༄༅།། དེང་སྐབས་འཛམ་གླིང་ཡོངས་སུ་ཁྱབ་པའི་ཏོག་དབྱིབས་ནད་དུག་རྒྱ་ནག་གི་ཝུ་ཧན་གྲོང་ཁྱེར་ནས་བྱུང་སྟེ་ལོ་གཅིག་དང་ཕྱེད་ཀ་ཙམ་འགོར། ཨ་རི་སོགས་ནུབ་ཕྱོགས་རྒྱལ་ཁབ་ཁག་གིས་རང་གི་མི་དམངས་ལ་སྨན་ཁབ་བརྒྱབ་ནས་ཏོག་དབྱིབས་ནད་དུག་འཇོམས་ཀྱི་ཡོད་ཀྱང་ཏོག་དབྱིབས་ནད་དུག་གི་འབྱུང་ཁུངས་གང་ཡིན་རྩད་གཅོད་མ་ཐུབ་པར་དོགས་པ་ཇེ་ཆེ་དང་གླེང་སློང་བྱ་རྒྱུ་ཤུགས་ཆེ་རུ་སོང་འདུག ཨ་མི་རི་ཀའི་གསང་བའི་ལས་ཁུངས་ཀྱི་སྙན་ཐོ་ཞིག་ཏུ་༢༠༡༩་ལོའི་ཕྱི་ཟླ་༡༡་པའི་ནང་དུ་ཝུ་ཧན་ནད་དུག་བརྟག་དཔྱད་ཁང་གི་ཉམས་ཞིབ་པ་འགའ་ཞིག་སྨན་ཁང་དུ་ཁྱེར་ནས་སྨན་བཅོས་བྱས་འདུག ཁོ་ཚོའི་ནད་རྟགས་རྣམས་ཚབས་ཆེན་ཞིག་རེད་ཅེས་བཀོད་ཀྱང་རྒྱ་ནག་གི་ཉམས་ཞིབ་པ་དེ་ཚོར་ཏོག་དབྱིབས་ནད་དུག་འགོས་ནས་སྨན་ཁང་དུ་ཁྱེར་བ་རེད་ཅེས་ཁ་ཚོན་གཅོད་མ་ཐུབ། ཡིན་ནའང་རྒྱ་ནག་གི་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཤོར་ཡོད་སྲིད་པའི་དོགས་པ་བྱ་དགོས་པའི་རྒྱུ་མཚན་མང་དག་ཅིག་ཡོད་པའི་གནས་ཚུལ་ཐོན། རྒྱ་ནག་གཞུང་གིས་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཤོར་མེད། ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་རེད་ཟེར་གྱི་ཡོད་པ་ནི་རྫུན་གཏམ་རེད། ཝུ་ཧན་ནད་དུག་བརྟག་དཔྱད་ཁང་ལ་འབྲེལ་བ་ཡོད་པའི་ཚན་རིག་པ་རྣམས་༢༠༡༩་ལོའི་ཕྱི་ཟླ་༡༢་པའི་ཚེས་༣༠་བར་དུ་ཏོག་དབྱིབས་ནད་དུག་ལ་འབྲེལ་བ་བྱུང་མེད་ཅེས་ཨུ་ཚུགས་མཐར་སྐྱེལ་བྱེད་ཀྱི་ཡོད་འདུག
འཛམ་གླིང་གི་ཚན་རིག་པ་མང་དག་ཅིག་གིས་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚན་རིག་པ་ཚོས་ཏོག་དབྱིབས་ནད་དུག་གི་འབྱུང་ཁུངས་རྩད་གཅོད་ཀྱི་ཞིབ་འཇུག་ལས་དོན་ཡག་པོ་དང་ཞིབ་ཚགས་ཤིག་གྲུབ་མ་སོང་། རྒྱ་ནག་གཞུང་གིས་ཐོག་མའི་ནད་པ་ཚོའི་ནད་རྟགས་ཀྱི་དཔེ་མཚོན་དང་ཝུ་ཧན་ནད་དུག་བརྟག་དཔྱད་ཁང་སོགས་ལ་ཞིབ་འཇུག་བྱེད་དུ་བཅུག་མེད་པ་དང་ཡིག་ཆ་ཁ་ཚང་ཞིག་མ་བསྟན་པ། རྒྱ་ནག་གཞུག་གི་བཀག་སྡོམ་དང་ཚོད་འཛིན་མེད་པར་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཞིབ་འཇུག་པ་ཚོར་ཝུ་ཧན་གྲོང་ཁྱེར་གྱི་ས་གནས་ཁག་ལ་བརྟག་དཔྱད་བྱེད་དུ་བཅུག་མེད་པ། ཝུ་ཧན་ནད་དུག་བརྟག་དཔྱད་ཁང་གི་ཉམས་ཞིབ་པ་ཁག་ཅིག་སྨན་ཁང་དུ་ཁྱེར་དགོས་པའི་རྒྱུ་རྐྱེན་ཅི་ཡིན། ཁོ་ཚོའི་ནད་རྟགས་ཀྱི་དཔེ་མཚོན་དང་ངོ་མར་ཉམས་ཞིབ་པ་དེ་ཚོར་ཏོག་དབྱིབས་ནད་དུག་ཕོག་ཡོད་མེད་རྣམས་རྒྱ་ནག་གཞུང་གིས་གསལ་བཀྲོལ་བྱ་དགོས། འཛམ་གླིང་འཕྲོད་བསྟེན་སྒྲིག་འཛུགས་ཀྱི་འགན་འཁྲི་མ་བླངས་པར་རང་བཙན་གྱི་ཚན་རིག་པའི་ཚོགས་པ་ཞིག་ལ་རྒྱ་ནག་གཞུང་གིས་བསྐྱར་དུ་ཏོག་དབྱིབས་ནད་དུག་གི་འབྱུང་ཁུངས་རྩད་གཅོད་བྱེད་དུ་འཇུག་ཞེས་ནན་བརྗོད་བྱས་འདུག གཟའ་འཁོར་འདིར་སྲིད་འཛིན་ཇཱོ་བྷ་ཌན་གྱི་ཏོག་དབྱིབས་ནད་དུག་སྔོན་འགོག་གི་སློབ་སྟོན་པ་གཙོ་བོ་སྨན་པ་ཧྥའོ་ཆིས་ཀྱང་ནད་དུག་དེ་རང་བཞིན་གྱིས་བྱུང་བ་ཞིག་ཡིན་པར་ཡིད་ཆེས་བྱེད་དཀའ། རྒྱ་ནག་གི་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཤོར་ཡོད་མེད་དེར་བརྟག་དཔྱད་ཞིབ་ཚགས་ཞིག་བྱ་དགོས་ཀྱི་འདུག་ཅེས་བཤད། དེ་བཞིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་སྤྱི་ཁྱབ་འགན་འཛིན་གྱིས་ཀྱང་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་ཁང་མ་རེད་ཟེར་ཐུབ་ཀྱི་མི་འདུག་ཅེས་བཤད།།
ཁ་སང་གཟའ་མིག་དམར་ཉིན་ཨ་རིའི་སྲིད་འཛིན་ཟུར་པ་ཌོ་ནལ་ཊམ་གྱིས་ངས་སྔ་མོ་ནས་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་རེད་ཟེར་བ་ཡིན། ང་ནི་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་ཡིན་པར་དོགས་པ་ཅི་ཡང་མེད། སྐབས་དེར་གསར་འགོད་པ་དང་སྨན་པ་མཁས་པ་ཚོས་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་ཡིན་པའི་གླེང་ཕྱོགས་ལ་ཁུངས་ལུང་མེད་པའི་ལྟ་ཚུལ་བཟུང་སྟེ་ཡིད་ཆེས་མ་སོང་། ཏོག་དབྱིབས་ནད་དུག་ནི་ཏན་ཏན་རྒྱ་ནག་གི་ཝུ་ཧན་ནད་དུག་བརྟག་དཔྱད་ཁང་ནས་ཕྱི་ལ་ཤོར་བ་རེད་ཅེས་བཤད། འོན་ཀྱང་སྲིད་འཛིན་ཟུར་པ་ཌོ་ནལ་ཊམ་གྱིས་རང་གི་སྐད་ཆ་དེ་ཚོར་དཔང་རྟགས་སམ། ཡང་ན་ཁོང་ལ་ཏོག་དབྱིབས་ནད་དུག་གི་འབྱུང་ཁུངས་རྒྱ་ནག་གི་ཝུ་ཧན་ནད་དུག་བརྟག་དཔྱད་ཁང་ཡིན་པའི་ཁུངས་སྐྱེལ་ཅི་ཡོད་གསལ་པོར་མ་བཤད། སྲིད་འཛིན་ཌོ་ནལ་ཊམ་གྱི་དུས་སུ་ཨ་རིའི་གསང་བའི་ལས་ཁུངས་ཁག་གིས་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཤོར་ཡོད་མེད་རྩད་གཅོད་བྱེད་འགོ་ཚུགས་པའི་ལས་དོན་རྣམས་སྲིད་འཛིན་གསར་པ་ཇཱོ་བྷ་ཌན་གྱི་སྲིད་གཞུང་གིས་ཀྱང་རྒྱུན་བསྐྱངས། ༢༠༢༠་ལོའི་ཕྱི་ཟླ་༤་པ་ནས་ཌོ་ནལ་ཊམ་གྱིས་རྒྱ་ནག་གི་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཁྱབ་པ་རེད་ཅེས་བཤད་འགོ་ཚུགས། ད་ལྟ་སྨན་པ་ཨན་ཐོ་ཎི་ཧྥའོ་ཆི་ཚུད་པའི་འཛམ་གླིང་གི་ཚན་རིག་པ་དང་སྨན་པ་མཁས་པ་མང་དག་ཅིག་གིས་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་ཡིན་སྲིད་པའི་དོགས་པ་དང་གླེང་སློང་བྱ་རྒྱུ་ཤུགས་ཆེ་རུ་ཕྱིན་ཡོད་པར་མ་ཟད། ཨ་རི་དང་འཛམ་གླིང་གི་གསར་འགྱུར་ལས་ཁང་ཁག་གིས་ཀྱང་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་ཡིན་མིན་གྱི་གནས་ཚུལ་སྤེལ་རྒྱུ་ཇེ་མང་དུ་སོང་འདུག
ཉེ་ཆར་ཕྱི་ཟླ་༣་པར་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་ཏོག་དབྱིབས་ནད་དུག་གི་འབྱུང་ཁུངས་རྩད་གཅོད་བྱས་པའི་ཞིབ་འཇུག་སྙན་ཐོ་ཞིག་བཏོན། སྙན་ཐོ་དེར་ཏོག་དབྱིབས་ནད་དུག་གང་ནས་བྱུང་མིན་གྱི་འབྱུང་ཁུངས་གསལ་པོ་ཞིག་རྙེད་མ་སོང་། ནད་དུག་དེའི་འབྱུང་ཁུངས་ལ་དོགས་པ་བྱ་དགོས་ས་ཁག་འགའ་ཞིག་འདུག ཏོག་དབྱིབས་ནད་དུག་ཕ་ཝང་ནས་ཐད་ཀར་མི་ལ་འགོས་པ། ཕ་ཝང་ནས་ཏོག་དབྱིབས་ནད་དུག་སེམས་ཅན་གཞན་ཞིག་ལ་འགོས་ཏེ་སེམས་ཅན་གཞན་པ་དེ་ནས་མི་ལ་འགོས་པ་ཡིན་མིན་ཤེས་རྟོགས་ཐུབ་མ་སོང་། ཉམས་ཞིབ་པ་ཁག་ཅིག་གིས་ཝུ་ཧན་ནད་དུག་བརྟག་དཔྱད་ཁང་ནས་ཏོག་དབྱིབས་ནད་དུག་ཕྱི་ལ་ཁྱབ་པ་རེད་ཟེར་བ་དེར་བདེན་ཤས་ཆེན་པོ་ཨེ་ཡོད་སྙམ། ཕྱི་ཟླ་༡༡་པའི་སྔོན་ལ་ཝུ་ཧན་ནད་དུག་བརྟག་དཔྱད་ཁང་གི་ཉམས་ཞིབ་པ་ཚོར་ནད་དུག་འགོས་ཡོད་མེད་ཀྱང་རྩད་ཆོད་མ་སོང་། རྒྱ་ནག་གཞུང་གིས་ཕྱི་གསལ་ནང་གསལ་དང་བཀག་འགོག་མེད་པར་ཏོག་དབྱིབས་ནད་དུག་གི་འབྱུང་ཁུངས་ལ་ཞིབ་འཇུག་ཐེངས་གཉིས་པ་ཞིག་བྱེད་དུ་འཇུག་དགོས་ཞེས་བཀོད། རྒྱ་ནག་གཞུང་གིས་ཝུ་ཧན་གྲོང་ཁྱེར་གྱི་ཤ་ཁྲོམ་ཞིག་ནས་ཏོག་དབྱིབས་ནད་དུག་ཁྱབ་གདལ་ཕྱིན་པ་རེད་ཅེས་བཀྲལ། ད་ལྟ་འཛམ་གླིང་གི་ཚན་རིག་པ་གྲགས་ཅན་དང་སྨན་པ་མཁས་པ། ཨ་མི་རི་ཀའི་གཞུང་འབྲེལ་མི་སྣ་ཟུར་པ་སོགས་ཀྱིས་ཝུ་ཧན་གྲོང་ཁྱེར་གྱི་ཤ་ཁྲོམ་དེ་ནས་ཏོག་དབྱིབས་ནད་དུག་ཁྱབ་པ་རེད་ཟེར་བ་ནི་རྒྱ་ནག་གཞུང་གིས་རྫུན་གཏམ་བཤད་པ་ཞིག་ཡིན་སྲིད་པའི་ཉེན་ཁ་འདུག དོན་དངོས་སུ་རྒྱ་ནག་གཞུང་གིས་ཏོག་དབྱིབས་ནད་དུག་ཁྱབ་ཀྱི་ཡོད་པ་སྦ་གསང་བྱས་པའི་རྟགས་མཚན་མང་པོ་འཐོན་གྱི་འདུག རྒྱ་ནག་གི་སྨན་པ་དང་འཕྲོད་བསྟེན་ལས་སྣེ་སོགས་ཝུ་ཧན་གྲོང་ཁྱེར་ལ་ཏོག་དབྱིབས་ནད་དུག་ཁྱབ་ཀྱི་འདུག་ཅེས་ཕྱིར་བསྒྲགས་བྱེད་མཁན་རྣམས་འཛིན་བཟུང་བཙོན་འཇུག་བྱས་པ་དང་མི་ཁག་ཅིག་གར་སོང་ཆ་མེད་དུ་གྱུར། སྨན་པ་ལི་ཝེན་ལེང་ལ་མཐའ་མཇུག་ཏོག་དབྱིབས་ནད་དུག་འགོས་ནས་འཆི་སྐྱོན་བྱུང་།
ཨ་རིའི་སྲིད་འཛིན་ཟུར་པ་ཁེ་ལིན་ཊོན་གྱི་རྒྱལ་ཡོངས་བདེ་འཇགས་ལྷན་ཁང་གི་ལས་སྣེ་ཟུར་པ་མཱེ་ཛལ་གྱིས་རྒྱ་ནག་གི་སྨན་པ་ཚོས་ཏོག་དབྱིབས་ནད་དུག་ཁྱབ་ཀྱི་འདུག་ཅེས་ཉེན་བརྡ་བཏང་མོད། འོན་ཀྱང་རྒྱ་གཞུང་གིས་ནད་ཡམས་དེ་སྦ་ཐབས་བྱས་ནས་འཕྲལ་དུ་སྔོན་འགོག་མ་བྱས་པར་རྒྱུ་མཚན་ཞིག་འདུག ཏོག་དབྱིབས་ནད་དུག་གི་འབྱུང་ཁུངས་གང་ཡིན་རུང་ཐོག་མའི་ཟླ་བ་གཅིག་གི་རིང་ལ་རྒྱ་ནག་གཞུང་གིས་ནད་དུག་དེ་སྦ་གསང་བྱ་རྒྱུར་ཤུགས་སྣོན་གཙོ་བོ་བརྒྱབ་འདུག་ཅེས་སྐྱོན་བཙུགས། དེ་བཞིན་སྲིད་འཛིན་ཌོ་ནལ་ཊམ་གྱི་གཞུང་གི་ཨ་རིའི་ནད་རིགས་སྔོན་འགོག་དང་བཀག་སྡོམ་ཁང་གི་འགན་འཛིན་སྨན་པ་རེ་ཌི་ཧྥིལ་ཌེས་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་རེད་ཅེས་ཤུགས་ཆེན་པོ་བཤད་ཀྱི་ཡོད་ཅིང་། རྒྱ་ནག་གཞུང་གིས་ལོ་གཅིག་ལྷག་ལ་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཉམས་ཞིབ་པ་ཚོ་ཝུ་ཧན་ལ་བརྟག་དཔྱད་བྱེད་དུ་ཡོང་མ་བཅུག་པ། ཐོག་མའི་ཏོག་དབྱིབས་ནད་དུག་གི་དཔེ་མཚོན་དང་ནད་པའི་ཡིག་ཆ་རྣམས་སྦས་གསང་། ལོ་གཅིག་ལྷག་ལ་ཝུ་ཧན་ནད་དུག་བརྟག་དཔྱད་ཁང་དང་ཤ་ཁྲོམ་དེར་དུག་སེལ་བྱས་ནས་མི་ཡོང་དུ་མ་བཅུག་པ། རྒྱ་ནག་གི་ཚན་རིག་པ་ཚོས་ཞིབ་འཇུག་བྱས་ཟིན་པའི་སྙན་ཐོ་ཞིག་འཛམ་གླིང་འཕྲོད་བསྟེན་སྒྲིག་འཛུགས་ཀྱི་བརྟག་དཔྱད་པ་ཚོར་སྤྲད་པ། ཐ་ན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་སྙན་ཐོ་དེའི་ཚན་པ་ཁག་ཅིག་རྒྱ་ནག་གཞུང་གིས་འབྲི་རྩོམ་བྱས་པ་རེད་ཅེས་དོགས་པ་བྱེད་ཀྱི་ཡོད་པས་ཏོག་དབྱིབས་ནད་དུག་གི་འབྱུང་ཁུངས་ཝུ་ཧན་ནད་དུག་བརྟག་དཔྱད་ཁང་མ་རེད་ཅེས་ཐག་བཅད་ནས་མཇུག་སྡོམ་རྒྱག་ཐུབ་ཀྱི་མེད་པ་རེད།།
