༄༅།། རྒྱ་ནག་གི་ས་ཁང་ཚོང་ལས་ཉམས་རྒུད་དང་ས་གནས་སྲིད་གཞུང་ཁག་གི་བུ་ལོན་ཆེ་རུ་ཕྱིན་ཏེ་བཟོ་ཚོང་ལས་ཁང་ཁག་ལ་ཚོང་ལས་ཀྱི་ཁེ་སང་མེད་པར་འགྱུར་གྱི་མེད་པའི་གནས་ཚུལ་ཐོན་འདུག ཕྱི་ཟླ་༨་པའི་ཚེས་༢༢་ཉིན་ཨེ་ཤི་ཡའི་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གཞུང་ནས་ས་གནས་སྲིད་གཞུང་ཁག་གིས་འགྲོ་གྲོན་གཅོག་ན་དམིགས་བསལ་གྱི་དངུལ་འཛིན་བུན་ཡིག་བཙོང་ཆོག་པའི་འཁྲོལ་ཆ་སྤྲད། ཐོག་མར་ཨ་རིའི་གྷོལ་མན་སེ་ཆི་དངུལ་ཁང་གིས་རྒྱ་ནག་ཏུ་མ་རྩ་བཙུགས་ནས་ཚོང་ལས་གཉེར་གྱི་ཡོད་པའི་མ་རྩའི་རྐང་གྲངས་རེར་ཁེ་སང་བརྒྱ་ཆ་༡༤་རག་རྒྱུའི་སྔོན་དཔག་བྱས་ཀྱང་གཟའ་འཁོར་འདིར་ཁེ་སང་བརྒྱ་༡༡་ལས་རག་རྒྱུ་མིན་པའི་ཚོད་དཔག་གསར་པ་ཞིག་བྱས་འདུག ཁ་སང་གཟའ་ཟླ་བའི་ཉིན་གྷོལ་མན་སེ་ཆི་དངུལ་ཁང་ནས་རྒྱ་ནག་གི་ས་ཁང་ཚོང་ལས་ཉམས་པ་དང་རྒྱལ་ཁབ་དེའི་དཔལ་འབྱོར་ལ་ཕྱོགས་ཡོངས་ནས་དཀའ་ངལ་ཞིག་འཕྲད་ཀྱི་ཡོད་པས་ང་ཚོས་ཁེ་སང་གི་ཚད་གཞི་དམའ་རུང་བཏང་བ་ཡིན་ཞེས་རྒྱུ་མཚན་བགྲངས།།
ཟླ་བ་འདིའི་ཚེས་༡༨་ཉིན་རྒྱ་ནག་གི་མི་དམངས་དངུལ་ཁང་གིས་རྒྱལ་ཡོངས་ཀྱི་ནོར་སྲིད་ཚན་པ་ཁག་གི་འགོ་ཁྲིད་ཚོ་དྲྭ་ལམ་དུ་ཚོགས་འདུར་བསྐོངས། མི་དམངས་དངུལ་ཁང་གི་འགོ་ཁྲིད་ཚོས་རྒྱ་ནག་གི་ས་ཁང་ཚོང་ལས་ཉམས་རྒུད་འགྲོ་བཞིན་པ་ནོར་སྲིད་ཚན་པ་ཁག་གིས་སྐྱོབ་ཐབས་དང་ས་གནས་སྲིད་གཞུང་ཁག་གི་བུ་ལོན་ཆུང་དུ་གཏོང་ཐུབ་པའི་རོགས་སྐྱོར་བྱ་དགོས། རྒྱ་ནག་གི་དཔལ་འབྱོར་སླར་གསོ་ནི་རྦ་རླབས་ལྟར་ཡར་འཕྱོ་མར་འབབ་བྱེད་ཀྱི་འདུག ནོར་སྲིད་ཚན་པ་ཁག་གིས་རྒྱལ་ཁབ་ཀྱི་དཔལ་འབྱོར་རྨང་གཞི་བརྟན་པོར་འཛིན་དགོས་ཞེས་ནན་གྱིས་བསྐུལ། དེང་སྐབས་རྒྱ་ནག་རྒྱལ་ཡོངས་སུ་ཁང་པ་ཉོ་མཁན་མེད་པར་ལོ་འདིའི་མགོ་སྟོད་ཟླ་བ་༦་གི་རིང་ས་ཁང་ཚོང་ལས་ཁག་ལ་ཁེ་སང་མེད་པར་གྱུར། རྒྱ་ནག་གི་ས་ཁང་ཚོང་ལས་ཉམས་ན་རྒྱལ་ཁབ་ཀྱི་དཔལ་འབྱོར་ལའང་གནོད་སྐྱོན་ཕོག་སྟེ་མི་དམངས་ཀྱིས་དངུལ་སྒོར་འགྲོ་གྲོན་མ་བཏང་བར་རྒྱལ་ནང་གི་ཚོང་ལས་འགགས། རྒྱ་ནག་གི་ས་ཁང་ཚོང་ལས་ཆེ་ཁག་༨༠་ཐམ་པར་འདས་པའི་ཟླ་བ་༦་གི་རིང་གྱོང་གུད་བརྒྱ་ཆ་༦༠་ལྷག་ཕོག་ཡོད་པའི་གནས་ཚུལ་ཐོན་འདུག
༢༠༢༣་ལོའི་མགོ་སྟོད་ཟླ་བ་༦་གི་རིང་ཡུའི་ཀྲུག་ཚོང་ཚོགས་ལ་རྒྱ་སྒོར་དུང་ཕྱུར་༦༠་ནས་དུང་ཕྱུར་༧༠་ཡས་མས་ཤིག་དང་རྒྱ་ནག་སུ་ནག་མ་རྩ་འཛིན་ཉར་ཚོང་ཚོགས་ལ་རྒྱ་སྒོར་དུང་ཕྱུར་༡༥༠་ནས་དུང་ཕྱུར་༡༦༠་ཡས་མས་ཤིག་གི་གྱོང་ཕོག རྒྱ་ནག་གི་ཧེང་ཏ་ས་ཁང་ཚོང་ལས་ཁང་མ་རྩ་བརྡིབས། པི་གུའི་ཡོན་ས་ཁང་ཚོང་ལས་ཁང་ལ་རྒྱ་སྒོར་དུང་ཕྱུར་༤༥༠་ནས་དུང་ཕྱུར་༥༥༠་ཡས་མས་ཤིག་གི་གྱོང་གུད་ཕོག ཁ་སྔོན་གཟའ་ཉི་མའི་ཉིན་པི་གུའི་ཡོན་ས་ཁང་ཚོང་ལས་ཁང་གི་སྤྱི་ཁྱབ་འགན་འཛིན་ཞིག་གིས་དབྱི་ཚེ་དྲྭ་ལམ་གསར་ཁང་ལ་ང་ཚོར་ལོ་མཇུག་བར་དུ་ཁང་པ་འབུམ་༤་རྒྱག་ཐུབ་པའི་མ་རྩ་ཡོད། ༢༠༢༤་ལོར་ཡང་ཁང་པ་འབུམ་༤་རྒྱག་ཐུབ་པའི་མ་རྩ་ཡོད། རྒྱལ་ནང་གི་བུན་བདག་ཚོར་གནས་སྐབས་རིང་ཟླ་རིའི་བུ་ལོན་སྤྲོད་རྒྱུའི་དངུལ་སྒོར་མེད་ཅེས་བཀྲལ། རྒྱ་ནག་གི་དཔལ་འབྱོར་ཉམས་ཞིབ་པ་པེ་ཝེན་ཞིས་ས་ཁང་ཚོང་ལས་འགའ་ཞིག་གིས་ལོ་འདིར་ཚོང་ལས་གཉེར་ཐུབ་ཀྱི་མི་འདུག མི་མང་གིས་ཁང་པ་ཉོ་ཡི་མེད་པ་དེ་འགལ་རྐྱེན་གཙོ་བོ་རེད་ཅེས་བསྟན།།
རྒྱ་ནག་གི་ཚོང་ལས་ཉམས་ཞིབ་ཁང་གི་འགན་འཛིན་ལིའུ་ཧྲུའི་ཡིས་ས་ཁང་ཚོང་ལས་ཁག་ལ་ཁེ་སང་ཡོད་མེད་ནི་ཚོང་ལས་དེ་མཚམས་མ་ཆད་པར་ཡུན་རིང་གཉེར་ཐུབ་རྒྱུ་ཡིན་མིན་ལ་རག་ལས་པ་རེད། མིག་སྔར་རྒྱ་ནག་གི་སྤྱི་ཚོགས་སུ་ཁང་པ་ཉོ་མཁན་མེད་པ་དང་མི་དམངས་ལ་དཔལ་འབྱོར་ཡོང་འབབ་ཉུང་དུ་འགྲོ་སྲིད་པའི་འཇིགས་སྣང་འདུག རྒྱ་ནག་གི་ས་ཁང་རིན་གོང་ཆག་པ་དང་ན་གཞོན་ཚོར་ལས་ཀ་མ་རག་པའི་དཀའ་ངལ་ཆེ། ༢༠༢༣་གྱི་སྨད་ཆ་འདིར་ས་ཁང་ཚོང་ལས་ཡར་རྒྱས་འགྲོ་ཐུབ་རྒྱུ་ཡིན་མིན་ནི་གཞུང་གི་རྒྱབ་སྐྱོར་གྱི་སྲིད་ཇུས་ལ་ཐུག་ཡོད་པ་རེད་ཟེར། རྒྱ་ནག་གཞུང་གིས་ཐེན་ཅིན་དང་ཁྲུང་ཆིང་། ཡུན་ནན་དང་ཧྲན་ཤི་བཅས་ས་གནས་ཁག་༡༢་ལ་ལོ་སྨད་འདིར་རྒྱ་སྒོར་ཁྲག་ཁྲིག་ཆེན་མོ་༡.༥་ཡི་དངུལ་འཛིན་བུན་ཡིག་བཙོང་ཆོག་པའི་ཆོག་མཆན་བཀོད། རྒྱ་ནག་གི་ས་གནས་སྲིད་གཞུང་ཁག་ལ་ཡོངས་གྲགས་སུ་བུ་ལོན་རྒྱ་སྒོར་ཁྲག་ཁྲིག་ཆེན་མོ་༣༥་རེ་ཡོད་ཟེར་གྱི་ཡོད་མོད། འོན་ཀྱང་ཚེ་ཞིན་གསར་ཁང་ནས་རྒྱ་ནག་གི་ས་གནས་སྲིད་གཞུང་ཁག ལ་དོན་དམ་དུ་བུ་ལོན་རྒྱ་སྒོར་ཁྲག་ཁྲིག་ཆེན་མོ་༤༠་ནས་༥༠་རེ་འདུག་ཅེས་ཐེར་འདོན་བྱས་འདུག
ཕྱི་ཟླ་༨་པའི་ཚེས་༢༡་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། བདུན་ཕྲག་སྔོན་མར་རྒྱ་སྒོར་གྱི་འཛའ་ཐང་ལོ་༡༦་གི་རིང་ལ་ཆག་མྱོང་མེད་པ་ཞིག་མར་ཆག རྒྱ་ནག་གི་དཔལ་འབྱོར་ཉམས་ནས་འཛམ་གླིང་གི་ཚོང་ལས་ལ་ཤུགས་རྐྱེན་ངན་པ་ཞིག་ཐེབས། དཔེར་ན་འཛམ་གླིང་གི་ཚོང་པ་དང་མ་རྩ་འཛུགས་མཁན་ཚོས་རྒྱ་ནག་ལ་མ་རྩ་བཙུགས་ནས་ཚོང་ལས་གཉེར་ན་གྱོང་གུད་འཕོག་རྒྱུའི་བློ་འཚབ་བྱེད་འགོ་ཚུགས། རྒྱ་ནག་གི་དཔལ་འབྱོར་ཉམས་རྒུད་འགྲོ་དགོས་པའི་འགག་རྩ་དེ་རྒྱ་གཞུང་གི་སྲིད་ཇུས་ལ་ཐུག་འདུག ཞིས་ཅིན་ཕིང་གིས་ལོ་གསུམ་ལ་སྒོ་རྒྱ་བསྡམས་ནས་ནད་འགོག་གི་སྲིད་ཇུས་ལག་ལེན་བསྟར། ནད་འགོག་སྲིད་ཇུས་དེ་ཕྱིར་བསྡུ་བྱས་པའི་རྗེས་སུ་ཡུད་ཙམ་རིང་དཔལ་འབྱོར་འཕེལ་རྒྱས་ཕྱིན་ཀྱང་དེ་ནས་ཉམས་རྒུད་དང་ཕྱིར་ཚོང་ཉམས་ཆག རྒྱ་ནག་གི་ས་ཁང་ཚོང་ལས་ཆེ་ཁག་གིས་བུན་བདག་ཚོར་ཟླ་བ་རེའི་བུ་ལོན་སྤྲོད་འཇལ་ཐུབ་ཀྱི་མེད་པར་མ་ཟད། རྒྱ་ནག་གཞུང་ལའང་དཔལ་འབྱོར་སླར་གསོའི་སྲིད་ཇུས་གསལ་པོ་ཞིག་མེད། རྒྱལ་སྤྱིའི་མ་རྩ་འཛུགས་མཁན་དངུལ་ཁང་ཆེ་ཁག་གིས་རྒྱ་ནག་གི་དཔལ་འབྱོར་འཕེལ་རྒྱས་བརྒྱ་ཆ་༥་འགྲོ་ཐུབ་རྒྱུ་མིན་པའི་ཚོད་དཔག་བྱས་འདུག
ནོ་མུ་ར་ཞིབ་འཇུག་ཁང་དང་མོར་གྷན་སི་ཊན་ལེ་དངུལ་ཁང་། བྷར་ཁ་ལེ་དངུལ་ཁང་སོགས་འཛམ་གླིང་དངུལ་ཁང་ཆེ་ཁག་ཚང་མས་རྒྱ་ནག་གི་དཔལ་འབྱོར་དམིགས་ཚད་ལྟར་འཕེལ་རྒྱས་འགྲོ་ཐུབ་རྒྱུ་ཁག་པོ་རེད་ཅེས་ཚོད་དཔག་དམའ་རུ་བཏང་འདུག རྒྱ་ནག་གིས་ལོ་འདིར་དཔལ་འབྱོར་བརྒྱ་ཆ་༥.༥་འཕེལ་རྒྱས་གཏོང་ཐུབ་རྒྱུའི་དམིགས་ཚད་བཟུང་། ཏོག་དབྱིབས་ནད་ཡམས་དུས་སུ་རྒྱ་ནག་གི་ས་གནས་སྲིད་གཞུང་ཁག་གིས་ཨ་སྒོར་དུང་ཕྱུར་མང་པོ་འགྲོ་གྲོན་བཏང་ནས་ལོ་གསུམ་ལ་འགྲིམ་འགྲུལ་དང་ཚོང་ལས་བཀག མི་གྲངས་དུང་ཕྱུར་མང་པོར་ཉིན་ལྟར་བརྟག་དཔྱད་བྱས། སྲང་ལམ་ཀུན་ལ་ལྕགས་རི་བསླངས་ནས་ལམ་བཀག་སྟེ་འགྲོ་གྲོན་ཕངས་མེད་གཏོང་དགོས་བྱུང་ཞིང་། རྒྱ་ནག་གི་ས་གནས་སྲིད་གཞུང་ཁག་གི་ཡོང་འབབ་ནི་ས་ཆ་བཙོངས་པའི་ས་རིན་དང་ཁང་གླའི་དཔྱ་ཁྲལ་སོགས་ཡིན་རུང་ས་ཁང་ཚོང་ལས་ཉམས་ཏེ་ཡོང་འབབ་ཆད། ས་གནས་ཁག་ལ་བུ་ལོན་ཅི་ཙམ་འཁོར་ཡང་རིམ་པ་ཁག་གི་འགོ་ཁྲིད་ཚོ་ལྐོག་ཟ་རུལ་སུངས་སུ་གྱུར་ཏེ་རྒྱས་བཟའ་རྒྱས་འཐུང་བྱ་རྒྱུ་མཚམས་འཇོག་གི་མེད་པའི་གནས་ཚུལ་ཐོན་འདུག
སི་ཨེན་ཨེན་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། རྒྱ་ནག་གི་དཔལ་འབྱོར་ཉམས་རྒུད་ཀྱི་འབྱུང་རྩ་གཞན་ཞིག་ནི་ན་གཞོན་ངལ་རྩོལ་བའི་གྲངས་འབོར་ཉུང་དུ་འགྲོ་བཞིན་པར་ཐུག་ཡོད་ཅིང་། རྒྱ་ནག་གི་བུད་མེད་ཚོར་ཕྲུ་གུ་སྐྱེ་རྒྱུ་ཉུང་དུ་ཕྱིན་འདུག ད་ལྟ་རྒྱ་ནག་གི་བུད་མེད་ཚོར་ཕྲུ་གུ་སྐྱེ་ཡི་ཡོད་པའི་གྲངས་འབོར་ནི་ཉི་ཧོང་ལས་ཉུང་དུ་སོང་། རྒྱ་ནག་གཞུང་གིས་སྔ་ལོ་མི་འབོར་ཉུང་དུ་ཕྱིན་པ་ནི་ལོ་༦༠་ཐམ་པའི་རིང་བྱུང་མྱོང་མེད་པ་ཞིག་རེད་ཅེས་གཞི་གྲངས་བཏོན། རྒྱ་ནག་ལ་རྒན་རྒོན་མི་གྲངས་མང་བའི་རྐྱེན་གྱིས་ཡུན་རིང་གི་དཔལ་འབྱོར་འཕེལ་རྒྱས་ལ་དཀའ་ངལ་འཕྲད་རྒྱུའི་སྔ་ལྟས་མངོན། རྒྱ་ནག་ལ་ངལ་རྩོལ་བ་ཇེ་ཉུང་དང་རྒན་རྒོན་སྨན་བཅོས་ཀྱི་འགྲོ་གྲོན་གཏོང་དགོས་ས་དང་རྒས་ཕོགས་སྤྲོད་དགོས་ས་མང་དུ་འགྲོ་བཞིན་ནི་སྤྱི་ཚོགས་ལ་རྡོག་ཁྲེས་ཆེན་པོ་ཞིག་ཏུ་གྱུར། ངལ་རྩོལ་བ་ཅི་ཙམ་ཉུང་དུ་ཕྱིན་ན་ཁྱིམ་ཚང་ཁག་གིས་གསོག་དངུལ་རྣམས་འཚོ་བའི་དོན་དུ་འགྲོ་གྲོན་བཏང་སྟེ་ཚོང་ལས་ལ་མ་རྩ་འཛུགས་མ་ཐུབ། མ་འོངས་པར་རྒྱ་ནག་གི་སྤྱི་ཚོགས་སུ་ཁང་པ་ཉོ་མཁན་དེ་བས་ཀྱང་ཉུང་དུ་འགྲོ་ས་རེད་ཅེས་གནས་ཚུལ་སྤེལ་འདུག
ཕྱི་ཟླ་༨་པའི་ཚེས་༢༢་ཉིན་རེ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་དཔལ་འབྱོར་སྦོ་ལུག་རྒྱུའི་ཕྱོགས་སུ་སྐྱོད་ཀྱི་ཡོད་པ་དང་པེ་ཅིང་གི་དབང་འཛིན་པ་ཚོས་དཔལ་འབྱོར་སྐྱོབ་ཐབས་སུ་འབད་ཀྱི་འདུག ཏོག་དབྱིབས་ནད་ཡམས་རྗེས་སུ་རྒྱ་ནག་མི་དམངས་ཀྱིས་དངུལ་སྒོར་འགྲོ་གྲོན་གཏོང་རྒྱུ་མཚམས་ཆད་ནས་དངོས་ཟོག་གི་རིན་གོང་ཆག ཞིས་ཅིན་ཕིང་གི་ཕྱོགས་གཏོགས་པ་པན་ཀོང་ཧྲེན་གྱིས་འགོ་ཁྲིད་པའི་མི་དམངས་དངུལ་ཁང་གིས་སྐྱེད་ཀ་བཅག་སྟེ་མི་དམངས་ལ་དངུལ་སྒོར་འགྲོ་གྲོན་གཏོང་དུ་འཇུག་ཐབས་བྱེད་ཀྱི་ཡོད་པར་གྲུབ་འབྲས་མ་ཐོན། དཔལ་འབྱོར་རིག་པ་བ་ཚོས་རྒྱ་ནག་གཞུང་གིས་མ་མཐའ་ཡང་སྐྱེད་ཀ་བརྒྱ་ཆ་༠.༡༥་གཅོག་རྒྱུའི་ཚོད་དཔག་བྱས་ཀྱང་ལོ་གཅིག་གི་བུ་ལོན་གྱི་སྐྱེད་ཀ་བརྒྱ་ཆ་༣.༥༥་ཡིན་པ་དེ་བརྒྱ་ཆ་༣.༤༥་དང་། ལོ་ལྔའི་བུ་ལོན་གྱི་སྐྱེད་ཀ་དེ་བརྒྱ་ཆ་༤.༢་ཡིན་པ་སོར་འཇོག་བྱས་ཡོད་པས་རྒྱ་གཞུང་གི་དཔལ་འབྱོར་སླར་གསོའི་སྲིད་ཇུས་ལ་ནུས་པ་ཐོན་ཐུབ་རྒྱུའི་རྟགས་མཚན་མེད་པའི་གནས་ཚུལ་སྤེལ་འདུག