༄༅།། གཟའ་འཁོར་སྔོན་མར་ཨ་རིའི་ཚོང་དོན་དྲུང་ཆེ་རྒྱ་ནག་ལ་འཚམས་འདྲིར་ཕེབས་ཏེ་ཕྱོགས་གཉིས་ཀྱི་འབྲེལ་བ་ཡར་རྒྱས་གཏོང་ཐབས་སུ་འབད། ཕྱི་ཟླ་༩་པའི་ཚེས་༧་ཉིན་ཨེ་ཤི་ཡའི་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་འགོ་ཁྲིད་ཚོས་ཨ་རིས་དངོས་ཟོག་ལ་སྒོ་ཁྲལ་སྤར་ཡོད་པ་ཕྱིར་འཐེན་བྱ་དགོས་ཞེས་འབོད་སྐུལ་ཞུས། ཨ་རིའི་གཞུང་གིས་སྲིད་འཛིན་ཟུར་པ་ཌོ་ནལ་ཊམ་གྱི་དུས་སུ་རྒྱ་ནག་གི་དངོས་ཟོག་ལ་སྒོ་ཁྲལ་སྤར་བ་དང་སྲིད་འཛིན་བྷ་ཌན་གྱིས་རྒྱ་ནག་ལ་འཕྲུལ་རིག་ལག་རྩལ་ཕྱིར་ཚོང་བཀག་སྡོམ་གྱི་སྲིད་ཇུས་ལག་ལེན་བསྟར་གྱི་ཡོད་པ་རྣམས་ཕྱིར་འཐེན་བྱ་རྒྱུའི་རྣམ་འགྱུར་མ་བསྟན། བདུན་ཕྲག་སྔོན་མའི་གཟའ་མིག་དམར་ཉིན་ཨ་རིའི་ཚོང་དོན་དྲུང་ཆེ་ཇཱི་ན་རེ་མོན་ཌོས་སྲིད་འཛིན་ཟུར་པ་ཌོ་ནལ་ཊམ་གྱི་དུས་ནས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་ཡོད་པར་བསྐྱར་ཞིབ་བྱེད་ཀྱི་ཡོད། ང་ཚོས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་བ་མིན། སྒོ་ཁྲལ་ཁག་ཅིག་ལ་ཕན་ཐོགས་མི་འདུག སྲིད་འཛིན་བྷ་ཌན་གྱི་གཞུང་གིས་བསྐྱར་ཞིབ་ཆ་ཚང་ཞིག་མ་བྱས་པར་སྒོ་ཁྲལ་རྣམས་ཕྱིར་འཐེན་བྱེད་ཐུབ་རྒྱུ་ཁག་པོ་རེད་ཅེས་བཤད།།
ཨ་རིའི་ཚོང་དོན་སྐུ་ཚབ་གཞོན་པ་སེ་རཱ་བྷི་ཡན་ཀིས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་ཡོད་པར་ང་ཚོས་ལོ་མཇུག་ཡས་མས་སུ་བསྐྱར་ཞིབ་བྱས་ནས་ཚར་ས་རེད་ཅེས་བསྒྲགས། ཕྱི་ཟླ་༨་ཚེས་༢༨་ཉིན་རྒྱ་ནག་གི་ཚོང་དོན་བློན་ཆེན་ཝང་ཝེན་ཐའོ་ཡིས་ཨ་རིའི་ཚོང་དོན་དྲུང་ཆེར་ཨ་མི་རི་ཀས་སྒོ་ཁྲལ་སྤར་ཡོད་པ་རྣམས་འགྲིག་གི་མི་འདུག ཨ་མི་རི་ཀས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་ནས་ལོ་༥་འགྲོ་བཞིན་ཡོད་པ་དང་ཕྱོགས་གཉིས་ཀྱི་ཚོང་ལས་འཕེལ་རྒྱས་ལ་དལ་འགོར་ཆེན་པོ་འབྱུང་གི་འདུག ཨ་རིས་སྒོ་ཁྲལ་སྤར་ནས་འཛམ་གླིང་གི་དཔལ་འབྱོར་འཕེལ་རྒྱས་ལ་འགོག་རྐྱེན་བསླངས། ཕྱོགས་གཉིས་ཀྱི་མི་དམངས་དང་བཟོ་ཚོང་ལས་ཁུངས་ཁག་ལ་རྡོག་ཁྲེས་འཐོལ་པ་ཞིག་བཀལ། འཛམ་གླིང་ཚོང་དོན་སྒྲིག་འཛུགས་ཀྱིས་ཨ་མི་རི་ཀས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་བ་ཁྲིམས་འགལ་ཡིན་པ་གསལ་སྟོན་བྱས་ཡོད་པ་རེད་ཅེས་གྲོས་མོལ་བྱས་ཤིང་། དེང་སྐབས་རྒྱ་ནག་གི་དཔལ་འབྱོར་ཉམས་རྒུད་འགྲོ་བཞིན་པའི་རྒྱུ་རྐྱེན་གཅིག་ནི་ཨ་མི་རི་ཀས་རྒྱ་ནག་གི་དངོས་ཟོག་ལ་སྒོ་ཁྲལ་སྤར་བར་འབྲེལ་བ་ཡོད་པའི་གནས་ཚུལ་ཐོན་འདུག
༢༠༡༨་དང་༡༩་གཉིས་ལ་སྲིད་འཛིན་ཌོ་ནལ་ཊམ་གྱི་གཞུང་གིས་ཨ་སྒོར་ཐེར་འབུམ་༣༨༠་ཐམ་པའི་རིན་འབབ་ཀྱི་རྒྱ་ནག་གི་དངོས་ཟོག་རྣམ་གྲངས་སྟོང་ཕྲག་མང་པོར་སྒོ་ཁྲལ་སྤར། རྒྱ་ནག་གིས་ཨ་མི་རི་ཀའི་བཟོ་ཚོང་ལས་ཁུངས་ཁག་གི་འཕྲུལ་རིག་ལག་རྩལ་རྣམས་བཙན་འཕྲོག་བྱས་པ་དང་རིག་དངོས་བདག་དབང་བརྐུས་འཁྱེར། ཨ་རིའི་བཟོ་ཚོང་ལས་ཁུངས་ཁག་ལ་རྒྱ་ནག་གི་ཁྲོམ་རའི་ནང་དུ་ཚོང་ལས་ཀྱི་གོ་སྐབས་འདྲ་མཉམ་མ་སྤྲད། ལྷག་པར་དུ་ལོ་ནས་ལོ་བསྟུད་དེ་རྒྱ་ནག་དང་ཨ་མི་རི་ཀའི་ཚོང་ལས་ཆ་མཉམ་མེད་པ་བཅས་ཀྱིས་སྲིད་འཛིན་ཌོ་ནལ་ཊམ་གྱིས་ཨ་རིའི་སྲིད་འཛིན་སྔོན་མ་རྣམས་ཀྱིས་ལག་ལེན་བསྟར་མ་ཐུབ་པའི་སྲིད་ཇུས་ཤིག་ལག་ལེན་བསྟར། དེ་ནས་ཨ་རྒྱའི་ལོ་རྒྱུས་ནང་དུ་བྱུང་མྱོང་མེད་པའི་ཚོང་དམག་ལངས་ཏེ་པེ་ཅིང་དང་ཝ་ཤིང་ཊོན་གྱི་འབྲེལ་བ་སྡུག་ཏུ་སོང་། ༢༠༡༩་ཡི་ལོ་མཇུག་དེར་རྒྱ་ནག་ནས་འཛམ་གླིང་ཡོངས་ལ་པྲོག་དབྱིབས་ནད་དུག་ཁྱབ་སྟེ་དངོས་ཟོག་གི་ཐོན་སྐྱེད་ཆད། རྒྱལ་སྤྱིའི་ཐོག་ཏུ་རྒྱ་ནག་འཛམ་གླིང་གི་དངོས་ཟོག་བཟོ་གྲྭ་གཙོ་བོ་དེར་གྱུར་ན་ཉེན་ཁ་ཆེ་བ་ངོས་ཟིན།།
ཕྱི་ཟླ་༨་པའི་ཚེས་༣་ཉིན་ཨ་རིའི་ཚོང་དོན་དྲུང་ཆེས་ང་ཚོས་ལོ་ལྟར་རྒྱ་ནག་ལ་ཨ་སྒོར་ཐེར་འབུམ་མང་པོའི་སྙིང་ཆས་བཙོང་རྒྱུ་ཡིན། སྙིང་ཆས་དེ་རྣམས་ཆེས་དེང་རབས་ཅན་གྱི་སྙིང་ཆས་མིན། རྒྱ་ནག་གི་དམག་དོན་ལ་བཀོལ་སྤྱོད་བྱེད་ཐུབ་པའི་ཨ་མི་རི་ཀའི་ཡར་ཐོན་སྙིང་ཆས་རྣམས་འཚོང་གི་མེད། ཨ་རིའི་སྙིང་ཆས་ཁག་ཅིག་རྒྱ་ནག་ལ་བཙོངས་ན་ཁེ་སང་ཡོད་པ་དང་མ་འོངས་པའི་ཞིབ་འཇུག་སོགས་ལ་ཕན་ཐོགས་འདུག་ཅེས་བཀྲལ། རྒྱ་ནག་གི་ཧུ་པེ་ཞིང་ཆེན་དུ་གནས་འཁོད་རྩོམ་པ་པོ་ཞིག་གིས་ཨ་རིའི་ཚོང་དོན་དྲུང་ཆེའི་སྐད་ཆ་དེ་དག་གིས་སྲིད་འཛིན་བྷ་ཌན་གྱི་གཞུང་ནས་རྒྱ་ནག་ལ་ཚོང་ལས་ཀྱི་ཉེས་ཆད་བཀལ་ཡོད་པ་ཁག་ཅིག་ཕྱིར་འཐེན་བྱ་དགོས་མིན་ཐད་གྲོས་མོལ་བྱ་རྒྱུའི་ཁོར་ཡུག་ཅིག་བསྐྲུན་སྲིད་པའི་རྟགས་མཚན་འདུག ཡིན་ནའང་ཚོང་དོན་དྲུང་ཆེ་རེ་མོན་ཌོས་རྒྱ་ནག་དགྲ་ཟླར་འཛིན་པའི་ཨ་རིའི་སྲིད་དོན་པ་རྙིང་ཞེན་ཅན་དེ་དག་ལ་ཁ་གཏད་གཅོག་དཀའ་ཞེས་རྩོམ་ཡིག་བྲིས། རྩོམ་ཡིག་དེ་གཟའ་ལྷག་པའི་ཉིན་ཧེ་ནན་རྒྱང་སྲིང་ཁང་གི་སྤྱི་ཚོགས་དྲྭ་ལམ་དུ་བཀྲམ།།
རྒྱ་ནག་གི་རྩོམ་པ་པོ་དེས་དུས་ཡུན་ཧ་ཅང་རིང་པོ་ཞིག་ལ་ཝ་ཤིང་ཊོན་གྱི་སྲིད་དོན་པ་ཚོས་རྒྱ་ནག་དགྲ་ཟླར་འཛིན་རྒྱུ་ཆབ་སྲིད་ཀྱི་ལྟ་བ་ཡང་དག་པ་ཞིག་ཏུ་བརྩིས་འདུག དེས་ན་ཉེ་ཆར་རྒྱ་ནག་ལ་འཚམས་འདྲིར་ཕེབས་པའི་ཨ་རིའི་གཞུང་འབྲེལ་མི་སྣ་ཚང་མས་ལངས་ཕྱོགས་མཁྲེགས་པོ་འཛིན་དགོས་བྱུང་ཞིང་། ཨ་རིའི་གཞུང་འབྲེལ་མི་སྣ་རྣམས་རྒྱ་ནག་དགྲ་ཟླར་འཛིན་པའི་སྲིད་དོན་པ་དེ་དག་གི་དབང་བསྒྱུར་འོག་ཏུ་ཚུད། ཁོ་ཚོས་ཨ་རིའི་སྤྱི་དམངས་ལའང་རྒྱ་ནག་དགྲ་ཟླར་འཛིན་དགོས་པའི་ཤུགས་རྐྱེན་ཐེབས། ད་སྟེ་གནས་སྟངས་དེ་འདྲ་ཞིག་གི་འོག་ཏུ་ཨ་རིའི་མཐོ་རིམ་གཞུང་འབྲེལ་མི་སྣ་ཚོས་གནས་ལུགས་དང་མཐུན་པའི་ཐག་གཅོད་ཅིག་བྱེད་ཐུབ་རྒྱུ་ཤིན་ཏུ་དཀའ། ཨ་རིའི་སྤྱི་མཐུན་ཚོགས་པ་དང་དམངས་གཙོ་ཚོགས་པའི་ཆབ་སྲིད་ཀྱི་འཐབ་རྩོད་དེ་རྣོ་ངར་ཆེ་རུ་འགྲོ་བཞིན་ཡོད་པ་དང་ཨ་མི་རི་ཀས་རྒྱ་ནག་དགྲ་ཟླར་འཛིན་པའི་སྲིད་ཇུས་རྒྱུན་འཁྱོངས་བྱ་རྒྱུ་རེད་ཅེས་བྲིས། རྒྱ་ནག་གི་ལྟ་ཞིབ་དྲྭ་ཚིགས་ཀྱི་ཉམས་ཞིབ་པ་ཁྲེན་ཧྥེང་ཞེས་པ་ཞིག་གིས་ཨ་རིའི་བྷོ་དབྱིན་༧༤༧་རྟགས་ཅན་གྱི་གནམ་གྲུ་མང་པོ་ཞིག་རྒྱ་ནག་གིས་མངགས་ཉོ་བྱས་ཀྱང་ཚོང་དམག་ལངས་རྗེས་ཚོང་སློག་བྱས་པ་རེད། ཨ་རིའི་ཚོང་དོན་དྲུང་ཆེས་རྒྱ་ནག་ལ་བྷོ་དབྱིན་༧༤༧་རྟགས་ཅན་གྱི་གནམ་གྲུ་དེ་རྣམས་ཉོ་རུ་འཇུག་ཐབས་བྱེད་ཀྱི་འདུག་ཅེས་རྩོམ་ཡིག་བྲིས།།
ཨེ་ཤི་ཡའི་དུས་བབ་ཚོགས་པར་ལ་མུ་མཐུད་དུ་གནས་ཚུལ་ཐོན་པ་ལྟར་ན། ཨ་རིའི་ཚོང་དོན་དྲུང་ཆེ་དང་རྒྱ་ནག་གི་ཚོང་དོན་བློན་ཆེན་ཝང་ཝེན་ཐའོ་གཉིས་དུས་ཡུན་ཆུ་ཚོད་༤་ལ་གྲོས་མོལ་བྱས་ཏེ་ཕྱོགས་གཉིས་ཀྱི་ཚོང་དོན་དང་ཕྱིར་ཚོང་སྟངས་འཛིན་ཚན་པ་ཁག་གི་ལས་དོན་རུ་ཁག་བཙུགས་ཏེ་ཚོང་ལས་ལ་འབྲེལ་བ་ཡོད་པའི་གནད་དོན་དེ་ཚོར་བསྐྱར་ཞིབ་བྱེད་དུ་འཇུག་རྒྱུའི་གྲོས་མཐུན་བྱུང་། ཕྱི་ཟླ་༨་པའི་ཚེས་༢༩་ཉིན་རྒྱ་ནག་གི་སྲིད་བློན་གཞོན་པ་ཧེ་ལི་ཧྥེང་གིས་ཕྱོགས་གཉིས་ཀྱི་མཉམ་འབྲེལ་ཡར་རྒྱས་གཏོང་རྒྱུར་ཤུགས་སྣོན་རྒྱག་ཆོག་ཅེས་ཨ་རིའི་ཚོང་དོན་དྲུང་ཆེར་ཁས་བླངས། རྒྱ་ནག་ལ་སྙིང་ཆས་ཀྱི་ཚོང་དམག་ཟུར་དུ་བཞག་སྟེ་ཨ་མི་རི་ཀར་ལས་དོན་གཞན་གྱི་ཐོག་ཏུ་མཉམ་འབྲེལ་བྱ་རྒྱུའི་འདོད་ཡོད་པའི་རྣམ་པ་ཞིག་ཐོན། ཉིན་དེར་རྒྱ་ནག་གི་ཧྭ་ཝེ་ཁ་པར་བཟོ་ཚོང་ཁང་གིས་ཁ་པར་གསར་པ་ཞིག་བཏོན། ཨ་རིའི་རྒྱལ་སྲུང་སློབ་སྟོན་པ་སུ་ལི་ཝན་གྱིས་ཧྭ་ཝེའི་འཕྲུལ་རིག་ལག་རྩལ་ཅི་ཡིན་རྩད་གཅོད་མ་ཐུབ་པར་ཁ་པར་གསར་པ་དེའི་ཐད་སྐད་ཆ་བཤད་རྒྱུ་མིན་ཟེར།།
ཕྱི་ཟླ་༩་པའི་ཚེས་༦་ཉིན་ནེའུ་ཡོག་དུས་བབ་ཚགས་པར་ལ་གནས་ཚུལ་ཐོན་པ་ལྟར་ན། རྒྱ་ནག་གི་ཧྭ་ཝེ་ཁ་པར་བཟོ་ཚོང་ཁང་གིས་ཁ་པར་ཐོན་རིམ་གསར་པ་ཞིག་བཟོ་ཐུབ་ཡོད་ཅིང་། ཨ་མི་རི་ཀས་རྒྱ་ནག་ལ་སྙིང་ཆས་ཀྱི་ཚོང་ལས་བཀག་ནས་ཉེས་ཆད་བཅད་ཀྱང་ཕན་ཐོགས་མ་བྱུང་བ་རེད། ཧྭ་ཝེའི་ཁ་པར་གྱི་སྙིང་ཆས་དེ་རྒྱ་ནག་རང་གིས་བཟོས་པའི་ཆེས་ཡར་ཐོན་གྱི་སྙིང་ཆས་ཞིག་ཡིན་པར་སྣང་། ཨ་མི་རི་ཀས་རྒྱ་ནག་གི་སྙིང་ཆས་འཕྲུལ་རིག་ལག་རྩལ་འགོག་ཐབས་བྱས་ཀྱང་འགོག་མ་ཐུབ་པ་འདྲ། ཧྭ་ཝེ་བཟོ་ཚོང་ཁང་གི་ཁ་པར་གསར་པ་ཐོན་པ་དང་ཨ་རིའི་ཚོང་དོན་དྲུང་ཆེ་རྒྱ་ནག་ལ་འཚམས་འདྲིར་ཕེབས་པ་གཉིས་སྟབས་ཁེལ་བ་ཡིན་སྲིད། ཨ་རིའི་ཚོང་དོན་དྲུང་ཆེས་རྒྱ་ནག་གི་འགོ་ཁྲིད་ཚོར་གྲོས་མོལ་བྱས་པའི་དུས་ཚོད་མང་ཆེ་བར་ཨ་མི་རི་ཀས་རྒྱ་ནག་ལ་སྙིང་ཆས་བཀག་སྡོམ་བྱ་དགོས་པའི་རྒྱུ་མཚན་རྣམས་འགྲེལ་བཤད་བརྒྱབ། རྒྱ་ནག་གིས་ཨ་མི་རི་ཀས་སྙིང་ཆས་བཀག་སྡོམ་གྱི་ཁྲིམས་ལ་འགྱུར་བ་གཏོང་དགོས་པའི་ཨུ་ཚུགས་བརྒྱབ་འདུག་ཅེས་གསར་འགྱུར་སྤེལ།།
རྒྱ་ནག་གི་གསར་འགྱུར་ལས་ཁང་ཁག་གིས་ཧྭ་ཝེ་ཁ་པར་བཟོ་ཚོང་ཁང་གིས་སྙིང་ཆས་གསར་པ་བཟོ་ཐུབ་པ་ནི་རྒྱ་ནག་ཨ་མི་རི་ཀའི་སྙིང་ཆས་ཀྱི་འཕྲུལ་རིག་རྩལ་ལ་བརྟེན་མ་དགོས་པར་རང་བཙན་ཐོབ་པ་རེད་ཅེས་གསར་འགྱུར་སྤེལ། ཨ་རིའི་ཉམས་ཞིབ་པ་ཚོས་ཧྭ་ཝེ་ཁ་པར་བཟོ་ཚོང་ཁང་གི་སྙིང་ཆས་དེ་ཨ་མི་རི་ཀའི་འཕྲུལ་རིག་ལག་རྩལ་ལ་ཤུགས་ཆེན་པོ་བརྟེན་ཡོད་པས་ཨ་རིའི་བཀག་སྡོམ་འོག་ཏུ་ཚུད་འདུག སྲིད་འཛིན་ཟུར་པ་ཌོ་ནལ་ཊམ་གྱིས་རྒྱ་ནག་ལ་ཡར་ཐོན་སྙིང་ཆས་ཀྱི་ཚོང་ལས་བཀག་སྡོམ་བྱ་རྒྱུ་མགོ་བརྩམས། སྲིད་འཛིན་བྷ་ཌན་ནས་སྲིད་ཇུས་དེ་རྒྱུན་འཁྱོངས་བྱས་ཏེ་རྒྱ་ནག་གིས་ཨ་མི་རི་ཀའི་སྙིང་ཆས་རྣམས་དམག་དོན་དང་མཚོན་ཆ་ཡར་རྒྱས་གཏོང་རྒྱུར་བཀོལ་སྤྱོད་བྱེད་མི་ཐུབ་པར་གྱུར། ཕྱི་ཟླ་༩་པའི་ཚེས་༧་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་གཞུང་གིས་ཧྭ་ཝེའི་འཕྲུལ་རབས་༥་པའི་ཁ་པར་གྱི་སྙིང་ཆས་ལག་རྩལ་དེའི་འབྱུང་ཁུངས་ལ་ཞིབ་འཇུག་བྱེད་ཀྱི་ཡོད་པར་མ་ཟད། ཨ་རིའི་གྲོས་ཚོགས་འཐུས་མི་ཚོས་རྒྱ་ནག་ལ་སྙིང་ཆས་བཀག་སྡོམ་གྱི་ཉེས་ཆད་གཅོད་རྒྱུ་སྔར་ལས་ཤུགས་ཆེ་རུ་གཏོང་དགོས་པའི་གྲོས་སྡུར་བྱེད་ཀྱི་ཡོད་པའི་གནས་ཚུལ་ཐོན་འདུག
