བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ་ཚོགས་ཆུང་ཞིག་ཉེ་ལམ་བཞུགས་སྒར་དུ་ཆེད་ཕེབས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་དང་སྦྲགས། བོད་མི་མང་སྤྱི་འཐུས་ལྷན་ཚོགས་དང་། དེ་མིན་གཞུང་འབྲེལ་མ་ཡིན་པའི་ཚོགས་ཁག་ཅིག་ཏུ་འཚམས་གཟིགས་སུ་ཕེབས་ཡོད་པ་རེད།
ད་རེས་ཀྱི་སྐུ་ཚབ་རྣམ་པའི་མཇལ་ཁའི་སྐབས་༧གོང་ས་༧སྐྱབས་མགོན་ཆེན་པོ་མཆོག་ནས་བཀའ་སློབ་གང་དང་གང་གནང་ཡོད་པའི་སྐོར་ལ་བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པའི་དྲུང་ཆེ་བཀྲ་ཤིས་ཚེ་རིང་ལགས་ཀྱིས་བརྗོད་དོན། ༧གོང་ས་༧སྐྱབས་མགོན་ཆེན་པོ་མཆོག་ནས་སྐུ་ཚབ་ཚོགས་ཆུང་ལ་བོད་ཙམ་མ་ཡིན་པར་རྒྱ་ནག་ནང་གི་འགྲོ་བ་མིའི་ཐོབ་ཐང་ལའང་རྒྱབ་སྐྱོར་གནང་དགོས་པ་དང་། མ་ཟད་རྒྱ་ནག་གི་བཙན་དབང་འོག་ཡོད་པའི་ས་ཁུལ་ཤར་ཏུར་ཀི་སི་ཐན་དང་། ཧོང་ཀོང་སོགས་ས་ཁུལ་གཞན་ཁག་ལའང་དོ་སྣང་གནང་དགོས་པ་སོགས་ཀྱི་བཀའ་སློབ་སྩལ་གནང་ཡོད་པ་གསུངས་གནང་སོང་།
དེ་དང་འབྲེལ་ད་རེས་ཀྱི་འཚམས་གཟིགས་འདིའང་བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པའི་ངོས་ནས་ལོ་ལྟར་བཞུགས་སྒར་ཁུལ་དུ་འཚམས་གཟིགས་སུ་ཕེབས་ཀྱི་ཡོད་པ་དང་། གཙོ་བོ་༧གོང་ས་ཆེན་པོའི་ཞལ་མཇལ་བཀའ་སློབ་ཞུ་རྒྱུ། དེ་བཞིན་ཉེ་ལམ་འགྲོ་བ་མིའི་ཐོབ་ཐང་ཚོགས་པ་འདིའི་དེ་སྔའི་ཚོགས་གཙོ་སྐུ་ཚེ་མ་ཟིན་པའི་གནས་སྟངས་བྱུང་སྟེ་ཚོགས་གཙོ་གསར་འདེམས་བྱུང་ཡོད་སྟབས། ཚོགས་གཙོ་གསར་པའི་ངོས་ནས་བོད་མིའི་སྒྲིག་འཛུགས་ལ་རྒྱུས་ལོན་དང་། དེ་བཞིན་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ལ་འཚམས་གཟིགས་སོགས་གནང་རྒྱུར་དམིགས་ཡོད་པ་གསུངས་གནང་སོང་ལ། ད་རེས་བོད་མི་མང་སྤྱི་འཐུས་ལྷན་ཁང་དུ་སྤྱི་འཐུས་ཚོགས་གཙོ་བགྲེས་གཞོན་གཙོས་པའི་རྒྱུན་ལས་རྣམ་པ་མཇལ་འཕྲད་གནང་བའི་སྐབས་སྐུ་ཚབ་ཚོགས་ཆུང་གིས་ངོས་ནས་བཙན་བྱོལ་བོད་མིའི་སྒྲིག་འཛུགས་ཀྱིས་གཏན་ལ་ཕབ་པའི་སྲིད་བྱུས་དབུ་མའི་ལམ་སྲིད་བྱུས་གཞིར་གཞག་ཐེ་ཝན་ནང་ལས་འགུལ་ཇི་སྤེལ་ལ་རྒྱབ་སྐྱོར་གནང་རྒྱུ་ཡིན་པ་གསུངས་ཡོད་པ་ཡང་བརྗོད་གནང་བྱུང་།
གཞི་རྩའི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལོ་ ༡༩༩༧ ལོར་ཐོག་མར་ཐེ་ཝན་དུ་ཆིབས་བསྒྱུར་བསྐྱངས་གནང་མཛད་ཡོད་པ་དང་། དེའི་ལོ་ཕྱི་མ་ནས་ཐེ་ཝན་སྐུ་ཚབ་དོན་གཅོད་ཁང་གསར་འཛུགས་ཐུབ་ཡོད་ཅིང་། དེ་རྗེས་བོད་རིགས་ཚོགས་པ་གསར་འཛུགས། རིམ་པས་ས་གནས་གཞོན་ནུ། བོད་ཀྱི་གྲོགས་པོ་ཚོགས་པ། ཕྱི་ལོ་ ༢༠༡༦ ལོར་བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པ། མ་ཟད་གཙོ་ཆེ་ཤོས་ཐེ་ཝན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། ས་གནས་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཅས་རིམ་པ་བཞིན་དུ་གསར་འཛུགས་གནང་ཐུབ་ཏེ། བོད་དོན་དྲིལ་བསྒྲགས་ཐོག་ལའང་གང་འཚམ་གྱིས་ལས་དོན་སྒྲུབ་ཐུབ་ཡོད་པ་བཀྲ་ཤིས་དོན་གྲུབ་ལགས་ཀྱིས་འགྲེལ་བརྗོད་གནང་བྱུང་།
Your browser doesn’t support HTML5
བོད་དང་ཐེ་ཝན་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ་ཚོགས་ཆུང་ཞིག་བཞུགས་སྒར་དུ་ཕེབས་པ།