༄༅།། ཏུར་ཀིའི་སྲིད་འཛིན་ཨེར་དྷོ་ཝན་སླར་ཡང་ལོ་ལྔར་སྲིད་འཛིན་ལ་འདེམས་ཐོན་བྱུང་། ཕྱི་ཟླ་༥་པའི་ཚེས་༢༩་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། རེ་ཆིབ་ཐ་ཡིབ་ཨེར་དྷོ་ཝན་གྱིས་༢༠༢༨་བར་དུ་སྲིད་དབང་འཛིན་ཆོག་ཀྱང་ཏུར་ཀིའི་དཔལ་འབྱོར་ཉམས་རྒུད་དང་ས་འགུལ་བརྒྱུགས་ནས་མི་ཁྲི་ཚོ་༥་ལྷག་བསད་པའི་དཀའ་ངལ་ལ་གདོང་ལེན་བྱ་དགོས་ཤིང་། ཁ་སང་གཟའ་ཉི་མར་བསྐྱར་དུ་འོས་བསྡུ་བྱས་པའི་སྐབས་སུ་སྲིད་འཛིན་ཨེར་དྷོ་ཝན་ལ་འོས་ཤོག་བརྒྱ་ཆ་༥༢་དང་ཁ་གཏད་པ་ཀ་མལ་ཀི་ལི་ཆི་དྷ་རོག་ལུ་ལ་འོས་ཤོག་བརྒྱ་ཆ་༤༨་ཐོབ། བདུན་ཕྲག་གཉིས་ཀྱི་སྔོན་དེར་ཏུར་ཀིའི་སྲིད་འཛིན་འོས་མི་གཅིག་ལའང་འོས་ཤོག་བརྒྱ་ཆ་༥༠་ཐོབ་མེད་པས་རྩེ་ཐོག་འོས་མི་གཉིས་ཀྱིས་འགྲན་སྡུར་ཐེངས་གཉིས་པ་བྱ་དགོས་བྱུང་འདུག འདས་པའི་ལོ་༢༠་ཐམ་པར་སྲིད་འཛིན་ཨེར་དྷོ་ཝན་གྱིས་སྲིད་དབང་བཟུང་། ཁོང་གིས་ཏུར་ཀིའི་དམངས་གཙོའི་ལམ་སྲོལ་ཁག་བརྡལ་བཤིག་བཏང་སྟེ་སྲིད་དབང་སྒེར་གཅོད་ཀྱི་ཕྱོགས་སུ་ཁ་ལོ་བསྒྱུར། ལྷག་པར་དུ་ཨུ་རུ་སུའི་སྲིད་འཛིན་ཕུ་ཊིན་ལ་འབྲེལ་བ་དམ་ཟབ་བཙུགས་ཏེ་ནུབ་ཆིངས་དང་ཨ་རི། ཡུ་རོབ་མཉམ་འབྲེལ་བཅས་ལ་འབྲེལ་བ་སྡུག་ཏུ་སོང་།།
ཀ་མལ་ཀི་ལི་ཆི་དྷ་རོག་ལུ་ཡིས་ཏུར་ཀའི་དམངས་གཙོའི་ལམ་སྲོལ་སླར་གསོ་བྱ་རྒྱུ་ཡིན། ནུབ་ཕྱོགས་རྒྱལ་ཁབ་ཁག་དང་ནུབ་ཆིངས་ལ་འབྲེལ་བ་ཡར་རྒྱས་གཏོང་རྒྱུའི་ཁས་ལེན་བྱས་ཀྱང་དོན་སྨིན་མ་བྱུང་། སྲིད་འཛིན་ཨེར་དྷོ་ཝན་གྱིས་རྒྱལ་ས་ཨན་ཀ་ར་དང་ཨི་སི་ཊན་བྷུལ་གྲོང་ཁྱེར་དུ་གཏམ་བཤད་ཐེངས་གཉིས་བྱས་ཡོད་པ་སྟེ། དེ་རིང་གི་འོས་བསྡུའི་སྐབས་སུ་རྒྱལ་ཁ་ཐོབ་མཁན་དེ་ཏུར་ཀི་རྒྱལ་ཁབ་རེད། ད་ལོ་དེང་རབས་ཀྱི་ཏུར་ཀི་རྒྱལ་ཁབ་ཚུགས་ནས་ལོ་བརྒྱ་འཁོར་གྱི་ཡོད་པ་རེད། དུས་རབས་གཉིས་པ་དེ་ཏུར་ཀིའི་དུས་རབས་ཤིག་ཏུ་བསྒྱུར་བའི་འབད་བརྩོན་བྱ་རྒྱུ་ཡིན་ཞེས་ཁས་བླངས། ཁ་གཏད་པ་ཀི་ལི་ཆི་དྷ་རོག་ལུ་ཡིས་འོས་བསྡུ་འདི་གཏན་ནས་དྲང་སྙོམས་ཤིག་བྱུང་མ་སོང་། ཏུར་ཀི་རྒྱལ་ཁབ་ཀྱི་མཐུན་རྐྱེན་ཁག་སྲིད་འཛིན་ཨེར་དྷོ་ཝན་གྱིས་འོས་བསྡུའི་དྲིལ་བསྒྲགས་ལས་འགུལ་སྤེལ་བར་འགྲོ་གྲོན་བཏང་མོད། འོན་ཀྱང་ཏུར་ཀིའི་དམངས་གཙོ་སླར་གསོ་མ་བྱུང་བར་དུ་ང་ཚོ་མདུན་དུ་ཐོན་ནས་འཐབ་རྩོད་བྱ་རྒྱུ་ཡིན་ཞེས་བསྒྲགས། ཨེར་དྷོ་ཝན་གྱི་རྒྱབ་སྐྱོར་བ་ཚོས་སྲིད་འཛིན་གྱི་མིང་ནས་བོས་ཏེ་རྒྱལ་དར་འཕྱར། ཁོ་ཚོས་རླངས་འཁོར་གྱི་དུང་བཏང་བ་དང་སྲང་ལམ་ཁག་ཏུ་བྲོ་འཁྲབ་ནས་དགའ་སྟོན་གྱི་དཔལ་ལ་རོལ།།
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། འཛམ་གླིང་རྒྱལ་ཁབ་ཁག་གི་འགོ་ཁྲིད་ཚོས་སྲིད་འཛིན་ཨེར་དྷོ་ཝན་ལ་བསྐྱར་དུ་འོས་བསྡུའི་རྒྱལ་ཁབ་ཐོབ་པར་རྟེན་འབྲེལ་ཞུ་བཞིན་ཡོད་པར་བལྟས་ཚེ། འཛམ་གླིང་གི་ཆབ་སྲིད་དང་ཡུཀ་རེན་ལ་ནུབ་ཆིངས་སྒྲིག་འཛུགས་ཀྱིས་རྒྱབ་སྐྱོར་མཚམས་མ་ཆད་པར་བྱ་རྒྱུ་ཡིན་མིན་ཐད་ཏུར་ཀི་གནད་འགག་ཆེན་པོ་ཞིག་ཏུ་གྱུར་ཡོད་པ་མཚོན་ཐུབ། ནུབ་ཕྱོགས་རྒྱལ་ཁབ་ཁག་གི་སྲིད་དོན་པ་ཚོས་འདས་པའི་ལོ་མང་རིང་ཏུར་ཀི་དང་ནུབ་ཕྱོགས་རྒྱལ་ཁབ་ཁག་གི་འབྲེལ་བ་སྡུག་ཏུ་ཕྱིན་ཀྱང་སྲིད་འཛིན་ཨེར་དྷོ་ཝན་ལ་མཉམ་འབྲེལ་བྱས་ནས་ལས་དོན་བསྒྲུབ་འཆར་ཡོད་ཅེས་གསལ་བསྒྲགས་སྤེལ། ཡུཀ་རེན་གྱི་འབྲུ་རིགས་ཕྱིར་ཚོང་དང་སུད་ཌེན་ནུབ་ཆིངས་ཁོངས་སུ་ཞུགས་ཐུབ་རྒྱུ་ཡིན་མིན་རྣམས་ཏུར་ཀིའི་རྒྱབ་སྐྱོར་ལ་རག་ལས་ཡོད་ཅིང་། སྲིད་འཛིན་ཨེར་དྷོ་ཝན་ནས་ས་ཡོམ་གྱི་གོད་ཆགས་བྱུང་ཡུལ་བསྐྱར་དུ་འཛུགས་སྐྲུན་དང་ཏུར་ཀིའི་ས་ཐོག་ཏུ་སི་རི་ཡའི་སྐྱབས་བཅོལ་བ་ས་ཡ་གཅིག་ཡོད་པ་རྣམས་རང་ཡུལ་དུ་ཕྱིར་སློག་བྱ་རྒྱུ་གཙིགས་སུ་འཛིན་རྒྱུ་ཡིན་ཞེས་བཤད།།
ཕྱི་ཟླ་༥་པའི་ཚེས་༢༨་ཉིན་ཨུ་རུ་སུའི་སྲིད་འཛིན་ཕུ་ཊིན་གྱིས་བརྩེ་བའི་གྲོགས་པོ་ཐ་ཡིབ་ཨེར་དྷོ་ཝན་ལ་འོས་བསྡུའི་རྒྱལ་ཁ་ཐོབ་པར་བཀྲ་ཤིས་བདེ་ལེགས་ཞུ། འོས་བསྡུའི་རྒྱལ་ཁ་དེ་སྐུ་ཉིད་ནས་རང་བཙན་གྱི་ཕྱི་སྲིད་ཅིག་འཛིན་གྱི་ཡོད་པར་ཏུར་ཀི་མི་དམངས་ཀྱིས་ཡི་རང་ཞུ་བཞིན་པའི་དག་རྟགས་མཚོན་པར་མ་ཟད། སྐུ་ཉིད་ནས་ངལ་བ་འཛེམས་མེད་ཀྱིས་ཏུར་ཀི་སྤྱི་མཐུན་རྒྱལ་ཁབ་ལ་སྲི་ཞུ་བསྒྲུབས་ཏེ་རྒྱལ་ཁབ་ཀྱི་བདག་དབང་སྲུང་སྐྱོབ་བྱེད་ཀྱི་ཡོད་པའི་རྟགས་སུ་མངོན། སྐུ་ཉིད་ཀྱིས་ཏུར་ཀི་དང་ཨུ་རུ་སུའི་འབྲེལ་བ་སྲ་བརྟན་དང་གཉིས་ཕན། མཉམ་འབྲེལ་གྱི་སྲིད་ཇུས་ཤིག་བཟུང་སྟེ་ལེགས་སྐྱེས་ཆེན་པོ་ཕུལ་བར་རྗེས་སུ་ཡི་རང་ཡོད་ཅེས་བསྟོད་བསྔགས་ཀྱི་འཕྲིན་ཐུང་ཞིག་སྤེལ། བྷེ་ལོ་རུ་སིའི་སྲིད་འཛིན་ལུ་ཁ་ཤན་ཁོ་(Lukashnko)་སྟེ། ཕུ་ཊིན་གྱི་ཨ་ཕྲུག་ལྟ་བུར་གྱུར་པ་དེས་ཀྱང་ཁོ་བོས་སྐུ་ཉིད་གོང་བཀུར་བྱེད་འོས་པ་ཞིག་དང་བྷེ་ལ་རུ་སིའི་གྲོགས་པོ། སྲིད་དོན་པ་མཁྲེགས་པོ་ཞིག་ཏུ་ངོས་འཛིན་བྱེད་ཀྱི་ཡོད། ང་ཚོས་རྒྱལ་སྤྱིའི་ཛ་དྲག་ཆུང་དུ་བཏང་སྟེ་ཟ་འབྲུ་མ་ཆད་པ། རྩོད་གཞི་རྣམས་ཞི་བའི་སྒོ་ནས་ཐུག་གཅོད་བྱས་ན་ཁེ་ཕན་འདྲ་མཚུངས་ཤིག་ཐོབ་ཤས་ཆེ་ཞེས་གསར་འགོད་གསལ་བསྒྲགས་སྤེལ།།
ཕྱི་ཟླ་༥་པའི་ཚེས་༢༩་ཉིན་ཕྱི་སྲིད་ལས་དོན་དུས་དེབ་ལ་གནས་ཚུལ་ཐོན་པ་ལྟར་ན། ཨེར་དྷོ་ཝན་གྱི་འོས་བསྡུའི་རྒྱལ་ཁ་ནི་ཨུ་རུ་སུའི་སྲིད་འཛིན་ཕུ་ཊིན་གྱི་རྒྱལ་ཁ་ཞིག་རེད། ཁོ་པ་འོས་བསྡུའི་སྐབས་སུ་ནམ་ཡང་ཤོར་མྱོང་མེད་པ་དང་སླར་ཡང་འོས་བསྡུའི་རྒྱལ་ཁ་ཐོབ། ༢༠༠༣་ལོར་ཨེར་དྷོ་ཝན་ནས་སྲིད་བློན་གྱི་གོ་གནས་བཟུང་། ༢༠༡༤་ནས་སྲིད་འཛིན་གྱི་གོ་གནས་འཛིན་རྒྱུ་མགོ་བརྩམས། ཉེ་ཆར་ཕྱི་ཟླ་༥་པའི་ཚེས་༡༤་ཉིན་ཏུར་ཀིའི་གྲོས་ཚོགས་འཐུས་མི་འོས་འདེམས་བྱས་པའི་སྐབས་སུའང་ཨེར་དྷོ་ཝན་གྱི་གཡས་ཐལ་དང་གཡས་ཤོག་ཚོགས་པ་ཁག་ལ་གདན་གྲངས་མང་བ་ཐོབ། ད་ལྟ་ཨེར་དྷོ་ཝན་ནི་ཏུར་ཀིའི་རྩོད་མེད་ཀྱི་རྒྱལ་པོར་གྱུར། ནུབ་ཕྱོགས་ཀྱི་ཉམས་ཞིབ་པ་ཚོས་ཨེར་དྷོ་ཝན་ལ་འོས་བསྡུའི་རྒྱལ་ཁ་ཐོབ་རྒྱུ་ཁག་པོ་ཡིན་པའི་ཚོད་དཔག་བྱས་ཀྱང་འོས་ཤོག་བདེ་བླག་ཏུ་ཐོབ། ད་ནི་ཨེར་དྷོ་ཝན་གྱི་སྲིད་དབང་གི་སྟོབས་ཤུགས་དེའི་འབྱུང་ཁུངས་ལ་བརྟག་དཔྱད་བྱ་དགོས་ཀྱི་འདུག ཏུར་ཀིའི་དཔལ་འབྱོར་ཉམས་རྒུད་དང་ས་ཡོམ་གྱི་གོད་ཆག ཕྱོགས་འགལ་ཚོགས་པ་༦་རྡོག་རྩ་གཅིག་ཏུ་བསྒྲིལ་ཡང་ཨེར་དྷོ་ཝན་ལ་རྒྱལ་ཁ་ལས་སླ་པོར་རྒྱལ་ཁ་ཐོབ་པ་དེ་དོགས་པ་སྐྱེ་དགོས་པ་ཞིག་མིན་ནམ་ཞེས་དྲིས།།
ཉམས་ཞིབ་པ་ཚོས་ཐེངས་འདིའི་འོས་བསྡུའི་གྲུབ་འབྲས་ལ་གཞིགས་ན་ཏུར་ཀི་ཡུ་རོབ་ཀྱི་གུ་ཡངས་དམངས་གཙོའི་ལམ་ནས་ཕྱིར་ལྡོག་བྱས་ཏེ་ཨུ་རུ་སུའི་སྲིད་དབང་སྒེར་གཅོད་ཀྱི་ལམ་དུ་སྐྱོད་ཀྱི་ཡོད་པ་ར་འཕྲོད། ཨེ་དྷོ་ཝན་གྱི་བྱ་བ་དང་སྤྱོད་པ་རྣམས་ཨུ་རུ་སུའི་སྲིད་འཛིན་ཕུ་ཊིན་དང་གཅིག་པ་རེད། ཕུ་ཊིན་གྱིས་ཨུ་རུ་སུའི་འོས་བསྡུའི་སྐབས་སུ་རང་ལ་རྒྱལ་ཁ་ཐོབ་ཐུབ་པ་ཞིག་བཟོ་ཐུབ་ཡོད་པ་ལྟར་ཨེ་དྷོ་ཝན་གྱིས་ཀྱང་ཏུར་ཀིའི་འོས་བསྡུའི་སྐབས་སུ་རང་ལ་རྒྱལ་ཁ་ཐོབ་ཐུབ་པ་ཞིག་བཟོས་འདུག འོས་བསྡུའི་དྲིལ་བསྒྲགས་ལས་འགུལ་དུས་སུ་སྲིད་འཛིན་ཨེར་དྷོ་ཝན་གྱིས་ཕྱོགས་འགལ་ཚོགས་པའི་འགོ་ཁྲིད་ཚོ་དང་སྤྱི་ཚོགས་ཀྱི་ལས་འགུལ་བ་རྣམས་འཛིན་བཟུང་། ནུབ་ཕྱོགས་ཀྱི་ལྟ་སྤྱོད་འཛིན་པའི་སྲིད་དོན་ཚོགས་པ་ཁག་གིས་སྲིད་དབང་འཕྲོག་ཐབས་བྱེད་ཀྱི་འདུག ཁོ་ཚོ་ཕོ་ལོག་མོ་འགྱུར་དང་མོ་ལོག་ཕོ་འགྱུར། འཇིགས་སྐུལ་རིང་ལུགས་པ་དང་ལྟ་བ་ལོག་པ་རེད་ཅེས་ནག་ཉེས་བཙུགས། ཨེར་དྷོ་ཝན་ནི་ཕུ་ཊིན་ལས་ཅུང་ཙམ་གདུག་རྩུབ་ཆུང་བ་ཞིག་རེད་ཅེས་བཀོད།།
ཕྱི་ཟླ་༥་པའི་ཚེས་༢༩་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཏུར་ཀིའི་སྲིད་འཛིན་ཨེར་དྷོ་ཝན་ནི་ལོ་༧༤་ལ་སོན། ཁོང་གིས་སྲིད་དབང་བཟུང་བའི་རྗེས་སུ་ཏུར་ཀི་རྒྱལ་ཁབ་ལ་ཁ་ཆེའི་ཆོས་ལུགས་ཀྱི་ལྟ་བ་དར་སྤེལ་ཤུགས་ཆེན་བཏང་ཞིང་། ཏུར་ཀིའི་གཞུང་འཛིན་ཚོགས་པའི་དབུས་སྤྱི་ཁྱབ་ཁང་གི་ཕྱི་ལོགས་སུ་སྲིད་འཛིན་ཨེར་དྷོ་ཝན་གྱི་རྒྱབ་སྐྱོར་བ་ཨ་ནར་ཊ་(Anart)་ཟེར་བ་ཞིག་གིས་ཨེར་དྷོ་ཝན་གཏན་དུ་འཚོ་གནས་ཡོང་བར་ཤོག ཁོང་ནི་ངའི་ཨ་ཕ་དང་མེས་པོ། ངའི་ཨ་ཁུ་བཅས་ཐམས་ཅད་ཡིན་ཟེར། མི་ཁ་ཤས་ཀྱིས་ཁ་ཆེ་ཚོས་དགའ་སྟོན་བྱ་དགོས། འཛམ་གླིང་ཧྲིལ་པོས་ཁ་ཆེ་ཚོ་ངོ་ཡག་པོ་ཤེས་ཡོད་ངེས་རེད། འཛམ་གླིང་གི་ཁ་ཆེ་རྒྱལ་ཁབ་ཀུན་པོས་དགའ་སྟོན་བྱ་དགོས་ཞེས་སྨྲས། ཏུར་ཀིའི་སྲིད་དོན་ཚོགས་པ་གསུམ་པ་དེའི་འོས་མིར་འོས་ཤོག་བརྒྱ་ཆ་༥་ཐོབ་ཡོད་པ་དང་བདུན་ཕྲག་སྔོན་མར་སྲིད་འཛིན་ཨེར་དྷོ་ཝེན་ལ་རྒྱབ་སྐྱོར་བྱ་རྒྱུའི་ཐག་བཅད། དེ་ནས་སྲིད་འཛིན་ཨེར་དྷོ་ཝན་ལ་འོས་བསྡུའི་རྒྱལ་ཁབ་ཐོབ་པ་དང་ཏུར་ཀིའི་དབུས་འོས་བསྡུ་ལྷན་ཁང་གིས་འོས་བསྡུ་དྲང་སྙོམས་མ་བྱུང་བའི་དཀའ་ངལ་ཕྲད་མེད་ཅེས་གསལ་བསྒྲགས་སྤེལ།།
ཕྱོགས་འགལ་ཚོགས་པའི་འོས་མི་ཀི་ལི་ཆི་དྷ་རོག་ལུའི་སློབ་སྟོན་པ་ཀར་ལིས་(Karli)་སྲིད་འཛིན་ཨེར་དྷོ་ཝན་ལ་རྒྱལ་ཁ་ཐོབ་པ་ནི་ཆག་སྒོའི་རྒྱལ་ཁ་ཞིག་རེད། ཁོ་པར་འོས་ཤོག་ཐོབ་ཀྱང་འོས་བསྡུའི་རྒྱལ་ཁ་ཐོབ་པ་རེད་ཟེར་ན་ནོར་འཁྲུལ་ལོས་ཡིན། ཆག་སྒོའི་རྒྱལ་ཁ་ཟེར་ན་འོས་འཚམས་ཤིག་རེད་ཅེས་བཤད། བྷུ་རུ་ཀིང་སི་ཞིབ་འཇུག་ཁང་གི་ཉམས་ཞིབ་པ་ཨ་དབྱི་དིན་ཏ་ས་བྷ་སས་(Aydintasbas)་ཀྱང་ཏུར་ཀིར་འགྱུར་བ་གཏོང་འདོད་ཡོད་མཁན་ཚོར་ཕམ་ཉེས་ཆེན་པོ་ཞིག་བྱུང་བ་ཡིན་མི་སྲིད། ཏུར་ཀི་སླར་ཡང་ཤོག་ཁག་གཉིས་སུ་ཆད་པ་དང་ཤོག་ཁག་གཉིས་ཀར་བསྒྲུབ་འདོད་ཡོད་པ་རྦད་དེ་ཐ་དད་རེད་ཅེས་རྒྱལ་ཁབ་དེའི་མི་དམངས་ལ་འགལ་ཟླ་ཡོད་པ་རྣམས་བསྟན། ཨེར་དྷོ་ཝན་ལ་འོས་བསྡུའི་རྒྱལ་ཁ་ཐོབ་པའི་རྗེས་སུ་ཏུར་ཀིའི་དངུལ་ལོར་གྱི་འཛའ་ཐང་ཆག ཉམས་ཞིབ་པ་ཚོས་སྲིད་འཛིན་ཨེར་དྷོ་ཝན་གྱིས་སྐྱེད་ཀ་བཅག་སྟེ་ཡུལ་ཐང་འཕར་ཡོད་པ་གཅོག་ཐབས་བྱེད་ཀྱི་ཡོད་ཀྱང་གྲུབ་འབྲས་ཐོན་གྱི་མི་འདུག་ཅེས་གླེང་སློང་བྱེད་ཀྱི་ཡོད་པའི་གནས་ཚུལ་ཐོན།།
བདུན་ཕྲག་སྔོན་མར་སི་ཨེན་ཨེན་གསར་འགྱུར་ལས་ཁང་གིས་བཅར་འདྲི་ཞུས་པའི་སྐབས་སུ་སྲིད་འཛིན་ཨེར་དྷོ་ཝན་གྱིས་ཨུ་རུ་སུའི་སྲིད་འཛིན་ཕུ་ཊིན་ལ་དམིགས་བསལ་གྱི་འབྲེལ་བ་ཞིག་བཙུགས་ཡོད་པ་རྒྱུན་འཁྱོངས་བྱ་རྒྱུ་ཡིན། སུད་ཌེན་ནུབ་ཆིངས་ཁོངས་སུ་ཞུགས་ཐབས་བྱེད་ཀྱི་ཡོད་པར་སྔར་བཞིན་བཀག་འགོག་བྱ་འཆར་ཡོད། སུད་ཌེན་གྱིས་ཀུར་དི་མི་རིགས་ཀྱི་འཇིགས་སྐུལ་རིང་ལུགས་པའི་ཚོགས་པ་ཞིག་ལ་གནས་ཚང་གཡར་འདུག སུད་ཌེན་ནུབ་ཆིངས་ཁོངས་སུ་ཞུགས་དགོས་ན་འཇིགས་སྐུལ་ཚོགས་པ་དེའི་འགོ་ཁྲིད་ཚོ་ཏུར་ཀིའི་གཞུང་ལ་རྩིས་སྤྲོད་བྱ་དགོས་ཞེས་སྔོན་འགྲོའི་ཆ་རྐྱེན་བཏོན། ན་ནིང་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་པའི་རྗེས་སུ་ཨེར་དྷོ་ཝན་ཕྱོགས་ཁག་ཚང་མར་དགོས་མཁོ་ཅན་ཞིག་ཏུ་གྱུར། སུད་ཌེན་གྱི་སྲིད་བློན་ནས་སྲིད་འཛིན་ཨེར་དྷོ་ཝན་ལ་རྟེན་འབྲེལ་ཞུས་ཏེ་ང་ཚོ་ཐུན་མོང་གི་བདེ་འཇགས་ནི་འབྱུང་འགྱུར་ལ་གནད་འགག་ཆེན་པོ་ཡིན་ཞེས་ཊོས་ཊར་དྲྭ་ལམ་དུ་འཕྲིན་ཐུང་ཞིག་སྤེལ་བའི་གནས་ཚུལ་ཐོན་འདུག
