ཨུ་རུ་སུའི་འཐབ་འཛིན་གནམ་གྲུ་བདུན་རྩ་གཏོར།
༄༅།། ཨུ་རུ་སུའི་བཙན་བཟུང་འོག་ཏུ་ཚུད་པའི་ཁེ་རེ་མཱི་ཡ་གླིང་ཟུར་གྱི་གནམ་ཐང་ཞིག་ལ་འབར་གས་ཆེན་པོ་བྱུང་སྟེ་ཨུ་རུ་སུའི་འཐབ་འཛིན་གནམ་གྲུ་བདུན་རྩ་གཏོར་བཏང་ཡོད་པ་འཁོར་སྐར་གྱི་འདྲ་པར་ནང་དུ་གསལ། ཕྱི་ཟླ་༨་ཚེས་༡༡་ཉིན་སི་ཨེན་ཨེན་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། འདི་ནི་འཛམ་གླིང་དམག་ཆེན་གཉིས་པའི་རྗེས་སུ་ཉི་མ་གཅིག་ལ་ཨུ་རུ་སུའི་དམག་གི་གནམ་གྲུར་གཏོར་སྐྱོན་ཕོག་པ་ཚབས་ཆེ་ཤོས་དེ་ཡིན་སྲིད། གནམ་གྲུ་དེ་རྣམས་སུ་༢༤་རྟགས་ཅན་གྱི་མདེལ་འཕེན་གནམ་གྲུ་དང་སུ་༣༠་རྟགས་ཅན་གྱི་འཐབ་འཛིང་གནམ་གྲུ་རྣམས་ཡིན་པའི་བཟོ་ལྟ་འདུག་ཅེས་གནས་ཚུལ་སྤེལ། གྷེ་རི་ཧྥི་ཐེ་ཨེ་ཤི་ཡའི་ཞིབ་འཇུག་ཁང་གི་ཉམས་ཞིབ་པ་དང་ཨོ་གླིང་གི་གནམ་དམག་ཁོ་ལོ་བ་ཟུར་པ་ཕི་ཊར་ལེ་ཊོན་གྱིས་ས་ཀི་གནམ་ཐང་ལ་འབར་གས་མ་བྱུང་གོང་གི་འཁོར་སྐར་གྱི་འདྲ་པར་དང་འབར་གས་བྱུང་བའི་གཞུག་གི་འདྲ་པར་གཉིས་གཤིབ་སྡུར་བྱས་ནས་ཨུ་རུ་སུའི་དམག་གི་གནམ་གྲུ་དེ་དག་རིགས་གང་གང་ཡིན་མིན་ངོ་ཐག་བཅད། ཕི་ཊར་ལེ་ཊོན་གྱིས་ཨུ་རུ་སུའི་དམག་གི་གནམ་གྲུ་གཞན་པ་གཉིས་ལ་གཏོར་སྐྱོན་ཕོག་འདུག་ཅེས་བསྟན། ཁ་སང་གཟའ་ལྷག་པའི་ཉིན་ཡུཀ་རེན་གྱི་དམག་དཔུང་གིས་ཨུ་རུ་སུའི་དམག་གི་གནམ་གྲུ་༩་གཏོར་བ་ཡིན་ཞེས་གྲངས་ཐོ་ཞིག་བཏོན། ཡུཀ་རེན་གྱི་རྒྱལ་སྲུང་ལྷན་ཁང་གིས་ཁེ་རི་མཱི་ཡ་གླིང་ཟུར་གྱི་ཨུ་རུ་སུའི་དམག་སྒར་དེར་འབར་གས་བྱུང་བའི་རྒྱུ་རྐྱེན་ཅི་ཡིན་ཤེས་རྟོགས་བྱུང་མ་སོང་། གཅིག་བྱས་ན་ཨུ་རུ་སུའི་དབང་བསྒྱུར་ལ་ངོ་རྒོལ་དང་གྱེན་ལོག་བྱེད་མཁན་ཡུཀ་རེན་གྱི་རྒྱལ་གཅེས་རིང་ལུགས་པ་སྒེར་པ་ཚོས་གཏོར་རྒོལ་བྱས་པ་ཡིན་སྲིད་ཅེས་བསྒྲགས། ཨུ་རུ་སུའི་གཞུང་གིས་གནམ་ཐང་གི་མདེལ་མཛོད་ལ་མེ་སྐྱོན་བྱུང་ནས་འབར་གས་བྱུང་རེད་ཟེར། ཡིན་ནའང་མེ་སྐྱོན་བྱུང་དོན་ཅི་ཡིན་གསལ་བཀྲོལ་མ་བྱུང་།།
སྤྱི་ཚོགས་འདྲ་ལམ་དུ་ཁྱབ་པའི་བརྙན་འཕྲིན་དེར་སི་ཨེན་ཨེན་གསར་འགྱུར་ལས་ཁང་གིས་ཞིབ་འཇུག་བྱས་ནས་འབར་གས་བྱུང་ཡུལ་ས་ཆ་ངོས་འཛིན། ས་ཀི་གནམ་ཐང་དུ་དུད་སྤྲིན་ཆེན་པོ་གསུམ་འཁྲིགས་ནས་མཁའ་དབྱིངས་སུ་འཕྱུར། འབར་གས་ཆེན་པོ་གཉིས་ཅིག་ཅར་དུ་བྱུང་བ་དང་འབར་གས་གཅིག་སྐར་ཆ་འགའ་ཤས་ཀྱི་རྗེས་སུ་བྱུང་སྟེ་གནམ་ཐང་གི་མཐའ་འཁོར་གྱི་རྩི་ཤིང་རྣམས་མེར་འཚིགས། ཉམས་ཞིབ་པ་ཕི་ཊར་ལེ་ཊོན་གྱིས་འཁོར་སྐར་གྱིས་བླངས་པའི་འདྲ་པར་ལ་བལྟས་ན་འབར་གས་དེ་རྣམས་བསམ་བཞིན་གཏོར་རྒོལ་བྱས་ནས་བྱུང་བ་ལས་སྟེས་དབང་གིས་བྱུང་བ་ཞིག་མིན་པའི་རྟགས་མཚན་མི་འདུག ཅིའི་ཕྱིར་ཞེ་ན་འབར་གས་འབྱུང་ཡུལ་གྱི་ཤུལ་དོང་ཆེན་པོ་གསུམ་ཡོད་པ་དེ་རྣམས་ཆེད་མངགས་འབར་མདེལ་བཞག་ནས་ཤུལ་དོང་བྱུང་བ་རེད། དེའི་རྗེས་སུ་ཨུ་རུ་སུའི་མདེལ་མཛོད་ལ་མེ་ཚག་ཐོར་ནས་འབར་གས་བྱུང་བ་འདྲ། འབར་མདེལ་གཅིག་བཀད་ན་འཕྲལ་དུ་མེ་ཚག་ཐོར་ཏེ་ཉེ་འཁྲིས་ཀྱི་འབར་མདེལ་གཞན་རྣམས་འགད་ཀྱི་རེད། འདི་ལ་འགྱེད་ཁྱབ་འབར་གས་ཟེར་བ་དང་འདྲ་པར་ལ་བལྟས་ན་འབར་གས་ཀྱི་འབྱུང་ཁུངས་མ་འདྲ་བ་གསུམ་མཐོང་གི་འདུག འབར་གས་བྱུང་བའི་སྐབས་དེར་ཉེ་འཁོར་གྱི་དམག་གི་གནམ་གྲུ་དེ་ཚོར་འབར་མདེལ་བཏགས་ནས་འཐབ་འཁྲུག་གི་གྲ་སྒྲིག་བྱེད་ཡོད་པའི་རྟགས་མཚན་རེད། ཨུ་རུ་སུའི་མདེའུ་ལ་མེ་སྟག་ཐོར་ན་འགད་ཐོར་འགྲོ་སླ་ཞིང་། ད་ཐེངས་གནམ་ཐང་འདིར་གཏོར་གཏོར་ཕོག་པ་དང་ཡུཀ་རེན་གྱི་དམག་འཁྲུག་གི་མགོ་སྟོད་དེར་ཨུ་རུ་སུའི་མཚོ་དམག་གི་གཙུག་རྒྱན་ལྟ་བུའི་དམག་གྲུ་མོ་སི་ཀ་བྷ་ཞེས་པ་དེར་འཕུར་མདེལ་གཉིས་ཕོག་ནས་མཚོ་ནང་དུ་ཐིམ་པ་ནི་འདྲ་མཚུངས་རེད་ཅེས་བསྟན།།
ཨུ་རུ་སུའི་དམག་གྲུ་མོ་སི་ཀ་བྷར་གཏོར་རྒོལ་ཕོག་པའི་སྐབས་སུའང་གྲུ་ནང་གི་མདེའུ་རྣམས་བཀད། ནུབ་ཕྱོགས་ཀྱི་མཚོན་ཆ་སོགས་ལ་བསྡུར་ན་ཨུ་རུ་སུའི་མདེལ་མཚོན་རྣམས་གཏན་ནས་བདེ་འཇགས་མིན་པ་དང་འགད་འཐོར་འགྲོ་སླ་བ། ཉམས་ཞིབ་པ་ཕི་ཊར་ལེ་ཊོན་གྱིས་ཨུ་རུ་སུའི་འབར་མདེལ་རྣམས་རྙིང་དྲགས་པ་དང་སྔོན་མའི་ཨུ་རུ་སུ་དམར་ཤོག་གི་དུས་སུ་བཟོས་པའི་མདེལ་མཚོན་རེད། མདེལ་མཚོན་དེ་དག་གི་འཕྲུལ་རིག་ལག་རྩལ་རྣམས་ཧ་ཅང་གི་རྙིང་པ་དང་རྗེས་ལུས་རེད་ཅེས་མཐའ་སྡོམ་བརྒྱབ། ཨུ་རུ་སུའི་ཊ་སི་གསར་འགྱུར་ལས་ཁང་གིས་གནམ་ཐང་དེའི་ཉེ་འགྲམ་དུ་ཆགས་པའི་ཁང་ཆེན་འགའ་ཞིག་གི་སྒེའུ་ཁུང་རྣམས་བཅག་ནས་ཤེལ་སྒོ་ཐོར། ཁང་ཆེན་འགའ་ཞིག་ལ་གློག་ཆད། ཚོང་ཁང་དང་རིག་གཞུང་གི་ལྟེ་གནས་ཁག་ཅིག་ལ་གཏོར་བཤིག་ཕོག་ཡོད་པའི་བརྙན་འཕྲིན་བསྟན་ནས་གསར་འགྱུར་སྤེལ། འཁོར་སྐར་གྱིས་བླངས་པའི་འདྲ་པར་ནང་དུ་འདས་པའི་ཆུ་ཚོད་༢༤་རིང་ཨུ་རུ་སུའི་ཐད་ཕུར་གནམ་གྲུ་བཞི་དང་གནམ་གྲུ་གཞན་པ་བཞི་ས་གནས་གཞན་ལ་འཕུར་ཡོད་པའི་ཤུལ་སྟོང་རྣམས་མཐོང་རྒྱུ་ཡོད་ཅིང་། ༢༠༡༤་ལོར་ཨུ་རུ་སུའི་དམག་གིས་ཡུཀ་རེན་གྱི་ཁེ་རེ་མཱི་ཡ་གླིང་ཟུར་བཙན་གྱིས་ཕྲོགས། དེ་ནས་བཟུང་སྟེ་ཁེ་རེ་མཱི་ཡ་གླིང་ཟུར་གྱི་ས་ཀི་གནམ་ཐང་ནི་མཚོ་ནག་མངའ་ཁུལ་གྱི་ཨུ་རུ་སུའི་མཚོ་དམག་གི་དཔུང་སྡེ་གསུམ་པའི་གནམ་དམག་རུ་ཤོག་གི་རྟེན་གཞིར་གྱུར། ཁེ་རེ་མཱི་ཡ་གླིང་ཟུར་དུ་ཨུ་རུ་སུའི་སྐད་ཡིག་སྨྲ་བརྗོད་བྱེད་མཁན་མི་མང་སྟོང་ཕྲག་མང་པོ་ཡོད་པ་དེ་དག་གིས་ཕུ་ཊིན་གྱིས་དམག་དཔུང་བཏང་བར་དགའ་བསུ་ཞུས། ལོ་དེའི་ཕྱི་ཟླ་༣་པར་ཨུ་རུ་སུའི་གཞུང་གིས་ཁེ་རི་མཱི་ཡ་གླིང་ཟུར་ལ་མང་མོས་འོས་འདེམས་བྱས་ནས་ས་གནས་དེ་ཨུ་རུ་སུའི་མངའ་ཁོངས་སུ་ཟླ་སྒྲིལ་བྱ་རྒྱུའི་འོས་ཤོག་འཕངས། ཕུ་ཊིན་གྱིས་ཁེ་རེ་མཱི་ཡ་གླིང་ཟུར་ནི་ཨུ་རུ་སུའི་ཆ་ཤས་བསྙོན་མེད་ཅིག་ཡིན་ཞེས་བདག་ཏུ་བཟུང་། ཡུཀ་རེན་དང་རྒྱལ་སྤྱིའི་སྤྱི་ཚོགས་ནས་ཕུ་ཊིན་གྱི་གསལ་བསྒྲགས་དེ་ཁྲིམས་འགལ་རེད། ཁེ་རེ་མཱི་ཡ་གླིང་ཟུར་ནི་ཡུཀ་རེན་གྱི་མངའ་ཁོངས་ཡིན་པ་དང་ཡུཀ་རེན་ལ་ས་གནས་དེའི་ཁྲིམས་མཐུན་གྱི་བདག་དབང་ཡོད་པའི་རྩ་དོན་དེར་སྔར་བཞིན་བརྩི་འཇོག་ཞུས།།
ད་ལོའི་དམག་འཁྲུག་གི་མགོ་སྟོད་དེར་སྲིད་འཛིན་ཛེ་ལན་སི་ཀིས་ཡུཀ་རེན་གྱི་ཤར་ཕྱོགས་ཀྱི་ས་གནས་ཁག་ཅིག་དང་ཁེ་རེ་མཱི་ཡ་གླིང་ཟུར་གྱི་བདག་དབང་ཐོག་ཏུ་ཨུ་རུ་སུར་གྲོས་མོལ་བྱས་ནས་གུ་བཤངས་བྱེད་ཆོག་ཅེས་གྲོས་གཞི་བཏོན། ཕྱི་ཟླ་༨་ཚེས་༡༠་ཉིན་ཡུཀ་རེན་གྱི་སྲིད་འཛིན་ཛེ་ལན་སི་ཀིས་དུས་ཡུན་ཅི་ཙམ་འགོར་རྒྱུ་ཡིན་མིན་བཤད་ཁག་པོ་རེད། ཡིན་ནའང་ང་ཚོས་ངེས་པར་དུ་ཁེ་རེ་མཱི་ཡ་ནས་ཨུ་རུ་སུའི་བཙན་འཛུལ་དམག་དཔུང་མཐར་སྐྲོད་བཏང་སྟེ་གླིང་ཟུར་དེ་བཅིངས་འགྲོལ་གཏོང་རྒྱུ་ཡིན་ཞེས་གཏམ་བཤད་བྱས་ཤིང་། ཉམས་ཞིབ་པ་ཚོས་སྲིད་འཛིན་ཛེ་ལན་སི་ཀིས་ཁེ་རེ་མཱི་ཡ་བཅིངས་འགྲོལ་གཏོང་རྒྱུ་ཡིན་ཞེས་སྒྲོགས་ཐུབ་པའི་གདེང་ཚོད་གང་ནས་རྙེད་པ་རེད། འདི་ནི་ཡུཀ་རེན་གྱི་དམག་ས་ཁག་ཏུ་ཨུ་རུ་སུར་ཇུས་ཉེས་གཅིག་རྗེས་གཉིས་མཐུད་དུ་འབྱུང་གི་ཡོད་པ་དང་ཡུཀ་རེན་གྱི་དམིགས་བསལ་དཔུང་སྡེ་ཁེ་རེ་མཱི་ཡ་གླིང་ཟུར་དུ་སིམ་འཛུལ་བྱས་ནས་གཏོར་རྒོལ་བྱེད་ཐུབ་ཀྱི་ཡོད་པའི་རྟགས་མཚན་ཡིན་སྲིད་ཅེས་གནས་ཚུལ་སྤེལ། གཟའ་ཕུར་བུའི་ཉིན་ཧྥོར་བྷ་སི་གསར་འགྱུར་ལས་ཁང་གིས་ཟླ་བ་ལྔའི་དམག་འཁྲུག་གི་རིང་ཨུ་རུ་སུས་གཏོར་རྒོལ་བྱས་ནས་ཡུཀ་རེན་གྱི་གནམ་ཐང་ཞིག་ཏུ་དམག་གི་གནམ་གྲུ་གསུམ་གཏོར་འདུག ད་ལྟའི་བར་དུ་ཁྱོན་བསྡོམས་ཡུཀ་རེན་གྱི་དམག་གི་གནམ་གྲུ་༤༧་རྩ་གཏོར་བྱུང་བ་ངེས་གཏན་བྱེད་ཐུབ། དེ་བཞིན་ཡུཀ་རེན་གྱིས་ཕར་རྒོལ་བྱས་ནས་ཨུ་རུ་སུའི་དམག་གི་གནམ་གྲུ་༨༥་རྩ་གཏོར་བཏང་འདུག ཁ་སང་གཏོར་རྒོལ་ཕོག་པའི་གནམ་གྲུ་དེ་དག་སྤྱིའི་གྲངས་འབོར་ཁོངས་སུ་ཚུད་མེད། ཨུ་རུ་སུའི་གནམ་གྲུ་མང་ཆེ་བར་གནམ་ཐང་དུ་གཏོར་རྒོལ་ཕག་ནས་རྩ་ཐོར་ཕྱིན་ཡོད་པ་དང་དམག་གི་གནམ་གྲུར་གཏོར་རྒོལ་ཕོག་པའི་གྲངས་འབོར་དེ་ཨུ་རུ་སུ་ལ་མང་བ་འདུག ཡུཀ་རེན་གྱི་དམག་གིས་གསང་བའི་གནས་ཚུལ་དང་ཨ་མི་རི་ཀའི་ལམ་སྟོན་བྱས་པ་རྣམས་གཞི་རྩར་བཟུང་སྟེ་ཨུ་རུ་སུའི་གནམ་ཐང་ཁག་ལ་གཏོར་རྒོལ་བྱེད་ཀྱི་འདུག་ཅེས་གནས་ཚུལ་སྤེལ།།
ཕྱི་ཟླ་༨་པའི་ཚེས་༡༡་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུའི་དམག་དོན་མི་སྣ་ཚོ་སན་ཊི་ཕི་ཊར་སི་བྷག་གྲོང་ཁྱེར་གྱི་བཙོན་ཁང་ཁག་ཏུ་ཕྱིན་ནས་བཙོན་པ་ཚོ་དམག་ཁོངས་སུ་ཞུགས་ནས་ཡུཀ་རེན་གྱི་དམག་ས་ཁག་ཏུ་འགྲོ་འདོད་ཡོད་དམ། གལ་སྲིད་བཙོན་པ་རྣམས་དམག་སར་འགྲོ་འདོད་ཡོད་ན་ཉེས་ཡངས་གཏོང་རྒྱུའི་ཁག་ཐེག་བྱེད་ཆོག་ཅེས་དམག་སྐུལ་གྱི་ལས་སུ་ཞུགས། ཉིན་ཤས་རྗེས་སུ་བཙོན་པ་བཅུ་གྲངས་ཤིག་ཡུཀ་རེན་གྱི་དམག་སར་བསྐྱོད་རྒྱུའི་མོས་མཐུན་བྱས་པ་དང་བུད་མེད་ཅིག་གིས་ངའི་དགའ་རོགས་སན་ཊི་ཕི་ཊན་སི་བྷག་གྲོང་ཁྱེར་གྱི་བཙོན་ཁང་དུ་ཡོད། ཁོ་པ་དམག་སར་འགྲོ་རྒྱུའི་མོས་མཐུན་བྱས་ཀྱང་དང་བླངས་བྱས་པ་ཞིག་མ་རེད། ངའི་དགའ་རོགས་ཀྱིས་ལོ་མང་རིང་བཙོན་འཇུག་གི་ཉེས་ཆད་འཁུར་དགོས་པས་དམག་སར་བསྐྱོད་རྒྱུའི་གདམ་ཀ་དེར་བསམ་བློ་མ་བཏང་ཀ་མེད་དུ་གྱུར་པ་རེད་ཅེས་གསར་འགོད་པར་ནང་མོལ་བྱས་འདུག ཡུཀ་རེན་གྱི་དམག་ས་ཁག་ཏུ་ཨུ་རུ་སུའི་དམག་མིར་བསད་རྨས་ཚབས་ཆེན་འཕོག་གི་ཡོད་པས་དམག་མི་གསར་པ་བསྡུ་མ་ཐུབ་པའི་དཀའ་ངལ་འཕྲད། ཕུ་ཊིན་གྱིས་ཡུཀ་རེན་ལ་དམག་བཏང་དེ་བཙན་འཛུལ་མིན། དེ་ནི་དམིགས་བསལ་གྱི་དམག་དོན་ལས་འགུལ་ཞིག་ཡིན་ཞེས་འགྲེལ་བཤད་རྒྱག་གི་ཡོད་པས་རྒྱལ་ཡོངས་སུ་དམག་སྐུལ་ཆེན་པོ་ཞིག་བྱེད་ཐབས་མེད་པར་གྱུར། ཨུ་རུ་སུའི་ས་གནས་ཁག་༢༠་ཐམ་པས་དང་བླངས་དམག་དཔུང་ཐོ་འགོད་བྱ་ཡུལ་༤༠་ལྷག་སྒོ་ཕྱེ། ན་གཞོན་ཚོ་དང་བླངས་དམག་ཁོངས་སུ་ཞུགས་ན་ཟླ་བ་རེར་ཨ་སྒོར་༢༡༥༠་ནས་ཨ་སྒོར་༥༠༠༠་ཡས་མས་རེ་གླ་ཕོགས་སྤྲོད་ཆོག་ཅེས་གསལ་བསྒྲགས་བཀྲམ། དམག་ཁྲལ་བའི་ཁྲིམས་རྩོད་པ་ཨ་ལེཀ་སེ་ཏ་བྷ་ལོབ་ཀྱིས་སྔོན་ནས་དམག་སར་བཏང་ཟིན་པ་རྣམས་དང་ཉེ་ཆར་གན་རྒྱ་བཞག་ནས་དམག་སར་བཏང་བ་མང་ཆེ་བས་རང་ཡུལ་དུ་ཕྱིར་ལོག་བྱ་ཐབས་ཅི་ཞིག་འདུག་ཅེས་ང་ལ་སྐད་ཆ་འདྲི་ཡི་འདུག ཨུ་རུ་སུའི་རྒྱལ་སྲུང་ལྷན་ཁང་དམག་མི་གསར་པ་གཏོང་རྒྱུ་མ་རྙེད་པར་དཀའ་ངལ་ནང་དུ་ཚུད་འདུག་ཅེས་འགྲེལ་བརྗོད་བྱས་འདུག
གཟའ་འཁོར་འདིར་དབྱིན་ཇིའི་དམག་དོན་ཁང་གིས་མཉམ་འབྲེལ་གསར་ཁང་ལ་ཨུ་རུ་སུའི་རྒྱལ་སྲུང་ལྷན་ཁང་གིས་དང་བླངས་པའི་སྟོང་སྡེ་ཞེས་རུ་ཤོག་གསར་པ་ཞིག་བཙུགས། སློབ་འབྲིང་ཐོན་པའི་ཤེས་ཚད་ལས་མེད་པ་དང་ལོ་ན་༥༠་ཡས་མས་སུ་སོན་ཡོད་ཀྱང་གླ་ཕོགས་དང་གསོལ་རས་སོགས་སྤྲད་ནས་དམག་ལ་གཏོང་གི་འདུག ཁོ་ཚོར་ཉིན་ཤས་རིང་དམག་སྦྱོང་སྤྲད་པའི་རྗེས་སུ་ཡུཀ་རེན་ལ་གྱི་དམག་ས་ཁག་ཏུ་འགྲོ་དགོས་པ་རེད་ཅེས་གནས་ཚུལ་སྤེལ། ཨུ་རུ་སུའི་དམག་མི་ཁག་ཅིག་གིས་ཐོག་མར་ཁས་ལེན་བྱས་པའི་གླ་ཕོགས་རྣམས་རག་གི་མི་འདུག གན་རྒྱའི་དུས་ཡུན་རྫོགས་ཀྱང་དམག་ས་ནས་རང་ཁྱིམ་ལ་ཕྱིར་ལོག་བྱེད་དུ་འཇུག་གི་མི་འདུག་ཅེས་འཁང་ར་བཤད། མཉམ་འབྲེལ་གསར་ཁང་གིས་འཁང་ར་དེ་རྣམས་དངོས་བདེན་ཡིན་མིན་ངེས་གཏན་བྱ་ཐབས་བྲལ། ཁྲིམས་རྩོད་པ་ཏ་བྷ་ལོབ་ཀྱིས་ང་ལ་ཕྱི་ཟླ་༨་པའི་མགོ་སྟོད་དེར་ཟླ་བ་གཉིས་ཀྱི་དམག་སྦྱོང་ལ་འགྲོ་འདོད་མེད། དེ་ལ་ཁྲིམས་ཐོག་ཏུ་རྩོད་པ་རྒྱག་ས་ཡོད་མེད་ལམ་སྟོན་གནང་དགོས་པའི་འབོད་སྐུལ་ཞུ་མཁན་མང་པོ་ཞིག་བྱུང་སོང་ཞེས་གསར་འགོད་པའི་དྲི་བར་ལན་བཏབ། ཨུ་རུ་སུའི་བཙོན་པའི་འགྲོ་བ་མིའི་ཐོབ་ཐང་ཚོགས་པ་རྩ་འཛུགས་པ་ཨོ་སེ་ཆི་ཀིན་གྱིས་བཙོན་པ་དང་བཙོན་པའི་གཉེན་ཉེ་སོགས་ལ་འབྲེལ་བ་བྱས་ནས་ཤེས་རྟོགས་བྱུང་བར་གཞིགས་ན། ཨུ་རུ་སུའི་གཞུང་གི་ལས་སྣེ་ཚོ་ས་གནས་བདུན་གྱི་བཙོན་ཁང་ཁག་ཏུ་ཕྱིན་ཏེ་བཙོན་པ་ཚོར་ཉེས་ཡངས་བཏང་ནས་ཡུཀ་རེན་གྱི་དམག་ས་ཁག་ཏུ་གཏོང་ཐབས་བྱེད་ཀྱི་ཡོད་པའི་གནས་ཚུལ་ཐོན་འདུག
