༄༅།། འབྲུག་ཡུལ་དུ་གངས་རི་དང་འཁྱག་རོམ་མང་བས་ཆུའི་ཐོན་ཁུངས་མོད་པོ་ཡོད་ཅིང་། ཕྱི་ཟླ་དང་པོའི་ཚེས་༢༥་ཉིན་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་པ་ལྟར་ན། འབྲུག་གཞུང་གིས་རྒྱ་གར་ལ་མཉམ་འབྲེལ་བྱས་ནས་ཆུ་ཤུགས་གློག་ཁང་འཛུགས་སྐྲུན་དང་འབྲུག་ཡུལ་གྱི་ཆུའི་ཐོན་སྐྱེད་བཀོལ་སྤྱོད། འབྲུག་ཡུལ་གྱི་ཚོང་རྩ་དང་མ་རྩ་འཛུགས་འཇོག་ལྷན་ཁང་གི་སྤྱི་ཁྱབ་འགན་འཛིན་ཨུ་ཇ་ཝལ་དིབ་དྷལ་གྱིས་གསར་འགོད་པར་ང་ཚོས་རྒྱ་གར་ལ་འཐབ་ཇུས་མཉམ་འབྲེལ་གྱི་གྲོས་མོལ་དང་རྒྱལ་སྤྱིའི་འཐབ་ཇུས་ཟླ་གྲོགས་དེ་ཡིད་རྟོན་རུང་བ་ཞིག་ཏུ་འགྱུར་དགོས་པའི་གྲོས་མོལ་བྱེད་ཀྱི་ཡོད་ཅེས་བསྟན། འབྲུག་ཡུལ་གྱི་ཆུ་བོ་དག་གི་སྟེང་དུ་ཆུ་ཤུགས་གློག་ཁང་འཛུགས་སྐྲུན་བྱ་མ་ཐུབ་པར་རྒྱལ་ཁབ་དེའི་དཔལ་འབྱོར་འཕེལ་རྒྱས་དང་མང་ཚོགས་ཀྱི་བདེ་སྐྱིད་ཆེ་རུ་གཏོང་ཐུབ་ཀྱི་མེད་པའི་གནས་ཚུལ་ཐོན་འདུག
འབྲུག་གཞུང་གིས་དཔལ་འབྱོར་འཕེལ་རྒྱས་གཅིག་པུ་མིན་པར་མི་དམངས་ཀྱི་སེམས་ཁམས་འཕྲོད་བསྟེན་དང་སྤྲོ་སྐྱིད། སྐྱེ་ཁམས་སྣ་འཛོམས་དང་མང་ཚོགས་ཀྱི་འཚོ་བའི་གནས་སྟངས་བཅས་ལ་བསམ་ཞིབ་བྱས་ནས་རྒྱལ་ཡོངས་བདེ་སྐྱིད་ཐོན་སྐྱེད་ཞེས་པ་ཞིག་ཡར་རྒྱས་གཏོང་རྒྱུར་ཤུགས་སྣོན་བརྒྱབ། འབྲུག་ཡུལ་གྱི་གློག་ཁང་ཁག་ནས་རྒྱལ་ཁབ་ཀྱི་དཔལ་འབྱོར་ཐོན་སྐྱེད་བརྒྱ་ཆ་༡༥་འདུ་འགོད་ཐུབ། དེའི་འཕྲོ་ནས་རྒྱལ་ཁབ་ཀྱི་དཔལ་འབྱོར་ཐོན་སྐྱེད་ཞིང་ལས་དང་ཡུལ་སྐོར་སྤྲོ་འཆམ་ལ་བརྟེན། དེང་སྐབས་འབྲུག་ཡུལ་གྱི་ཆུ་ཤུགས་གློག་ཁང་ཁག་ནས་གློག་ཤུགས་མེ་གྷ་ཝ་ཊི་༢༥༠༠་ལས་ཐོན་གྱི་མེད་ཀྱང་ལོ་རྗེས་མར་གློག་ཤུགས་མེ་གྷ་ཝ་ཊི་༡༠༠༠་ཁ་སྣོན་ཐུབ་པའི་དམིགས་ཡུལ་བཅངས། འབྲུག་གཞུང་གིས་ལོ་ཤས་རྗེས་ནས་གློག་ཤུགས་མེ་གྷ་ཝ་ཊི་༤༠༠༠་འདོན་ཐུབ་པ་དང་མ་འོངས་པའི་ལོ་བཅུ་ཕྲག་གཅིག་གི་ནང་དུ་གློག་ཤུགས་མེ་གྷ་ཝ་ཊི་༡༠༠༠༠་མཁོ་འདོན་བྱ་རྒྱུའི་དམིགས་ཚད་བཟུང་འདུག
རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག
ཉེ་ཆར་ཕྱི་ཟླ་༡༢་པའི་ཚེས་༡༧་ཉིན་འབྲུག་ཡུལ་གྱི་རྒྱལ་སྟོན་དུས་ཆེན་ཐེངས་༡༡༦་པའི་ཐོག་ཏུ་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་གིས་དགེ་ལེགས་ཕུག་དཔལ་འབྱོར་དམིགས་བསལ་བསྟི་གནས་ཤིག་ཏུ་བསྒྱུར་རྒྱུ་ཡིན། དགེ་ལེགས་ཕུག་གི་འཛུགས་སྐྲུན་ལས་གཞིའི་ཁོངས་སུ་ཆུ་ཤུགས་གློག་ཁང་འཛུགས་སྐྲུན་བྱ་རྒྱུ་འདུས་ཡོད་ཅེས་གསལ་བསྒྲགས་སྤེལ། དགེ་ལེགས་ཕུག་གི་དཔལ་འབྱོར་དམིགས་བསལ་ས་ཁུལ་དེ་རྒྱ་གར་བྱང་ཤར་གྱི་ཨ་སམ་མངའ་སྡེའི་ས་མཚམས་དང་འབྲུག་ཡུལ་གྱི་གསར་སྤང་རྫོང་དང་རྩི་རང་རྫོང་གི་ཁོངས་སུ་གཏོགས། འབྲུག་ཡུལ་ནས་རྒྱ་གར་ལ་བསྐྱོད་པའི་འཛུལ་སྒོ་གསུམ་ཡོད་པ་ནི་བསམ་གྲུབ་ལྗོངས་མཁར་དང་ཕུན་ཚོགས་གླིང་། དགེ་ལེགས་ཕུག་བཅས་ཡིན་པས་འབྲུག་ཡུལ་གྱི་དཔལ་འབྱོར་དམིགས་བསལ་ས་ཁུལ་དེར་ལམ་ལྷོངས་འབྱུང་རྒྱུ་ཡིན་མིན་ནི་གློག་གི་མཐུན་རྐྱེན་དང་འགྲིམ་འགྲུལ་འབྲེལ་མཐུད། ཆེད་ལས་པའི་ལག་རྩལ་ཡར་རྒྱས་གཏོང་ཐུབ་རྒྱུ་ཡིན་མིན་དང་འཛུགས་སྐྲུན་རྒྱ་སྐྱེད་གཏོང་ཐུབ་རྒྱུ་ཡིན་མིན་བཅས་ལ་ཐུག་ཡོད་པའི་གནས་ཚུལ་ཐོན་འདུག
འབྲུག་ཡུལ་དུ་ཆུ་ཤུགས་གློག་ཁང་འཛུགས་སྐྲུན་བྱེད་ཐུབ་ན་ལྷོ་ཨེ་ཤི་ཡའི་རྒྱལ་ཁབ་ཁག་ལ་གློག་ཕྱིར་ཚོང་བྱས་ནས་དཔལ་འབྱོར་གོང་འཕེལ་གཏོང་ཐུབ། པྲོག་དབྱིབས་ནད་ཡམས་སྐབས་སུ་འབྲུག་གཞུང་གིས་ལོ་༣་ལ་སྒོ་རྒྱ་བསྡམས་ནས་ཡུལ་སྐོར་སྤྲོ་འཆམ་པ་བཀག རྒྱལ་ཁབ་ཀྱི་དཔལ་འབྱོར་དང་ཚོང་ལས་ཉམས། འབྲུག་པའི་ཤེས་ཡོན་ཅན་དང་ཆེད་ལས་པ། ན་གཞོན་རྣམས་ཨོ་གླིང་སོགས་ཕྱི་རྒྱལ་ཡུལ་གྲུ་ཁག་ཏུ་བསྐྱོད། འབྲུག་ཡུལ་གྱི་ཚོང་རྩ་དང་མ་རྩ་འཛུགས་འཇོག་ལྷན་ཁང་གི་སྤྱི་ཁྱབ་འགན་འཛིན་ཨུ་ཇ་ཝལ་དིབ་དྷལ་གྱིས་ང་ཚོས་རྒྱ་གར་ལ་མཉམ་འབྲེལ་བྱས་ཏེ་ཕུགས་རྒྱང་རིང་པོར་དམིགས་ནས་ཆུ་ཤུགས་གློག་ཁང་ཁག་ཅིག་འཛུགས་སྐྲུན་བྱ་འཆར་ཡོད། གློག་ཁང་གཉིས་འཕྲལ་དུ་འཛུགས་སྐྲུན་བྱ་རྒྱུའི་འཆར་འགོད་བྱས་ཡོད། ཆུ་ཤུགས་གློག་ཁང་འཛུགས་སྐྲུན་བྱེད་པའི་འགྲོ་གྲོན་སོགས་ལ་ཐ་མའི་ཐག་གཅོད་བྱས་མེད་ཅེས་བསྟན།།
འབྲུག་གཞུང་གིས་གློག་ཤུགས་མེ་གྷ་ཝ་ཊི་༡༠༠༠༠་འདོན་བྱ་དགོས་ཚེ། ཨ་སྒོར་ཐེར་འབུམ་༡༥་འགྲོ་གྲོན་བཏང་ནས་གློག་ཁང་ཁག་འཛུགས་སྐྲུན་བྱ་དགོས། གློག་ཁང་འཛུགས་སྐྲུན་གྱི་འགྲོ་གྲོན་རྣམས་རྒྱ་གར་གྱིས་མ་བཏང་བར་འབྲུག་གཞུང་གིས་འགྲོ་གྲོན་གཏོང་ཐུབ་རྒྱུ་ཤིན་ཏུ་དཀའ། འབྲུག་ཡུལ་ལ་ཆུ་ཤུགས་གློག་ཁང་འཛུགས་སྐྲུན་བྱེད་ཀྱི་ཡོད་པ་ནི་རྒྱལ་ཁབ་དེའི་འཛུགས་སྐྲུན་ཡར་རྒྱས་གཏོང་རྒྱུ་ཁོ་ན་མིན་པར་རྡོ་སོལ་དང་སྣུམ་སོགས་མཁའ་རླུང་འབག་བཙོག་བྱེད་པའི་དུ་བ་ནག་པོ་མེད་པར་ཉི་འོད་དང་རླུང་ཤུགས། ཆུ་ཤུགས་ལ་བརྟེན་པའི་གློག་མཁོ་འདོན་བྱ་རྒྱུ། རང་བྱུང་ཁམས་ལ་གནོད་སྐྱོན་མེད་པའི་གློག་གིས་གོ་ལའི་གནམ་གཤིས་ཚ་དྲོད་འཕེལ་གྱི་ཡོད་པ་འགོག་ཐུབ་པར་མ་ཟད། མ་འོངས་པར་འཛམ་གླིང་ལ་གློག་གི་འབྱུང་ཁུངས་ཡང་རླུང་གི་ནུས་པར་འགྱུར་རྒྱུ་ཡིན་པས་འབྲུག་ཡུལ་དང་རྒྱ་གར་གཉིས་ཀྱིས་ཡང་རླུང་གི་གློག་མཁོ་འདོན་བྱ་རྒྱུར་མཉམ་འབྲེལ་བྱེད་དགོས་པའི་གྲོས་མོལ་བྱེད་ཀྱི་ཡོད་པའི་གནས་ཚུལ་ཐོན་འདུག
འབྲུག་གཞུང་གིས་ཆུ་ཤུགས་གློག་ཁང་
ཨེ་ཤི་ཡའི་བཟོ་ལས་ཕྱུག་བདག་རྒྱ་གར་བ་མུ་ཀེ་ཤ་ཨམ་བྷ་ནི་དང་གྷོ་ཏམ་ཨ་དྷ་ནི་གཉིས་ཀྱིས་ཁོར་ཡུལ་ལ་གནོད་སྐྱོན་མེད་པའི་ཡང་རླུང་གི་གློག་མཁོ་འདོན་བྱ་རྒྱུའི་འགྲན་སྡུར་ལ་ཞུགས། ཡང་རླུང་མཁོ་འདོན་ཐུབ་ན་ས་གཏེར་རླངས་སྣུམ་རྣམས་བཀོལ་སྤྱོད་བྱེད་མི་དགོས་པར་འགྱུར་རྒྱུ་ཡིན་ཞིང་། འཛམ་གླིང་འདིར་ཡང་རླུང་གི་ཚོང་ལས་དཔལ་འབྱོར་དར་བར་དུས་ཡུན་གང་འཚམ་ཞིག་འགོར་རྒྱུ་ཡིན་རུང་འབྲུག་གཞུང་གིས་ལས་གཞི་དེ་གཉེར་རྒྱུའི་སྟ་གོན་དང་སྔོན་འགྲོའི་ཆ་རྐྱེན་ཁག་སྒྲུབ་འགོ་ཚུགས། འབྲུག་ཡུལ་གྱིས་ཉི་གློག་མེ་གྷ་ཝ་ཊི་༡༠༠༠་འདོན་ཐུབ་པའི་ལས་གཞི་ཞིག་ཀྱང་མགོ་བརྩམས། ད་དུང་ས་འོག་ནས་ཆུ་བཏོན་ཏེ་ཆུ་ཤུགས་གློག་ཁང་འཛུགས་བྱེད་ཐུབ་མིན་ཐད་ཚོད་ལྟ་བྱ་རྒྱུའི་འཆར་གཞི་བཀོད། འབྲུག་གཞུང་གིས་སྐྱེ་ཁམས་ལ་མ་གནོད་པར་འཛུགས་སྐྲུན་བྱ་རྒྱུ་གཙིགས་སུ་བཟུང་ཡོད་པའི་གནས་ཚུལ་ཐོན་འདུག
རྒྱ་གར་གཞུང་གིས་འབྲུག་ཡུལ་ལ་ཆུ་ཤུགས་གློག་ཁང་འཛུགས་སྐྲུན་ཐད་མ་རྩ་བཙུགས་ནས་རྒྱབ་སྐྱོར་བྱེད་ཀྱི་ཡོད་པའི་ཁོ་ན་མིན་པ་སྟེ། ཕྱི་ཟླ་དང་པོའི་ཚེས་༢༢་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། འབྲུག་ཡུལ་གྱི་བར་བརྒལ་སྲིད་གཞུང་གི་ཕྱི་སྲིད་དང་ཕྱིར་ཚོང་ལྷན་ཁང་གི་སློབ་སྟོན་པ་དྲག་ཤོས་ཚེ་དབང་རིག་འཛིན་དང་འབྲུག་ཡུལ་དུ་བཅའ་སྡོད་རྒྱ་གར་གྱི་གཞུང་ཚབ་པ་སུ་དྷ་ཀར་དྷ་ལེ་ལཱ་གཉིས་ཀྱིས་གྲོས་མཐུན་ཞིག་ལ་མིང་རྟགས་བཀོད། རྒྱ་གར་གཞུང་གིས་འབྲུག་ཡུལ་གྱི་རྨང་གཞིའི་མཐུན་རྐྱེན་ཡར་རྒྱས་དང་རྒྱལ་གཞུང་གི་ལས་གཞི་ཁག་ལ་འགྲོ་གྲོན་ཧིན་སྒོར་དུང་ཕྱུར་༡༥༠་རོགས་སྐྱོར་སྤྲད། རྒྱ་གར་གྱི་གཞུང་ཚབ་ཁང་གིས་ཧིན་སྒོར་དུང་ཕྱུར་༡༥༠་ཐམ་པ་ང་ཚོས་འབྲུག་ཡུལ་ལ་རོགས་སྐྱོར་སྤྲོད་ཀྱི་ཡོད་པའི་འཆར་གཞི་གཞན་པའི་ཁོངས་སུ་ཚུད་མེད་ཅེས་བསྒྲགས།།
རྒྱ་གར་གྱི་གཞུང་ཚབ་པས་ང་ཚོ་འབྲུག་རྒྱལ་པོའི་ཐུགས་དགོངས་ལྟར་འབྲུག་ཡུལ་གྱི་རྒྱལ་སྲུང་སྒྲིག་འཛུགས་ཀྱི་ཟླ་གྲོགས་སུ་གྱུར་པ་ནི་གཟི་བརྗིད་ཅིག་རེད་ཅེས་བཀྲལ། ༢༠༡༩་ལོའི་ཕྱི་ཟླ་༡༢་པའི་ཚེས་༡༧་ཉིན་འབྲུག་ཡུལ་གྱི་རྒྱལ་སྟོན་དུས་ཆེན་ཐེངས་༡༡༢་པའི་ཐོག་ཏུ་འབྲུག་རྒྱལ་པོས་རྒྱལ་སྲུང་ཁྲིམས་ཡིག་གསལ་བསྒྲགས་བསྐྱངས། ༢༠༢༢་ལོའི་ཕྱི་ཟླ་༡༡་པའི་ཚེས་༡༡་ཉིན་འབྲུག་ཡུལ་གྱི་རྒྱལ་ཡོངས་གྲོས་ཚོགས་ཀྱིས་ཁྲིམས་ཡིག་དེ་རྒྱལ་ཁབ་ཀྱི་ཁྲིམས་ལ་བསྒྱུར། འབྲུག་ཡུལ་གྱི་རྩ་ཁྲིམས་དོན་ཚན་༨་པའི་ནང་གསེས་དང་པོའི་འབྲུ་དོན་ལྟར་༢༠༢༤་ནས་རྒྱལ་སྲུང་སྦྱོང་བརྡ་འགོ་ཚུགས་ཏེ་འབྲུག་པ་ཚོས་ངེས་པར་དུ་རྒྱལ་སྲུང་སྲི་ཞུ་བསྒྲུབ་དགོས་ཞེས་འཁོད། འབྲུག་རྒྱལ་པོས་འབངས་མི་ན་གཞོན་ཡོངས་ཀྱིས་རྒྱལ་ཁབ་འཛུགས་སྐྲུན་དང་བདེ་འཇགས་སྲུང་སྐྱོབ། ཞི་བདེ་དང་མཐུན་སྒྲིལ། རྒྱལ་ཁབ་ཀྱི་བདག་དབང་སྲུང་སྐྱོབ་བཅས་ཀྱི་འགན་ཁུར་ལེན་ཐུབ་པའི་ཆེད་དུ་རྒྱལ་སྲུང་སྒྲིག་འཛུགས་རྩ་འཛུགས་བྱས་པའི་གནས་ཚུལ་ཐོན་འདུག