༄༅།། ལྷོ་ཤར་ཨེ་ཤི་ཡའི་རྒྱལ་ཁབ་ཁག་གིས་རྒྱ་ནག་གི་ཤུགས་རྐྱེན་འགོག་པར་རྒྱ་གར་ལ་བློ་ཁ་ཕྱོགས། རྒྱ་གར་གྱིས་ཀྱང་རྒྱ་ནག་ལ་ཁ་གཏད་གཅོག་པར་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་ཤུགས་རྐྱེན་ཐེབས་ཐབས་བྱེད་བཞིན་པའི་གནས་ཚུལ་ཐོན་འདུག ཕྱི་ཟླ་༨་པའི་ཚེས་༡༣་ཉིན་སི་ཨེན་བྷི་སི་གསར་འགྱུར་ལས་ཁང་གིས་ལྡི་ལི་གསར་པའི་ཕྱི་སྲིད་ལྟ་ཞིབ་ཁང་གི་གཙོ་འཛིན་གཞོན་པ་པན་ཏ་ལ་བཅར་འདྲི་ཞུས་ནས་གནས་ཚུལ་སྤེལ་བ་བ་ལྟར་ན། རྒྱ་གར་གྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་ཤུགས་རྐྱེན་ཐེབས་ཐབས་བྱ་རྒྱུ་ཤུགས་ཆེ་རུ་འགྲོ་བཞིན་པ་ཤིན་ཏུ་གསལ་པོ་རེད། རྒྱ་གར་གྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་འབྲེལ་བ་འཛིན་རྒྱུ་ཤུགས་ཇེ་ཆེ་དང་མངོན་གསལ་ཇེ་དོད་ཡིན་ཞིང་། རྒྱ་ནག་དོགས་འདྲོག་ལང་ས་ཁག་ཏུ་རྒྱ་གར་འཛུལ་ནས་ཐེ་ཇུས་བྱ་རྒྱུར་ལྡི་ལི་གསར་པས་འཛེམ་གྱི་འདུག རྒྱ་ནག་གིས་རྒྱ་གར་ལ་དཀའ་ངལ་ཆེན་པོ་སྤྲོད་ཐུབ་ཅེས་བསམ་ཤེས་བྱས་མོད། འོན་ཀྱང་ས་མཚམས་ཀྱི་རྩོད་གཞིའི་ཐོག་ཏུ་རྒྱ་ནག་གིས་སོར་གང་གློད་ཀྱི་མི་འདུག དེས་ན་རྒྱ་གར་གྱིས་ཀྱང་རྒྱ་ནག་ལ་ཁ་གཏད་བཅག་ནས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་ཤུགས་རྐྱེན་ཐེབས་ཐབས་མ་བྱས་ཐབས་མེད་དུ་གྱུར་པ་རེད་ཅེས་བསྟན།།
༢༠༢༠་ལོར་གྷལ་ཝན་ལུང་གཤོངས་སུ་རྒྱ་དཀར་ནག་གི་དམག་དཔུང་ཁག་ཅིག་ལག་འཛིང་ཐུབ་སྟེ་རྒྱ་གར་གྱི་དམག་མི་༢༠་དང་རྒྱ་དམག་༤་བསད་ནས་བཟུང་། རྒྱ་དཀར་ནག་གི་འབྲེལ་བ་སྡུག་ཏུ་ཕྱིན་པ་སླར་གསོ་བྱེད་དཀའ་བ་ཞིག་ཏུ་གྱུར། རྒྱ་གར་གྱི་ཕྱི་སྲིད་བློན་ཆེན་ཇཱེ་ཤན་ཀར་གྱིས་གྱིས་ས་མཚམས་སུ་ཞི་བདེ་བརྟན་ལྷིང་མེད་པར་པེ་ཅིང་དང་ལྡི་ལི་གསར་པའི་འབྲེལ་བ་སླར་གསོ་འབྱུང་ཐུབ་ཐབས་མེད་ཅེས་རྒྱ་ནག་གི་འབོད་སྐུལ་ལ་ལན་བཏབ། རྒྱ་དཀར་ནག་གི་འབྲེལ་བ་བཟང་པོ་མེད་པའི་རྐྱེན་གྱིས་རྒྱ་ནག་གི་ཤུགས་རྐྱེན་ཐེབས་ཡུལ་རྒྱལ་ཁབ་ཆེ་ཕྲ་ཀུན་ལ་རྒྱ་གར་གྱིས་འབྲེལ་བ་ཡར་རྒྱས་བཏང་ནས་ཤུགས་རྐྱེན་ཐེབས་ཐབས་བྱ་རྒྱུ་མཚམས་འཇོག་བྱེད་མི་སྲིད་པའི་རྣམ་པ་ཞིག་མངོན། ཉེ་བའི་ཟླ་ཤས་ནང་དུ་སྲིད་བློན་མོ་དྷིའི་གཞུང་ནས་རྒྱ་ནག་གི་བཙན་དྲག་དང་ཤུགས་རྐྱེན་འགོག་ཐབས་སུ་རྒྱ་གར་གྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་འཐབ་ཇུས་ཀྱི་ཟླ་གྲོགས་བསྒྲིགས་ནས་འབྲེལ་བ་ཡར་རྒྱས་གཏོང་རྒྱུ་ཤུགས་ཆེ་རུ་བཏང་ཡོད་པའི་གནས་ཚུལ་ཐོན་འདུག
འཇུག་ཁང་གི་ཉམས་ཞིབ་པ་ས་ཏོ་རུ་ན་གྷོས་
ཉི་ཧོང་གི་རྒྱལ་ས་ཊོག་ཀིའོ་གྲོང་ཁྱེར་དུ་གནས་འཁོད་ཧ་ཚིན་ཞིབ་འཇུག་ཁང་གི་ཉམས་ཞིབ་པ་ས་ཏོ་རུ་ན་གྷོས་བཤད་པ་ལྟར་ན། ཁ་སྔོན་ཕྱི་ཟླ་༦་པའི་ནང་རྒྱ་གར་གྱིས་ཝེ་ཏེ་ནམ་ལ་དམག་གྲུ་ཞིག་སྟེར་རྒྱུའི་ཐག་བཅད། ཝི་ཏེ་ནམ་གྱི་གནམ་དམག་གི་ཁ་ལོ་བ་དང་གནམ་ཐང་གི་དམག་མི་ཚོར་སྦྱོང་བརྡར་སྤྲད། རྒྱ་གར་གྱི་དམག་གྲུ་ཁག་རྟག་ཏུ་ཝི་ཏེ་ནམ་ལ་བསྐྱོད། ད་ལྟ་ཝེ་ཏེ་ནམ་གྱིས་རྒྱ་གར་ནས་འཕུར་མདེལ་ཉོ་འཆར་འདུག་ཅེས་བཀྲལ། རན་ཌི་བཟོ་ཚོང་ཁང་གི་ཉམས་ཞིབ་པ་ཌེ་རིག་གྷ་རོ་སི་མན་ནས་རྒྱ་གར་གྱིས་ཤར་ཕྱོགས་སུ་བལྟ་རྒྱུའི་སྲིད་ཇུས་དེ་༡༩༩༡་ལོར་འགོ་བཙུགས་ཀྱང་༢༠༡༤་བར་དུ་ལག་ལེན་མ་བསྟར། ཞིས་ཅིན་ཕིང་གིས་དབང་བསྒྱུར་འོག་ཏུ་རྒྱ་ནག་གིས་སྟོབས་ཤུགས་ངོམ་ནས་ཕྱིའི་རྒྱལ་ཁབ་ཁག་ལ་བཙན་དྲག་བཀོལ། ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་ཤུགས་རྐྱེན་ཐེབས་རྒྱུ་ཤུགས་ཆེ་རུ་སོང་། རྒྱ་ནག་ནི་སྔར་དང་མ་འདྲ་བ་ཞིག་ཏུ་གྱུར་ཡོད་པས་སྲིད་བློན་མོ་དྷིའི་གཞུང་གིས་རྒྱ་ནག་ལ་ཁ་གཏད་གཅོག་པའི་སྲིད་ཇུས་ཤིག་འཛིན་དགོས་པར་གྱུར་བ་རེད་ཅེས་བཤད།།
ཉེ་ཆར་ཕྱི་ཟླ་༦་པའི་ནང་རྒྱ་གར་དང་ཧྥི་ལི་ཕིན་གྱི་ཕྱི་སྲིད་བློན་ཆེན་གྱི་གཉིས་ཀྱིས་༢༠༡༦་ལོར་རྒྱལ་སྤྱིའི་ཉེས་དོན་ཁྲིམས་ཁང་གིས་ལྷོ་རྒྱ་ནག་རྒྱ་མཚོའི་བདག་དབང་ཐད་ཐག་གཅོད་བྱས་ཡོད་པར་རྒྱ་ནག་གིས་བརྩི་འཇོག་བྱ་དགོས་ཞེས་ཐུན་མོང་གི་གསར་འགོད་གསལ་བསྒྲགས་ཤིག་སྤེལ། རྒྱལ་སྤྱིའི་ཉེས་དོན་ཁྲིམས་ཁང་ནས་རྒྱ་ནག་གིས་རྩོད་ཀྱི་ཡོད་པའི་རྒྱ་མཚོ་དེ་རྣམས་ཧྥི་ལི་ཕིན་གྱི་མངའ་ཁོངས་སུ་གཏོགས་ཀྱི་འདུག་ཅེས་བཅད་ཁྲ་བསྒྲགས། རྒྱ་ནག་གིས་རྒྱལ་སྤྱིའི་ཉེས་དོན་ཁྲིམས་ཁང་གི་ཐག་གཅོད་དེ་ཁྲིམས་འགལ་རེད་ཅེས་དགག་པ་བརྒྱབ། ཉམས་ཞིབ་པ་མང་ཆེ་བས་རྒྱ་གར་དང་ཧྥི་ལི་ཕིན་གྱི་ཕྱི་སྲིད་བློན་ཆེན་གཉིས་ཀྱི་གསལ་བསྒྲགས་དེས་རྒྱ་གར་གཞུང་ནས་གཞན་གྱི་མངའ་ཁོངས་རྩོད་གཞིར་ཐེ་ཇུས་མི་བྱེད་པར་བཏང་སྙོམས་ཀྱི་ལངས་ཕྱོགས་ཤིག་འཛིན་སྲོལ་ཡོད་པར་འགྱུར་བ་ཐེབས་ཀྱི་ཡོད་པའི་རྟགས་སུ་བརྩིས། ལྷོ་རྒྱ་ནག་རྒྱ་མཚོའི་མངའ་ཁོངས་ཐོག་ཏུ་རྒྱ་ནག་དང་ཧྥི་ལི་ཕིན་གཅིག་པུ་མ་ཡིན་པར་རྒྱ་ནག་དང་མེ་ལེ་ཤི་ཡ། ཝི་ཏེ་ནམ་དང་བྷུ་རུ་ནེ་སོགས་རྒྱལ་ཁབ་འགའ་ཞིག་ལ་རྩོད་པ་བྱུང་འདུག
རན་ཌི་བཟོ་ཚོང་ཁང་གི་ཉམས་ཞིབ་པ་ཌེ་རིག་གྷ་རོ་སི་མན་གྱིས་མུ་མཐུད་དུ་བཤད་པ་ལྟར་ན། རྒྱ་གར་གྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་དམག་དོན་དང་ཕྱི་སྲིད། དཔལ་འབྱོར་དང་བདེ་འཇགས་སྲུང་སྐྱོབ་ཀྱི་འབྲེལ་བ་ཤུགས་ཆེ་རུ་བཏང་སྟེ་རྒྱ་ནག་གི་བཙན་གནོན་འགོག་ཐབས་སུ་འབད། ལྷག་པར་དུ་ལྷོ་རྒྱ་ནག་རྒྱ་མཚོའི་མངའ་ཁོངས་རྩོད་གཞིའི་ཐོག་ཏུ་འགལ་ཟླ་ཆེ་རུ་སོང་སྟེ་ཞི་བདེ་ལྷིང་མེད་པར་འགྱུར་གྱི་འདུག་ཅེས་བཤད། དེ་བཞིན་སེངྒ་པུར་གྱི་ཡུ་སེབ་ཨི་ཤག་ཞིབ་འཇུག་ཁང་གི་ཉམས་ཞིབ་པ་ཇཱོ་ཨན་ལིན་གྱིས་ཀྱང་རྒྱ་ནག་གིས་རྒྱུད་གཅིག་ལམ་གཅིག་བརྒྱུད་ནས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་ཤུགས་རྐྱེན་ཐེབས་ཀྱི་ཡོད་པ་རྒྱ་གར་གྱིས་བློ་འཚབ་བྱ་དགོས་ངེས་ཤིག་ཡིན། རྒྱ་གར་གྱི་མངའ་ཁོངས་སྤྱི་དང་མཚོ་ཁོངས་ལ་སྲུང་སྐྱོབ་བྱ་རྒྱུ་དེ་བས་ཀྱང་གནད་འགག་ཆེ་ཞེས་སྨྲས། ཉམས་ཞིབ་པ་ཚོས་རྒྱ་ནག་གི་རྒྱུད་གཅིག་ལམ་གཅིག་ནི་དཔལ་འབྱོར་དང་ཚོང་ལས་གཅིག་པུའི་དོན་དུ་མིན་པར་རྒྱ་ནག་གི་ཆབ་སྲིད་དང་དམག་དོན་རྒྱ་སྐྱེད་ཀྱི་དམིགས་ཡུལ་ཞིག་ཡིན་པའི་ངོས་འཛིན་བྱས་འདུག
རྒྱ་གར་གྱིས་ཕྱོགས་གཅིག་ནས་རྒྱ་ནག་ལ་ཁ་གཏད་གཅོག་ཐབས་དང་ཕྱོགས་གཞན་ཞིག་ནས་ཧིན་བོད་ས་མཚམས་སུ་འཁྲུག་རྩོད་འབྱུང་སྲིད་པ་འགོག་ཐབས་བྱེད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་༨་པའི་ཚེས་༡༤་ཉིན་རོ་ཡེ་ཊར་སི་གསར་འགྱུར་ལས་ཁུངས་ནས་གནས་ཚུལ་སྤེལ་བ་ལྟར་ན། གཟའ་ཟླ་བའི་ཞོགས་པར་ཆུ་ཚོད་༩་དང་ཕྱེད་ཀ་ནས་ལ་དྭགས་ཀྱི་ཆུ་ཤུལ་ས་གནས་སུ་རྒྱ་དཀར་ནག་གི་དམག་དཔོན་རིམ་པས་གྲོས་མོལ་ཚོགས་འདུ་ཐེངས་༡༩་པ་ཚོགས། དེ་རིང་གི་གྲོས་མོལ་དེར་རྒྱ་གར་གྱི་དམག་སྤྱི་གཞོན་པ་ར་ཤིམ་བྷ་ལི་དང་རྒྱ་ནག་གི་སྐུ་ཚབ་ཚོགས་པ་ཞིན་ཅང་དམག་ཁུལ་ཁང་གི་ལྷོ་ཕྱོགས་བཀོད་འདོམས་པས་འགོ་ཁྲིད་ཡོད་པའི་ཚོད་དཔག་བྱས་འདུག རྒྱ་གར་གྱིས་སྡེ་བཟང་ལ་དང་བདེ་མཆོག་ས་ཁུལ་ནས་རྒྱ་དམག་ཕྱིར་འཐེན་བྱ་དགོས་ཞེས་ནན་སྐུལ་བྱས་པར་མ་ཟད། རྒྱ་གར་ཕྱི་སྲིད་ལྷན་ཁང་གིས་༢༠༢༢་ལོའི་ཕྱི་ཟླ་༧་པའི་ནང་ཨིན་རྡུ་ནེ་ཤི་ཡའི་བྷ་ལི་མཚོ་གླིང་དུ་འཛམ་གླིང་གི་དཔལ་འབྱོར་སྟོབས་ཆེན་རྒྱལ་ཁབ་༢༠་པའི་ཚོགས་འདུའི་ཐོག་ཏུ་སྲིད་བློན་མོ་དྷི་དང་རྒྱ་ནག་གི་འགོ་ཁྲིད་ཞིས་ཅིན་ཕིང་གིས་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་རྒྱུ་གལ་འགངས་ཆེན་པོ་ཡིན་པའི་བཀའ་མོལ་གནང་བ་རེད་ཅེས་གནས་ཚུལ་སྤེལ་འདུག
ཕྱི་ཟླ་༨་པའི་ཚེས་༧་ཉིན་ཧོང་ཀོང་གི་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་དཀར་ནག་གཉིས་ཀས་ཧིན་བོད་ས་མཚམས་ཀྱི་ས་གནས་ཁག་ཅིག་ནས་དམག་དཔུང་ཕྱིར་འཐེན་བྱས་ནས་ཛ་དྲག་ཆུང་དུ་གཏོང་ཐབས་བྱས་ཀྱང་རྩོད་གཞི་གཞན་གྱི་ཐོག་ཏུ་འགལ་ཟླ་སེལ་མ་ཐུབ། རྒྱ་གར་གྱིས་ཨ་མི་རི་ཀ་དང་ཡུ་རོབ། ཨོ་གླིང་དང་ཉི་ཧོང་སོགས་ལ་འབྲེལ་བ་ཡར་རྒྱས་བཏང་སྟེ་རྒྱ་གར་ཨ་རི་དང་ཉི་ཧོང་། ཨོ་གླིང་བཅས་ཀྱི་ཚོགས་ཁོངས་སུ་ཞུགས་ཏེ་བཞི་འབྲེལ་རྒྱལ་ཁབ་ཀྱི་སྒྲིག་འཛུགས་ཤིག་ཚུགས་ཡོད་པར་རྒྱ་ནག་ཁོང་ཁྲོས་བརྟས། ཁ་སྔོན་ཕྱི་ཟླ་༦་པའི་ནང་སྲིད་བློན་མོ་དྷི་ཨ་མི་རི་ཀར་རྒྱལ་དོན་འཚམས་འདྲིར་ཕེབས་ནས་སྲིད་འཛིན་བྷ་ཌན་ལ་ཐུག་འཕྲད་དང་ཨ་རིའི་རྒྱལ་ཡོངས་གྲོས་ཚོགས་གོང་འོག་གཉིས་ལ་གཏམ་བཤད། སྲིད་བློན་མོ་དྷིས་རྒྱ་ནག་ཅེས་མིང་འབོད་མ་བྱས་ཀྱང་ཨེ་ཤི་ཡའི་མངའ་ཁུལ་དུ་བཙན་དྲག་གི་མུན་པ་འཐིབས་ཡོད་ཅེས་བཤད། ཨ་རི་དང་རྒྱ་གར་གཉིས་ཀྱིས་རྒྱལ་སྲུང་འབྲེལ་བ་ཡར་རྒྱས་གཏོང་རྒྱུའི་གྲོས་མཐུན་ཞིག་ལ་མིང་རྟགས་བཀོད་སོགས་ཀྱིས་རྒྱ་ནག་ལ་ཕོག་ཐུག་བྱུང་ཡོད་པའི་གནས་ཚུལ་ཐོན་འདུག
སི་ཨེན་བྷི་སི་གསར་འགྱུར་ལས་ཁུངས་ནས་མུ་མཐུད་དུ་གནས་ཚུལ་སྤེལ་བ་ལྟར་ན། རྒྱ་ནག་གི་དཔལ་འབྱོར་དང་ཚོང་ལས། དམག་དོན་སོགས་ཀྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ལ་དམིགས་བསལ་གྱིས་ཤུགས་རྐྱེན་ཞིག་ཐེབས་ཀྱི་ཡོད་པས་མངའ་ཁུལ་དེར་རྒྱ་ནག་ལ་ཁ་གཏད་གཅོག་ཐུབ་པའི་རྒྱལ་ཁབ་གཅིག་ཡོད་པ་ནི་རྒྱ་གར་རེད་ཅེས་གནས་ཚུལ་སྤེལ། ཝིལ་སིན་ལྟེ་གནས་ཁང་གི་ཉམས་ཞིབ་པ་པྲ་མེ་ས་ཝ་རན་གྱིས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་གིས་རྒྱ་གར་ལ་འབྲེལ་བ་འཛུགས་ཀྱི་འདུག དེའི་རྒྱུ་མཚན་ནི་རྒྱ་གར་ལ་སྟོབས་ཤུགས་ཡོད་པ་དང་རྒྱལ་ཁབ་དེ་དག་གིས་རྒྱ་ནག་ཁོ་ན་གཙིགས་སུ་འཛིན་མི་དགོས་པར་རྒྱ་གར་ཡང་ལྟེ་དབུས་སུ་འཛིན་ཆོག་པའི་གདམ་ཀ་ཞིག་སྤྲད་པ་རེད་ཅེས་བཤད། སེངྒ་པུར་གྱི་ཡུ་སེབ་ཨི་ཤག་ཞིབ་འཇུག་ཁང་གིས་ལྷོ་ཤར་ཨེ་ཤི་ཡའི་ཡུལ་གྲུ་ཁག་གི་མི་དམངས་ལ་བསམ་ཚུལ་དྲིས། རྒྱ་གར་གྱིས་ཨུ་རུ་སུ་དང་ཡུཀ་རེན་གྱི་དམག་འཁྲུག་ལ་བཏང་སྙོམས་ཀྱི་ལངས་ཕྱོགས་ཤིག་བཟུང་ཡང་ལྷོ་ཤར་ཨེ་ཤི་ཡའི་ཡུལ་གྲུ་ཁག་ཏུ་རྒྱ་གར་ལ་ལྟ་ཚུལ་བཟང་པོ་ཡོད་པའི་གནས་ཚུལ་ཐོན་འདུག