ཨ་རིའི་གྲོས་ཚོགས་གོང་མའི་གདན་གྲངས་༣༥་འོས་འདེམས། ༄༅།།
༢༠༢༠་ལོའི་སྲིད་འཛིན་འོས་འདེམས་སྐབས་སུ་ཨ་རིའི་གྲོས་ཚོགས་གོང་མར་འཐུས་མི་༡༠༠་ཡོད་པ་དེའི་ཁོངས་ནས་འཐུས་མི་༣༥་ཡི་གདན་གྲངས་འོས་འདེམས་བྱེད་ཀྱི་ཡོད་ཅིང་། དེང་སྐབས་སྤྱི་མཐུན་ཚོགས་པར་འཐུས་མི་༥༣་དང་དམངས་གཙོ་ཚོགས་པར་འཐུས་མི་༤༥་ལས་མེད་ཀྱང་རང་བཙན་གྱི་གྲོས་ཚོགས་གོང་མའི་འཐུས་མི་༢་ཡོད་པ་དེ་དག་གིས་དམངས་གཙོ་ཚོགས་པའི་ཕྱོགས་སུ་འོས་ཤོག་འཕེན། ད་ལོ་གྲོས་ཚོགས་གོང་མའི་གདན་གྲངས་༣༥་འོས་འདེམས་བྱེད་ཀྱི་ཡོད་པ་དེའི་ཁོངས་སུ་སྤྱི་མཐུན་ཚོགས་པའི་འཐུས་མི་༢༣་དང་དམངས་གཙོ་ཚོགས་པའི་འཐུས་མི་༡༢་འདུག དམངས་གཙོ་ཚོགས་པར་སྲིད་འཛིན་འོས་འདེམས་ཀྱི་རྒྱལ་ཁ་འཐོབ་ན་ཐེངས་འདིའི་འོས་འདེམས་སྐབས་སུ་གྲོས་ཚོགས་གོང་མའི་ནང་དུ་གདན་གྲངས་འཐོལ་པ་༣་འཐོབ་ན་ཆོག་ཅིང་། གལ་སྲིད་དམངས་གཙོ་ཚོགས་པར་སྲིད་འཛིན་འོས་འདེམས་ཀྱི་རྒྱལ་ཁ་མ་ཐོབ་ཚེ། དམངས་གཙོ་ཚོགས་པར་ཉུང་མཐར་ཡང་ཨ་རིའི་གྲོས་ཚོགས་གོང་མར་འཐུས་༤་ཡི་གདན་གྲངས་འཐོལ་པ་འཐོབ་དགོས་ཀྱི་འདུག ཉམས་ཞིབ་པ་ཚོས་ཨ་རིའི་གྲོས་ཚོགས་གོང་མའི་འཐུས་མི་༢༡་གི་གདན་གྲངས་དེར་འགྱུར་བ་ཐེབས་ཐུབ་རྒྱུ་ཁག་པོ་ཡིན་རུང་གདན་གྲངས་༡༤་ནི་འགྲན་རྩོད་ཀྱི་གནས་སུ་ལྷུང་འདུག དམངས་ཚོགས་པའི་གྲོས་ཚོགས་གོང་མའི་འཐུས་མི་གཅིག་གཉིས་ཤིག་དང་སྤྱི་མཐུན་ཚོགས་པའི་འཐུས་མི་ལྔ་དྲུག་ཅིག་ལ་ཕམ་ཉེས་འབྱུང་རྒྱུའི་རྟགས་མཚན་འདུག་ཅེས་གནས་ཚུལ་སྤེལ་ཡོད་པ་རེད།།
ཨ་རིའི་འདེམས་འཐུས་ལྷན་ཚོགས།
༄༅།། ཨ་རིའི་རྒྱལ་ཡོངས་སུ་འདེམས་འཐུས་ལྷན་ཚོགས་ཀྱི་གདན་གྲངས་༥༣༨་ཡོད་པ་སྟེ། མངའ་སྡེ་རེར་ཨ་རིའི་གྲོས་ཚོགས་འོག་མའི་ནང་དུ་འཐུས་མི་ཅི་ཙམ་ཡོད་པ་དེའི་ཚད་མཉམ་ཀྱི་གདན་གྲངས་དང་། དེའི་ཐོག་ཏུ་མངའ་སྡེ་རེར་ཨ་རིའི་གྲོས་ཚོགས་གོང་མར་འཐུས་མི་གཉིས་རེའི་ཡོད་པ་དེའི་ཚད་མཉམ་གྱི་གདན་གྲངས། རྒྱལ་ས་ཝ་ཤིང་ཊོན་གྲོང་ཁྱེར་ལ་འདེམས་འཐུས་ལྷན་ཚོགས་ཀྱི་འཐུས་མི་༣་གྱི་གདན་གྲངས་བཅས་ཁྱོན་བསྡོམས་ཨ་མི་རི་ཀར་འདེམས་འཐུས་ལྷན་ཚོགས་ཀྱི་འཐུས་མི་༥༣༨་ཡོད་ཅིང་། འདེམས་འཐུས་ལྷན་ཚོགས་ཀྱི་འཐུས་མི་རྣམས་མངའ་སྡེ་སོ་སོ་བསྐོ་བཞག་བྱེད་ཀྱི་ཡོད་པ་རེད། སྲིད་འཛིན་འོས་མི་གཉིས་ཀྱི་སུ་ལ་མངའ་སྡེ་གཅིག་གི་མི་དམངས་ཀྱི་འོས་ཤོག་མང་བ་ཐོབ་ན་འོས་མི་དེར་མངའ་སྡེ་དེའི་འདེམས་འཐུས་ལྷན་ཚོགས་ཀྱི་འོས་ཤོག་ཆ་ཚང་འཐོབ་དགོས་པར་མ་ཟད། སྲིད་འཛིན་འོས་མི་གཉིས་ཀྱི་སུ་ལ་འདེམས་འཐུས་ལྷན་ཚོགས་ཀྱི་འོས་ཤོག་༢༧༠་འཐོབ་ན་འོས་མི་དེ་ཨ་རིའི་འདེམས་ཐོན་སྲིད་འཛིན་ལ་འགྱུར། ཨ་མི་རི་ཀར་འདེམས་འཐུས་ལྷན་ཚོགས་ཀྱི་འོས་ཤོག་འཐོབ་དགོས་པའི་ལམ་ལུགས་ཤིག་དར་ཡོད་པའི་སྟབས་ཀྱིས་རྒྱལ་ཡོངས་སུ་མི་དམངས་ཀྱི་འོས་ཤོག་གྲངས་མང་ཐོབ་ཀྱང་འདེམས་འཐུས་ལྷན་ཚོགས་ཀྱི་འོས་ཤོག་མ་ཐོབ་ན་སྲིད་འཛིན་ལ་འདེམས་ཐོན་འབྱུང་དཀའ། འདེམས་འཐུས་ལྷན་ཚོགས་ཀྱི་འོས་ཤོག་འཐོབ་དགོས་པའི་སྟབས་ཀྱིས་འོས་མི་གཉིས་ཀ་ཨ་རིའི་མངའ་སྡེ་ཚང་མར་བསྐྱོད་ནས་རང་ལ་མངའ་སྡེ་དེའི་འདེམས་འཐུས་ལྷན་ཚོགས་ཀྱི་འོས་ཤོག་འཐོབ་ཐུབ་པའི་འབད་བརྩོན་བྱས་ནས་ལས་འགུལ་སྤེལ་དགོས་པ་རེད།། https://www.voatibetan.com/p/7517.html?nocache=1
མི་མང་འོས་འཕེན་པའི་རྩ་དོན་གལ་ཆེན།
༄༅།། ཨ་རིའི་གསར་འགྱུར་ལས་ཁང་ཁག་གིས་མི་མང་འོས་ཤོག་འཕེན་མཁན་ཚོར་སྐད་ཆ་དྲིས་པ་ལྟར་ན། མི་མང་སྐད་ཆ་འདྲི་ཡུལ་བརྒྱ་ཆ་༥༢་ཀྱིས་ཏོག་དབྱིབས་རིམས་ནད་བཀག་སྡོམ་བྱ་རྒྱུ་ཨང་དང་པོར་བརྩིས་ནས་འོས་ཤོག་འཕངས་པ་ཡིན་ཞེས་ལན་བཏབ། མི་མང་འོས་ཤོག་འཕེན་བརྒྱ་ཆ་༤༢་ཀྱིས་དཔལ་འབྱོར་སླར་གསོ་བྱ་རྒྱུ་ཨང་དང་པོར་བརྩིས་ནས་འོས་ཤོག་འཕངས་པ་ཡིན་ཞེས་ལན་བཏབ་འདུག མི་མང་སྐད་ཆ་འདྲི་ཡུལ་བརྒྱ་ཆ་༤༨་ཀྱིས་ཨ་མི་རི་ཀར་ཏོག་དབྱིབས་རིམས་ནད་བཀག་སྡོམ་ནན་པོ་ཐུབ་ཀྱི་འདུག་ཟེར་པ་དང་མི་མང་སྐད་ཆ་འདྲི་ཡུལ་བརྒྱ་ཆ་༥༡་གིས་ཨ་མི་རི་ཀར་ཏོག་དབྱིབས་རིམས་ནད་བཀག་སྡོམ་བྱེད་ཐུབ་ཀྱི་མི་འདུག་ཅེས་ལན་འདེབས་བྱས་འདུག མི་མང་སྐད་ཆ་འདྲི་ཡུལ་བརྒྱ་ཆ་༣༤་ལྷག་གི་དཔལ་འབྱོར་ཨང་དང་པོ་རེད་ཟེར། མི་མང་སྐད་ཆ་འདྲི་ཡུལ་བརྒྱ་ཆ་༢༡་གིས་མི་རིགས་འདྲ་མཉམ་ཨང་དང་པོ་རེད་ཟེར། མི་མང་སྐད་ཆ་འདྲི་ཡུལ་བརྒྱ་ཆ་༡༨་ཀྱིས་ཏོག་དབྱིབས་རིམས་ནད་འགོག་རྒྱུ་ཨང་དང་པོ་རེད་ཅེས་ལན་འདེབས་བྱས་འདུག ད་ལོའི་འོས་ཤོག་མཁན་བརྒྱ་ཆ་༡༣་ན་གཞོན་གསར་པ་དང་ཐེངས་དང་པོར་འོས་ཤོག་འཕེན་མཁན་རྣམས་ཡིན་ཞིང་། མི་མང་འོས་ཤོག་འཕེན་མཁན་བརྒྱ་༨༧་རྙིང་པ་ཡིན་འདུག དམངས་གཙོ་ཚོགས་པའི་རྒྱབ་སྐྱོར་པ་བརྒྱ་ཆ་༣༡་གིས་ཌོ་ནལ་ཊམ་ལ་ངོ་རྒོལ་བྱས་ནས་ཇཱོ་བྷ་ཌན་ལ་འོས་ཤོག་འཕངས་པ་ཡིན་ཞེས་ལན་བཏབ། མི་མང་སྐད་ཆ་འདྲི་ཡུལ་བརྒྱ་ཆ་༦༠་ལྷག་གིས་ཇཱོ་བྷ་ཌན་ལ་རྒྱབ་སྐྱོར་བྱས་ནས་འོས་ཤོག་འཕངས་པ་ཡིན་ཟེར། ཌོ་ནལ་ཊམ་ལ་རྒྱབ་སྐྱོར་བྱེད་མཁན་བརྒྱ་ཆ་༨༡་གིས་ཌོ་ནལ་ཊམ་ལ་འོས་ཤོག་འཕངས་པ་ཡིན་ཟེར་པ་དང་མི་མང་འོས་ཤོག་འཕེན་མཁན་བརྒྱ་ཆ་༡༠་ཡས་མས་ཤིག་གིས་ཇཱོ་བྷ་ཌན་ལ་ངོ་རྒོལ་བྱས་ནས་ཌོ་ནལ་ཊམ་ལ་འོས་ཤོག་འཕངས་ཡིན་ཞེས་ལན་བྱས་འདུག
