༄༅།། རྒྱ་ནག་གི་འགོ་ཁྲིད་ཞིན་ཅིན་ཕིང་གིས་ཨ་རིའི་གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་ལ་ཐུག་འཕྲད་བྱས་ནས་ཨ་རྒྱ་འབྲེལ་བ་ནི་འགྲོ་བ་མིའི་རིགས་ཀྱི་ལས་དབང་ལ་འབྲེལ་བ་ཡོད་པ་རེད་ཅེས་བཤད་འདུག ཕྱི་ཟླ་༡༠་པའི་ཚེས་༩་ཉིན་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་གྱིས་འགོ་ཁྲིད་པའི་གྲོས་ཚོགས་འཐུས་མི་༦་གི་སྐུ་ཚབ་ཚོགས་པ་ཞིག་པེ་ཅིང་ལ་འཚམས་འདྲིར་བསྐྱོད། འདི་ནི་ཨ་མི་རི་ཀའི་མཐོ་རིམ་གཞུང་འབྲེལ་མི་སྣ་ཚོ་རྒྱ་ནག་ལ་བསྐྱོད་ནས་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་ཐབས་བྱེད་ཀྱི་ཡོད་པ་གསར་ཤོས་དེ་ཡིན་ཞིང་། ཞིས་ཅིན་ཕིང་ནས་པེ་ཅིང་གི་མི་དམངས་ཚོགས་ཁང་ཆེན་མོར་ཨ་རིའི་གྲོས་ཚོགས་གོང་མའི་ཚོགས་གཙོ་སོགས་ལ་ཐུག་འཕྲད་བྱས་པའི་སྐབས་སུ་དེང་སྐབས་འཛམ་གླིང་འདིར་དཀའ་ངལ་དང་ཟིང་ཆ་ཆེན་པོ་ཞིག་ལངས་ཡོད་པའི་དུས་སུ་ཨ་རྒྱའི་འབྲེལ་བ་ཡག་ཉེས་གང་འདྲ་ཞིག་ཏུ་གྱུར་ཀྱང་འགྲོ་བ་མིའི་རིགས་ཀྱི་མདུན་ལམ་ལ་ཤུགས་རྐྱེན་ཐེབས་ཀྱི་རེད་ཅེས་བསྟན།།
ཞིས་ཅིན་ཕིང་གིས་ངས་ཨ་རིའི་སྲིད་འཛིན་འགའ་ཞིག་ཚུད་པའི་མི་མང་པོར་ཨ་རྒྱའི་འབྲེལ་བ་ཡར་རྒྱས་གཏོང་དགོས་པའི་རྒྱུ་མཚན་སྟོང་ཕྲག་རྙེད་ཀྱང་ཕྱོགས་གཉིས་ཀྱི་འབྲེལ་བ་སྡུག་ཏུ་གཏོང་དགོས་པའི་རྒྱུ་མཚན་སྣ་གཅིག་མི་རྙེད་ཅེས་བཤད་མྱོང་ཡོད། རྒྱ་ནག་གི་ཕྱི་འབྲེལ་ནང་དུ་ཨ་རྒྱའི་འབྲེལ་བ་ལས་གལ་གནས་ཆེ་བ་ཅི་ཡང་མེད་ཅེས་ཁས་བླངས། ཨ་རིའི་གྲོས་ཚོགས་གོང་མའི་སྐུ་ཚབ་ཚོགས་པའི་སྔོན་དུ་ཕྱི་སྲིད་དྲུང་ཆེ་བྷ་ལིན་ཁེན་དང་ནོར་སྲིད་དྲུང་ཆེ་ཇཱེ་ནེ་ཊི་ཡེ་ལཱེན། ཨ་རིའི་ཚོང་དོན་དྲུང་ཆེ་ཇཱི་ན་རཱེ་མོན་ཌོ། དེ་བཞིན་ཨ་རིའི་གནམ་གཤིས་ལས་དོན་ཐད་ཀྱི་དམིགས་བསལ་སྐུ་ཚབ་ཇཱོན་ཁེ་རི་རྣམས་རྒྱ་ནག་ལ་སྔ་རྗེས་སུ་འཚམས་འདྲིར་ཕེབས་ནས་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་ཐབས་སུ་འབད། རྒྱ་ནག་གི་རྒྱ་སྐྱེད་དང་ཨ་རྒྱའི་ཚོང་ལས། ཐེ་ཝན་དང་ཡུཀ་རེན། རྒྱ་ནག་ནས་འཛམ་གླིང་ཡོངས་ལ་པྲོག་དབྱིབས་ནད་དུག་ཁྱབ་པ་སོགས་ཀྱིས་ཨ་རྒྱའི་འབྲེལ་བར་འགལ་ཟླ་སྣ་མང་ཞིག་བསླངས། ད་དུང་ནད་ཡམས་རྗེས་སུ་རྒྱ་ནག་གི་དཔལ་འབྱོར་ཉམས་ནས་ནུབ་ཕྱོགས་རྒྱལ་ཁབ་ཁག་ལ་འབྲེལ་བ་ཡར་རྒྱས་མ་བཏང་ཀ་མེད་དུ་གྱུར་ཡོད་པའི་གནས་ཚུལ་ཐོན་འདུག
ཕྱི་ཟླ་༡༠་པའི་ཚེས་༩་ཉིན་ཎི་ཀེ་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། གྲོས་ཚོགས་གོང་མའི་སྐུ་ཚབ་ཚོགས་པ་ཞིག་རྒྱ་ནག་ལ་འཚམས་འདྲིར་བསྐྱོད་པ་ནི་ལོ་བཞིའི་ནང་དུ་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་ཤིག་རྒྱ་ནག་ཏུ་བསྐྱོད་པ་ཐེངས་དང་པོ་ཡིན་ཞིང་། གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་གྱིས་ཨ་མི་རི་ཀས་རྒྱ་ནག་ལ་འཁྲུག་རྩོད་སློང་བའམ། ཡང་ན་རྒྱ་ནག་ལ་ཚོང་འབྲེལ་གཅོད་འདོད་མེད། ཨ་མི་རི་ཀས་རྒྱ་ནག་ལ་གྲོས་མོལ་བྱས་ནས་ཕྱོགས་གཉིས་མི་མཐུན་པའི་འགལ་ཟླ་ཡོད་པ་རྣམས་འགན་འཁྲི་བླངས་ནས་སེལ་ཐབས་བྱེད་ཀྱི་ཡོད། རྒྱ་ནག་གིས་ཨ་མི་རི་ཀར་འགྲན་སྡུར་བྱས་ན་དགའ་བསུ་ཡོད། འགྲན་སྡུར་དེ་དྲང་སྙོམས་ཤིག་བྱ་དགོས་པ་དང་རྒྱ་ནག་གི་ས་ཐོག་ཏུ་ཚོང་ལས་གཉེར་གྱི་ཡོད་པའི་ཨ་རིའི་བཟོ་ཚོང་ལས་ཁང་ཁག་ལ་དྲང་པོ་བྱེད་ཀྱི་མི་འདུག་ཅེས་ར་སྤྲད། ཨ་རིའི་གྲོས་ཚོགས་གོང་འོག་གཉིས་སུ་རྒྱ་ནག་གི་ཁྲོམ་ར་སྒོ་འབྱེད་ཀྱི་མེད་པ་དང་རྒྱ་ནག་གིས་ཨ་མི་རི་ཀའི་བཟོ་ཚོང་ལས་ཁང་ཁག་གི་འཕྲུལ་རིག་ལག་རྩལ་འཕྲོག་གི་འདུག་ཅེས་སྐྱོན་བརྗོད་ཤུགས་ཆེན་བྱུང་།།
ཨ་རིའི་གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་གྱིས་མུ་མཐུད་བཤད་པ་ལྟར་ན། ཨ་རྒྱའི་ཚོང་པ་ཁག་དང་བཟོ་ཚོང་ལས་ཁང་ཁག་གི་འགྲན་སྡུར་དེ་དྲང་སྙོམས་ཤིག་ཡོང་དགོས། ཨ་མི་རི་ཀས་བློ་འཚབ་ཆེན་པོ་བྱེད་ཀྱི་ཡོད་པའི་གནད་དོན་ཆེ་ཤོས་ཤིག་ནི་རྒྱ་ནག་གི་ས་ཐོག་ཏུ་ཡོད་པའི་བཟོ་ཚོང་ལས་ཁང་ཁག་གིས་ཧྥན་ཊ་ནིལ་(Fentanyl)་བཟི་སྨན་བཟོས་ནས་ཨ་མི་རི་ཀར་ཕྱིར་ཚོང་བྱས་ཏེ་དཀའ་ངལ་ཆེན་པོ་འཕྲད་ཀྱི་འདུག ཨུ་རུ་སུས་འགྲོ་བ་མིའི་སྤྱོད་ཚུལ་ལས་འདས་པའི་བཙན་འཛུལ་བྱས་ནས་ཡུཀ་རེན་ལ་དམག་འཁྲུག་རྒྱག་གི་ཡོད་པར་རྒྱ་ནག་གིས་རྒྱབ་སྐྱོར་བྱེད་ཀྱི་མེད་པའི་ཁག་ཐེག་བྱ་དགོས། རྒྱ་ནག་གཞུང་གིས་རང་གི་མི་དམངས་ཀྱི་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་ཞེས་པེ་ཅིང་གི་དབང་འཛིན་པ་ཚོར་ཐུག་འཕྲད་གྲོས་མོལ་བྱས་པའི་སྐབས་སུ་ནན་བརྗོད་བྱས་པའི་གནས་ཚུལ་ཐོན་མོད། འོན་ཀྱང་རྒྱ་ནག་གཞུང་གིས་བོད་པ་དང་ཞིན་ཅང་གི་ཡུ་གུར་བ། ནང་སོག་གི་སོག་པོ་སོགས་རྩ་མེད་གཏོང་གི་ཡོད་པའི་གནད་དོན་ཁག་གླེང་སློང་བྱས་མིན་གསལ་པོ་མི་འདུག
ཧྥ་རན་སི་གསར་འགྱུར་ལས་ཁང་གིས་སླར་ཡང་གནས་ཚུལ་སྤེལ་བ་ལྟར་ན། ཁ་སང་གཟའ་ཉི་མའི་ཉིན་རྒྱ་ནག་ཕྱི་སྲིད་ལྷན་ཁང་གིས་ཨི་སི་རལ་དང་པ་ལི་སི་ཐན་གཉིས་ཀས་དྲག་ཟིང་ཆེ་རུ་མི་གཏོང་བར་ལྷིང་འཇགས་བསྐྲུན་དགོས་ཞེས་གསར་འགོད་གསལ་བསྒྲགས་སྤེལ་བར་ཨ་རིའི་གྲོས་ཚོགས་གོང་མའི་ཚོགས་གཙོ་ཆཱག་ཆུ་མར་ལ་བློ་ཕམ་བྱུང་། ཁོང་གིས་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ལ་གཟའ་སྤེན་པའི་ཉིན་ཨི་སི་རལ་ལ་འཇིགས་སྐུལ་རིང་ལུགས་པའི་གཏོར་རྒོལ་ཡ་ང་བ་ཞིག་བྱུང་བ་རེད། ངས་རྒྱ་ནག་གཞུང་དམངས་གཉིས་ཀ་ཨི་སི་རལ་མི་དམངས་ཀྱི་ཕྱོགས་སུ་ལངས་ནས་སྡར་མ་དང་གདུག་རྩུབ་ཀྱི་གཏོར་རྒོལ་དེར་ཁ་རྡུང་གཏོང་དགོས་པའི་འབོད་སྐུལ་ཞུ་ཡི་ཡོད་ཅེས་བཤད། ཕྱི་ཟླ་༡༠་པའི་ཚེས་༦་གི་ཞོགས་པར་པ་ལི་སི་ཐན་གྱི་ཧ་མ་སི་དྲག་སྤྱོད་ཤོག་ཁག་གི་འཐབ་མོ་བ་ཚོས་སྐམ་མཚོ་གནམ་གསུམ་ནས་ཨི་སི་རལ་ལ་གཏོར་རྒོལ་བྱས་ནས་མི་༡༠༠༠་ལྷག་བསད་པར་རྒྱ་ནག་གིས་ཁ་རྡུང་དྲག་པོ་མ་བཏང་བར་དྲག་ཟིང་མཚམས་འཇོག་བྱེད་པར་ཨི་སི་རལ་དང་པ་ལི་སི་ཐན་རང་བཙན་རྒྱལ་ཁབ་གཉིས་ཞི་བདེ་མཉམ་གནས་བྱ་རྒྱུའི་ཐབས་ལམ་ལག་ལེན་བསྟར་དགོས་ཞེས་བསྐུལ།།
རྒྱ་ནག་གི་ཕྱི་སྲིད་བློན་ཆེན་ཝང་དབྱིས་ཨ་རིའི་གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་དང་སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་མེཀ་ཀ་ར་པོ་གཉིས་ལ་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པས་ཕྱོགས་གཉིས་ཀྱི་འབྲེལ་བ་བཟང་ཕྱོགས་སུ་བསྒྱུར་ཐུབ་པའི་རེ་བ་ཡོད་ཅེས་རེ་ལྟོས་བཅངས། གྲོས་ཚོགས་གོང་མའི་ཚོགས་གཙོ་ཆཱག་ཤུ་མར་གྱིས་ང་ཚོ་སྐུ་ཚབ་ཚོགས་པ་ཚུད་པའི་ཨ་མི་རི་ཀ་བ་མང་ཆེ་བར་རྒྱ་ནག་གིས་དྲང་སྙོམས་ཀྱི་ཚོང་ལས་ཤིག་གཉེར་གྱི་མེད་པ་དང་རྒྱ་ནག་གི་ས་ཐོག་ཏུ་ཚོང་ལས་གཉེར་བཞིན་པའི་ཨ་རིའི་ཚོང་པ་ཚོར་གོ་སྐབས་འདྲ་མཉམ་ཞིག་འཐོབ་ཀྱི་མེད་པའི་ལྟ་ཚུལ་ཡོད་པ་རེད་ཅེས་བཀྲལ། ཨ་མི་རི་ཀའི་གྲོས་ཚོགས་ཀྱི་སྐུ་ཚབ་ཚོགས་པ་པེ་ཅིང་ལ་མ་འབྱོར་གོང་དུ་ཧྲང་ཧེ་གྲོང་ཁྱེར་དུ་བསྐྱོད་ནས་ཨ་རིའི་ཚོང་ལས་མཐུན་ཚོགས་ཀྱི་འགོ་ཁྲིད་ཚོར་རྒྱ་ནག་གིས་དྲང་སྙོམས་ཀྱི་ཚོང་ལས་སྲིད་ཇུས་ཤིག་ལག་ལེན་བསྟར་གྱི་ཡོད་མེད་འདྲི་ཞིབ་བྱས། རྒྱ་ནག་ནས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་ལྷོ་ཀོ་རི་ཡ་དང་ཉི་ཧོང་ལ་བསྐྱོད་རྒྱུའི་གནས་ཚུལ་ཐོན་འདུག
ཕྱི་ཟླ་༡༠་པའི་ཚེས་༦་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཟླ་༡༡་པའི་ནང་དུ་ཨ་མི་རི་ཀའི་སན་ཧྥ་རན་སེ་སི་ཀོ་གྲོང་ཁྱེར་དུ་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་ཡུལ་གྲུ་མཉམ་འབྲེལ་མཐུན་ཚོགས་ཀྱི་ཆེས་མཐོའི་འགོ་ཁྲིད་ཚོའི་ལོ་རེའི་ཚོགས་འདུ་འཚོགས་ཀྱི་ཡོད་ཅིང་། གསར་འགོད་པ་ཚོས་སྲིད་འཛིན་བྷ་ཌན་ལ་སྐབས་དེར་རྒྱ་ནག་གི་འགོ་ཁྲིད་ཞིས་ཅིན་ཕིང་ལ་ཐུག་འཕྲད་བྱ་འཆར་ཡོད་དམ་ཞེས་དྲིས། སྲིད་འཛིན་བྷ་ཌན་གྱིས་ཞིས་ཅིན་ཕིང་དང་ཐུག་འཕྲད་འབྱུང་སྲིད། ཡིན་ནའང་ཐུག་འཕྲད་ཀྱི་མཛད་རིམ་བཀོད་སྒྲིག་བྱས་མེད་ཅེས་ལན་བཏབ། ན་ནིང་ཨིན་རྡུ་ནེ་ཤི་ཡའི་བྷ་ལི་མཚོ་གླིང་དུ་ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་ཡུལ་གྲུ་མཉམ་འབྲེལ་མཐུན་ཚོགས་ཀྱི་ཆེས་མཐོའི་འགོ་ཁྲིད་ཚོའི་འཚོགས་འདུ་ཚོགས་པའི་རྗེས་སུ་ཞིས་ཅིན་ཕིང་དང་ཇཱོ་བྷ་ཌན་གཉིས་ཐུག་འཕྲད་གྲོས་མོལ་མ་བྱུང་། སྲིད་འཛིན་ཟུར་པ་ཌོ་ནལ་ཊམ་གྱི་དུས་ནས་ཚོང་དམག་ལངས། ད་ལོའི་མགོ་སྟོད་དེར་ཨ་མི་རི་ཀས་རྒྱ་ནག་གི་གསང་ཉུལ་གྱི་ལྒང་བུ་ཞིག་བར་སྣང་དུ་གཏོར། ཨ་རིས་རྒྱ་ནག་ལ་ཡར་ཐོན་གྱིས་སྙིང་ཆས་བཙོང་རྒྱུ་བཀག
ཕྱི་ཟླ་༡༠་པའི་ཚེས་༩་ཉིན་ཧོང་ཀོང་གི་རྒྱ་ནག་ལྷོ་ཕྱོགས་སྔ་དྲོའི་ཚགས་པར་ལ་གནས་ཚུལ་ཐོན་པ་ལྟར་ན། གཟའ་འཁོར་འདིར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་རྒྱ་སྐྱེད་གཏོང་རྒྱུའི་འོས་ཤོག་འཕེན་གྱི་ཡོད་པར་མ་ཟད། རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཁོངས་སུ་ཚུད་རྒྱུའི་རྟགས་མཚན་འདུག དེས་ན་ཨ་རི་དང་རྒྱ་ནག་གཉིས་ལྟ་གྲུབ་མི་མཐུན་པའི་འགལ་ཟླ་ཆེ་རུ་འགྲོ་ཤས་ཆེ། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱལ་ཚོགས་ཀྱི་ལས་དོན་འགན་འཛིན་ལུ་ཝི་ཤཱག་བྷ་ནོས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གདན་ཐོབ་ཅིག་སྟོང་པར་བཞག་ནས་ཕྱིས་སུ་འོས་འཚམས་ཀྱི་ཚོགས་འཐུས་ཤིག་གདམ་ཆོག་གི་རེད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཐུས་མི་འོས་འདེམས་ནི་ལྐོག་གཡོའི་འོས་བསྡུ་ཞིག་ཡིན་པ་དང་དོན་དམ་ལ་མཐུན་པ་ཞིག་མ་རེད་ཅེས་སྐྱོན་བཙུགས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཐུས་མི་འདེམས་མཁན་རྒྱལ་ཁབ་༡༩༣་ཡོད་དེ་དག་ལ་འགྲོ་བ་མིའི་ཐོབ་ཐང་ཚོགས་པ་ཁག་གིས་འོས་ཤོག་མ་འཕེན་ཞེས་ལས་འགུལ་སྤེལ་གྱི་ཡོད་པའི་གནས་ཚུལ་ཐོན་འདུག
