༄༅།། བོད་ཀྱི་རྒྱལ་ས་ལྷ་ས་དང་གཞིས་ཀ་རྩེ་གཉིས་སུ་མི་༢༡་ལ་ཏོག་དབྱིབས་ནད་དུག་འགོས་པའི་རྗེས་སུ་གཟའ་མིག་དམར་ནས་མང་ཚོགས་ལ་ནད་དུག་འགོས་ཡོད་མེད་བརྟག་དཔྱད་བྱ་རྒྱུ་འགོ་ཚུགས། ཀན་ལྷོ་བོད་རིགས་རང་སྐྱོང་ཁུལ་གི་བསང་ཆུ་རྫོང་ངམ། བླ་བྲང་ཕྱོགས་སུ་ཏོག་དབྱིབས་ནད་དུག་སྔོན་འགོག་ཆེད་དུ་མི་དམངས་རྣམས་རང་ཁྱིམ་དུ་བཀག་ནས་ཟླ་བ་གཅིག་ལྷག་འགྲོ་བཞིན་ཡོད་ཅིང་། ད་དུང་ཡང་དུས་ནམ་ཞིག་འགྲོ་འོང་བཀག་སྡོམ་ཕྱིར་འཐེན་བྱ་རྒྱུ་ཡིན་པ་ངེས་གཏན་མི་འདུག་ཅེས་ས་གནས་ཀྱི་ཡུལ་མི་ཞིག་གིས་གནས་ཚུལ་མཁོ་སྤྲོད་བྱས་བྱུང་། ཉིན་ཤས་སྔོན་དེར་རེབ་གོང་མི་དམངས་དང་ཐུན་རེན་རྫོང་གིས་བླ་བྲང་མི་དམངས་ལ་གདུང་སེམས་མཉམ་སྐྱེད་ཡོད་ཅེས་རླངས་འཁོར་ཐོག་ཏུ་འཕྲེད་དར་བཙུགས་ནས་དངུལ་སྒོར་དང་བག་ལེབ་ཆེན་པོ་རྣམས་སྐྱེལ་འདྲེན་བྱེད་ཀྱི་ཡོད་པའི་འདྲ་པར་ཁག་ཅིག་སྐད་འཕྲིན་ནང་དུ་བཀྲམ་སྟེ་ཕྱི་ལོགས་སུ་ཁྱབ། ཕྱི་ཟླ་༨་པའི་ཚེས་༩་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་བོད་ཀྱི་ཕོ་བྲང་པོ་ཏ་ལ་ཚུད་པའི་དགོན་སྡེ་དང་ལྷ་ཁང་སོགས་སྒོ་བརྒྱབ་སྟེ་ཡུལ་སྐོར་སྤྲོ་འཆམ་པ་བཀག ལྷ་ས་དང་གཞིས་ཀ་རྩེ་སོགས་སུ་མི་ཚོགས་འདུ་འཛོམས་དང་དུས་རྒྱུན་གྱི་བྱེད་སྒོ་ཁག་སྤེལ་མི་ཆོག་ཅེས་བསྒྲགས། བོད་རང་སྐྱོང་ལྗོངས་ཀྱི་དབང་འཛིན་པ་ཚོས་མི་གཅིག་ལ་ནད་དུག་འགོས་ཡོད་པ་ངེས་གཏན་བྱུང་བ་དང་མི་༢༡་ལ་ནད་རྟགས་ཐོན་སོང་ཞེས་གནས་ཚུལ་སྤེལ། ལོ་ན་༢༦་ལ་སོན་པའི་ལྷ་སའི་དབྱངས་ཅན་ཞེས་པ་ཞིག་གིས་ངའི་འཚོ་བ་དང་ལས་ཀ་སོགས་ལ་བརྡབ་གསིག་དེ་ཙམ་ཐེབས་མ་སོང་། ང་ལ་ལས་བདག་གིས་ཁྱིམ་དུ་བསྡད་ནས་ལས་ཀ་བྱེད་ཆོག་ཅེས་བཀོད་འདོམས་བྱས་བྱུང་། ལྷ་སར་ཏོག་དབྱིབས་ནད་དུག་མ་ཁྱབ་པར་ལོ་གཉིས་ལྷག་ཕྱིན་པ་དང་དམ་དྲག་འདི་འདྲ་ཞིག་བྱེད་ཀྱི་ཡོད་པ་ནི་ཧང་སང་དགོས་པ་རེད་ཅེས་བཀྲལ།།
ལྷ་སའི་དབྱངས་ཅན་གྱིས་མུ་མཐུད་དུ་གསར་འགོད་པར་བརྗོད་དོན་ལྟར་ན། མི་སུ་ཞིག་ལ་ནད་དུག་འགོས་ཡོད་པ་དང་ནད་པ་གང་དུ་ཡོད་མེད་རྣམས་ཤེས་རྟོགས་ཐུབ་རྒྱུ་ཁག་པོ་རེད། དེར་བརྟེན་ང་ལ་སེམས་ཁྲལ་ཅུང་ཟད་ཅིག་ཡོང་གི་འདུག ལྷ་སར་གཞིས་ཀ་རྩེ་ལྟར་ཟླ་བ་གཅིག་ལ་སྒོ་རྒྱ་བསྡམས་སྲིད་མདོག་ཁ་པོ་ནི་མ་རེད། གལ་སྲིད་ནད་དུག་སྔོན་འགོག་ཆེད་དུ་མི་རྣམས་ཁྱིམ་དུ་བཀག་སྡེ་ཕྱི་ལོགས་སུ་བཟའ་བཏུང་ལ་རོལ་ཏུ་འགྲོ་མ་བཅུག་ན་ངས་ཉི་མ་ལྔ་དྲུག་ཅིག་ལ་འདང་བའི་འབྲས་དང་གྲོ་ཕྱེ། སྣུམ་སོགས་ཉོས་ནས་གྲ་སྒྲིག་བྱས་ཡོད་ཅེས་གསར་འགོད་པའི་དྲི་བ་ཁག་ལ་ལན་བཏབ། གཞིས་ཀ་རྩེ་ནི་འཛམ་གླིང་གི་གངས་རི་མཐོ་ཤོས་ཇོ་མོ་གླང་མའི་ཕྱོགས་སུ་བསྐྱོད་པའི་འཛུལ་སྒོ་ལྟ་བུ་ཞིག་ཡིན་ཞིང་། རྒྱ་ནག་གཞུང་གིས་གཞིས་ཀ་རྩེར་ཉིན་གསུམ་ལ་འཇམ་ཐིང་གི་དུས་སྐབས་ཞེས་ས་གནས་ཡོངས་སུ་འགྲིམ་འགྲུལ་དང་ཚོང་ལས་གཉེར་མི་ཆོག་པར་མི་རྣམས་རང་ཁྱིམ་དུ་འཛུལ་དགོས་པའི་ཁྲིམས་ཤིག་ལག་ལེན་བསྟར། ཁ་སང་གཟའ་མིག་དམར་ཉིན་ལྷ་ས་དང་གཞིས་ཀ་རྩེའི་མི་མང་ལ་བརྟག་དཔྱད་སྐོར་ཐེངས་དང་པོ་བྱས་པ་དང་དེ་རིང་གཟའ་ལྷག་པའི་ཉིན་བརྟག་དཔྱད་སྐོར་ཐེངས་གཉིས་པ་བྱ་རྒྱུ་མགོ་བརྩམས། རྒྱ་ནག་གཞུང་གིས་ལྷ་ས་དང་གཞིས་ཀ་རྩའི་མི་མང་ལ་ནད་དུག་བརྟག་དཔྱད་ཐེངས་ཅི་ཙམ་བྱ་འཆར་ཡོད་མེད་བོད་ལྗོངས་བརྙན་འཕྲིན་ཁང་གིས་ཁྱབ་བསྒྲགས་མ་བྱུང་། དེ་བཞིན་བོད་ཀྱི་སྟོད་མངའ་རིས་ནི་མི་འབོར་ཉུང་ཡང་ཕྱོགས་བཞི་མཚམས་བརྒྱད་ནས་གངས་དཀར་ཏེ་སེ་དང་མ་ཕམ་གཡུ་མཚོ་སོགས་ལ་གནས་སྐོར་དུ་ཡོང་མཁན་ཧ་ཅང་མང་བས་གྲོང་རྡལ་གསུམ་ལ་ནད་དུག་བརྟག་དཔྱད་ཐེངས་གསུམ་བྱ་རྒྱུ་འགོ་ཚུགས་ཡོད་པའི་གནས་ཚུལ་ཐོན། བོད་རང་སྐྱོང་ལྗོངས་ཀྱི་དཔལ་འབྱོར་ཡོང་འབབ་ནི་རྒྱ་གཞུང་གི་རོགས་དངུལ་དང་ཡུལ་སྐོར་སྤྲོ་འཆམ་གྱི་ཡོང་འབབ་ལ་ཤུགས་ཆེན་པོ་ཞིག་བརྟེན་ཡོད་པས་ཡུན་རིང་བཀག་སྡོམ་བྱེད་ན་ས་གནས་མི་མང་གི་འཚོ་བ་དང་དཔལ་འབྱོར་ཡོང་འབབ། ཉིན་རེའི་གླ་ཕོགས་ལ་བརྟེན་པའི་ལས་མི་སོགས་ཀྱི་འཚོ་བར་དོ་ཕོག་འབྱུང་སྲིད་ཅེས་མཉམ་འབྲེལ་གསར་ཁང་གིས་གནས་ཚུལ་སྤེལ་འདུག
ཕྱི་ཟླ་༨་པའི་ཚེས་༩་ཉིན་ཨེ་ཤི་ཡའི་དངུལ་རྩའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་གཟའ་མིག་དམར་ཉིན་མི་༨༢༨་ལ་རྒྱལ་ནང་ནས་ཁྱབ་པའི་ཏོག་དབྱིབས་ནད་དུག་འགོས་ཡོད་པ་དང་ནད་པ་བརྒྱ་ཆ་༧༠་ཐམ་པ་ཧེ་ནན་ཞིང་ཆེན་དུ་འདུག ཕྱི་ཟླ་༨་པའི་ཚེས་༨་ནས་རྒྱ་ནག་གི་ཞིང་ཆེན་དང་ས་གནས་བཅུ་ཕྲག་བརྒལ་བ་ཞིག་ལ་ནད་དུག་ཁྱབ་འདུག་ཅེས་གསལ་བསྒྲགས་སྤེལ། ཧེ་ནན་ནི་རྒྱ་ནག་གི་མཚོ་གླིང་ཞིང་ཆེན་ཞིག་ཡིན་པ་དང་ད་ལྟ་ཞིང་ཆེན་དེའི་གྲོང་ཁྱེར་དང་གྲོང་རྡལ་ཁག་གི་མི་མང་ས་ཡ་མང་པོ་རང་ཁྱིམ་དུ་བཀག མི་མང་རྣམས་ནད་དུག་འགོས་ཡོད་མེད་བརྟག་དཔྱད་དང་བཟའ་ཆས་ཉོ་བ། ཛ་དྲག་གི་བྱ་བ་མེད་ན་ཁྱིམ་ནས་ཕྱི་ལ་འབུད་མི་ཆོག་ཅེས་བཀའ་རྒྱ་བཀྲམ། གཟའ་ཟླ་བའི་ཉིན་ཧེ་ནན་ཞིང་ཆེན་རྒྱལ་ས་ཧེ་ཁུག་གྲོང་ཁྱེར་ལ་དུས་ཡུན་ཚོད་འགའ་ཞིག་གི་རིང་སྒོ་རྒྱ་བསྡམས་པ་ཕྱིར་འཐེན་བྱས་ཀྱང་གཟའ་མིག་དམར་ནས་མི་གྲངས་འབུམ་༤་ལྷག་ཡོད་པའི་ཏུང་ཧྥང་གྲོང་ཁྱེར་དུ་ཉི་མ་གསུམ་གྱི་རིང་འགྲོ་འོང་བཀག་སྡོམ་བྱ་རྒྱུའི་ཐག་བཅད། ཧེ་ནན་ཞིང་ཆེན་གྱི་ས་གནས་ཁག་ཏུ་ཡུལ་སྐོར་སྤྲོ་འཆམ་པ་༡༧༨༠༠༠་ཡས་མས་ཤིག་ཡོད་པ་རྣམས་སོ་སོའི་ས་གནས་ཁག་ལ་ཕྱིར་ལོག་བྱེད་མི་ཆོག ནད་དུག་འགོས་མེད་པའི་རྟགས་ཐོན་པ་ཚོ་རང་ཡུལ་ལ་ཕྱིར་ལོག་བྱེད་དུ་འཇུག་རྒྱུ་ཡིན་ཟེར། ནད་རྟགས་ཐོན་པའི་ཡུལ་སྐོར་སྤྲོ་འཆམ་པ་རྣམས་ཟུར་འགོག་བྱ་རྒྱུ་དང་ཧེ་ནན་ཞིང་ཆེན་གྱི་འགོ་ཁྲིད་ཚོས་ས་གནས་ཁག་གི་འབྲེལ་ཡོད་ལས་སྣེ་ཚོར་གཟའ་པ་སངས་བར་དུ་ཏོག་དབྱིབས་ནད་དུག་གཅིག་ཀྱང་མེད་པར་གཏོང་དགོས་ཞེས་བཙན་བཀའ་བཏང་ཡོད་པའི་གནས་ཚུལ་ཐོན།།
གཟའ་བའི་ཟླ བའི་ཉིན་ཧེ་ནན་ཞིང་ཆེན་གྱི་འཕྲོད་བསྟེན་ལས་ཁུངས་ཀྱི་འགོ་ཁྲིད་ཀྲུག་ཁྲང་ཆོན་ཞེས་པ་ཞིག་གིས་ཕྱི་ཟླ་༤་པ་དང་༧་པ་གཉིས་ལ་ནད་དུག་ཁྱབ་ཀྱང་ང་ཚོའི་ནད་འགོག་གི་སྲིད་ཇུས་ལ་གྲུབ་འབྲས་གང་ལེགས་ཐོན་ཡོད། ཡིན་ནའང་འབྲེལ་ཡོད་སྣེ་ཁག་ཅིག་གིས་སོ་སོའི་ལས་འགན་ཚུལ་བཞིན་མ་བསྒྲུབས་པར་འཐུས་ཤོར་ཕྱིན་ཡོད་ཤས་ཆེ། ང་ཚོར་ནད་དུག་བརྟག་དཔྱད་དང་འགོག་བཅོས། འགོས་ནད་ཀྱི་རིགས་ལ་ཞིབ་འཇུག་ཡག་པོ་ཞིག་བྱེད་ཐུབ་ཀྱི་མེད་པའི་ཞན་ཆ་ཡོད་ངེས་རེད་ཅེས་བརྙན་འཕྲིན་ནང་དུ་ངོས་ལེན་ཞུས། དེང་སྐབས་པེ་ཅིང་དང་ཧྲང་ཧེ། ཧྲེན་ཀྲེན་གསུམ་ལ་ཏོག་དབྱིབས་ནད་དུག་གཅིག་ཀྱང་མེད་ཅེས་གནས་ཚུལ་སྤེལ་ཡོད་པར་མ་ཟད། ད་ལྟའི་བར་དུ་རྒྱ་ནག་རྒྱལ་ཡོངས་སུ་ཏོག་དབྱིབས་ནད་དུག་འགོས་པའི་ནད་པ་༢༣༡༦༦༥་བྱུང་ཡོད་པ་དང་མི་༥༢༢༦་ལ་འཆི་སྐྱོན་ཕོག་སོང་ཞེས་གཞུང་འབྲེལ་གྱི་གྲངས་འབོར་ཞིག་སྤེལ། ཨ་རི་དང་ནུབ་ཕྱོགས་ཀྱི་སློབ་ཆེན་འགའ་ཞིག་གིས་ཨ་མི་རི་ཀ་དང་རྒྱ་གར། ཡུ་རོབ་དང་ལྷོ་ཨ་མི་རི་ཀའི་རྒྱལ་ཁབ་བྷར་ཛིལ་སོགས་འཛམ་གླིང་ཡུལ་གྲུ་གང་སར་ཏོག་དབྱིབས་ནད་དུག་ཁྱབ་སྟེ་མི་ལ་ནད་མནར་དང་འཆི་སྐྱོན་བྱུང་བའི་གྲངས་འབོར་ལ་གཞིགས་ནས་རྒྱ་ནག་ལའང་ཉུང་མཐར་མི་ས་ཡ་༡་དང་འབུམ་༦་ཡས་མས་ཤིག་ལ་ཏོག་དབྱིབས་ནད་དུག་འགོས་ནས་འཆི་སྐྱོན་བྱུང་ཡོད་པའི་ཚོད་དཔག་གི་ཞིབ་འཇུག་སྙན་ཐོ་བཏོན། རྒྱ་ནག་གཞུང་གིས་ཐོག་མར་ཝུ་ཧན་གྲོང་ཁྱེར་ལ་ཏོག་དབྱིབས་ནད་དུག་ཇི་ལྟར་ཁྱབ་ཡོད་མེད། རྒྱ་ནག་ནས་འཛམ་གླིང་ཡོངས་ལ་ཁྱབ་པའི་ཏོག་དབྱིབས་ནད་དུག་དེའི་འབྱུང་ཁུངས་སོགས་གསང་རྒྱ་དམ་པོ་བྱས་ནས་ཕྱིར་བསྒྲགས་བྱེད་ཀྱི་མེད་པ་རེད།།
རྒྱ་ནག་གིས་འཛམ་གླིང་རྒྱལ་ཁབ་གཞན་དང་མ་འདྲ་བར་ཏོག་དབྱིབས་ནད་དུག་གཅིག་ཀྱང་མེད་པར་གཏོང་རྒྱུའི་སྲིད་ཇུས་ཤིག་ལག་ལེན་བསྟར་ནས་མི་མང་ལ་དཀའ་ངལ་རབ་དང་རིམ་པ་ཞིག་འཕྲད། ཉེ་ཆར་ཞིས་ཅིན་ཕིང་གི་ནད་འགོག་སྲིད་ཇུས་འདི་༢༠༢༥་བར་དུ་རྒྱུན་འཁྱོངས་བྱེད་སྲིད་ཅེས་རྒྱ་ནག་གི་འགོ་ཁྲིད་ཚོས་གླེང་སློང་བྱས་པའི་གནས་ཚུལ་ཐོན། ཕྱི་ཟླ་༨་པའི་ཚེས་༢་ཉིན་བྷུ་ལུམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ནད་འགོག་སྲིད་ཇུས་ལ་འགྱུར་བ་བཏང་ནས་ཏོག་དབྱིབས་ནད་དུག་འགོ་ཞོར་དང་རྒྱུན་ལྡན་གྱི་འཚོ་བ་སླར་གསོ་བྱེད་མ་ཐུབ་ཚེ། རྒྱ་ནག་གི་ས་གནས་སོ་སོར་ཉིན་ཤས་རེའི་ནང་ཚུད་དུ་མི་དམངས་ལ་གཞུང་གིས་བཙུགས་པའི་བརྟག་དཔྱད་ས་ཚིགས་ཁག་ཏུ་ཏོག་དབྱིབས་ནད་དུག་འགོས་ཡོད་མེད་བརྟག་དཔྱད་བྱ་དགོས་པ་དང་མི་དམངས་རྣམས་ཁྱིམ་དུ་བཀག་སྟེ་བཟང་བཙོན་ལྟ་བུའི་དཀའ་ངལ་མྱོང་རྒྱུ། སྒོ་རྒྱ་བསྡམས་པའི་དུས་སུ་མི་དམངས་ལ་བཟའ་བཏུང་ཆད། མི་སྟོང་ཕྲག་མང་པོ་གཞུང་གི་ཟུར་འགོག་ཁང་དུ་བཙན་གྱིས་ཁྲིད་ནས་ལྡེབ་ཏུ་བཅུག རྒྱ་གཞུང་གི་འཕྲོད་བསྟེན་ལས་སྣེ་ཚོས་ཁྱིམ་ཚང་ཁག་ལ་བཙན་གྱིས་དུག་སེལ་བྱས་ནས་ཏོག་དབྱིབས་ནད་དུག་སྔོན་འགོག་ཆེད་དུ་ཁྱིམ་ཚང་གི་སྒོ་ཁྱིམ་སོགས་དམར་གསོད། རྒྱ་ནག་མི་དམངས་རྣམས་ཕྱི་ལ་མི་ཐར་པའི་དཀའ་ངལ་ནང་དུ་ཚུད། བྱིས་པ་ཚོར་ཡང་ལག་ཐོགས་ཁ་པར་ནང་དུ་ནད་དུག་འགོས་མེད་པའི་འཕྲོད་བསྟེན་གྱི་བཤེར་ཆས་སྟོན་རྒྱུ་མེད་པར་རྩེད་ཐང་ཁག་ཏུ་བསྐྱོད་མི་ཆོག་པའི་དཀའ་འཕྲད་བཞིན་པ་རྣམས་མཚམས་ཆད་ཐུབ་རྒྱུ་ཁག་པོ་རེད། རྒྱ་ནག་མི་དམངས་ཀྱི་གྲས་སུ་ཞིས་ཅིན་ཕིང་གི་ནད་འགག་སྲིད་ཇུས་ལ་དགའ་མོས་མེད་མཁན་ཉིན་རེ་བཞིན་ཇེ་མང་དུ་འགྲོ་བཞིན་འདུག་ཅེས་གནས་ཐོན།།
ཞིས་ཅིན་ཕིང་གི་ནད་འགོག་སྲིད་ཇུས་དེར་ངན་ཕྱོགས་ཀྱི་མཇུག་འབྲས་ཁག་ཅིག་སྨིན་གྱི་ཡོད་པ་སྟེ། སྔོན་ཆད་རྒྱ་ནག་གི་བཟོ་ཚོང་ལས་ཁུངས་ཁག་དང་སློབ་ཆེན་ཁག རྒྱ་ནག་གི་རིག་གཞུང་ཉམས་ཞིབ་ལས་ཁང་རྣམས་འཛམ་གླིང་ཡོངས་ལ་འབྲེལ་བ་ཚུགས་ཀྱང་ཏོག་དབྱིབས་ནད་དུག་ཁྱབ་ནས་འབྲེལ་བ་ཆད། ཕྱི་རྒྱལ་གྱི་བཟོ་ཚོང་ལས་ཁང་མང་དག་ཅིག་རྒྱ་ནག་གི་ཏོག་དབྱིབས་ནད་དུག་གཅིག་ཀྱང་མེད་པར་གཏོང་རྒྱུའི་སྲིད་ཇུས་ལ་སུན་སྣང་སྐྱེས་ནས་རྒྱལ་ཁབ་གཞན་ལ་སྤོར་དགོས་པའི་ངེས་ཤེས་རྙེད། ཞིས་ཅིན་ཕིང་གིས་ཏོག་དབྱིབས་ནད་དུག་གཅིག་ཀྱང་མེད་པར་གཏོང་རྒྱུའི་སྲིད་ཇུས་དེ་༢༠༢༢་ཕན་ཆད་དུའང་རྒྱུན་འཁྱོངས་བྱ་རྒྱུའི་རྣམ་པ་ཤུགས་ཆེན་པོ་ཐོན། ཉམས་ཞིབ་པ་ཚོས་ནམ་ཞིག་རྒྱ་ནག་གིས་ཀྱང་སིངྒ་པུར་དང་ཨོ་གླིང་། ཐེ་ཝན་སོགས་ལ་མིག་དཔེ་བལྟས་ནས་ཏོག་དབྱིབས་ནད་དུག་གཅིག་ཀྱང་མེད་པར་གཏོང་རྒྱུའི་སྲིད་ཇུས་འདོར་རྒྱུའི་རེ་ལྟོས་བཅངས་པ་སྟོང་ཟད་དུ་གྱུར། ཨ་རིའི་རྒྱལ་ས་ཝ་ཤིང་ཊོན་གྱི་ཕི་ཊར་སན་རྒྱལ་སྤྱིའི་དཔལ་འབྱོར་ཞིབ་འཇུག་ཁང་གི་ཉམས་ཞིབ་པ་ཧྭང་ཐེན་ལེས་རྒྱ་ནག་གི་སྲིད་ཇུས་མཐའ་དག་ཏོག་དབྱིབས་ནད་དུག་གཅིག་ཀྱང་མེད་པར་གཏོང་རྒྱུ་དེར་དམིགས་ནས་གཏན་འབེབས་བྱེད་ཀྱི་འདུག་ཅེས་བསྟན། ཞིས་ཅིན་ཕིང་གིས་ཕྱི་ལ་སྒོ་མོ་ཕྱེ་ནས་ཚོང་ལས་དང་འགྲིམ་འགྲུལ་སླར་གསོ་བྱ་རྒྱུའི་ཚབ་ཏུ་རང་གི་སྲིད་དབང་སྲ་བརྟན། ཁོ་པར་ཆབ་སྲིད་ཐོག་ཏུ་ཉེ་ཞོ་འབྱུང་སྲིད་པར་གཡོལ་ཐབས་བྱ་རྒྱུ་གཙིགས་སུ་བཟུང་ཡོད་པའི་གནས་ཚུལ་ཐོན་འདུག དེང་སྐབས་ཨ་སྒོར་དུང་ཕྱུར་༤༨༠་ཐམ་པའི་མ་རྩ་ཡོད་པའི་རྒྱ་ནག་གི་འབྱོར་ལྡན་པ་ཚོ་རང་ཡུལ་གྱི་ནད་འགོག་སྲིད་ཇུས་ལ་བསུན་ནས་ཕྱི་རྒྱལ་ཡུལ་གྲུ་ཁག་ཏུ་བྲོས་བྱོལ་ལ་ཐར་ཐབས་སུ་འབད། རྒྱ་ནག་གཞུང་གིས་འབྱོར་ལྡན་པ་དེ་དག་གི་མ་རྩ་རྣམས་ཕྱི་ལ་འཁྱེར་མི་ཆོག་ཅེས་འགོག་གི་ཡོད་ཀྱང་ཉམས་ཞིབ་པ་ཚོས་རྒྱ་ནག་གིས་དངུལ་སྒོར་འགོག་གི་ཡོད་པ་ནི་གླེན་རྟགས་རེད། དངུལ་སྒོར་ལ་འཛད་རྒྱུ་ཡོད་པ་དང་དངུལ་འདུ་འགོད་བྱེད་ཐུབ་པའི་མི་རྣམ་དཔྱད་ཅན་རྣམས་རྒྱལ་ནང་དུ་ཉར་འཛིན་བྱ་རྒྱུ་གནད་འགག་ཆེན་པོ་རེད། དངུལ་སྒོར་བཟོ་ཐུབ་པའི་མི་ཀླད་པ་ཅན་རྣམས་ཕྱི་ལ་འཆོར་ན་ཕུགས་སུ་རྒྱ་ནག་ལ་གསབ་ཏུ་མེད་པའི་གྱོང་གུད་ཆེན་པོ་ཞིག་འཕོག་ངེས་རེད་ཅེས་ཉེན་བརྡ་བཏང་འདུག