༄༅།། ཨུ་རུ་སུའི་དམག་གིས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱ་རྒྱུའི་ཉེན་ཁ་ནི་ཉིན་རེ་བཞིན་ཇེ་ཆེར་འགྲོ་བ་དང་། ཡུཀ་རེན་གྱི་རྒྱལ་སྲུང་ལྷན་ཁང་གིས་ཕྱོགས་གཅིག་ནས་ཨ་རི་སོགས་ནུབ་ཕྱོགས་རྒྱལ་ཁབ་ཁག་ལ་འབོད་སྐུལ་ཞུས་ནས་ཨུ་རུ་སུའི་བཙན་འཛུལ་འགོག་ཐབས། ཁོ་ཚོས་ཕྱོགས་གཞན་ཞིག་ནས་ཡུཀ་རེན་གྱི་དམག་ལ་མངོན་གསལ་མེད་པར་ཡུན་རིང་གི་འཇབ་རྒོལ་འཐབ་འཁྲུག་ཅིག་ལ་གྲ་སྒྲིག་བྱ་དགོས། ལྷག་པར་དུ་ཡུཀ་རེན་རྒྱལ་ཡོངས་སུ་མི་དམངས་དཀྱུས་མ་དང་བུད་མེད། ལོ་ཆུང་ཚོར་དམག་སྦྱོང་སྤྲད་ནས་ཡུལ་དམག་གི་དཔུང་སྡེ་བཙུགས་ཏེ་ཨུ་རུ་སུའི་བཙན་འཛུལ་ལ་འགོག་རྒོལ་བྱ་རྒྱུའི་གྲབས་བཤམས། ཕྱི་ཟླ་༢་པའི་ཚེས་༨་ཉིན་ཝ་ཤིང་ཊོན་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། ཡུཀ་རེན་གྱི་ཡེ་ཤུའི་བླ་མ་ཁག་ཅིག་རྒྱལ་ཡོངས་ཆོས་དཔོན་གྱི་དཔུང་སྡེའི་རུ་ཁག་གི་ཁོངས་སུ་ཞུགས་ཏེ་དམག་སར་ཆས་རྒྱུ་དང་དུ་བླངངས། ཆོས་དཔོན་ཁོ་ལོ་ཌོབ་ཟེར་བ་ནི་རྒྱལ་ས་ཁིབ་གྲོང་ཁྱེར་གྱི་བས་མཐའི་ཡེ་ཤུའི་ལྷ་ཁང་ཞིག་གི་བླ་མ་ཡིན་ཞིང་། ཁོང་གིས་ཆོས་དཔོན་གྱི་དབུ་ཞྭ་དང་ན་བཟའ་ཆ་ཚང་མནབས་ཏེ་མགུལ་ལ་རྒྱ་གྲམ་བཏགས། ཕྱག་ཏུ་བྱིན་ཆང་གི་དངུལ་ཕོར་དང་འཁར་གསིལ་སོགས་ཐོགས་ཏེ་འདོན་པ་དབྱངས་སུ་གྱེར་ནས་གསུངས། འོན་ཀྱང་ཆོས་དཔོན་ཁོ་ལོ་ཌོབ་ཀྱི་བླ་མའི་ན་བཟའི་འོག་ཏུ་དམག་ཆས་ཆ་ཚང་མནབས་ཏེ་དམག་སར་ཕེབས་རྒྱུའི་གྲ་སྒྲིག་ཆ་ཚང་བྱས་འདུག ཁོང་གིས་གསར་འགོད་པར་ང་ནི་དུས་ནམ་ཞིག་ཡིན་རུང་དམག་འཁྲུག་ལ་ཞུགས་རྒྱུ་དེར་ཐེ་ཚོམ་མེད་ཅེས་གཟའ་ཉི་མའི་གསུང་ཆོས་ཀྱི་གཞུག་ཏུ་ཆོས་གོས་ཕུད་ནས་དམག་ཆས་མནབས་ཡོད་པ་བསྟན། ༢༠༡༤་ལོར་ཨུ་རུ་སུའི་དམག་གིས་ཡུཀ་རེན་གྱི་ཁེ་རེ་མི་ཡ་གླིང་ཟུར་བཙན་འཕྲོག་བྱས་པ་དང་ཨུ་རུ་སུའི་གཞུང་གིས་རྒྱབ་སྐྱོར་བྱེད་བཞིན་པའི་ཡུཀ་རེན་གྱི་ཤར་ཕྱོགས་གྱེན་ལོག་པ་ཚོས་དམག་འཁྲུག་བསླངས་ནས་བཟུང་། དགུང་ལོ་༤༦་ལ་ཕེབས་པའི་ཆོས་དཔོན་ཁོ་ལོ་ཌོབ་ཀྱིས་ལྷ་ཁང་སྒོ་བརྒྱབ་སྟེ་དམག་འཁྲུག་ལ་ཞུགས་རྒྱུའི་སེམས་ཐག་བཅད་འདུག
ཡུཀ་རེན་དུ་ཡུལ་དམག་ལ་དམག་སྦྱོང་བྱེད་བཞིན་པ།
དུས་རབས་གཅིག་གི་སྔོན་དེར་ཨུ་རུ་སུའི་དམར་དམག་གིས་ཡུཀ་རེན་རྒྱལ་ཡོངས་ཀྱི་ཡེ་ཤུའི་བླ་མ་ཚོར་དྲག་གནོན་བྱས་ནས་ཐལ་བའི་རྡུལ་དུ་བརླག ད་ལྟ་ཡུཀ་རེན་ལ་རྒྱལ་ཡོངས་ཆོས་དཔོན་གྱི་དཔུང་སྡེའི་རུ་ཁག་ཅེས་པའི་ཆེད་ལས་པའི་དམག་དཔུང་གསར་པ་ཞིག་བཙུགས་ཏེ་རྒྱལ་ཁབ་སྲུང་སྐྱོབ་དོན་དུ་དམག་འཁྲུག་ལ་ཞུགས་ཀྱི་ཡོད་པར་མ་ཟད། ཆོས་དཔོན་ཁོ་ལོ་ཌོབ་ཀྱིས་གསར་འགོད་པར་སྔོན་མའི་ཨུ་རུ་སུའི་དམར་ཤོག་སྲིད་གཞུང་ནི་ལྷ་དང་དཀོན་མཆོག་ལ་ཡིད་ཆེས་ཡོད་པ་ཞིག་མ་རེད། དེར་བརྟེན་སྐབས་དེར་ཆོས་དཔོན་གྱི་དཔུང་སྡེའི་རུ་ཁག་ཟེར་བ་ཞིག་ཚུགས་མ་ཐུབ་པ་རེད། ད་ལྟ་ཡུཀ་རེན་གྱི་དམག་ཁོངས་སུ་ཆོས་དཔོན་རྣམས་ཞུགས་ཀྱི་ཡོད་པ་ནི་དང་བླངས་འབའ་ཞིག་ཡིན་པ་དང་གླ་ཕོགས་ཀྱང་དམའ་མོ་རེད་ཅེས་བཀྲལ། ཆོས་དཔོན་ཁོ་ལོ་ཌོབ་ནི་ཡུཀ་རེན་གྱི་སེར་མོ་བའི་དཔུང་སྡེའི་འགོ་ཁྲིད་གཞོན་པ་ཡིན་པ་དང་ཁ་སྔོན་ཕྱི་ཟླ་༡༢་པའི་ཚེས་༡༧་ཉིན་ཡུཀ་རེན་གྱི་གཞུང་གིས་ཆོས་དཔོན་གྱི་དཔུང་སྡེའི་རུ་ཁག་དམག་གི་སྒྲིག་ཁོངས་སུ་བསྡུས་ནས་གླ་ཕོགས་སྤྲོད་དགོས་པའི་ཁྲིམས་ཤིག་གཏན་ལ་ཕབ། ༢༠༢༢་ལོའི་ཕྱི་ཟླ་༧་ནས་ཡུཀ་རེན་གྱི་ཆོས་དཔོན་ཚོའི་དཔུང་སྡེའི་རུ་ཁག་རྒྱལ་ཁབ་དེའི་དམག་གི་གྲུབ་ཆ་ངོ་མ་ཞིག་ལ་འགྱུར་རྒྱུ་དང་ཡུཀ་རེན་གྱི་དམག་གི་ཁོངས་སུ་ཆོས་ཕྱོགས་ཀྱི་སློབ་སྟོན་པའི་ལྷན་ཚོགས་འཛུགས་འཆར་ཡོད་ཅེས་རྒྱལ་ཡོངས་རླུང་འཕྲིན་ཁང་གིས་གསལ་བསྒྲགས་སྤེལ། ཡུཀ་རེན་གྱི་བཅའ་ཁྲིམས་དེར་ཐོག་མར་ཆོས་དཔོན་༡༢༠་ཐམ་པ་དམག་ས་ཁག་ལ་གཏོང་དགོས། ཆོས་དཔོན་༥༠༠་ཐམ་པ་ཟུར་འཇོག་བྱས་ནས་དམག་སར་གཏོང་རྒྱུའི་སྟ་གོན་བྱ་དགོས་ཞེས་འཁོད། ཡུཀ་རེན་གྱི་ཆོས་དཔོན་མང་ཆེ་བ་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བ་ཡིན་རུང་རྒྱལ་ཁབ་དེར་ཡེ་ཤུ་ཆོས་ལུགས་གསར་མའི་ཆོས་དཔོན་ཡང་གང་འཚམ་ཞིག་ཡོད་པའི་གནས་ཚུལ་ཐོན་འདུག
ཡུཀ་རེན་རྒྱལ་ཡོངས་སུ་ཡེ་ཤུའི་ཆོས་སྡེ་སྟོང་ཕྲག་མང་པོ་ཡོད་ཀྱང་ཆོས་སྡེ་ཁག་ཅིག་གི་ཆོས་དཔོན་རྣམས་དམག་ཁོངས་སུ་ཞུགས་རྒྱུ་དེར་དགའ་བསུ་མ་ཐོབ། ཡུཀ་རེན་གྱི་མི་རིགས་རིང་ལུགས་པ་ཚོས་ཝ་ཤིང་ཊོན་ཡིག་ཟམ་ཚགས་པར་གྱི་གསར་འགོད་པར་བཤད་པ་ལྟར་ན། ཡེ་ཤུའི་ཆོས་དཔོན་དེ་རྣམས་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བ་ཡིན་པ་དང་གློ་སྙིང་བྲང་གསུམ་གཏོད་ས་ཨུ་རུ་སུ་རེད། ཁོ་ཚོས་གསུང་ཆོས་གནང་བའི་སྐབས་སུ་རྒྱལ་ཚོང་བ་དང་ཨུ་རུ་སུའི་སྡིག་སྤྱོད་བྱས་ཉེས། ཡུཀ་རེན་གྱི་ཤར་ཕྱོགས་སུ་གྱེན་ལོག་པས་ཟིང་འཁྲུག་སློང་གི་ཡོད་པ་དང་ཨུ་རུ་སུའི་གཞུང་གིས་ཡུཀ་རེན་ཧམ་ཟ་བྱ་རྒྱུའི་ཀུན་སློང་འཆང་ཡོད་པ་བཅས་ལ་བཟོད་ཡངས་བྱེད་ཀྱི་འདུག་ཅེས་སྐྱོན་བཙུགས། ཨུ་རུ་སུ་དང་ཡུཀ་རེན་གྱི་འཐབ་རྩོད་ནི་མི་རིགས་དང་སྐད་ཡིག ཆོས་སྡེའི་ལངས་ཕྱོགས་འཛིན་སྟངས་བཅས་ནས་ཀྱང་དགྲ་གཉེན་གྱི་དབྱེ་བ་འབྱེད་ཕྱེ། ༢༠༡༤་ལོར་ཨུ་རུ་སུའི་དམག་གིས་ཡུཀ་རེན་ལ་བཙན་འཛུལ་བྱས་པའི་རྗེས་སུ་རྒྱལ་ཁབ་དེའི་ཡེ་ཤུའི་ཆོས་སྡེ་དུམ་བུ་གཉིས་སུ་ཆད། ༢༠༡༩་ལོ་ནས་ཡུཀ་རེན་གྱི་ཡེ་ཤུའི་ཆོས་སྡེའི་མང་དག་ཅིག་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་གྲུབ་མཐའི་འོག་ཏུ་འདུ་མི་དགོས་པར་ཡུཀ་རེན་གྱི་ཡེ་ཤུའི་ཆོས་རྒྱུད་ཅེས་གྲུབ་མཐའ་གསར་དུ་ཚུགས་ནས་རང་སྐྱོང་ཐོབ། ཡུཀ་རེན་གྱི་ཡེ་ཤུའི་ཆོས་སྡེ་ཁག་དང་ཨུ་རུ་སུའི་གཞུང་གིས་ཤུགས་རྐྱེན་ཐེབས་ཀྱི་ཡོད་པའི་ཡུཀ་རེན་གྱི་ཡེ་ཤུའི་སྡེ་ཁག་གི་འགལ་ཟླ་ཇེ་ཆེར་སོང་སྟེ་འདུམ་དཀའ་བའི་གནས་སུ་ལྷུང་། ༢༠༡༥་ནས་ཨུ་རུ་སུའི་ཕྱོགས་གཏོགས་ཡེ་ཤུའི་ཆོས་སྡེ་ཁག་གི་ཆོས་དཔོན་ཚོས་ཨུ་རུ་སུའི་གཞུང་གིས་རྒྱབ་སྐྱོར་བྱེད་ཀྱི་ཡོད་པའི་གྱེན་ལོག་པ་ཚོར་འཐབ་རྒོལ་བྱས་ནས་ཤི་བའི་ཡུཀ་རེན་གྱི་དམག་མི་འདས་པོ་ཚོར་སྨོན་ལམ་གསུང་གི་མིན་ཞེས་བསྒྲགས། དེར་བརྟེན་བྷེ་ལ་རུ་སུའི་ས་མཚམས་སུ་ཆགས་པའི་གྲོང་གསེབ་ཅིག་གི་མང་ཚོགས་ཀྱིས་ཆོས་དཔོན་མཐར་སྐྲོད་བཏང་སྟེ་ཡུཀ་རེན་ནས་ཆོས་དཔོན་གསར་པ་ཞིག་གདན་དྲངས་པའི་གནས་ཚུལ་ཐོན།།
ཨུ་རུ་སུའི་ཡེ་ཤུ་ཆོས་རྒྱུད་ཀྱི་རྗེས་འབྲང་བ་ཚོས་ང་ཚོས་ཡུཀ་རེན་གྱི་གཞུང་དམག་དང་གྱེན་ལོག་པའི་འཐབ་འཁྲུག་འགོག་ཐབས་ཁོ་ན་བྱེད་ཀྱི་ཡོད། ང་ཚོར་རྒྱལ་ཚོང་བ་དང་ཁ་ཕྱི་བལྟས་དང་གྲོད་པ་ནང་བལྟས་ཞེས་ནག་ཉེས་འཛུགས་ཀྱི་ཡོད་པ་དྲང་པོ་མ་རེད་ཅེས་ཝ་ཤིང་ཊོན་ཡིག་ཟམ་ཚགས་པར་གྱི་གསར་འགོད་པར་སྡུག་སྐད་བརྒྱབ། ཆོས་དཔོན་ཁོ་ལོ་ཌོབ་ཀྱིས་ང་ལ་སྔོན་ཆད་ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བའི་གྲས་སུ་ཆོས་གྲོགས་འགའ་ཞིག་ཡོད། ཁོ་ཚོ་ཨུ་རུ་སུའི་ཡེ་ཤུའི་ཆོས་རྒྱུད་ནས་ཡུཀ་རེན་གྱི་ཡེ་ཤུའི་ཆོས་རྒྱུད་ལ་མ་བསྒྱུར་ཚེ། ཨུ་རུ་སུའི་ཡེ་ཤུ་ཆོས་རྒྱུད་ཀྱི་ཆོས་དཔོན་དེ་དག་ཡུཀ་རེན་དང་ཨུ་རུ་སུ་གཉིས་ཀྱི་གང་ལ་གཞུང་དྲང་བློ་དཀར་ཡིན་མིན་ལངས་ཕྱོགས་གསལ་པོར་བསྟན་པ་རེད། ཨུ་རུ་སུའི་ཡེ་ཤུའི་ཆོས་རྒྱུད་ཀྱི་རྗེས་འབྲང་བ་རྣམས་ཨུ་རུ་སུའི་གསང་བའི་ལས་ཁུངས་ཀྱི་གསང་ཉུལ་རེད་ཅེས་བསྡིགས། ཁོང་གིས་གསར་འགོད་པ་གསུམ་ལ་ཡུཀ་རེན་གྱི་མང་ཚོགས་རྣམས་ཨུ་རུ་སུའི་ཕྱོགས་གཏོགས་ཡེ་ཤུའི་ཆོས་དཔོན་ཚོར་དགའ་མོས་མེད་པ་ཤེས་དགོས་ན་ངའི་མཉམ་དུ་གྲོང་གསེབ་ཁག་གི་དུར་ཁྲོད་དུ་ཤོག དེ་ནས་གསར་འགོད་པ་ཚོས་ཡུཀ་རེན་གྱི་མི་མང་གིས་ཨུ་རུ་སུའི་ཕྱོགས་གཏོགས་ཡེ་ཤུའི་ཆོས་དཔོན་ཚོར་སྡང་ཟུག་བྱེད་དོན་ཅི་ཡིན་ཤེས་ཀྱི་རེད་ཅེས་བཀྲལ། ཆོས་དཔོན་ཁོ་ལོ་ཌོབ་ཀྱིས་གསུང་ཆོས་གཞུག་ཏུ་ལྷ་ཁང་སྒོ་བརྒྱབ་སྟེ་ལྷ་ཁང་གི་མཐའ་འདབས་སུ་གསར་འགོད་པ་ཁྲིད་ནས་དྲན་རྟེན་ཞིག་གི་སྟེང་དུ་དྭངས་ལྕགས་ཀྱི་རྒྱ་གྲམ་ཞིག་བཙུགས་ཡོད་པ་བསྟན། ཁོང་གིས་འདས་པོ་དེ་དག་གིས་ཡུཀ་རེན་གྱི་རང་དབང་དོན་དུ་ལུས་སྲོག་ཕར་བསྔོས་བྱས་པ་རེད་ཅེས་བསྔགས་བརྗོད་དང་གུས་ཞབས་ཀྱི་རྣམ་འགྱུར་ཐོན། ཁོང་གིས་དུར་ས་ཁག་གི་མདུན་དུ་སྨོན་ལམ་གསུངས་ཏེ་འདས་པོ་དེ་ཚོར་སྐྱབས་འཇུག་ཞུས། ཆོས་དཔོན་ཁོ་ལོ་ཌོབ་ཀྱིས་ང་ཚོར་མེ་མདའ་དང་འབར་མདེལ། ཆོས་ལུགས་ཀྱི་སྟོབས་ཤུགས་བཅས་མཚོན་ཆ་རིགས་མ་འདྲ་བ་གཉིས་ཡོད་ཅེས་གསར་འགོད་པར་གླེང་མོལ་བྱས་འདུག
ཨ་རིའི་ཧྥོཀ་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་སྲིད་འཛིན་དང་རྒྱལ་སྲུང་བློན་ཆེན་སོགས་ཀྱིས་མི་དམངས་ལ་དངངས་སྐྲག་སྐྱེ་མི་དགོས་ཞེས་བློ་བསམ་བདེ་རུ་འགོད་ཐབས་སུ་འབད། ཡུཀ་རེན་གྱི་རྒྱལ་སྲུང་བློན་ཆེན་གྱིས་གསར་འགོད་པ་ཚོར་ཡུཀ་རེན་གྱི་དམག་དང་མི་དམངས་ཀྱིས་བཙན་འཛུལ་ལ་འགོག་རྒོལ་དང་རང་སྲུང་བྱེད་ཐུབ་པའི་ཡིད་ཆེས་བརྒྱ་ཆ་བརྒྱ་ཐམ་པ་ཡོད། ང་ལ་སེམས་ཁྲལ་གཏན་ནས་མེད་པ་དང་འཕྲལ་དུ་བཙན་འཛུལ་འབྱུང་རྒྱུ་རེད་ཟེར་གྱི་ཡོད་པ་ནི་ལོང་གཏམ་རེད། མི་དམངས་རྣམས་དངངས་འཚབ་ལང་མི་དགོས་ཞེས་བཤད། འོན་ཀྱང་ཝ་ལན་ཊི་ན་ཞེས་པའི་བུད་མེད་ཅིག་གིས་ང་ནི་རང་གི་བཟའ་མི་རྣམས་དང་བུ་ཕྲུག་གི་བདེ་འཇགས་ལ་སྐྲག་གི་འདུག ངས་རང་གི་ཤེས་ཡོན་རྣམས་བུ་ཕྲུག་ལ་སློབ་ཐུབ་པ་དང་ང་ཚོ་འཚོ་གནས་བྱེད་འདོད་ཡོད། ང་ནི་ཡུ་རོབ་ཀྱི་དམངས་གཙོའི་རྒྱལ་ཁབ་ཅིག་ཏུ་འཚོ་གནས་བྱེད་འདོད་ཡོད་ཅེས་གསར་འགོད་པའི་དྲི་བར་ལན་བཏབ། ཡུཀ་རེན་གྱི་ཕོ་མོ་རྒན་གཞོན་གཉིས་ཀས་མེ་མདའ་ངོ་མ་དང་ཤིང་གི་མེ་མདའ་སོགས་བཟུང་ནས་དམག་སྦྱོང་བྱེད་པ་དང་རྨས་མ་ཚོར་སྨན་བཅོས་ཇི་ལྟར་བྱེད་དགོས་མིན། རང་ཁྱིམ་དུ་འབར་མདེལ་ཇི་ལྟར་བཟོ་དགོས་མིན་དང་ལོ་ཆུང་ཚོ་ཞོགས་པ་སྔ་པོར་ལངས་ནས་དགུན་གྱི་གྲང་ངར་ཁྲོད་དུ་དམག་སྦྱོང་། ཡུ་རི་ཞེས་པའི་ལོ་ཆུང་ཞིག་གིས་ང་ཚོ་རང་གི་རྒྱལ་ཁབ་ཀྱི་དོན་དུ་འཆི་བ་སྲོག་ལ་ཐུག་ཀྱང་མཐར་སྐྱེལ་བྱ་རྒྱུའི་གྲ་སྒྲིག་ཡོད་ཅེས་བཤད། ཡུཀ་རེན་གྱི་དམག་ཞབས་ཟུར་པ་ཞིག་ལ་གསར་འགོད་པས་མི་མང་དཀྱུས་མ་ཚོས་ཨུ་རུ་སུའི་དམག་ལ་འཐབ་རྒོལ་ཅི་ཙམ་བྱེད་ཐུབ་རྒྱུ་རེད་ཅེས་དྲིས། ཁོང་གིས་ཁྱེད་ཚོས་བལྟས་ན་ང་ཚོའི་གྲོང་གསེབ་འདིར་མི་གྲངས་༥༠༠་ཡོད་པ་རེད། ངས་བལྟས་ན་མི་གྲངས་ས་ཡ་༥་རེད། ང་ཚོ་ས་གནས་འདིར་འཚོ་གནས་བྱས་ནས་ལོ་སྟོང་ཕྲག་ཕྱིན་པ་དང་ང་ཚོས་ཨུ་རུ་སུ་ལ་འཐབ་རྒོལ་བྱེད་ཐུབ་ཀྱི་རེད། འཐབ་རྒོལ་བྱེད་ངེས་ཀྱང་ཡིན་ཞེས་གསར་འགོད་པར་གླེང་མོལ་བྱས་འདུག