ཕྱི་ཟླ་བཅིུག་པའི་ཚེས་༥ཉིན་ཨ་རིའི་ནང་སྲིད་འཛིན་གྱི་འོས་བསྡུ་ཆེན་མོ་བྱ་རྒྱུ་ཡིན་པ་ལྟར་མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་སྲིད་འཛིན་འོས་མི་སོ་སོས་འོས་བསྡུའི་དྲིལ་བསྒྲགས་ཚ་ཚ་འུར་འུར་ངང་གནང་བཞིན་པ་དང་ཆབས་ཅིག དྲིལ་བསྒྲགས་སྤེལ་ཕྱོགས་ལ་འོས་མི་གཉིས་ཀྱི་དབར་དངོས་གསལ་དོད་པོས་ཐབས་ལམ་མི་འདྲ་བ་ལག་ལྟར་བྱེད་བཞིན་པ་མཐོང་རྒྱུ་ཡོད། སྲིད་འཛིན་ཟུར་པ་ཌོ་ནལ་ཊམ་གྱིས་འོས་འཕེན་མི་མང་ཚོར་གཏམ་བཤད་གནང་སྐབས་རྒྱལ་ཁ་ཐོབ་ན་ལས་དོན་བྱེད་ཕྱོགས་དང་སྲིད་ཇུས་ཐད་གཏམ་བཤད་དེ་ཙམ་མ་གནང་བར་མི་མང་ཚོར་ཁོང་གི་ཁ་གཏད་ཧེ་རེ་སེ་ལ་རྒྱལ་ཁ་ཐོབ་ན་རྒྱལ་ཁབ་འདི་ཕྱི་མིས་བཙན་འཛུལ་བྱེད་ཀྱི་རེད་ཅེས་དང་། ཡང་མང་གཙོ་ཚོགས་པའི་སྲིད་འཛིན་འོས་མི་ཀ་མ་ལཱ་ ཧེ་རེ་སེས་ ཁོང་གིས་ཁ་གཏད་སྲིད་འཛིན་ཟུར་པ་ཊམ་འོས་འདེམས་བྱུང་བ་ཡིན་ཚེ་ང་ཚོའི་རྒྱལ་ཁབ་འདི་གཏོར་གཤིག་གཏོང་གི་རེད་ཅེས་སོགས་ཧ་ཅང་ཡིད་རྨུགས་པའི་ཚོར་སྣང་དང་ཞེ་སྣང་དངངས་འཚབ་ཀྱི་ཚོར་བ་ཞིག་བསྐྲུན་ཏེ་ཁུངས་སོ་སོར་འོས་ཤོག་འཕེན་དགོས་པའི་རེ་སྐུལ་གནང་གི་ཡོད།
ཡང་ལྕམ་ཀ་མ་ལཱ་ ཧེ་རེ་སེས་སྐུ་ཞབས་ཊམ་གྱིས་ཡིད་རྨུགས་དགོས་པའི་སེམས་ཚོར་བསྐྲུན་གནང་པ་ཁག་ལ་ལྡོག་ཕྱོགས་ཀྱི་ཐབས་ལམ་ཞིག་འཛིན་ནས་མི་མང་ཚོར་སྤྲོ་སྣང་གི་ཚོར་བ་བསྐྲུན་ཐབས་གནང་ནས་མི་མང་གི་བློ་འགུག་ཐབས་གནང་གི་ཡོད། ཐབས་བྱུས་དེ་ནི་སྐུ་ཞབས་ཊམ་གྱི་གནང་ཕྱོགས་དང་མི་འདྲ་བ་ཡིན་པ་མ་ཟད། ཁོང་གིས་མང་གཙོ་ཚོགས་པའི་སྲིད་འཛིན་འོས་མི་རྩིས་བཞེས་གནང་ཡུལ་ལས་ཐོག་སྲིད་འཛིན་ཇོ་བྷའི་ཌན་གྱི་གནང་ཕྱོགས་དང་རྒྱབ་འགལ་ཡིན་པ་རེད། སྲིད་འཛིན་བྷ་ཌན་གྱིས་སྲིད་འཛིན་ཟུར་པ་ཊམ་ལ་རྒྱལ་ཁ་ཐོབ་ཚེ་ཨ་རིའི་མང་གཙོར་ཕམ་ཉེས་འགྲོ་རྒྱུ་ཡིན་པ་སོགས་ཡིད་རྨུགས་དགོས་པའི་གནས་ཚུལ་མང་པོ་ཞིག་ཡོང་ཉེན་ཡོད་སྐོར་གསུངས་ཡོད། འོས་མི་གཉིས་མི་འདྲ་བའི་ཁྱད་པར་གཅིག་ནི་ལྕམ་ཀ་མ་ལཱ་ ཧེ་རེ་སེས་གནད་དོན་དང་ལངས་ཕྱོགས་ཇི་འདྲ་འཛིན་མིན་ཐད་དེ་ཙམ་གླེང་སློང་མ་གནང་བ་མ་ཟད། གསར་འགྱུར་བརྒྱུད་ལམ་ཁག་ལ་བཅར་འདྲིར་དང་ལེན་ཉུང་ཤས་ལས་གནང་མེད་པ་དེ་ཡིན་ནའང་། མང་ཚོགས་འདུ་འཛོམས་ཐོག་ཧ་ཅང་དགའ་ཚོར་དང་སྤྲོ་སྣང་ལྡན་པའི་རྣམ་པ་ཞིག་སྟོན་དང་སྟོན་བཞིན་པ་དེས་འདས་པའི་ཟླ་བ་གཅིག་ཙམ་གྱི་གོང་ཆབ་སྲིད་ཀྱི་འགོ་ཁྲིད་བགྲེས་སོང་གཉིས་ཀྱིས་ཧ་ཅང་དཀའ་རྙོག་དང་དཀའ་ཚེགས་ཅན་གྱི་རྒྱལ་ཁབ་ཤིག་ཏུ་འགྱུར་ཉེན་འབུར་སྟོན་གནང་ནས་མི་རྣམས་ཡིད་ཐང་ཆད་བཅུག་པའི་སྐབས་འདིར་ལས་དོན་གྱི་སྲིད་ཇུས་ཇི་འདྲ་འཛིན་མིན་གསལ་ཁ་སྟོན་མེད་ནའང་། འོས་འཕེན་མཁན་མི་མང་ཚོར་སྤྲོ་སྣང་འཕེལ་བའི་ཚོར་བ་ཞིག་བསྐྲུན་ཐབས་གནང་ཡོད་ཅིང་། དབྱེ་ཞིབ་པས་བྱས་ན་གནས་སྟངས་དེས་སྤྱི་ཚོགས་ཁྲོད་དེ་སྔ་འོས་བསྡུར་དོ་སྣང་དེ་ཙམ་མི་བྱེད་མཁན་མི་མང་ཧ་ཅང་མང་པོས་ད་ལོའི་འོས་བསྡུར་དོ་སྣང་གསར་པ་ཞིག་བྱེད་དགོས་གྱུར་ཡོད་པ་དང་། དེའི་རྒྱུ་མཚན་གཙོ་བོ་དེ་ནི་སྲིད་འཛིན་འོས་མི་ཀ་མ་ལཱ་ ཧེ་རེ་སེས་སྤྲོ་སྣང་གི་ཚོར་བའི་སྒོ་ནས་འོས་བསྡུའི་དྲིལ་བསྒྲགས་སྤེལ་བར་བརྟེན་ཡིན་སྐོར་འགྲེལ་བརྗོད་བྱེད་ཀྱི་ཡོད།
གསར་འགོད་པ། པདྨ་བདེ་ཆེན།
ཞུ་དག་རྩོམ་སྒྲིག་པ། རྣམ་རྒྱལ་ཤཱསྟྲཱི།
གླེང་སྟེགས།