༄༅།། ཨ་རབ་རྒྱལ་ཁབ་སོ་ཌི་ཨ་རེ་བྷི་ཡའི་ས་ཐོག་ཏུ་ཨུ་རུ་སུའི་བཙན་འཛུལ་དམག་འཁྲུག་མཚམས་འཇོག་ཡོང་ཐབས་སུ་ཡུཀ་རེན་གྱིས་ཞི་བདེའི་ཚོགས་འདུ་ཞིག་བསྐོང་རྒྱུའི་གསལ་བསྒྲགས་སྤེལ་འདུག ཕྱི་ཟླ་༧་པའི་ཚེས་༣༠་ཉིན་མཉམ་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། མིང་འདོན་དངོས་སུ་མ་བྱས་པའི་སོ་ཌི་ཨ་རེ་བྷི་ཡའི་གཞུང་འབྲེལ་མི་སྣ་ཞིག་གིས་ཟླ་བ་རྗེས་མར་མཚོ་དམར་འགྲམ་གྱི་ཇཱེ་ཌ་གྲོང་ཁྱེར་དུ་ཡུཀ་རེན་གྱི་དམག་འཁྲུག་མཚམས་འཇོག་ཐུབ་ཐབས་སུ་ཞི་བའི་གྲོས་མོལ་ཚོགས་འདུ་ཞིག་ཡུཀ་རེན་གྱིས་བསྐོང་གི་འདུག ཚོགས་འདུ་དེར་ཨུ་རུ་སུའི་སྐུ་ཚབ་མགྲོན་འབོད་བྱས་མི་འདུག་ཅེས་བསྒྲགས། ཡུཀ་རེན་གྱི་སྲིད་འཛིན་ལས་ཁུངས་ཀྱི་མགྲིན་ཚབ་པ་ཨན་ཌི་རི་ཡར་མག་གིས་སོ་ཌི་ཨ་རེ་བྷི་ཡའི་ས་ཐོག་ཏུ་ཞི་བདེའི་ཚོགས་འདུ་ཞིག་འཚོགས་ཀྱི་ཡོད། ཡུཀ་རེན་གྱི་ཞི་བདེའི་གྲོས་མོལ་འདིར་འགག་རྩའི་དོན་ཚན་བཅུ་ཡོད། དེ་ནི་ཡུཀ་རེན་གྱི་ཞི་བདེ་འགན་ལེན་དང་མ་འོངས་པར་འཛམ་གླིང་ཡོངས་སུ་དམག་འཁྲུག་འདི་འདྲ་མི་འབྱུང་བའི་ཐབས་ལམ་རྣམས་བཀོད་ཡོད་ཅེས་བསྟན།།
སྔོན་ཆད་ཡུཀ་རེན་གྱིས་བཏོན་པའི་ཞི་བའི་གྲོལ་གཞི་དེར་རྒྱལ་ཁབ་དེའི་མངའ་ཁོངས་གོང་བུ་གཅིག་གྱུར་སླར་གསོ་དང་ཨུ་རུ་སུའི་དམག་དཔུང་ཕྱིར་འཐེན། བཟུང་དམག་བཙོན་པ་རྣམས་གློད་གྲོལ། བཙན་འཛུལ་དམག་འཁྲུག་བསླངས་པའི་ཉེས་ཅན་ཚོར་དམིགས་བསལ་ཁྲིམས་ཁང་ཞིག་བཙུགས་ནས་ཁྲིམས་ལ་སྦྱོར་དགོས། ཡུཀ་རེན་གྱི་བདེ་འཇགས་སྲུང་སྐྱོབ་ལ་འགན་ལེན་བྱ་དགོས་ཞེས་དོན་ཚན་ཁག་འདུས། རྒྱ་ནག་དང་ཡེ་ཤུའི་གནམ་བདག་ཆོས་ལུགས་ཀྱི་དབུ་ཁྲིད་བླ་ཆེན་ཕོབ་མཆོག ཨ་ཧྥི་རི་ཀ་མཉམ་འབྲེལ་བཅས་ཀྱིས་ཡུཀ་རེན་གྱི་དམག་འཁྲུག་མཚམས་འཇོག་གི་ཞི་བའི་གྲོས་གཞི་རེ་བཏོན། ཡུཀ་རེན་གྱི་ཞི་བདེའི་ཚོགས་འདུ་དེར་ཡུཀ་རེན་དང་བྷར་ཛིལ། ལྷོ་ཨ་ཧྥི་རི་ཀ་དང་རྒྱ་གར། ཨ་རིའི་གཞུང་གི་མཐོ་རིམ་སྐུ་ཚབ་ཚོགས་པ་ཞིག་བཅས་རྒྱལ་ཁབ་འགའ་ཞིག་གི་སྐུ་ཚབ་རྣམས་མཉམ་ཞུགས་བྱེད་ཀྱི་ཡོད་པའི་གནས་ཚུལ་ཐོན། ཝོལ་སི་ཊི་རི་ཊི་འཇར་ནལ་ཚགས་པར་ལ་ཡུཀ་རེན་གྱི་ཞི་བདེའི་ཚོགས་འདུ་དེ་ཕྱི་ཟླ་༨་པའི་ཚེས་༥་དང་༦་གཉིས་ལ་འཚོགས་ཀྱི་ཡོད་པ་དང་རྒྱལ་ཁབ་༣༠་ཐམ་པའི་སྐུ་ཚབ་རྣམས་ཕེབས་ཀྱི་འདུག་ཅེས་གནས་ཚུལ་སྤེལ།།
ཕྱི་ཟླ་༧་པའི་ཚེས་༣༠་ཉིན་ཨ་རིའི་པོ་ལི་ཊི་ཀོ་གསར་ཁང་གིས་གནས་ཚུལ་སྤེལ་བ་ལྟར་ན། ཨུ་རུ་སུའི་སྲིད་འཛིན་ཕུ་ཊིན་གྱིས་རྒྱལ་ས་རྙིང་པ་སན་ཊི་ཕི་ཊར་སི་བྷག་གྲོང་ཁྱེར་དུ་ཨ་ཧྥི་རི་ཀའི་རྒྱལ་ཁབ་ཁག་ཅིག་གི་འགོ་ཁྲིད་ཚོར་ཐུག་འཕྲད་བྱས་ཤིང་། ཕུ་ཊིན་གྱིས་རྒྱ་ནག་དང་ཨ་ཧྥི་རི་ཀ་མཉམ་འབྲེལ་གྱིས་བཏོན་པའི་ཞི་བའི་གྲོས་གཞི་དེ་ཡུཀ་རེན་གྱི་དམག་འཁྲུག་མཇུག་སྒྲིལ་བའི་ཞི་རྩའི་ཐབས་ཇུས་དེར་འཛིན་བྱེད་ཆོག ཡིན་ནའང་ཡུཀ་རེན་གྱི་ཚུར་རྒོལ་བྱེད་ཀྱི་ཡོད་པའི་སྐབས་འདིར་མེ་འཕེན་མཚམས་འཇོག་ཡོང་ཐབས་བྲལ། ཡུཀ་རེན་གྱི་དམག་གིས་ཚུར་རྒོལ་བྱེད་ཀྱི་ཡོད་པ་དང་ང་ཚོར་གཏོར་རྒོལ་འཕོག་གི་ཡོད་པ་རེད། ཁོ་ཚོས་ཚུར་རྒོལ་རྒྱ་ཆེན་པོ་ཞིག་བྱེད་ཀྱི་འདུག ང་ཚོར་རྒོལ་རྡུང་འཕོག་གི་ཡོད་པའི་སྐབས་འདིར་མེ་འཕེན་མཚམས་འཇོག་བྱེད་མི་ཐུབ། ང་ཚོས་ཞི་བའི་གྲོས་མོལ་ལ་དགག་པ་རྒྱག་གི་མེད་པ་དང་ཞི་བའི་གྲོས་མོལ་དེ་འགོ་འཛུགས་པར་ཕྱོགས་གཉིས་ཀ་གྲོས་མཐུན་འབྱུང་དགོས་ཞེས་ཞི་བའི་གྲོས་མོལ་གཏན་ནས་བྱ་རྒྱུ་མིན་པའི་ཐག་མ་བཅད།།
ཕུ་ཊིན་གྱིས་ཨ་ཧྥི་རི་ཀའི་རྒྱལ་ཁབ་༥༢་ཀྱི་འགོ་ཁྲིད་ཚོ་སན་ཊི་ཕི་ཊར་སི་བྷག་གྲོང་ཁྱེར་དུ་ཚོགས་འདུར་གདན་འདྲེན་ཞུས་ཀྱང་རྒྱལ་ཁབ་༡༧་ཀྱི་འགོ་ཁྲི་ཚོ་མ་གཏོགས་མ་བསླེབས། ཆ་ཌི་རྒྱལ་ཁབ་ཀྱི་ཕྱི་སྲིད་བློན་ཆེན་དང་ཨ་ཧྥི་རི་ཀ་མཉམ་འབྲེལ་གྱི་ཚོགས་གཙོ་མུ་ས་ཧྥ་ཀི་མ་ཧ་མ་ཏས་དམག་འཁྲུག་འདི་ངེས་པར་དུ་མཚམས་འཇོག་བྱ་དགོས་པ་དང་དྲང་བདེན་དང་གནས་ལུགས་ལ་གཞི་བཅོལ་ནས་དམག་འཁྲུག་འདི་མཇུག་བསྒྲིལ་བྱ་དགོས་ཞེས་ཕུ་ཊིན་ལ་ནན་བརྗོད་བྱས་པར་མ་ཟད། ཀོང་གོའི་སྲིད་འཛིན་གྱིས་ཀྱང་ཨ་ཧྥི་རི་ཀ་མཉམ་འབྲེལ་གྱིས་བཏོན་པའི་ཞི་བའི་གྲོས་འཆར་དེར་དོ་སྣང་བྱེད་འོས་པའི་རིན་ཐང་ཡོད། གྲོས་གཞི་དེར་སྣང་ཆུང་གཏན་ནས་གཏོང་མི་ཉན། ང་ཚོས་ཡུ་རོབ་གླིང་ལ་ཞི་བདེ་སླར་གསོ་བྱ་དགོས་པའི་འབོད་སྐུལ་ཞུ་ཡི་ཡོད་ཅེས་གཏམ་བཤད་བྱས་འདུག སི་ན་གྷལ་གྱི་སྲིད་འཛིན་དང་ལྷོ་ཨ་ཧྥི་རི་ཀའི་སྲིད་འཛིན་གཉིས་ནས་འཐབ་འཁྲུག་གི་ཛ་དྲག་ཆུང་དུ་གཏོང་རྒྱུ་དང་ལྷག་བསམ་རྣམ་དག་གིས་ཞི་བའི་གྲོས་མོལ་བྱས་ནས་དམག་འཁྲུག་མཇུག་བསྒྲིལ་བྱ་དགོས་ཞེས་འབོད་སྐུལ་ཞུས།།
ཕྱི་ཟླ་༧་པའི་ཚེས་༣༡་ཉིན་ཨ་རིའི་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཕུ་ཊིན་གྱིས་ཕྱི་ཟླ་༧་པའི་ཚེས་༢༧་ཉིན་ཚོགས་པའི་ཨུ་རུ་སུ་དང་ཨ་ཧྥི་རི་ཀ་མཉམ་འབྲེལ་གྱི་ཚོགས་འདུའི་ཐོག་ཏུ་ཡུཀ་རེན་གྱི་འབྲུ་རིགས་མེད་ཀྱང་ཁྱད་པར་མེད། ད་ལོ་ཨུ་རུ་སུར་ལོ་ལེགས་བྱུང་ཡོད་པ་དང་ཨ་ཧྥི་རི་ཀའི་རྒྱལ་ཁབ་ཁག་ལ་ཨུ་རུ་སུའི་འབྲུ་རིགས་ཕྱིར་ཚོང་བྱ་དགོས། མ་འོངས་པའི་ཟླ་བ་བཞིའི་ནང་ཚུད་དུ་བྷུར་ཀི་ན་ཧྥ སོ་དང་ཛིམ་བྷབ་ཝེ། མ་ལི་དང་སོ་མ་ལི་ཡ། ཨི་རེ་ཊེ་རི་ཡ་དང་དབུས་ཨ་ཧྥི་རི་ཀ་སྤྱི་མཐུན་རྒྱལ་ཁབ་ཅེས་ཨ་ཧྥི་རི་ཀའི་རྒྱལ་ཁབ་༦་ལ་འབྲུ་རིགས་ཊོན་༢༥༠༠༠་ནས་༥༠༠༠༠་ཡས་མས་ཤིག་རིན་མེད་དུ་སྤྲོད་རྒྱུ་ཡིན་ཞེས་ཁས་བླངས། མཉམ་འབྲེལ་རྒྱལ་ཚོགས་ཀྱི་ཟ་འབྲུ་འདུ་འགོད་ལྷན་ཁང་གིས་བཀྲེས་ལྟོགས་མྱོང་བཞིན་པའི་ཨ་ཧྥི་རི་ཀའི་རྒྱལ་ཁབ་ཁག་ལ་འབྲུ་རིགས་ཊོན་༧༢༥༠༠༠་མཁོ་འགྲེམ་བྱེད་ཀྱི་ཡོད་ཅིང་། ཨུ་རུ་སུས་མཚོ་ལམ་བཀག་ནས་ཡུཀ་རེན་གྱི་འབྲུ་རིགས་ཕྱིར་ཚོང་བྱེད་དུ་འཇུག་གི་མེད་པས་ཨ་ཧྥི་རི་ཀའི་རྒྱལ་ཁབ་ཁག་ལ་མུ་གེ་འབྱུང་རྒྱུའི་ཉེན་ཁ་ཡོད་པའི་གནས་ཚུལ་ཐོན།།
མཉམ་འབྲེལ་གསར་ཁང་གིས་མུ་མཐུད་དུ་གནས་ཚུལ་སྤེལ་བ་ལྟར་ན། བདུན་ཕྲག་སྔོན་མའི་གཟའ་ཕུར་བུའི་ཉིན་ཨ་རིའི་རྒྱལ་སྲུང་སློབ་སྟོན་པ་ཇཱེག་སུ་ལི་ཝན་སོ་ཌི་ཨ་རེ་བྷི་ཡར་ཕེབས་པའི་རྗེས་སུ་ཡུཀ་རེན་གྱི་ཞི་བདེའི་ཚོགས་འདུ་ཞིག་བསྐོང་རྒྱུའི་གསར་འགྱུར་ཐོན། སོ་ཌི་ཨ་རེ་བྷི་ཡའི་གཞུང་འབྲེལ་མི་སྣ་དེས་ཟླ་བ་སྔོན་མར་སུད་ཌེན་གྱི་རྒྱལ་ས་ཀོ་པན་ཧེ་གྷན་དུ་ཡུཀ་རེན་གྱི་ཞི་བའི་ཚོགས་འདུ་ཐེངས་དང་པོ་ཚོགས། སོ་ཌི་ཨ་རེ་བྷི་ཡར་འཚོགས་ཀྱི་ཡོད་པ་འདི་ཚོགས་འདུ་ཐེངས་གཉིས་པ་རེད་ཅེས་བཀྲལ། ཉེ་ཆར་ཕྱི་ཟླ་༥་པའི་ནང་ཇཱེ་ཌར་གྲོང་ཁྱེར་དུ་ཨ་རབ་ཡུལ་གྲུ་མཉམ་འབྲེལ་མཐུན་ཚོགས་ཀྱི་ཚོགས་འདུ་ཚོགས་པ་དང་ཡུཀ་རེན་གྱི་སྲིད་འཛིན་ཛེ་ལན་སི་ཀི་ཚོགས་འདུ་དེར་ཞུགས། ཁོང་གིས་ཨ་རབ་རྒྱལ་ཁབ་ཁག་གིས་ཡུཀ་རེན་ལ་རྒྱབ་སྐྱོར་བྱ་དགོས་ཞེས་ནན་གྱིས་བསྐུལ། ཨ་རབ་རྒྱལ་ཁབ་ཁག་དམག་དོན་དང་དཔལ་འབྱོར་ཐོག་ཏུ་ཨུ་རུ་སུར་འབྲེལ་བ་དམ་ཟབ་ཡོད་པས་༢༠༢༢་ལོའི་ཕྱི་ཟླ་༢་པའི་ཚེས་༢༤་ཉིན་ཨུ་རུ་སུས་དམག་དྲངས་ནས་ཡུཀ་རེན་ལ་བཙན་འཛུལ་བྱས་ཀྱང་ཨ་རབ་རྒྱལ་ཁབ་ཁག་གིས་ཁ་རྡུང་མ་བཏང་བར་བཏང་སྙོམས་སུ་བསྡད།།
སོ་ཌི་ཨ་རེ་བྷི་ཡ་དང་ཨུ་རུ་སུ་གཉིས་ཀ་རྒྱལ་སྤྱིའི་རྡོ་སྣུམ་ཕྱིར་ཚོང་མཐུན་ཚོགས་ཀྱི་ཚོགས་འཐུས་རྒྱལ་ཁབ་ཡིན་ཞིང་། ཨུ་རུ་སུས་ཡུཀ་རེན་ལ་བཙན་འཛུལ་བྱས་ནས་རྡོ་སྣུམ་ཐོན་སྐྱེད་ཉུང་དུ་བཏང་སྟེ་རྡོ་སྣུམ་གྱི་རིན་གོང་འཕར། ཨ་རིའི་སྲིད་འཛིན་ཇཱོ་བྷ་ཌན་དང་གྲོས་ཚོགས་འཐུས་མི་ཚོ་ཁོང་ཁྲོས་བརྟས། སོ་ཌི་ཨ་རེ་བྷི་ཡའི་ཁྲི་འཛིན་རྒྱལ་སྲས་མོ་ཧ་མེ་དཱ་བྷིན་སལ་མན་གྱིས་ཨི་རན་ལ་འབྲེལ་བ་བཙུགས་ནས་ཡེ་མན་གྱི་ནང་འཁྲུག་མཚམས་འཇོག་གི་གྲོས་མོལ་མགོ་བརྩམས། ད་ལྟ་སོ་ཌི་ཨ་རེ་བྷི་ཡའི་ས་ཐོག་ཏུ་ཡུཀ་རེན་གྱི་ཞི་བདེའི་ཚོགས་འདུ་ཞིག་འཚོགས་འཆར་ཡོད་པས་ཁྲི་འཛིན་རྒྱལ་སྲས་བིན་སལ་མན་གྱི་མཚན་སྙན་རྒྱས་པར་ཕན་ཐོགས་འབྱུང་སྲིད། ༢༠༡༨་ལོར་སོ་ཌིའི་གཞུང་གིས་ཝ་ཤིང་ཊོན་ཡིག་ཟམ་ཚགས་པར་གྱི་གསར་འགོད་པ་ཇཱ་མལ་ཁ་ཤོ་ཇཱི་བསད་པའི་རྗེས་སུ་ནུབ་ཕྱོགས་རྒྱལ་ཁབ་ཁག་དང་སོ་ཌི་ཨ་རེ་བྷི་ཡའི་འབྲེལ་བ་སྡུག་ཏུ་སོང་།།
ཕྱི་ཟླ་༧་པའི་ཚེས་༣༠་ཉིན་རོ་ཡེ་ཊར་སི་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ཁ་སང་གཟའ་ཉི་མའི་ཉིན་ཨུ་རུ་སུའི་སྲིད་འཛིན་ཟུར་པ་མེ་ཌ་ཝེ་ཌེབ་ནས་ཡུཀ་རེན་ལ་ནུབ་ཆིངས་ཀྱིས་རྒྱབ་སྐྱོར་བྱེད་ཀྱི་ཡོད་པ་རེད། ཡུཀ་རེན་ལ་རྒྱལ་ཁ་ཐོབ་ན་ང་ཚོའི་ས་ཆ་དུམ་བུ་ཞིག་འཆོར་རྒྱུ་ཡིན་པས་ང་ཚོས་རྡུལ་ཕྲན་མཚོན་ཆ་བཀོལ་སྤྱོད་བྱས་ནས་རང་གི་མངའ་ཁོངས་གོང་བུ་གཅིག་གྱུར་ལ་སྲུང་སྐྱོབ་བྱ་དགོས་ངེས་རེད། ང་ཚོར་གདམ་ཀ་གཞན་པ་མེད་པ་དང་དགྲ་ཕྱོགས་ནས་ཨུ་རུ་སུའི་དམག་ལ་རྒྱལ་ཁ་ཐོབ་པར་ཤོག་ཅེས་སྨོན་ལམ་ཐོབས། ང་ཚོས་རྡུལ་ཕྲན་མཚོན་ཆ་བཀོལ་སྤྱོད་བྱེད་མི་དགོས་པའི་རེ་བ་ཡོད་ཅེས་སྡིགས་ར་བསྐུལ། ཉིན་ཤས་གོང་ནས་ཡུཀ་རེན་གྱིས་དམག་དཔུང་མང་དུ་བཏང་སྟེ་ཕར་རྒོལ་གྱི་སྟོབས་ཤུགས་ཆེ་རུ་བཏང་ཞིང་། སྲིད་འཛིན་ཛེ་ལན་སི་ཀིས་ཡུཀ་རེན་གྱི་སྟོབས་ཤུགས་ཆེ་རུ་འགྲོ་བཞིན་ཡོད་པ་དང་རིམ་བཞིན་དམག་འཁྲུག་དེ་ཨུ་རུ་སུའི་ས་ཐོག་ཏུ་ཁྱབ་ཀྱི་རེད། དེ་ནི་ཆོས་ཉིད་ལ་མཐུན་པ་ཞིག་རེད་ཅེས་གཏམ་བཤད་བྱས་འདུག གཟའ་མཇུག་དེར་ཨུ་རུ་སུའི་རྒྱལ་ས་མོ་སི་ཀོའི་ཁང་ཆེན་ཞིག་ལ་ཁ་ལོ་བ་མེད་པའི་འཕུར་གྲུ་ཞིག་གིས་གཏོར་རྒོལ་བྱས་པའི་གནས་ཚུལ་ཐོན་འདུག
