༄༅།། ཉེ་ཆར་ཕྱི་ཟླ་༡༡་པའི་ཚེས་༣༠་ཉིན་འབྲུག་ཡུལ་དུ་རྒྱལ་ཡོངས་གྲོས་ཚོགས་ཀྱི་འཐུས་མིའི་སྔོན་འགྲོ་འོས་བསྡུ་བྱས་པའི་སྐབས་སུ་རྒྱ་ནག་ལ་ཕྱོགས་པའི་འབྲུག་ཡུལ་གྱི་སྲིད་བློན་ཟུར་པ་བློ་གྲོས་ཚེ་རིང་གིས་འགོ་ཁྲིད་པའི་འབྲུག་མཉམ་རུབ་ཚོགས་པར་ཕམ་ཉེས་ཆེན་པོ་བྱུང་བའི་གནས་ཚུལ་ཐོན་འདུག འོས་བསྡུའི་ཕྱི་ཉིན་དེར་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གཟའ་འཁོར་སྔོན་མའི་འོས་འདེམས་དུས་སུ་དྲག་ཤོས་ཚེ་རིང་སྟོབས་རྒྱལ་ལམ། ༢༠༡༣་ནས་༢༠༡༨་བར་དུ་སྲིད་བློན་གྱི་ལས་ཁུར་བཞེས་པའི་འབྲུག་ཡུལ་གྱི་སྲིད་བློན་ཟུར་པ་ཚེ་རིང་སྟོབས་ཀྱིས་འགོ་ཁྲིད་པའི་འབྲུག་མི་སེར་དམངས་གཙོ་ཚོགས་པར་འོས་ཤོག་བརྒྱ་ཆ་༤༢་ལྷག་དང་འབྲུག་རྟེན་འབྲེལ་ཚོགས་པར་འོས་ཤོག་བརྒྱ་ཆ་༡༩་ཐོབ། དེར་བརྟེན་འབྲུག་ཡུལ་རྒྱལ་ཁབ་ཆུང་ཆུང་དེའི་སྤྱི་ཡོངས་འོས་བསྡུ་རྒྱ་དཀར་ནག་གི་ས་ཁམས་ཆབ་སྲིད་ཀྱི་འཐབ་རྩོད་ལ་འགྱུར་བ་ཆེན་པོ་ཞིག་ཐེབས་པའི་རྒྱུ་རུ་འགྱུར་སྲིད་པའི་གནས་ཚུལ་ཐོན་འདུག
མི་སེར་དམངས་གཙོ་ཚོགས་པ་
༢༠༢༤་ལོའི་ཕྱི་ཟླ་དང་པོའི་ཚེས་༩་ཉིན་འབྲུག་ཡུལ་དུ་དངོས་གཞིའི་འོས་བསྡུ་བྱེད་ཀྱི་ཡོད་པས་འབྲུག་ཕུན་སུམ་ཚོགས་པ་དང་འབྲུག་མཐུན་འབྲེལ་ཚོགས་པ། འབྲུག་མཉམ་རུབ་ཚོགས་པ་གསུམ་དངོས་གཞིའི་འོས་བསྡུའི་ཁོངས་སུ་ཞུགས་མི་ཐུབ་པར་གྱུར། འབྲུག་ཡུལ་གྱི་མི་སེར་དམངས་གཙོ་ཚོགས་པ་དང་འབྲུག་བརྟེན་འབྲེལ་ཚོགས་པ་གཉིས་ཀྱི་སྲིད་བློན་འོས་མི་ཟུང་གིས་དངོས་གཞིའི་འོས་བསྡུར་འགྲན་སྡུར་བྱས་ནས་འབྲུག་པ་ཚོས་སྲིད་དོན་ཚོགས་པ་དེ་དག་གི་འོས་མི་གཉིས་ཀྱི་གང་རུང་ཞིག་ལ་འོས་ཤོག་འཕངས་ནས་སྲིད་བློན་གསར་པ་ཞིག་གདམ་དགོས། འབྲུག་ཡུལ་གྱི་འོས་བསྡུའི་ལམ་ལུགས་ནང་དུ་ཨང་གསུམ་པ་དང་བཞི་པ། ལྔ་པ་ཐོབ་པའི་སྲིད་དོན་ཚོགས་པ་ཁག་དངོས་གཞིའི་འོས་བསྡུར་འགྲན་ཞུགས་བྱེད་མི་ཆོག་པའི་ཐག་བཅད། འབྲུག་ཡུལ་དུ་གཞུང་འཛིན་ཚོགས་པ་གཅིག་དང་ཕྱོགས་འགལ་ཚོགས་པ་གཅིག་བཅས་སྲིད་དོན་ཚོགས་པ་གཉིས་ལས་མེད། སྲིད་དོན་ཚོགས་པ་ཁག་གིས་མཉམ་སྐྱོང་སྲིད་གཞུང་ཡང་འཛུགས་མི་ཆོག་པའི་གནས་ཚུལ་ཐོན་འདུག
འབྲུག་ཡུལ་གྱི་དམངས་གཙོའི་འོས་འདེམས་ཐེངས་བཞི་པ་ནི་འབྲུག་པའི་ཆབ་སྲིད་དང་སྲིད་གཞུང་འཕོ་འགྱུར་གྱི་གནས་ཚུལ་གལ་ཆེན་ཞིག་ཡིན་པ་ཁོ་ན་མིན་པར་རྒྱ་དཀར་ནག་གི་འཐབ་རྩོད་ལའང་འབྲེལ་བ་ཡོད་པའི་འོས་བསྡུ་ཞིག་ཡིན་ཞིང་། སྲིད་བློན་ཟུར་པ་བློ་གྲོས་ཚེ་རིང་གིས་རྒྱ་ནག་ལ་འབྲེལ་བ་བཙུགས་ཏེ་འབྲུག་བོད་ས་མཚམས་ཀྱི་རྩོད་གཞི་ཁག་སེལ་བར་གོམ་སྟོབས་གསུམ་གྱི་ལམ་སྟོན་གྲོས་མཐུན་ཞེས་པ་ཞིག་ལ་མིང་རྟགས་བཀོད། འབྲུག་ཡུལ་གྱི་རྒྱལ་ས་ཐིམ་ཕུག་ཏུ་རྒྱ་ནག་ལ་གཞུང་ཚབ་ཁང་འཛུགས་ཆོག་པའི་མོས་མཐུན་བྱས། གོམ་སྟབས་གསུམ་གྱི་ལམ་སྟོན་གྲོས་མཐུན་གྱི་ནང་དོན་ཞིབ་ཕྲ་འབྲུག་ཡུལ་གྱི་མཐུན་གྲོགས་གཙོ་བོ་རྒྱ་གར་ལའང་སྦས་གསང་བྱས་ནས་ལྡི་ལི་གསར་པར་དོགས་འདྲོག་ཆེན་པོ་ལངས། རྒྱ་གར་དང་འབྲུག་ཡུལ་གྱི་མཛའ་འབྲེལ་ལ་དོ་ཕོག་བྱུང་། འབྲུག་རྒྱལ་པོ་ལྡི་ལི་གསར་པར་ཐེངས་གཉིས་ཕེབས་ནས་རྒྱ་ནག་ལ་གྲོས་མོལ་བྱས་པའི་རྒྱུད་རིམ་ཁག་སྲིད་བློན་མོ་དྷིར་གསལ་བཀྲོལ་བྱ་དགོས་བྱུང་འདུག
རྒྱ་གར་ལ་འབྲེལ་བ་དམ་ཟབ་ཡོད་པའི་དྲག་ཤོས་ཚེ་རིང་སྟོབས་རྒྱལ་
ད་ལྟ་རྒྱ་གར་ལ་འབྲེལ་བ་དམ་ཟབ་ཡོད་པའི་དྲག་ཤོས་ཚེ་རིང་སྟོབས་རྒྱལ་འབྲུག་ཡུལ་གྱི་སྲིད་བློན་གསར་པར་འགྱུར་རྒྱུ་གཏན་ཁེལ་ཡོད་པས་ལྡི་ལི་གསར་པ་བློ་བདེ་བག་ཕེབས་སུ་གྱུར་པ་དང་རྒྱ་ནག་གིས་འབྲུག་པའི་སྲིད་གཞུང་གསར་པས་གོམས་སྟབས་གསུམ་གྱི་ལམ་སྟོན་གྲོས་མཐུན་ཁས་ལེན་བྱ་རྒྱུ་ཡིན་མིན། འབྲུག་ཡུལ་གྱི་རྒྱལ་ས་ཐིམ་ཕུག་ཏུ་རྒྱ་ནག་གི་གཞུང་ཚབ་ཁང་འཛུགས་རྒྱུའི་འཆར་གཞི་ཡོད་པ་འགྲུབ་རྒྱུ་ཡིན་མིན་བཅས་ལ་བློ་འཚབ་བྱེད་འགོ་ཚུགས། གལ་སྲིད་འབྲུག་ཡུལ་གྱི་རྒྱལ་ས་ཐིམ་ཕུག་ཏུ་རྒྱ་ནག་ལ་གཞུང་ཚབ་ཁང་སྒོ་འབྱེད་བྱེད་དུ་བཅུག་ཚེ། ལྷོ་ཨེ་ཤི་ཡར་རྒྱ་ནག་གི་ཤུགས་རྐྱེན་ཁྱབ་སྟེ་རྒྱ་གར་གྱི་ཤུགས་རྐྱེན་ཉམས། མ་འོངས་པར་འབྲུག་ཡུལ་ཡང་རྒྱ་ནག་གི་ཤུགས་རྐྱེན་འོག་ཏུ་ཚུད་ནས་བལ་ཡུལ་དང་པ་ཀི་སི་ཐན་ལྟར་དུ་འགྱུར་མི་སྲིད་པ་ཞིག་མིན་པའི་གནས་ཚུལ་ཐོན་འདུག
འབྲུག་ཡུལ་ལ་མི་འབོར་འབུམ་༨་ཡོད་པ་དེའི་ཁོངས་ཀྱི་མི་མང་འོས་ཤོག་འཕེན་མཁན་ཐོ་འགོད་བྱས་ཡོད་པ་འབུམ་༥་ཡས་མས་ཤིག་འདུག་ཅེས་གཞི་གྲངས་སུ་གསལ། སྔོན་འགྲོའི་འོས་བསྡུ་དེར་མི་གྲངས་བརྒྱ་ཆ་༦༣་གྱིས་ཤོག་འཕངས། སྲིད་བློན་ཟུར་པ་བློ་གྲོས་ཚོགས་རིང་གི་འབྲུག་མཉམ་རུབ་ཚོགས་པར་འོས་ཤོག་བརྒྱ་ཆ་༡༣་ལས་མ་ཐོབ། ཕྱི་ཟླ་༡༢་པའི་ཚེས་༢་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། ད་ལོའི་འོས་འདེམས་སྐབས་སུ་འབྲུག་ཡུལ་གྱི་སྲིད་དོན་ཚོགས་པ་ལྔའི་ཁོངས་ནས་བུད་མེད་༢༦་གྲོས་ཚོགས་འཐུས་མིར་ལངས་ཀྱང་བུད་མེད་༢༠་ཐམ་པ་དངོས་གཞིའི་འོས་བསྡུར་ཞུགས་མི་ཐུབ་པར་གྱུར་ཡོད་ཅིང་། གྲོས་ཚོགས་སྔོན་མའི་ནང་དུ་འབྲུག་མཉམ་རུབ་ཚོགས་པ་དང་འབྲུག་ཕུན་སུམ་ཚོགས་པ་གཉིས་ལ་བུད་མེད་འཐུས་མི་༧་དང་འབྲུག་མཐུན་འབྲེལ་ཚོགས་པར་འཐུས་མི་དྲུག འབྲུག་རྟེན་འབྲེལ་ཚོགས་པ་དང་མི་སེར་དམངས་གཙོ་ཚོགས་པར་འཐུས་མི་༣་རེ་བཅས་ཡོད་པའི་གནས་ཚུལ་ཐོན་འདུག
འབྲུག་ཡུལ་གྱི་རྒྱལ་ཡོངས་གྲོས་ཚོགས་ལ་གདན་གྲངས་༤༧་ཡོད་པ་དང་སྲིད་བློན་ཟུར་པ་བློ་གྲོས་ཚེ་རིང་གི་འབྲུག་མཉམ་རུབ་ཚོགས་པས་འཐུས་མི་༣༠་ཐམ་པའི་གདན་གྲངས་བཟུང། ཐེངས་འདིའི་སྔོན་འགྲོའི་འོས་བསྡུའི་སྐབས་སུ་གྲོས་ཚོགས་སྔོན་མའི་ཕྱོགས་འགལ་ཚོགས་པ་འབྲུག་ཕུམ་སུམ་ཚོགས་པ་ལའང་ཕམ་ཉེས་བྱུང་། སྲིད་དོན་ཚོགས་པ་དེའི་འགོ་ཁྲིད་དབང་འདུས་རྡོ་རྗེས་ང་ཚོར་ལོ་ལྔའི་རྗེས་སུ་འོས་བསྡུའི་རྒྱལ་ཁ་འཐོབ་རྒྱུའི་རེ་བ་ཡོད། ང་ཚོས་མ་འོངས་པར་སྲིད་གཞུང་འཛུགས་ཐུབ་པའམ། ཡང་ན་ཕྱོགས་འགལ་ཚོགས་པའི་གནས་བབ་འཛིན་ཐུབ་པའི་གྲ་སྒྲིག་བྱ་དགོས། ང་ཚོའི་སྲིད་དོན་ཚོགས་པར་འོས་ཤོག་བརྒྱ་ཆ་༡༤.༩་ཐོབ་པ་ནི་དགའ་འོས་པ་ཞིག་རེད་ཅེས་བསྒྲགས། སྲིད་བློན་ཟུར་པ་བློ་གྲོས་ཚེ་རིང་གིས་འོས་འདེམས་ཀྱི་གྲུབ་འབྲས་ལ་ངོས་ལེན་དང་འོས་ཤོག་མང་བ་ཐོབ་པའི་སྲིད་དོན་ཚོགས་པ་གཉིས་ལ་དངོས་གཞིའི་འོས་བསྡུའི་སྐབས་སུ་རྒྱལ་ཁ་འཐོབ་རྒྱུའི་རྟེན་འབྲེལ་ཞུས་པའི་གནས་ཚུལ་ཐོན་འདུག
མི་སེར་དམངས་གཙོ་ཚོགས་པ་
ཕྱི་ཟླ་༡༢་པའི་ཚེས་༤་ཉིན་རྒྱ་གར་གྱི་ཊེ་ལི་གྷ་རབ་ཚགས་པར་ལ་གནས་ཚུལ་ཐོན་པ་ལྟར་ན། སྲིད་བློན་ཟུར་པ་དྲག་ཤོས་ཚེ་རིང་སྟོབས་རྒྱལ་གྱི་མི་སེར་དམངས་གཙོ་ཚོགས་པར་འོས་བསྡུའི་རྒྱལ་ཁ་ཐོབ་པ་ནི་རྒྱ་གར་ལ་གཏམ་བཟང་ཞིག་རེད། ཉེ་ཆར་འབྲུག་ཡུལ་དང་རྒྱ་ནག་གིས་པེ་ཅིང་དུ་ས་མཚམས་གྲོས་མོལ་ཐེངས་༢༥་པ་བྱས་པར་མ་ཟད། རྒྱ་ནག་གིས་འབྲུག་ཡུལ་གྱི་སྐུ་ཚབ་ཚོར་ས་ཆ་ཁག་ཅིག་ཕན་ཚུན་བརྗེ་ལེན་བྱ་དགོས་པའི་གྲོས་གཞི་བཏོན། ས་ཆ་ཕར་སྤྲོད་ཚུར་ལེན་བྱ་རྒྱུ་དེ་དག་གི་གྲས་སུ་འབྲོག་ལམ་ཚུད་ཡོད་པ་དང་འབྲོག་ལམ་ནི་འབྲུག་པའི་མངའ་ཁོངས་སུ་གཏོགས། བྱ་དཀར་ལུང་དང་དཔག་བསམ་ལུང་ནི་རྒྱ་ནག་གི་དབང་བསྒྱུར་འོག་ཏུ་གཏོགས། རྒྱ་ནག་གིས་བྱ་དཀར་ལུང་དང་དཔག་བསམ་ལུང་གཉིས་འབྲུག་ཡུལ་ལ་སྤྲོད་ཆོག འབྲོག་ལམ་རྒྱ་ནག་ལ་སྤྲོད་དགོས་ཟེར། འབྲོག་ལམ་ནི་བོད་དང་འབྲས་ལྗོངས། འབྲུག་ཡུལ་གསུམ་གྱི་འདྲེས་མཚམས་སུ་ཆགས་འདུག་ཅེས་གནས་ཚུལ་སྤེལ།།
རྒྱ་གར་གྱི་བདེ་འཇགས་ཉམས་ཞིབ་པ་ཚོས་འབྲོག་ལམ་ནི་རྒྱ་གར་གྱི་ཤི་རི་གུ་རིའི་ཤུར་ལམ་ཕྲ་མོ་སྟེ། ཁྱིམ་བྱའི་སྐེ་དབྱིབས་ལྟར་གྱི་འགག་འཕྲང་དེར་བར་ཐག་ཧ་ཅང་ཉེ། གལ་སྲིད་རྒྱ་ནག་གིས་འབྲོག་ལམ་ནས་དམག་བརྒྱབ་སྟེ་ཤི་རི་གུ་རིའི་ཤུར་ལམ་ཕྲ་མོ་བཅད་ན་རྒྱ་གར་སྐམ་ས་ཆེན་མོ་དང་རྒྱ་གར་བྱང་ཤར་གྱི་མངའ་སྡེ་ཁག་གི་བར་མཚམས་གཅོད་ཐུབ། ༢༠༡༧་ལོར་རྒྱ་ནག་གིས་འབྲོག་ལམ་ཕྱོགས་སུ་རྒྱ་ལམ་ཞིག་འཛུགས་སྐྲུན་བྱས་པར་རྒྱ་གར་གྱིས་དམག་དྲངས་ནས་ཉི་མ་༧༣་ལ་རྒྱ་དཀར་ནག་གིས་དམག་འཁྲུག་རྒྱག་རྒྱུའི་གྲབས་བཤམས། འབྲུག་ཡུལ་གྱི་མི་སེར་དམངས་གཙོ་ཚོགས་པའི་འོས་མི་དྲག་ཤོས་ཚེ་རིང་སྟོབས་རྒྱལ་དང་རྒྱ་གར་གྱི་སྲིད་བློན་མོ་དྷི་གཉིས་ལ་དམིགས་བསལ་གྱི་འབྲེལ་བ་ཞིག་ཚུགས། ད་དུང་རྒྱ་གར་གྱི་བཟོ་ཚོང་ལས་ཁུངས་ཁག་དང་ཁེ་ལས་ཁག་གི་བདག་པོ་འབྱོར་ལྡན་པ་མུ་ཀེ་ཤ་ཨམ་བྷ་ཎི་དང་གོ་ཏམ་ཨ་དྷ་ཎི་སོགས་ཀྱང་དྲག་ཤོས་ཚེ་རིང་སྟོབས་རྒྱལ་ལ་འབྲེལ་བ་གང་ལེགས་ཚུགས་ཡོད་པའི་གནས་ཚུལ་ཐོན་འདུག