༄༅།། ཉེ་ཆར་བྱང་ཀོ་རི་ཡའི་འགོ་ཁྲིད་ཀིམ་ཇོང་ཨུན་བདུན་ཕྲག་གཅིག་ལ་ཨུ་རུ་སུར་འཚམས་འདྲིར་བསྐྱོད། ཁ་སང་གཟའ་མིག་དམར་གྱི་དགོང་མོར་ཀིམ་ཇོང་ཨུན་བྱང་ཀོ་རི་ཡའི་རྒྱལ་ས་ཕིང་དབྱང་ལ་ཕྱིར་ལོག་བྱས་པའི་གནས་ཚུལ་ཐོན་འདུག ཕྱི་ཟླ་༩་པའི་ཚེས་༢༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། བྱང་ཀོ་རི་ཡའི་མཐོ་རིམ་འགོ་ཁྲིད་ཚོ་དང་དམག་དཔུང་རུ་སྒྲིག་བྱས་ནས་ཀིམ་ཇོང་ཨུན་ལ་མེ་འཁོར་འབབ་ཚིགས་སུ་ཕེབས་བསུ་གཟབ་རྒྱས་ཞུས། ད་ཐེངས་ཀྱི་འཚམས་འདྲིའི་སྐབས་སུ་ཀིམ་ཇོང་ཨུན་དང་ཨུ་རུ་སུའི་སྲིད་འཛིན་ཕུ་ཊིན་གཉིས་ཐུག་འཕྲད་གྲོས་མོལ་ཐེངས་འགའ་ཞིག་བྱས་ཀྱང་གྲོས་མོལ་ཅི་བྱུང་དང་གྲོས་མོལ་གྱི་ནང་དོན་རྣམས་ཕྱིར་བསྒྲགས་མ་བྱུང་། གཟའ་འཁོར་སྔོན་མར་ཨུ་རུ་སུའི་རྒྱལ་སྲུང་བློན་ཆེན་སར་གྷེ་ཤོ་གུས་ཀིམ་ཇོང་ཨུན་འཐབ་འཇིང་གནམ་གྲུ་དང་འཕུར་མདེལ། དམག་གྲུའི་བཟོ་གྲྭ་ཁག་ལ་ལྟ་སྐོར་དུ་ཁྲིད། ཀིམ་ཇོང་ཨུན་གྱིས་ཨུ་རུ་སུའི་འཕུར་སྐྱོད་དང་དམག་དོན་འཕྲུལ་རིག་ལག་རྩལ་ལ་བསྔགས་བརྗོད་བྱས།།
ཕྱི་ཟླ་༩་པའི་ཚེས་༡༩་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུ་དང་བྱང་ཀོ་རི་ཡ་གཉིས་ཨ་རི་སོགས་ནུབ་ཕྱོགས་རྒྱལ་ཁབ་ཁག་ལ་འབྲེལ་བ་བཟང་པོ་མེད་ཅིང་། བྱང་ཀོ་རི་ཡར་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཁང་གི་ཚོང་ལས་བཀག་སྡོམ་གྱི་ཉེས་ཆད་ཕོག ལྷག་པར་དུ་ཡུཀ་རེན་གྱི་དམག་འཁྲུག་ལངས་ནས་ཨུ་རུ་སུ་ཡང་བྱང་ཀོ་རི་ཡ་ལྟར་རྒྱལ་སྤྱིའི་ཐོག་ཏུ་གྲོགས་མེད་ཁེར་རྐྱང་དུ་ལུས། ཨུ་རུ་སུ་དང་བྱང་ཀོ་རི་ཡ་གཉིས་ཀས་རྒྱལ་ཚོགས་ཀྱི་བདེ་འཇགས་ལས་འཛིན་ལྷན་ཁང་གི་གྲོས་ཆོད་ཁག་ལ་རྒྱབ་འགལ་བྱས་ནས་མཚོན་ཆ་ཉོ་ཚོང་གི་གྲོས་མཐུན་བཞག་འདུག་ཅེས་ཉམས་ཞིབ་པ་ཚོས་ཚོད་དཔག་བྱས་འདུག ཀིམ་ཇོང་ཨུན་བདུན་ཕྲག་གཅིག་ལ་ཨུ་རུ་སུར་འཚམས་འདྲིར་མ་བསྐྱོད་གོང་དེར་བྱང་ཀོ་རི་ཡའི་མདེའུ་དང་སྒྱོགས་མདེལ་བཟོ་གྲྭ་ཁག་ཏུ་རྟོག་ཞིབ་ཏུ་བསྐྱོད། ཨུ་རུ་སུའི་དམག་ལ་ཡུཀ་རེན་གྱི་དམག་ས་ཁག་ཏུ་མདེའུ་དང་སྒྱོགས་མདེལ་མེད་པར་བྱང་ཀོ་རི་ཡ་ནས་ནང་འདྲེན་བྱེད་ཀྱི་ཡོད་པའི་གནས་ཚུལ་ཐོན་འདུག
ཉམས་ཞིབ་པ་ཚོས་ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་ནས་ལོ་༡་དང་ཟླ་བ་༧་འགྲོ་བཞིན་ཡོད་པས་ཨུ་རུ་སུའི་སྒྱོགས་མདེལ་རྣམས་ཡོངས་སུ་ཟད། ཕུ་ཊིན་དང་ཀིམ་ཇོང་ཨུན་གཉིས་ཀྱིས་བྱང་ཀོ་རི་ཡས་ཨུ་རུ་སུར་སྒྱོགས་མདེལ་བཙོང་རྒྱུ་དང་ཨུ་རུ་སུས་བྱང་ཀོ་རི་ཡར་དམག་དོན་འཕྲུལ་རིག་ལག་རྩལ་སྤྲད་ནས་བྱང་ཀོ་རི་ཡའི་མཚོན་ཆ་རྣམས་དེང་རབས་ཅན་དུ་བསྒྱུར་རྒྱུའི་གྲོས་མཐུན་བྱུང་འདུག་ཅེས་གླེང་། ཉམས་ཞིབ་པ་ཁག་ཅིག་གིས་ཨུ་རུ་སུའི་གཞུང་གིས་རང་གི་དམག་དོན་འཕྲུལ་རིག་ལག་རྩལ་རྣམས་བྱང་ཀོ་རི་ཡར་སྤྲོད་མི་སྲིད། ཕུ་ཊིན་གྱིས་བྱང་ཀོ་རི་ཡར་རྡོ་སྣུམ་དང་སོལ་རླངས། འབྲུ་རིགས་སོགས་རོགས་སྐྱོར་སྤྲོད་རྒྱུ་དང་བྱང་ཀོ་རི་ཡས་ཨུ་རུ་སུར་སྒྱོགས་མདེལ་བཙོང་རྒྱུའི་གྲོས་མཐུན་བཞག་ཡོད་པའི་ཚོད་དཔག་བྱས་འདུག ཁ་སང་གཟའ་མིག་དམར་ཉིན་ལྷོ་ཀོ་རི་ཡའི་གཞུང་གིས་རྒྱལ་ས་སོལ་དུ་བཅའ་སྡོད་ཨུ་རུ་སུའི་གཞུང་ཚབ་པ་འབོད་འགུགས་བྱས་ནས་ཕིང་དབྱང་དང་མོ་སི་ཀོ་གཉིས་དམག་དོན་མཉམ་འབྲེལ་བྱས་ན་ངོ་རྒོལ་ཡོད་ཅེས་དགག་པ་བརྒྱབ།།
ཕྱི་ཟླ་༩་པའི་ཚེས་༡༥་ཉིན་ཀོ་རི་ཡའི་དུས་བབ་ཚགས་པར་ལ་ཨུ་རུ་སུའི་སྲིད་འཛིན་ཕུ་ཊིན་དང་བྱང་ཀོ་རི་ཡའི་འགོ་ཁྲིད་ཀིམ་ཇོང་ཨུན་གཉིས་ཀྱིས་གྲོགས་པོ་བསྒྲིག་རྒྱུ་ནི་ཆོས་ཉིད་རེད། དེང་སྐབས་རྒྱལ་སྤྱིའི་ཐོག་ཏུ་གྲོགས་མེད་ཁེར་རྐྱང་དུ་ལུས་ཡོད་པའི་རྒྱལ་ཁབ་གཉིས་ཀྱི་འབྲེལ་བ་དེ་རྒྱུན་ལྡན་ཞིག་ཏུ་འགྱུར་གྱི་འདུག་ཅེས་བསྟན། ཀོ་རི་ཡའི་རྒྱལ་ཡོངས་གཅིག་གྱུར་ཞིབ་འཇུག་ཁང་གི་ཉམས་ཞིབ་པ་ཆོ་ཧན་བུམ་ནས་ཡུཀ་རེན་གྱི་དམག་འཁྲུག་གིས་ཨུ་རུ་སུ་ནུབ་ཕྱོགས་རྒྱལ་ཁབ་ཁག་གི་དགྲ་ཟླར་གྱུར། ཨུ་རུ་སུ་དང་བྱང་ཀོ་རི་ཡ་གཉིས་ཀར་རང་རང་གི་དཀའ་ངལ་རེ་ཡོད་པས་ཕྱོགས་གཉིས་ཀྱི་འབྲེལ་བ་ཚད་གཞི་མཐོ་རུ་གཏོང་གི་འདུག འདི་ནི་ཨུ་རུ་སུའི་དམར་ཤོག་ལམ་ལུགས་འཐོར་ཞིག་ཕྱིན་པའི་རྗེས་སུ་མྱོང་མེད་པ་ཞིག་རེད། ཨུ་རུ་སུ་དང་བྱང་ཀོ་རི་ཡའི་མཛའ་འབྲེལ་འདི་དུས་ཡུན་ཅི་ཙམ་རིང་བརྟན་རྒྱུ་ཡིན་མིན་ནི་ཡུཀ་རེན་གྱི་དམག་འཁྲུག་ལ་རག་ལས་མོད། འོན་ཀྱང་ཨུ་རུ་སུ་འུ་ཐུག་གི་གནས་ནས་གྲོལ་ཏེ་བྱང་ཀོ་རི་ཡའི་སྒྱོགས་མདེལ་ལ་བརྟེན་མི་དགོས་པའི་མཚམས་སུ་ཕུ་ཊིན་གྱིས་བྱང་ཀོ་རི་ཡར་འབྲེལ་བ་དམ་ཟབ་འཛིན་རྒྱུ་གཙིགས་སུ་འཛིན་མི་སྲིད་ཅེས་བཀྲལ།།
ཀིམ་ཇོང་ཨུན་གྱིས་ཨུ་རུ་སུའི་སྲིད་འཛིན་ཕུ་ཊིན་བྱང་ཀོ་རི་ཡར་འཚམས་འདྲིར་ཕེབས་དགོས་པའི་མགྲོན་འབོད་བྱས་པར་ཕུ་ཊིན་གྱིས་དགའ་མོས་ཐོག་ཏུ་དང་ལེན་བྱས་པར་མ་ཟད། ཕུ་ཊིན་གྱིས་ཨུ་རུ་སུ་དང་བྱང་ཀོ་རི་ཡ་གཉིས་ལ་ཐུན་མོང་མ་ཡིན་པའི་མཛའ་འབྲེལ་གྱི་ལམ་སྲོལ་ཞིག་ཡོད་པ་རྒྱུན་འཁྱོངས་བྱ་རྒྱུ་ཡིན་ཞེས་ཁས་བླངས། ཡིན་ནའང་ཨུ་རུ་སུར་བཅའ་སྡོད་ལྷོ་ཀོ་རི་ཡའི་གཞུང་ཚབ་པ་ཟུར་པ་ཕཱག་ནོ་བྷེ་ཡོག་(Park No-byeok)་གིས་སྐབས་ཤིག་གི་རིང་ཕུ་ཊིན་བྱང་ཀོ་རི་ཡར་འཚམས་འདྲིར་བསྐྱོད་ཐུབ་རྒྱུ་མ་རེད། མགྲོན་འབོད་དེ་རྒྱལ་ཁབ་ཁག་གི་འགོ་ཁྲིད་ཚོ་ཕན་ཚུན་ཐུག་འཕྲད་བྱས་པའི་སྐབས་སུ་སྐད་ཆ་སྙན་པོ་དང་མགྲོན་དུ་ཕེབས་ཤོག་ཅེས་འབོད་སྲོལ་ཡོད་པ་ལྟར་ཡིན་ཞིང་། ཀིམ་ཇོང་ཨུན་གྱི་མགྲོན་འབོད་དེར་དོན་སྙིང་ཆེན་པོ་ཞིག་མེད་པ་དང་ལོ་འདིར་ཕུ་ཊིན་བྱང་ཀོ་རི་ཡར་འཚམས་འདྲིར་བསྐྱོད་ཐུབ་རྒྱུ་ཁག་པོ་རེད་ཅེས་སྨྲས། ཨུ་རུ་སུའི་ཁེ་རིམ་ལིན་སྲིད་འཛིན་ལས་ཁུངས་ཀྱི་ལས་སྣེ་ཚོས་ཀྱང་ཕུན་ཊིན་བྱང་ཀོ་རི་ཡར་འཚམས་འདྲིར་ཕེབས་འཆར་མེད་ཅེས་གསལ་བསྒྲགས་སྤེལ།།
ཉེ་བའི་ལོ་ཤས་ཤིག་ནས་ཨ་མི་རི་དང་རྒྱ་ནག་གི་འབྲེལ་བ་སྡུག་ཏུ་སོང་། ཨུ་རུ་སུས་ཁྱིམ་མཚེས་རྒྱལ་ཁབ་ཡུཀ་རེན་ལ་བཙན་འཛུལ་བྱས་ནས་དམག་འཁྲུག་བསླངས། རྒྱ་ནག་དང་བྱང་ཀོ་རི་ཡ། ཨུ་རུ་སུ་གསུམ་ཕྱོགས་གཅིག་ཏུ་བསྒྲིལ། ཨ་མི་རི་ཀ་དང་ཉི་ཧོང་། ལྷོ་ཀོ་རི་ཡ་དང་ནུབ་ཕྱོགས་རྒྱལ་ཁབ་ཁག་ཕྱོགས་གཅིག་ཏུ་བསྒྲིལ་ནས་འཛམ་གླིང་འདིར་སླར་ཡང་གྲང་དམག་གསར་པ་ཞིག་ལང་རྒྱུའི་ཉེན་ཁ་ཆེ། ལྷོ་ཀོ་རི་ཡའི་ཨེ་ཝ་ཧ་བུད་མེད་སློབ་ཆེན་གྱི་བྱང་ཀོ་རི་ཡ་ཉམས་ཞིབ་སློབ་སློབ་དཔོན་ཕཱག་ཝོན་གྷོན་གྱིས་ཀིམ་ཇོང་ཨུན་དང་ཕུ་ཊིན་གྱི་ཐུག་འཕྲད་གྲོས་མོལ་དེས་རྒྱ་ནག་དང་བྱང་ཀོ་རི་ཡ། ཨུ་རུ་སུ་གསུམ་གྱི་འབྲེལ་བ་བརྟན་པོ་མེད་པ་མཐོང་ཐུབ། ཨུ་རུ་སུ་དང་བྱང་ཀོ་རི་ཡའི་ཐུན་མོང་གི་ཁེ་ཕན་དེ་རྒྱ་ནག་གི་ཁེ་ཕན་ཞིག་ཏུ་འགྱུར་མི་སྲིད། ཀིམ་ཇོང་ཨུན་ནས་ཡུཀ་རེན་གྱི་དམག་འཁྲུག་ཐོག་ཏུ་ཕུ་ཊིན་ལ་མཐའ་གཅིག་ཏུ་རྒྱབ་སྐྱོར་བྱས་ཀྱང་རྒྱ་ནག་གིས་ཡུཀ་རེན་གྱི་དམག་འཁྲུག་ཐོག་ཏུ་ཨུ་རུ་སུར་རྒྱབ་སྐྱོར་མངོན་གསལ་དོད་པོ་བྱས་ནས་ཡུ་རོབ་རྒྱལ་ཁབ་ཁག་དགྲ་རུ་འགྱུར་དུ་འཇུག་འདོད་མེད་པ་ཧ་ཅང་གསལ་པོ་རེད་ཅེས་བཤད་འདུག
ཕྱི་ཟླ་༩་པའི་ཚེས་༡༥་ཉིན་ཕྱི་སྲིད་དུས་དེབ་ལ་གནས་ཚུལ་ཐོན་པ་ལྟར་ན། བྱང་ཀོ་རི་ཡའི་འགོ་ཁྲིད་ཀིམ་ཇོང་ཨུན་པྲོག་དབྱིབས་ནད་ཡམས་ལ་འཛེམས་ནས་ལོ་གསུམ་གྱི་རིང་མཚམས་པ་ལྟར་བསྡད། ཕུ་ཊིན་ལ་རྒྱལ་སྤྱིའི་ཉེས་དོན་ཁྲིམས་ཁང་ནས་དམག་འཁྲུག་གི་ཉེས་ཅན་དུ་བརྩིས་ཏེ་འཛིན་བཟུང་བྱ་དགོས་པའི་བཅད་ཁྲ་བསྒྲགས། གཟའ་འཁོར་སྔོན་མར་ཕུ་ཊིན་དང་ཀིམ་ཇོང་ཨུན་གཉིས་ཐུག་འཕྲད་བྱས་པ་ནི་ཕྱོགས་གཉིས་ཀར་ཛ་དྲག་གི་དགོས་མཁོ་རེ་ཡོད་པ་ཤེས་ཐུབ། ཨུ་རུ་སུ་དང་བྱང་ཀོ་རི་ཡའི་འགོ་ཁྲིད་གཉིས་ཐུག་འཕྲད་གྲོས་མོལ་མ་བྱུང་སྔོན་དུ་ཨུ་རུ་སུའི་རྒྱལ་སྲུང་བློན་ཆེན་སར་གྷེ་ཤོ་གུ་བྱང་ཀོ་རི་ཡར་ཕྱིན་ཏེ་མཚོན་ཆའི་འགྲེམ་སྟོན་ཁག་ལ་བལྟས། ཕུ་ཊིན་གྱིས་ཀིམ་ཇོང་ཨུན་ལ་ཝོ་སི་ཊོ་ཆི་ཎི་མཁའ་དབྱིངས་ལྟེ་གནས་སུ་ཐུག་འཕྲད་བྱས་པ་ནི་ཀིམ་ཇོང་ཨུན་མཁའ་དབྱིངས་ཞིབ་འཇུག་ལ་དོ་སྣང་ཡོད་པས་རེད་ཅེས་བཤད། ཟླ་བ་སྔོན་མར་བྱང་ཀོ་རི་ཡའི་སོ་མྱུལ་གྱི་འཁོར་སྐར་ཞིག་བར་སྣང་དུ་བཏང་སྟེ་ལམ་ལྷོངས་མ་བྱུང་བས་ཨུ་རུ་སུར་རོགས་སྐྱོར་ཞུ་ཡི་ཡོད་པ་ཡིན་སྲིད་ཅེས་གནས་ཚུལ་ཐོན།།
ཀིམ་ཇོང་ཨུན་གྱི་དགོས་མཁོ་ངོ་མ་དེ་ཨུ་རུ་སུའི་དམག་དོན་འཕྲུལ་རིག་ལག་རྩལ་ཡིན་རུང་ཕུ་ཊིན་གྱིས་རང་གི་གཅེས་ནོར་དེ་རྣམས་བྱང་ཀོ་རི་ཡར་སྤྲོད་དཀའ། ཡུཀ་རེན་གྱི་དམག་འཁྲུག་དོན་དུ་ཨུ་རུ་སུར་བྱང་ཀོ་རི་ཡའི་ཡར་ཐོན་འཕུར་མདེལ་རྣམས་དགོས་ཀྱི་ཡོད་ཀྱང་ཀིམ་ཇོང་ཨུན་གྱིས་འཕུར་མདེལ་དེ་རྣམས་རང་གི་རྒྱལ་ཁབ་ཀྱི་སྲུང་སྐྱོབ་ཆེད་དུ་བཞག་ནས་ཨུ་རུ་སུར་བཙོང་མི་སྲིད། ཉམས་ཞིབ་པ་ཁག་ཅིག་གིས་ཨེ་ཤི་ཡའི་བྱང་ཤར་ཁུལ་དུ་ཨུ་རུ་སུ་དང་བྱང་ཀོ་རི་ཡ། རྒྱ་ནག་བཅས་བཙན་དབང་རིང་ལུགས་ཀྱི་རུ་ཚོགས་ཤིག་ཚུགས་སྲིད་པའི་གླེང་སློང་བྱེད་ཀྱི་ཡོད་ཀྱང་ཕུ་ཊིན་དང་ཀིམ་ཇོང་ཨུན་གྱི་ཐུག་འཕྲད་གྲོས་མོལ་སྐབས་སུ་དེའི་རྟགས་མཚན་ཅི་ཡང་མ་ཐོན། གལ་སྲིད་ཨུ་རུ་སུས་ཕྱོགས་ཁག་གསར་པ་ཞིག་བསྒྲིག་རྒྱུ་ཡིན་ན་བྱང་ཀོ་རི་ཡར་མཐུན་གྲོགས་བསྒྲིགས་ན་ཕན་ཐོགས་ཆུང་། ཨུ་རུ་སུར་གནས་སྐབས་རིང་སྒྱོགས་མདེལ་ཚར་ནས་དཀའ་ངལ་འཕྲད་ཀྱི་ཡོད་པ་དང་བྱང་ཀོ་རི་ཡར་སྒྱོགས་མདེལ་མོད་པོ་ཡོད་པས་ཕུ་ཊིན་གྱིས་སྐབས་འཕྲལ་དགོས་མཁོའི་ཆེད་དུ་ཀིམ་ཇོང་ཨུན་ལ་གྲོགས་པོ་སྒྲིག་གི་ཡོད་པ་རེད་ཅེས་གནས་ཚུལ་སྤེལ་འདུག
