གསར་འགྱུར་ཞིག་སྤེལ་སྐབས་གསར་འགྱུར་དེ་ལ་མི་ག་ཚོད་ཀྱིས་དགའ་བ་དང་། མི་ག་ཚོད་ཀྱིས་མ་དགའ་བ་བྱེད་སྲིད་དམ་ཞེས་པ་འདི་གསར་འགོད་པ་དང་རྩོམ་སྒྲིག་པ་སུ་ཞིག་གིས་བསམ་བློ་གཏོང་ས་ཞིག་དང་དཔྱད་གཞི་ཞིག་ཆགས་ཀི་མེད་ཅེས་པདྨ་འཚོ་ལགས་ཀྱིས་བརྗོད་སོང་།
སྤྱི་ཟླ་༩་ཚེས་༡༨་ཉིན་གྱི་ཀུན་གླེང་བརྗོད་གཞི་སྟེ་(བཙན་བྱོལ་བོད་ཀྱི་གསར་ལམ་ཁག་གི་འོས་འགན་དང་དཀའ་ངལ་)ཞེས་པའི་ཐད་ལ་འདི་ཀ་རླུང་འཕྲིན་ཁང་ལ་མི་མང་གི་བསམ་ཚུལ་དང་དྲི་བ་༥༠་ཙམ་འབྱོར་ཞིང་། ཕལ་ཆེ་ཤོས་ནི་བཙན་བྱོལ་བོད་ཀྱི་གསར་ཁང་ཁག་དང་གསར་འགོད་པ་ཚོས་བོད་ཕྱི་ནང་གི་བར་དང་། ཡང་བོད་དང་རྒྱལ་སྤྱིའི་བར་གྱི་ཟམ་པ་ལྟ་བུའི་འབྲེལ་མཐུད་པའི་གོ་ཆོད་དགོས་པ་མ་ཟད། བོད་ནང་གི་བོད་མིར་འཁོ་བ་ནི་༸གོང་ས་མཆོག་གི་མཛད་འཕྲིན་དང་རྒྱལ་སྤྱིའི་གསར་འགྱུར། བོད་དོན་གསར་འགྱུར་བཅས་ཡིན། དེ་བས་བཙན་བྱོལ་ནང་ཁུལ་གྱི་རྩོད་རྙོག་དེ་ཚོ་ཆེ་རུ་བཟོས་ནས་གསར་འགྱུར་གཏོང་མི་འོས་ཞེས་བསམ་ཚུལ་འབྲི་མཁན་མང་ཙམ་བྱུང་། ཡང་བཙན་བྱོལ་ནང་གི་གསར་འགོད་པ་ཚོས། བོད་ནང་གི་གནས་སྟངས་དང་དཀའ་ངལ་གཙོ་བོར་བཟུང་ནས་རྒྱལ་སྤྱིའི་རང་བཞིན་གྱི་དྲིལ་བསྒྲག་ཇི་ལྟར་བྱ་དགོས་པ་དང་། རྒྱལ་སྤྱིའི་གསར་ལམ་ཁག་ཏུ་ཁྱབ་སྤེལ་འགྲོ་བཞིན་པའི་རྒྱ་ནག་གི་རྫུན་གཏམ་དེ་དག་ལ་གསར་འགོད་པ་ཚོས་རྒྱལ་སྤྱིའི་རང་བཞིན་གྱི་གདོང་ལེན་ཇི་ལྟར་བྱའམ་ཞེས་བཀའ་འདྲི་ཞུ་མཁན་ཡང་འདུག ད་དུང་བཙན་བྱོལ་གསར་འགོད་པ་ཚོའི་ལས་དོན་གཙོ་བོ་དེ་བོད་ནང་གི་གནས་ཚུལ་མཁོ་འདོནབདང་ཁྱབ་སྤེལ་བྱེད་རྒྱུ་དེ་ཡིན་འོས་ཀྱང་། ད་ལྟ་བཙན་བྱོལ་གྱི་གསར་ལམ་ཁག་གིས་བཙན་བྱོལ་སྤྱི་ཚོགས་ནང་ཁུལ་གྱི་གནས་ཚུལ་ཁག་ལ་དོ་དབྱིངས་ཆེ་དྲག་པ་འདིའི་ཁ་ཕྱོགས་བསྒྱུར་ཐབས་ཡོད་མེད་ཀྱང་བཀའ་འདྲི་ཞུ་མཁན་བྱུང་།
བོད་ཀྱི་དུས་བབ་གསར་ཁང་གི་རྩོམ་སྒྲིག་པ་པདྨ་འཚོ་ལགས་ཀྱིས་གོང་གི་མི་མང་གི་བསམ་ཚུལ་དང་དྲི་བ་དེ་དག་ལ་བཀའ་ལན་གནང་སྐབས། བཙན་བྱོལ་གྱི་གསར་འགོད་པ་ཚོས་ཀྱང་སྤྱིའི་གསར་འགྱུར་རྒྱུད་ལམ་གྱི་རྩ་འཛིན་ལྟར་དྲང་བདེན་དང་དངོས་ཡོད་གཞི་བཞག་པའི་ཐོག བཙན་བྱོལ་གྱི་གསར་ལམ་ཁག་དང་གསར་འགོད་པ་ཚོར་དེའི་ཐོག་ལ་ད་དུང་འཐབ་རྩོད་ཀྱི་འགན། འཕྲལ་ཕུགས་གཉིས་ལ་བསམ་བློ་གཏོང་དགོས་པའི་འགན་འཕར་མ་ཞིག་ཡོད་ཕྱིན་མི་མང་གི་བསམ་ཚུལ་དང་དྲི་བ་འདི་རྣམས་གཏོང་དགོས་བྱུང་བཞིན་པ་རེད། ཁོང་གིས། བོད་པའི་གསར་ཁང་ཞིག་གི་རྩོམ་སྒྲིག་པའི་ངོས་ནས། བཙན་བྱོལ་ནང་གི་གསར་ཁང་ཕལ་ཆེ་ཤོས་ཀྱིས་བོད་སྤྱི་བའི་བསམ་མདུན་ལྟར། ༧གོང་ས་མཆོག་གི་མཛད་འཕྲིན་དང་བོད་མིའི་སྒྲིག་འཛུགས་ཀྱི་སྲིད་ཇུས་དང་ཕྱག་ལས། བོད་མི་མང་གི་བདེ་སྡུག་ལ་འབྲེལ་བའི་གནས་ཚུལ་རྣམས་གལ་ཆེ་ཤོས་སུ་འཇོག་བཞིན་ཡོད་པར་ངོས་འཛིན་ཞུ་བཞིན་ཡོད་ཅེས་གསུང་བ་དང་། ཡང་བཙན་བྱོལ་གྱི་ནང་ཁུལ་དཀའ་ངལ་དང་རྙོད་དྲག་རྣམས་མ་སྤེལ་ན་ཡག་པོ་ཡོད་པའི་ལྟ་ཚུལ་འཛིན་མཁན་དེ་དག་ཀྱང་སྤྱི་ཡོངས་ཀྱི་ཆ་ནས་བདེན་པ་རེད་ལ། གཞིས་བྱེས་གང་དུ་ཡང་མ་ལེགས་པའི་ཆ་དེ་ཕྱི་ལ་བཏོན་ནས་དྲིལ་བསྒྲགས་བྱེད་པའི་མོས་པ་ཆེན་པོ་མེད་ཀྱང་། ཡིན་ཡང་འདི་ནི་བོད་མི་ཁོ་ནའི་དཀའ་ངལ་ཞིག་མ་ཡིན་པར་སྤྱི་ཚོགས་ཤིག་ཡིན་ན་ལེགས་ཉེས་གཉིས་ཀ་ཡོད་པ་རང་བཞིན་དང་ཆོས་ཉིད་ཡིན་དུས། ལེགས་སྤེལ་ཉེས་འགོག་གི་འགན་དང་བསམ་བློ་ཞིག་འཁོར་ཐུབ་ན་ཡང་བསམ་བློ་གཏོང་ཕྱོགས་ཤིག་ཡོང་གི་ཡོད་པར་གསུང་སོང་།
དེ་མིན་རྒྱ་ནག་གཞུང་གིས་བོད་དུ་དམ་དྲག་གི་སྲིད་ཇུས་སྤེལ་མུས་དང་ཕྱིའི་རྒྱལ་ཁབ་ཁག་ཏུ་དཀྲོག་གཏམ་་( Disinformation ) དང་ལོག་འགྲེལ་( Misinformation) ཀྱི་བོད་འབྲེལ་དྲིལ་བསྒྲགས་ཤུགས་ཆེ་རུ་གཏོང་བཞིན་པའི་སྐབས་སུ། བཙན་བྱོལ་བོད་ཀྱི་གསར་ཁང་དང་གསར་འགོད་པ་ཚོས་ཀྱང་ཕྱི་ནང་གཉིས་ནས་གདོང་ལེན་བྱེད་དགོས་པའི་དཀའ་ངལ་ཇེ་མང་ཡིན་ན་ཡང་། རྒྱལ་སྤྱིའི་གསར་འགྱུར་རྒྱུད་ལམ་ཁག་ཏུ་བོད་དོན་གནས་ཚུལ་ཁྱབ་སྤེལ་ཡོང་བར་བཙན་བྱོལ་དུ་སྐད་ཡིག་སྣ་མང་གི་གསར་འགྱུར་སྤེལ་བཞིན་པ་དང་། རྒྱལ་སྤྱིའི་གསར་ཁང་སྐད་གྲགས་ཅན་ཁག་ཏུ་ཕྱག་ལས་གནང་མཁན་བོད་པ་རེ་ཟུང་ཡོང་བཞིན་པ། དེ་བཞིན་རྒྱལ་སྤྱིའི་སྒང་ལ་བོད་དོན་དྲིལ་བསྒྲགས་བྱེད་མཁན་ཚོགས་པ་སྐྱིད་སྡུག་ཁག་གིས་གསར་འགྱུར་རྒྱུད་ལམ་ཁག་ནི་བོད་ནང་གི་གནས་ཚུལ་ལེན་སའི་ཁོངས་དང་བོ་དེ་ཆགས་བཞིན་པ། རྒྱལ་སྤྱིའི་སྙན་ཐོ་ཁག་གིས་བོད་སྐད་ཡིག་གི་གསར་འགྱུར་རྒྱུད་ལམ་ཁག་ཏུ་ཐོན་པའི་གནས་ཚུལ་རྣམས་ལ་དོ་སྣང་བྱེད་བཞིན་པ་བཅས་ནི་བོད་ནང་གི་གནས་ཚུལ་རྒྱལ་སྤྱིའི་ནང་སྙོབས་ཐུབ་པའི་ལམ་ཀ་ཞིག་ལ་འགྱུར་བཞིན་པ་ཡོད་པས། བཙན་བྱོལ་བོད་མིའི་གསར་ཁང་རེ་རེ་དང་གསར་འགོད་པ་རེ་རེ་ནི་རྒྱལ་སྤྱིའི་སྒང་ལ་བོད་དོན་ཁྱབ་སྤེལ་བྱེད་མཁན་དུ་འགྱུར་བཞིན་པ་འདི་རྒྱུན་སྐྱོང་བྱེད་དགོས་པའི་སྐོར་ལ་ཡང་པདྨ་འཚོ་ལགས་ཀྱིས་དགོངས་ཚུལ་གསུང་སོང་།
ཀུན་གླེང་གཙོ་སྐྱོང་བ་ཚེ་རིང་སྐྱིད་ཀྱིས་བོད་ཀྱི་དུས་བབ་རྩོམ་སྒྲིག་པ་པདྨ་འཚོ་ལགས་དང་བགྲོ་གླེང་།
པདྨ་འཚོ་ལགས་ནི་བོད་ཀྱི་དུས་བབ་ཀྱི་རྩོམ་སྒྲིག་པ་དང་གསར་འགོད་པ་ཞིག་ཡིན་པ་མ་ཟད། ཡང་སྐབས་བཅུ་བདུན་པའི་བོད་མི་མང་སྤྱི་འཐུས་ཀྱང་ཡིན། དེ་བས་ཆབ་སྲིད་པ་དང་གསར་འགོད་ལས་རིགས་ཀྱི་ལྟ་གྲུབ་ཐ་དད་ཡིན་པས་ཆབ་སྲིད་པ་ཡིན་བཞིན་དུ་གསར་འགོད་པ་གང་འདྲ་བྱེད་པ་དང་། གསར་འགོད་པ་ཆབ་སྲིད་ཀྱི་ནང་ལ་ཞུགས་པ་དེས་གསར་འགོད་རིག་པའི་ལྟ་གྲུབ་དང་འགལ་ཡོད་མེད་མི་མང་གིས་དྲི་བ་བཏོན་འདུག་པ་འདིའི་ཐད་ལ་པདྨ་འཚོ་ལགས་ཀྱིས། ངས་དྲི་བ་འདི་ལ་སྔོན་མ་ལན་ཐེངས་ཁ་ཤས་ལ་བརྒྱབ་མྱོང་ཡོད། ཁོང་རང་གི་ལྟ་གྲུབ་ཟེར་ན་རེད། བསམ་བློ་གཏོང་ཕྱོགས་དེ་ཕྱི་རྒྱལ་གྱི་བསམ་བློ་གཏོང་ཕྱོགས་ཤུགས་ཆེན་པོ་ཡོད་པ་རེད། མ་གཞི་གསར་འགྱུར་རྒྱུད་ལམ་དར་བའི་སྔ་ཕྱིར་ལྟས་ན་ཕྱི་རྒྱལ་གྱི་ལྟ་བ་དང་ལངས་ཕྱོགས་མང་པོ་ཞིག་འདྲེས་ཤག་རེད། ཡིན་ན་ཡང་ང་རང་དངོས་སུ་གསར་འགྱུར་གྱི་ལས་ཀ་ལས་མཁན་ཞིག་དང་། ཆབ་སྲིད་ཟེར་ན་རེད། གང་ལྟར་ཁྲིམས་བཟོ་ལྷན་ཚོགས་ཀྱི་ལོ་གཉིས་ཀྱི་ཉམས་མྱོང་ལ་ལྟས་ཡོང་ན། ཏག་ཏག་ཕྱི་ཡི་ཆབ་སྲིད་དང་བཙན་བྱོལ་གྱི་ཆབ་སྲིད་པའི་བར་རོལ་དུ་ཁྱད་པར་ཆེན་པོ་ཞིག་འདུག ཁྱད་པར་གཅིག་ནི་ང་ཚོའི་སྤྱི་འཐུས་ལ་མཚོན་ན་ཆབ་སྲིད་ཚོགས་པ་མ་འདྲ་བ་དེ་འདྲ་མེད། ང་ཚོ་ནི་ས་གནས་ས་གནས་ནས་གདམས་པའི་ཆབ་སྲིད་ཀྱི་འཐུས་མི་ཞིག་ཆགས་ཡོད། གཉིས་ནས་ང་ཚོ་བཙན་བྱོལ་ནང་གི་ཆབ་སྲིད་པའམ་སྤྱི་འཐུས་ཤིག་ཡིན་ན། བོད་ནང་གི་བོད་མི་ཚོའི་ཉི་མ་རེ་རེའི་གནས་སྟངས་དང་བཙན་བྱོལ་བོད་མིའི་བདེ་སྡུག་ལ་ལྟ་དགོས་པ་དེ་གནད་འགག་ཆེན་པོ་དང་འགན་དང་བོ་དེ་ཆགས་ཡོད་དུས། ང་རང་ཚོའི་བོད་མི་མང་སྤྱི་འཐུས་ཤིག་གི་གནས་བབ་དང་བཙན་བྱོལ་བ་ཞིག་གི་གནས་བབ་ཐོག་ནས་ང་རང་གསར་འགོད་པ་ཞིག་ཡིན་པ་ཧ་ཅང་སྟབས་ལེགས་པོ་བྱུང་འདུག་བསམ་གི་ཡོད། དེ་ཡིན་དུས་འགལ་ཟླ་ཆེན་པོ་མཐོང་གི་མེད་དེ་དཀའ་ངལ་ཡོད་པ་བདེན་པ་རེད། གང་ལྟར་ཡང་རྒྱལ་བལ་འབྲུག་གསུམ་གྱི་བོད་མིའི་སྤྱི་ཚོགས་ལ་མཚོན་ན་མི་གཅིག་གི་དུས་གཅིག་ཏུ་འགན་མ་འདྲ་བ་མང་པོ་མ་ཁུར་ཚེ་བོད་མི་བཙན་བྱོལ་བའི་ནང་དུ་མི་ཆ་ཡི་དཀའ་ངལ་ཡོད་ཅེས་ཀྱང་གསུང་སོང་།
ཡང་པདྨ་འཚོ་ལགས་ཀྱིས་བཙན་བྱོལ་གྱི་མི་ལོ་༦༠་ལྷག་གི་འཐབ་རྩོད་ཁྲོད་དུ་བཙན་བྱོལ་གྱི་གསར་ལམ་ཁག་གིས་བོད་དོན་འཐབ་རྩོད་ལ་ནུས་པ་ཆེན་པོ་ཐོན་ཡོད་པར་ངོས་འཛིན་གནང་གི་འདུག ཁོང་གིས། མི་འབོར་དང་གསར་འགྱུར་རྒྱུད་ལམ་གྱི་གྲངས་ཚད་སོགས་གང་གི་ཆ་ནས་འབོར་ཆེན་པོ་མ་རེད་དེ། གང་ཡོད་པ་དེ་ཡིས་གསར་འགོད་པ་རེ་རེ་ཡང་གཅིག་འདུས་ཀྱི་གསར་འགོད་པ་ཆགས་ཡོད་ཅིང་། གསར་ཁང་རེ་རེ་ཡང་གསར་ཁང་ཙམ་མ་ཟད་འཐབ་རྩོད་པ་ཞིག་གི་ལས་ཀ་དེ་སྒྲུབ་ཐུབ་ཡོད་པ་རེད་བསམ་ཀི་འདུག གཞན་ཡང་གསར་འགྱུར་ཞིག་སྤེལ་སྐབས་དེ་ལ་མི་ག་ཚོད་ཀྱིས་དགའ་བ་དང་མ་དགའ་བ་བྱེད་ཀི་ཡོད་མེད་ལ་གསར་འགོད་པ་དང་རྩོམ་སྒྲིག་པ་སུ་ཞིག་གི་ངོས་ནས་དཔྱད་གཞི་ཞིག་དང་བསམ་བློ་གཏོང་ས་ཞིག་ཆགས་ཀི་མེད། དེར་བརྟེན་བཙན་བྱོལ་གྱི་གསར་ཁང་ཁག་ལ་ཁ་རྡུང་སོགས་ཡང་ཡང་ཡོང་གི་ཡོད་ལ། དེ་ཚོ་ཚང་མ་གཞི་རྩ་མེད་པ་དེ་འདྲ་ཡང་མ་རེད་དེ། མང་པོ་ཞིག་ནི་མི་སོ་སོ་འདོད་དང་མ་འདོད། དེ་དགོས་དང་མ་དགོས་ཀྱི་ཐོག་ནས་ཁ་རྡུང་གཏོང་མཁན་དང་སྐྱོན་བརྗོད་བྱེད་མཁན་ཡོང་དུས་དེ་སྤྱི་ཚོགས་ཤིག་གི་རང་བཞིན་ལ་བསམ་བློ་བཏང་བཞག་ན་ཞེས་གསུང་བྱུང་།
པདྨ་འཚོ་ལགས་བོད་ནས་འཚར་ཞིང་། ནང་མི་ཚང་མ་རྒྱ་ནག་གི་བཙན་གནོན་འོག་ཡོད་པའི་བོད་དུ་ཡོད་དུས་ད་ལྟའི་བར་དཀའ་ངལ་མང་པོ་འཕྲད་མྱོང་བ་དང་། ནང་མི་དང་འབྲེལ་བ་རྦད་དེ་གཅོད་དགོས་པ་ཆགས་ཡོད་པ་མ་ཟད་ཁོང་གསར་ཁང་ཞིག་གི་རྩོམ་སྒྲིག་པ་ཡིན་པའི་ཆ་ནས་གསར་འགོད་པར་དཀའ་ངལ་འཕྲད་ཀྱིན་པའི་གནས་ཚུལ་ཞིག་དཔེར་བརྗོད་དུ་བཀོད་སོང་། དེ་ཡང་ཁོང་གིས། ང་ཚོའི་བོད་ཀྱི་དུས་བབ་གསར་ཁང་གི་ལྷོ་ཕྱོགས་གསར་འགོད་པས་མཚན་གུང་ཞིག་ལ་ངར་ཁ་པར་ཡོང་ནས། ཁོང་གི་ནང་ལ་ཉེན་རྟོག་པ་ཡོང་འདུག་པ་དང་། ཁོང་གི་ཨ་ཅག་གི་ནང་དུ་ཉེན་རྟོག་པ་ཡོང་ནས་ཁྱེད་ཚོའི་སྤུན་མཆེད་ཀྱིས་གནས་ཚུལ་ཞིག་མཁོ་སྤྲོད་བྱེད་འདུག་ཅེས་སྡུག་ར་སྐུལ་བཞིན་འདུག་ཟེར། ངས་དེ་མ་ཐག་ད་ག་རེ་བྱེད་དམ། ཁྱེད་རང་གིས་གསར་འགྱུར་དེ་བཀོད་པ་ནི་མ་རེད། ད་ཅི་བྱ་ཞེས་དྲིས་དུས། གསར་འགྱུར་དེ་ངས་བཏང་བ་མ་རེད་ཅེས་ཡི་གེ་ཞིག་གཏོང་རོགས་ཟེར། ངས་ཡི་གེ་དེ་བཏང་བ་སོགས་སྤྱིར་ཨ་ཆད་འུ་ཐུག་གི་གནས་སྟངས་འདྲ་བོ་རེད། ཐ་ན་འདི་འདྲ་བྱེད་དགོས་པའི་གནས་སྟངས་ཀྱང་འདུག བཙན་བྱོལ་དུ་གསར་འགྱུར་ལས་རིགས་གཉེར་མཁན་བོད་དུ་ནང་མི་ཡོད་མཁན་ཞིག་ལ་མཚོན་ན། ཧ་ལམ་བརྒྱ་ཆ་བརྒྱ་ཐམ་པར་དཀའ་ངལ་མེད་ས་ཞིག་ཡོད་མ་རེད་ལ། རང་བཞིན་གྱིས་ནང་མི་དང་འབྲེལ་བ་མེད་པ་ཞིག་བཟོ་བཞིན་འདུག་ཅེས་བརྗོད་སོང་།
པདྨ་འཚོ་ལགས་ཀྱིས་ད་ལྟའི་བོད་ཕྱི་ནང་གི་བོད་སྐད་ཡིག་གི་གསར་འགྱུར་རྒྱུད་ལམ་གྱི་སྤྱིའི་གནས་བབ་སྐོར་ལ་བཀའ་མོལ་གནང་སྐབས། རྒྱ་ནག་གཞུང་གིས་ན་ནིང་སྙན་ཐོ་དེ་འདྲའི་ནང་ལ་བོད་ནང་དུ་བོད་སྐད་ཡིག་གི་ཚགས་པར་དང་དུས་དེབ་འདི་འདྲ་ཡོད་ཅེས་སྡོམ་གྲངས་དེ་འདྲ་བཏོན་ཡོད། ཡིན་ན་ཡང་ཉིན་རེ་རེ་ལ་བོད་ནང་གི་བོད་སྐད་ཡིག་གི་དྲ་ཚིགས་ཁག་ལ་ལྟས་ཡོང་དུས། ཚོང་དང་ཡུལ་སྐོར་སྤྲོ་འཆམ་པ་ལ་དྲིལ་བསྒྲགས་ཀྱི་རིགས་མ་གཏོགས། དངོས་གནས་ཀྱི་གསར་འགྱུར་སྤུས་ཚད་བསྡུར་ན། ཕྱི་ལོགས་ཀྱི་བོད་སྐད་ཡིག་གི་གསར་འགྱུར་རྒྱུད་ལམ་གྱི་སྙོབས་ཚད་དང་ཁྱབ་ཚད། སྤུས་ཚད་གང་གི་ཆ་ནས་ཡག་པོ་ཞིག་མཐོང་གི་འདུག་ཅེས་གསུང་བྱུང་།
Your browser doesn’t support HTML5
བཙན་བྱོལ་བོད་ཀྱི་གསར་ལམ་ཁག་གི་འོས་འགན་དང་གདོང་ལེན།