༄༅།། ཡུཀ་རེན་གྱི་དམག་གིས་རྒྱལ་ཁབ་དེའི་ཤར་ཕྱོགས་དང་ལྷོ་ཕྱོགས་གཉིས་སུ་ཨུ་རུ་སུའི་དམག་ལ་ཕར་རྒོལ་བྱེད་ཀྱི་ཡོད་ཀྱང་དཔུང་འཇུག་དེར་གྲུབ་འབྲས་ཆེན་པོ་ཞིག་ཐོན་མེད་ཅིང་། ཕྱི་ཟླ་༧་པའི་ཚེས་༣་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། འདས་པའི་གཟའ་འཁོར་དེར་ཡུཀ་རེན་གྱི་ལྷོ་ཤར་གཉིས་སུ་ཨུ་རུ་སུའི་དམག་གིས་བཙན་ས་བཟུང་སྟེ་འགོག་རྒོལ་དྲག་པོ་བྱུང་། ཡུཀ་རེན་གྱི་དམག་གིས་ས་ཆ་སྤྱི་ལེ་གྲུ་བཞི་མ་༣༧.༤་ལས་ཕྱིར་ལེན་མ་ཐུབ། ཡུཀ་རེན་གྱི་རྒྱལ་སྲུང་བློན་ཆེན་གཞོན་པ་ཧ་ན་མ་ལིར་(Hanna Maliar)་གྱིས་ཌོ་ནེ་ཛིཀ་ས་གནས་ཀྱི་མ་རིན་ཀ་དང་ལི་མན། ཨབ་ཌིབ་ཀ་བཅས་ས་གནས་ཁག་ཏུ་དཔུང་འཇུག་བྱེད་ཀྱི་ཡོད། ས་གནས་དེར་འཐབ་འཁྲུག་དྲག་པོ་རྒྱག་བཞིན་འདུག གཟའ་འཁོར་སྔོན་མར་ཡུཀ་རེན་གྱིས་ཤར་ཕྱོགས་ནས་ས་ཆ་སྤྱི་ལེ་གྲུ་བཞི་མ་༩་དང་ལྷོ་ཕྱོགས་ནས་ས་ཆ་སྤྱི་ལེ་གྲུ་བཞི་མ་༢༨.༤་ཕྱིར་ལེན་ཐུབ་སོང་། ད་ལོའི་ཕར་རྒོལ་རྗེས་སུ་ཁྱོན་བསྡོམས་ས་ཁྱོན་སྤྱི་ལེ་གྲུ་བཞི་མ་༡༥༨.༤་ཕྱིར་ལེན་བྱས་ཡོད་ཅེས་དར་འཕྲིན་དྲྭ་ལམ་དུ་འཕྲིན་ཐུང་ཞིག་སྤེལ།།
ཕྱི་ཟླ་༧་པའི་ཚེས་༢་ཉིན་ཧྥ་རན་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཡུཀ་རེན་གྱི་རྒྱལ་སྲུང་བློན་ཆེན་གཞོན་པ་མ་ལིར་གྱིས་ནུབ་ཕྱོགས་རྒྱལ་ཁབ་ཁག་གིས་F-16་རྟགས་ཅན་གྱི་འཐབ་འཛིང་གནམ་གྲུ་སོགས་ཡར་ཐོན་མཚོན་ཆ་རོགས་རམ་སྤྲོད་རྒྱུ་ཤུགས་ཆེ་རུ་གཏོང་དགོས། ད་ལོའི་ཕར་རྒོལ་འདི་ལས་སླ་པོ་ཞིག་མི་འདུག ཤར་ཕྱོགས་ཀྱི་བྷག་མུ་ཏ་དང་ལྷོ་ཕྱོགས་ཀྱི་མེ་ལི་ཏོ་པོལ། བྷེར་ཌི་ཡན་སི་ཀི་སོགས་ནས་མདུན་སྐྱོད་ཆེན་པོ་ཞིག་བྱེད་དཀའ། ཨུ་རུ་སུའི་རྒྱབ་གནོན་དམག་དཔུང་བསླེབས་པ་དང་ས་མེ་སྤས་འཇོག ང་ཚོས་ས་མེ་གཙང་སེལ་དང་ཕར་རྒོལ་བྱེད་ཞོར་དུ་མདུན་སྐྱོད་བྱ་དགོས་ཀྱི་འདུག ཡིན་ནའང་ཡུཀ་རེན་གྱི་དམག་དཔུང་ཕྱི་ནུད་མེད་པ་དང་དཔའ་སྟོབས་ཞུམ་པ་མེད་པར་ཕར་རྒོལ་རིམ་བཞིན་བྱེད་ཀྱི་ཡོད་ཅེས་བཀྲལ། ཁ་སང་གཟའ་ཉི་མའི་ཉིན་ཨུ་རུ་སུས་ཁ་ལོ་བ་མེད་པའི་འཕུར་གྲུ་བཏང་སྟེ་ཡུཀ་རེན་གྱི་རྒྱལ་སར་གཏོར་རྒོལ་བྱས་ཀྱང་འཕུར་གྲུ་ཚང་མ་བར་སྣང་དུ་གཏོར་ཡོད་པའི་གནས་ཚུལ་ཐོན་འདུག
ཁ་སྔོན་གཟའ་པ་སངས་ཉིན་ཡུཀ་རེན་གྱི་དམག་དཔུང་སྤྱི་ཁྱབ་བཀོད་འདོམས་པ་ཝེ་ལ་རི་ཛ་ལུ་ཞི་ཎིས་ནུབ་ཕྱོགས་རྒྱལ་ཁབ་ཁག་གིས་མཚོན་ཆ་རོགས་རམ་སྤྲོད་རྒྱུའི་ཁས་ལེན་བྱས་པ་རྣམས་དུས་ཐོག་ཏུ་འབྱོར་གྱི་མི་འདུག ནུབ་ཕྱོགས་རྒྱལ་ཁབ་ཁག་གི་འགོ་ཁྲིད་ཁག་ཅིག་ནས་ཡུཀ་རེན་གྱི་ཕར་རྒོལ་ལ་ནུས་པ་ཐོན་གྱི་མི་འདུག་ཅེས་འཁང་ར་བཤད་ཀྱི་ཡོད་པར་ང་ཚོ་དགའ་མོས་མེད། ནུབ་ཕྱོགས་རྒྱལ་ཁབ་ཁག་གིས་ཐག་གཅོད་མྱུར་དུ་མ་བྱས་པར་ཉིན་ལྟར་མི་མང་པོའི་ཚེ་སྲོག་འཆོར་གྱི་འདུག མི་མང་པོ་འཆི་ཡི་ཡོད་པ་རེད། ང་ཚོར་ཨུ་རུ་སུའི་དམག་ལ་ཡོད་པའི་མེ་སྒྱོགས་མདེའུ་དེའི་བཞི་ཟུར་ཞིག་ལས་མེད་ཅེས་ཝ་ཤིང་ཊོན་ཡིག་ཟམ་ཚགས་པར་གྱི་གསར་འགོད་པའི་བཅར་འདྲིར་ལན་བཏབ། བདུན་ཕྲག་སྔོན་མའི་གཟའ་མིག་དམར་ཉིན་ཨུ་རུ་སུས་ཡུཀ་རེན་ཤར་ཕྱོགས་ཀྱི་ཀ་ར་མ་ཏོར་སི་ཀི་གྲོང་ཁྱེར་དུ་འཕུར་མདེལ་འཕངས། ཕི་ཛ་ཟ་ཁང་ཞིག་ཏུ་ཡུཀ་རེན་གྱི་རྩོམ་པ་པོ་དང་དམག་འཁྲུག་གི་ནག་ཉེས་རྩོད་གཅོད་པ་སྟེ། ལོ་ན་༣༧་ལ་སོན་པའི་ཝིཀ་ཊོ་རི་ཡ་ཨ་མེ་ལི་ན་ཟ་ཁང་དེར་ཡོད་པའི་སྐབས་སུ་རྨས་སྐྱོན་ཕོག ཁ་སང་གཟའ་ཉི་མའི་ཕྱི་དྲོར་རྒྱལ་སྤྱིའི་རྩོམ་པ་པོའི་སྨྱུག་ཚོགས་མཐུན་ཚོགས་ཀྱིས་ཨ་མེ་ལི་ན་རྨས་སྐྱོན་གྱིས་གྲོངས་སོང་ཞེས་གནས་ཚུལ་སྤེལ།།
ཕྱི་ཟླ་༧་པའི་ཚེས་༣་ཉིན་ནེའུ་ཡོག་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། ཡུཀ་རེན་གྱི་དམག་གིས་ལྷོ་ཕྱོགས་ཀྱི་ནེ་སི་ཀུ་ཆི་ནེ་གྲོང་ཚོའི་ཨུ་རུ་སུའི་དམག་གི་བཀོད་འདོམས་ཁང་ལ་མེ་སྒྱོགས་དང་འཕུར་མདེལ་གྱིས་གཏོར་རྒོལ་དྲག་པོ་བྱས་ཀྱང་ཡུཀ་རེན་གྱི་དམག་གིས་གྲོང་ཚོ་དེ་བདེ་བླག་ཏུ་ལེན་མ་ཐུབ། ཨུ་རུ་སུའི་དམག་མི་རྣམས་སྔ་ལོ་ལྟར་མ་བྲོས་པར་ཉི་མ་༢་ལ་འཐབ་འཁྲུག་བརྒྱབ། ཉི་མ་གཉིས་ཀྱི་རྗེས་སུ་ཨུ་རུ་སུའི་དམག་གིས་མཚོན་ཆ་དང་མདེའུ། འཐབ་གྲོགས་འདས་པོ་རྣམས་ཀྱི་ཕུང་པོ་སོགས་ལ་བདག་པོ་མ་བརྒྱབ་པར་བྲོས། ཕྱི་ཟླ་༦་པའི་ཚེས་༩་ཉིན་ནེ་སི་ཀུ་ཆི་ནེ་གྲོང་ཚོ་ཕྱིར་ལེན་ཐུབ་པ་ནི་ལོ་འདིའི་དཔྱིད་ཀྱི་དཔུང་འཇུག་འགོ་བཙུགས་པའི་རྗེས་སུ་ཡུཀ་རེན་གྱི་དམག་ལ་ལྷོ་ཕྱོགས་སུ་རྒྱལ་ཁ་ཐོབ་པ་ཐེངས་དང་པོ་ཡིན་འདུག ནེ་སི་ཀུ་ཆི་ནེ་གྲོང་ཚོ་བདེ་བླག་ཏུ་ལེན་མ་ཐུབ་པ་དེས་ཨུ་རུ་སུའི་དམག་ལ་སྦྱོང་བརྡར་ཐོབ། ༢༠༢༣་གྱི་ཕར་རྒོལ་འདི་སྔ་ལོ་ལྟར་མ་ཡིན་པ་མཚོན་ནུས། ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་འཕྲལ་དུ་རྒྱལ་ཁ་འཐོབ་རྒྱུའི་རེ་ལྟོས་འཆང་བ་སྒྲུབ་དཀའ་བ་ཞིག་ཏུ་གྱུར་ཡོད་པའི་གནས་ཚུལ་སྤེལ་འདུག
ནུབ་ཕྱོགས་ཀྱི་དམག་དོན་ཉམས་ཞིབ་པ་ཚོས་ལོ་འདིའི་ཕར་རྒོལ་དུས་སུ་ནུབ་ཆིངས་ཀྱིས་སྦྱོང་བརྡར་སྤྲད་པའི་དམག་དཔུང་དང་ནུབ་ཕྱོགས་རྒྱལ་ཁབ་ཁག་གིས་སྤྲད་པའི་མཚོན་ཆ་རྣམས་བཀོལ་སྤྱོད་བྱས་ནས་ཡུཀ་རེན་གྱི་དམག་གིས་ཨུ་རུ་སུའི་བཙན་འཛུལ་དམག་མཐར་སྐྲོར་གཏོང་རྒྱུ་རེད་བསམས། ད་སྔ་ཡུཀ་རེན་གྱིས་དམག་དཔུང་དྲག་གྲས་མ་བཏང་བར་ཡུལ་དམག་གམ། ཡང་ན་དང་བླངས་དམག་མི་བཏང་ནས་ནེ་སི་ཀུ་ཆི་ནེ་གྲོང་ཚོ་སོགས་ལ་དཔུང་འཇུག་བྱེད་དུ་བཅུག ཡུཀ་རེན་གྱི་དམག་དཔུང་གཙོ་བོས་ཕར་རྒོལ་གང་དུ་བྱ་རྒྱུ་ཡིན་མིན། དུས་ནམ་ཞིག་ཕར་རྒོལ་བྱ་རྒྱུ་ཡིན་མིན་སོགས་ཨུ་རུ་སུ་དང་ནུབ་ཕྱོགས་རྒྱལ་ཁབ་ཁག་གིས་ཚོད་དཔག་མ་ཐུབ་པར་ལུས་ཡོད་པའི་གནས་ཚུལ་ཐོན། ནེ་སི་ཀུ་ཆི་ནེ་གྲོང་ཚོ་བཅིངས་འགྲོལ་བཏང་བའི་རྗེས་སུ་ཡུཀ་རེན་གྱི་དམག་གིས་གྲོང་ཚོ་གཞན་ཁག་ཅིག་ཀྱང་བླངས། ཨུ་རུ་སུའི་དམག་གིས་ཚུར་རྒོལ་བྱས་ནས་ཡུཀ་རེན་གྱི་དམག་མི་བསད་རྨས་དང་ས་མེ་སྦས་ཡོད་པས་མདུན་སྐྱོད་འགགས། ནེ་སི་ཀུ་ཆི་ནེ་གྲོང་ཚོར་ཡུཀ་རེན་གྱི་དམག་མི་༧༠་ཐམ་པས་ཨུ་རུ་སུའི་དམག་མི་༡༥༠་ལྷག་ལ་འཕར་རྒོལ་བྱས་ནས་གྲོང་ཚོ་དེ་བཅིངས་འགྲོལ་གཏང་དགོས་བྱུང་འདུག
ཝེ་ལ་རི་ཞེས་པའི་ཡུཀ་རེན་གྱི་དམག་སྡེ་ཨང་༡༢༩་པའི་འཐབ་མོ་བ་ཞིག་གིས་ང་ཚོས་ཐོག་མར་ནེ་སི་ཀུ་ཆི་ནེ་གྲོང་ཚོར་ཨུ་རུ་སུའི་དམག་མི་༢༠་ཡས་མས་ཤིག་ལས་ཡོད་རྒྱུ་མ་རེད་དྲན་བྱུང་། གྲོང་ཚོ་དེར་ཨུ་རུ་སུའི་དམག་མི་དང་ས་གནས་ཀྱི་གྱེན་ལོག་པ་སོགས་དམག་མི་མང་པོ་འདུག ང་ཚོས་ཁང་པ་རེ་རེ་བཞིན་བཅིངས་འགྲོལ་གཏོང་དགོས་ཀྱི་འདུག་ཅེས་ཉམས་མྱོང་བཤད། གྲོང་ཚོ་དེར་མི་༥༠༠་ཡས་མས་ཤིག་འཚོ་གནས་བྱེད་བཞིན་ཡོད་པ་དང་དམག་འཁྲུག་གི་མགོ་སྟོད་ནས་ཨུ་རུ་སུའི་དབང་བསྒྱུར་འོག་ཏུ་ཚུད། དེས་ན་ནེ་སི་ཀུ་ཆི་ནེ་ལྟ་བུའི་ས་གནས་ཁག་ཏུ་ཨུ་རུ་སུའི་དམག་གིས་ས་དོང་བྲུས། ས་མེ་སྦས། ཡུཀ་རེན་གྱི་དཔུང་འཇུག་ལ་འགོག་རྒོལ་གྱི་གྲ་སྒྲིག་གང་ལེགས་བྱས་ཡོད་པས་ས་ཆ་དེ་རྣམས་ལས་སླ་པོར་ལེན་ཐབས་བྲལ། གྲོང་ཚོ་དེའི་དམག་འཁྲུག་ལ་ཞུགས་པའི་ཡུཀ་རེན་གྱི་འཐབ་མོ་བ་ཚོས་ཨུ་རུ་སུའི་དམག་གིས་ལྕགས་ཁྲབ་འཁོར་ལོ་གཏོར་ཐུབ་པའི་ས་མེ་སྦས་འཇོག་དང་ལྕགས་ཁྲབ་འཁོར་ལོ་གཏོར་ཐུབ་པའི་འཕུར་མདེལ་བཙུགས་འདུག་ཅེས་བསྟན། ནེའུ་དུས་བབ་ཚགས་པར་གྱི་གསར་འགོད་པས་སྐད་ཆ་དེ་བདེན་པོ་ཡིན་པ་ངེས་གཏན་བྱས་འདུག
ཨ་རི་དང་ནུབ་ཆིངས་ཀྱི་དམག་དོན་མི་སྣ་ཚོས་ཡུཀ་རེན་གྱིས་ཨུ་རུ་སུའི་བཙན་ས་ཁག་ཏུ་མེ་སྒྱོགས་བརྒྱབ། ལྕགས་ཁྲབ་འཁོར་ལོ་དང་དམག་དཔུང་བཏང་ནས་དཔུང་འཇུག་ཆེན་པོ་ཞིག་བྱ་རྒྱུའི་ཚོད་དཔག་བྱས་ཀྱང་དེ་ལྟར་བྱུང་མེད་པར་སྐྱོན་བརྗོད་བྱ་རྒྱུ་མགོ་བརྩམས། དེང་སྐབས་ཡུཀ་རེན་གྱི་དམག་གིས་འཛམ་གླིང་དམག་ཆེན་དང་པོའི་དུས་ཀྱི་འཐབ་ཇུས་ལྟར་གྲོང་གསེབ་ཁག་ཏུ་འཇབ་རྒོལ་བྱས་ནས་དམག་གི་རུ་ཁག་ཆུང་དུ་བཏང་སྟེ་གང་སར་བཀྲམ། ཨ་རིའི་མེ་སྒྱོགས་དང་འཕུར་མདེལ་ཁག་གིས་གློ་བུར་དུ་གཏོར་རྒོལ་བྱས་ནས་ནགས་གསེབ་ཏུ་ཡིབ། ཨུ་རུ་སུའི་འཕུར་མདེལ་དཔུང་ཁག་དང་གནམ་དམག་གིས་དམིགས་འབེན་དུ་འཛིན་རྒྱུ་མི་རྙེད། གལ་སྲིད་ཡུཀ་རེན་གྱིས་ལྕགས་ཁྲབ་འཁོར་ལོ་བཏང་སྟེ་དཔུང་ཆེན་དྲངས། མེ་སྒྱོགས་བསྒྲིགས་ནས་གཏོར་རྒོལ་བྱས་ན་ཨུ་རུ་སུའི་གནམ་དམག་དང་འཕུར་མདེལ་དཔུང་ཁག་གིས་གནམ་ས་གཉིས་ནས་གཏོར་རྒོལ་བྱས་ཏེ་ཡུཀ་རེན་གྱི་དམག་དཔུང་རྩ་མེད་གཏོང་རྒྱུ་ཉག་ཅིག་ཡིན་ཞིང་། ཨུ་རུ་སུའི་དམག་གིས་ཡུཀ་རེན་གྱི་སློབ་གྲྭ་ཁག་དང་ཁྱིམ་ཚང་ཁག་ཏུ་ལས་ཁུངས་བཙུགས་ཏེ་དམག་ས་བཟུང་ཡོད་པས་གྲོང་གསེབ་དེ་ཚོར་གཏོར་རྒོལ་བྱ་རྒྱུ་ཉེན་ཁ་ཆེན་པོ་ཡིན་པའི་གནས་ཚུལ་ཐོན་འདུག
ཧྥ་རན་སི་གསར་འགྱུར་ལས་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། གཟའ་འཁོར་འདིར་ཨ་རིའི་སྲིད་འཛིན་ཇཱོ་བྷ་ཌན་ནུབ་ཆིངས་ཀྱི་ཚོགས་འཐུས་རྒྱལ་ཁབ་ཁག་གི་ཆེས་མཐོའི་འགོ་ཁྲིད་ཚོའི་ཚོགས་འདུ་དང་ཡུ་རོབ་རྒྱལ་ཁབ་གསུམ་ལ་འཚམས་འདྲིར་ཕེབས་ཀྱི་ཡོད་པར་མ་ཟད། ཁོང་ནས་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་རྒྱབ་སྐྱོར་བྱ་རྒྱུ་ཤུགས་ཆེ་རུ་གཏོང་དགོས་པའི་ནན་སྐུལ་བྱ་རྒྱུའི་གནས་ཚུལ་ཐོན། ཕྱི་ཟླ་༦་པའི་ཚེས་༣༠་ཉིན་ཡུཀ་རེན་གྱི་སྲིད་འཛིན་ཛེ་ལན་སི་ཀིས་ཕྱི་ཟླ་༧་པའི་ཚེས་༡༡་ནས་༡༢་བར་དུ་ནུབ་ཆིངས་ཀྱི་ལོ་འཁོར་ཚོགས་འདུ་འཚོགས་ཀྱི་ཡོད་པ་དེའི་སྔོན་དུ་ང་ཚོས་ཕ་རྒོལ་བྱས་ནས་གྲུབ་འབྲས་ཆེན་པོ་ཞིག་སྟོན་དགོས་ཀྱི་ཡོད་པ་རེད། ཡིན་ནའང་ས་ཆ་མཱི་ཊར་རེ་ཕྱིར་ལེན་བྱེད་པར་མིའི་ཚེ་སྲོག་གི་འགྲོ་གྲོན་ཤིན་ཏུ་ཆེ། ང་ཚོའི་མཐུན་གྲོགས་རྒྱལ་ཁབ་ཁག་གིས་མེ་སྒྱོགས་སོགས་དུས་ཐོག་ཏུ་སྤྲོད་ཀྱི་མི་འདུག ལོ་འདིའི་དཔྱིད་ཀར་ཆར་ཞོད་ཆེ་བས་འདམ་ཉོག་ཁྲོད་དུ་དམག་དཔུང་དང་འཐབ་འཁོར། ལྕགས་ཁྲབ་འཁོར་ལོ་སོགས་ཐར་གྱི་མི་འདུག་ཅེས་དཔུང་འཇུག་འདིར་ནུས་པ་ཆེན་པོ་ཞིག་ཐོན་མེད་པའི་རྒྱུ་མཚན་རྣམས་གསལ་བཀྲོལ་བྱས་པའི་གནས་ཚུལ་ཐོན་འདུག
