༄༅།། འབྲུག་ཡུལ་གྱི་སྲིད་གཞུང་གསར་པས་རྒྱ་ནག་ལ་འབྲུག་བོད་ས་མཚམས་ཀྱི་གནད་དོན་ཁག་ལ་གྲོས་མོལ་མུ་མཐུད་དུ་བྱས་ཏེ་རྒྱ་གར་ལ་ཚོང་ལས་དང་དཔལ་འབྱོར། འབྲུག་ཡུལ་དང་རྒྱ་གར་གྱི་འབྲེལ་བ་སྔར་ལས་དམ་ཟབ་ཏུ་གཏོང་བའི་སྲིད་ཇུས་ཤིག་འཛིན་རྒྱུའི་རྣམ་པ་མངོན། ཕྱི་ཟླ་དང་པོའི་ཚེས་༢༢་ཉིན་རྒྱ་གར་གྱི་ཞིབ་འཇུག་རྟོག་ཞིབ་ཐེབས་རྩ་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་ཕྱི་ཚེས་༩་ཉིན་འབྲུག་ཡུལ་གྱི་མི་སེར་དམངས་གཙོ་ཚོགས་པར་འོས་བསྡུའི་རྒྱལ་ཁ་ཐོབ། དྲག་ཤོས་ཚེ་རིང་སྟོབས་རྒྱལ་གྱིས་འགོ་ཁྲིད་པའི་སྲིད་དོན་ཚོགས་པ་དེར་སླར་ཡང་འོས་བསྡུའི་རྒྱལ་ཁ་ཐོབ་པ་ནི་༢༠༠༨་ལོར་འབྲུག་ཡུལ་དུ་དམངས་གཙོའི་འོས་བསྡུ་བྱས་ནས་བཟུང་། ད་ལྟའི་བར་དུ་སྲིད་དོན་ཚོགས་པ་ཞིག་བསྐྱར་དུ་འདེམས་ཐོན་བྱུང་བ་ཐེངས་དང་པོ་ཡིན་ཞིང་། འབྲུག་ཡུལ་གྱི་དཔལ་འབྱོར་དཀའ་ངལ་དང་མི་སེར་དམངས་གཙོ་ཚོགས་པའི་སྔོན་མའི་གྲུབ་འབྲས་ཁག་ལ་གཞིགས་ནས་འབྲུག་པ་ཚོས་སྲིད་དོན་ཚོགས་པ་དེར་འོས་ཤོག་འཕངས་པ་འདྲ་ཞེས་འཁོད།།
འབྲུག་ཡུལ་ནི་རྒྱལ་ལྡན་དམངས་གཙོའི་རྒྱལ་ཁབ་ཅིག་ཡིན་པས་རྒྱ་གར་ལ་མཛའ་འབྲེལ་རྒྱུན་འཁྱོངས་དང་རྒྱ་གར་གྱི་ཁེ་ཕན་ལ་དོ་ཕོག་མ་ཐེབས་པར་རྒྱ་ནག་ལ་གྲོས་མོལ་བྱས་ནས་ས་མཚམས་ཀྱི་རྩོད་གཞི་རྣམས་ཐག་གཅོད་བྱ་རྒྱུའི་སྲིད་ཇུས་དེ་འབྲུག་གཞུང་གི་ཕྱི་སྲིད་ཀྱི་གྲུབ་ཆ་གཙོ་བོ་ཞིག་ཞིང་། འབྲུག་རྒྱལ་པོ་ནི་ཕྱི་སྲིད་ཀྱི་ལམ་སྟོན་པ་དང་དམག་དཔུང་སྤྱི་ཁྱབ་བཀོད་འདོམས་པ། ཁོང་ལ་འབྲུག་ཡུལ་གྱི་བདེ་འཇགས་དང་རྒྱལ་སྲུང་གི་ལས་དོན་རྣམས་ཐག་གཅོད་བྱེད་ཐུབ་པའི་དབང་ཚད་ལྡན། དེས་ན་འབྲུག་ཡུལ་གྱི་སྲིད་གཞུང་རིམ་པས་རྒྱ་ནག་ལ་འབྲེལ་བ་འཛིན་པའི་དུས་སུ་སྲིད་གཞུང་སྔོན་མ་ཁག་གི་སྲིད་ཇུས་རྣམས་རྒྱུན་འཁྱོངས་བྱས་པར་འགྱུར་བ་ཐེབས་དཀའ། འབྲུག་པའི་གྲོས་མོལ་གྱི་རྣམ་པ་དང་ཐབས་ཇུས་ལ་འགྱུར་བ་ཐེབས་ཀྱང་མཐར་ཐུག་གི་དམིགས་ཡུལ་ནི་ས་མཚམས་ཀྱི་རྩོད་གཞི་རྣམས་ཐག་གཅོད་ཐུབ་ཐབས་ལ་དམིགས་འདུག་ཅེས་རྩོམ་ཡིག་སྤེལ།།
ཕྱི་ལོ་༢༠༠༠་ཡས་མས་ནས་རྒྱ་ནག་གིས་འབྲུག་པའི་ས་ཐོག་ཏུ་སིམ་འཛུལ་བྱ་རྒྱུ་འགོ་ཚུགས། ༢༠༠༨་ནས་༢༠༡༣་བར་དུ་སྲིད་དབང་བཟུང་བའི་འབྲུག་ཡུལ་གྱི་སྲིད་བློན་འཇིགས་མེད་འཕྲིན་ལས་ནས་ནུབ་ཕྱོགས་ཀྱི་རྩོད་གཞི་ཆེ་བའི་ས་མཚམས་ཁག་ཏུ་རྒྱ་ནག་ལ་མཉམ་འབྲེལ་བྱས་ནས་ས་ཞིབ་བྱ་རྒྱུའི་མོས་མཐུན་བྱས་པ་དང་རྒྱ་ནག་ལ་ཕྱི་འབྲེལ་བཙུགས་ཏེ་དཔལ་འབྱོར་འཕེལ་རྒྱས་གཏོང་རྒྱུའི་རྣམ་འགྱུར་བསྟན། ༢༠༡༣་ནས་༢༠༡༨་བར་དུ་སྲིད་དབང་བཟུང་བའི་འབྲུག་ཡུལ་གྱི་སྲིད་བློན་ཚེ་རིང་སྟོབས་རྒྱལ་གྱིས་རྒྱ་ནག་ལ་ཕྱི་འབྲེལ་འཛུགས་རྒྱུ་མིན་རུང་༢༠༡༣་ནས་༢༠༡༦་བར་དུ་ལོ་ལྟར་རྒྱ་ནག་ལ་ས་མཚམས་ཀྱི་གྲོས་མོལ་བྱ་རྒྱུའི་སྲིད་ཇུས་ལག་ལེན་བསྟར། ༢༠༡༦་ལོར་རྒྱ་ནག་དང་འབྲུག་ཡུལ་གཉིས་ཀས་བྱང་ཕྱོགས་དང་ནུབ་ཕྱོགས་སུ་མཉམ་འབྲེལ་ས་ཞིབ་བྱས་ཀྱང་༢༠༡༧་ལོར་རྒྱ་ནག་གིས་འབྲོག་ལམ་ཁུལ་དུ་རྒྱ་ལམ་འཛུགས་སྐྲུན་བྱས་པས་རྒྱ་དཀར་ནག་གི་དམག་འཁྲུག་ལང་གྲབས་སུ་གྱུར་ནས་འབྲུག་ཡུལ་དང་རྒྱ་ནག་གི་གྲོས་མོལ་མཚམས་ཆད།།
༢༠༡༨་ནས་༢༠༢༣་བར་དུ་སྲིད་དབང་བཟུང་བའི་འབྲུག་ཡུལ་གྱི་སྲིད་བློན་བློ་གྲོས་ཚེ་རིང་གིས་རྒྱ་ནག་ལ་ས་མཚམས་ཀྱི་གྲོས་མོལ་སླར་གསོ་བྱས། ༢༠༢༠་ལོར་རྒྱ་དཀར་ནག་གི་དམག་དཔུང་ཁག་ཅིག་ཧིན་བོད་ས་མཚམས་ཀྱི་གྷལ་ཝན་ལུང་གཤོང་དུ་ལག་འཛིང་ཐུག རྒྱ་ནག་གིས་འབྲུག་ཡུལ་གྱི་སག་སྟེང་ཁུལ་གྱི་ས་ཆ་ཁག་ཅིག་གི་བདག་དབང་བརྩད། འབྲུག་གཞུང་གིས་ཕྱོགས་གཉིས་ཀྱི་མཁས་པའི་ཚོགས་ཆུང་གི་ཚོགས་འདུ་བསྐོངས་ནས་འུར་སྒྲོགས་མེད་པར་ས་མཚམས་ཀྱི་རྩོད་གཞི་རྣམས་ཐག་གཅོད་བྱེད་ཐུབ་པའི་ཐབས་ཇུས་བསྟེན། ༢༠༢༠་ལོར་འབྲུག་ཡུལ་དང་རྒྱ་ནག་གིས་གོམ་སྟབས་གསུམ་གྱི་ལམ་སྟོན་གྲོས་མཐུན་ཞེས་པ་ཞིག་ལ་མིང་རྟགས་བཀོད། ༢༠༢༣་ལོར་ཕྱོགས་གཉིས་ཀྱི་མཁས་པའི་ཚོགས་ཆུང་གི་ཚོགས་འདུ་ཐེངས་༡༡་པ་དང་༡༢་པ། ༡༣་པ་བཅས་ཚོགས་ཏེ་ཕྱོགས་གཉིས་ཀྱི་ས་མཚམས་གྲོས་མོལ་ཐེངས་༢༥་པ་བྱས་ཀྱང་འབྲུག་གཞུང་གིས་འབྲོག་ལམ་གྱི་བདག་དབང་དེར་ཟུར་དུ་གྲོས་མོལ་བྱ་དགོས། བོད་དང་འབྲུག་ཡུལ། འབྲས་ལྗོངས་གསུམ་འདྲེས་མཚམས་ཀྱི་ས་ཆ་དེའི་བདག་དབང་ཐོག་ཏུ་རྒྱ་གར་མཉམ་ཞུགས་མ་བྱས་པར་རྒྱ་ནག་ལ་གྲོས་མོལ་བྱ་རྒྱུ་མིན་པའི་ལངས་ཕྱོགས་བཟུང་བའི་གནས་ཚུལ་ཐོན་འདུག
རྒྱ་གར་གྱི་ཞིབ་འཇུག་རྟོག་ཞིབ་ཐེབས་རྩ་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ད་ལྟ་དྲག་ཤོས་ཚེ་རིང་སྟོབས་རྒྱལ་ཀྱིས་བསྐྱར་དུ་སྲིད་དབང་འཛིན་གྱི་ཡོད་ཀྱང་ཕྱོགས་གཉིས་ཀྱི་ས་མཚམས་གྲོས་མོལ་ལ་འགྱུར་བ་གཏོང་མི་སྲིད། ཁོ་པའི་སྲིད་གཞུང་གིས་སྲིད་གཞུང་སྔོན་མ་ལྟར་ས་མཚམས་ཀྱི་རྩོད་གཞི་རྣམས་འཕྲལ་དུ་ཐག་གཅོད་བྱེད་ཐུབ་པའི་ཤུགས་སྣོན་རྒྱག་ཤས་ཆེ། འབྲུག་ཡུལ་གྱི་སྲིད་གཞུང་གསར་པས་རྒྱ་ནག་ལ་ཕོག་ཐུག་གཏོང་རྒྱུར་འཛེམས་པ་དང་ས་མཚམས་ཀྱི་གྲོས་མོལ་ལ་འགལ་རྐྱེན་མི་འབྱུང་བའི་ཆེད་དུ་རྒྱ་ནག་ལ་ཕྱི་འབྲེལ་འཛུགས་དགོས་མིན་ཐད་སྔར་བཞིན་གླེང་སློང་བྱ་རྒྱུ་མིན་པར་སྣང་། འབྲུག་ཡུལ་གྱིས་རྒྱ་ནག་ལ་ཚོང་ལས་དང་དཔལ་འབྱོར་གྱི་འབྲེལ་བ་འཛིན་འདོད་ཡོད་པ་གསལ་པོ་རེད། འབྲུག་ཡུལ་གྱི་སྲིད་གཞུང་གསར་པས་རྒྱ་གར་ལ་ནང་མོལ་བྱས་ནས་རྒྱ་ནག་ལ་ས་མཚམས་ཀྱི་རྩོད་གཞི་ཁག་སེལ་ཐུབ་པའི་གྲོས་མོལ་བྱ་རྒྱུ་རེད་ཅེས་བཀྲལ།།
གཟའ་འཁོར་སྔོན་མར་ཁེ་ན་ཌའི་ཨེ་ཤི་ཡ་དང་ཞི་བདེ་རྒྱ་མཚོའི་ཐེབས་རྩ་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་ནི་འབྲུག་ཡུལ་གྱི་མཐུན་གྲོགས་རྒྱལ་ཁབ་གཙོ་བོ་དང་ཚོང་རོགས་ཨང་དང་པོ། འབྲུག་ཡུལ་དང་རྒྱ་གར་གྱིས་ཆིངས་ཡིག་བཞག་སྟེ་༡༩༤༩་ནས་༢༠༠༧་བར་དུ་འབྲུག་ཡུལ་གྱི་ཕྱི་སྲིད་ལ་ལམ་སྟོན་གྱི་འགན་ཁུར་བླངས། ད་ལོའི་ཕྱི་ཚེས་༩་ཉིན་འབྲུག་ཡུལ་གྱི་མི་སེར་དམངས་གཙོ་ཚོགས་པར་འོས་བསྡུའི་རྒྱལ་ཁ་ཐོབ། སྲིད་བློན་ཟུར་པ་བློ་གྲོས་ཚེ་རིང་གིས་རྒྱ་ནག་ལ་གྲོས་མོལ་བྱས་ནས་ཕྱི་འབྲེལ་འཛུགས་རྒྱུའི་སྐད་ཆ་བཤད་པར་རྒྱ་གར་དོགས་འདྲོག་ཆེན་པོ་ལངས། འབྲུག་མཉམ་རུབ་ཚོགས་པར་འོས་འདེམས་སྐབས་སུ་ཕམ་ཉེས་བྱུང་བའི་རྗེས་སུ་རྒྱ་གར་གྱི་ཉམས་ཞིབ་པ་ཚོ་བློ་བདེ་བག་ཕེབས་སུ་གྱུར། རྒྱ་ནག་གིས་གོ་ལའི་བདེ་འཇགས་ལས་གཞི་དང་གོ་ལའི་འཛུགས་སྐྲུན་ལས་གཞི་བརྒྱུད་ནས་འབྲུག་ཡུལ་ལ་རྒྱབ་སྐྱོར་བྱས་ཏེ་རྒྱ་གར་ལ་གནོན་ཤུགས་ཐེབས། འབྲུག་ཡུལ་གྱི་སྲིད་གཞུང་གསར་པས་རྒྱ་དཀར་ནག་གཉིས་ལ་འབྲེལ་བ་སྙོམས་པོ་ཞིག་འཛིན་རྒྱུ་གལ་གནད་ཆེ་ཟེར།།
༢༠༢༡་ལོར་འབྲུག་ཡུལ་དང་རྒྱ་ནག་གིས་མིང་རྟོགས་བཀོད་པའི་གོམ་སྟབས་གསུམ་གྱི་ལམ་སྟོན་གྲོས་མཐུན་ནང་དུ་ས་མཚམས་ཀྱི་རྩོད་གཞི་སེལ་རྒྱུའི་ཐག་བཅད། ༢༠༢༣་ལོར་དབྱིན་ཇིའི་ཆ་ཐམ་ཞིབ་འཇུག་ཁང་གིས་སྙན་ཐོ་བཏོན་པ་ལྟར་ན། རྒྱ་ནག་གིས་འབྲུག་ཡུལ་གྱི་བྱང་ཕྱོགས་སུ་གྲོང་ཚོ་གསར་པ་འཛུགས་སྐྲུན་བྱས་ནས་ས་ཆ་བཟུང་། ས་གནས་ས་ཐོག་ཏུ་ཁྱིམ་གཞིས་ཆགས་པའི་རྗེས་སུ་འབྲུག་གཞུང་གིས་ས་ཆ་དེ་དག་བློས་བཏང་ནས་རྒྱ་ནག་ལ་འགྲིག་མཐུན་བྱ་རྒྱུའི་རྩིས་བརྒྱབ། འབྲུག་ཡུལ་གྱིས་རྒྱ་ནག་ལ་ས་མཚམས་ཀྱི་རྩོད་གཞིའི་ཐོག་ཏུ་གུ་བཤངས་བྱས་ཚེ། རྒྱ་དཀར་ནག་གཉིས་ལ་ཧིན་བོད་ས་མཚམས་སུ་རྩོད་པ་ཡོད་པས་རྒྱ་གར་ལ་གཏམ་བཟང་ཞིག་མིན། འབྲུག་ཡུལ་དང་རྒྱ་ནག་གིས་ས་མཚམས་རྩོད་གཞི་ཇི་ལྟར་ཐག་གཅོད་བྱས་ཀྱང་རྒྱ་གར་ལ་ཕན་གནོད་ཀྱི་ཤུགས་རྐྱེན་ཐེབས་རྒྱུ་ཉག་གཅིག་རེད། འབྲུག་གཞུང་གིས་རྒྱ་གར་གྱི་འདོད་པ་ལྟར་ས་མཚམས་ཀྱི་རྩོད་གཞི་ཁག་ལ་གྲོས་མོལ་བྱ་དགོས་ཀྱང་རྒྱ་ནག་དེ་ལ་འཐད་པ་མེད་པའི་གནས་ཚུལ་ཐོན་འདུག
ཉེ་ཆར་ཕྱི་ཟླ་༡༢་པའི་ཚེས་༡༧་ཉིན་འབྲུག་ཡུལ་གྱི་རྒྱལ་སྟོན་དུས་ཆེན་ཐེངས་༡༡༦་པའི་ཐོག་ཏུ་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་གིས་དགེ་ལེགས་ཕུག་དཔལ་འབྱོར་དམིགས་བསལ་ས་ཁུལ་ཞིག་ཏུ་བསྒྱུར་རྒྱུ་ཡིན། ས་ཁྱོན་སྤྱི་ལེ་གྲུ་བཞི་མ་༡༠༠༠་ཡས་མས་ཤིག་གི་སྟེང་དུ་འབྲུག་ཡུལ་གྱི་སྐྱེ་ཁམས་དང་ཁོར་ཡུག་ལ་མི་གནོད་པ། ན་གཞོན་ཚོར་ལས་ཀའི་གོ་སྐབས་བསྐྲུན་ཐུབ་པ་ཞིག་འཛུགས་སྐྲུན་བྱ་རྒྱུ་ཡིན་ཞེས་གསལ་བསྒྲགས་སྤེལ། འབྲུག་ཡུལ་གྱི་ལྷོ་ཕྱོགས་དེར་རྒྱལ་སྤྱིའི་བཟོ་ཚོང་ལས་ཁུངས་ཁག་གིས་ནག་རྫས་དུད་རླངས་མེད་པའི་བཟོ་གྲྭ་འཛུགས་ཆོག་ཅིང་། ད་སྔ་ཁེ་ན་ཌ་དང་ཉི་ཧོང་གཉིས་མ་གཏོགས་འཛམ་གླིང་གི་བཟོ་ལས་ཡར་ཐོན་རྒྱལ་ཁབ་༧་གྱི་གཅིག་གིས་ཀྱང་འབྲུག་ཡུལ་དུ་མ་རྩ་བཙུགས་མི་འདུག་ཅེས་བསྒྲགས། དགེ་ལེགས་ཕུག་གི་དཔལ་འབྱོར་དམིགས་བསལ་ས་ཁུལ་དུ་རྒྱ་དཀར་ནག་གཉིས་ཀྱིས་མ་རྩ་བཙུགས། འབྲུག་ཡུལ་དང་རྒྱ་གར། རྒྱ་ནག་བཅས་ཕྱོགས་གསུམ་མཉམ་འབྲེལ་བྱེད་ཐུབ་པ་དང་ཐུན་མོང་གི་མཉམ་འབྲེལ་ཁོར་ཡུག་ཅིག་རྙེད་ཐུབ་པའི་རེ་བ་ཡོད་སྲིད་ཅེས་གནས་ཚུལ་ཐོན་འདུག
གླེང་སྟེགས།