༄༅།། ཨུ་རུ་སུའི་སྲིད་འཛིན་ཕུ་ཊིན་གྱིས་མིའི་ཚེ་སྲོག་ལ་རིན་ཐང་མ་བརྩིས་པར་ཡུཀ་རེན་ལ་བཙན་འཛུལ་བྱ་དགོས་ཞེས་དམག་འཁྲུག་བསླངས། འདས་པའི་ཟླ་བ་གཉིས་མ་ཟིན་ཙམ་གྱི་རིང་དེར་ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་དམག་མི་ཁྲི་ཚོ་༢་ཡས་མས་ཤིག་བསད་པའི་རྗེས་སུ་ཕུ་ཊིན་གྱིས་གློ་བུར་དུ་མིའི་ཚེ་སྲོག་ལ་རིན་ཐང་བརྩི་རྒྱུ་ཤེས་ཡོད་པ་འདྲ་ཞེས་གནས་ཚུལ་བཀོད་འདུག ཕྱི་ཟླ་༤་པའི་ཚེས་༢༡་ཉིན་ཌེ་ལི་བྷི་སི་ཊི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ཕུར་བུའི་ཉིན་ཕུ་ཊིན་གྱིས་ཨུ་རུ་སུའི་རྒྱལ་སྲུང་བློན་ཆེན་ཤོ་གུ་ལ་ཡུཀ་རེན་གྱི་མ་རི་ཨུ་པུལ་གྲོང་ཁྱེར་གྱི་དྭངས་ལྕགས་བཟོ་གྲྭ་དེར་དཔུང་འཇུག་བྱ་རྒྱུ་མཚམས་འཇོག་བྱོས། ངས་དཔུང་འཇུག་བྱ་རྒྱུ་མཚམས་འཇོག་བྱོས་ཟེར་དོན་ནི་མིའི་ཚེ་སྲོག་ལ་བསམ་བློ་བཏང་བ་ཡིན། ང་ཚོས་གནས་སྟངས་གང་འདྲ་ཞིག་ཡིན་རུང་དེ་ལ་མནོ་བསམ་ཞིབ་ཕྲ་གཏོང་དགོས། ལྷག་པར་དུ་ད་ལྟའི་གནས་སྟངས་འོག་ཏུ་དཔུང་འཇུག་བྱ་རྒྱུ་དེར་བསམ་ཞིབ་ནན་ཏན་བྱ་དགོས་པ་ཞིག་རེད། ང་ཚོའི་དམག་དང་དམག་དཔོན་ཚོའི་ཚེ་སྲོག་དང་བདེ་ཐང་གཉིས་གཙིགས་སུ་འཛིན་དགོས། བཟོ་ལས་ས་ཁུལ་དེ་མཐའ་བསྐོར་ནས་སྦྲང་འབུ་ཞིག་ཀྱང་ཐར་ས་མེད། བཟོ་གྲྭ་དེར་བཙན་ཐབས་ཀྱིས་དཔུང་འཇུག་བྱེད་དགོས་དོན་མི་འདུག་ཅེས་བཀའ་ཕབ། ཡུཀ་རེན་གྱི་འཐབ་མོ་བ་སྟོང་ཕྲག་གཉིས་ལྷག་གིས་ཉི་མ་༥༨་ཀྱི་རིང་དུ་ཨུ་རུ་སུའི་དམག་ལ་འགོག་རྒོལ་བྱས་ནས་མགོ་སྒུར་གྱི་མེད་ཅིང་། ཨུ་རུ་སུའི་རྒྱལ་སྲུང་ལྷན་ཁང་གིས་མ་རི་ཨུ་པུལ་གྲོང་ཁྱེར་གྱི་དྭངས་ལྕགས་བཟོ་གྲྭ་དེར་སྐུང་ཡོད་པའི་ཡུཀ་རེན་གྱི་འཐབ་མོ་བ་ཚོས་མགོ་སྒུར་པའམ། ཡང་ན་གཏོར་རྒོལ་བྱས་ནས་གསོད་རྒྱུ་ཡིན་ཞེས་ཐ་ཚིག་ཐེངས་འགའ་ཞིག་བསྒྲགས། ཡུཀ་རེན་གྱི་འཐབ་མོ་བ་ཚོས་ཨུ་རུ་སུའི་ཐ་ཚིག་གི་དུས་བཀག་དེ་ཚོར་སྣང་མེད་བཏང་ནས་མགོ་མ་སྒུར།།
གཟའ་ཕུར་བུའི་ཉིན་ཡུཀ་རེན་གྱི་གཞུང་གིས་མ་རི་ཨུ་པུལ་གྲོང་ཁྱེར་དུ་བཀག་ཡོད་པའི་ཡུཀ་རེན་གྱི་མི་དམངས་རྣམས་ཉེན་གཡོལ་དུ་འགྲོ་རུ་འཇུག་དགོས། ཨུ་རུ་སུའི་བཟུང་དམག་རྣམས་དང་མ་རི་ཨུ་པུལ་གྲོང་གི་དྭངས་ལྕགས་བཟོ་གྲྭ་དེར་སྐུང་ཡོད་པའི་ཡུཀ་རེན་གྱི་འཐབ་མོ་བ་རྣམས་བརྗེ་རེས་བྱ་དགོས་པའི་གྲོས་གཞི་བཏོན། ཕུ་ཊིན་གྱིས་རྒྱལ་སྲུང་བློན་ཆེན་ཤོ་གུ་ལ་མ་རི་ཨུ་པུལ་གྲོང་ཁྱེར་བཅིངས་འགྲོལ་བཏང་བར་རྟེན་འབྲེལ་ཞུས། འོན་ཀྱང་ཨུ་རུ་སུའི་དམག་གིས་གྲོང་ཁྱེར་དེར་ཉིན་མཚན་མེད་པར་གཏོར་རྒོལ་བྱས་ནས་གྱང་རོ་དང་མི་བསད་པའི་ཕུང་པོ་ལས་ཅི་ཡང་མ་ལུས། སྲིད་དོན་ཉམས་ཞིབ་པ་ཚོས་ཕུ་ཊིན་གྱིས་མ་རི་ཨུ་པུལ་དྭངས་ལྕགས་བཟོ་གྲྭ་དེར་དཔུང་འཇུག་བྱ་རྒྱུ་མཚམས་འཇོག་བྱེད་དགོས་པའི་བཀའ་བཏང་བ་ནི་ཨུ་རུ་སུའི་དམག་ལ་བསད་རྨས་ཚབས་ཆེན་ཕོག རྒྱལ་ནང་དུ་དམག་འཁྲུག་ལ་ངོ་རྒོལ་བྱས་ནས་ཕུ་ཊིན་ལ་གནོན་ཤུགས་ཆེན་པོ་ཐེབས་ཀྱི་ཡོད་པའི་རྟགས་མཚན་རེད། ཕུ་ཊིན་ད་གཟོད་འཕྲུལ་སྣང་གི་ཀློང་ནས་གཉིད་སད་ནས་དོན་དངོས་ལ་བལྟ་ཐུབ་པ་ཞིག་ཏུ་འགྱུར་གྱི་ཡོད་པ་ཡིན་སྲིད་ཅེས་གླེང་། དཔེར་ན་བདུན་ཕྲག་སྔོན་མར་གཏོར་རྒོལ་ཕོག་སྟེ་མཚོ་ནང་དུ་ཐིམ་པའི་ཨུ་རུ་སུའི་དམག་གྲུ་མོ་སི་ཀ་བྷ་ཞེས་པ་དེའི་ནང་དུ་དམག་མི་༥༠༠་ཡོད་ཀྱང་མི་༡༠༠་ཡས་མས་ཤིག་བསྐྱབས། དམག་གྲུ་དེའི་ནང་གི་མཚོ་དམག་ལྷག་མ་རྣམས་འཆི་གསོན་ཅི་ཡིན་ཨུ་རུ་སུའི་གཞུང་གིས་གསལ་བཀྲོལ་བྱེད་ཀྱི་མེད་པས་དམག་མི་དེ་དག་གི་ཕ་མ་སྤུན་མཆེད་དང་བཟའ་ཟླ་སོགས་ཀྱིས་ཕུ་ཊིན་ལ་སྐྱོན་བརྗོད་དྲག་པོ་བྱས་ནས་ངོ་རྒོལ་བྱེད་ཀྱི་ཡོད་པའི་གནས་ཚུལ་ཐོན། ད་ལྟའི་བར་དུ་ཨུ་རུ་སུའི་གཞུང་གིས་ཡུཀ་རེན་གྱི་མི་དམངས་རྣམས་བཅིངས་འགྲོལ་གཏོང་གི་ཡོད། ཡུཀ་རེན་གྱི་གཞུང་གིས་རྒྱལ་ཁབ་དེའི་ཤར་ཕྱོགས་ཀྱི་ཨུ་རུ་སུའི་མི་རིགས་རྩ་མེད་གཏོང་གི་འདུག་ཅེས་དྲིལ་བསྒྲགས་ལོག་པ་བྱས་པར་མི་དམངས་རྣམས་ཡིད་ཆེས། ཡིན་ནའང་རིམ་བཞིན་ཨུ་རུ་སུའི་དམག་མི་ཚོར་སྲོག་སྐྱོན་འཕོག་རྒྱུ་ཇེ་མང་དང་ཡུཀ་རེན་ལ་བཙན་འཛུལ་བྱེད་ཀྱི་ཡོད་པ་ཤེས་རྟོགས་བྱུང་སྟེ་རྫུན་སྒྲོགས་སྲིད་ཇུས་དེས་ཁུངས་འཁྱོལ་གྱི་མེད་པའི་གནས་ཚུལ་ཐོན་འདུག
ཕྱི་ཟླ་༤་པའི་ཚེས་༢༡་ཉིན་ཨ་རིའི་གཟའ་འཁོར་གསར་འགྱུར་དུས་དེབ་ལ་གནས་ཚུལ་ཐོན་པ་ལྟར་ན། ཨུ་རུ་སུའི་དབང་བསྒྱུར་འོག་ཏུ་ཚུད་ཟིན་པའི་ས་གནས་རེ་ཟུང་ལ་ཨུ་རུ་སུ་དམར་ཤོག་གི་རྒྱལ་དར་བཙུགས། ལེ་ནིན་གྱི་རྡོ་སྐུ་བསླངས་ནས་ཨུ་རུ་སུའི་དམར་ཤོག་བཙན་རྒྱལ་སླར་གསོ་བྱེད་ཀྱི་ཡོད་པའི་རྣམ་པ་ཞིག་ཐོན། ཡུཀ་རེན་གྱི་ཁར་སན་མངའ་ཁུལ་ནི་དམག་འཁྲུག་གི་མགོ་སྟོད་ནས་ཨུ་རུ་སུའི་དབང་བསྒྱུར་འོག་ཏུ་ཚུད། དེང་སྐབས་ཨུ་རུ་སུའི་གཞུང་གིས་ཁར་སན་མངའ་ཁུལ་ལ་མི་དམངས་སྤྱི་མཐུན་རྒྱལ་ཁབ་ཟེར་པ་ཞིག་འཛུགས་རྒྱུའི་སྟ་གོན་ཚུགས། ཡུཀ་རེན་གྱི་འཐབ་མོ་བ་ཚོས་ཨུ་རུ་སུར་མཉམ་འབྲེལ་བྱེད་མཁན་རྒྱལ་ཚོང་བ་རྣམས་ལྐོག་གསོད་དང་འཐབ་རྒོལ་རྒྱུན་འཁྱོངས་བྱ་ཡིན་ཞེས་དམ་བཅའ་བཞག གཟའ་ལྷག་པའི་ཉིན་ཨུ་རུ་སུའི་དམག་མི་ཁག་ཅིག་གིས་འཛམ་གླིང་དམག་ཆེན་གཉིས་པའི་སྐབས་སུ་འཇར་མན་ན་ཛིའི་དམག་ལ་འཐབ་རྒོལ་བྱས་ནས་རྒྱལ་ཁབ་ཐོབ་པའི་རྒྱལ་དར་དམར་པོ་ཞིག་ཁར་སན་མངའ་ཁུལ་གྱི་དམག་ཞབས་འདས་པོའི་དྲན་རྟེན་ཁང་གི་མདུན་དུ་བཙུགས་ཡོད་པའི་བརྙན་ཐུང་ཞིག་དྲྭ་ལམ་དུ་ཁྱབ། ཨུ་རུ་སུའི་ཕྱོགས་གཏོགས་པ་དྲྭ་ལམ་རྩོམ་པ་པོ་ཀུ་ལེ་ཤོབ་ཟེར་བ་ཞིག་ལ་ངོ་ཐག་མི་ཆོད་པའི་མི་ཁག་ཅིག་གིས་ཁར་སན་གྲོང་དུ་མེ་མདའ་བརྒྱབ་ནས་རླངས་འཁོར་ནང་དུ་བསད། ཁོ་པ་བསད་པ་ནི་གྲོང་ཁྱེར་དེར་ཨུ་རུ་སུར་ངན་འབྲེལ་བྱེད་མཁན་མཐོ་རིམ་མི་སྣ་ལྐོག་གསོད་བྱས་པ་ཨང་གཉིས་པ་ཡིན་ཞིང་། ཕྱི་ཟླ་༣་པའི་ཟླ་མཇུག་དེར་པ་ཝེལ་སཱ་ལོ་བྷོ་ཌི་ཆི་ཀོབ་ཟེར་བའི་ཨུ་རུ་སུའི་ཕྱོགས་གཏོགས་པ་ཞིག་ཡུཀ་རེན་གྱི་འཐབ་མོ་བ་ཚོས་ལྐོག་གསོད་བྱས་འདུག མི་དེའི་རླངས་འཁོར་ལ་མདེའུ་བརྒྱབ་ནས་གཙབ་རལ་དུ་བཏང་བའི་འདྲ་པར་ཞིག་དྲྭ་ལམ་དུ་བཀྲམ་སྟེ་ཨུ་རུ་སུའི་བཙན་འཛུལ་བ་དང་དེའི་རྒྱབ་སྐྱོར་བ་ཚོས་ཤེས་པར་བྱོས། ང་ཚོ་སླེབས་ཡོད། ཁར་སན་གྲོང་དུ་འཇབ་དམག་རྒྱག་གི་ཡོད། ཁྱོད་ཚོ་གསོད་ངེས་ཡིན། ཁར་སན་གྲོང་ནི་ཡུཀ་རེན་གྱི་མངའ་ཁོངས་ཡིན་ཞེས་འདྲ་པར་དེའི་གཤམ་དུ་མཆན་བྲིས། ཡིན་ནའང་མཆན་འབྲི་མཁན་དེ་ཚོགས་པ་དང་སྒྲིག་འཛུགས་གང་ཡིན་ངེས་གཏན་མ་བྱུང་།།
ཨུ་རུ་སུའི་དམག་གིས་ཁར་སན་གྲོང་ཁྱེར་བདེ་བླག་ཏུ་བླངས་ཀྱང་གྲོང་ཁྱེར་དེའི་ཡུལ་མི་ཚོས་ཉི་མ་མང་པོར་བཙན་འཛུལ་ལ་ངོ་རྒོལ་དང་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་བར་ཡུཀ་རེན་མི་དམངས་དང་རྒྱལ་སྤྱིའི་ཐོག་ཏུ་བསྔགས་བརྗོད་ཐོབ། གྲོང་མི་ཚོས་ལུས་ལ་ཡུཀ་རེན་གྱི་རྒྱལ་དར་དཀྲིས་ནས་ཨུ་རུ་སུའི་བཙན་འཛུལ་བ་རྣམས་མཐར་སྐྲོད་གཏོང་དགོས། ཁར་སན་གྲོང་ནི་ཡུཀ་རེན་གྱི་མངའ་ཁོངས་ཡིན་ཞེས་ངོ་རྒོལ་སྐད་འབོད་བྱས་ཤིང་། ད་ལྟ་ཨུ་རུ་སུའི་གཞུང་གིས་ཁར་སན་མངའ་ཁུལ་དེ་ཡུཀ་རེན་དང་ཁ་བྲལ་བཏང་སྟེ་མི་དམངས་སྤྱི་མཐུན་རྒྱལ་ཁབ་ཟེར་བ་ཞིག་གསར་འཛུགས་བྱ་རྒྱུའི་ངན་ཇུས་གཤོམ་གྱི་ཡོད་པའི་གནས་ཚུལ་ཐོན། ཡུཀ་རེན་གྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ཌེ་ཎི་སོ་ཝས་ཕྱི་ཟླ་༥་པའི་ཚེས་༡་ནས་ཚེས་༡༠་བར་དུ་ཨུ་རུ་སུས་བཀོད་ཇུས་ལྟར་ཁར་སན་མངའ་ཁུལ་དུ་རང་བཙན་གྱི་མང་མོས་འོས་འདེམས་ཟེར་བ་ཞིག་བྱ་འཆར་འདུག བདེན་དཔང་བ་ཚོས་འོས་ཤོག་རྣམས་དཔར་དུ་བསྐྲུན་ཏེ་ས་གནས་སུ་སྐྱེལ་འདྲེན་བྱས་ཡོད་པ་མིག་གིས་མཐོང་འདུག མང་མོས་འོས་འདེམས་ཟེར་བ་དེའི་སྐབས་སུ་ཁར་སན་མངའ་ཁུལ་དུ་ཕྱི་ནང་གཉིས་ལ་འབྲེལ་བ་གཅོད་རྒྱུའི་ཉེན་ཁ་ཆེ། ཨུ་རུ་སུས་སྔ་མོ་ནས་རྒྱལ་ཁབ་གཞན་གྱི་མངའ་ཁོངས་ཁ་བྲལ་དུམ་བུར་བཏང་སྟེ་བཙན་དབང་རིང་ལུགས་དང་ལྐོག་ཟ་རུལ་སུངས་ཀྱི་རྒྱལ་ཁབ་གསར་འཛུགས། ཨ་ཕྲུག་རྒྱལ་ཁབ་དེ་ཚོ་ཨུ་རུ་སུའི་ཤུགས་རྐྱེན་འོག་ཏུ་ཚུད་དགོས་པའི་སྲིད་ཇུས་ཤིག་ལག་ལེན་བསྟར་སྲོལ་ཡོད་པ་རེད། ཁོ་ཚོས་ཡུཀ་རེན་གྱི་སྲིད་གཞུང་གི་སྟོབས་ཤུགས་གཅོག་པར་སྲིད་ཇུས་གཞན་པའང་ལག་ལེན་བསྟར་ངེས་རེད་ཅེས་ངོ་དེབ་ནང་དུ་གནས་ཚུལ་སྤེལ། ཡུཀ་རེན་གྱི་འཇབ་དམག་གི་འགོ་ཁྲིད་ཚོས་རང་བཙན་གྱི་མང་མོས་འོས་འདེམས་ཟེར་བ་དེའི་འོས་ཤོག་འཕེན་ས་ཁག་དང་འོས་འདེམས་ཀྱི་ལས་སྣེ་རྣམས། ཨུ་རུ་སུར་ངན་འབྲེལ་བྱས་ནས་འོས་ཤོག་འཕེན་མཁན་རྣམས་དགྲ་ཕྱོགས་སུ་ངོས་འཛིན་བྱས་ནས་རྒོལ་རྡུང་བྱ་ཡུལ་གྱི་དམིགས་འབེན་དུ་འཛིན་རྒྱུ་ཡིན་ཞེས་ཉེན་བརྡ་བཏང་འདུག
ཕྱི་ཟླ་༤་པའི་ཚེས་༡༩་ཉིན་ཨ་རིའི་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཁར་སན་མངའ་ཁུལ་གྱི་གྲོང་རྡལ་ཞིག་གི་གཞུང་འཛིན་ལས་ཁུངས་སྟེང་དུ་ཨུ་རུ་སུ་དམར་ཤོག་གི་རྒྱལ་དར་དང་ད་ལྟའི་ཨུ་རུ་སུའི་རྒྱལ་དར་གཉིས་ཀ་བཙུགས། གྲོང་རྡལ་ལས་ཁུངས་མདུན་དུ་ཨུ་རུ་སུ་དམར་ཤོག་གི་འགོ་ཁྲིད་ལེ་ནིན་གྱི་རྡོ་སྐུ་ཞིག་བསླངས། ༢༠༡༥་ལོའི་ཕྱི་ཟླ་༧་པའི་ཚེས་༡༦་ཉིན་ཧེ་ཎི་ཆེ་སིཀ་གྲོང་རྡལ་གཞུང་གིས་ལེ་ནིན་གྱི་རྡོ་སྐུ་ཡོད་དོ་ཅོག་ཕྱིར་བསྡུ་བྱ་དགོས་པའི་ཐག་བཅད། གྲོང་རྡལ་དེའི་མི་མང་བརྒྱ་ཆ་༩༠་ལྷག་གིས་ལེ་ནིན་གྱི་རྡོ་སྐུ་ཕྱིར་བསྡུ་བྱ་རྒྱུ་དེར་རྒྱབ་སྐྱོར་བྱས་ཀྱང་མི་ཉུང་ཤས་ཤིག་གིས་ལེ་ནིན་གྱི་རྡོ་སྐུ་རང་སོར་འཇོག་དགོས་པའི་ལངས་ཕྱོགས་བཟུང་། གྲོང་རྡལ་དེ་ཡུཀ་རེན་རྒྱལ་ཡོངས་སུ་ལེ་ནེན་གྱི་རྡོ་སྐུ་ཕྱིར་བསྡུ་བྱེད་མཁན་གྲོང་རྡལ་མཐའ་མ་དེ་ཡིན་ཞིང་། ཁར་སན་ས་གནས་ཀྱི་འགོ་ཁྲིད་གཞོན་པས་ཨུ་རུ་སུའི་དམག་གིས་དམར་ཤོག་གི་རྒྱལ་དར་དང་ལེ་ནིན་གྱི་རྡོ་སྐུ་སྒྲེང་འཛུགས་བྱེད་ཀྱི་འདུག ཁོ་ཚོས་མུན་ནག་གི་དུས་སྐབས་དེར་ལྟག་ལོག་རྒྱག་ཐུབ་མིན་ཚོད་ལྟ་བྱེད་ཀྱི་འདུག འདི་ནི་ཕྱོགས་གང་ཐད་ནས་རྒྱབ་འགལ་ཡིན་པ་དང་གདུག་རྩུབ་ཆེན་པོ། ཨུ་རུ་སུའི་དམག་མི་རྣམས་འདས་ཟིན་པའི་དུས་སྐབས་ཤིག་ལ་ཞེ་ཐོགས་ཡོད་པ་འདྲ་ཞེས་ངོ་དེབ་ནང་དུ་འཕྲིན་ཐུང་ཞིག་བྲིས། ༢༠༡༦་ལོར་ཕུ་ཊིན་གྱིས་ཡོངས་གྲགས་སུ་ལེ་ནིན་གྱི་གསར་བརྗེ་ནི་ཨུ་རུ་སུ་མི་དམངས་ཀྱི་ཁེ་ཕན་ལ་རྒྱབ་འགལ་ཡིན་པར་མ་ཟད། ལེ་ནིན་ལ་ཨུ་རུ་སུའི་གོང་མ་དང་གོང་མའི་སྐུ་འཁོར་རྣམས་ཤུལ་བཅད་ནས་དམར་གསོད་བྱས་པའི་ནག་ཉེས་ཡོད་ཅེས་ཁ་རྡུང་དྲག་པོ་བཏང་འདུག ཉེ་ཆར་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུས་ཡུཀ་རེན་ལ་བཙན་འཛུལ་མ་བྱས་གོང་དུ་ཕུ་ཊིན་གྱིས་༡༩༢༩་ལོར་ལེ་ནིན་གྱིས་ཡུཀ་རེན་ཟེར་བའི་རྒྱལ་ཁབ་ཅིག་གསར་དུ་བཙུགས་པ་རེད་ཅེས་ནག་ཉེས་བགྲངས། ད་ལྟ་ཕུ་ཊིན་གྱིས་ཨུ་རུ་སུ་དམར་ཤོག་གི་རྒྱལ་དར་དང་ལེ་ནིན་གྱི་རྡོ་སྐུ་རྣམས་ཡུཀ་རེན་གྱི་ས་ཐོག་ཏུ་སྒྲེང་འཛུགས་བྱེད་ཀྱི་ཡོད་པ་ནི་ཁྱད་མཚར་ཞིག་རེད་ཅེས་གནས་ཚུལ་ཐོན་འདུག