༄༅།། ཕུ་ཊིན་གྱིས་ཡུཀ་རེན་ལ་བཙན་འཛུལ་བྱེད་དུ་བཅུག་སྟེ་དམག་འཁྲུག་བསླངས་ནས་ཟླ་བ་༣་ལྷག་འགྲོ་བཞིན་པའི་སྐབས་འདིར་ཨུ་རུ་སུའི་འཐབ་མོ་བ་ཚོར་ཡུཀ་རེན་གྱི་དམག་ས་ཁག་ཏུ་བསད་རྨས་ཚབས་ཆེན་ཕོག ད་དུང་ཨུ་རུ་སུའི་དམག་ལ་འཚོ་བ་དང་སྨན་བཅོས་ཀྱི་མཐུན་རྐྱེན་འདང་ངེས་མེད་པར་དཀའ་ངལ་ཆེན་པོ་འཕྲད་ཀྱི་ཡོད་པའི་གནས་ཚུལ་ཐོན། ཉེ་དུས་ཤིག་ནས་ཨུ་རུ་སུའི་མི་མང་སྒེར་པ་ཚོས་ཞལ་འདེབས་བསྡུས་ཏེ་དམག་ལ་ཁ་ལོ་བ་མེད་པའི་འཕུར་གྲུ་དང་འཁར་དབྱུག ཞོ་ཁོག་དང་སྨན་སོགས་རོགས་སྐྱོར་སྤྲོད་ཀྱི་ཡོད་པའི་གནས་ཚུལ་ཐོན་འདུག ནེའུ་ཡུཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཨུ་རུ་སུའི་རྒྱལ་ས་མོ་སི་ཀོའི་ཤར་ཕྱོགས་ས་ཁུལ་ཞིག་གི་གྲོང་མི་སྟེ། ན་ཊ་ལི་ཡ་ཨ་བྷི་ཡེ་ཝ་ཞེས་པ་ནི་ས་ཁང་ཉོ་ཚོང་དང་ཁང་པ་གླ་གཏོང་གི་ཆེད་ལས་པ་ཞིག་ཡིན་མོད། ཡུཀ་རེན་གྱི་དམག་འཁྲུག་ལངས་པའི་རྗེས་སུ་ཨ་བྷི་ཡེ་ཝས་དམག་སར་རྨས་སྐྱོན་ཕོག་པའི་དམག་མི་ཚོར་ཁྲག་རྒྱུན་གཅོད་ཐབས་ཀྱི་ཡོ་ཆས་རྣམས་མཁོ་སྒྲུབ་བྱ་རྒྱུ་མགོ་བརྩམས། ཁོ་མོས་ཁྲག་གཅོད་ཟེགས་རྡུལ་དང་དབུགས་བརྡོལ་ཁབ་འབིག་ཉོ་སྒྲུབ། ཨ་བྷི་ཡེ་ཝ་དམག་གི་སྨན་ཁང་ཞིག་ཏུ་ཨུ་རུ་སུའི་དམག་དཔུང་བཀོད་འདོམས་པ་རྨས་མ་ཞིག་ལ་ཐུག་སྟེ་བཀོད་འདོམས་པ་དེས་ངའི་འཐབ་གྲོགས་ཤིག་ལ་དབུགས་གཏོང་འགྱིག་བུག་མེད་པར་ཤི་སོང་ཞེས་བཤད། བདུན་ཕྲག་སྔོན་མའི་གཟའ་ལྷག་པའི་ཉིན་ལོ་ན་༣༧་ལ་སོན་པའི་ཨ་བྷི་ཡེ་ཝ་དང་རོགས་པ་གཞན་གཉིས་ཀྱིས་ཨ་སྒོར་༦༠༠༠༠་ལྷག་ཞལ་འདེབས་བསྡུས་ནས་ཨུ་རུ་སུའི་དམག་ལ་ཙོང་དང་ཞོ་ཁོག ཕན་ཚུན་བརྡ་གཏོང་རླུང་འཕྲིན་ཁ་པར་དང་རྒྱ་ཤེལ། རྨ་རས་དང་རྨ་སྨན། ཟུག་གཅོག་སྨན་དང་སྨན་ཁབ་སོགས་ཆ་འགྲིག་ཡོད་པའི་སྨན་ཁུག་སྟབས་བདེ། བཟའ་ཆས་དང་གྱོན་གོས། འཁར་དབྱུག་སོགས་ཉོས་ནས་རླངས་འཁོར་ནང་དུ་བརྩིགས་ཏེ་ཡུཀ་རེན་གྱི་ས་མཚམས་བར་དུ་བསྐྱལ། འདི་ནི་ཨ་བྷི་ཡེ་ཝ་དང་རོགས་པ་ཚོས་ཨུ་རུ་སུའི་དམག་ལ་མཁོ་ཆས་སྐྱེལ་འདྲེན་བྱས་པ་ཐེངས་བདུན་པ་ཡིན་འདུག ཁོ་མོས་འཛམ་གླིང་ཡོངས་ཀྱིས་ང་ཚོའི་སྡང་དགྲ་དེར་རྒྱབ་སྐྱོར་བྱེད་ཀྱི་ཡོད་པས་ང་ཚོས་ཀྱང་རང་གི་དམག་ལ་རྒྱབ་སྐྱོར་བྱེད་ཀྱི་ཡོད། ང་ཚོ་ཨུ་རུ་སུའི་དམག་གི་རྒྱབ་རྩར་ལངས་ཡོད་ཅེས་ནེའུ་ཡོཀ་དུས་བབ་ཚགས་པར་གྱི་གསར་འགོད་པར་གླེང་མོལ་བྱས་འདུག
ཁ་སྔོན་ཕྱི་ཚེས་༢༨་ཉིན་ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། དེང་སྐབས་ཨུ་རུ་སུ་རྒྱལ་ཡོངས་སུ་བུད་མེད་ཀྱི་ཞལ་འདེབས་འདུ་འགོད་པའི་ཚོགས་པ་ཚུགས་ནས་དམག་ལ་རྒྱབ་སྐྱོར་གྱི་ལས་འགུལ་ལངས། ཨུ་རུ་སུའི་མང་ཚོགས་ཀྱི་གྲས་སུ་ཕུ་ཊིན་གྱི་དམག་འཁྲུག་དེར་རྒྱབ་སྐྱོར་དང་ཨུ་རུ་སུར་ཕམ་ཉེས་འབྱུང་གི་ཡོད་པ་ཤེས་རྟོགས་ཐུབ་མཁན་ཇེ་མང་དུ་སོང་། ལྷག་པར་དུ་ཕྱི་ཟླ་༢་པའི་ཚེས་༢༤་ཉིན་གྱི་བཙན་འཛུལ་སྔོན་དེར་ཨུ་རུ་སུའི་དམག་དཔུང་ནི་འཛམ་གླིང་གི་དམག་དཔུང་རྩེ་ཕུད་གྲས་སུ་ཚུད་ཡོད་སྙམ་པའི་སྤོབས་པ་སྐྱེད་མཁན་ཚོར་ཡུཀ་རེན་ལ་བཙན་འཛུལ་བྱས་པའི་རྗེས་སུ་ཨུ་རུ་སུའི་དམག་དཔུང་ནི་འཐབ་འཁྲུག་ལ་གྲ་སྒྲིག་མེད་པའི་ཐབས་རྡུགས་ཤིག་ཡིན་པ་ར་འཕྲོད། ཨུ་རུ་སུའི་གཞུང་གིས་ཨ་སྒོར་ཐེར་འབུམ་༦༦་རྒྱལ་སྲུང་འགྲོ་གྲོན་བཏང་རུང་འཐབ་འཁྲུག་ལ་མཁོ་བའི་ཡོ་ཆས་རྣམས་བསྒྲུབས་ཐུབ་མེད་པས་མང་ཚོགས་ཀྱི་ཞལ་འདེབས་བསྡུས་ནས་དམག་འཁྲུག་ལ་རྒྱལ་ཁ་འཐོབ་དཀའ། ཡིན་ནའང་ཨུ་རུ་སུའི་མི་མང་སྒེར་པ་ཁག་ཅིག་གིས་ཞལ་འདེབས་བསྡུས་ནས་ཕྱི་རྒྱལ་གྱི་མཚན་མོའི་རྒྱང་ཤེལ་དང་ཁ་ལོ་བ་མེད་པའི་འཕུར་གྲུ། ཨུ་རུ་སུའི་དམག་མི་ཚོར་བཟའ་བཏུང་སོས་པ་རྣམས་ཉོ་སྒྲུབ་བྱེད་ཀྱི་ཡོད་པའི་གནས་ཚུལ་ཐོན། ཨུ་རུ་སུའི་ཝོལ་གྷ་ཆུ་བོའི་འགྲམ་གྱི་ཚོང་པ་པཱ་ལོ་ཊི་ནི་ཀོ་ཝ་ཞེས་པའི་བུད་མེད་ཅིག་གིས་ང་ཚོ་སུ་གཅིག་གིས་ཀྱང་དམག་འཁྲུག་རྒྱག་རྒྱུ་ཡིན་པ་སྔོན་དཔག་ཐུབ་མེད། སུ་གཅིག་ཀྱང་དམག་འཁྲུག་འདིར་གྲ་སྒྲིག་བྱས་ཡོད་པ་མ་རེད་ཅེས་བཤད། ལོ་ན་༤༧་ལ་སོན་པའི་པཱ་ལོ་ཊི་ནི་ཀོ་ཝས་དམག་གི་མཁོ་ཆས་ཊོན་༣་ལྷག་འདུ་འགོད་བྱས་ནས་དབྱིན་ལེ་༡༠༠༠་ལྷག་གི་ཕ་རོལ་ཏུ་ཡོད་པའི་ཡུཀ་རེན་གྱི་ས་མཚམས་བར་དུ་སྐྱེལ་འདྲེན་ཐེངས་གཉིས་བྱས་འདུག ཁོ་མོས་བདུན་ཕྲག་སྔོན་མའི་གཟའ་ལྷག་པའི་ཉིན་རྨ་རས་དང་སྦྲིད་སྨན། གཉན་འཇོམས་སྨན། འཁར་དབྱུག་དང་འཁོར་ལོའི་རྐུབ་བཀྱག་རྣམས་དགོས་མཁོ་ཆེན་པོ་འདུག་ཅེས་དྲྭ་ལམ་དུ་ཛ་དྲག་གི་ཐོ་གཞུང་ཞིག་བཀྲམ།།
ནུབ་ཕྱོགས་རྒྱལ་ཁབ་ཁག་གིས་ཡུ་རེན་ལ་མཚོན་ཆ་རོགས་རམ་སྤྲད་ནས་གཏོར་རྒོལ་གྱི་ནུས་པ་ཆེ་རུ་སོང་སྟེ་གླེགས་མི་ཁེལ་བ་ཞིག་ཏུ་གྱུར། ཡུཀ་རེན་གྱི་ཤར་ཕྱོགས་གྱེན་ལོག་པ་དང་ཨུ་རུ་སུའི་གྲོས་ཚོགས་འཐུས་མི་ཨ་ལིཀ་ཛན་ཌར་བྷོ་རོ་དྷ་ཡེ་ཞེས་པ་ཞིག་གིས་མདེལ་ལྕགས་ཐོར་ནས་མི་ལ་རྨས་སྐྱོན་དང་མེར་འཚིག་ནས་རྨས་སྐྱོན་ཕོག་པ་ཚོར་སྨན་བཅོས་ཀྱི་ཡོ་ཆས་རྣམས་དགོས་མཁོ་ཆེན་པོ་འདུག ཡུཀ་རེན་གྱི་དམག་གིས་མེ་སྒྱོགས་བརྒྱབ་ནས་ཨུ་རུ་སུའི་དམག་ལ་རྨས་སྐྱོན་ཕོག་པ་བརྒྱ་ཆ་༩༠་ལྷག་མདེལ་ལྕགས་ཐོར་བ་དང་མེར་འཚིག་ནས་རྨས་སྐྱོན་འཕོག་གི་འདུག ཨ་རིའི་མེ་སྒྱོགས་ཀྱི་སྙོབ་ཚད་དང་ཡུཀ་རེན་གྱི་དམག་གི་སྙིང་སྟོབས་བཅས་ལ་ཨུ་རུ་སུའི་འགོ་ཁྲིད་ཚོས་སྣང་ཆུང་གཏོང་མི་ཉན་ཞེས་འབོད་སྐུལ་ཞུས། ཁོ་པས་ང་ཚོའི་དམིགས་ཡུལ་ལྟར་དམིགས་བསལ་དམག་དོན་མགྱོགས་མྱུར་གྱིས་སྒྲུབ་ཐུབ་ཀྱི་མེད་པར་སྙོན་ཐབས་བྲལ། ཡུཀ་རེན་ལ་ནུབ་ཕྱོགས་རྒྱལ་ཁབ་ཁག་གིས་རྒྱབ་སྐྱོར་ཤུགས་ཆེན་པོ་དེ་འདྲ་ཞིག་བྱ་རྒྱུ་ཡིན་པ་ང་ཚོའི་འགོ་ཁྲིད་ཚོས་སྔོན་དཔག་མ་ཐུབ་པ་འདྲ་ཞེས་གཏམ་བཤད་བྱས་ཤིང་། ཨུ་རུ་སུའི་དམག་ལ་ཞལ་འདེབས་བསྡུས་ནས་མཁོ་ཆས་རོགས་རམ་སྤྲོད་མཁན་རྣམས་སྲིད་གཞུང་ལ་འབྲེལ་བ་མེད་པར་སྣང་། ཁོ་ཚོས་དང་བླངས་དང་སྒེར་པ་བརྒྱུད་ནས་དམག་གི་སྨན་ཁང་ཁག་ལ་འབྲེལ་བ་བྱས་ཏེ་མཁོ་ཆས་རྣམས་སྐྱེལ་འདྲེན་བྱེད་ཀྱི་ཡོད་པའི་གནས་ཚུལ་ཐོན། ཨུ་རུ་སུའི་གཞུང་གིས་མི་མང་སྒེར་པ་ཚོས་དམག་འཁྲུག་ལ་རྒྱབ་སྐྱོར་དང་མཁོ་ཆས་འདུ་འགོད་བྱེད་ཀྱི་ཡོད་པ་གསར་འགྱུར་ནང་དུ་གཏན་ནས་མི་སྒྲོགས། དེའི་རྒྱུ་མཚན་ནི་ཨུ་རུ་སུའི་དམག་ལ་ཇུས་ཉེས་འབྱུང་གི་ཡོད་པ་ངོས་ལེན་བྱེད་འདོད་མེད་པས་ཡིན་སྲིད། ཕྱི་ཟླ་༤་པའི་ནང་དུ་ཨུ་རུ་སུའི་བརྙན་འཕྲིན་ལས་ཁང་ཞིག་གིས་ང་ཚོའི་དམག་མི་ཚོར་མཁོ་ཆས་རྣམས་ཡོངས་སུ་འཛོམས་ཡོད། ཨ་མ་ཚོས་སེམས་པས་མ་བཟོད་པར་དམག་ལ་མཁོ་ཆས་རོགས་རམ་འདུ་འགོད་བྱེད་ཀྱི་ཡོད་པ་རེད་ཅེས་གླེང་ཙམ་བྱས་འདུག
ཁ་སང་ཕྱི་ཟླ་༥་པའི་ཚེས་༣༠་ཉིན་ནེའུ་ཡོཀ་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཡུཀ་རེན་གྱི་ཁར་ཀིབ་གྲོང་ཁྱེར་གྱི་དམག་ས་ཁག་ཏུ་ཨུ་རུ་སུའི་དམག་མི་བསད་པའི་ཕུང་པོ་༦༢་རས་ཁུག་དཀར་པོའི་ནང་དུ་གཅུད། མེ་འཁོར་ཁང་མིག་ཅིག་འཁྱག་སྒམ་དུ་བསྒྱུར་ནས་ཕུང་པོ་རྣམས་དེའི་ནང་དུ་བརྩིགས། འཁྱག་ཁང་གི་གྲང་ཚད་ཀླད་གོར་འོག་གི་ཨང་གྲངས་༢༠་ཐམ་པར་བཞག་ཀྱང་ཕུང་པོ་རུལ་བའི་དྲི་ངན་ཕྱོགས་ཀུན་ཏུ་ཐུལ། སུ་མེར་ཞེས་པའི་ཡུཀ་རེན་གྱི་དམག་མི་དང་བླངས་པ་ཞིག་གིས་ང་ཚོས་རང་གི་གཙང་སྦྲ་འཕྲོད་བསྟེན་ཆེད་དུ་ཨུ་རུ་སུའི་དམག་མི་ཤི་བའི་རོ་ལ་བདག་པོ་རྒྱག་གི་ཡོད། ཅིའི་ཕྱིར་ཞེས་ན་མི་རོ་རྣམས་ཁྱི་ལྟོགས་ཀྱིས་ཟ་བཞིན་ཡོད་པ་དང་མཐའ་མཇུག་ཕུང་པོ་འདི་རྣམས་རོ་བདག་ཚོར་འཕྲོད་དུ་འཇུག་འཆར་ཡོད། ང་ཚོ་ས་གནས་འདིར་མ་བསླེབས་སྔོན་གྱི་ཟླ་བ་རེ་ཟུང་ནས་ཕུང་པོ་རྣམས་གང་སར་གཡུགས་འདུག ང་ཚོའི་རུ་ཁག་གི་ལས་མི་གཉིས་ཀྱིས་ཕུང་པོ་དེ་དག་གི་ངོ་གདོང་དང་ལུས་སྟེང་གི་ཁབ་གཙགས་རི་མོ། གློ་ཁུག་ནང་གི་ལག་འཁྱེར་ཡིག་ཆ་དང་སྐེ་འདོགས་ཨང་གྲངས། དེ་བཞིན་འདས་པོ་དེ་དག་གི་རྒྱུད་རྫས་བླགས་ནས་གཤིན་པོ་དེ་རྣམས་སུ་སུ་ཡིན་པ་ངོ་ཐག་གཅོད་ཀྱི་ཡོད། བཙན་འཛུལ་བའི་རོ་ལ་བདག་པོ་རྒྱག་དགོས་པ་ནི་སྤྲོ་བ་འཕེལ་བའི་ལས་དོན་ཞིག་གཏན་ནས་མ་རེད། ཕུང་པོ་ཁག་ཅིག་རུལ་དྲགས་ཏེ་ངོ་ཟིན་གྱི་མི་འདུག ཉེ་ཆར་ཡུཀ་རེན་གྱི་དམག་གིས་ཕར་རྒོལ་བྱས་ནས་ཨུ་རུ་སུའི་དམག་ལ་སྲོག་སྐྱོན་ཕོག་པའི་ཕུང་པོ་ཁག་ཅིག་གསར་པ་རེད། ཨུ་རུ་སུའི་དམག་དཔུང་ཕྱིར་འཐེན་བྱས་ནས་བྲོས་བྱོལ་དུ་ཕྱིན་པའི་སྐབས་དེར་འཐབ་གྲོགས་འདས་པོ་ཚོའི་ཕུང་པོ་རྣམས་མཉམ་དུ་མ་ཁྱེར་བར་ཤུལ་དུ་བསྐྱུར་འདུག་ཅེས་བཀྲལ། ཡུཀ་རེན་གྱི་གཞུང་འབྲེལ་མི་སྣ་ཚོས་ཨུ་རུ་སུར་དམག་མི་གཤིན་པོ་རྣམས་ཀྱི་ཕུང་པོ་རྩིས་སྤྲོད་རྩིས་ལེན་བྱ་དགོས་ཞེས་གྲོས་མགོ་བཏོན་རུང་དེ་ལ་ཡ་ལན་སྤྲོད་ཀྱི་མི་འདུག་ཅེས་འཁང་ར་བཤད།།
ཕྱི་ཚེས་༣༠་ཉིན་ཡུཀ་རེན་གྱི་དམག་དཔུང་སྤྱི་ཁྱབ་བཀོད་འདོམས་ཁང་གིས་གནས་ཚུལ་སྤེལ་བ་ལྟར་ན། ༢༠༡༤་ལོར་ཨུ་རུ་སུས་བཙན་འཕྲོག་བྱས་པའི་ཁེ་རི་མི་ཡ་གླིང་ཟུར་གྱི་སྨན་ཁང་ཁག་ཏུ་དམག་མི་རྨས་མ་འབའ་ཞིག་ལ་སྨན་བཅོས་བྱ་རྒྱུ་གཙིགས་སུ་འཛིན་དགོས། མི་མང་དཀྱུས་མའི་ནད་པ་རྣམས་སྨན་ཁང་ཁག་ནས་སྤོར་དུ་བཅུག་སྟེ་སྨན་ཁང་གི་ཉལ་ཁྲི་རྣམས་དམག་མི་རྨས་མ་ཚོར་སྤྲོད་དགོས་པའི་བཀའ་ཕབ་འདུག བྷེ་ལོ་རུ་སུའི་དམག་གིས་ཀྱང་དཔུང་འཇུག་བྱ་རྒྱུའི་གྲ་སྒྲིག་བྱེད་ཀྱི་ཡོད་པར་མ་ཟད། ཨུ་རུ་སུའི་དམག་གིས་བྱང་ཕྱོགས་ནས་ཡུཀ་རེན་གྱི་སུ་མི་ས་གནས་སུ་མེ་སྒྱོགས་རྒྱག་གི་འདུག་ཅེས་གནས་ཚུལ་སྤེལ། དབྱིན་ཇིའི་གྷར་ཌི་ཡན་ཚགས་པར་གྱི་གསར་འགོད་པས་ཡུཀ་རེན་གྱི་རྒྱལ་སྲུང་ལྷན་ཁང་གི་ལས་སྣེ་ཚོ་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན། ཨུ་རུ་སུའི་གཞུང་གིས་དམག་སར་བཀོད་འདོམས་ལ་ཉན་གྱི་མེད་པའི་དམག་མི་ཚོའི་བཟའ་ཟླ་བུ་ཕྲུག་རྣམས་གཏའ་མར་ཉར་ནས་རྒྱང་ཤར་ཕྱོགས་སུ་རྒྱང་ཕུད་གཏོང་རྒྱུའི་སྡིགས་ར་བསྐུལ། ཨུ་རུ་སུའི་ནུབ་ཕྱོགས་དམག་སྡེའི་ཁོངས་ཀྱི་དམག་མི་ཚོའི་བཟའ་མི་རྣམས་རང་ཡུལ་དུ་བཀག་སྟེ་ཕྱི་རྒྱལ་ལ་བསྐྱོད་དུ་འཇུག་གི་མེད་ཅིང་། ཕྱི་ཟླ་༥་པའི་ཚེས་༢༥་ཉིན་ཨུ་རུ་སུའི་ཡུལ་སྲུང་དམག་མི་༡༡༥་ཡུཀ་རེན་གྱི་དམག་ས་ཁག་ཏུ་བསྐྱོད་རྒྱུ་མིན་ཞེས་བཀའ་གྱེན་ལྡོག་བྱས་པར་དམག་ཁོངས་ནས་ཕྱིར་ཕུད་བྱས་འདུག ཨུ་རུ་སུའི་ལྷོ་ཕྱོགས་སྤྱི་མཐུན་ས་གནས་ཁ་བྷར་ཌི་ནོ་བྷལ་ཁ་རི་ཡའི་དམག་གི་ཁྲིམས་ཁང་གིས་ཡུལ་སྲུང་དམག་མི་ཕྱིར་ཕུད་བྱས་པ་འགྲིག་འདུག་ཅེས་བཅད་ཁྲ་བསྒྲགས་པ་རྣམས་མོ་སི་ཀོ་དུས་བབ་ཚགས་པར་ལ་གནས་ཚུལ་ཐོན་འདུག་ཅེས་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ། ཨུ་རུ་སུའི་གྲོས་ཚོགས་ཀྱི་དམར་ཤོག་ཚོགས་པའི་འཐུས་མི་ཝ་སི་ཡུ་ཁེ་ཝི་ཆི་ཞེས་པ་ཞིག་གིས་ཕུ་ཊིན་ལ་དམག་འཁྲུག་མཚམས་འཇོག་བྱ་དགོས་པའི་འབོད་སྐུལ་ཞུས། ཁོང་གིས་ང་ཚོས་དམག་འཁྲུག་འདི་མཚམས་འཇོག་མ་བྱས་ན་རྒྱལ་ནང་དུ་དྭ་ཕྲུག་སྔར་ལས་ཇེ་མང་དུ་འགྲོ་ཤས་ཆེ། ང་ཚོའི་རྒྱལ་ཁབ་འདིར་ལེགས་སྐྱེས་ཆེན་པོ་འབུལ་ཐུབ་པའི་ན་གཞོན་མང་དག་ཅིག་དམག་ས་ཁག་ཏུ་ཤི་བ་རེད། ང་ཚོས་འཕྲལ་དུ་ཨུ་རུ་སུ་མནའ་འབྲེལ་རྒྱལ་ཁབ་ཀྱི་དམག་དཔུང་ཕྱིར་འཐེན་བྱ་དགོས་ཞེས་དགོས་འདུན་བཏོན། ཝ་སི་ཡ་ཁེ་ཝི་ཆིར་རྒྱལ་ཚོང་བ་ཞེས་ནག་ཉེས་བཙུགས་ཏེ་གྲོས་ཚོགས་ཁང་ནས་ཕྱི་ལ་བསྐྲད། ཨུ་རུ་སུའི་དམར་ཤོག་ཚོགས་པས་འཐུས་མི་དེར་ཉེས་ཆད་དྲག་པོ་གཅོད་རྒྱུ་ཡིན་ཞེས་ཉེན་བརྡ་བཏང་ཡོད་པའི་གནས་ཚུལ་ཐོན་འདུག