མིག་ལྔའི་གསང་བའི་གནས་ཚུལ་གཞིར་བཟུང་གིས་རྒྱ་གར་ལ་ཉེས་འཛུགས། 

༄༅།། ཁེ་ན་ཌར་བཅའ་སྡོད་ཨ་རིའི་གཞུང་ཚབ་པས་མིག་ལྔའི་གསང་བའི་ལས་ཁུངས་ཀྱི་གནས་ཚུལ་གཞིར་བཟུང་གིས་ཁེ་ན་ཌའི་གཞུང་ནས་རང་གི་ས་ཐོག་ཏུ་སིག་རྒྱ་བོ་ཁ་བྲལ་རིང་ལུགས་པ་ཞིག་ལྐོག་གསོད་བྱུང་བར་རྒྱ་གར་གཞུང་འབྲེལ་བ་ཡོད་སྲིད་པའི་སྐྱོན་འཛུགས་བྱ་ཕོད་པ་བྱུང་བ་རེད་ཅེས་བསྟན། ཕྱི་ཟླ་༩་པའི་ཚེས་༢༤་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། མིག་ལྔ་ནི་ཨ་རི་དང་དབྱིན་ཇི། ཁེ་ན་ཌ་དང་ཨོ་གླིང་། ནེའུ་ཛི་ལན་ཌི་བཅས་རྒྱལ་ཁབ་ལྔའི་མཉམ་འབྲེལ་གསང་བའི་ལས་ཁུངས་ལ་གོ་དགོས་ཤིང་། ཁ་སང་གཟའ་ཉི་མའི་ཉིན་ཁེ་ན་ཌའི་བརྙན་འཕྲིན་ཁང་གིས་ཨ་རིའི་གཞུང་ཚབ་པ་ཌེ་ཝི་ཌི་ཀོ་ཧན་ལ་བཅར་འདྲི་ཞུས་པའི་སྐབས་སུ་མིག་ལྔའི་རྒྱལ་ཁབ་ཁག་གིས་ཕན་ཚུན་གསང་བའི་གནས་ཚུལ་སྤྲོད་རེས་བྱེད་ཀྱི་ཡོད་པ་རེད། ཁེ་ན་ཌའི་སྲིད་བློན་གྱིས་མིག་ལྔའི་གསང་བའི་གནས་ཚུལ་ལ་བརྟེན་ནས་རྒྱ་གར་ལ་སྐྱོན་འཛུགས་བྱས་པ་རེད་ཅེས་བསྒྲགས། ཡིན་ནའང་ཨ་རིའི་གཞུང་ཚབ་པས་གསང་བའི་གནས་ཚུལ་དེའི་འབྱུང་ཁུངས་ཨ་མི་རི་ཀ་ཡིན་མིན་ངེས་གཏན་བྱས་མེད་པའི་གནས་ཚུལ་ཐོན་འདུག

བདུན་ཕྲག་སྔོན་མར་ཁེ་ན་ཌའི་སྲིད་བློན་གྱིས་ང་ཚོའི་ས་ཐོག་ཏུ་རྒྱ་གར་བ་སིག་རྒྱ་བོ་ཧར་དིབ་སིང་ཎི་ཇཱར་ལྐོག་གསོད་བྱུང་བ་དེའི་རྒྱབ་ཏུ་ལྡི་ལི་གསར་པ་ཡོད་པའི་རྟགས་མཚན་ཁུངས་འཕེར་འདུག ཁེ་ན་ཌའི་གཞུང་གིས་དེ་ལ་རྩད་གཅོད་བྱེད་ཀྱི་ཡོད་ཅེས་གསལ་བསྒྲགས་སྤེལ། ཉེ་ཆར་ཕྱི་ཟླ་༦་པའི་ཚེས་༡༨་ཉིན་ཁེ་ན་ཌའི་ནུབ་ཕྱོགས་སུ་ཆགས་པའི་སུ་རཱེ་ས་གནས་སུ་གདོང་འབག་གྱོན་པའི་མི་གཉིས་ཀྱིས་མེ་མདའ་བརྒྱབ་སྟེ་ཧར་དིབ་སིང་ཎི་ཇཱར་བསད། རྒྱ་གར་གཞུང་གིས་ཁེ་ན་ཌའི་སྐྱོན་འཛུགས་དེར་ངོས་ལེན་གཏན་ནས་བྱེད་ཀྱི་མེད་པ་སྟེ། རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་ཨ་རིན་དམ་བྷག་ཆིས་(Arindam Bagchi)་ཁེ་ན་ཌའི་སྐྱོན་འཛུགས་དེར་དཔང་རྟགས་ཅི་ཡང་མི་འདུག་ཅེས་དགག་པ་བརྒྱབ། ཁེ་ན་ཌ་དང་རྒྱ་གར་གཉིས་ཀས་ཕྱི་འབྲེལ་མི་སྣ་ཕྱིར་ཕུད་བྱ་རེས་བྱས་ཏེ་ཕྱོགས་གཉིས་ཀྱི་འབྲེལ་བ་སྡུག་ཏུ་སོང་། གཟའ་འཁོར་སྔོན་མར་རྒྱ་གར་གཞུང་གིས་ཁེ་ན་ཌའི་སྤྱི་དམངས་ཚོར་ཐོངས་མཆན་སྤྲོད་རྒྱུ་ངང་འཐེན་བྱས་པ་དང་ཨ་རིའི་ཟླ་གྲོགས་རྒྱལ་ཁབ་གཉིས་ཀྱི་འབྲེལ་བ་དེ་ཁྱད་མཚར་ཞིག་ཏུ་གྱུར།།

ཨ་རིའི་གཞུང་ཚབ་པས་ཁེ་ན་ཌའི་སྐྱོན་འཛུགས་བྱེད་ཀྱི་ཡོད་པར་ཨ་མི་རི་ཀར་བློ་འཚབ་ཡོད། རྒྱ་གར་གྱིས་ཁེ་ན་ཌར་མཉམ་འབྲེལ་བྱས་ནས་ཉེས་དོན་དེར་རྩད་གཅོད་བྱ་དགོས་པའི་ནན་སྐུལ་བྱས་པ་ཡིན། གལ་སྲིད་ཁེ་ན་ཌའི་སྐྱོན་འཛུགས་དེ་བདེན་པ་ཡིན་ན་རྒྱལ་སྤྱིའི་ཁྲིམས་ལ་འགལ་འཛོལ་ཆེན་པོ་ཞིག་བྱུང་བ་རེད་ཅེས་ཁེ་ན་ཌའི་བརྙན་འཕྲིན་ཁང་གི་གསར་འགོད་པའི་དྲི་བ་ཁག་ལ་ལན་བཏབ། གཟའ་ཉི་མའི་ཉིན་ཁེ་ན་ཌའི་རྒྱང་སྲིང་ཁང་གིས་རྒྱལ་སྲུང་བློན་ཆེན་བྷིལ་བྷ་ལེར་(Bill Blair)་ལ་བཅར་འདྲི་ཞུས་པ་དང་རྒྱལ་སྲུང་བློན་ཆེན་གྱིས་ཧར་དིབ་སིང་ཎི་ཇཱར་བསད་པའི་ཉེས་དོན་དེར་ཞིབ་འཇུག་བྱ་དགོས། མིག་ལྔའི་གསང་བའི་ལས་ཁུངས་ནི་ཧ་ཅང་གི་གནད་འགག་ཆེན་པོ་ཡིན། ཁེ་ན་ཌར་གསང་བའི་གནས་ཚུལ་ཁུངས་ཐུབ་ཡོད། ངས་རྩད་གཅོད་བྱ་དགོས་ཟེར་དོན་ནི་དོགས་པ་ཐམས་ཅད་སེལ་ཐབས་དང་དཔང་རྟགས་ཁུངས་འཕེར་ཐོན་ཐབས། རྒྱ་གར་གཞུང་དོགས་པ་སངས་ཐུབ་པ་དང་བདེན་པ་ར་སྤྲོད་བྱུང་བའི་རྗེས་སུ་གནད་དོན་དེ་འོས་འཚམས་ཀྱི་ལམ་ནས་ཐག་གཅོད་བྱ་དགོས་ཟེར་ཡོད་ཅེས་བཤད་མོད། འོན་ཀྱང་ཁེ་ན་ཌའི་རྒྱལ་སྲུང་བློན་ཆེན་གྱིས་གསང་བའི་གནས་ཚུལ་དེའི་འབྱུང་ཁུངས་གང་ཡིན་ཕྱིར་བསྒྲགས་མ་བྱུང་།།

བདུན་ཕྲག་སྔོན་མའི་གཟའ་ཕུར་བུའི་ཉིན་ཁེ་ན་ཌའི་སྲིད་བློན་ནས་རྒྱ་གར་གྱིས་ཕྱི་གསལ་ནང་གསལ་དང་ཁྲིམས་ལ་བརྩི་བའི་འགན་འཁྲི་ལེན་དགོས། རྒྱ་གར་གཞུང་གིས་ཁེ་ན་ཌར་མཉམ་འབྲེལ་བྱས་ནས་ཉེས་དོན་དེར་རྩད་གཅོད་བྱ་དགོས་པ་དང་ང་ཚོས་རྒྱ་གར་ལ་འཁྲུག་རྩོད་སློང་བའམ། ཡང་ན་ཕྱོགས་གཉིས་བར་དུ་འགལ་ཟླ་སློང་གི་མེད། མི་གསོད་ཀྱི་ཉེས་དོན་དེར་ཞིབ་འཇུག་དྲང་སྙོམས་དང་ཁྲིམས་ལུགས་ལ་མཐུན་པ་ཞིག་བྱ་དགོས་ཟེར་གྱི་ཡོད་ཅེས་ནན་བརྗོད་བྱས་འདུག རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་བྷག་ཆིས་ཉིན་དེར་ཁེ་ན་ཌ་ནི་འཇིགས་སྐུལ་རིང་ལུགས་པ་རྣམས་འདུ་ཡུལ་ཞིག་རེད། ཁེ་ན་ཌས་ཁུངས་མེད་སྐྱོན་འཛུགས་བྱས་ནས་རྒྱལ་སྤྱིའི་ཐོག་ཏུ་མིང་ཤས་ངན་པ་འཕོག་རྒྱུ་དེར་བསམ་བློ་ཐོངས། ཁེ་ན་ཌའི་དབང་འཛིན་པ་ཚོས་དྲག་སྤྱོད་སློང་བའི་ངན་སྐུལ་དང་དྲག་སྤྱོད་འགོག་གི་མེད་པས་ཁེ་ན་ཌའི་སྤྱི་དམངས་ཚོ་རྒྱ་གར་དུ་ཡོང་ཆོག་པའི་ཐོངས་མཆན་སྤྲོད་རྒྱུ་ངང་འཐེན་བྱས་པ་ཡིན་ཞེས་རྒྱུ་མཚན་བགྲངས།།

རྒྱ་གར་གཞུང་གིས་སྔ་མོ་ནས་སིག་རྒྱ་བོ་ཁ་བྲལ་རིང་ལུགས་པ་དང་མཐའ་ལྷུང་རིང་ལུགས་པ་རྣམས་ཁེ་ན་ཌར་འདུས་འདུག ཁོ་ཚོས་རྒྱ་གར་གྱི་པན་ཇབ་མངའ་སྡེ་ཁ་ལི་སི་ཐན་རང་བཙན་རྒྱལ་ཁབ་ཏུ་བསྒྱུར་རྒྱུའི་ལས་འགུལ་སྤེལ་གྱི་ཡོད་ཀྱང་ཁེ་ན་ཌའི་གཞུང་གིས་དེ་ལ་གནོན་སྡོམ་བྱེད་ཀྱི་མི་འདུག ཁ་ལི་སི་ཐན་རང་བཙན་ལས་འགུལ་རྒྱ་གར་གྱི་བདེ་འཇགས་དང་མངའ་ཁོངས་གོང་བུ་གཅིག་གྱུར་ལ་ཉེན་ཁ་ཞིག་རེད་ཅེས་སྐྱོན་བཙུགས། ཧར་དིབ་སིང་ཎི་ཇཱར་ནི་ཁ་ལི་སི་ཐན་རང་བཙན་འཐབ་རྩོད་ཀྱི་རྒྱབ་སྐྱོར་བ་གཙོ་གྲས་ཤིག་ཡིན་ཞིང་། རྒྱ་གར་གཞུང་གིས་ཁ་ལི་སི་ཐན་རང་བཙན་ལས་འགུལ་ཚོགས་པ་ཁག་འཇིགས་སྐུལ་རིང་ལུགས་པའི་སྒྲིག་འཛུགས་རེད། ཧར་དིབ་སིང་ཎི་ཇཱར་གྱིས་འཛམ་གླིང་ཡོངས་ཀྱི་སིག་རྒྱ་བོ་རྣམས་དྲག་སྤྱོད་པར་སྒྱུར་ཐབས་བྱེད་ཀྱི་འདུག་ཅེས་ནག་ཉེས་བཙུགས་པར་མ་ཟད། ༢༠༢༠་ལོར་རྒྱ་གར་གཞུང་གིས་ཧར་དིབ་སིང་ཎི་ཇཱར་ཐོ་གཞུང་ནག་པོར་བཀོད། སིག་རྒྱ་བོའི་ཚོགས་ཁག་གིས་ང་ཚོ་འཇིགས་སྐུལ་རིང་ལུགས་པ་མིན། ང་ཚོས་ཞི་བའི་སྒོ་ནས་ཁ་ལི་སི་ཐན་རང་བཙན་རྒྱལ་ཁབ་འཛུགས་ཐབས་བྱེད་ཀྱི་ཡོད་ཅེས་བཀྲལ།།

ཕྱི་ཟླ་༩་པའི་ཚེས་༢༤་ཉིན་རྒྱ་གར་གྱི་མིན་ཊི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་སིག་རྒྱ་བོ་ཚོར་རང་བཙན་གྱི་ཡུལ་ལུང་ཞིག་ལོགས་སུ་དགོས་པའི་ལྟ་ཚུལ་དེ་གསར་པ་གང་ཡང་མ་རེད། ༡༩༤༧་ལོར་རྒྱ་གར་ལ་དབྱིན་ཇིའི་དབང་བསྒྱུར་འོག་ནས་རང་བཙན་ཐོབ་པའི་རྗེས་སུ་སིག་རྒྱ་བོ་ཁག་ཅིག་གིས་ཁ་ལི་སི་ཐན་རང་བཙན་རྒྱལ་ཁབ་འཛུགས་དགོས་པའི་ལྟ་བ་བཅངས།། དུས་རབས་སྔོན་མའི་ལོ་རབས་༨༠་པ་དང་ལོ་རབས་༩༠་པའི་ནང་དུ་ཁ་ལི་སི་ཐན་རང་བཙན་ལས་འགུལ་གྱི་ངར་ཤུགས་རྒྱས། སིག་རྒྱ་བོ་ཚོས་གྱེན་ལོག་བྱས་ནས་དྲག་ཟིང་བསླངས་པ་རྒྱལ་ས་ལྡི་ལིའི་ཕྱོགས་སུ་ཁྱབ་སྟེ་མི་སྟོང་ཕྲག་མང་པོའི་ཚེ་སྲོག་ཤོར། རྒྱ་གར་གྱི་དམག་གིས་སིག་རྒྱ་བོའི་གནས་མཆོག་གསེར་གྱི་ལྷ་ཁང་ལ་དཔུང་འཇུག་བྱས་པ་དང་སིག་རྒྱ་བོའི་སྐུ་སྲུང་བ་ཞིག་གིས་སྲིད་བློན་ཨིན་དྷི་ར་གྷན་དྷི་བཀྲོངས་ནས་དགྲ་ལན་བསློགས་པ་ནི་རྒྱ་གར་གྱི་ཉེ་རབས་ལོ་རྒྱུས་ཀྱི་བྱུང་བ་ཡ་ང་བ་གཉིས་རེད། གསེར་གྱི་ལྷ་ཁང་ལ་དཔུང་འཇུག་དང་ཨིན་དྷི་ར་གྷན་དྷི་བཀྲོངས་པའི་རྗེས་སུ་སིག་རྒྱ་བོ་ཁྲི་ཚོ་མང་པོ་བསད་པ་དང་ཞེ་འཁོན་དེ་ནམ་ཡང་སངས་ཐུབ་མེད་པ་ཞིག་ཏུ་གྱུར་ཡོད་པའི་གནས་ཚུལ་ཐོན་འདུག

དེང་སྐབས་ཁེ་ན་ཌ་གཅིག་པུར་སིག་རྒྱ་བོ་འབུམ་༧་དང་ཁྲི་ཚོ་༧་ལྷག་ཡོད་ཅིང་། སིག་རྒྱ་བོ་ཁྲི་ཚོ་མང་པོ་རང་ཡུལ་ནས་དབྱིན་ཡུལ་དང་ཨ་རི། ཁེ་ན་ཌ་སོགས་ལ་གནས་སྤོས་ཀྱང་སྔར་བཞིན་ཁ་བྲལ་གྱི་ལས་འགུལ་སྤེལ། སིག་རྒྱ་བོའི་གནས་མཆོག་གསེར་གྱི་ལྷ་ཁང་ལ་རྒྱ་གར་གྱི་དམག་གིས་དཔུང་འཇུག་བྱས་པ་དང་ཨིན་དྷི་ར་གྷན་དྷི་བཀྲོངས་པའི་རྗེས་སུ་རྒྱ་གར་རྒྱལ་ཡོངས་སུ་སིག་རྒྱ་བོ་སྟོང་ཕྲག་མང་པོ་དམར་གསོད་དང་གསོན་བསྲེགས། སིག་རྒྱ་བོའི་ཚོང་ལས་དང་རྒྱུ་དངོས་རྣམས་འཕྲོག་བཅོམ་བྱས་པ་སེམས་ལ་བཟུང་སྟེ་མི་རབས་རྒན་པས་མི་རབས་གསར་པ་ཚོར་བསླབས་ནས་བརྗེད་དུ་མ་བཅུག རྒྱ་གར་རྒྱལ་ཡོངས་སུ་སིག་རྒྱ་བོའི་མི་འབོར་ས་ཡ་༢༣་ཡོད་པ་དེའི་ཁོངས་སུ་ཁ་ལི་སི་ཐན་རང་བཙན་རྒྱལ་ཁབ་འཛུགས་དགོས་ཞེས་འཐབ་རྩོད་བྱེད་མཁན་ཉུང་ཤས་ལས་མེད། ༡༩༨༥་ལོར་རྒྱ་གར་གྱི་འགྲུལ་སྐྱེལ་གནམ་གྲུ་ཞིག་གི་ནང་དུ་འབར་མདེལ་སྦས་ནས་མི་༣༢༩་བསད་པ་དེ་ཁེ་ན་ཌར་གནས་འཁོད་སིག་རྒྱ་བོ་ཚོས་བྱས་པ་ཞིག་ཡིན་པའི་རྣམ་པ་ཐོན།།

ཨ་རིའི་འཇོར་ཇཱི་ཊོང་སློབ་གྲྭ་ཆེན་མོའི་སློབ་དཔོན་སི་ཁེ་རི་སི་ཊིན་ཧྥེར་(C. Christine Fair)་གྱིས་སིག་རྒྱ་བོ་ཚོས་དྲིག་ཟིང་སློང་གི་ཡོད་པར་རྒྱུ་རྐྱེན་འགའ་ཞིག་འདུག པན་ཇབ་མངའ་སྡེའི་དཔལ་འབྱོར་དེ་རྒྱ་གར་གྱི་དཔལ་འབྱོར་འཕེལ་རྒྱས་ལྟར་གོང་འཕེལ་འགྲོ་མ་ཐུབ། ན་གཞོན་ཚོར་གླ་ཕོགས་མཐོན་པོའི་ལས་ཀ་མ་རག ༢༠༢༠་དང་༢༠༢༡་ལོར་སིག་རྒྱ་བོའི་ཞིང་པ་ཚོས་ཟླ་བ་མང་པོར་ངོ་རྒོལ་བྱས་པའང་མང་ཚོགས་ལ་དཀའ་ངལ་ཡོད་པ་མཚོན་ནུས། རྒྱ་གར་གཞུང་གིས་ངེས་པར་དུ་མ་རྩ་བཙུགས་ནས་ན་གཞོན་མ་དང་བུད་མེད་ཀྱི་འཕྲོད་བསྟེན་ལྟ་སྐྱོང་ཡར་རྒྱས། པན་ཇབ་མངའ་སྡེའི་རྨང་གཞིའི་མཐུན་རྐྱེན་འཛུགས་སྐྲུན་བྱས་ནས་མངའ་སྡེ་དེའི་ན་གཞོན་ཚོའི་གནས་སྟངས་ཡར་རྒྱས་གཏོང་རྒྱུ་དེ་གོམ་སྟབས་དང་པོ་རེད། པན་ཇབ་མངའ་སྡེའི་དཀའ་ངལ་སེལ་རྒྱུ་ལས་སླ་པོ་ཞིག་མིན་རུང་གནད་དོན་དེ་ཐག་གཅོད་མ་བྱས་ཚེ། ད་ལྟའི་རྒྱ་གར་གཞུང་དང་མ་འོངས་པའི་རྒྱ་གར་གྱི་སྲིད་གཞུང་རིམ་པར་དཀའ་ངལ་འདི་ལས་ཆེ་བ་ཞིག་འཕྲད་ཤས་ཆེ། རྒྱ་གར་ཕྱི་ནང་གཉིས་ཀྱི་སིག་རྒྱ་བོའི་ན་གཞོན་ཚོས་སྡང་ཟུག་བྱས་ནས་མི་རིགས་དང་ཆོས་ལུགས་འཐེན་འཁྱེར་སློང་རྒྱུའི་ཉེན་ཁ་འདུག་ཅེས་ཉེན་བརྡ་བཏང་འདུག

ཕྱི་ཟླ་༩་པའི་ཚེས་༢༥་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། སིག་རྒྱ་བོ་ཞིག་ལྐོག་གསོད་བྱུང་བ་དེའི་ཐོག་ཏུ་རྒྱ་གར་དང་ཁེ་ན་ཌ་གཉིས་ཀྱི་འབྲེལ་བ་སྡུག་ཏུ་ཕྱིན་ཏེ་པན་ཇབ་མངའ་སྡེ་ནང་དང་ཕྱི་རྒྱལ་ཡུལ་གྲུ་ཁག་ཏུ་གནས་འཁོད་སིག་རྒྱ་བོ་ཚོར་རྒྱ་གར་གྱི་ཧིན་རྡུ་མི་རིགས་རིང་ལུགས་པ་ཚོས་གཏོར་རྒོལ་བྱ་རྒྱུའི་ཉེན་ཁ་འབྱུང་སྲིད། ལོ་ན་༣༡་ལ་སོན་པའི་སན་དིབ་སིང་ཞེས་པའི་སིག་རྒྱ་བོ་ཞིག་གིས་སྲིད་བློན་མོ་དྷིའི་གཞུང་གིས་འཇིགས་སྐུལ་གྱི་ཁོར་ཡུག་ཅིག་སྐྲུན་གྱི་འདུག ཁྱད་པར་དུ་ན་གཞོན་ཚོར་དངངས་སྐྲག་ཡོང་གི་འདུག ང་ཚོས་ངོ་རྒོལ་བྱས་ན་ཕ་མ་ཚོར་རང་གི་བུ་ཕྲུག་རྣམས་ཧར་དིབ་སིང་ཎི་ཇཱར་ལྟར་གསོད་སྲིད་པའི་སེམས་ཁྲལ་ཡོང་གི་འདུག་ཅེས་བཤད། ལོ་ན་༡༩་ལ་སོན་པའི་གུར་སིམ་རན་སིང་ཞེས་པའི་སིག་རྒྱ་བོ་ཞིག་གིས་ང་ཁེ་ན་ཌར་སློབ་སྦྱོང་བྱེད་དུ་བསྐྱོད་འདོད་ཡོད། ཁེ་ན་ཌའི་གཞུང་གིས་རྒྱ་གར་ལ་ལན་པ་བསློགས་ནས་ཐོངས་མཆན་འགོག་རྒྱུ་ཡིན་མིན་དང་རྒྱ་གར་གཞུང་གིས་པན་ཇབ་ཀྱི་སློབ་ཕྲུག་ཚོར་ཁེ་ན་ཌར་སློབ་སྦྱོང་བྱེད་དུ་གཏོང་རྒྱུ་ཡིན་མིན་ཐད་བློ་གཡེང་འདུག་ཅེས་བཤད་པའི་གནས་ཚུལ་ཐོན་འདུག