༄༅།། ཡུ་རོབ་རྒྱལ་ཁབ་ཨི་ཊ་ལི་རྒྱ་ནག་གི་འགོ་ཁྲིད་ཞིས་ཅིན་ཕིང་གི་གཙིགས་འཛིན་ལས་གཞི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུའི་རྣམ་འགྱུར་གསལ་པོ་ཐོན། ཕྱི་ཟླ་༩་པའི་ཚེས་༤་ཉིན་བྷུ་ལམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ཟླ་བའི་ཉིན་ཨི་ཊ་ལིའི་ཕྱི་སྲིད་བློན་ཆེན་ཨན་ཐོ་ཎི་འོ་ཏེ་ཇ་ཎི་དང་རྒྱ་ནག་གི་ཕྱི་སྲིད་བློན་ཆེན་ཝང་དབྱི་གཉིས་ཐུག་འཕྲད་གྲོས་མོལ་བྱུང་། ཕྱི་སྲིད་བློན་ཆེན་ཏེ་ཇ་ཎིས་ང་རྒྱ་ནག་གི་ཕྱི་འབྲེལ་མི་སྣ་མཐོ་ཤོས་དེར་ཐུག་འཕྲད་བྱས་ནས་ཕྱོགས་གཉིས་ཀྱི་དཔལ་འབྱོར་དང་རིག་གཞུང་། ཚན་རིག་སོགས་མཉམ་འབྲེལ་བྱེད་ཀྱི་ཡོད་པ་རྒྱུན་འཁྱོངས་བྱ་རྒྱུའི་གྲོས་མོལ་བྱས་པ་ཡིན་ཞེས་ཨེག་སི་སྤྱི་ཚོགས་དྲྭ་ལམ་དུ་འཕྲིན་ཐུང་ཞིག་སྤེལ། རྒྱ་ནག་ཕྱི་སྲིད་ལྷན་ཁང་ནས་ཝང་དབྱིས་ཕྱི་སྲིད་བློན་ཏེ་ཇ་ཎི་ལ་རྒྱ་ནག་དང་ཨི་ཊ་ལིས་མཉམ་འབྲེལ་ཐོག་ཏུ་རྒྱུད་གཅིག་ལམ་གཅིག་འཛུགས་སྐྲུན་བྱས་ནས་ཚོང་ལས་ཀྱི་ཁེ་ཕན་ཐོབ་ཡོད། ཨི་ཊ་ལིའི་དངོས་ཟོག་སྤུས་དག་རྣམས་རྒྱ་ནག་གི་དུད་ཁྱིམ་སྟོང་ཕྲག་མང་པོར་ཁྱབ་ཡོད་པ་གསལ་སྟོན་བྱས་པ་རེད་ཅེས་གནས་ཚུལ་སྤེལ།།
ཝང་དབྱིས་རྒྱ་ནག་དང་ཨི་ཊ་ལིའི་ཚོང་ལས་ཀྱི་གྲུབ་འབྲས་དང་པེ་ཅིང་དང་རོམ་གཉིས་ལ་ལོ་ངོ་སྟོང་ཕྲག་གི་འབྲེལ་བ་ཡོད་པ་དྲན་སྐུལ་བྱས་ཀྱང་ཨི་ཊ་ལི་རྒྱུད་གཅིག་ལམ་གཅིག་ཁོངས་སུ་སོར་གནས་བྱ་རྒྱུ་དཀའ་བར་སྣང་། རྒྱ་ནག་གིས་ཨེ་ཤི་ཡ་དང་ཨ་ཧྥི་རི་ཀ ཤར་ཡུ་རོབ་སོགས་འཛམ་གླིང་གི་མཐའ་གྲུ་ཀུན་ཏུ་རྒྱ་ལམ་དང་ལྕགས་ལམ། གྲུ་ཁ་དང་གནམ་ཐང་འཛུགས་སྐྲུན་བྱས་ནས་རྒྱ་ནག་གི་ཤུགས་རྐྱེན་ཁྱབ་ཐུབ་པའི་ལས་གཞི་ཞིག་གཉེར། ༢༠༡༩་ལོར་ཨི་ཊ་ལི་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས་རྒྱུའི་གྲོས་མཐུན་ལ་མིང་རྟགས་བཀོད། ཨི་ཊ་ལི་ནི་འཛམ་གླིང་གི་བཟོ་ལས་ཡར་ཐོན་རྒྱལ་ཁབ་༧་གྱི་གྲས་ནས་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས་མཁན་རྒྱལ་ཁབ་འབའ་ཞིག་དེར་གྱུར། ཨི་ཊ་ལི་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས་པར་ཨ་རི་སོགས་ནུབ་ཕྱོགས་རྒྱལ་ཁབ་ཕལ་མོ་ཆེ་ཁོང་ཁྲོས་བརྟས། ད་ལྟ་ལོ་༣་གྱི་རྗེས་སུ་ཨི་ཊ་ལི་རྒྱུད་གཅིག་ལམ་གཅིག་ཁོངས་སུ་ཞུགས་ནས་ཚོང་ལས་ཀྱི་ཁེ་ཕན་མ་ཐོབ། རྒྱ་ནག་གི་དངོས་ཟོག་ཨི་ཊ་ལིར་མང་བ་བཙོངས་ཡོད་པ་དང་ཨི་ཊ་ལིའི་དངོས་ཟོག་རྒྱ་ནག་ལ་ཉུང་བ་བཙོངས། ཨི་ཊ་ལི་རྒྱུད་གཅིག་ལམ་གཅིག་ཁོངས་སུ་ཞུགས་ནས་རྒྱ་ནག་ལ་ཚོང་ལས་དང་དཔལ་འབྱོར་གྱི་ཁེ་ཕན་མང་བ་ཐོབ།།
རྒྱལ་ས་རོམ་དུ་བཅའ་སྡོད་རྒྱ་ནག་གི་གཞུང་ཚབ་པ་ཅ་གུའི་ཏེས་
ཨི་ཊ་ལི་རྒྱ་ནག་གི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱས་ན་པེ་ཅིང་ལ་ཕོག་ཐུག་འགྲོ་རྒྱུ་བརྗོད་ཅི་དགོས། ཨི་ཊ་ལིའི་སྲིད་བློན་གཞོན་པ་དང་ཕྱི་སྲིད་བློན་ཆེན་གཅིག་ལྕོག་ཏེ་ཇ་ཎི་རྒྱ་ནག་ལ་འཚམས་འདྲིར་ཕེབས་ནས་ཕྱོགས་གཉིས་ཀྱི་འབྲེལ་བ་སྡུག་ཏུ་མི་འགྲོ་བའི་ཆེད་དུ་ཝང་དབྱི་ལ་ཐུག་འཕྲད་གྲོས་མོལ་བྱས་འདུག རྒྱལ་ས་རོམ་དུ་བཅའ་སྡོད་རྒྱ་ནག་གི་གཞུང་ཚབ་པ་ཅ་གུའི་ཏེས་(Jia Guide)་ཨི་ཊ་ལི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱས་ན་མཇུག་འབྲས་ངན་པ་ཞིག་སྨིན་སྲིད་ཅེས་ཉེན་བརྡ་བཏང་མོད། ཉེ་ཆར་ཕྱི་ཟླ་༧་པའི་ནང་ཨི་ཊ་ལིའི་སྲིད་བློན་ཇཱི་འོར་ཇཱི་ཡ་མེ་ལོ་ཎི་(Giorgia Meloni)་ཕོ་བྲང་དཀར་པོར་ཕེབས་ནས་སྲིད་འཛིན་བྷ་ཌན་ལ་མཇལ་འཕྲད་གྲོས་མོལ་གནང་བའི་སྐབས་སུ་ཨི་ཊ་ལི་རྒྱ་ནག་ལ་བརྟེན་རྒྱུ་ཤུགས་ཆུང་དུ་གཏོང་རྒྱུ་ཡིན། ཁོ་མོ་རྒྱ་ནག་ལ་འཚམས་འདྲིར་བསྐྱོད་འཆར་ཡོད་ཅེས་སྲིད་འཛིན་བྷ་ཌན་ལ་ནང་མོལ་བྱས་འདུག ཟླ་བ་རྗེས་མར་རྒྱ་ནག་གིས་རྒྱུད་གཅིག་ལམ་གཅིག་གི་ལས་གཞི་གཉེར་ནས་ལོ་༡༠་འཁོར་བའི་དུས་དྲན་སྲུང་བརྩི་བྱེད་ཀྱི་ཡོད་པའི་གནས་ཚུལ་ཐོན་འདུག
ཨི་ཊ་ལིའི་སྲིད་བློན་ཇཱི་འོར་ཇཱི་ཡ་མེ་ལོ་ཎི་ཕོ་བྲང་དཀར་པོར་ཕེབས་ནས་སྲིད་འཛིན་བྷ་ཌན་ལ་མཇལ་འཕྲད་གྲོས་མོལ་གནང་བའི་སྐབས་
ཕྱི་ཟླ་༩་པའི་ཚེས་༥་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ཕྱི་སྲིད་བློན་ཆེན་ཝང་དབྱིས་རྒྱུད་གཅིག་ལམ་གཅིག་གིས་ཨི་ཊ་ལི་ལ་ཕན་ཐོགས་བྱུང་བ་རྣམས་ཕྱི་སྲིད་བློན་ཆེན་ལ་ཏེ་ཇ་ཎི་ལ་ར་སྤྲད། ཝང་དབྱིས་རྒྱ་ནག་དང་ཨི་ཊ་ལིའི་ཚོང་ལས་ཨ་སྒོར་དུང་ཕྱུར་༥༠༠་ནས་དུང་ཕྱུར་༨༠༠་ལ་འཕར་འདུག འདས་པའི་ལོ་ལྔའི་རིང་ཨི་ཊ་ལིའི་དངོས་ཟོག་རྒྱ་ནག་ལ་ཕྱིར་ཚོང་བྱ་རྒྱུ་བརྒྱ་ཆ་༣༠་ཐམ་པ་མང་དུ་ཕྱིན་འདུག་ཅེས་བསྟན། ཡིན་ནའང་དུས་ཡུན་དེའི་རིང་རྒྱ་ནག་གིས་ཨི་ཊ་ལར་དངོས་ཟོག་ཅི་ཙམ་བཙོངས་ཡོད་མེད་དང་ཨི་རྒྱ་གཉིས་ཀྱི་གང་ལ་ཁེ་ཕན་མང་བ་ཐོབ་ཡོད་མེད་གསལ་བཀྲོལ་མ་བྱུང་། ཨི་ཊ་ལིའི་ཨན་ས་གསར་འགྱུར་ལས་ཁང་གིས་ཕྱི་སྲིད་བློན་ཆེན་ཏེ་ཇ་ཎིས་ང་ཚོས་རྒྱ་ནག་ལ་ཐད་ཀར་དང་ཡུ་རོབ་མཉམ་འབྲེལ་ཁོངས་ནས་རྩ་དོན་དང་ཐོབ་ཐང་སོགས་གྲོས་མོལ་ལྷུག་པོ་དང་མངོན་ལྐོག་མེད་པ་ཞིག་བྱ་དགོས་པའི་ལངས་ཕྱོགས་བཟུང་ཡོད་པར་རྒྱབ་སྐྱོར་བྱེད་ཀྱི་ཡོད་ཅེས་བཤད་པའི་གནས་ཚུལ་སྤེལ། རྩ་དོན་དང་ཐོབ་ཐང་ཞེས་པ་ནི་དམངས་གཙོ་དང་རང་དབང་གི་ལྟ་གྲུབ་དང་འགྲོ་བ་མིའི་ཐོབ་ཐང་གི་རྩ་དོན་ལ་གོ་དགོས་པའི་གནས་ཚུལ་ཐོན་འདུག
རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས་པའི་ཨེ་ཤི་ཡ་དང་ཨ་ཧྥི་རི་ཀའི་རྒྱལ་ཁབ་ཁག་ཅིག་བུ་ལོན་ནང་དུ་ཚུད་ནས་ས་ཆ་རྒྱ་ནག་ལ་ཤོར་ཡོད་པ་སྟེ། ལྷོ་ཨེ་ཤི་ཡའི་རྒྱལ་ཁབ་སིངྒ་ལ་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས། རྒྱ་ནག་གིས་འགྲོ་གྲོན་བཏང་ནས་སིངྒ་ལར་གྲུ་ཁ་ཞིག་འཛུགས་སྐྲུན་བྱས་ཀྱང་སིངྒ་ལས་རྒྱ་ནག་ལ་བུ་ལོན་འཇལ་མ་ཐུབ་པར་གྲུ་ཁ་དེ་ལོ་༩༠་ཐམ་པའི་རིང་རྒྱ་ནག་གིས་བདག་ཉར་བྱེད་ཆོག་པའི་གྲོས་མཐུན་བཞག དེ་བཞིན་པ་ཀི་སི་ཐན་ཡང་རྒྱ་ནག་གི་གཅིག་རྒྱུད་ལམ་གཅིག་ཁོངས་སུ་ཞུགས་ནས་ཨ་སྒོར་དུང་ཕྱུར་མང་པོའི་བུ་ལོན་ནང་དུ་ཚུད། རྒྱ་ནག་གིས་ཨ་ཧྥི་རི་ཀའི་རྒྱལ་ཁབ་ཁག་ཏུ་ལྕགས་ལམ་དང་རྒྱ་ལམ། ཟམ་པ་དང་གྲུ་ཁ། གནམ་ཐང་སོགས་འཛུགས་སྐྲུན་བྱས་ཀྱང་རྒྱལ་ཁབ་དེ་དག་གིས་རྒྱ་ནག་ལ་བུ་ལོན་འཇལ་མ་ཐུབ། རྒྱ་ནག་གིས་ཕྱིའི་རྒྱལ་ཁབ་ཁག་ལ་འཛུགས་སྐྲུན་བྱས་ནས་ཨ་སྒོར་ཐེར་འབུམ་མང་པོ་མ་རྩ་བཙུགས་པ་རྣམས་བུ་ལོན་རུལ་པར་གྱུར་ཏེ་བསྡུ་རྒྱུ་མེད། ཕྱོགས་གཅིག་ནས་རྒྱུད་གཅིག་ལམ་གཅིག་དེ་རྒྱ་ནག་བུ་ལོན་ནང་དུ་ཚུད་པའི་རྒྱུ་རུ་གྱུར་ཡོད་པའི་གནས་ཚུལ་ཐོན་འདུག
ཕྱི་ཟླ་༩་པའི་ཚེས་༢་ཉིན་ཨ་རིའི་སི་ཨེན་བྷི་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨི་ཊ་ལིའི་སྲིད་དོན་ཚོགས་པ་ཁག་གིས་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་ཞུགས་རྒྱུ་དེར་རྒྱབ་སྐྱོར་བྱེད་ཀྱི་མེད་པར་མ་ཟད། ལོ་མཇུག་འདིར་ཨི་ཊ་ལི་དངོས་སུ་རྒྱ་ནག་གི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུའི་གླེང་སློང་བྱ་རྒྱུ་ཤུགས་ཆེ་རུ་སོང་། ཡུ་རོབ་མཉམ་འབྲེལ་གྱིས་རྒྱ་ནག་ལ་གཅིག་གྱུར་གྱི་ལངས་ཕྱོགས་ཤིག་འཛིན་གྱི་ཡོད་ཀྱང་ཨི་ཊ་ལི་རྒྱ་ནག་གི་གཅིག་རྒྱུད་ལམ་གཅིག་ཁོངས་སུ་ཞུགས་ནས་ཡུ་རོབ་མཉམ་འབྲེལ་གྱི་མཐུན་སྒྲིལ་རྡོག་རྩ་གཅིག་སྒྲིལ་ལ་གས་ཆག་ཤོར། ༢༠༢༡་ལོར་ཨི་ཊ་ལིར་སྲིད་གཞུང་གསར་པ་ཞིག་ཚུགས། སྲིད་བློན་གསར་པ་མ་རི་འོ་ཌ་ར་གྷིའི་གཞུང་གིས་རྒྱུད་གཅིག་ལམ་གཅིག་གི་ལས་གཞི་རྒྱུན་འཁྱོངས་བྱ་རྒྱུ་མཚམས་བཞག ད་ལྟ་ལོ་གཉིས་ཀྱི་རྗེས་སུ་ཨི་ཊ་ལིར་སླར་ཡང་སྲིད་གཞུང་གསར་པ་ཞིག་ཚུགས་ནས་སྲིད་བློན་མེ་ལོ་ཎིའི་གཞུང་གིས་རྒྱུད་གཅིག་ལམ་གཅིག་གི་གྲོས་མཐུན་དེར་བསྐྱར་ཞིབ་བྱ་རྒྱུའི་ཐག་བཅད།།
ཨི་ཊ་ལིའི་ཕྱི་སྲིད་བློན་ཆེན་ཏེ་ཇ་ཎིས་ངས་རྒྱ་ནག་ལ་བརྡ་ཞིག་གཏོང་གི་ཡོད་པ་ནི་ཧ་ཅང་གི་གསལ་པོ་དང་གོ་ནོར་ཐེབས་ས་མེད་པ་ཞིག་ཡིན། དེ་ནི་ང་ཚོས་རྒྱ་ནག་ལ་མཉམ་འབྲེལ་བྱ་རྒྱུ་དང་རྒྱ་ནག་གི་ཁྲོམ་རའི་ནང་དུ་ཚོང་ལས་གཉེར་རྒྱུའི་གྲ་སྒྲིག་ཡོད། ཡིན་ནའང་ངས་སྔོན་ནས་བཤད་པ་ལྟར་ཕྱོགས་གཉིས་ཀྱི་ཚོང་ལས་དེ་སྙོམས་པོ་ཞིག་ཡོང་རྒྱུ་ཤིན་ཏུ་གལ་གནད་ཆེ་ཞེས་བཀྲལ། རྒྱུད་གཅིག་ལམ་གཅིག་གི་གྲོས་མཐུན་ནང་དུ་ཕྱོགས་གཉིས་ཀས་ལོ་ལྔའི་རྗེས་སུ་གྲོས་མཐུན་དེ་མེད་པར་གཏོང་ཆོག གལ་སྲིད་ཕྱོགས་གཉིས་ཀས་དུས་ཐོག་ཏུ་གྲོས་མཐུན་དེར་གླེང་སློང་མ་བྱུང་ན་གྲོས་མཐུན་དེ་སླར་ཡང་ལོ་ལྔའི་རིང་དུས་ཡུན་ཕར་འགྱངས་བྱེད་ཀྱི་ཡོད་ཅེས་འཁོད། རྒྱ་ནག་གི་ཕྱི་སྲིད་བློན་ཆེན་ཝང་དབྱི་དང་ཨི་ཊ་ལིའི་ཕྱི་སྲིད་བློན་ཆེན་གཉིས་ཀས་གྲོས་མོལ་ཅི་ཞིག་བྱས་མིན་གྱི་ནང་དོན་ཞིབ་ཕྲ་གསལ་བསྒྲགས་མ་བྱས་ཀྱང་ཨི་ཊ་ལི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུ་གཏན་ཁེལ་བྱུང་ཟིན་པའི་རྣམ་པ་ཞིག་མངོན། ཨི་ཊ་ལི་དངོས་སུ་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱས་ན་ཞིས་ཅིན་ཕིང་ངོ་ཚ་ཁ་སྐྱེངས་ཀྱི་གནས་སུ་ལྷུང་རྒྱུ་ཉག་གཅིག་ཡིན་པའི་གནས་ཚུལ་ཐོན་འདུག
ཨི་ཊ་ལིའི་རྒྱལ་ཡོངས་གྲོས་ཚོགས་ཀྱི་འཐུས་མི་ཚོས་ཡུ་རོབ་རྒྱལ་ཁབ་གཞན་ཁག་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་མ་ཞུགས་པར་མཉམ་འབྲེལ་གང་ལེགས་བྱེད་ཐུབ་ཀྱི་འདུག ཨི་ཊ་ལི་ཡང་རྒྱ་ནག་གི་རྒྱུད་གཅིག་ལམ་གཅིག་ཁོངས་སུ་མུ་མཐུད་དུ་འདུག་དགོས་མིན་བསྐྱར་ཞིབ་བྱ་དགོས་ཞེས་སྲིད་གཞུང་ལ་གནོན་ཤུགས་སྤྲོད་ཀྱི་ཡོད་པའི་གནས་ཚུལ་ཐོན། ཕྱི་ཟླ་༩་པའི་ཚེས་༥་ཉིན་ཨ་རིའི་པོ་ལི་ཊི་ཀོ་གསར་ཁང་གིས་གནས་ཚུལ་སྤེལ་བ་ལྟར་ན། སྲིད་བློན་མེ་ལོ་ཎིའི་གཞུང་གིས་ཨི་ཊ་ལི་རྒྱ་ནག་གི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུའི་ཐག་བཅད་ཟིན་པ་རེད། གཟའ་འཁོར་འདིར་ཨི་ཊ་ལིའི་ཕྱི་སྲིད་བློན་ཆེན་པེ་ཅིང་ལ་འཚམས་འདྲིར་ཕེབས་ནས་རྒྱ་ནག་གི་ཕྱི་སྲིད་བློན་ཆེན་ལ་ཨི་ཊ་ལི་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུའི་ནང་མོལ་བྱས་འདུག ཨི་ཊ་ལིའི་གཞུང་ལ་རྒྱ་ནག་གི་ཁ་རྡུང་འཕོག་རྒྱུ་གཡོལ་ཐབས་སུ་གྲོས་ཚོགས་འཐུས་མི་ཚོར་འོས་ཤོག་འཕེན་དུ་བཅུག་ནས་རྒྱུད་གཅིག་ལམ་གཅིག་ཁོངས་ནས་ཕྱིར་འཐེན་བྱ་རྒྱུའི་ཐབས་ཇུས་ཤིག་འཛིན་གྱི་འདུག་ཅེས་གནས་ཚུལ་སྤེལ་འདུག