༄༅།། གློ་བོའི་རྒྱལ་སྲས་འཇིགས་མེད་དོན་གྲུབ་ཕུན་ཚོགས་དཔལ་འབར་མཆོག་ནས་བཙུན་མོ་ཨུ་སྐྱབས་བསོད་ནམས་དབྱངས་ཅན་ཁབ་ཏུ་བཞེས་ནས་གཉེན་སྟོན་གཟབ་རྒྱས་ཚུགས་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༣་ཉིན་བལ་ཡུལ་གྱི་རེ་པབ་ལི་ཀ་གསར་ཁང་གིས་གནས་ཚུལ་སྤེལ་བ་ལྟར་ན། གློ་སྨོན་ཐང་ས་གནས་གཞུང་གིས་གཟའ་ཟླ་བའི་ཉིན་མོར་གཞུང་གི་ལས་ཁུངས་ཁག་དང་སློབ་གྲྭ་སོགས་ལ་གུང་སེང་བཏང་སྟེ་རྒྱལ་སྲས་ཀྱི་གཉེན་སྟོན་རྟེན་འབྲེལ་ལ་དགའ་སྟོན་ཚུགས་དགོས་པའི་ཐག་བཅད། མི་དམངས་ཀྱིས་དགའ་བའི་གླུ་དབྱངས་བླངས་པ་དང་སྐྱིད་པའི་བྲོ་འཁྲབ། བལ་པོའི་སྐད་ཀྱི་གསར་འགྱུར་ལས་ཁུངས་ཁག་གིས་གློ་བོའི་རྒྱལ་སྲས་ཀྱི་གཉེན་སྟོན་སྐོར་གསར་འགྱུར་ཐད་གཏོང་དང་ཞིབ་རྒྱས་སྤེལ། རྒྱལ་སྲས་འཇིགས་མེད་དོན་གྲུབ་ཕུན་ཚོགས་དཔལ་འབར་ནི་གློ་བོའི་ཡུལ་གྱི་རྒྱལ་ཆུང་འཇིགས་མེད་སེངྒེ་དཔལ་འབར་དང་ཡུམ་རྒྱལ་བཙུན་རྡོ་རྗེ་དབྱངས་སྐྱིད་གཉིས་ཀྱི་སྲས་ཡིན་པ་དང་བཙུན་མོ་ཨུ་སྐྱབས་བསོད་ནམས་དབྱངས་ཅན་ནི་ཡབ་ཝ་ལུང་འགོ་པ་ཨུ་སྐྱབས་བསྟན་འཛིན་རྣམ་རྒྱལ་དང་ཡུམ་ཨུ་སྐྱབས་བདེ་ཆེན་ཆོས་སྒྲོན་གཉིས་ཀྱི་སྲས་མོ་ཡིན་པའི་གནས་ཚུལ་ཐོན་འདུག
ཕྱི་ཟླ་༧་པའི་ཚེས་༤་ནས་ངོ་དེབ་དང་ཡུ་ཊུབ་སོགས་སྤྱི་ཚོགས་དྲྭ་ལམ་ཁག་ཏུ་རྒྱལ་སྲས་འཇིགས་མེད་དོན་གྲུབ་ཕུན་ཚོགས་དཔལ་འབར་མཆོག་ནས་བཙུན་མོ་ཨུ་སྐྱབས་བསོད་ནམས་དབྱངས་ཅན་ཁབ་ཏུ་བཞེས་པའི་གཉེན་སྟོན་གྱི་སྐུ་པར་དང་བརྙན་ཐུང་སོགས་བཀྲམ། གློ་བོ་བ་དང་བོད་པ་སོགས་འཛམ་གླིང་ཡུལ་གྲུ་ཁག་ཏུ་གློ་བོའི་རྒྱལ་སྲས་སྟངས་དཔྱལ་གཉིས་ལ་བཀྲ་ཤིས་བདེ་ལེགས་ཀྱི་འཚམས་འདྲི་དང་རྟེན་འབྲེལ་གྱི་ཁ་གཡང་བསྒྲགས། གཉེན་སྟོན་གྱི་སྐུ་པར་ནང་དུ་རྒྱལ་སྲས་དང་བཙུན་མོ་གཉིས་ཀས་བོད་ཀྱི་སྲོལ་རྒྱུན་དང་མཐུན་པའི་ཆས་གོས་སྤུས་ལེགས་སྤྲས་ཏེ་རྒྱན་ཆ་བཏགས། གཉེན་སྟོན་གྱི་རྟེན་འབྲེལ་མཛད་སྒོ་ཚོགས་ཡུལ་གྱི་རྒྱབ་ལྗོངས་སུ་ཐང་ཀའི་མཆོད་རྫས་རྣམས་བཤམས། བཙུན་མོ་བསུ་བའི་དུས་སུ་རྟ་པ་དང་རླངས་འཁོར་དུ་མ་ལྷན་དུ་བཅར། དགེ་འདུན་པ་ཚོས་རྔ་བརྡུངས་ནས་རོལ་ཆས་དཀྲོལ། མི་དམངས་ཀྱི་ལག་ཏུ་དཀར་གཙང་ཁ་བཏགས་དང་ནས་ཆང་བསིལ་མ་བཟུང་ནས་ཕེབས་བསུ་ཞུས། མཚན་མོར་གློ་སྨོན་ཐང་གི་ཕོ་བྲང་གི་མཐའ་འཁོར་ཡོངས་སུ་ཚོན་མདོག་རྣམ་པར་བཀྲ་བའི་གློག་སྒྲོན་སྟར་ཡོད་པའི་བརྙན་འཕྲིན་རྣམས་དྲྭ་ལམ་དུ་ཁྱབ།།
ཕྱི་ཟླ་༧་པའི་ཚེས་༢་ཉིན་བལ་ཡུལ་གྱི་ཨ་ཆ་ཧམ་དྲྭ་ལམ་གསར་ཁང་གིས་གནས་ཚུལ་སྤེལ་བ་ལྟར་ན། གློ་སྨོན་ཐང་གི་སྡེ་དཔོན་གུ་རུང་བཀྲ་ཤིས་ནོར་བུས་རྒྱས་སྲས་ཀྱི་གཉེན་སྟོན་ཉིན་མོར་གཞུང་འབྲེལ་གྱི་གུང་སེང་གཏོང་རྒྱུ་ཡིན་ཞེས་བསྒྲགས། རྒྱལ་སྲས་འཇིགས་མེད་དོན་གྲུབ་ཕུན་ཚོགས་དཔལ་འབར་གྱིས་ཨ་རིར་གཙུག་ལག་རབ་འབྱམས་པའི་སློབ་གཉེར་གནང་ཞིང་། ཁོང་ནི་གློ་བོའི་ཡུལ་གྱི་ལོ་རྒྱུས་དང་རིག་གཞུང་། ཆོས་ཕྱོགས་བཅས་ཀྱི་ཚབ་མཚོན་མི་སྣ་ཤིན་ཏུ་གནད་འགག་ཅན་ཞིག་ཡིན་པས་གཉེན་སྟོན་དེར་གཞུང་འབྲེལ་གྱི་གུང་སེང་བཏང་བའི་གནས་ཚུལ་ཐོན་འདུག གནའ་སྔ་མོར་གློ་བོའི་ཡུལ་ནི་བོད་ཀྱི་མངའ་ཁོངས་སུ་གཏོགས་ཀྱང་དུས་རབས་༡༨་པའི་མཇུག་ཏུ་གློ་བོའི་ཡུལ་དེ་བལ་པོའི་མངའ་འོག་ཏུ་བསྡུས། བལ་བོད་ཀྱི་དམག་འཁྲུག་སྐབས་སུ་གློ་བོའི་ཡུལ་གྱིས་བོད་དང་མན་ཇུའི་གོང་མའི་དམག་ལ་རྒྱབ་སྐྱོར་བྱས་པ་རེད་ཅེས་ཡིག་ཆ་ཁག་ཏུ་འཁོད།།
གློ་བོའི་རྒྱལ་པོ་འཇིགས་མེད་རྡོ་རྗེ་དཔལ་འབར་མཆོག་ནི་༡༩༣༠་ལོར་འཁྲུངས་པ་དང་༢༠༡༦་ལོའི་ཕྱི་ཟླ་༡༢་ཚེས་༡༦་ཉིན་དགུང་གྲངས་༨༦་ཐོག་ཏུ་སྐུ་གཤེགས། ༢༠༠༨་ལོར་བལ་ཡུལ་གྱི་རྒྱལ་ལྡན་ལམ་མཇུག་བསྡུས་ནས་་སྤྱི་མཐུན་རྒྱལ་ཁབ་ཏུ་བསྒྱུར། ཨ་རིའི་སི་ཨེན་ཨེན་གསར་འགྱུར་ལས་ཁུངས་ནས་༢༠༡༦་ལོའི་ཕྱི་ཟླ་༣་པའི་ཚེས་༢༧་ཉིན་གནས་ཚུལ་སྤེལ་བ་ལྟར་ན། བལ་ཡུལ་གཞུང་གིས་སྤྱི་མཐུན་ལམ་ལུགས་བཙུགས་ཏེ་གློ་རྒྱལ་པོའི་མཚན་གནས་མེད་པར་བཟོས་ཀྱང་རྒྱལ་པོ་དང་རྒྱལ་པོའི་སྐུ་འཁོར་ཚོར་མི་དམངས་ཀྱིས་ཧ་ཅང་གི་བརྩི་མཐོང་དང་གོང་བཀུར་ཞུ་བཞིན་ཡོད་པར་མ་ཟད། ས་གནས་ཀྱི་ཁ་མཆུ་དང་གྱོད་གཞི་རྣམས་སྔར་བཞིན་གློ་རྒྱལ་པོས་ཐག་གཅོད་གནང་དགོས་ཀྱི་འདུག གློ་རྒྱལ་པོས་རིག་གཞུང་དང་ཁོར་ཡུག་སྲུང་སྐྱོབ་ཆེད་དུ་ཡུལ་སྐོར་སྤྲོ་འཆམ་པ་ཚོད་འཛིན། ཁོང་གིས་ས་གནས་དེའི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་དང་བོད་ཡིག་གི་དགེ་རྒན་ཚོར་རྒྱབ་སྐྱོར། དགོན་སྡེ་ཁག་དང་སློབ་གྲྭ་ཁག་ལ་གཟིགས་རྟོག་གནང་གི་འདུག་ཅེས་གསར་འགྱུར་སྤེལ།།
སི་ཨེན་ཨེན་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། གློ་སྨོན་ཐང་གི་རྒྱལ་པོའི་ཕོ་བྲང་དུ་བཅར་ན་རྒྱལ་པོ་དང་སྐུ་འཁོར་སོགས་མཇལ་ཐུབ། རྒྱལ་པོ་སྐུ་ན་བགྲེས་ཀྱང་ཡུལ་སྐོར་སྤྲོ་འཆམ་པ་དང་ཕྱི་མི་ཚོར་མཇལ་འཕྲད་གནང་ནས་འབྲེལ་བ་རྒྱུན་འཁྱོངས་གནང་གི་འདུག ང་གློ་རྒྱལ་པོར་མཇལ་དུ་བཅར་བའི་སྐབས་སུ་བཀའ་མོལ་ལྷུག་པོ་གནང་བྱུང་། ཁོང་གིས་ཟླ་འོད་འོག་ཏུ་ཕོ་བྲང་རྩེ་ཐོག་དེར་གསོལ་སྟོན་བཤམས་ན་ཧ་ཅང་སྐྱིད་པོ་ཡོད་ཅེས་གསུང་གི་འདུག གློ་རྒྱལ་པོའི་ཕོ་བྲང་དུ་མཚམས་རེར་ཕྱི་མི་ཚོར་གཡག་ཤ་བཙོས་མ་དང་ནས་ཆང་འདྲེན། ཕོ་བྲང་གི་བྲོ་པ་ཚོས་ཚོན་མདོག་རྣམ་པར་བཀྲ་བའི་འཁྲབ་ཆས་གྱོན། གཡུ་དང་བྱུ་རུ། གསེར་དངུལ་སོགས་ཀྱི་རྒྱན་ཆ་བཏགས་ནས་མེ་ཕུང་མཐའ་རུ་གཞས་བཏང་སྟེ་བྲོ་འཁྲབ་ཀྱི་འདུག་ཅེས་གསར་འགོད་པས་རང་གི་མཐོང་ཐོས་མྱོང་གསུམ་བཀོད་པའི་གསར་འགྱུར་ཞིབ་སྤེལ་འདུག
དབྱིན་ཇིའི་བྷི་བྷི་སི་གསར་འགྱུར་ལས་ཁང་གིས་༢༠༡༦་ལོའི་ཕྱི་ཟླ་༣་པའི་ཚེས་༡༨་ཉིན་གནས་ཚུལ་སྤེལ་བ་ལྟར་ན། བལ་ཡུལ་གཞུང་ནས་གློ་རྒྱལ་པོའི་མཚན་གནས་མེད་པར་བཏང་བའི་རྗེས་སུ་རྒྱལ་པོ་མཆོག་གིས་ས་གནས་དེའི་ཆོས་ལུགས་དབུ་ཁྲིད་ལྟ་བུའི་ཐུགས་འགན་བཞེས། ཁོང་སྐུ་གཟུགས་བདེ་ཐང་མེད་པར་གྱུར་ཏེ་བལ་ཡུལ་གྱི་རྒྱལ་ས་ཀ་ཐ་མན་རྡུར་གནས་སྤོར་གནང་ནས་སྨན་བཅོས་བྱ་རྒྱུ་འགོ་ཚུགས། ༡༩༥༩་ལོར་བོད་ལ་དུས་འགྱུར་བྱུང་བའི་རྗེས་སུ་ཨ་རིའི་དབུས་གསང་བའི་ལས་ཁུངས་ཀྱི་རྒྱབ་སྐྱོར་འོག བོད་པ་བཙན་བྱོལ་བ་ཚོས་གློ་བོའི་ཡུལ་དུ་འཇབ་དམག་གི་སྒྲིག་འཛུགས་བཙུགས་ནས་བོད་ནང་གི་རྒྱ་དམག་རྣམས་མཐར་སྐྲོད་གཏོང་རྒྱུའི་དྲག་པོའི་ལས་འགུལ་སྤེལ་བར་རྒྱལ་པོ་འཇིགས་མེད་རྡོ་རྗེ་མཆོག་གིས་རྒྱབ་སྐྱོར་གནང་ཡོད་པའི་གནས་ཚུལ་སྤེལ་འདུག འདས་པའི་ལོ་མང་རིང་བལ་ཡུལ་གཞུང་གིས་གློ་བོའི་ཡུལ་དུ་ལྟ་སྐོར་བ་དང་ཕྱི་མི་མ་བཏང་བར་བཀག ༡༩༩༡་ཡས་མས་ཤིག་ནས་བལ་ཡུལ་གཞུང་གིས་གློ་བོའི་ཡུལ་དུ་ཡུལ་སྐོར་སྤྲོ་འཆམ་པ་གཏོང་རྒྱུ་མགོ་བརྩམས་ཡོད་པའི་གནས་ཚུལ་ཐོན་འདུག