༄༅།། གཟའ་མིག་དམར་གྱི་དགོང་མོར་ཨ་རིའི་སྲིད་འཛིན་ཟུར་པ་ཌོ་ནལ་ཊམ་གྱིས་༢༠༢༤་ལོའི་སྲིད་འཛིན་འོས་འདེམས་ལ་འགྲན་ཞུགས་བྱ་རྒྱུ་ཡིན་ཞེས་གསལ་བསྒྲགས་སྤེལ། ཕྱི་ཟླ་༡༡་པའི་ཚེས་༡༦་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་ཨ་མི་རི་ཀར་བར་མའི་འོས་བསྡུ་བྱས་པའི་སྐབས་སུ་སྤྱི་མཐུན་ཚོགས་པར་གྲོས་ཚོགས་གོང་མའི་ནང་དུ་འཐུས་མི་གྲངས་མང་གི་རྒྱལ་ཁ་མ་ཐོབ། དེ་བཞིན་གྲོས་ཚོགས་འོག་མའི་ནང་དུའང་འཐུས་མི་ཉུང་ཤས་ཤིག་གི་མ་གཏོགས་འཐུས་མི་གྲངས་མང་གི་གདན་གྲངས་མ་ལོངས། ལྷག་པར་དུ་ཌོ་ནལ་ཊམ་གྱིས་གྲོས་ཚོགས་གོང་འོག་དང་མངའ་སྡེའི་སྤྱི་ཁྱབ་སོགས་འོས་མི་༡༦་ལ་རྒྱབ་སྐྱོར་བྱས་ཀྱང་འོས་མི་༡༣་ལ་ཕམ་ཉེས་དང་འོས་མི་༣་ལ་རྒྱལ་ཁ་ཐོབ། ད་དུང་ཌོ་ནལ་ཊམ་ལ་ཨ་རིའི་དབུས་གཞུང་དང་མངའ་སྡེ་ཁག་གི་ཁྲིམས་འཛིན་ལྷན་ཁང་ཁག་གིས་ཞིབ་འཇུག་བྱེད་ཀྱི་ཡོད་ཀྱང་ཁོ་པ་སྲིད་འཛིན་གྱི་འོས་མིར་འགྲན་ཞུགས་བྱ་རྒྱུའི་ཐག་བཅད། ཌོ་ནལ་ཊམ་གྱིས་ཨ་མི་རི་ཀ་སླར་ཡང་རླབས་ཆེན་དང་གཟི་བརྗིད་ལྡན་པ་ཞིག་ལ་བསྒྱུར་བར་ང་ཨ་རིའི་སྲིད་འཛིན་གྱི་འོས་མིར་ལང་རྒྱུ་ཡིན། ད་ནས་ཨ་མི་རི་ཀ་བསྐྱར་ལངས་བྱ་རྒྱུ་འགོ་ཚུགས་པ་རེད། ང་ཚོའི་རྒྱལ་ཁབ་འདི་ཉམས་རྒུད་འགྲོ་བཞིན་ཡོད་པ་དང་ང་ཚོས་ཨ་མི་རི་ཀ་དེ་འདྲ་ཞིག་ལ་འགྱུར་དུ་འཇུག་དགོས་དོན་མེད་པའི་གསལ་བསྒྲགས་བྱ་རྒྱུ་ཡིན་ཞེས་བཤད་པའི་གནས་ཚུལ་ཐོན་འདུག ཌོ་ནལ་ཊམ་གྱི་སློབ་སྟོན་པ་ཚོས་འཇོར་ཇཱི་ཡ་མངའ་སྡེའི་གྲོས་ཚོགས་གོང་མའི་འཐུས་མི་གཉིས་ཀྱི་འོས་འདེམས་དེ་ཐག་ཆོད་མེད་པ་དང་དེའི་བར་དུ་སྒུག་དགོས་ཞེས་འབོད་སྐུལ་ཞུས། ཡིན་ནའང་ཌོ་ནལ་ཊམ་གྱིས་རང་གི་སློབ་སྟོན་པ་ཚོའི་འབོད་སྐུལ་ལ་མ་མཉན་པར་༢༠༢༤་ལོའི་སྲིད་འཛིན་འོས་འདེམས་ལ་འགྲན་ཞུགས་བྱ་རྒྱུ་དང་སྤྱི་མཐུན་ཚོགས་པའི་འོས་མི་གཞན་རྣམས་འགོག་ཐབས་ཀྱི་སྲིད་ཇུས་ཤིག་ལག་ལེན་བསྟར།།
དེ་རིང་གཟའ་ལྷག་པའི་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཌོ་ནལ་ཊམ་གྱིས་ཨ་རིའི་སྲིད་འཛིན་ཟུར་པ་ཁེ་ལིབ་ལན་ཌིར་མིག་དཔེ་བལྟས་ནས་བསྐྱར་དུ་འོས་འདེམས་ལ་ལང་གི་ཡོད་པ་རེད། ཁེ་ལིབ་ལན་ཌི་༡༨༨༤་ལོར་སྲིད་འཛིན་འོས་མིར་ལངས་ནས་འོས་འདེམས་ཀྱི་རྒྱལ་ཁ་ཐོབ། ༡༨༨༨་ལོར་སྲིད་འཛིན་འོས་མིར་ལངས་ཀྱང་འོས་ཤོག་མ་ཐོབ། ༡༨༩༢་ལོར་སླར་ཡང་སྲིད་འཛིན་འོས་མིར་ལངས་ནས་འོས་འདེམས་ཀྱི་རྒྱལ་ཁ་ཐོབ། ༢༠༢༠་ལོའི་སྲིད་འཛིན་འོས་འདེམས་སྐབས་སུ་ཌོ་ནལ་ཊམ་ལ་ཨ་རིའི་མི་དམངས་ཀྱི་འོས་ཤོག་དང་འདེམས་འཐུས་ལྷན་ཚོགས་ཀྱི་འོས་ཤོག་གཉིས་ཀ་མ་ཐོབ་པར་ཇཱོ་བྷ་ཌན་ལ་ཤོར། ཡིན་ནའང་ཌོ་ནལ་ཊམ་གྱིས་༢༠༢༠་ལོའི་འོས་འདེམས་ཀྱི་གྲུབ་འབྲས་ལ་གཡོ་ཁྲམ་བྱས་སོང་། ཁོ་པར་འོས་འདེམས་ཀྱི་རྒྱལ་ཁ་ཐོབ་ཡོད་ཅེས་རྫུན་བཤད། མདང་དགོང་ཡང་ཌོ་ནལ་ཊམ་གྱིས་རྒྱ་ནག་གིས་ཐེ་ཇུས་བྱས་ནས་༢༠༢༠་ལོའི་ཨ་རིའི་སྲིད་འཛིན་འོས་འདེམས་ཀྱི་གྲུབ་འབྲས་དྲང་སྙོམས་མ་བྱུང་བ་རེད་ཅེས་བསྒྲགས། ཁོ་པ་སྲིད་འཛིན་བྷ་ཌན་གྱི་ལས་ཁུར་མཛད་སྒོར་མ་ཞུགས་པ་དང་སྤྱི་མཐུན་ཚོགས་པའི་ནང་ཁུལ་དུ་རྫུན་དང་བསྙོན་འཛུགས་ཀྱི་ས་བོན་བཏབ། ༡༨༨༩་ལོར་ཁེ་ལིབ་ལན་ཌིར་ཕམ་ཉེས་བྱུང་བའི་རྗེས་སུ་ཁ་གཏད་པའི་ལས་ཁུར་མཛད་སྒོའི་ཐོག་ཏུ་སྲིད་འཛིན་གསར་པ་ཧ་རི་སན་གྱི་མགོ་ལ་ཆར་གདུགས་བཀར། ཁོང་གིས་ཨ་མི་རི་ཀའི་མི་དམངས་དང་སྲིད་དོན་ཚོགས་པ་གཉིས་མཐུན་སྒྲིལ་རྡོག་རྩ་གཅིག་ཏུ་སྒྲིལ་ཐབས་སུ་འབད། ཁེ་ལིབ་ལན་ཌི་ལོ་༧༡་ཐོག་ཏུ་འདས་གྲོངས་སུ་གྱུར། ཌོ་ནལ་ཊམ་གྱིས་༢༠༡༧་ལོར་སྲིད་དབང་བཟུང་བའི་སྐབས་དེར་ལོ་༧༡་རེད། གལ་སྲིད་ཁོ་པར་༢༠༢༤་ལོའི་འོས་འདེམས་ཀྱི་རྒྱལ་ཁ་ཐོབ་ཚེ། ཌོ་ནལ་ཊམ་ལོ་༧༨་ལ་སོན་རྒྱུ་དང་ཨ་མི་རི་ཀའི་སྲིད་འཛིན་ལོ་ན་བགྲེས་ཤོས་སུ་འགྱུར་རྒྱུ་རེད་ཅེས་གཤིབ་སྡུར་གྱི་གནས་ཚུལ་སྤེལ་འདུག
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། ཌོ་ནལ་ཊམ་ནི་གྲོས་ཚོགས་ཀྱིས་ཉེས་འཛུགས་ཐེངས་གཉིས་ཕོག་པ་དང་རང་གི་རྒྱབ་སྐྱོར་བ་ཚོར་ངན་སྐུལ་བྱས་ནས་༢༠༢༡་གི་ཕྱི་ཟླ་༡་པའི་ཚེས་༦་ཉིན་ཨ་རིའི་གྲོས་ཚོགས་ལ་དཔུང་རྒོལ་བྱེད་དུ་བཅུག་པའི་སྲིད་འཛིན་འབའ་ཞིག་དེ་ཡིན་ཞིང་། ཨ་རིའི་སྲིད་དོན་ཉམས་ཞིབ་པ་ཕལ་མོ་ཆེས་ལོ་འདིའི་བར་མའི་འོས་བསྡུའི་སྐབས་སུ་དམངས་གཙོ་ཚོགས་པར་ཕམ་ཉེས་ཆེན་པོ་འབྱུང་དགོས་པ་དང་སྤྱི་མཐུན་ཚོགས་པས་གྲོས་ཚོགས་གོང་འོག་གཉིས་ཀར་དབང་བསྒྱུར་བྱེད་ཐུབ་པའི་རྒྱལ་ཁ་ཆེན་པོ་ཞིག་ཐོབ་དགོས་ངེས་ཡིན། ༢༠༢༢་ལོའི་ཨ་རིའི་བར་མའི་འོས་བསྡུའི་སྐབས་སུ་སྤྱི་མཐུན་ཚོགས་པར་རྒྱལ་ཁ་མ་ཐོབ་པའི་རྒྱུ་རྐྱེན་གཙོ་བོ་ཌོ་ནལ་ཊམ་ལ་ཐུག་འདུག སྤྱི་མཐུན་ཚོགས་པས་མདུན་ཕྱོགས་སུ་བལྟས་ནས་ཌོ་ནལ་ཊམ་རྒྱབ་ཏུ་བསྐྱུར་དགོས། ཧྥུ་ལོ་རི་ཌ་མངའ་སྡེའི་སྤྱི་ཁྱབ་ཌི་སན་ཊི་སི་དང་སྲིད་འཛིན་གཞོན་པ་ཟུར་པ་མེཀ་ཕེན་སི། ཕྱི་སྲིད་དྲུང་ཆེ་ཟུར་པ་མེཀ་ཕོམ་ཕིའོ་ལྟ་བུའི་འོས་མི་གཞན་རྣམས་སྤྱི་མཐུན་ཚོགས་པའི་སྲིད་འཛིན་འོས་མིར་གདམ་དགོས། ཌོ་ནལ་ཊམ་གྱིས་ཕོ་བྲང་དཀར་པོའི་ཡིག་ཆ་གསང་རྒྱ་མ་གྲོལ་བ་ཤོག་སྒམ་བཅུ་ཕྲག་མང་པོ་མཱ་ར་ལ་གྷོ་གཞིས་ཀར་ཁྱེར་ནས་ཁྲིམས་འགལ་བྱས་པར་ཨ་རིའི་དབུས་ཞིབ་གཅོད་ལས་ཁུངས་དང་ཁྲིམས་འཛིན་ལྷན་ཁང་གིས་ཞིབ་འཇུག་བྱེད་བཞིན་པ་རེད། ནེའུ་ཡོཀ་མངའ་སྡེ་དང་འཇར་ཇཱི་ཡ་མངའ་སྡེ། ཧྥུ་ལོ་རི་ཌ་མངའ་སྡེ་བཅས་ནས་ཌོ་ནལ་ཊམ་གྱིས་ཚོང་ཁྲལ་མ་བརྒྱབ་པ་དང་འོས་འདེམས་དུས་སུ་ཁྲིམས་འགལ་བྱས་པའི་གྱོད་གཞི་ཁག་ལ་ཞིབ་འཇུག ཨ་རིའི་གྲོས་ཚོགས་འོག་མས་ཌོ་ནལ་ཊམ་གྱི་རྒྱབ་སྐྱོར་བ་ཚོས་གྲོས་ཚོགས་ལ་དཔུང་རྒོལ་བྱས་ནས་༢༠༢༠་ལོའི་སྲིད་འཛིན་འོས་འདེམས་ཀྱི་གྲུབ་འབྲས་འཕྲུ་སློག་གཏོང་ཐབས་བྱས་པར་ཞིབ་འཇུག་བྱེད་ཀྱི་ཡོད་པ་རེད། དེས་ན་ཌོ་ནལ་ཊམ་སྤྱི་མཐུན་ཚོགས་པའི་སྲིད་འཛིན་འོས་མིར་ལངས་ན་ཕན་ཐོགས་ལས་གནོད་ཚབས་ཆེ་ཞེས་བསམ་ཚུལ་བརྗོད་འདུག
མདང་དགོང་ཌོ་ནལ་ཊམ་གྱིས་༢༠༢༤་ལོའི་སྲིད་འཛིན་འོས་མིར་ལང་རྒྱུའི་གསལ་བསྒྲགས་སྤེལ་བའི་སྐབས་སུ་༢༠༡༦་ལྟར་མི་ཚོགས་ཆེན་པོ་མེད་པར་མ་ཟད། ཐ་ན་ཌོ་ནལ་ཊམ་གྱི་བུ་མོ་རྒན་པ་ཨི་ཝན་ཁ་དང་བུ་རྒན་པ་གཉིས་ཀྱང་མེད་ཅིང་། ཧྥོཀ་སི་གསར་འགྱུར་ལས་ཁང་གིས་ཨི་ཝན་ཁར་བཅར་འདྲི་ཞུས་པའི་སྐབས་སུ་ང་ནི་རང་གི་ཨ་ཕར་ཧ་ཅང་གི་དགའ་མོས་དང་རྒྱབ་སྐྱོར་ཡོད། ཡིན་ནའང་ང་ཆབ་སྲིད་ལ་ཞུགས་ནས་ཨ་ཕའི་འོས་འདེམས་ལས་འགུལ་ལ་ཞུགས་འཆར་མེད། ངས་རང་གི་ཁྱིམ་ཚང་དང་ཕྲུ་གུ་ཚོར་ལྟ་སྐྱོང་བྱ་རྒྱུ་གཙིགས་སུ་འཛིན་དགོས་ཀྱི་འདུག ང་ཆབ་སྲིད་ལ་འབྲེལ་བ་མེད་པར་ཨ་ཕར་རྒྱབ་སྐྱོར་བྱ་འཆར་ཡོད། ང་ལ་ཨ་མི་རི་ཀའི་མི་དམངས་ལ་སྲི་ཞུ་སྒྲུབ་པའི་གོ་སྐབས་ཤིག་ཐོབ་པ་ནི་གཟི་བསོད་ཅིག་ལ་རྩི་བཞིན་ཡོད་པ་དང་ང་ཚོའི་གཞུང་འཛིན་ལྷན་ཁང་གི་གྲུབ་འབྲས་ཁག་ལ་དུས་དང་རྣམ་པ་ཀུན་ཏུ་སྤོབས་པ་ཡོད་ཅེས་གསར་འགོད་པའི་དྲི་བ་ཁག་ལ་ལན་བཏབ། ༢༠༢༠་ལོར་ཌོ་ནལ་ཊམ་ལ་འོས་འདེམས་ཀྱི་རྒྱལ་ཁ་མ་ཐོབ་པའི་རྗེས་སུ་ཨི་ཝན་ཁ་དང་ཁྱོ་ག་ཇཱེ་རི་ཁུ་ཤི་ནར། ཁོ་ཚོའི་ཕྲུ་གུ་རྣམས་བཅས་བཟའ་མི་ཚང་མ་ཝ་ཤིང་ཊོན་ནས་ཧྥུ་ལོ་རི་ཌ་མངའ་སྡེར་སྤོར། ཨི་ཝན་ཁས་ང་དང་ཨ་ཕ་གཉིས་ཉེ་པོ་ཡོད་པ་དང་ང་ཚོའི་འབྲེལ་བར་ནམ་ཡང་འགྱུར་བ་ཐེབས་མི་སྲིད། འདས་པའི་ལོ་ངོ་དེ་དག་གི་རིང་ངས་ལས་འགན་སྣ་མང་ཞིག་བསྒྲུབས་པ་ཡིན། ད་ལྟ་ངས་རང་གི་ཕྲུ་གུ་ཚོར་ལྟ་སྐྱོང་དང་རང་དབང་གི་དུས་སྐབས། སྐྱེ་བོ་སྒེར་གྱི་འཚོ་བའི་གོ་སྐལ་འདི་ལོངས་སུ་སྤྱད་ནས་གཅེས་སྤྲས་བྱེད་ཀྱི་ཡོད། དུས་ཚོད་ནི་སྐད་ཅིག་གི་ངང་དུ་ཡོལ་འགྲོ་ཡི་ཡོད་པ་དང་ངས་ཕྲུ་གུ་ཚོའི་མཉམ་དུ་དུས་ཚོད་མང་ཙམ་སྐྱེལ་ནས་འཚོ་བར་རོལ་འདོད་ཡོད་ཅེས་ཌོ་ནལ་ཊམ་གྱི་འོས་འདེམས་ལས་འགུལ་ལ་མཉམ་ཞུགས་བྱ་རྒྱུ་མིན་པའི་རྒྱུ་མཚན་བགྲངས།།
སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ལི་ཛི་ཆེ་ཎིས་ཝ་ཤིང་ཊོན་ཡིག་ཟམ་ཚགས་པར་གྱི་གསར་འགོད་པར་བཤད་པ་ལྟར་ན། ཁོ་མོར་༢༠༢༤་ལོར་སྲིད་འཛིན་ཟུར་པ་ཌོ་ནལ་ཊམ་བསྐྱར་དུ་འདེམས་ཐོན་འབྱུང་རྒྱུ་མིན་པའི་གདེང་ཚོད་ཡོད། ཁོ་པ་སྲིད་འཛིན་གྱི་འོས་ཆོས་ཚང་བའི་མི་ཞིག་མིན་པ་དང་གྲོས་ཚོགས་ལ་དཔུང་རྒོལ་བྱས་ནས་མི་གསོད་ཁྲག་སྦྱོར་བྱུང་། ཌོ་ནལ་ཊམ་གྱི་ཉེ་འཁོར་དུ་ཡོད་པའི་མི་ཚོས་གྲོས་ཚོགས་ལ་དཔུང་རྒོལ་བྱེད་ཀྱི་ཡོད་པ་འགོག་དགོས་པའི་ཞུ་བ་འཐེན་ཡང་ཌོ་ནལ་ཊམ་གྱིས་རུ་ཚོགས་དེ་མ་བཀག་པར་བརྙན་འཕྲིན་བལྟས་ནས་བསྡད་པ་རེད། ཕྱི་ཟླ་༡་པའི་ཚེས་༦་གི་ཞིབ་འཇུག་ཚོགས་ཆུང་གིས་ཌོ་ནལ་ཊམ་ལ་སྲིད་དབང་འཛིན་པའི་འོས་ཆོས་མི་ཚང་བ་དང་གྲོས་ཚོགས་ལ་དཔུང་རྒོལ་བྱུང་བར་ཌོ་ནལ་ཊམ་ཐད་ཀར་འབྲེལ་བ་ཡོད་པ་ཐེར་འདོན་བྱས་ཡོད་ཅེས་བསྟན། ལི་ཛི་ཆེ་ཎི་ཕྱི་ཟླ་༡་པོའི་ཚེས་༦་གི་གྲོས་ཚོགས་ཀྱི་ཞིབ་འཇུག་ཚོགས་ཆུང་གི་ཚོགས་གཙོ་གཞོན་པ་ཡིན་ཞིང་། ཌོ་ནལ་ཊམ་གྱིས་ཝ་ཡོ་མཱི་མངའ་སྡེའི་སྤྱི་མཐུན་ཚོགས་པའི་འོས་མི་གཞན་ཞིག་ལ་རྒྱབ་སྐྱོར་བྱས་ནས་ལི་ཛི་ཆེ་ཎི་བསྐྱར་དུ་འདེམས་ཐོན་མ་བྱུང་། ཁོ་མོར་སྔོན་འགྲོའི་འོས་བསྡུའི་སྐབས་སུ་ཕམ་ཉེས་བྱུང་བའི་རྗེས་སུ་ལི་ཛི་ཆེ་ཎིས་༢༠༢༠་ལོའི་སྲིད་འཛིན་འོས་འདེམས་ཀྱི་གྲུབ་འབྲས་ངོས་ལེན་མི་བྱེད་པའི་སྤྱི་མཐུན་ཚོགས་པའི་འོས་མི་གཅིག་ལའང་རྒྱབ་སྐྱོར་བྱ་རྒྱུ་མིན། དེའི་ཚབ་ཏུ་དམངས་གཙོ་ཚོགས་པའི་འོས་མི་ཚོར་རྒྱབ་སྐྱོར་བྱ་རྒྱུ་དང་ཐབས་བརྒྱ་ཇུས་སྟོང་གི་སྒོ་ནས་ཌོ་ནལ་ཊམ་སླར་ཡང་ཨ་རིའི་སྲིད་འཛིན་ལ་འདེམས་ཐོན་འབྱུང་དུ་འཇུག་རྒྱུ་མིན་པའི་ལས་འགུལ་སྤེལ་རྒྱུ་ཡིན་ཞེས་ཐག་གཅོད་བྱས་ཤིང་། ཁོ་མོ་༢༠༢༤་ལོའི་སྲིད་འཛིན་འོས་མིར་ལང་རྒྱུ་ཡིན་མིན་བསམ་ཞིབ་བྱེད་ཀྱི་ཡོད། ཨ་རིའི་མི་དམངས་འོས་ཤོག་འཕེན་མཁན་ཚོས་སྲིད་ཇུས་དང་རྒྱལ་ཁབ་ཀྱི་དཀའ་ངལ་ལ་གདོང་ལེན་བྱེད་ཐུབ་པའི་འོས་མི་ཞིག་གདམ་རྒྱུ་གནད་འགག་ཆེན་པོ་རེད་ཅེས་བཤད་འདུག
