༄༅།། རྒྱ་ནག་གཞུང་གིས་བོད་དང་བལ་ཡུལ་གྱི་ས་མཚམས་བཀག་ནས་དོལ་སྟོད་ཁུལ་གྱི་དོལ་པོ་བྷུ་དྷ་ཀུན་མཁྱེན་དོལ་པོ་སངས་རྒྱས་ཀྱི་འཁྲུངས་ཡུལ་ཕྱོགས་དང་ཤེལ་ཕུ་སུམ་མདོ། ཚྭ་དགའ་སྟེང་གཤོངས་བཅས་ཀྱི་ས་གནས་ཁག་གི་དོལ་པོ་བ་ཚོར་ཡུལ་ཐང་འཕར་ནས་དཀའ་ངལ་འཕྲད་ཀྱི་ཡོད་པའི་གནས་ཚུལ་ཐོན་འདུག ཕྱི་ཟླ་༧་པའི་ཚེས་༢༧་ཉིན་ཀ་ཐ་མན་རྡུ་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། ཀརྨ་བླ་མ་ནི་དོལ་སྟོད་བྷུ་དྷ་གྲོང་སྡེ་ལྷན་ཁང་ཁྱབ་ཁོངས་ཀྱི་སྡེ་གྲོང་གསུམ་པའི་ཡུལ་མི་ཞིག་ཡིན་ཞིང་། ཉེ་ཆར་ཁོང་གིས་བལ་སྒོར་༤༥༠༠་སྤྲད་ནས་འབྲས་སྤྱི་རྒྱ་༣༠་ཐམ་པ་ཉོས། རྫོང་གི་སྤྱི་ཁྱབ་ཁང་ཡོད་སའི་སྡུག་དམྱལ་ལམ། དུང་ཉལ་གྲོང་དུ་ཉོས་ན་འབྲས་སྤྱི་རྒྱ་༣༠་ཐམ་པར་བལ་སྒོར་༡༥༠༠་ལས་སྤྲོད་མི་དགོས། ད་ལྟ་ཉེར་མཁོའི་དངོས་ཟོག་རྣམས་ས་གནས་གཞན་ནས་རྟ་དྲེལ་ལ་བཀལ་ཏེ་སྐྱེལ་འདྲེན་བྱ་དགོས་པས་དོལ་པོ་བྷུ་དྷ་དང་ཤེལ་ཕུ་སུམ་མདོ། ཚྭ་དགའ་སྟེང་གཤོངས་བཅས་ཀྱི་གྲོང་སྡེ་ཁག་ཏུ་དངོས་ཟོག་ལ་རིན་གོང་འཕར་མ་སྤྲད་ནས་ཉོ་དགོས་པའི་གནས་ཚུལ་ཐོན་འདུག
ཤེལ་ཕུ་སུམ་མདོ་གྲོང་སྡེ་ལྷན་ཁང་གི་སྡེ་གྲོང་༣་པའི་ཡུལ་མི་གུ་རུང་རྡོ་རྗེ་ཚེ་རིང་གིས་ཀ་ཐ་མན་རྡུ་ཡིག་ཟམ་ཚགས་པར་གྱི་གསར་འགོད་པར་བཤད་པ་ལྟར་ན། རྒྱ་ནག་གིས་བལ་བོད་ས་མཚམས་སྒོ་བརྒྱབ་པའི་རྗེས་སུ་ཞིང་པ་ཚོས་རང་གི་ཐོན་སྐྱེད་བཙོང་ས་མ་རྙེད་པར་དཀའ་ངལ་འཕྲད་ཀྱི་འདུག ང་ཚུད་པའི་ཞིང་པ་མང་པོ་བུ་ལོན་ནང་དུ་ཚུད་ཡོད་པ་དང་ང་ཚོས་མིའི་ལག་ནས་དངུལ་སྒོར་བསྐྱིས་ཏེ་བུ་ལོན་ཆེན་པོ་ཡོད། ས་མཚམས་སྒོ་ཕྱེ་ཡོད་པའི་དུས་སུ་ང་ཚོས་ལོ་གཅིག་ལ་འདང་བའི་འབྲུ་རིགས་རྣམས་བོད་ནས་སྡེབ་ཉོ་བྱེད་ཀྱི་ཡོད་པ་དང་སྨན་རྩྭ་སོགས་བོད་ལ་བཙོངས་ནས་ཁེ་སང་ཆེན་པོ་ཐོབ་ཀྱི་ཡོད་ཅེས་བཀྲལ། ཚྭ་དགའ་སྟེང་གཤོངས་གྲོང་སྡེ་ལྷན་ཁང་གི་གཙོ་འཛིན་གུ་རུང་བསོད་ནམས་ཀྱིས་མར་ཡུམ་དང་སྐྱ་གྲོད་ཟུང་ནི་བོད་དང་དོལ་པོ་འདྲེས་མཚམས་ཀྱི་ས་ཚིགས་གཉིས་རེད། རྒྱ་ནག་གིས་བལ་བོད་ས་མཚམས་སྒོ་བརྒྱབ་པའི་རྗེས་སུ་དོལ་སྟོད་ཕྱོགས་ཀྱི་མི་དམངས་ལ་ཟས་སོང་འཕར་ནས་དཀའ་ངལ་ཆེ་རུ་འགྲོ་འགོ་ཚུགས་སོང་ཟེར།།
ཀརྨ་བླ་མས་གསར་འགོད་པར་མུ་མཐུད་དུ་གླེང་མོལ་བྱས་པ་ལྟར་ན། དོལ་སྟོད་ཕྱོགས་སུ་རྒྱ་ལམ་འཛུགས་སྐྲུན་དང་སྐྱེལ་འདྲེན་སྟབས་བདེ་མེད་པའི་རྐྱེན་གྱིས་དངོས་ཟོག་དེ་དག་ཉོ་ཡུལ་ནས་འདྲེན་ཡུལ་ཁག་ཏུ་སྐྱེལ་འདྲེན་བྱེད་པར་ཉིན་༣་འགོར་གྱི་འདུག ས་གནས་ཀྱི་ཚོང་པ་ཚོས་རི་ལམ་ཕྲ་མོ་དང་དགག་འཕྲང་དོག་མོ་བརྒྱུད་ནས་རྟ་དྲེལ་གྱི་སྟེང་དུ་དངོས་ཟོག་བཀལ་ཏེ་སྐྱེལ་འདྲེན་བྱ་དགོས་པས་འབྲུ་རིགས་དང་དངོས་ཟོག་རྣམས་རིན་གོང་ལྡབ་གཉིས་རེ་འཕར་འདུག སྐབས་འགར་འབྲས་སྤྱི་རྒྱ་༣༠་ཐམ་པ་སྐྱེལ་འདྲེན་བྱས་པའི་དོས་གླ་གཅིག་པུར་བལ་སྒོར་༣༠༠༠་ཡས་མས་རེ་འབབ་ཀྱི་འདུག འདས་པའི་ལོ་བཞིའི་རིང་རྒྱ་ནག་གིས་ཏོག་དབྱིབས་ནད་དུག་འགོག་གི་ཡོད་ཅེས་བལ་བོད་ས་མཚམས་སྒོ་བརྒྱབ་ནས་ང་ཚོར་དཀའ་ངལ་ཆེ་རུ་ཕྱིན་སོང་། དོལ་པོའི་ས་ཞིང་རྣམས་ཆུ་མ་མིན་པ་དང་ཐན་པ་བྱུང་བ་སོགས་ཀྱིས་འབྲུ་རིགས་ཕྱི་ནས་ནང་འདྲེན་བྱ་དགོས་ཀྱི་འདུག སྔོན་ཆད་བོད་ནས་འབྲས་ནང་འདྲེན་བྱེད་ཀྱི་ཡོད་པས་འབྲུ་རིགས་ཀྱི་རིན་གོང་ཆེན་པོ་མ་རེད་ཅེས་བསྟན།།
ཤེལ་ཕུ་སུམ་མདོ་གྲོང་སྡེ་ལྷན་ཁང་གི་སྤྱི་ཁྱབ་གཞོན་པ་གུ་རུང་པདྨ་དབང་ཆེན་གྱིས་ཟ་འབྲུ་འདུ་འགོད་དང་ཚོང་ལས་ཁང་བཙུགས་ཏེ་ལྷ་མཆོད་དུས་ཆེན་སྐབས་སུ་གྲོང་སྡེ་གསུམ་གྱི་མི་དམངས་ལ་འབྲས་ཀུན་ཊལ་༡༥༠༠་རེ་འཚོ་སྣོན་བཙོང་རྒྱུའི་གཏན་འབེབས་བྱས་བྱུང་། ཡིན་ནའང་དོལ་སྟོད་ཕྱོགས་ཀྱི་མི་དམངས་ལ་ཟ་འབྲུ་མ་འདང་བའི་དཀའ་ངལ་ཚབས་ཆེན་ཡོད་པས་ཕྱི་ཟླ་༡༠་པའི་འཚོ་སྣོན་གྱི་འབྲས་དེས་བདུན་ཕྲག་གཅིག་ལའང་འདང་ས་མ་རེད། རྒྱ་ནག་གིས་བལ་བོད་ས་མཚམས་སྒོ་ཕྱེ་ན་དོལ་པོའི་མི་དམངས་ལ་ཕྱོགས་གང་ཐད་དུ་སྟབས་ཇེ་བདེར་འགྲོ་རྒྱུ་སྨོས་ཅི་དགོས། དོལ་སྟོད་ཀྱི་མི་མང་གིས་བོད་ཀྱི་ཁྲོམ་རའི་ནང་དུ་ཚོང་ལས་གཉེར་ཐུབ་ཀྱི་མེད་པས་ཡོང་འབབ་མེད་པར་ལོ་གསུམ་འདས། བལ་ཡུལ་དབུས་གཞུང་གིས་རྒྱ་ནག་ལ་གྲོས་མོལ་བྱས་ནས་བལ་བོད་ཀྱི་ཚོང་ལམ་བསྐྱར་དུ་སྒོ་ཕྱེ་སྟེ་དོལ་པོ་མི་དམངས་ལ་ཟས་སོང་འཕར་ནས་དཀའ་ངལ་འཕྲད་ཀྱི་ཡོད་པ་སེལ་ཐབས་ཤིག་རྙེད་ཀྱི་མི་འདུག ང་ཚོས་རིམ་པ་ཁག་གི་འགོ་ཁྲིད་ཚོར་བདེ་སྡུག་ཞུས་རུང་སུ་གཅིག་གིས་ཀྱང་གཟིགས་རྟོག་གནང་གི་མི་འདུག་ཅེས་གསར་འགོད་པར་སྡུག་སྐད་བརྒྱབ།།
རྒྱ་ནག་གི་ཝུ་ཧན་གྲོང་ཁྱེར་ནས་འཛམ་གླིང་ཡོངས་ལ་ཏོག་དབྱིབས་ནད་དུག་མ་ཁྱབ་གོང་དུ་དོལ་པོ་བ་ཚོ་ཉི་མ་གཅིག་གི་ལམ་ཐག་ལས་མེད་པའི་བལ་བོད་ས་མཚམས་སུ་བསྐྱོད་ནས་ཉེར་མཁོའི་དངོས་ཟོག་རྣམས་ཉོ་སྒྲུབ་བྱ་རྒྱུ་སྟབས་བདེ་ཞིང་། བོད་ནས་ནང་འདྲེན་བྱས་པའི་དངོས་ཟོག་ལ་དོས་གླ་དམའ། རྫོང་གི་སྤྱི་ཁྱབ་ཁང་ཡོད་སའི་སྡུག་དམྱལ་གྲོང་ནས་ཉོ་དགོས་ན་དངོས་ཟོག་ལ་རིན་གོང་ཆེ། ས་མཚམས་སྒོ་མ་བརྒྱབ་གོང་དུ་དོལ་པོའི་འབྲོག་ལས་ཐོན་སྐྱེད་དང་སྨན་རྩྭ་རྣམས་ས་མཚམས་སུ་ཁྱེར་ནས་བོད་པ་དང་རྒྱ་མི་ཚོར་བཙོངས་ནས་དཔལ་འབྱོར་ཡོང་འབབ་ཡག་པོ་ཐོབ། ཏོག་དབྱིབས་ནད་ཡམས་ཁྱབ་པའི་རྗེས་སུ་རྒྱ་གཞུང་གིས་བལ་བོད་ས་མཚམས་བཀག སྡུག་དམྱལ་གྲོང་དུ་བལ་སྒོར་༡༠་སྤྲོད་དགོས་པའི་ཚཱ་སྦག་ཆ་ཞིག་ལ་དོལ་སྟོད་ཕྱོགས་སུ་བལ་སྒོར་༡༠༠་སྤྲོད་དགོས་ཤིང་། ང་ཚོས་ཁྲོམ་རའི་ཟ་སྣུམ་ལ་སྐྱེལ་འདྲེན་དོས་གླ་བལ་སྒོར་༣༠༠་སྤྲོད་དགོས་པར་མ་ཟད། ས་གནས་མི་མང་གིས་དངོས་ཟོག་སྡེབ་ཉོ་བྱས་ནས་རིན་གོང་སྔར་ལས་འཕར། ཆར་དུས་དང་དགུན་དུས་སྐྱེལ་འདྲེན་གྱི་དོས་གླས་དེ་བས་ཀྱང་འཕར་གྱི་འདུག་ཅེས་གནས་ཚུལ་སྤེལ་འདུག
ཕྱི་ཟླ་༧་པའི་ཚེས་༢༧་ཉིན་རྒྱ་ནག་གི་ཞིན་ཧྭ་གསར་འགྱུར་ལས་ཁུངས་ཀྱིས་གནས་ཚུལ་སྤེལ་བ་ལྟར་ན། ༢༠༢༣་གྱི་བཞི་ཚན་དང་པོ་དེར་བོད་རང་སྐྱོང་ལྗོངས་དང་བལ་ཡུལ་གྱི་ཚོང་ལས་བརྒྱ་ཆ་༤.༧་འཕེལ་རྒྱས་ཕྱིན་ཏེ་ཕྱི་ཟླ་དང་པོ་ནས་ཕྱི་ཟླ་༦་པའི་བར་དུ་ཨ་སྒོར་དུང་ཕྱུར་༡.༡༤་ལྷག་བརྒལ། བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་གའོ་པའོ་ཅུན་གྱིས་བལ་ཡུལ་ནི་བོད་ཀྱི་ཚོང་ཤག་བླ་ན་མེད་པ་དེ་ཡིན། སྐྱིད་གྲོང་དང་འགྲམ། སྤུ་ཧྲེང་བཅས་ཀྱི་འགག་སྒོ་རྣམས་སྒོ་ཕྱེ་ནས་ཕྱོགས་གཉིས་ཀྱི་ཚོང་ལས་འཕྲོ་སྐྱོང་བྱེད་ཀྱི་ཡོད་ཅེས་བསྒྲགས། ཡིན་ནའང་གའོ་པའོ་ཅུན་གྱིས་བོད་རང་སྐྱོང་ལྗོངས་ཀྱི་ཚོགས་འདུ་ཐེངས་༡༡་པའི་ཐོག་ཏུ་བོད་དང་དོལ་པོའི་ས་མཚམས་ཁག་ནམ་སྒོ་འབྱེད་རྒྱུ་ཡིན་མིན་གསལ་སྟོན་མ་བྱུང་། བོད་རང་སྐྱོང་ལྗོངས་ཀྱི་ཕྱིར་ཚོང་གཉེར་ཡུལ་གཙོ་བོ་ཞིག་བལ་ཡུལ་ཡིན་པ་དང་བོད་རང་སྐྱོང་ལྗོངས་ནི་བལ་ཡུལ་དུ་མ་རྩ་འཛུགས་མཁན་གཙོ་གྲས་སུ་གྱུར། ད་སྔ་ཕན་ཆད་ལ་བོད་རང་སྐྱོང་ལྗོངས་ཀྱིས་བལ་ཡུལ་གྱི་ལས་གཞི་༢༠་ཐམ་པར་ཨ་སྒོར་ས་ཡ་༨༧.༣༣་མ་རྩ་བཙུགས། དེ་བཞིན་བལ་ཡུལ་གྱིས་ཀྱང་བོད་རང་སྐྱོང་ལྗོངས་ཀྱི་ལས་གཞི་རྣམ་གྲངས་༦༠་ལྷག་ལ་མ་རྩ་བཙུགས་ཡོད་པའི་གནས་ཚུལ་ཐོན་འདུག
ཉེ་ཆར་ཕྱི་ཟླ་༥་པའི་ཚེས་༡་ཉིན་ཀ་ཐ་མན་རྡུ་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། འདས་པའི་ལོ་གཉིས་ལྷག་ལ་རྒྱ་ནག་གིས་ཏོག་དབྱིབས་ནད་དུག་གཙང་སེལ་གྱི་སྲིད་ཇུས་ལག་ལེན་བསྟར། ད་ལོའི་ཕྱི་ཟླ་༥་པའི་ཚེས་༡་ནས་ར་སུ་ཝ་ག་དྷི་དང་སྐྱིད་གྲོང་། ཏ་ཏོ་པ་ཎི་དང་འགྲམ་གྱི་ཚོང་ལམ་རྣམས་བསྐྱར་དུ་སྒོ་འབྱེད་རྒྱུ་རེད། ཡར་རི་དང་ཕུ་ལང་བར་གྱི་ཚོང་ལམ་དང་འགྲིམ་འགྲུལ་ཡང་བསྐྱར་དུ་འགོ་ཚུགས་རྒྱུའི་གྲོས་མཐུན་བྱུང་འདུག བལ་ཡུལ་གཞུང་ནས་རེ་སྐུལ་ཞུས་པ་ལྟར་རྒྱ་ནག་གིས་བལ་བོད་ས་མཚམས་སུ་བརྟག་དཔྱད་ས་ཚིགས་སྣ་མང་ཞིག་འཛུགས་རྒྱུའི་མོས་མཐུན་བྱས་པ་རེད་ཅེས་གནས་ཚུལ་སྤེལ། ཡིན་ནའང་ཕྱི་ཟླ་༥་པའི་ཚེས་༡༥་ཉིན་བོད་གནས་བསྐྱར་ཞིབ་ལ་གནས་ཚུལ་ཐོན་པ་ལྟར་ན། ཕྱི་ཟླ་༥་པའི་ཚེས་༡་ཉིན་རྒྱ་ནག་གིས་བལ་ཡུལ་ལ་ཏ་ཏོ་པ་ཎིའི་ས་མཚམས་སྒོ་ཕྱེ་པའི་རྗེས་སུ་བལ་ཡུལ་ནས་སྨྱུག་མའི་རྐུབ་བཀྱག་དང་འགྱིག་གི་ཁྱིམ་ཆས་བརྩིགས་པའི་དོས་སྐྱེལ་རླངས་འཁོར་༣་བལ་བོད་ས་མཚམས་སུ་བསྐྱོད། ཕྱི་ཟླ་༥་པའི་ཚེས་༢་ཉིན་རྒྱ་གཞུང་གིས་བལ་པོའི་ཅ་ལག་དེ་རྣམས་ཉོ་མཁན་མི་འདུག་ཅེས་ས་མཚམས་སླར་ཡང་སྒོ་བརྒྱབ་པའི་གནས་ཚུལ་ཐོན་འདུག
