༄༅།། ཉེ་ཆར་ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བྷེ་བཀྲོངས་པའི་རྗེས་སུ་རྒྱལ་ཁབ་དེའི་སྲིད་དོན་པ་དང་གཅིག་གྱུར་ཆོས་ཚོགས་གཉིས་འབྲེལ་བ་དམ་ཟབ་ཡོད་ཅིང་། ཉི་ཧོང་གི་གཅིག་གྱུར་ཆོས་ཚོགས་ནི་ཧ་ཅང་གི་རྩོད་གཞི་ཅན་གྱི་ཡེ་ཤུའི་ཆོས་སྡེ་ཞིག་ཡིན་པ་གསར་འགྱུར་ལས་ཁང་ཁག་གིས་ཐེར་འདོན་བྱ་རྒྱུ་ཤུགས་ཆེ་རུ་ཕྱིན་འདུག ཕྱི་ཟླ་༧་པའི་ཚེས་༢༩་ཉིན་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ལོ་ན་༤༡་ལ་སོན་པའི་ཉི་ཧོང་བ་ཡ་མ་གྷ་མཱི་ཞེས་པ་ཞིག་གིས་ངས་སྲིད་བློན་ཟུར་པ་ཤིན་ཛོ་ཨ་བྷེ་བསད་པ་ནི་ཁོ་པ་གཅིག་གྱུར་ཆོས་ཚོགས་ཀྱི་རྒྱབ་སྐྱོར་བ་གཙོ་གྲས་ཤིག་ཡིན་པར་འབྲེལ་བ་ཡོད། གཅིག་གྱུར་ཆོས་ཚོགས་ཀྱིས་ངའི་ཨ་མའི་ལག་ནས་ཨ་སྒོར་འབུམ་༧་ལྷག་ཞལ་འདེབས་བསྡུས་ནས་ང་ཚོའི་ཁྱིམ་ཚང་གང་པོ་སྤྲང་པོར་བསྒྱུར་སོང་ཞེས་རྒྱུ་མཚན་བགྲངས། ཡ་མ་གྷ་མཱིས་ཉི་ཧོང་གི་ས་གནས་གསར་འགྱུར་ལས་ཁང་ཞིག་ལ་གནས་འཕྲིན་ཞིག་བཏང་སྟེ་ཤིན་ཛོ་ཨ་བྷེ་ནི་གཅིག་གྱུར་ཆོས་ཚོགས་ཀྱི་རྒྱབ་སྐྱོར་བ་ཞིག་རེད། ང་ནི་གཅིག་གྱུར་ཆོས་ཚོགས་ལ་དགའ་མོས་གཏན་ནས་མེད་པའི་མི་ཞིག་ཡིན་ཞེས་བཀོད། ཉི་ཧོང་གི་ས་གནས་གསར་འགྱུར་ལས་ཁང་དེས་ཡ་མ་གྷ་མཱིའི་ཨ་མ་གཅིག་གྱུར་ཆོས་ཚོགས་ཀྱི་ཚོགས་མི་ཡིན་པ་རྩད་གཅོད་བྱུང་ཞིང་། གཅིག་གྱུར་ཆོས་ཚོགས་ཀྱི་ཚོགས་མི་ཟུར་པ་ཚོ་དང་ཁྲིམས་རྩོད་པ། གཅིག་གྱུར་ཆོས་ཚོགས་ལ་ཞིབ་འཇུག་བྱེད་མཁན་ཉམས་ཞིབ་པ་ཚོས་ཡ་མ་གྷ་མཱིའི་ཁྱིམ་ཚང་ལ་དཀའ་ངལ་ཕྲད་པ་ལྟར་ཉི་ཧོང་གི་ཁྱིམ་ཚང་གཞན་ཁག་གིས་ཀྱང་གཅིག་གྱུར་ཆོས་ཚོགས་ལ་ཞལ་འདེབས་ཕུལ་ནས་དཀའ་ངལ་གཅིག་མཚུངས་འཕྲད་ཀྱི་འདུག ཡ་མ་གྷ་མཱིའི་གནས་འཕྲིན་ནང་དུ་གཅིག་གྱུར་ཆོས་ཚོགས་ལ་སྐྱོན་འཛུགས་བྱས་པ་རྣམས་བསྙོན་འཛུགས་དང་ལུང་ཁུངས་མེད་པ་ཞིག་མ་རེད་ཅེས་བསྟན། གཅིག་གྱུར་ཆོས་ཚོགས་ཀྱི་ཚོགས་མི་ཟུར་པ་ཚོའི་ཁྲིམས་རྩོད་པ་ཡ་མ་གུ་ཆིས་གཅིག་གྱུར་ཆོས་ཚོགས་ཀྱིས་ཉིན་ལྟར་ཚོགས་མི་ཚོར་ཞལ་འདེབས་འབུལ་དགོས་པའི་གནོན་ཤུགས་སྤྲད། ཆོས་ཚོགས་ཀྱི་ལས་སྣེ་ཚོས་ཚོགས་མི་ཚོར་ཁྱོད་ཚོས་ལས་ངན་བསགས་པ་རྣམས་དངུལ་སྒོར་ལ་འབྲེལ་བ་ཡོད་པ་རེད། ཁྱོད་ཚོེར་རང་ཉིད་སྐྱོབ་འདོད་ཡོད་ན་ཆོས་ཚོགས་ལ་ཞལ་འདེབས་འབུལ་དགོས་ཞེས་བཙན་སྐུལ་བྱེད་ཀྱི་འདུག་ཅེས་བཀྲལ།།
ཡ་མ་གྷ་མཱི།
ཧྥ་རན་སི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཡ་མ་གྷ་མཱིའི་ཨ་ཕས་རང་སྲོག་བཅད་ནས་ཤི་བའི་རྗེས་སུ་ཨ་མ་འུ་ཐུག་སྟེ་གཅིག་གྱུར་ཆོས་ཚོགས་ཀྱི་ཁོངས་སུ་ཞུགས། ཁོ་མོ་འཕྲལ་དུ་དད་པ་དམ་ཚིག་གཡོ་བ་མེད་པའི་ཚོགས་མི་ཞིག་ཏུ་གྱུར། ཡ་མ་གྷ་མཱིའི་ཨ་ཞང་གིས་གསར་འགོད་པར་ཨ་མ་ཆོས་ཚོགས་ལ་ཕྱིན་ཏེ་ཕྲུ་གུ་ཚོ་གཅིག་པུ་ཁྱིམ་དུ་བཞག ཕྲུ་གུ་ཚོར་ཁྱིམ་དུ་བཟའ་བཏུང་མེད་པའི་དུས་སུ་ཚ་བོས་ང་ལ་ཁ་པར་གཏོང་གི་རེད། ཨ་མས་གཅིག་གྱུར་ཆོས་ཚོགས་ལ་ཨ་སྒོར་ས་ཡ་༡་ཡས་མས་ཤིག་ཞལ་འདེབས་ཕུལ་ནས་ཁྱིམ་ཚང་མ་རྩ་བརྡིབས་པ་རེད་ཅེས་གསལ་བཀྲོལ་བྱས་ཤིང་། ཉི་ཧོང་གི་གཅིག་གྱུར་ཆོས་ཚོགས་ཀྱི་ཚོགས་མི་ཚོས་ཨ་སྒོར་༣༥༠༠༠༠་ཕུལ་ནས་སྐུ་འདྲ་རེ་བླུས་ན་དོ་བདག་རང་ཉིད་དང་མི་དེའི་ཕ་མེས་ཚོའི་སྡིག་སྒྲིབ་རྣམས་འདག་གི་རེད་ཅེས་ལམ་སྟོན་བྱེད་ཀྱི་ཡོད་པས་ཉི་ཧོང་བ་ཇི་སྙེད་ཅིག་གིས་དེ་ལ་ཡིད་ཆེས་བྱེད་ཀྱི་ཡོད་པར་མ་ཟད། གཅིག་གྱུར་ཆོས་ཚོགས་ཀྱི་ལས་སྣེ་ཚོས་ཚོགས་མི་ཚོར་འཛམ་གླིང་དམག་ཆེན་གཉིས་པའི་སྐབས་སུ་ཉི་ཧོང་གིས་ཀོ་རི་ཡར་བཙན་འཛུལ་བྱས་ནས་ལས་ངན་ཚབས་ཆེན་བསགས་ཡོད་པར་བཤགས་སྡོམ་བྱ་དགོས་ཞེས་བསྐུལ། ཉི་ཧོང་གི་ཇཱོ་ཚུ་སློབ་གྲྭ་ཆེན་མོའི་སྤྱི་ཚོགས་དང་ཆོས་ལུགས་རིག་པའི་ཟུང་འབྲེལ་སློབ་དཔོན་ཛུ་ཀ་དྷས་གཅོག་གྱུར་ཆོས་ཚོགས་ཀྱིས་བསམ་བཞིན་རྒྱལ་ཁབ་མ་འདྲ་བའི་ཚོགས་མི་ཚོར་ལས་འགན་མ་འདྲ་བ་སྤྲོད་ཀྱི་འདུག ཉི་ཧོང་ནི་གཅིག་གྱུར་ཆོས་ཚོགས་ལ་དཔལ་འབྱོར་འདུ་འགོད་བྱ་ཡུལ་མཆོག་ཏུ་གྱུར་པ་ཞིག་ཏུ་གྱུར་པ་རེད། ཁོ་ཚོས་ཐར་པའི་གོ་འཕང་ཉོ་རྒྱུ་ཡོད་པའི་དྲིལ་བསྒྲགས་བྱས་ནས་རྨོངས་དད་བྱེད་མཁན་ཚོར་བཤུ་གཞོག་བྱེད་ཀྱི་འདུག་ཅེས་བསྟན།།
ཆོས་ཚོགས་དེར་གཞུང་འབྲེལ་དུ་འཛམ་གླིང་ཞི་བདེའི་ཁྱིམ་ཚང་མནའ་འབྲེལ་གཅིག་གྱུར་ཆོས་ཚོགས་ཞེས་འབོད། ༡༩༥༤་ལོར་ལྷོ་ཀོ་རི་ཡའི་ཡེ་ཤུའི་ཆོས་པ་སན་ཡུང་མུན་གྱིས་ཆོས་ཚོགས་དེ་གསར་དུ་བཙུགས། ༡༩༥༩་ལོར་ཉི་ཧོང་ལ་ཡན་ལག་ཆོས་ཚོགས་བཙུགས་ཏེ་༡༩༨༠་གྱ་གྲངས་སུ་ཉི་ཧོང་གི་དཔལ་འབྱོར་དང་ཚོང་ལས་འཕེལ་རྒྱས་ཕྱིན་ཏེ་ཆོས་ཚོགས་ཀྱི་ཚོགས་མི་ཡང་མང་དུ་འཕེལ། ཉི་ཧོང་གི་རྒྱལ་ས་ཊོཀ་གྲོང་ཁྱེར་གྱི་རི་སི་ཤོ་སློབ་གྲྭ་ཆེན་མོའི་སྤྱི་ཚོགས་སེམས་ཁམས་རིག་པའི་སློབ་དཔོན་ཎི་ཤི་དྷས་ལོ་རབས་༨༠་པ་ནི་ཉི་ཧོང་གི་དཔལ་འབྱོར་གོང་འཕེལ་དང་མི་མང་གི་འཚོ་བ་ཡར་རྒྱས། ཉི་ཧོང་བ་ཚོ་ཇི་ལྟར་འཚོ་གནས་བྱེད་དགོས་པ་ཤེས་ཀྱི་མེད་པའི་དུས་སྐབས་ཤིག་ཡིན་ཞིང་། དེར་བརྟེན་གཅིག་གྱུར་ཆོས་ཚོགས་ལ་ཚོགས་མི་མང་དུ་གཏོང་བའི་གོ་སྐབས་བཟང་པོ་ཞིག་ཐོབ་པ་རེད་ཅེས་བཤད། ཉི་ཧོང་གི་རྒྱལ་ཡོངས་ཁྲིམས་རྩོད་པའི་མཐུན་ཚོགས་ཀྱིས་གཅིག་གྱུར་ཆོས་ཚོགས་དེའི་ལས་སྣེ་ཚོས་ཐར་ལམ་ཚོང་འགྲེམ་བྱེད་ཀྱི་འདུག་ཅེས་ཁ་མཆུ་བཙུགས། ༡༩༨༧་ནས་གཅིག་གྱུར་ཆོས་ཚོགས་ཀྱིས་ཟླ་རེ་བཞིན་ཚོགས་མི་ཚོའི་ལག་ནས་ཞལ་འདེབས་བཙན་གྱིས་བསྡུས། ད་ལྟ་ཁྲིམས་རྩོད་པས་གཅིག་གྱུར་ཆོས་ཚོགས་ཀྱིས་ཨ་སྒོར་དུང་ཕྱུར་དགུ་ལྷག་ཚོགས་མི་ཟུར་པ་ཚོར་ཕྱིར་སློག་བྱ་དགོས་ཞེས་ཁྲིམས་ལ་གཏུགས། ཕྱི་ལོ་༢༠༠༠་ཡས་མས་ནས་ཉི་ཧོང་གཞུང་གིས་གཅིག་གྱུར་ཆོས་ཚོགས་ཀྱི་ལས་སྣེ་ཁག་ཅིག་འཛིན་བཟུང་དང་ཐར་ལམ་ཉོ་རྒྱུ་ཡོད་པ་རེད་ཅེས་མང་ཚོགས་ལ་མགོ་སྐོར་གཏོང་གི་ཡོད་པ་རྣམས་ཁྲིམས་ལ་སྦྱར། ཁྲིམས་རྩོད་པ་ཡ་མ་གུ་ཆིས་གཅིག་གྱུར་ཆོས་ཚོགས་ཀྱིས་སྔར་བཞིན་ཚོགས་མི་ཚོར་ཞལ་འདེབས་འབུལ་དགོས། འདི་ནི་དཀོན་མཆོག་གི་ཐག་གཅོད་ཅིག་ཡིན་པ་དང་ཚོགས་མི་ཚོས་ཟླ་བ་རེའི་ཞལ་འདེབས་ཀྱི་གྲངས་ཚད་དེ་ངེས་པར་དུ་འབུལ་དགོས་ཞེས་དངུལ་སྒོར་བསྡུ་ཡི་འདུག ང་ཚོའི་སེམས་པར་དཀོན་མཆོག་ལ་དངུལ་སྒོར་འབུལ་རྒྱུ་ཡིན་མིན་ནི་མི་ཚོས་རང་མོས་ཀྱིས་ཐག་གཅོད་བྱ་དགོས་པ་ཞིག་རེད་ཅེས་བཤད།།
༢༠༠༥་ལོར་ཡ་མ་གྷ་མཱིའི་ཨ་མས་ཁྱིམ་ཚང་གི་དངུལ་སྒོར་ཡོད་ཚད་གཅིག་གྱུར་ཆོས་ཚོགས་ལ་ཕུལ་ནས་ཁྱིམ་ཚང་སྤྲང་པོར་གྱུར་ནས་བཟུང་། ཡ་མ་གྷ་མཱིས་རང་སྲོག་གཅོག་ཐབས་དང་རང་སྲོག་བཅད་ནས་ཤི་ན་སྤུན་མཆེད་ཚོར་འགན་སྲུང་ལས་ཁུངས་ནས་གྱོང་གསབ་དངུལ་སྒོར་འབབ་རྒྱུ་ཡོད་པས་སྤུན་མཆེད་ཚོའི་དཀའ་ངལ་ཅུང་ཙམ་སེལ་ཐུབ་རྒྱུའི་བསམ་བློ་བཏང་འདུག ཡ་མ་གྷ་མཱིའི་ཕུ་བོར་ཆུང་དུས་ནས་སྐྲན་ནད་ཕོག་སྟེ་ལོ་བཅུའི་རྗེས་སུ་རང་སྲོག་བཅད་ནས་ཤི། སྲིད་བློན་ཟུར་པ་ཤིན་ཛོ་ཨ་བྷ་མ་བཀྲོངས་གོང་གི་ཉིན་གཅིག་གི་སྔོན་དེར་ཡ་མ་གྷ་མཱིས་ཆོས་ཚོགས་ལ་ངོ་རྒོལ་གྱི་རྩོམ་ཡིག་འབྲི་སའི་དྲྭ་ཚིགས་ཤིག་ཏུ་ངའི་བྱིས་པའི་དུས་ཀྱི་འཚོ་བ་ནི་ཨ་མས་ཆོས་ཚོགས་ལ་ཞལ་འདེབས་ཕངས་མེད་ཕུལ། ང་ཚོའི་ཁྱིམ་ཚང་ཧྲིལ་པོ་སྤྲང་པོར་གྱུར་ཏེ་ཁ་ཆག་སྣ་རལ་འབའ་ཞིག་མྱངས་པའི་མི་ཚེ་ཞིག་ཡིན། ང་ལ་ཆུང་དུས་ཕྲད་པའི་དཀའ་ངལ་དེ་དག་གིས་ངའི་མི་ཚེ་མགོ་རྟིང་སློག་སོང་ཞེས་བྲིས། གཅིག་གྱུར་ཆོས་ཚོགས་ཀྱི་ཚོགས་མི་ཟུར་པ་བུད་མེད་ཅིག་གིས་ཡ་མ་གྷ་མཱིས་སྲིད་བློན་ཟུར་པ་ཨ་བྷེ་བཀྲོངས་པར་ངས་རྒྱབ་སྐྱོར་བྱེད་ཀྱི་མེད། ཡིན་ནའང་གཅིག་གྱུར་ཆོས་ཚོགས་ཀྱིས་མིའི་འཚོ་བར་བརྡབ་གསིག་ཆེན་པོ་གཏོང་གི་ཡོད་པ་བདེན་པ་རེད། གཅིག་གྱུར་ཆོས་ཚོགས་ཀྱིས་ང་དང་གདུག་རྩུབ་ཅན་གྱི་ཁྱོ་ག་ཞིག་ཁ་སྦྱར་སོང་། ངའི་ཨ་མས་ང་ལ་སྡུག་སྒོམ་བྱས་ནས་ཁྱོ་གའི་མཉམ་དུ་འདུག་དགོས། བཟའ་ཚང་ཁ་འཐོར་བྱུང་ན་ཆོས་ཚོགས་དགོངས་པ་འགལ་གྱི་རེད་ཅེས་བཙན་གནོན་བྱས་པ་རྣམས་ཐེར་འདོན་བྱས་འདུག
གཅིག་གྱུར་ཆོས་ཚོགས་ཀྱི་ཚོགས་གཙོ།
ཕྱི་ཟླ་༧་པའི་ཚེས་༢༨་ཉིན་བྷུ་ལུམ་བྷག་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཉི་ཧོང་གི་སྲིད་བློན་ཟུར་པ་ཤིན་ཛོ་ཨ་བྷེ་གཅིག་གྱུར་ཆོས་ཚོགས་ཀྱི་ཚོགས་མི་མིན་རུང་ཆོས་ཚོགས་དེའི་མཛད་སྒོ་ཁག་ལ་མཉམ་ཞུགས་བྱས་མྱོང་ཡོད་པ་རེད། ན་ནིང་ཕྱི་ཟླ་༩་པར་ཤིན་ཛོ་ཨ་བྷེ་དང་ཉི་ཧོང་གི་གནད་ཡོད་སྲིད་དོན་པ་མང་དག་ཅིག་གིས་གཅིག་གྱུར་ཆོས་ཚོགས་ལ་འབྲེལ་བ་ཡོད་པའི་མཛད་སྒོ་ཞིག་ཏུ་གཏམ་བཤད་བྱས་ཤིང་། ཡ་མ་གྷ་མཱིའི་གནས་འཕྲིན་དེར་ཤིན་ཛོ་ཨ་བྷེ་ནི་གཅིག་གྱུར་ཆོས་ཚོགས་ལ་རྒྱབ་སྐྱོར་བྱེད་མཁན་སྲིད་དོན་པ་ཤུགས་རྐྱེན་ཆེ་ཤོས་དེ་རེད་ཅེས་འཁོད། གཟའ་འཁོར་འདིར་ཤིན་ཛོ་ཨ་བྷེའི་སྤུན་མཆེད་དང་ཉི་ཧོང་གི་རྒྱལ་སྲུང་བློན་ཆེན་ནོ་བྷུ་ཀི་ཤཱིས་གསར་འགོད་པར་གཅིག་གྱུར་ཆོས་ཚོགས་ཀྱི་ཚོགས་མི་ཚོས་ཨ་བྷེའི་འོས་འདེམས་ལས་འགུལ་དུས་སུ་དང་བླངས་བྱས་ནས་རྒྱབ་སྐྱོར་བྱས་མྱོང་ཡོད་པ་རེད་ཅེས་ངོས་ལེན་བྱས་འདུག སྲིད་བློན་ཨ་བྷེའི་མེས་པོ་དང་ཉི་ཧོང་གི་སྲིད་བློན་ཟུར་པ་ནོ་བྷུ་སུ་ཀེ་ཀི་ཤཱི་ཡང་གཅིག་གྱུར་ཆོས་ཚོགས་ལ་འབྲེལ་བ་ཡོད་པ་གསལ་སྟོན་བྱུང་། ཉི་ཧོང་གི་བུད་མེད་ཀྱི་ཡེ་ཤུའི་སློབ་གྲྭ་ཆེན་མོས་ཆོས་ལུགས་མཁས་པ་ཤི་མ་དྷས་གཅིག་གྱུར་ཆོས་ཚོགས་ཀྱི་ཚོགས་མི་ཚོས་སྔ་མོ་ནས་ཤིན་ཛོ་ཨ་བྷེས་འགོ་ཁྲིད་པའི་ཉི་ཧོང་གི་དམངས་གཙོ་གུ་ཡངས་ཚོགས་པར་དང་བླངས་ཐོག་ཏུ་རྒྱབ་སྐྱོར་བྱེད་ཀྱི་ཡོད་པ་རེད། གཅིག་གྱུར་ཆོས་ཚོགས་ལ་ཁ་མཆུ་འཛུགས་ཀྱི་ཡོད་པ་དང་སྐྱོན་བརྗོད་འཕོག་གི་ཡོད་པ་རྣམས་དམངས་གཙོ་གུ་ཡངས་ཚོགས་པས་འགོག་མ་ཐུབ་ཀྱང་ཆོས་ཚོགས་དེས་ཁྲིམས་འགལ་བྱེད་ཀྱི་ཡོད་པ་སྣང་མེད་དུ་བཞག ད་དུང་ཤིན་ཛོ་ཨ་བྷེ་དང་ཁོང་གི་མེས་པོ་སོགས་ཀྱང་ཆོས་ཚོགས་དེར་འབྲེལ་བ་ཡོད་པས་ཡ་མ་གྷ་མཱིས་ཤིན་ཛོ་ཨ་བྷེ་བཀྲོངས་པ་རེད་ཅེས་བཀྲལ། ད་ལྟ་ཉི་ཧོང་གི་ཕྱོགས་འགལ་ཚོགས་པའི་འཐུས་མི་ཚོས་ལས་དོན་ཚོགས་ཆུང་འགའ་ཞིག་བཙུགས་ནས་གཅིག་གྱུར་ཆོས་ཚོགས་དང་སྲིད་དོན་པ་ཚོར་འབྲེལ་བ་ཅི་ཙམ་ཡོད་མེད་ཞིབ་འཇུག་བྱ་རྒྱུའི་གསལ་བསྒྲགས་སྤེལ། ཉི་ཧོང་གི་གཞུང་འཛིན་དམངས་གཙོ་གུ་ཡངས་ཚོགས་པའི་གྲོས་ཚོགས་འཐུས་མི་རྣམས་དང་གཅིག་གྱུར་ཆོས་ཚོགས་ལ་འབྲེལ་བ་ཡོད་པའི་ཉི་ཧོང་གི་སྲིད་དོན་པ་ཚོ་དོགས་མ་བདེ་བར་གྱུར། ཐོག་མར་ཡ་མ་གྷ་མཱིས་གཅིག་གྱུར་ཆོས་ཚོགས་གསར་འཛུགས་པ་སན་ཡུང་མུན་གྱི་ཆུང་མ་ཡུག་མོ་ཧཀ་ཇཱ་ཧན་མུན་གསོད་རྒྱུའི་ཐག་བཅད་ཀྱང་ཕྱིས་སུ་ཤིན་ཛོ་ཨ་བྷེ་དམིགས་འབེན་དུ་བཟུང་ནས་བསད་པ་རེད་ཅེས་གནས་ཚུལ་སྤེལ་འདུག