༄༅།། འབྲུག་ཡུལ་གྱི་དབུས་འོས་བསྡུ་ལྷན་ཁང་གིས་ཕྱི་ཟླ་༡༡་པའི་ཚེས་༣༠་ཉིན་འབྲུག་ཡུལ་གྱི་སྲིད་དོན་ཚོགས་པ་ཁག་གི་གྲོས་ཚོགས་འཐུས་མིའི་འོས་མི་རྣམས་འདེམས་བསྐོ་བྱ་དགོས། ༢༠༢༤་ལོའི་ཕྱི་ཟླ་དང་པོའི་ཚེས་༩་ཉིན་འབྲུག་ཡུལ་དུ་དམངས་གཙོའི་འོས་འདེམས་ཐེངས་བཞི་པ་བྱས་ཏེ་རྒྱལ་ཡོངས་གྲོས་ཚོགས་ཀྱི་འཐུས་མི་རྣམས་འོས་འདེམས་བྱ་དགོས་ཞེས་འོས་བསྡུའི་ཚེས་གྲངས་གཏན་འབེབས་བྱས་འདུག ཉེ་ཆར་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། འབྲུག་ཡུལ་གྱི་སྲིད་གཞུང་གི་ལས་དུས་རྫོགས་ཏེ་སྲིད་བློན་བློ་གྲོས་ཚེ་རིང་གིས་དགོངས་པ་ཞུས། ཟླ་བ་འདིའི་ཚེས་༡་ཉིན་འབྲུག་རྒྱལ་པོ་འཇིགས་མེད་གེ་སར་རྣམ་རྒྱལ་དབང་ཕྱུག་གིས་རྒྱལ་ཁབ་དེའི་ཆེས་མཐོའི་ཁྲིམས་ཞིབ་པ་ཆོས་རྒྱལ་དར་སྒོ་རིག་འཛིན་གྱི་འགོ་ཁྲིད་འོག ཚོགས་མི་༩་ཡོད་པའི་བར་བརྒལ་སྲིད་གཞུང་ཞིག་བསྐོ་བཞག་གནང་ནས་འབྲུག་ཡུལ་གྱི་སྤྱི་ཡོངས་འོས་འདེམས་ཡག་པོ་ཞིག་འབྱུང་ཐུབ་པའི་ལས་འགན་བསྒྲུབ་དགོས་ཞེས་བཀའ་ཕབ་ཡོད་པའི་གནས་ཚུལ་ཐོན་འདུག
འབྲུག་ཕུན་སུམ་ཚོགས་པ།
ད་ལྟ་འབྲུག་ཡུལ་གྱི་སྲིད་དོན་ཚོགས་པ་ལྔས་སྤྱི་ཡོངས་འོས་བསྡུར་གྲ་སྒྲིག་དང་སྲིད་དོན་ཚོགས་པ་སོ་སོའི་རྩ་འཛིན་ཡིག་ཆ་རྣམས་ཕྱིར་བསྒྲགས་བྱས་ནས་མི་དམངས་ལ་འོས་བསྡུའི་དྲིལ་བསྒྲགས་ལས་འགུལ་སྤེལ་གྱི་ཡོད་པ་སྟེ། ཕྱི་ཟླ་༡༡་པའི་ཚེས་༡༣་ཉིན་འབྲུག་ཡུལ་གྱི་ཀུན་གསལ་གསར་ཁང་གིས་གནས་ཚུལ་སྤེལ་བ་ལྟར་ན། འབྲུག་ཕུན་སུམ་ཚོགས་པས་མ་འོངས་པའི་ལོ་ལྔའི་ནང་དུ་དཔལ་འབྱོར་འཕེལ་རྒྱས་བརྒྱ་ཆ་༨་གཏོང་རྒྱུ་ཡིན། འབྲུག་ཡུལ་གྱི་ཞི་བདེ་དང་བདེ་འཇགས། རྒྱལ་ཁབ་ཀྱི་བདག་དབང་སྲུང་སྐྱོབ། འདྲ་མཉམ་དང་དྲང་བདེན་གཙིགས་སུ་འཛིན་རྒྱུ་ཡིན། རྒྱལ་ཁབ་ཀྱི་དཔལ་འབྱོར་འཕེལ་རྒྱས་གཏོང་བར་སྒེར་གྱི་ཚོང་ལས་ཁག་ཡར་རྒྱས་བཏང་སྟེ་དཔྱ་ཁྲལ་ལམ་ལུགས་ལེགས་བཅོས་གཏོང་རྒྱུ་ཡིན། འབྲུག་སུམ་ཚོགས་པར་འོས་བསྡུའི་རྒྱལ་ཁ་ཐོབ་ན་ཆུ་ཤུགས་གློག་ཁང་ཆེན་པོ་གསུམ་གསར་དུ་འཛུགས་སྐྲུན་བྱ་རྒྱུ་དང་ཕུ་ན་གཙང་པོའི་ཆུ་ཤུགས་གློག་ཁང་མྱུར་དུ་ལེགས་འགྲུབ་འབྱུང་དུ་འཇུག་རྒྱུ་ཡིན་ཞེས་འབྲུག་ཡུལ་གྱི་ཞིང་ལས་དང་ཤེས་ཡོན་སློབ་གསོ། འཕྲོད་བསྟེན་དང་མི་འབོར། སྲི་ཞུ་དང་ཁོར་ཡུག སྤྱི་ཚོགས་ཡར་རྒྱས་ཇི་ལྟར་གཏོང་རྒྱུ་ཡིན་མིན་གྱི་འཆར་གཞི་རྣམས་ཕྱིར་བསྒྲགས་བྱས་འདུག
བྷུ་ཊཱན་རྟེན་འབྲེལ་ཚོགས་པ།
འབྲུག་རྟེན་འབྲེལ་ཚོགས་པས་རྩ་འཛིན་ཡིག་ཆ་ཤོག་གྲངས་༦༣་ཅན་ཞིག་འགྲེམ་སྤེལ་བྱས་ཡོད་པ་དེའི་ནང་དུ་སྲིད་དོན་ཚོགས་པ་དེར་འོས་བསྡུའི་རྒྱལ་ཁ་ཐོབ་ན་རྒེད་འོག་ཚང་མའི་ནང་དུ་མི་དམངས་ལ་ཞབས་ཏོག་སྡེ་པ་རེ་བཙུགས་ནས་ལས་དོན་ཐམས་ཅད་འཐུས་ཤོར་མེད་པར་བསྒྲུབ་རྒྱུ་ཡིན་པར་མ་ཟད། མ་འོངས་པའི་ལོ་ལྔའི་ནང་དུ་གཞུང་གི་སྲི་ཞུ་བའི་ནུས་པ་ལྡབ་འགྱུར་ཞིག་ཡར་རྒྱས་གཏོང་རྒྱུ་ཡིན། འབྲུག་རྟེན་འབྲེལ་ཚོགས་པའི་ལས་དོན་གཙོ་བོ་ནི་འབྲུག་ཡུལ་གྱི་ཁོར་ཡུག་སྲུང་སྐྱོབ་དང་གློག་གི་རླངས་འཁོར་དར་ཁྱབ་གཏོང་རྒྱུ། རྒྱལ་ལམ་གང་སར་གློག་གི་རླངས་འཁོར་ལ་གློག་ཤུགས་སྣོན་གསོག་བྱ་ཡུལ་འཛུགས་སྐྲུན་བྱ་རྒྱུ་ཡིན། མི་མང་གི་སློབ་ཤེས་ཡོན་གསོ་ཡར་རྒྱས་བཏང་སྟེ་ལས་ཀའི་གོ་སྐབས་གསར་པ་བསྐྲུན་རྒྱུ། ༢༠༢༩་ཡི་ལོ་མཇུག་བར་དུ་མི་དམངས་ཀྱི་ཡོང་འབབ་དངུལ་ཊམ་༤༠༦༡༣༤་ནས་ས་ཡ་༣་བར་དུ་ལྡབ་༧་མང་དུ་གཏོང་རྒྱུ་ཡིན། ༢༠༢༢་ལོར་འབྲུག་གཞུང་གིས་འགྲུལ་ཁྲལ་ཆེན་པོ་བསྡུ་རྒྱུའི་ཐག་གཅོད་བྱས་པར་བསྐྱར་ཞིབ་བྱ་འཆར་ཡོད་ཅེས་གསལ་བསྒྲགས་སྤེལ་འདུག
འབྲུག་མཉམ་རུབ་ཚོགས་པ།
འབྲུག་མཉམ་རུབ་ཚོགས་པའི་རྩ་འཛིན་ཡིག་ཆའི་ནང་དུ་ཆབ་སྲིད་ཀྱི་ཁེ་ཕན་རྣམས་ཟུར་དུ་བཞག་སྟེ་རྒྱལ་ཁབ་ཀྱི་ཁེ་ཕན་ཨང་དང་པོ་འཛིན་རྒྱུ་ཡིན། སྲིད་དོན་ཚོགས་པ་དེར་འོས་བསྡུའི་རྒྱལ་ཁ་ཐོབ་ན་༢༠༣༤་ཡི་མཚམས་སུ་འབྲུག་ཡུལ་ནི་བདེ་འཇགས་དང་ཡར་རྒྱས། གཅིག་སྒྲིལ་དང་བདེ་ཐང་། རང་ཁ་རང་གསོ་ཐུབ་པའི་ཡར་ཐོན་རྒྱལ་ཁབ་ཅིག་ཏུ་བསྒྱུར་རྒྱུ་ཡིན། སྲིད་དོན་ཚོགས་པ་དེའི་འཆར་གཞི་རྣམས་འགྲུབ་པར་སྔོན་ལ་མི་དམངས་ཀྱི་འཕྲོད་བསྟེན་དང་ཤེས་ཡོན་སློབ་གསོ། རྒྱལ་ཁབ་ཀྱི་དཔལ་འབྱོར། ཞིང་ལས་ཡར་རྒྱས་བཏང་སྟེ་གནམ་གཤིས་འགྱུར་ལྡོག་བཀག་འགོག རྒྱལ་ཁབ་ཀྱི་རྨང་གཞིའི་མཐུན་རྐྱེན་འཛུགས་སྐྲུན་བྱས་ནས་ས་གནས་སྲིད་གཞུང་ཁག་ལ་དབང་ཚད་ཆེ་རུ་གཏོང་རྒྱུ་ཡིན། ༢༠༢༩་ཡས་མས་སུ་འབྲུག་ཡུལ་དུ་མངལ་སྐེའི་འབྲས་ནད་མེད་པར་གཏོང་རྒྱུ་དང་བྱིས་པ་རེར་དངུལ་ཊམ་༡༥༠༠་རེ་རོགས་དངུལ་སྤྲོད་ཀྱི་ཡོད་པ་༢༠༤༠་ལ་སྤར་རྒྱུ། ལོ་རེར་འབྲུག་ཡུལ་གྱི་ཞིང་ལས་ཐོན་སྐྱེད་བརྒྱ་ཆ་༧་ནས་༨་ཙམ་འཕེལ་རྒྱས་གཏོང་རྒྱུ་ཡིན་ཞེས་ཁས་ལེན་བྱས་འདུག
འབྲུག་མཐུན་འབྲེལ་ཚོགས་པ།
འབྲུག་མཐུན་སྒྲིལ་ཚོགས་པའི་རྩ་འཛིན་ཡིག་ཆའི་ནང་དུ་སྲིད་དོན་ཚོགས་པ་དེར་འོས་བསྡུའི་རྒྱལ་ཁབ་ཐོབ་ན་སྤྱི་ཚོགས་དང་དཔལ་འབྱོར། རྒྱལ་ཡོངས་ཀྱི་རྣམ་པ་བཅས་ལ་འགྱུར་བ་གཏོང་རྒྱུ་ཡིན། རྒྱལ་ཁབ་ཀྱི་དཔལ་འབྱོར་ཨང་དང་པོར་འཛིན་རྒྱུ། ཞིང་ལས་དང་ཡུལ་སྐོར་སྤྲོ་འཆམ་ཨང་གཉིས་པར་འཛིན་རྒྱུ་ཡིན། སྤྱི་ཚོགས་ཡར་རྒྱས་དང་བདེ་འཇགས་སྲུང་སྐྱོབ། སྲིད་གཞུང་གི་འཛིན་སྐྱོང་ལམ་ལུགས་ལེགས་བཅོས་གཏོང་རྒྱུ་ཡིན། ༢༠༢༨་ཡས་མས་སུ་འབྲུག་ཡུལ་གྱི་གཏེར་ཁའི་ཡོང་འབབ་དངུལ་ཊམ་དུང་ཕྱུར་༡༥༠་ཐམ་པ་མང་དུ་བཏང་སྟེ་མི་ལས་༢༠༠༠་ལ་ལས་ཀ་གསར་པ་བཀོད་སྒྲིག་བྱ་རྒྱུ་ཡིན། རྒྱལ་ཡོངས་སུ་རྒྱ་ལམ་འཛུགས་སྐྲུན་བྱས་ནས་ནམ་ཟླ་བཞིར་ས་ཞིང་འདེབས་ལས་བྱེད་ཐུབ་པའི་མཐུན་རྐྱེན་བསྒྲུབ་རྒྱུ། སློབ་ཕྲུག་ཚོར་སློབ་ཡོན་དང་བཟའ་བཏུང་སྤྲད་ནས་སྤྱི་ཚོགས་ཡར་རྒྱས། རྒྱལ་ཁབ་འཛིན་སྐྱོང་གི་འཆར་གཞི་རྣམས་ལག་ལེན་བསྟར་ནས་གྲུབ་འབྲས་ཐོན་དུ་འཇུག་རྒྱུ་ཡིན། གཞུང་གྲོན་ཆུད་ཟོས་སུ་གཏོང་གི་ཡོད་པ་རྣམས་མེད་པར་གཏོང་རྒྱུ་ཡིན་ཞེས་ཁས་ལེན་བྱས་འདུག
མི་སེར་དམངས་གཙོའི་ཚོགས་པ།
འབྲུག་མི་མང་དམངས་གཙོ་ཚོགས་པས་རྩ་འཛིན་ཡིག་ཆ་ཤོག་གྲངས་༡༣༧་ཅན་ཞིག་བཀྲམ་ཡོད་པ་དེའི་ནང་དུ་སྲིད་དོན་ཚོགས་པ་དེར་འོས་བསྡུའི་རྒྱལ་ཁ་ཐོབ་ཚེ། ཕུན་ཚོགས་གླིང་གི་འཛུལ་སྒོ་ནས་འབྲུག་པ་ཚོས་འཛུལ་ཡོན་སྤྲོད་དགོས་པ་ཆག་ཡང་གཏོང་རྒྱུ་ཡིན། འབྲུག་ཡུལ་དུ་དཔལ་འབྱོར་ཡར་རྒྱས་ཚོགས་ཆུང་ཞིག་བཙུགས་ནས་དངུལ་ཊམ་དུང་ཕྱུར་༡༥༠་ཐམ་པ་དཔལ་འབྱོར་སླར་གསོར་འགྲོ་གྲོན་གཏོང་རྒྱུ་ཡིན། འཆར་གཞི་དེ་སྲིད་གཞུང་འཛིན་སྐྱོང་གི་ཉིན་དང་པོ་ནས་ལག་ལེན་བསྟར་འཆར་ཡོད། འབྲུག་ཡུལ་དུ་ལོ་ལྟར་ཡུལ་སྐོར་སྤྲོ་འཆམ་པ་འབུམ་༣་ཙམ་ཡོང་དུ་འཇུག་རྒྱུ་ཡིན། འབྲུག་ཡུལ་གྱི་མཐའ་མཚམས་གྲོང་རྡལ་ཁག་ཏུ་ཡུལ་སྐོར་སྤྲོ་འཆམ་པ་གཏོང་རྒྱུའི་བསམ་ཞིབ་བྱེད་ཀྱི་ཡོད། རྒྱལ་ཁབ་ཀྱི་སྤྱི་ཡོངས་དཔལ་འབྱོར་ཐོན་སྐྱེད་དངུལ་ཊམ་དུང་ཕྱུར་༢༥་ནས་དུང་ཕྱུར་༥༠་ལ་འཕེལ་རྒྱས་བཏང་སྟེ་འབྲུག་པ་མི་དམངས་ཀྱི་ལོ་རེའི་ཆ་མཉམ་ཡོང་འབབ་ཨ་སྒོར་༣༤༠༠་ནས་ཨ་སྒོར་༡༢༠༠༠་ལ་མང་དུ་གཏོང་རྒྱུ་ཡིན་ཞེས་ཁས་ལེན་བྱས་འདུག
འབྲུག་ཡུལ་གྱི་སྲིད་དོན་ཚོགས་པ་ཁག་གིས་ཕྱིར་བསྒྲགས་བྱས་པའི་རྩ་འཛིན་ཡིག་ཆ་ཁག་ཏུ་འབྲུག་ཡུལ་གྱི་ཆབ་སྲིད་ལམ་ལུགས་དམངས་གཙོར་བསྒྱུར་རྒྱུ་ཤུགས་ཆེ་རུ་ཇི་ལྟར་གཏོང་རྒྱུ་ཡིན་མིན། འབྲུག་ཡུལ་གྱི་སྲིད་གཞུང་སྔོན་མས་རྒྱ་ནག་ལ་ས་མཚམས་ཀྱི་གྲོས་མོལ་བྱས་ནས་ཕྱི་འབྲེལ་འཛུགས་རྒྱུའི་འདོད་པ་ཡོད་པའི་གྲོས་མོལ་བྱས་པ་སྲིད་གཞུང་རྗེས་མས་རྒྱུན་འཁྱོངས་བྱ་རྒྱུ་ཡིན་མིན། སྲིད་བློ་ཟུར་པ་བློ་གྲོས་ཚེ་རིང་གིས་རྒྱ་ནག་ལ་འབྲེལ་བ་ཡག་ཏུ་བཏང་སྟེ་འབྲུག་ཡུལ་དང་རྒྱ་གར་གྱི་འབྲེལ་བར་དོ་ཕོག་སོང་། རྒྱ་ནག་དང་འབྲུག་ཡུལ་གྱི་གྲོས་མོལ་ཁག་ལ་རྒྱ་གར་དོགས་འདྲོག་ཆེན་པོ་ལངས་ཡོད་པ་ཇི་ལྟར་སེལ་རྒྱུ་ཡིན་མིན། འབྲུག་པའི་ན་གཞོན་དང་ཤེས་ཡོན་ཅན་རྣམས་ཨོ་གླིང་སོགས་རྒྱལ་ཁབ་གཞན་ལ་སྤོས་ནས་རྒྱལ་ནང་དུ་དགེ་རྒན་དང་སྲི་ཞུ་བ་མེད་པའི་དཀའ་ངལ་ཆེན་པོ་འཕྲད་བཞིན་པ་ཇི་ལྟར་སེལ་རྒྱུ་ཡིན་མིན་ཐད་གསལ་བཀྲོལ་ཞིབ་ཕྲ་ཞིག་མ་བྱུང་། ༢༠༠༨་ལོར་འབྲུག་ཡུལ་དུ་དམངས་གཙོའི་འོས་འདེམས་ཐེངས་དང་པོ་བྱུང་། མི་འབོར་འབུམ་༨་ཡོད་པའི་འབྲུག་ཡུལ་གྱི་རྒྱལ་ཡོངས་གྲོས་ཚོགས་ལ་གདན་གྲངས་༤༧་ཡོད་པ་དེར་ལོ་ལྔའི་རེའི་མཚམས་སུ་འོས་འདེམས་བྱེད་ཀྱི་ཡོད་ཅིང་། འབྲུག་ཡུལ་དུ་འོས་འདེམས་བྱས་ནས་ཟླ་བ་༣་གྱི་ནང་ཚུད་དུ་སྲིད་གཞུང་གསར་པས་རྒྱལ་ཁབ་འཛིན་སྐྱོང་བྱ་དགོས་པའི་གནས་ཚུལ་ཐོན་འདུག