༄༅།། ཇོ་མོ་གླང་མའི་གངས་འདབས་ཀྱི་གཞིས་སྒར་དང་གཞིས་སྒར་དང་པོའི་བར་གྱི་ཁུམ་བུའི་ཁུལ་དུ་འཁྱག་རོམ་ཉིལ་ཏེ་ཤར་པ་ལམ་ཤན་པ་གསུམ་གངས་འོག་ཏུ་མནན། ཕྱི་ཟླ་༤་པའི་ཚེས་༡༤་ཉིན་བལ་ཡུལ་གྱི་ཧི་མ་ལ་ཡ་ཉིན་རེའི་ཚགས་པར་ལ་གནས་ཚུལ་ཐོན་པ་ལྟར་ན། ཤར་པ་རི་འཛེག་པ་དེ་དག་འཚོལ་ཞིབ་བྱས་ནས་སྐྱོབ་ཐབས་བྱེད་ཀྱི་ཡོད་ཀྱང་རྙེད་ཀྱི་མེད་ཅིང་། བལ་ཡུལ་གྱི་ཡུལ་སྐོར་སྤྲོ་འཆམ་ལྷན་ཁང་གི་རི་འཛེག་སྡེ་ཚན་གྱི་འགན་འཛིན་ཡུབ་ར་ཇ་ཀ་དི་ཝ་ཌས་ང་ཚོས་འཚོལ་ཞིབ་པ་དང་ཉེན་སྐྱོབ་རུ་ཁག་བཏང་བར་གྲུབ་འབྲས་མ་སོན། ད་དུང་ཡང་འཚོལ་ཞིབ་དང་ཉེན་སྐྱོབ་ཀྱི་ལས་དོན་སྒྲུབ་བཞིན་ཡོད། སིམ་རི་ཀ་མཁའ་ལམ་ལས་ཁུངས་ཀྱི་ཐད་འཕུར་གནམ་གྲུ་ཞིག་ཀྱང་འཁྱག་རོམ་ཉིལ་ཡུལ་དུ་བཏང་སྟེ་ཉེན་སྐྱོབ་ཀྱི་ལས་དོན་ལ་གཞོགས་འདེགས་སྒྲུབ་ཏུ་བཅུག་ཀྱང་ལས་དོན་ལ་རྔོ་ཐོགས་པ་ཞིག་ཡོང་གི་མི་འདུག་ཅེས་བཤད་འདུག
སིམ་རི་ཀ་མཁའ་ལམ་ལས་ཁུངས་ཀྱི་ཚོང་ལས་འགན་འཛིན་ཡོ་གེ་ཤ་སབ་ཀོ་ཏས་མི་གསུམ་པོ་གངས་མཐུག་པོའི་འོག་ཏུ་མནན་ཡོད་པས་རྙེད་དཀའ། གངས་འོག་ཏུ་མནན་པའི་མི་རྣམས་འཚོལ་སྤྱད་འཕྲུལ་ཆས་བཀོལ་སྤྱོད་བྱས་ཀྱང་རྙེད་ཀྱི་མི་འདུག དེ་རིང་མཁའ་དབྱིངས་སུ་གནམ་གྲུ་བཏང་ནས་ཁུལ་དེར་སྐོར་ཞིབ་བྱས་ཀྱང་ཅི་ཡང་རྙེད་མ་བྱུང་། མི་དེ་དག་འཆི་གསོན་ཇི་ལྟར་ཡིན་རུང་རྙེད་པ་ཡིན་ཚེ། ཁོ་ཚོ་སྐྱེལ་འདྲེན་བྱེད་སྤྱད་གནམ་གྲུ་ས་གནས་དེར་བཞག་ཡོད་ཅེས་བཀྲལ། གངས་འོག་ཏུ་མནན་པའི་ཤར་པ་གསུམ་ནི་ཁུམ་བུ་པ་སངས་ལྷ་མོ་རི་གྲོང་ལྔ་པའི་ཟླ་བ་ཚེ་རིང་དང་སྤེན་པ་བསྟན་འཛིན། ལྷག་པ་ཧྲི་ཐར་བཅས་ཡིན་ཞིང་། ཁོ་ཚོས་གངས་འཛེག་པའི་མཁོ་ཆས་སྐྱེལ་འདྲེན་བྱེད་ཀྱི་ཡོད་པ་དང་བལ་ཡུལ་གཞུང་གིས་ཇོ་མོ་གླང་མའི་འདབས་ཀྱི་རྐང་ལམ་བསྐྱར་གསོ་རྒྱུན་འཁྱོངས་བྱེད་དགོས་མིན་ཐད་གྲོས་སྡུར་བྱེད་ཀྱི་ཡོད་པའི་གནས་ཚུལ་ཐོན།།
༡༩༥༣་ལོར་ཤར་པ་བསྟན་འཛིན་ནོར་རྒྱས་དང་ཨེ་ཌི་མེན་ཌི་ཧི་ལ་རི་གཉིས་ཆེས་ཐོག་མར་ཇོ་མོ་གླང་མའི་རྩེ་མོར་འཛེགས། ད་ལོ་བལ་ཡུལ་གཞུང་གིས་ཇོ་མོ་གླང་མའི་རྩེ་མོར་འགྲོ་བ་མི་འཛེགས་ནས་ལོ་༧༣་འཁོར་བའི་དུས་དྲན་སྲུང་བརྩི་བྱེད་ཀྱི་ཡོད་པར་མ་ཟད། ད་སྔ་བལ་ཡུལ་གཞུང་གིས་རི་འཛེག་པ་༢༤༣་ལ་ཇོ་མོ་གླང་མའི་རྩེ་རུ་འཛེག་ཆོག་པའི་ཆོག་མཆན་སྤྲད། ཆོག་མཆན་ཐོབ་པའི་རི་འཛེག་པ་དེ་དག་གི་གྲས་སུ་བུད་མེད་༤༡་དང་སྐྱེས་པ་༢༠༢་ཡོད་ཅིང་། བལ་ཡུལ་གཞུང་གིས་དཔྱིད་ཀ་འདིར་རི་འཛེག་གི་ཆོག་མཆན་སྤྲད་ནས་བལ་སྒོར་དུང་ཕྱུར་༣་དང་ས་ཡ་༣༤་ཡི་ཡོང་འབབ་བསྡུས། ཀ་ཐ་མན་རྡུ་ཡིག་ཟམ་ཚགས་པར་ལ་གནས་ཚུལ་ཐོན་པ་ལྟར་ན། གཟའ་ལྷག་པའི་ཞོགས་པའི་ཆུ་ཚོད་༩་དང་ཕྱེད་ཀ་ཡས་མས་སུ་ཁ་བ་དང་འཁྱག་རོམ་ཊོན་ས་ཡ་འགའ་ཞིག་ཐུར་དུ་ཉིལ། སྐབས་དེར་ས་མཐོའི་ལམ་ཤན་པ་༢༥་ཙམ་གྱིས་ལམ་སྣེ་ཁྲིད་དེ་ཁུམ་བུའི་འཁྱག་རོམ་འཛེགས་ནས་རྐང་ལམ་དེ་ཞིག་གསོ་བྱེད་ཀྱི་ཡོད་པའི་དུས་སུ་འཁྱག་རོམ་ཉིལ།།
ཤར་པ་ནོར་བུ་ལྷག་པ་ནི་ཇོ་མོ་གླང་མའི་རི་འདབས་ཀྱི་གཞིས་སྒར་དང་ཧི་མ་ལ་ཡའི་ཉེན་སྐྱོབ་མཐུན་ཚོགས་ཀྱི་འབྲེལ་མཐུད་པ་ཡིན་ཞིང་། ཁོ་མོས་ཀ་ཐ་མན་རྡུ་ཡིག་ཟམ་ཚགས་པར་གྱི་གསར་འགོད་པར་འཁྱག་རོམ་མཐུག་ཚད་མཱི་ཊར་༥༠་ལྷག་གཞིས་སྒར་དང་པོའི་མན་ཆད་ཀྱི་མཱི་ཊར་༥༧༠༠་ཐམ་པའི་ཞབས་སུ་ཉིལ་ཏེ་ཤར་པ་ལམ་ཤན་པ་གསུམ་འཁྱག་རོམ་འོག་ཏུ་མནན་སོང་། དུས་ཚོད་འགྲོ་རིམ་བཞིན་ལམ་ཤན་པ་དེ་རྣམས་གསོན་པོར་རྙེད་རྒྱུའི་གོ་སྐབས་ཇེ་ཕྲ་རེད། ཁོ་ཚོ་འཁྱག་རོམ་མཐུག་ཚད་མཱི་ཊར་ལྔ་དྲུག་ཅིག་གི་འོག་ཏུ་མནན་ཡོད་སྲིད། འཁྱག་རོམ་གྱི་ཆེ་ཆུང་ནི་ཁང་པའི་ཆེ་ཆུང་ཡོད་པ་དང་འཁྱག་རོམ་བསྔོགས་ནས་མི་འཚོལ་རྒྱུ་དཀའ་ངལ་ཆེན་པོ་རེད། ཁོ་ཚོ་འཁྱག་རོམ་སྲུངས་སུ་ལྷུང་བ་མིན་པར་གངས་འོག་ཏུ་མནན་པ་ཡིན་པས་ཉེན་སྐྱོབ་ཐུབ་རྒྱུ་ཁག་པོ་རེད་ཅེས་རང་གི་ཉེན་སྐྱོབ་ཀྱི་ཆེད་ལས་ཉམས་མྱོང་ལ་གཞིགས་ནས་གསར་འགོད་པར་ལན་བཏབ།།
༢༠༡༤་ལོའི་ཕྱི་ཟླ་༤་པའི་ཚེས་༡༨་ཉིན་ཁུམ་བུ་ཁུལ་དུ་འཁྱག་རོམ་ཉིལ་ཏེ་ཤར་པ་ལམ་ཤན་པ་༡༦་གངས་འོག་ཏུ་མནན། ལོ་དེའི་གངས་འཛེག་གི་ནམ་ཟླ་ཚུགས་ཀྱང་གངས་འཛེག་པ་རྣམས་གངས་རི་འཛེགས་མ་ཐུབ། སྐབས་དེར་ཉི་མ་༢་ཀྱི་རྗེས་སུ་མི་༡༣་གྱི་ཕུང་པོ་རྙེད་ཀྱང་མི་གཞན་པ་༣་གྱི་ཕུང་པོ་མ་རྙེད། ད་ཐེངས་ཀྱི་འཁྱག་རོམ་ཉིལ་ཡུལ་ནི་༡༩༧༠་ཐམ་པའི་ལོར་ཆག་སྒོ་བྱུང་ས་དེ་ཡིན་ཞིང་། ༡༩༧༠་ཐམ་པ་ལོའི་ཕྱི་ཟླ་༤་པའི་ནང་ཁུམ་བུ་ཁུལ་གྱི་ཇོ་མ་གླང་མའི་འཁྱག་རོམ་ཉིལ་ནས་ཤར་པ་ལམ་ཤན་པ་༦་ལ་སྲོག་སྐྱོན་ཕོག ༢༠༡༥་ལོའི་ཕྱི་ཟླ་༤་པའི་ནང་ས་འགུལ་བརྒྱུགས་ཏེ་ཇོ་མོ་གླང་མའི་གངས་རི་ཉིལ་ནས་མི་༢༢་བསད། དེ་ནི་ཇོ་མོ་གླང་མའི་རི་འཛེག་གི་ལོ་རྒྱུས་ནང་གི་གོད་ཆག་ཚབས་ཆེ་ཤོས་སུ་གྱུར། ཧི་མ་ལ་ཡའི་གཞི་གྲངས་སུ་༡༩༥༣་ནས་༢༠༡༦་བར་དུ་མི་༤༤་ལ་ཇོ་མོ་གླང་མའི་སྟེང་དུ་སྲོག་སྐྱོན་བྱུང་བ་ཐོ་འགོད་བྱུང་ཡོད་པའི་གནས་ཚུལ་ཐོན་འདུག
