ཊམ་གྱིས་རྒྱ་ནག་དང་ཁེ་ན་ཌ། མེཀ་སི་ཁོ་བཅས་ལ་སྒོ་ཁྲལ་སྤོར་རྒྱུའི་དམ་བཅའ།

རེས་གཟའ་ཟླ་བའི་ཉིན་ཨ་རིའི་བདམས་ཐོན་སྲིད་འཛིན་ཊམ་གྱིས་ཕྱི་ཟླ་དང་པོའི་ནང་ལས་འཁུར་འགོ་འཛུགས་བྱས་ཉིན་ནས་གང་མགྱོགས་རྒྱ་ནག་དང་ཁེ་ཎ་ཌ་ མེཀ་སི་ཁོ་བཅས་ཀྱི་ཚོང་ཟོག་ཨ་རིའི་ནང་འབྱོར་བ་རྣམས་ལ་སྒོ་ཁྲལ་གསར་པ་འགེལ་རྒྱུའི་ཉེན་བརྡ་བཏང་འདུག་པ་དང་། དེ་ནི་བདམས་ཐོན་སྲིད་འཛིན་ཊམ་གྱིས་ཨ་རིའི་ནང་ཁྲིམས་འགལ་འཛུལ་ཞུགས་བྱེད་མཁན་ཕྱི་མི་འགོག་ཐབས་དང་དུག་རྫས་ནག་ཚོང་བྱེད་མཁན་ཚོ་བཀག་འགོག་བྱ་རྒྱུའི་ལས་འཆར་ཁོངས་ཡིན་ཞེས་བརྗོད་ཀྱི་ཡོད་པ་རེད། ཊམ་གྱིས་བརྗོད་དོན་ལ་ མེཀ་སི་ཁོ་དང་ཁེ་ཎ་ཌ་ནས་ཨ་རིར་ནང་འདྲེན་བྱས་པའི་ཚོང་ཟོག་ལ་སྒོ་ཁྲལ་བརྒྱ་ཆ་ ༢༥ འགེལ་རྒྱུ་དང་། རྒྱ་ནག་གི་ཚོང་ཟོག་ལ་སྒོ་ཁྲལ་འཕར་མ་བརྒྱ་ཆ་ ༡༠ འགེལ་གྱི་ཡིན་ཞེས་གསུངས་འདུག

གལ་སྲིད་སྒོ་ཁྲལ་སྤོར་རྒྱུའི་སྲིད་ཇུས་ལག་བསྟར་བྱས་པ་ཡིན་ན་ཨ་རིའི་ནང་ཚོང་ཟོག་ཉོ་སྒྲུབ་བྱེད་མཁན་མི་ཚོར་རྡོ་སྣུམ་ནས་སོ་ནམ་ཞིང་ལས་ཀྱི་ཐོན་བསྐྱེད་སོགས་ཀྱི་བར་རིན་གོང་འཕར་མ་སྤྲོད་དགོས་ཆགས་རྒྱུ་ཡིན་པ་རེད། ཨ་རི་ནི་འཛམ་གླིང་ནང་ཕྱི་ནས་དངོས་ཟོག་ཉོ་མཁན་ཁྲོམ་ར་ཆེ་ཤོས་དེ་ཡིན་པ་དང་། ཉེ་དུས་ཨ་རིའི་གྲངས་ཐོ་གསར་ཤོས་ཐོན་པར་གཞིགས་ན། མེཀ་སི་ཁོ་དང་རྒྱ་་ནག ཁེ་ན་ཌ་བཅས་ནི་ཨ་རི་ལ་ཚོང་ཟོག་བཙོང་མཁན་ཆེ་ཤོས་གསུམ་ཡིན་གསལ་འདོན་བྱས་འདུག

ཊམ་གྱིས་སྒེར་གྱི་སྤྱི་ཚོགས་དྲ་ཚིགས་ཀྲུ་རུ་ཐུ་ སོ་ཤལ་ཞེས་པའི་ནང་འཕྲིན་ཡིག་གཏོང་ཐེངས་གཉིས་བྱས་པའི་ནང་སྒོ་ཁྲལ་སྤོར་རྒྱུའི་ཉེན་བརྡ་དེ་བཏང་འདུག་ཅིང་། དེའི་ནང་ཁྲིམས་འགལ་གྱིས་ཨ་རིའི་ནང་འཛུལ་ཞུགས་བྱེད་མཁན་འཕོན་ཆེ་ཡོད་པ་དེ་དག་ལ་དམིགས་འདུག་པ་དང་། རྩ་བའི་འདས་པའི་ལོ་བཞིའི་ནང་ཨ་རིའི་ལྷོ་ཕྱོགས་ས་མཚམས་ཁག་ནས་ཕྱི་མི་ཡོང་མཁན་འགོག་རྒྱུར་ནུས་པ་ཆེ་རུ་བཏང་ཡོད་པ་རེད།

འཕྲིན་ཡིག་དེའི་ནང་ཌོ་ནལྜ་ ཊམ་གྱིས་ཕྱི་ཟླ་ ༡ ཚེས་ ༢༠ ཉིན་བཀའ་རྩ་དང་པོ་གསལ་བསྒྲགས་བྱ་རྒྱུའི་ནང་མེཀ་སི་ཁོ་དང་ཁེ་ན་ཌ་གཉིས་ནས་ཨ་རིའི་ནང་འབྱོར་བའི་ཚོང་ཟོག་ཚང་མར་སྒོ་ཁྲལ་བརྒྱ་ཆ་ ༢༥ འགེལ་རྒྱུ་ཡིན་གསུངས་པ་མ་ཟད། ས་མཚམས་སྒོ་ཕྱེ་ཡོད་པ་དེར་འཕྱ་མོད་བྱས་ནས་མེཀ་སི་ཁོ་དང་ཁེ་ན་ཌ་གཉིས་ནས་མི་ཁྲི་ཁྲག་མང་པོ་ཨ་རིར་འཛུལ་ནས་ནག་ཉེས་ཅན་དང་དུག་རྫས་ནག་ཚོང་བྱེད་མཁན་དེ་སྔ་མཐོང་མྱོང་མེད་པ་ཁྲིད་ཡོང་གི་འདུག་ཅེས་བཀོད་འདུག འོན་ཀྱང་ཏོག་དབྱིབས་ཀྱི་དུས་དང་བསྡུར་ནང་ས་མཚམས་སུ་དྲག་སྤྱོད་ནག་ཉེས་བྱེད་མཁན་ཉུང་དུ་སོང་ཡོད།

ཌོ་ནལྜ་ ཊམ་གྱིས་དུག་རྫས་དང་ལྷག་པར་ཕེན་ཏི་ནལ་དང་ཁྲིམས་འགལ་གྱིས་ཕྱི་མིས་བཙན་འཛུལ་ཉུང་འཕྲི་མ་བྱས་བར་སྒོ་ཁྲལ་གསར་པ་འགེལ་རྒྱུ་ཡིན་པ་དང་། མེཀ་སི་ཁོ་དང་ཁེ་ན་ཌ་གཉིས་ཀས་དཀའ་ངལ་དེ་རིགས་མཚམས་འཇོག་ཐུབ་རྒྱུར་ཐོབ་དབང་ཡོད་པས་དབང་ཆ་དེ་བེད་སྤྱོད་བྱེད་དགོས་པའི་དགོས་འདུན་བཏོན་གྱི་ཡོད་ཅེས་བརྗོད་ཀྱི་ཡོད། དེ་ལྟར་མ་བྱས་ཀྱི་བར་ཁོང་ཚོས་སྤྲོད་འཇལ་ཆེན་པོ་འཇལ་དགོས་འགྱུར་གྱི་རེད་ཅེས་འགྲེལ་བརྗོད་བྱས་འདུག

ཁེ་ནེ་ཌའི་མཐོ་རིམ་གཞུང་འབྲེལ་མི་སྣ་གཅིག་གིས་བརྗོད་དོན་ལ་ ཌོ་ནལྜ་ ཊམ་གྱིས་འཕྲིན་ཡིག་དེ་སྤྱི་ཚོགས་དྲ་ཚིགས་ནང་བཞག་རྗེས་སྲིད་བློན་ཇས་ཌིན་ ཀྲུ་ཌེ་འུ་དང་ཊམ་གཉིས་བཀའ་གྲོས་གནང་ཡོད་པ་དང་། དབུ་ཁྲིད་གཉིས་ཀྱིས་ས་མཚམས་དང་ཚོང་འབྲེལ་སྐོར་བཀའ་གྲོས་གནང་ཡོད་པ་དེའི་ནང་བཀའ་སྡུར་ཡག་པོ་བྱུང་འདུག་ཅེས་འགྲེལ་བརྗོད་བྱས་འདུག གཞུང་འབྲེལ་མི་སྣ་དེས་དབུ་ཁྲིད་གཉིས་ཀྱི་བཀའ་གྲོས་ཇི་བྱུང་སྐོར་ཕྱི་ལ་འགྲེལ་བཤད་བྱེད་ཆོག་གི་མེད་པར་བརྟེན་མཚན་སྨོས་གནང་འདོད་གནང་མི་འདུག

ཌོ་ནལྜ་ ཊམ་གྱིས་རྒྱ་ནག་ལའང་ཁོང་ཁྲོའི་རྣམ་འགྱུར་བསྟན་ནས་རྒྱ་ནག་ནས་དུས་རྫས་འཕོན་ཆེ་ཨ་རིར་གཏོང་གི་ཡོད་པ་དེའི་སྐོར་ལན་མང་རྒྱ་ནག་ལ་སྐད་ཆ་བཤད་ཡོད་པ་དང་། དམིགས་བཀར་ཕན་ཏ་ནི་སྐོར་བཤད་ཡོད། འོན་ཀྱང་དེ་ལ་གྲུབ་འབྲས་གང་ཡང་མ་བྱུང་། དེ་རིགས་རྒྱ་ནག་གིས་བཀའ་འགོག་མ་བྱས་བར་རྒྱ་ནག་ནས་ཨ་རིར་ནང་འདྲེན་བྱས་པའི་ཚོང་ཟོག་ཡོངས་ལ་སྒོ་ཁྲལ་འཕར་མ་བརྒྱ་ཆ་ ༡༠ འགེལ་རྒྱུ་ཡིན་ཞེས་འགྲེལ་བརྗོད་བྱས་འདུག

ཝ་ཤིན་ཌོན་ནང་ཡོད་པའི་རྒྱ་ནག་གི་གཞུང་ཚབ་ལས་ཁུངས་ཀྱིས་གལ་སྲིད་ཚོང་དོན་དམག་འཐབ་དེ་མུ་མཐུད་གནས་པ་ཡིན་ན་གྱོང་གུན་དེ་ཕྱོགས་གཉིས་ཀར་ཡོང་གི་རེད་ཅེས་བཤད་འདུག

རྒྱ་ནག་གཞུང་ཚབ་ཁང་གི་མགྲིན་ཚབ་པ་ལིའུ་ ཕིན་ཀུས་ཨེཀ་ས་སྤྱི་ཚོགས་དྲ་ཚིགས་ལ་འཕྲིན་ཡིག་བཀོད་པའི་ནང་ཨ་རི་དང་རྒྱ་ནག་དབར་གྱི་ཚོང་འབྲེལ་གྱི་ངོ་བོ་དེ་ཕྱོགས་གཉིས་ལ་ཁེ་ཕན་ཡོད་པ་གཅིག་ཡིན་པ་དང་། ཚོང་དོན་ནམ། ཡང་ན་སྒོ་ཁྲལ་གྱི་དམག་འཐབ་དེས་སུ་ལའང་རྒྱལ་ཁ་ཐོབ་ཀྱི་མ་རེད། རྒྱ་ནག་གིས་དུག་རྫས་བཀག་འགོག་བྱེད་རྒྱུར་སྔར་ལོ་ནས་ནུས་ཤུགས་ཆེ་རུ་བཏང་ཡོད་ཅེས་བཀོད་འདུག

བདམས་ཐོན་སྲིད་འཛིན་ཊམ་གྱི་ནོར་སྲིད་དྲུང་ཆེར་མིང་འདོན་བྱས་པ་སི་ཀོཊ་ བྷན་སན་གྱིས་སྒོ་ཁྲལ་གྱི་གནད་དོན་དེ་གྲོས་མོལ་བྱ་རྒྱུའི་གནད་དོན་གཅིག་རེད་ཅེས་ཐེངས་མང་པོར་གསུངས་ཡོད་པ་དང་། གལ་སྲིད་གྲོས་ཚོགས་གོང་མས་ངོས་ལེན་མང་མོས་ཐོབ་པ་ཡིན་ན་སྒོ་ཁྲལ་བཏང་འཛིན་བྱ་རྒྱུ་དེ་ནོར་སྲིད་དྲུང་ཆེའི་ལས་འགན་ཡིན་པ་རེད།