགས་ཆེན་གྱི་གྲོས་གཞི་གཙོ་བོ་ཡུཀ་རེན་ཁོ་ན་མིན་པ་ཤིན་ཏུ་གསལ། ནུབ་ཆིངས་ཀྱི་སྤྱི་ཁྱབ་དྲུང་ཆེས་ཡུཀ་རེན་གྱི་དམག་འཁྲུག་གིས་གྲང་དམག་རྗེས་སུ་ཨ་རིས་འགོ་ཁྲིད་པའི་དམག་དོན་སྒྲིག་འཛུགས་འདིར་སྔོན་ཆད་བྱུང་མྱོང་མེད་པའི་མཐུན་སྒྲིལ་རྡོག་རྩ་གཅིག་སྒྲིལ་བྱུང་སོང་། དེ་རིང་ཡུཀ་རེན་ལ་བཙན་འཛུལ་བྱུང་ནས་དམག་འཁྲུག་ལངས་ཡོད་ཀྱང་སང་ཉིན་ཨེ་ཤི་ཡར་དམག་འཁྲུག་ལང་སྲིད་ཅེས་གཏམ་བཤད་བྱས་འདུག ནུབ་ཆིངས་ཀྱི་ཕྱི་སྲིད་དྲྭ་ཚིགས་སུ་སྤྱི་ཁྱབ་དྲུང་ཆེ་ས་ཊོལ་ཊེན་བྷག་ནས་རྒྱ་ནག་གིས་ཕྱི་ལ་བཙན་དྲག་བཀོལ་བ་དང་ནང་དུ་དྲག་གནོན་བྱེད་ཀྱི་ཡོད་པ་ནི་ནུབ་ཆིངས་ཀྱི་བདེ་འཇགས་དང་ལྟ་གྲུབ། ནུབ་ཆིངས་ཀྱི་ཁེ་ཕན་བཅས་ལ་ཉེན་ཁ་ཞིག་རེད་ཅེས་རྩོམ་ཡིག་བྲིས།།
NATO leaders summit in Vilnius
ནུབ་ཆིངས་ཀྱི་སྤྱི་ཁྱབ་དྲུང་ཆེས་མུ་མཐུད་དུ་བཤད་པ་ལྟར་ན། རྒྱ་ནག་གིས་ཁྱིམ་མཚེས་རྒྱལ་ཁབ་ཁག་ལ་འཇིགས་སྐུལ་དང་རྒྱལ་ཁབ་གཞན་ལ་ཐུབ་ཚོད་བྱེད་ཀྱི་འདུག རྒྱ་ནག་གིས་ནུབ་ཆིངས་ཀྱི་ཚོགས་འཐུས་རྒྱལ་ཁབ་༣༡་གི་རྨང་གཞིའི་མཐུན་རྐྱེན་འཛུགས་སྐྲུན་དང་ཉེར་མཁོའི་དངོས་ཟོག་རྣམས་ཁེར་སྡོམ་བྱས་ནས་ཉེན་ཁ་དེ་ཐད་ཀར་ཁྱབ་ཡོང་གི་འདུག རྒྱ་ནག་ཚུད་པའི་བཙན་དབང་རིང་ལུགས་ཀྱི་རྒྱལ་ཁབ་ཁག་གིས་ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པར་རྒྱང་ནས་བལྟས། ཁོ་ཚོས་བཙན་འཛུལ་བྱས་ན་ཁེ་གྱོང་ཅི་ཞིག་འཐོབ་རྒྱུ་ཡོད་མེད་ཁོག་རྩིས་རྒྱག་གི་ཡོད་པ་རེད། ང་ལོ་འདིའི་མགོ་སྟོད་དེར་ཉི་ཧོང་དང་ལྷོ་ཀོ་རི་ཡར་བསྐྱོད་པའི་སྐབས་སུ་རྒྱལ་ཁབ་དེ་དག་གི་འགོ་ཁྲིད་ཚོ་ཡུ་རོབ་ལ་འབྱུང་གི་ཡོད་པའི་དམག་འཁྲུག་འདི་མ་འོངས་པར་ཨེ་ཤི་ཡར་འབྱུང་སྲིད་པའི་བློ་འཚབ་བྱེད་ཀྱི་འདུག་ཅེས་བསྟན། ནུབ་ཆིངས་ཀྱི་སྤྱི་ཁྱབ་དྲུང་ཆེས་ཐེ་ཝན་ཞེས་དངོས་སུ་མིང་འབོད་མ་བྱས་ཀྱང་རྒྱ་ནག་གིས་ཨུ་རུ་སུར་མིག་དཔེ་བལྟས་ནས་ཐེ་ཝན་ལ་བཙན་འཛུལ་བྱ་སྲིད་པར་དམིགས་ཡོད་པ་ནི་གོར་མ་ཆག
པེ་ཅིང་གི་དབང་འཛིན་པ་ཚོས་ཐེ་ཝན་གྱི་གནད་དོན་ནི་རྒྱ་ནག་གི་ནང་སྲིད་ཡིན། དེ་ལ་ནུབ་ཆིངས་ལྟ་ཞོག རྒྱལ་ཁབ་སུ་གཅིག་གིས་ཀྱང་ཐེ་གཏོགས་བྱེད་མི་ཆོག ང་ཚོས་སུ་གཅིག་ལའང་ཞི་བདེ་ཁ་ལ་ཁྱེར་ནས་རྒྱ་ནག་གི་ནང་སྲིད་ལ་ཐེ་གཏོགས་བྱེད་དུ་འཇུག་རྒྱུ་མིན། ཉི་ཧོང་དང་ལྷོ་ཀོ་རི་ཡ་གཉིས་ནམ་ཡང་ནུབ་ཕྱོགས་ཀྱི་མི་རིགས་དཀར་པོའི་གྲས་སུ་ཚུད་མི་སྲིད། ཉི་ཧོང་དང་ལྷོ་ཀོ་རི་ཡ་གཉིས་ཀྱིས་རྒྱ་ནག་ལ་མཉམ་འབྲེལ་བྱས་ནས་ཨེ་ཤི་ཡ་དང་རྒྱལ་སྤྱིའི་ལས་དོན་ཁག་ལ་ནུས་པ་འདོན་དགོས་ཞེས་སྐུལ་ལྕག་བཏང་མོད། འོན་ཀྱང་ཉམས་ཞིབ་པ་ཚང་མས་ཉི་ཧོང་དང་ལྷོ་ཀོ་རི་ཡ། ཨོ་གླིང་དང་ནེའུ་ཛི་ལན་ཌི་བཞིའི་འགོ་ཁྲིད་ཚོ་ནུབ་ཆིངས་ཀྱི་ཚོགས་འདུར་ཞུགས་ཡོད་པ་ནི་ནུབ་ཕྱོགས་ཀྱི་དམག་དོན་སྒྲིག་འཛུགས་དེ་འཛམ་གླིང་ཤར་ཕྱོགས་སུ་རྒྱ་སྐྱེད་གཏོང་བའམ། ཡང་ན་ཨེ་ཤི་ཡའི་ནུབ་ཆིངས་སྒྲིག་འཛུགས་ཤིག་གསར་དུ་འཛུགས་ཤས་ཆེ། ཡུཀ་རེན་ལ་བཙན་འཛུལ་བྱུང་བ་ལྟར་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་དུ་འབྱུང་སྲིད་པ་སྔོན་འགོག་བྱ་རྒྱུའི་རྟགས་མཚན་ཡིན་པ་ཧ་ཅང་གསལ་པོ་རེད་ཅེས་གླེང་གི་ཡོད་པའི་གནས་ཚུལ་ཐོན་འདུག